| Library / Tipiṭaka / තිපිටක • Tipiṭaka / ධම්‌මසඞ්‌ගණි-අට්‌ඨකථා • Dhammasaṅgaṇi-aṭṭhakathā |
අකුසලවිපාකකථා
Akusalavipākakathā
556. ඉතො පරානි අකුසලවිපාකානි – පඤ්‌ච චක්‌ඛුසොතඝානජිව්‌හාකායවිඤ්‌ඤාණානි, එකා මනොධාතු, එකා මනොවිඤ්‌ඤාණධාතූති ඉමානි සත්‌ත චිත්‌තානි – පාළිතො ච අත්‌ථතො ච හෙට්‌ඨා වුත්‌තෙහි තාදිසෙහෙව කුසලවිපාකචිත්‌තෙහි සදිසානි.
556. Ito parāni akusalavipākāni – pañca cakkhusotaghānajivhākāyaviññāṇāni, ekā manodhātu, ekā manoviññāṇadhātūti imāni satta cittāni – pāḷito ca atthato ca heṭṭhā vuttehi tādiseheva kusalavipākacittehi sadisāni.
කෙවලඤ්‌හි තානි කුසලකම්‌මපච්‌චයානි ඉමානි අකුසලකම්‌මපච්‌චයානි. තානි ච ඉට්‌ඨඉට්‌ඨමජ්‌ඣත්‌තෙසු ආරම්‌මණෙසු වත්‌තන්‌ති, ඉමානි අනිට්‌ඨඅනිට්‌ඨමජ්‌ඣත්‌තෙසු. තත්‌ථ ච සුඛසහගතං කායවිඤ්‌ඤාණං, ඉධ දුක්‌ඛසහගතං . තත්‌ථ ච උපෙක්‌ඛාසහගතා මනොවිඤ්‌ඤාණධාතු මනුස්‌සෙසු ජච්‌චන්‌ධාදීනං පටිසන්‌ධිං ආදිං කත්‌වා පඤ්‌චසු ඨානෙසු විපච්‌චති. ඉධ පන එකාදසවිධෙනාපි අකුසලචිත්‌තෙන කම්‌මෙ ආයූහිතෙ කම්‌මකම්‌මනිමිත්‌තගතිනිමිත්‌තෙසු අඤ්‌ඤතරං ආරම්‌මණං කත්‌වා චතූසු අපායෙසු පටිසන්‌ධි හුත්‌වා විපච්‌චති; දුතියවාරතො පට්‌ඨාය යාවතායුකං භවඞ්‌ගං හුත්‌වා, අනිට්‌ඨඅනිට්‌ඨමජ්‌ඣත්‌තාරම්‌මණාය පඤ්‌චවිඤ්‌ඤාණවීථියා සන්‌තීරණං හුත්‌වා, බලවාරම්‌මණෙ ඡසු ද්‌වාරෙසු තදාරම්‌මණං හුත්‌වා, මරණකාලෙ චුති හුත්‌වාති, එවං පඤ්‌චසු එව ඨානෙසු විපච්‌චතීති.
Kevalañhi tāni kusalakammapaccayāni imāni akusalakammapaccayāni. Tāni ca iṭṭhaiṭṭhamajjhattesu ārammaṇesu vattanti, imāni aniṭṭhaaniṭṭhamajjhattesu. Tattha ca sukhasahagataṃ kāyaviññāṇaṃ, idha dukkhasahagataṃ . Tattha ca upekkhāsahagatā manoviññāṇadhātu manussesu jaccandhādīnaṃ paṭisandhiṃ ādiṃ katvā pañcasu ṭhānesu vipaccati. Idha pana ekādasavidhenāpi akusalacittena kamme āyūhite kammakammanimittagatinimittesu aññataraṃ ārammaṇaṃ katvā catūsu apāyesu paṭisandhi hutvā vipaccati; dutiyavārato paṭṭhāya yāvatāyukaṃ bhavaṅgaṃ hutvā, aniṭṭhaaniṭṭhamajjhattārammaṇāya pañcaviññāṇavīthiyā santīraṇaṃ hutvā, balavārammaṇe chasu dvāresu tadārammaṇaṃ hutvā, maraṇakāle cuti hutvāti, evaṃ pañcasu eva ṭhānesu vipaccatīti.
අකුසලවිපාකකථා නිට්‌ඨිතා.
Akusalavipākakathā niṭṭhitā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / ධම්‌මසඞ්‌ගණීපාළි • Dhammasaṅgaṇīpāḷi / අකුසලවිපාකඅබ්‍යාකතං • Akusalavipākaabyākataṃ
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / ධම්‌මසඞ්‌ගණී-මූලටීකා • Dhammasaṅgaṇī-mūlaṭīkā / අකුසලවිපාකකථාවණ්‌ණනා • Akusalavipākakathāvaṇṇanā
