| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
9. அகுஸலமூலஸுத்தவண்ணனா
9. Akusalamūlasuttavaṇṇanā
70. நவமே அகுஸலமூலானீதி அகுஸலானங் மூலானி, அகுஸலானி ச தானி மூலானி சாதி வா அகுஸலமூலானி. யத³பி, பி⁴க்க²வே, லோபோ⁴தி யோபி, பி⁴க்க²வே, லோபோ⁴. தத³பி அகுஸலமூலந்தி ஸோபி அகுஸலமூலங். அகுஸலமூலங் வா ஸந்தா⁴ய இத⁴ தம்பீதி அத்தோ² வட்டதியேவ. ஏதேனுபாயேன ஸப்³ப³த்த² நயோ நேதப்³போ³. அபி⁴ஸங்க²ரோதீதி ஆயூஹதி ஸம்பிண்டே³தி ராஸிங் கரோதி. அஸதா து³க்க²ங் உப்பாத³யதீதி அபூ⁴தேன அவிஜ்ஜமானேன யங்கிஞ்சி தஸ்ஸ அபூ⁴தங் தோ³ஸங் வத்வா து³க்க²ங் உப்பாதே³தி. வதே⁴ன வாதிஆதி³ யேனாகாரேன து³க்க²ங் உப்பாதே³தி, தங் த³ஸ்ஸேதுங் வுத்தங். தத்த² ஜானியாதி த⁴னஜானியா. பப்³பா³ஜனாயாதி கா³மதோ வா ரட்ட²தோ வா பப்³பா³ஜனீயகம்மேன . ப³லவம்ஹீதி அஹமஸ்மி ப³லவா. ப³லத்தோ² இதிபீதி ப³லேன மே அத்தோ² இதிபி, ப³லே வா டி²தொம்ஹீதிபி வத³தி.
70. Navame akusalamūlānīti akusalānaṃ mūlāni, akusalāni ca tāni mūlāni cāti vā akusalamūlāni. Yadapi, bhikkhave, lobhoti yopi, bhikkhave, lobho. Tadapiakusalamūlanti sopi akusalamūlaṃ. Akusalamūlaṃ vā sandhāya idha tampīti attho vaṭṭatiyeva. Etenupāyena sabbattha nayo netabbo. Abhisaṅkharotīti āyūhati sampiṇḍeti rāsiṃ karoti. Asatā dukkhaṃ uppādayatīti abhūtena avijjamānena yaṃkiñci tassa abhūtaṃ dosaṃ vatvā dukkhaṃ uppādeti. Vadhena vātiādi yenākārena dukkhaṃ uppādeti, taṃ dassetuṃ vuttaṃ. Tattha jāniyāti dhanajāniyā. Pabbājanāyāti gāmato vā raṭṭhato vā pabbājanīyakammena . Balavamhīti ahamasmi balavā. Balattho itipīti balena me attho itipi, bale vā ṭhitomhītipi vadati.
அகாலவாதீ³தி காலஸ்மிங் ந வத³தி, அகாலஸ்மிங் வத³தி நாம. அபூ⁴தவாதீ³தி பூ⁴தங் ந வத³தி , அபூ⁴தங் வத³தி நாம. அனத்த²வாதீ³தி அத்த²ங் ந வத³தி, அனத்த²ங் வத³தி நாம. அத⁴ம்மவாதீ³தி த⁴ம்மங் ந வத³தி, அத⁴ம்மங் வத³தி நாம. அவினயவாதீ³தி வினயங் ந வத³தி, அவினயங் வத³தி நாம.
Akālavādīti kālasmiṃ na vadati, akālasmiṃ vadati nāma. Abhūtavādīti bhūtaṃ na vadati , abhūtaṃ vadati nāma. Anatthavādīti atthaṃ na vadati, anatthaṃ vadati nāma. Adhammavādīti dhammaṃ na vadati, adhammaṃ vadati nāma. Avinayavādīti vinayaṃ na vadati, avinayaṃ vadati nāma.
ததா² ஹாயந்தி ததா² ஹி அயங். ந ஆதப்பங் கரோதி தஸ்ஸ நிப்³பே³ட²னாயாதி தஸ்ஸ அபூ⁴தஸ்ஸ நிப்³பே³ட²னத்தா²ய வீரியங் ந கரோதி. இதிபேதங் அதச்ச²ந்தி இமினாபி காரணேன ஏதங் அதச்ச²ங். இதரங் தஸ்ஸேவ வேவசனங்.
Tathā hāyanti tathā hi ayaṃ. Na ātappaṃ karoti tassa nibbeṭhanāyāti tassa abhūtassa nibbeṭhanatthāya vīriyaṃ na karoti. Itipetaṃ atacchanti imināpi kāraṇena etaṃ atacchaṃ. Itaraṃ tasseva vevacanaṃ.
