| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. அக்கோஸஸுத்தவண்ணனா
2. Akkosasuttavaṇṇanā
188. து³தியே அக்கோஸகபா⁴ரத்³வாஜோதி பா⁴ரத்³வாஜோவ ஸோ, பஞ்சமத்தேஹி பன கா³தா² ஸதேஹி ததா²க³தங் அக்கோஸந்தோ ஆக³தோதி. ‘‘அக்கோஸகபா⁴ரத்³வாஜோ’’தி தஸ்ஸ ஸங்கீ³திகாரேஹி நாமங் க³ஹிதங். குபிதோ அனத்தமனோதி ‘‘ஸமணேன கோ³தமேன மய்ஹங் ஜெட்ட²கபா⁴தரங் பப்³பா³ஜெந்தேன ஜானி கதா, பக்கோ² பி⁴ன்னோ’’தி கோதே⁴ன குபிதோ தோ³மனஸ்ஸேன ச அனத்தமனோ ஹுத்வாதி அத்தோ². அக்கோஸதீதி ‘‘சோரோஸி, பா³லோஸி, மூள்ஹோஸி, தே²னோஸி, ஒட்டோ²ஸி, மெண்டோ³ஸி, கோ³ணோஸி, க³த்³ரபோ⁴ஸி, திரச்சா²னக³தோஸி, நேரயிகோஸீ’’தி த³ஸஹி அக்கோஸவத்தூ²ஹி அக்கோஸதி. பரிபா⁴ஸதீதி ‘‘ஹோது முண்ட³கஸமணக, ‘அத³ண்டோ³ அஹ’ந்தி கரோஸி, இதா³னி தே ராஜகுலங் க³ந்த்வா த³ண்ட³ங் ஆரோபெஸ்ஸாமீ’’திஆதீ³னி வத³ந்தோ பரிபா⁴ஸதி நாம.
188. Dutiye akkosakabhāradvājoti bhāradvājova so, pañcamattehi pana gāthā satehi tathāgataṃ akkosanto āgatoti. ‘‘Akkosakabhāradvājo’’ti tassa saṅgītikārehi nāmaṃ gahitaṃ. Kupito anattamanoti ‘‘samaṇena gotamena mayhaṃ jeṭṭhakabhātaraṃ pabbājentena jāni katā, pakkho bhinno’’ti kodhena kupito domanassena ca anattamano hutvāti attho. Akkosatīti ‘‘corosi, bālosi, mūḷhosi, thenosi, oṭṭhosi, meṇḍosi, goṇosi, gadrabhosi, tiracchānagatosi, nerayikosī’’ti dasahi akkosavatthūhi akkosati. Paribhāsatīti ‘‘hotu muṇḍakasamaṇaka, ‘adaṇḍo aha’nti karosi, idāni te rājakulaṃ gantvā daṇḍaṃ āropessāmī’’tiādīni vadanto paribhāsati nāma.
ஸம்பு⁴ஞ்ஜதீதி ஏகதோ பு⁴ஞ்ஜதி. வீதிஹரதீதி கதஸ்ஸ படிகாரங் கரோதி. ப⁴க³வந்தங் கோ², கோ³தமந்தி கஸ்மா ஏவமாஹ? ‘‘தவேவேதங், ப்³ராஹ்மண, தவேவேதங், ப்³ராஹ்மணா’’தி கிரஸ்ஸ ஸுத்வா. ‘‘இஸயோ நாம குபிதா ஸபனங் தெ³ந்தி கிஸவச்சா²த³யோ வியா’’தி அனுஸ்ஸவவஸேன ‘‘ஸபதி மங் மஞ்ஞே ஸமணோ கோ³தமோ’’தி ப⁴யங் உப்பஜ்ஜி. தஸ்மா ஏவமாஹ.
Sambhuñjatīti ekato bhuñjati. Vītiharatīti katassa paṭikāraṃ karoti. Bhagavantaṃ kho, gotamanti kasmā evamāha? ‘‘Tavevetaṃ, brāhmaṇa, tavevetaṃ, brāhmaṇā’’ti kirassa sutvā. ‘‘Isayo nāma kupitā sapanaṃ denti kisavacchādayo viyā’’ti anussavavasena ‘‘sapati maṃ maññe samaṇo gotamo’’ti bhayaṃ uppajji. Tasmā evamāha.
த³ந்தஸ்ஸாதி நிப்³பி³ஸேவனஸ்ஸ. தாதி³னோதி தாதி³லக்க²ணங் பத்தஸ்ஸ. தஸ்ஸேவ தேன பாபியோதி தஸ்ஸேவ புக்³க³லஸ்ஸ தேன கோதே⁴ன பாபங் ஹோதி. ஸதோ உபஸம்மதீதி ஸதியா ஸமன்னாக³தோ ஹுத்வா அதி⁴வாஸேதி. உபி⁴ன்னங் திகிச்ச²ந்தானந்தி உபி⁴ன்னங் திகிச்ச²ந்தங். அயமேவ வா பாடோ². யோ புக்³க³லோ ஸதோ உபஸம்மதி, உபி⁴ன்னமத்த²ங் சரதி திகிச்ச²தி ஸாதே⁴தி, தங் புக்³க³லங் ஜனா பா³லோதி மஞ்ஞந்தி. கீதி³ஸா ஜனா? யே த⁴ம்மஸ்ஸ அகோவிதா³. த⁴ம்மஸ்ஸாதி பஞ்சக்க²ந்த⁴த⁴ம்மஸ்ஸ வா சதுஸச்சத⁴ம்மஸ்ஸ வா. அகோவிதா³தி தஸ்மிங் த⁴ம்மே அகுஸலா அந்த⁴பா³லபுது²ஜ்ஜனா. து³தியங்.
Dantassāti nibbisevanassa. Tādinoti tādilakkhaṇaṃ pattassa. Tasseva tena pāpiyoti tasseva puggalassa tena kodhena pāpaṃ hoti. Sato upasammatīti satiyā samannāgato hutvā adhivāseti. Ubhinnaṃ tikicchantānanti ubhinnaṃ tikicchantaṃ. Ayameva vā pāṭho. Yo puggalo sato upasammati, ubhinnamatthaṃ carati tikicchati sādheti, taṃ puggalaṃ janā bāloti maññanti. Kīdisā janā? Ye dhammassa akovidā. Dhammassāti pañcakkhandhadhammassa vā catusaccadhammassa vā. Akovidāti tasmiṃ dhamme akusalā andhabālaputhujjanā. Dutiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. அக்கோஸஸுத்தங் • 2. Akkosasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. அக்கோஸஸுத்தவண்ணனா • 2. Akkosasuttavaṇṇanā
