| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
২. অক্কোসসুত্তৰণ্ণনা
2. Akkosasuttavaṇṇanā
১৮৮. ভারদ্ৰাজোৰ সোতি ভারদ্ৰাজো নাম এৰ সো ব্রাহ্মণো। গোত্তৰসেন হি তযিদং নামং, ৰিসেসেন পনেতং জাতন্তি দস্সেতুং ‘‘পঞ্চমত্তেহী’’তিআদি ৰুত্তং। জানিকতাতি ঞাতিৰগ্গহানিকতা। পক্খো ভিন্নোতি ততো এৰ ঞাতিপক্খো নট্ঠো। যথা দোমনস্সিতো অনত্তমনোতি ৰত্তব্বং লভতি, এৰং কুপিতোতি আহ ‘‘দোমনস্সেন চা’’তি। দসহীতি অনৰসেসপরিযাদানৰসেন ৰুত্তং পঞ্চহি গাথাসতেহি অক্কোসন্তো তথা অক্কোসেয্যাতি কত্ৰা। তত্থ পন যেন কেনচি অক্কোসন্তোপি অক্কোসতিযেৰ নাম। করোসি মম ভাতিকস্স পব্বজ্জং।
188.Bhāradvājova soti bhāradvājo nāma eva so brāhmaṇo. Gottavasena hi tayidaṃ nāmaṃ, visesena panetaṃ jātanti dassetuṃ ‘‘pañcamattehī’’tiādi vuttaṃ. Jānikatāti ñātivaggahānikatā. Pakkho bhinnoti tato eva ñātipakkho naṭṭho. Yathā domanassito anattamanoti vattabbaṃ labhati, evaṃ kupitoti āha ‘‘domanassena cā’’ti. Dasahīti anavasesapariyādānavasena vuttaṃ pañcahi gāthāsatehi akkosanto tathā akkoseyyāti katvā. Tattha pana yena kenaci akkosantopi akkosatiyeva nāma. Karosi mama bhātikassa pabbajjaṃ.
সম্ভুঞ্জতীতি সম্ভোগং করোতি। অক্কোসাদীহি একতো ভুঞ্জতি। ৰীতিহরতীতি ব্যতিহারং করোতি, অক্কোসতো পচ্চক্কোসনাদিনা ৰিনিমযং করোতীতি অত্থো। তেনাহ ‘‘কতস্স পটিকারং করোতী’’তি। অস্স অনুস্সৰৰসেন সুত্ৰা ‘‘সপতি ম’’ন্তি সঞ্ঞিনো ভযং উপ্পজ্জীতি যোজনা। অস্সাতি ব্রাহ্মণস্স। সুত্ৰাতি পদং উভযত্থাপি যোজেতব্বং ‘‘তৰেৰেতং ব্রাহ্মণাতি সুত্ৰা, অনুস্সৰৰসেন সুত্ৰা’’তি চ। কামং কিসৰচ্ছাদযো সপনং নাদংসু, দেৰতানংযেৰ হি সো অত্থো, সত্তানং পন তথা সঞ্ঞা উপ্পন্না, সোপি তথাসঞ্ঞী অহোসি। তেনাহ ‘‘অনুস্সৰৰসেনা’’তি।
Sambhuñjatīti sambhogaṃ karoti. Akkosādīhi ekato bhuñjati. Vītiharatīti byatihāraṃ karoti, akkosato paccakkosanādinā vinimayaṃ karotīti attho. Tenāha ‘‘katassa paṭikāraṃ karotī’’ti. Assa anussavavasena sutvā ‘‘sapati ma’’nti saññino bhayaṃ uppajjīti yojanā. Assāti brāhmaṇassa. Sutvāti padaṃ ubhayatthāpi yojetabbaṃ ‘‘tavevetaṃ brāhmaṇāti sutvā, anussavavasena sutvā’’ti ca. Kāmaṃ kisavacchādayo sapanaṃ nādaṃsu, devatānaṃyeva hi so attho, sattānaṃ pana tathā saññā uppannā, sopi tathāsaññī ahosi. Tenāha ‘‘anussavavasenā’’ti.
দন্তস্স সব্বসো দমথং উপগতত্তা। নিব্বিসেৰনস্সাতি রাগদোসাদিহেতুকৰিপ্ফন্দনরহিতস্স। তস্সেৰাতি পটিকুজ্ঝন্তস্সেৰ পুগ্গলস্স তেন কোধেন পাপং হোতি পাপস্স সন্তানন্তরসঙ্কন্তিযা অভাৰতো। কেচি পন ‘‘তস্সেৰাতি তস্সেৰ পটিকুজ্ঝন্তপুরিসস্স তেন পটিকুজ্ঝনেন। পাপিযোতি পটিকুজ্ঝন্তপুগ্গলস্স লামকতরো’’তি এৰমেত্থ অত্থং ৰদন্তি। সতিযা সমন্নাগতো হুত্ৰা পটিসঙ্খানে ঠিতো অধিৰাসেতি, ন সহো মূল়্হো হুত্ৰাতি অধিপ্পাযো। উভিন্নং তিকিচ্ছন্তন্তি উভিন্নং উপ্পন্নকোধসঙ্খাতং কিলেসব্যাধিং তিকিচ্ছন্তং ৰূপসমেন্তং তং পুগ্গলং। যো পুগ্গলোতিআদিনা পুরিমাসু গাথাসু পৰত্তিতানি পদানি সম্বন্ধিত্ৰা দস্সেতি। পঞ্চসু খন্ধেসু যাথাৰতো ৰিনীতা অরিযধম্মস্স কোৰিদা নাম হোন্তীতি আহ ‘‘ধম্মস্সাতি পঞ্চক্খন্ধধম্মস্সা’’তি। ইদানি তমত্থং পরিপুণ্ণং কত্ৰা দস্সেন্তো আহ ‘‘চতুসচ্চধম্মস্স ৰা’’তি।
Dantassa sabbaso damathaṃ upagatattā. Nibbisevanassāti rāgadosādihetukavipphandanarahitassa. Tassevāti paṭikujjhantasseva puggalassa tena kodhena pāpaṃ hoti pāpassa santānantarasaṅkantiyā abhāvato. Keci pana ‘‘tassevāti tasseva paṭikujjhantapurisassa tena paṭikujjhanena. Pāpiyoti paṭikujjhantapuggalassa lāmakataro’’ti evamettha atthaṃ vadanti. Satiyā samannāgato hutvā paṭisaṅkhāne ṭhito adhivāseti, na saho mūḷho hutvāti adhippāyo. Ubhinnaṃ tikicchantanti ubhinnaṃ uppannakodhasaṅkhātaṃ kilesabyādhiṃ tikicchantaṃ vūpasamentaṃ taṃ puggalaṃ. Yo puggalotiādinā purimāsu gāthāsu pavattitāni padāni sambandhitvā dasseti. Pañcasu khandhesu yāthāvato vinītā ariyadhammassa kovidā nāma hontīti āha ‘‘dhammassāti pañcakkhandhadhammassā’’ti. Idāni tamatthaṃ paripuṇṇaṃ katvā dassento āha ‘‘catusaccadhammassa vā’’ti.
অক্কোসসুত্তৰণ্ণনা নিট্ঠিতা।
Akkosasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ২. অক্কোসসুত্তং • 2. Akkosasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২. অক্কোসসুত্তৰণ্ণনা • 2. Akkosasuttavaṇṇanā
