| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
8. අලබ්‌භනීයඨානසුත්‌තවණ්‌ණනා
8. Alabbhanīyaṭhānasuttavaṇṇanā
48. අට්‌ඨමෙ අලබ්‌භනීයානීති අලද්‌ධබ්‌බානි, න සක්‌කා ලභිතුං. ඨානානීති කාරණානි. ජරාධම්‌මං මා ජීරීති යං මය්‌හං ජරාසභාවං, තං මා ජීරතු. සෙසපදෙසුපි එසෙව නයො. නච්‌ඡාදෙය්‍යාති න රුච්‌චෙය්‍ය. අබ්‌බුහීති නීහරි.
48. Aṭṭhame alabbhanīyānīti aladdhabbāni, na sakkā labhituṃ. Ṭhānānīti kāraṇāni. Jarādhammaṃ mā jīrīti yaṃ mayhaṃ jarāsabhāvaṃ, taṃ mā jīratu. Sesapadesupi eseva nayo. Nacchādeyyāti na rucceyya. Abbuhīti nīhari.
යතොති යස්‌මිං කාලෙ. ආපදාසූති උපද්‌දවෙසු. න වෙධතීති න කම්‌පති නානුසොචති. අත්‌ථවිනිච්‌ඡයඤ්‌ඤූති කාරණත්‌ථවිනිච්‌ඡයෙ කුසලො. පුරාණන්‌ති නිබ්‌බිකාරතාය පොරාණකමෙව. ජප්‌පෙනාති වණ්‌ණභණනෙන. මන්‌තෙනාති මහානුභාවමන්‌තපරිවත්‌තනෙන. සුභාසිතෙනාති සුභාසිතකථනෙන. අනුප්‌පදානෙනාති සතස්‌ස වා සහස්‌සස්‌ස වා දානෙන. පවෙණියා වාති කුලවංසෙන වා, ‘‘ඉදං අම්‌හාකං පවෙණියා ආචිණ්‌ණං, ඉදං අනාචිණ්‌ණ’’න්‌ති එවං පවෙණිකථනෙනාති අත්‌ථො. යථා යථා යත්‌ථ ලභෙථ අත්‌ථන්‌ති එතෙසු ජප්‌පාදීසු යෙන යෙන යත්‌ථ යත්‌ථ ඨානෙ ජරාධම්‌මාදීනං අජීරණතාදිඅත්‌ථං ලභෙය්‍ය. තථා තථා තත්‌ථ පරක්‌කමෙය්‍යාති තෙන තෙන තස්‌මිං තස්‌මිං ඨානෙ පරක්‌කමං කරෙය්‍ය. කම්‌මං දළ්‌හන්‌ති වට්‌ටගාමිකම්‌මං මයා ථිරං කත්‌වා ආයූහිතං, ස්‌වාහං ඉදානි කින්‌ති කරොමීති එවං පච්‌චවෙක්‌ඛිත්‌වා අධිවාසෙය්‍යාති.
Yatoti yasmiṃ kāle. Āpadāsūti upaddavesu. Na vedhatīti na kampati nānusocati. Atthavinicchayaññūti kāraṇatthavinicchaye kusalo. Purāṇanti nibbikāratāya porāṇakameva. Jappenāti vaṇṇabhaṇanena. Mantenāti mahānubhāvamantaparivattanena. Subhāsitenāti subhāsitakathanena. Anuppadānenāti satassa vā sahassassa vā dānena. Paveṇiyāvāti kulavaṃsena vā, ‘‘idaṃ amhākaṃ paveṇiyā āciṇṇaṃ, idaṃ anāciṇṇa’’nti evaṃ paveṇikathanenāti attho. Yathā yathā yattha labhetha atthanti etesu jappādīsu yena yena yattha yattha ṭhāne jarādhammādīnaṃ ajīraṇatādiatthaṃ labheyya. Tathā tathā tattha parakkameyyāti tena tena tasmiṃ tasmiṃ ṭhāne parakkamaṃ kareyya. Kammaṃ daḷhanti vaṭṭagāmikammaṃ mayā thiraṃ katvā āyūhitaṃ, svāhaṃ idāni kinti karomīti evaṃ paccavekkhitvā adhivāseyyāti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 8. අලබ්‌භනීයඨානසුත්‌තං • 8. Alabbhanīyaṭhānasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 7-8. ධනසුත්‌තාදිවණ්‌ණනා • 7-8. Dhanasuttādivaṇṇanā
