| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) |
੨. ਅਕ੍ਕੋਸਸੁਤ੍ਤવਣ੍ਣਨਾ
2. Akkosasuttavaṇṇanā
੧੮੮. ਭਾਰਦ੍વਾਜੋવ ਸੋਤਿ ਭਾਰਦ੍વਾਜੋ ਨਾਮ ਏવ ਸੋ ਬ੍ਰਾਹ੍ਮਣੋ। ਗੋਤ੍ਤવਸੇਨ ਹਿ ਤਯਿਦਂ ਨਾਮਂ, વਿਸੇਸੇਨ ਪਨੇਤਂ ਜਾਤਨ੍ਤਿ ਦਸ੍ਸੇਤੁਂ ‘‘ਪਞ੍ਚਮਤ੍ਤੇਹੀ’’ਤਿਆਦਿ વੁਤ੍ਤਂ। ਜਾਨਿਕਤਾਤਿ ਞਾਤਿવਗ੍ਗਹਾਨਿਕਤਾ। ਪਕ੍ਖੋ ਭਿਨ੍ਨੋਤਿ ਤਤੋ ਏવ ਞਾਤਿਪਕ੍ਖੋ ਨਟ੍ਠੋ। ਯਥਾ ਦੋਮਨਸ੍ਸਿਤੋ ਅਨਤ੍ਤਮਨੋਤਿ વਤ੍ਤਬ੍ਬਂ ਲਭਤਿ, ਏવਂ ਕੁਪਿਤੋਤਿ ਆਹ ‘‘ਦੋਮਨਸ੍ਸੇਨ ਚਾ’’ਤਿ। ਦਸਹੀਤਿ ਅਨવਸੇਸਪਰਿਯਾਦਾਨવਸੇਨ વੁਤ੍ਤਂ ਪਞ੍ਚਹਿ ਗਾਥਾਸਤੇਹਿ ਅਕ੍ਕੋਸਨ੍ਤੋ ਤਥਾ ਅਕ੍ਕੋਸੇਯ੍ਯਾਤਿ ਕਤ੍વਾ। ਤਤ੍ਥ ਪਨ ਯੇਨ ਕੇਨਚਿ ਅਕ੍ਕੋਸਨ੍ਤੋਪਿ ਅਕ੍ਕੋਸਤਿਯੇવ ਨਾਮ। ਕਰੋਸਿ ਮਮ ਭਾਤਿਕਸ੍ਸ ਪਬ੍ਬਜ੍ਜਂ।
188.Bhāradvājova soti bhāradvājo nāma eva so brāhmaṇo. Gottavasena hi tayidaṃ nāmaṃ, visesena panetaṃ jātanti dassetuṃ ‘‘pañcamattehī’’tiādi vuttaṃ. Jānikatāti ñātivaggahānikatā. Pakkho bhinnoti tato eva ñātipakkho naṭṭho. Yathā domanassito anattamanoti vattabbaṃ labhati, evaṃ kupitoti āha ‘‘domanassena cā’’ti. Dasahīti anavasesapariyādānavasena vuttaṃ pañcahi gāthāsatehi akkosanto tathā akkoseyyāti katvā. Tattha pana yena kenaci akkosantopi akkosatiyeva nāma. Karosi mama bhātikassa pabbajjaṃ.
