| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
৮. অলব্ভনীযঠানসুত্তৰণ্ণনা
8. Alabbhanīyaṭhānasuttavaṇṇanā
৪৮. অট্ঠমে অলব্ভনীযানীতি অলদ্ধব্বানি, ন সক্কা লভিতুং। ঠানানীতি কারণানি। জরাধম্মং মা জীরীতি যং ময্হং জরাসভাৰং, তং মা জীরতু। সেসপদেসুপি এসেৰ নযো। নচ্ছাদেয্যাতি ন রুচ্চেয্য। অব্বুহীতি নীহরি।
48. Aṭṭhame alabbhanīyānīti aladdhabbāni, na sakkā labhituṃ. Ṭhānānīti kāraṇāni. Jarādhammaṃ mā jīrīti yaṃ mayhaṃ jarāsabhāvaṃ, taṃ mā jīratu. Sesapadesupi eseva nayo. Nacchādeyyāti na rucceyya. Abbuhīti nīhari.
যতোতি যস্মিং কালে। আপদাসূতি উপদ্দৰেসু। ন ৰেধতীতি ন কম্পতি নানুসোচতি। অত্থৰিনিচ্ছযঞ্ঞূতি কারণত্থৰিনিচ্ছযে কুসলো। পুরাণন্তি নিব্বিকারতায পোরাণকমেৰ। জপ্পেনাতি ৰণ্ণভণনেন। মন্তেনাতি মহানুভাৰমন্তপরিৰত্তনেন। সুভাসিতেনাতি সুভাসিতকথনেন। অনুপ্পদানেনাতি সতস্স ৰা সহস্সস্স ৰা দানেন। পৰেণিযা ৰাতি কুলৰংসেন ৰা, ‘‘ইদং অম্হাকং পৰেণিযা আচিণ্ণং, ইদং অনাচিণ্ণ’’ন্তি এৰং পৰেণিকথনেনাতি অত্থো। যথা যথা যত্থ লভেথ অত্থন্তি এতেসু জপ্পাদীসু যেন যেন যত্থ যত্থ ঠানে জরাধম্মাদীনং অজীরণতাদিঅত্থং লভেয্য। তথা তথা তত্থ পরক্কমেয্যাতি তেন তেন তস্মিং তস্মিং ঠানে পরক্কমং করেয্য। কম্মং দল়্হন্তি ৰট্টগামিকম্মং মযা থিরং কত্ৰা আযূহিতং, স্ৰাহং ইদানি কিন্তি করোমীতি এৰং পচ্চৰেক্খিত্ৰা অধিৰাসেয্যাতি।
Yatoti yasmiṃ kāle. Āpadāsūti upaddavesu. Na vedhatīti na kampati nānusocati. Atthavinicchayaññūti kāraṇatthavinicchaye kusalo. Purāṇanti nibbikāratāya porāṇakameva. Jappenāti vaṇṇabhaṇanena. Mantenāti mahānubhāvamantaparivattanena. Subhāsitenāti subhāsitakathanena. Anuppadānenāti satassa vā sahassassa vā dānena. Paveṇiyāvāti kulavaṃsena vā, ‘‘idaṃ amhākaṃ paveṇiyā āciṇṇaṃ, idaṃ anāciṇṇa’’nti evaṃ paveṇikathanenāti attho. Yathā yathā yattha labhetha atthanti etesu jappādīsu yena yena yattha yattha ṭhāne jarādhammādīnaṃ ajīraṇatādiatthaṃ labheyya. Tathā tathā tattha parakkameyyāti tena tena tasmiṃ tasmiṃ ṭhāne parakkamaṃ kareyya. Kammaṃ daḷhanti vaṭṭagāmikammaṃ mayā thiraṃ katvā āyūhitaṃ, svāhaṃ idāni kinti karomīti evaṃ paccavekkhitvā adhivāseyyāti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৮. অলব্ভনীযঠানসুত্তং • 8. Alabbhanīyaṭhānasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৭-৮. ধনসুত্তাদিৰণ্ণনা • 7-8. Dhanasuttādivaṇṇanā
