| Library / Tipiṭaka / д̇ибидага • Tipiṭaka / маж̇жхиманигааяа (адтагат̇аа) • Majjhimanikāya (aṭṭhakathā) |
2. алаг̇ад̣̇д̣̇уубамасуд̇д̇аван̣н̣анаа
2. Alagaddūpamasuttavaṇṇanā
234. звам̣ мз суд̇анд̇и алаг̇ад̣̇д̣̇уубамасуд̇д̇ам̣. д̇ад̇т̇а г̇ад̣̇д̇хз б̣аад̇хаяим̣сууд̇и г̇ад̣̇д̇хаб̣аад̇хино, г̇ад̣̇д̇хаб̣аад̇хино буб̣б̣абурисаа ассаад̇и г̇ад̣̇д̇хаб̣аад̇хибуб̣б̣о, д̇асса г̇ад̣̇д̇хаб̣аад̇хибуб̣б̣асса, г̇иж̇жхагхаад̇агагулаббасуд̇ассаад̇и ад̇т̇о. саг̇г̇амогкаанам̣ анд̇арааяам̣ гаронд̇ийд̇и анд̇арааяигаа. д̇з гаммагилзсавибаагаубаваад̣̇ааан̣аавийд̇иггамавасзна бан̃жавид̇хаа. д̇ад̇т̇а бан̃жаананд̇арияад̇хаммаа гамманд̇арааяигаа наама. д̇ат̇аа бхигкунийд̣̇уусагагаммам̣, д̇ам̣ бана могкассзва анд̇арааяам̣ гарод̇и, на саг̇г̇асса. нияад̇амижчаад̣̇идтид̇хаммаа гилзсанд̇арааяигаа наама. бан̣д̣агад̇иражчаанаг̇ад̇аубхад̇об̣яан̃ж̇анагаанам̣ бадисанд̇хид̇хаммаа вибааганд̇арааяигаа наама. арияуубаваад̣̇ад̇хаммаа убаваад̣̇анд̇арааяигаа наама, д̇з бана яаава арияз на камаабзнд̇и, д̇аавад̣̇зва, на д̇ад̇о барам̣. сан̃жижжа вийд̇игганд̇аа сад̇д̇а аабад̇д̇игканд̇хаа аан̣аавийд̇иггаманд̇арааяигаа наама. д̇зби яаава бхигкубхаавам̣ ваа бадиж̇аанаад̇и, на вудтаад̇и ваа, на д̣̇зсзд̇и ваа, д̇аавад̣̇зва, на д̇ад̇о барам̣.
234.Evaṃme sutanti alagaddūpamasuttaṃ. Tattha gaddhe bādhayiṃsūti gaddhabādhino, gaddhabādhino pubbapurisā assāti gaddhabādhipubbo, tassa gaddhabādhipubbassa, gijjhaghātakakulappasutassāti attho. Saggamokkhānaṃ antarāyaṃ karontīti antarāyikā. Te kammakilesavipākaupavādaāṇāvītikkamavasena pañcavidhā. Tattha pañcānantariyadhammā kammantarāyikā nāma. Tathā bhikkhunīdūsakakammaṃ, taṃ pana mokkhasseva antarāyaṃ karoti, na saggassa. Niyatamicchādiṭṭhidhammā kilesantarāyikā nāma. Paṇḍakatiracchānagataubhatobyañjanakānaṃ paṭisandhidhammā vipākantarāyikā nāma. Ariyūpavādadhammā upavādantarāyikā nāma, te pana yāva ariye na khamāpenti, tāvadeva, na tato paraṃ. Sañcicca vītikkantā satta āpattikkhandhā āṇāvītikkamantarāyikā nāma. Tepi yāva bhikkhubhāvaṃ vā paṭijānāti, na vuṭṭhāti vā, na deseti vā, tāvadeva, na tato paraṃ.