ਸਮ੍ਭੁਞ੍ਜਤੀਤਿ ਸਮ੍ਭੋਗਂ ਕਰੋਤਿ। ਅਕ੍ਕੋਸਾਦੀਹਿ ਏਕਤੋ ਭੁਞ੍ਜਤਿ। વੀਤਿਹਰਤੀਤਿ ਬ੍ਯਤਿਹਾਰਂ ਕਰੋਤਿ, ਅਕ੍ਕੋਸਤੋ ਪਚ੍ਚਕ੍ਕੋਸਨਾਦਿਨਾ વਿਨਿਮਯਂ ਕਰੋਤੀਤਿ ਅਤ੍ਥੋ। ਤੇਨਾਹ ‘‘ਕਤਸ੍ਸ ਪਟਿਕਾਰਂ ਕਰੋਤੀ’’ਤਿ। ਅਸ੍ਸ ਅਨੁਸ੍ਸવવਸੇਨ ਸੁਤ੍વਾ ‘‘ਸਪਤਿ ਮ’’ਨ੍ਤਿ ਸਞ੍ਞਿਨੋ ਭਯਂ ਉਪ੍ਪਜ੍ਜੀਤਿ ਯੋਜਨਾ। ਅਸ੍ਸਾਤਿ ਬ੍ਰਾਹ੍ਮਣਸ੍ਸ। ਸੁਤ੍વਾਤਿ ਪਦਂ ਉਭਯਤ੍ਥਾਪਿ ਯੋਜੇਤਬ੍ਬਂ ‘‘ਤવੇવੇਤਂ ਬ੍ਰਾਹ੍ਮਣਾਤਿ ਸੁਤ੍વਾ, ਅਨੁਸ੍ਸવવਸੇਨ ਸੁਤ੍વਾ’’ਤਿ ਚ। ਕਾਮਂ ਕਿਸવਚ੍ਛਾਦਯੋ ਸਪਨਂ ਨਾਦਂਸੁ, ਦੇવਤਾਨਂਯੇવ ਹਿ ਸੋ ਅਤ੍ਥੋ, ਸਤ੍ਤਾਨਂ ਪਨ ਤਥਾ ਸਞ੍ਞਾ ਉਪ੍ਪਨ੍ਨਾ, ਸੋਪਿ ਤਥਾਸਞ੍ਞੀ ਅਹੋਸਿ। ਤੇਨਾਹ ‘‘ਅਨੁਸ੍ਸવવਸੇਨਾ’’ਤਿ।
Sambhuñjatīti sambhogaṃ karoti. Akkosādīhi ekato bhuñjati. Vītiharatīti byatihāraṃ karoti, akkosato paccakkosanādinā vinimayaṃ karotīti attho. Tenāha ‘‘katassa paṭikāraṃ karotī’’ti. Assa anussavavasena sutvā ‘‘sapati ma’’nti saññino bhayaṃ uppajjīti yojanā. Assāti brāhmaṇassa. Sutvāti padaṃ ubhayatthāpi yojetabbaṃ ‘‘tavevetaṃ brāhmaṇāti sutvā, anussavavasena sutvā’’ti ca. Kāmaṃ kisavacchādayo sapanaṃ nādaṃsu, devatānaṃyeva hi so attho, sattānaṃ pana tathā saññā uppannā, sopi tathāsaññī ahosi. Tenāha ‘‘anussavavasenā’’ti.
ਦਨ੍ਤਸ੍ਸ ਸਬ੍ਬਸੋ ਦਮਥਂ ਉਪਗਤਤ੍ਤਾ। ਨਿਬ੍ਬਿਸੇવਨਸ੍ਸਾਤਿ ਰਾਗਦੋਸਾਦਿਹੇਤੁਕવਿਪ੍ਫਨ੍ਦਨਰਹਿਤਸ੍ਸ। ਤਸ੍ਸੇવਾਤਿ ਪਟਿਕੁਜ੍ਝਨ੍ਤਸ੍ਸੇવ ਪੁਗ੍ਗਲਸ੍ਸ ਤੇਨ ਕੋਧੇਨ ਪਾਪਂ ਹੋਤਿ ਪਾਪਸ੍ਸ ਸਨ੍ਤਾਨਨ੍ਤਰਸਙ੍ਕਨ੍ਤਿਯਾ ਅਭਾવਤੋ। ਕੇਚਿ ਪਨ ‘‘ਤਸ੍ਸੇવਾਤਿ ਤਸ੍ਸੇવ ਪਟਿਕੁਜ੍ਝਨ੍ਤਪੁਰਿਸਸ੍ਸ ਤੇਨ ਪਟਿਕੁਜ੍ਝਨੇਨ। ਪਾਪਿਯੋਤਿ ਪਟਿਕੁਜ੍ਝਨ੍ਤਪੁਗ੍ਗਲਸ੍ਸ ਲਾਮਕਤਰੋ’’ਤਿ ਏવਮੇਤ੍ਥ ਅਤ੍ਥਂ વਦਨ੍ਤਿ। ਸਤਿਯਾ ਸਮਨ੍ਨਾਗਤੋ ਹੁਤ੍વਾ ਪਟਿਸਙ੍ਖਾਨੇ ਠਿਤੋ ਅਧਿવਾਸੇਤਿ, ਨ ਸਹੋ ਮੂਲ਼੍ਹੋ ਹੁਤ੍વਾਤਿ ਅਧਿਪ੍ਪਾਯੋ। ਉਭਿਨ੍ਨਂ ਤਿਕਿਚ੍ਛਨ੍ਤਨ੍ਤਿ ਉਭਿਨ੍ਨਂ ਉਪ੍ਪਨ੍ਨਕੋਧਸਙ੍ਖਾਤਂ ਕਿਲੇਸਬ੍ਯਾਧਿਂ ਤਿਕਿਚ੍ਛਨ੍ਤਂ વੂਪਸਮੇਨ੍ਤਂ ਤਂ ਪੁਗ੍ਗਲਂ। ਯੋ ਪੁਗ੍ਗਲੋਤਿਆਦਿਨਾ ਪੁਰਿਮਾਸੁ ਗਾਥਾਸੁ ਪવਤ੍ਤਿਤਾਨਿ ਪਦਾਨਿ ਸਮ੍ਬਨ੍ਧਿਤ੍વਾ ਦਸ੍ਸੇਤਿ। ਪਞ੍ਚਸੁ ਖਨ੍ਧੇਸੁ ਯਾਥਾવਤੋ વਿਨੀਤਾ ਅਰਿਯਧਮ੍ਮਸ੍ਸ ਕੋવਿਦਾ ਨਾਮ ਹੋਨ੍ਤੀਤਿ ਆਹ ‘‘ਧਮ੍ਮਸ੍ਸਾਤਿ ਪਞ੍ਚਕ੍ਖਨ੍ਧਧਮ੍ਮਸ੍ਸਾ’’ਤਿ। ਇਦਾਨਿ ਤਮਤ੍ਥਂ ਪਰਿਪੁਣ੍ਣਂ ਕਤ੍વਾ ਦਸ੍ਸੇਨ੍ਤੋ ਆਹ ‘‘ਚਤੁਸਚ੍ਚਧਮ੍ਮਸ੍ਸ વਾ’’ਤਿ।
Dantassa sabbaso damathaṃ upagatattā. Nibbisevanassāti rāgadosādihetukavipphandanarahitassa. Tassevāti paṭikujjhantasseva puggalassa tena kodhena pāpaṃ hoti pāpassa santānantarasaṅkantiyā abhāvato. Keci pana ‘‘tassevāti tasseva paṭikujjhantapurisassa tena paṭikujjhanena. Pāpiyoti paṭikujjhantapuggalassa lāmakataro’’ti evamettha atthaṃ vadanti. Satiyā samannāgato hutvā paṭisaṅkhāne ṭhito adhivāseti, na saho mūḷho hutvāti adhippāyo. Ubhinnaṃ tikicchantanti ubhinnaṃ uppannakodhasaṅkhātaṃ kilesabyādhiṃ tikicchantaṃ vūpasamentaṃ taṃ puggalaṃ. Yo puggalotiādinā purimāsu gāthāsu pavattitāni padāni sambandhitvā dasseti. Pañcasu khandhesu yāthāvato vinītā ariyadhammassa kovidā nāma hontīti āha ‘‘dhammassāti pañcakkhandhadhammassā’’ti. Idāni tamatthaṃ paripuṇṇaṃ katvā dassento āha ‘‘catusaccadhammassa vā’’ti.
ਅਕ੍ਕੋਸਸੁਤ੍ਤવਣ੍ਣਨਾ ਨਿਟ੍ਠਿਤਾ।
Akkosasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੨. ਅਕ੍ਕੋਸਸੁਤ੍ਤਂ • 2. Akkosasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) / ੨. ਅਕ੍ਕੋਸਸੁਤ੍ਤવਣ੍ਣਨਾ • 2. Akkosasuttavaṇṇanā
