| Library / Tipiṭaka / တိပိဋက • Tipiṭaka / ဓမ္မသင္ဂဏိ-အဋ္ဌကထာ • Dhammasaṅgaṇi-aṭṭhakathā |
အကုသလဝိပာကကထာ
Akusalavipākakathā
၅၅၆. ဣတော ပရာနိ အကုသလဝိပာကာနိ – ပဉ္စ စက္ခုသောတဃာနဇိဝ္ဟာကာယဝိညာဏာနိ, ဧကာ မနောဓာတု, ဧကာ မနောဝိညာဏဓာတူတိ ဣမာနိ သတ္တ စိတ္တာနိ – ပာဠိတော စ အတ္ထတော စ ဟေဋ္ဌာ ဝုတ္တေဟိ တာဒိသေဟေဝ ကုသလဝိပာကစိတ္တေဟိ သဒိသာနိ။
556. Ito parāni akusalavipākāni – pañca cakkhusotaghānajivhākāyaviññāṇāni, ekā manodhātu, ekā manoviññāṇadhātūti imāni satta cittāni – pāḷito ca atthato ca heṭṭhā vuttehi tādiseheva kusalavipākacittehi sadisāni.
ကေဝလဉ္ဟိ တာနိ ကုသလကမ္မပစ္စယာနိ ဣမာနိ အကုသလကမ္မပစ္စယာနိ။ တာနိ စ ဣဋ္ဌဣဋ္ဌမဇ္ဈတ္တေသု အာရမ္မဏေသု ဝတ္တန္တိ, ဣမာနိ အနိဋ္ဌအနိဋ္ဌမဇ္ဈတ္တေသု။ တတ္ထ စ သုခသဟဂတံ ကာယဝိညာဏံ, ဣဓ ဒုက္ခသဟဂတံ ။ တတ္ထ စ ဥပေက္ခာသဟဂတာ မနောဝိညာဏဓာတု မနုသ္သေသု ဇစ္စန္ဓာဒီနံ ပဋိသန္ဓိံ အာဒိံ ကတ္ဝာ ပဉ္စသု ဌာနေသု ဝိပစ္စတိ။ ဣဓ ပန ဧကာဒသဝိဓေနာပိ အကုသလစိတ္တေန ကမ္မေ အာယူဟိတေ ကမ္မကမ္မနိမိတ္တဂတိနိမိတ္တေသု အညတရံ အာရမ္မဏံ ကတ္ဝာ စတူသု အပာယေသု ပဋိသန္ဓိ ဟုတ္ဝာ ဝိပစ္စတိ; ဒုတိယဝာရတော ပဋ္ဌာယ ယာဝတာယုကံ ဘဝင္ဂံ ဟုတ္ဝာ, အနိဋ္ဌအနိဋ္ဌမဇ္ဈတ္တာရမ္မဏာယ ပဉ္စဝိညာဏဝီထိယာ သန္တီရဏံ ဟုတ္ဝာ, ဗလဝာရမ္မဏေ ဆသု ဒ္ဝာရေသု တဒာရမ္မဏံ ဟုတ္ဝာ, မရဏကာလေ စုတိ ဟုတ္ဝာတိ, ဧဝံ ပဉ္စသု ဧဝ ဌာနေသု ဝိပစ္စတီတိ။
Kevalañhi tāni kusalakammapaccayāni imāni akusalakammapaccayāni. Tāni ca iṭṭhaiṭṭhamajjhattesu ārammaṇesu vattanti, imāni aniṭṭhaaniṭṭhamajjhattesu. Tattha ca sukhasahagataṃ kāyaviññāṇaṃ, idha dukkhasahagataṃ . Tattha ca upekkhāsahagatā manoviññāṇadhātu manussesu jaccandhādīnaṃ paṭisandhiṃ ādiṃ katvā pañcasu ṭhānesu vipaccati. Idha pana ekādasavidhenāpi akusalacittena kamme āyūhite kammakammanimittagatinimittesu aññataraṃ ārammaṇaṃ katvā catūsu apāyesu paṭisandhi hutvā vipaccati; dutiyavārato paṭṭhāya yāvatāyukaṃ bhavaṅgaṃ hutvā, aniṭṭhaaniṭṭhamajjhattārammaṇāya pañcaviññāṇavīthiyā santīraṇaṃ hutvā, balavārammaṇe chasu dvāresu tadārammaṇaṃ hutvā, maraṇakāle cuti hutvāti, evaṃ pañcasu eva ṭhānesu vipaccatīti.
အကုသလဝိပာကကထာ နိဋ္ဌိတာ။
Akusalavipākakathā niṭṭhitā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ဓမ္မသင္ဂဏီပာဠိ • Dhammasaṅgaṇīpāḷi / အကုသလဝိပာကအဗ္ယာကတံ • Akusalavipākaabyākataṃ
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ဓမ္မသင္ဂဏီ-မူလဋီကာ • Dhammasaṅgaṇī-mūlaṭīkā / အကုသလဝိပာကကထာဝဏ္ဏနာ • Akusalavipākakathāvaṇṇanā