д̇ад̇рааяам̣ бхигку б̣ахуссуд̇о д̇хаммагат̇иго сзсанд̇арааяигз ж̇аанаад̇и, винаяз бана аговид̣̇ад̇д̇аа бан̣н̣ад̇д̇ивийд̇иггаманд̇арааяигз на ж̇аанаад̇и, д̇асмаа рахог̇ад̇о звам̣ жинд̇зси – имз ааг̇ааригаа бан̃жа гаамаг̇ун̣з барибхун̃ж̇анд̇аа сод̇аабаннааби сагад̣̇ааг̇ааминоби анааг̇ааминоби хонд̇и. бхигкууби манаабигаани жагкувин̃н̃зяяаани руубаани бассанд̇и…бз… гааяавин̃н̃зяяз подтаб̣б̣з пусанд̇и, муд̣̇угаани ад̇т̇аран̣абаавуран̣аад̣̇ийни барибхун̃ж̇анд̇и, зд̇ам̣ саб̣б̣ам̣ ваддад̇и. гасмаа ид̇т̇ийнам̣язва руубасад̣̇д̣̇аг̇анд̇харасаподтаб̣б̣аа на вадданд̇и? зд̇зби вадданд̇ийд̇и. звам̣ расзна расам̣ сам̣санд̣̇зд̇ваа сажчанд̣̇арааг̇абарибхог̇ан̃жа нижчанд̣̇арааг̇абарибхог̇ан̃жа згам̣ гад̇ваа т̇уулаваагзхи сад̣̇д̇хим̣ ад̇исукумасуд̇д̇ам̣ убанзнд̇о вияа, саасабзна сад̣̇д̇хим̣ синзрум̣ убасам̣харанд̇о вияа, баабагам̣ д̣̇идтиг̇ад̇ам̣ уббаад̣̇зд̇ваа, ‘‘гим̣ бхаг̇авад̇аа махаасамуд̣̇д̣̇ам̣ б̣анд̇ханд̇зна вияа махад̇аа уссаахзна батамабаарааж̇игам̣ бан̃н̃ад̇д̇ам̣, над̇т̇и зд̇т̇а д̣̇осо’’д̇и саб̣б̣ан̃н̃уд̇ан̃н̃аан̣зна сад̣̇д̇хим̣ бадивируж̇жханд̇о взсаараж̇ж̇ан̃аан̣ам̣ бадиб̣ааханд̇о арияамаг̇г̇з каан̣уган̣дагаад̣̇ийни багкибанд̇о мзт̇унад̇хаммз д̣̇осо над̇т̇ийд̇и ж̇инасса аан̣аажаггз бахаарам̣ ад̣̇ааси. д̇знааха – ‘‘д̇ат̇аахам̣ бхаг̇авад̇аа д̇хаммам̣ д̣̇зсид̇ам̣ ааж̇аанаамий’’д̇иаад̣̇и.
Tatrāyaṃ bhikkhu bahussuto dhammakathiko sesantarāyike jānāti, vinaye pana akovidattā paṇṇattivītikkamantarāyike na jānāti, tasmā rahogato evaṃ cintesi – ime āgārikā pañca kāmaguṇe paribhuñjantā sotāpannāpi sakadāgāminopi anāgāminopi honti. Bhikkhūpi manāpikāni cakkhuviññeyyāni rūpāni passanti…pe… kāyaviññeyye phoṭṭhabbe phusanti, mudukāni attharaṇapāvuraṇādīni paribhuñjanti, etaṃ sabbaṃ vaṭṭati. Kasmā itthīnaṃyeva rūpasaddagandharasaphoṭṭhabbā na vaṭṭanti? Etepi vaṭṭantīti. Evaṃ rasena rasaṃ saṃsandetvā sacchandarāgaparibhogañca nicchandarāgaparibhogañca ekaṃ katvā thūlavākehi saddhiṃ atisukhumasuttaṃ upanento viya, sāsapena saddhiṃ sineruṃ upasaṃharanto viya, pāpakaṃ diṭṭhigataṃ uppādetvā, ‘‘kiṃ bhagavatā mahāsamuddaṃ bandhantena viya mahatā ussāhena paṭhamapārājikaṃ paññattaṃ, natthi ettha doso’’ti sabbaññutaññāṇena saddhiṃ paṭivirujjhanto vesārajjañāṇaṃ paṭibāhanto ariyamagge khāṇukaṇṭakādīni pakkhipanto methunadhamme doso natthīti jinassa āṇācakke pahāraṃ adāsi. Tenāha – ‘‘tathāhaṃ bhagavatā dhammaṃ desitaṃ ājānāmī’’tiādi.
