| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
9. அகுஸலமூலஸுத்தவண்ணனா
9. Akusalamūlasuttavaṇṇanā
70. நவமே லுப்³ப⁴தீதி லோபோ⁴. து³ஸ்ஸதீதி தோ³ஸோ. முய்ஹதீதி மோஹோ. லோபா⁴தீ³னி பனேதானி அஸஹஜாதானங் பாணாதிபாதாதீ³னங் கேஸஞ்சி அகுஸலானங் உபனிஸ்ஸயபச்சயட்டே²ன, ஸஹஜாதானங் அதி³ன்னாதா³னாதீ³னங் கேஸஞ்சி ஸம்பயுத்தா ஹுத்வா உப்பாத³கட்டே²ன, ஸயஞ்ச அகுஸலானீதி ஸாவஜ்ஜது³க்க²விபாகட்டே²னாதி ஆஹ ‘‘அகுஸலானங் மூலானி, அகுஸலானி ச தானி மூலானீ’’தி. வுத்தம்பி சேதங் ‘‘ரத்தோ கோ², ஆவுஸோ, ராகே³ன அபி⁴பூ⁴தோ பரியாதி³ன்னசித்தோ பாணம்பி ஹனதீ’’திஆதி³. யத³பீதி லிங்க³விபல்லாஸேன வுத்தந்தி ஆஹ ‘‘யோபி, பி⁴க்க²வே, லோபோ⁴’’தி. தத³பீதி எத்தா²பி ஏஸேவ நயோதி ஆஹ ‘‘ஸோபி அகுஸலமூல’’ந்தி. வினாபி லிங்க³விபல்லாஸேன அத்த²யோஜனங் த³ஸ்ஸெந்தோ ‘‘அகுஸலமூலங் வா’’திஆதி³மாஹ. ஸப்³ப³த்தா²தி ‘‘யத³பி, பி⁴க்க²வே, தோ³ஸோ, தத³பி அகுஸலமூல’’ந்திஆதீ³ஸு. அபி⁴ஸங்க²ரோதீதி எத்த² ஆயூஹதீதி அத்த²ங் வத்வா தஞ்ச ஆயூஹனங் பச்சயஸமவாயஸித்³தி⁴தோ ஸம்பிண்ட³னங் ராஸிகரணங் விய ஹோதீதி ஆஹ ‘‘ஸம்பிண்டே³தி ராஸிங் கரோதீ’’தி.
70. Navame lubbhatīti lobho. Dussatīti doso. Muyhatīti moho. Lobhādīni panetāni asahajātānaṃ pāṇātipātādīnaṃ kesañci akusalānaṃ upanissayapaccayaṭṭhena, sahajātānaṃ adinnādānādīnaṃ kesañci sampayuttā hutvā uppādakaṭṭhena, sayañca akusalānīti sāvajjadukkhavipākaṭṭhenāti āha ‘‘akusalānaṃ mūlāni, akusalāni ca tāni mūlānī’’ti. Vuttampi cetaṃ ‘‘ratto kho, āvuso, rāgena abhibhūto pariyādinnacitto pāṇampi hanatī’’tiādi. Yadapīti liṅgavipallāsena vuttanti āha ‘‘yopi, bhikkhave, lobho’’ti. Tadapīti etthāpi eseva nayoti āha ‘‘sopi akusalamūla’’nti. Vināpi liṅgavipallāsena atthayojanaṃ dassento ‘‘akusalamūlaṃ vā’’tiādimāha. Sabbatthāti ‘‘yadapi, bhikkhave, doso, tadapi akusalamūla’’ntiādīsu. Abhisaṅkharotīti ettha āyūhatīti atthaṃ vatvā tañca āyūhanaṃ paccayasamavāyasiddhito sampiṇḍanaṃ rāsikaraṇaṃ viya hotīti āha ‘‘sampiṇḍeti rāsiṃ karotī’’ti.
பாளியங் ‘‘வதே⁴னா’’திஆதீ³ஸு வதே⁴னாதி மாரணேன வா போத²னேன வா. வத⁴ஸத்³தோ³ ஹி ஹிங்ஸனத்தோ² விஹேட²னத்தோ² ச ஹோதி. ப³ந்த⁴னேனாதி அத்³து³ப³ந்த⁴னாதி³னா. ஜானியாதி த⁴னஜானியா, ‘‘ஸதங் க³ண்ஹத², ஸஹஸ்ஸங் க³ண்ஹதா²’’தி ஏவங் பவத்திதத³ண்டே³னாதி அத்தோ². க³ரஹாயாதி பஞ்சஸிக²முண்ட³ககரணங், கோ³மயஸிஞ்சனங், கீ³வாய குரண்ட³கப³ந்த⁴னந்தி ஏவமாதீ³னி கத்வா க³ரஹபாபனேன. தத்த² பஞ்சஸிக²முண்ட³ககரணங் நாம காகபக்க²கரணங். கோ³மயஸிஞ்சனங் ஸீஸேன கணோத³காவஸேசனங். குரண்ட³கப³ந்த⁴னங் க³த்³து³லப³ந்த⁴னங்.