து³க்³க³தி பாடிகங்கா²தி நிரயாதி³கா து³க்³க³தி இச்சி²தப்³பா³, ஸா அஸ்ஸ அவஸ்ஸபா⁴வினீ, தத்தா²னேன நிப்³ப³த்திதப்³ப³ந்தி அத்தோ². உத்³த⁴ஸ்தோதி உபரி த⁴ங்ஸிதோ. பரியோனத்³தோ⁴தி ஸமந்தா ஓனத்³தோ⁴. அனயங் ஆபஜ்ஜதீதி அவுட்³டி⁴ங் ஆபஜ்ஜதி. ப்³யஸனங் ஆபஜ்ஜதீதி வினாஸங் ஆபஜ்ஜதி. கி³ம்ஹகாலஸ்மிஞ்ஹி மாலுவாஸிபாடிகாய ப²லிதாய பீ³ஜானி உப்பதித்வா வடருக்கா²தீ³னங் மூலே பதந்தி. தத்த² யஸ்ஸ ருக்க²ஸ்ஸ மூலே தீஸு தி³ஸாஸு தீணி பீ³ஜானி பதிதானி ஹொந்தி, தஸ்மிங் ருக்கே² பாவுஸ்ஸகேன மேகே⁴ன அபி⁴வட்டே² தீஹி பீ³ஜேஹி தயோ அங்குரா உட்ட²ஹித்வா தங் ருக்க²ங் அல்லீயந்தி. ததோ பட்டா²ய ருக்க²தே³வதாயோ ஸகபா⁴வேன ஸண்டா²துங் ந ஸக்கொந்தி. தேபி அங்குரா வட்³ட⁴மானா லதாபா⁴வங் ஆபஜ்ஜித்வா தங் ருக்க²ங் அபி⁴ருஹித்வா ஸப்³ப³விடபஸாகா²பஸாகா² ஸங்ஸிப்³பி³த்வா தங் ருக்க²ங் உபரி பரியோனந்த⁴ந்தி. ஸோ மாலுவாலதாஹி ஸங்ஸிப்³பி³தோ க⁴னேஹி மஹந்தேஹி மாலுவாபத்தேஹி ஸஞ்ச²ன்னோ தே³வே வா வஸ்ஸந்தே வாதே வா வாயந்தே தத்த² தத்த² பலுஜ்ஜித்வா கா²ணுமத்தமேவ அவஸிஸ்ஸதி. தங் ஸந்தா⁴யேதங் வுத்தங்.
Duggati pāṭikaṅkhāti nirayādikā duggati icchitabbā, sā assa avassabhāvinī, tatthānena nibbattitabbanti attho. Uddhastoti upari dhaṃsito. Pariyonaddhoti samantā onaddho. Anayaṃ āpajjatīti avuḍḍhiṃ āpajjati. Byasanaṃāpajjatīti vināsaṃ āpajjati. Gimhakālasmiñhi māluvāsipāṭikāya phalitāya bījāni uppatitvā vaṭarukkhādīnaṃ mūle patanti. Tattha yassa rukkhassa mūle tīsu disāsu tīṇi bījāni patitāni honti, tasmiṃ rukkhe pāvussakena meghena abhivaṭṭhe tīhi bījehi tayo aṅkurā uṭṭhahitvā taṃ rukkhaṃ allīyanti. Tato paṭṭhāya rukkhadevatāyo sakabhāvena saṇṭhātuṃ na sakkonti. Tepi aṅkurā vaḍḍhamānā latābhāvaṃ āpajjitvā taṃ rukkhaṃ abhiruhitvā sabbaviṭapasākhāpasākhā saṃsibbitvā taṃ rukkhaṃ upari pariyonandhanti. So māluvālatāhi saṃsibbito ghanehi mahantehi māluvāpattehi sañchanno deve vā vassante vāte vā vāyante tattha tattha palujjitvā khāṇumattameva avasissati. Taṃ sandhāyetaṃ vuttaṃ.
ஏவமேவ கோ²தி எத்த² பன இத³ங் ஓபம்மஸங்ஸந்த³னங் – ஸாலாதீ³ஸு அஞ்ஞதரருக்கோ² விய ஹி அயங் ஸத்தோ த³ட்ட²ப்³போ³, திஸ்ஸோ மாலுவாலதா விய தீணி அகுஸலமூலானி, யாவ ருக்க²ஸாகா² அஸம்பத்தா, தாவ தாஸங் லதானங் உஜுகங் ருக்கா²ரோஹனங் விய லோபா⁴தீ³னங் த்³வாரங் அஸம்பத்தகாலோ, ஸாகா²னுஸாரேன க³மனகாலோ விய த்³வாரவஸேன க³மனகாலோ, பரியோனத்³த⁴காலோ விய லோபா⁴தீ³ஹி பரியுட்டி²தகாலோ, கு²த்³த³கஸாகா²னங் பலுஜ்ஜனகாலோ விய த்³வாரப்பத்தானங் கிலேஸானங் வஸேன கு²த்³தா³னுகு²த்³த³கா ஆபத்தியோ ஆபன்னகாலோ, மஹாஸாகா²னங் பலுஜ்ஜனகாலோ விய க³ருகாபத்திங் ஆபன்னகாலோ, லதானுஸாரேன ஓதிண்ணேன உத³கேன மூலேஸு திந்தேஸு ருக்க²ஸ்ஸ பூ⁴மியங் பதனகாலோ விய கமேன சத்தாரி பாராஜிகானி ஆபஜ்ஜித்வா சதூஸு அபாயேஸு நிப்³ப³த்தனகாலோ த³ட்ட²ப்³போ³.