звам̣ б̣яаа код̇и звам̣ вияа ко. самануяун̃ж̇анд̇ийд̇иаад̣̇ийсу гим̣ лад̣̇д̇хиго д̇вам̣, лад̣̇д̇хим̣ вад̣̇зхийд̇и бужчамаанаа самануяун̃ж̇анд̇и наама. д̣̇идтим̣ бад̇идтаабзнд̇аа самануг̇г̇ааханд̇и наама. гзна гааран̣зна звам̣ вад̣̇асийд̇и гааран̣ам̣ бужчанд̇аа саманубхаасанд̇и наама. адтиган̇галуубамаад̇иаад̣̇ийсу (ма. ни. 2.42-48) адтиган̇галуубамаа аббассаад̣̇адтзна. мам̣сабзсуубамаа б̣ахусаад̇хааран̣адтзна. д̇ин̣уггуубамаа ануд̣̇аханадтзна. ан̇г̇аарагаасуубамаа махаабхид̇аабанадтзна. субинагуубамаа ид̇д̇арабажжубадтаанадтзна. яаажид̇агуубамаа д̇аавагаалигадтзна. ругкапалуубамаа саб̣б̣ан̇г̇абажжан̇г̇абалибхан̃ж̇анадтзна. асисуунуубамаа ад̇хигудданадтзна. сад̇д̇исуулуубамаа винивиж̇жханадтзна. саббасируубамаа саасан̇гасаббадибхаяадтзна. т̇аамасаад̇и д̣̇идтит̇аамзна. бараамаасаад̇и д̣̇идтибараамаасзна. абхинивисса вохарад̇ийд̇и ад̇хидтахид̇ваа вохарад̇и д̣̇ийбзд̇и ваа.
Evaṃbyā khoti evaṃ viya kho. Samanuyuñjantītiādīsu kiṃ laddhiko tvaṃ, laddhiṃ vadehīti pucchamānā samanuyuñjanti nāma. Diṭṭhiṃ patiṭṭhāpentā samanuggāhanti nāma. Kena kāraṇena evaṃ vadasīti kāraṇaṃ pucchantā samanubhāsanti nāma. Aṭṭhikaṅkalūpamātiādīsu (ma. ni. 2.42-48) aṭṭhikaṅkalūpamā appassādaṭṭhena. Maṃsapesūpamā bahusādhāraṇaṭṭhena. Tiṇukkūpamā anudahanaṭṭhena. Aṅgārakāsūpamā mahābhitāpanaṭṭhena. Supinakūpamā ittarapaccupaṭṭhānaṭṭhena. Yācitakūpamā tāvakālikaṭṭhena. Rukkhaphalūpamā sabbaṅgapaccaṅgapalibhañjanaṭṭhena. Asisūnūpamā adhikuṭṭanaṭṭhena. Sattisūlūpamā vinivijjhanaṭṭhena. Sappasirūpamā sāsaṅkasappaṭibhayaṭṭhena. Thāmasāti diṭṭhithāmena. Parāmāsāti diṭṭhiparāmāsena. Abhinivissa voharatīti adhiṭṭhahitvā voharati dīpeti vā.
235. яад̇о ко д̇з бхигкууд̇и яад̣̇аа д̇з бхигкуу. звам̣ б̣яаа ко ахам̣, бханд̇з, бхаг̇авад̇аад̇и ид̣̇ам̣ зса ад̇д̇ано аж̇жхаасаязна над̇т̇ийд̇и вад̇д̇угаамоби бхаг̇авад̇о аанубхаавзна самбадижчад̇и, б̣уд̣̇д̇хаанам̣ гира саммукаа д̣̇вз гат̇аа гат̇зд̇ум̣ самад̇т̇о наама над̇т̇и.
235.Yato kho te bhikkhūti yadā te bhikkhū. Evaṃbyā kho ahaṃ, bhante, bhagavatāti idaṃ esa attano ajjhāsayena natthīti vattukāmopi bhagavato ānubhāvena sampaṭicchati, buddhānaṃ kira sammukhā dve kathā kathetuṃ samattho nāma natthi.