Pāḷiyaṃ ‘‘vadhenā’’tiādīsu vadhenāti māraṇena vā pothanena vā. Vadhasaddo hi hiṃsanattho viheṭhanattho ca hoti. Bandhanenāti addubandhanādinā. Jāniyāti dhanajāniyā, ‘‘sataṃ gaṇhatha, sahassaṃ gaṇhathā’’ti evaṃ pavattitadaṇḍenāti attho. Garahāyāti pañcasikhamuṇḍakakaraṇaṃ, gomayasiñcanaṃ, gīvāya kuraṇḍakabandhananti evamādīni katvā garahapāpanena. Tattha pañcasikhamuṇḍakakaraṇaṃ nāma kākapakkhakaraṇaṃ. Gomayasiñcanaṃ sīsena kaṇodakāvasecanaṃ. Kuraṇḍakabandhanaṃ gaddulabandhanaṃ.
காலஸ்மிங் ந வத³தீதி யுத்தகாலே ந வத³தி, வத்தப்³ப³காலஸ்ஸ புப்³பே³ வா பச்சா² வா அயுத்தகாலே வத்தா ஹோதி. அபூ⁴தவாதீ³தி யங் நத்தி², தஸ்ஸ வத்தா. தேனாஹ ‘‘பூ⁴தங் ந வத³தீ’’தி. அத்த²ங் ந வத³தீதி காரணங் ந வத³தி, அகாரணனிஸ்ஸிதங் நிப்ப²லங் வத்தா ஹோதி. த⁴ம்மங் ந வத³தீதி ஸபா⁴வங் ந வத³தி, அஸபா⁴வங் வத்தா அயதா²வாதீ³தி அத்தோ². வினயங் ந வத³தீதி ஸங்வரவினயங் ந வத³தி, ந ஸங்வரவினயப்படிஸங்யுத்தஸ்ஸ வத்தா ஹோதி, அத்தனோ ஸுணந்தஸ்ஸ ச ந ஸங்வரவினயாவஹஸ்ஸ வத்தாதி அத்தோ².
Kālasmiṃ na vadatīti yuttakāle na vadati, vattabbakālassa pubbe vā pacchā vā ayuttakāle vattā hoti. Abhūtavādīti yaṃ natthi, tassa vattā. Tenāha ‘‘bhūtaṃ na vadatī’’ti. Atthaṃ na vadatīti kāraṇaṃ na vadati, akāraṇanissitaṃ nipphalaṃ vattā hoti. Dhammaṃ na vadatīti sabhāvaṃ na vadati, asabhāvaṃ vattā ayathāvādīti attho. Vinayaṃ na vadatīti saṃvaravinayaṃ na vadati, na saṃvaravinayappaṭisaṃyuttassa vattā hoti, attano suṇantassa ca na saṃvaravinayāvahassa vattāti attho.
அதச்ச²ந்தி அபூ⁴தத்த²ங். தேனாஹ ‘‘இதரங் தஸ்ஸேவ வேவசன’’ந்தி. அத² வா அபூ⁴தந்தி அஸந்தங் அவிஜ்ஜமானங். அதச்ச²ந்தி அததா²காரங்.
Atacchanti abhūtatthaṃ. Tenāha ‘‘itaraṃ tasseva vevacana’’nti. Atha vā abhūtanti asantaṃ avijjamānaṃ. Atacchanti atathākāraṃ.