Evameva khoti ettha pana idaṃ opammasaṃsandanaṃ – sālādīsu aññatararukkho viya hi ayaṃ satto daṭṭhabbo, tisso māluvālatā viya tīṇi akusalamūlāni, yāva rukkhasākhā asampattā, tāva tāsaṃ latānaṃ ujukaṃ rukkhārohanaṃ viya lobhādīnaṃ dvāraṃ asampattakālo, sākhānusārena gamanakālo viya dvāravasena gamanakālo, pariyonaddhakālo viya lobhādīhi pariyuṭṭhitakālo, khuddakasākhānaṃ palujjanakālo viya dvārappattānaṃ kilesānaṃ vasena khuddānukhuddakā āpattiyo āpannakālo, mahāsākhānaṃ palujjanakālo viya garukāpattiṃ āpannakālo, latānusārena otiṇṇena udakena mūlesu tintesu rukkhassa bhūmiyaṃ patanakālo viya kamena cattāri pārājikāni āpajjitvā catūsu apāyesu nibbattanakālo daṭṭhabbo.
ஸுக்கபக்கோ² வுத்தவிபல்லாஸேன வேதி³தப்³போ³. ஏவமேவ கோ²தி எத்த² பன இத³ங் ஓபம்மஸங்ஸந்த³னங் – ஸாலாதீ³ஸு அஞ்ஞதரருக்கோ² விய அயங் ஸத்தோ த³ட்ட²ப்³போ³, திஸ்ஸோ மாலுவாலதா விய தீணி அகுஸலமூலானி, தாஸங் அப்பவத்திங் காதுங் ஆக³தபுரிஸோ விய யோகா³வசரோ, குத்³தா³லோ விய பஞ்ஞா, குத்³தா³லபிடகங் விய ஸத்³தா⁴பிடகங், பலிக²னநக²ணித்தி விய விபஸ்ஸனாபஞ்ஞா, க²ணித்தியா மூலச்சே²த³னங் விய விபஸ்ஸனாஞாணேன அவிஜ்ஜாமூலஸ்ஸ சி²ந்த³னகாலோ, க²ண்டா³க²ண்டி³கங் சி²ந்த³னகாலோ விய க²ந்த⁴வஸேன தி³ட்ட²காலோ, பா²லனகாலோ விய மக்³க³ஞாணேன கிலேஸானங் ஸமுக்³கா⁴திதகாலோ, மஸிகரணகாலோ விய த⁴ரமானகபஞ்சக்க²ந்த⁴காலோ, மஹாவாதே ஓபுணித்வா அப்பவத்தனகாலோ விய உபாதி³ன்னகக்க²ந்தா⁴னங் அப்படிஸந்தி⁴கனிரோதே⁴ன நிருஜ்ஜி²த்வா புனப்³ப⁴வே படிஸந்தி⁴அக்³க³ஹணகாலோ த³ட்ட²ப்³போ³தி. இமஸ்மிங் ஸுத்தே வட்டவிவட்டங் கதி²தங்.
Sukkapakkho vuttavipallāsena veditabbo. Evameva khoti ettha pana idaṃ opammasaṃsandanaṃ – sālādīsu aññatararukkho viya ayaṃ satto daṭṭhabbo, tisso māluvālatā viya tīṇi akusalamūlāni, tāsaṃ appavattiṃ kātuṃ āgatapuriso viya yogāvacaro, kuddālo viya paññā, kuddālapiṭakaṃ viya saddhāpiṭakaṃ, palikhananakhaṇitti viya vipassanāpaññā, khaṇittiyā mūlacchedanaṃ viya vipassanāñāṇena avijjāmūlassa chindanakālo, khaṇḍākhaṇḍikaṃ chindanakālo viya khandhavasena diṭṭhakālo, phālanakālo viya maggañāṇena kilesānaṃ samugghātitakālo, masikaraṇakālo viya dharamānakapañcakkhandhakālo, mahāvāte opuṇitvā appavattanakālo viya upādinnakakkhandhānaṃ appaṭisandhikanirodhena nirujjhitvā punabbhave paṭisandhiaggahaṇakālo daṭṭhabboti. Imasmiṃ sutte vaṭṭavivaṭṭaṃ kathitaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. அகுஸலமூலஸுத்தங் • 9. Akusalamūlasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 9. அகுஸலமூலஸுத்தவண்ணனா • 9. Akusalamūlasuttavaṇṇanā