புஞ்ஞகம்மதோ ஏதி உப்பஜ்ஜதீதி அயோ, வட்³டி⁴. தப்படிக்கே²பேன அனயோ, அவட்³டீ⁴தி ஆஹ ‘‘அனயங் ஆபஜ்ஜதீதி அவட்³டி⁴ங் ஆபஜ்ஜதீ’’தி. மாலுவாஸிபாடிகா நாம தீ³க⁴ஸண்டா²னங் மாலுவாபக்கங் , மாலுவாப²லபொட்ட²லிகாதி அத்தோ² . ப²லிதாயாதி ஆதபேன ஸுஸ்ஸித்வா பி⁴ன்னாய. வடருக்கா²தீ³னங் மூலேதி வடருக்கா²தீ³னங் ஸமீபே. ஸகபா⁴வேன ஸண்டா²துங் ந ஸக்கொந்தீதி கஸ்மா ந ஸக்கொந்தி? ப⁴வனவினாஸப⁴யா. ருக்க²மூலே பதிதமாலுவாபீ³ஜதோ ஹி லதா உப்பஜ்ஜித்வா ருக்க²ங் அபி⁴ருஹதி. ஸா மஹாபத்தா சேவ ப³ஹுபத்தா ச மஹாகோலிரபத்தஸண்டா²னேஹி ததோ ச மஹந்ததரேஹி ஸாகா²விடபந்தரேஹி பத்தேஹி ஸமன்னாக³தா. அத² நங் ருக்க²ங் மூலதோ பட்டா²ய வினந்த⁴மானா ஸப்³ப³விடபானி ஸஞ்சா²தெ³த்வா மஹந்தங் பா⁴ரங் ஜனெத்வா திட்ட²தி, ஸா வாதே வாயந்தே தே³வே வா வஸ்ஸந்தே ஓக⁴னஹெட்டா²க³தா ஓலம்ப³னஹேதுபூ⁴தங் க⁴னபா⁴வங் ஜனெத்வா தஸ்ஸ ருக்க²ஸ்ஸ ஸப்³ப³ஸாக²ங் பி⁴ஜ்ஜதி, பூ⁴மியங் நிபாதேதி. ததோ தஸ்மிங் ருக்கே² பதிட்டி²தவிமானங் பி⁴ஜ்ஜதி வினஸ்ஸதி. இதி தா தே³வதாயோ ப⁴வனவினாஸப⁴யா ஸகபா⁴வேன ஸண்டா²துங் ந ஸக்கொந்தி. எத்த² ச யங் ஸாக²ட்ட²கவிமானங் ஹோதி, தங் ஸாகா²ஸு பி⁴ஜ்ஜமானாஸு தத்த² தத்தே²வ பி⁴ஜ்ஜித்வா ஸப்³ப³ஸாகா²ஸு பி⁴ன்னாஸு ஸப்³ப³ங் பி⁴ஜ்ஜதி, ருக்க²ட்ட²கவிமானங் பன யாவ ருக்க²ஸ்ஸ மூலமத்தம்பி திட்ட²தி, தாவ ந நஸ்ஸதீதி வேதி³தப்³ப³ங். தத்த² தத்த² பலுஜ்ஜித்வாதி தத்த² தத்த² பி⁴ஜ்ஜித்வா. ஸேஸமெத்த² ஸுவிஞ்ஞெய்யமேவ.
Puññakammato eti uppajjatīti ayo, vaḍḍhi. Tappaṭikkhepena anayo, avaḍḍhīti āha ‘‘anayaṃ āpajjatīti avaḍḍhiṃ āpajjatī’’ti. Māluvāsipāṭikā nāma dīghasaṇṭhānaṃ māluvāpakkaṃ , māluvāphalapoṭṭhalikāti attho . Phalitāyāti ātapena sussitvā bhinnāya. Vaṭarukkhādīnaṃ mūleti vaṭarukkhādīnaṃ samīpe. Sakabhāvena saṇṭhātuṃ na sakkontīti kasmā na sakkonti? Bhavanavināsabhayā. Rukkhamūle patitamāluvābījato hi latā uppajjitvā rukkhaṃ abhiruhati. Sā mahāpattā ceva bahupattā ca mahākolirapattasaṇṭhānehi tato ca mahantatarehi sākhāviṭapantarehi pattehi samannāgatā. Atha naṃ rukkhaṃ mūlato paṭṭhāya vinandhamānā sabbaviṭapāni sañchādetvā mahantaṃ bhāraṃ janetvā tiṭṭhati, sā vāte vāyante deve vā vassante oghanaheṭṭhāgatā olambanahetubhūtaṃ ghanabhāvaṃ janetvā tassa rukkhassa sabbasākhaṃ bhijjati, bhūmiyaṃ nipāteti. Tato tasmiṃ rukkhe patiṭṭhitavimānaṃ bhijjati vinassati. Iti tā devatāyo bhavanavināsabhayā sakabhāvena saṇṭhātuṃ na sakkonti. Ettha ca yaṃ sākhaṭṭhakavimānaṃ hoti, taṃ sākhāsu bhijjamānāsu tattha tattheva bhijjitvā sabbasākhāsu bhinnāsu sabbaṃ bhijjati, rukkhaṭṭhakavimānaṃ pana yāva rukkhassa mūlamattampi tiṭṭhati, tāva na nassatīti veditabbaṃ. Tattha tattha palujjitvāti tattha tattha bhijjitvā. Sesamettha suviññeyyameva.
அகுஸலமூலஸுத்தவண்ணனா நிட்டி²தா.
Akusalamūlasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. அகுஸலமூலஸுத்தங் • 9. Akusalamūlasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. அகுஸலமூலஸுத்தவண்ணனா • 9. Akusalamūlasuttavaṇṇanā