236. гасса ко наама д̇вам̣ могхабурисаад̇и д̇вам̣ могхабуриса гасса кад̇д̇ияасса ваа б̣раахман̣асса ваа взссасса ваа суд̣̇д̣̇асса ваа г̇ахадтасса ваа баб̣б̣аж̇ид̇асса ваа д̣̇звасса ваа мануссасса ваа маяаа звам̣ д̇хаммам̣ д̣̇зсид̇ам̣ ааж̇аанааси. ат̇а ко бхаг̇аваа бхигкуу ааманд̇зсийд̇и аяам̣ баадиязгго анусанд̇хи. аридто гира жинд̇зси – ‘‘бхаг̇аваа мам̣ могхабурисод̇и вад̣̇ад̇и, на ко бана могхабурисаад̇и вуд̇д̇амад̇д̇агзна маг̇г̇апалаанам̣ убаниссаяо на ход̇и. убасзнамби хи ван̇г̇анд̇абуд̇д̇ам̣, ‘ад̇илахум̣ ко д̇вам̣, могхабуриса, б̣аахуллааяа аавад̇д̇о’д̇и (махаава. 75) бхаг̇аваа могхабурисаваад̣̇зна овад̣̇и. т̇зро абарабхааг̇з гхадзнд̇о вааяаманд̇о ча абхин̃н̃аа сажчаагааси. ахамби д̇ат̇ааруубам̣ вийрияам̣ баг̇г̇ан̣хид̇ваа маг̇г̇апалаани ниб̣б̣ад̇д̇зссаамий’’д̇и. ат̇асса бхаг̇аваа б̣анд̇ханаа бавуд̇д̇асса бан̣д̣убалаасасса вияа авирул̣хибхаавам̣ д̣̇ассзнд̇о имам̣ д̣̇зсанам̣ аарабхи.
236.Kassa kho nāma tvaṃ moghapurisāti tvaṃ moghapurisa kassa khattiyassa vā brāhmaṇassa vā vessassa vā suddassa vā gahaṭṭhassa vā pabbajitassa vā devassa vā manussassa vā mayā evaṃ dhammaṃ desitaṃ ājānāsi. Atha kho bhagavā bhikkhū āmantesīti ayaṃ pāṭiyekko anusandhi. Ariṭṭho kira cintesi – ‘‘bhagavā maṃ moghapurisoti vadati, na kho pana moghapurisāti vuttamattakena maggaphalānaṃ upanissayo na hoti. Upasenampi hi vaṅgantaputtaṃ, ‘atilahuṃ kho tvaṃ, moghapurisa, bāhullāya āvatto’ti (mahāva. 75) bhagavā moghapurisavādena ovadi. Thero aparabhāge ghaṭento vāyamanto cha abhiññā sacchākāsi. Ahampi tathārūpaṃ vīriyaṃ paggaṇhitvā maggaphalāni nibbattessāmī’’ti. Athassa bhagavā bandhanā pavuttassa paṇḍupalāsassa viya aviruḷhibhāvaṃ dassento imaṃ desanaṃ ārabhi.
усмийгад̇обийд̇и , бхигкавз, д̇умхз гинд̇и ман̃н̃ат̇а, аяам̣ аридто звам̣лад̣̇д̇хиго саб̣б̣ан̃н̃уд̇ан̃н̃аан̣зна бадивируж̇жхид̇ваа взсаараж̇ж̇ан̃аан̣ам̣ бадиб̣аахид̇ваа д̇ат̇ааг̇ад̇асса аан̣аажаггз бахаарам̣ д̣̇ад̣̇амаано аби ну имасмим̣ д̇хаммавинаяз усмийгад̇оби? яат̇аа ниб̣б̣уд̇зби маханд̇з аг̇г̇игканд̇хз каж̇ж̇убанагамад̇д̇ааби аг̇г̇ибабадигаа ход̇иязва, яам̣ ниссааяа буна махаааг̇г̇игканд̇хо бхавзяяа. гим̣ ну ко звам̣ имасса аббамад̇д̇игааби н̃аан̣усмаа ад̇т̇и, яам̣ ниссааяа вааяаманд̇о маг̇г̇апалаани ниб̣б̣ад̇д̇зяяаад̇и? но хзд̇ам̣, бханд̇зд̇и, бханд̇з, звам̣лад̣̇д̇хигасса гуд̇о зваруубаа н̃аан̣усмаад̇и? маг̇г̇апалаанам̣ бажжаяасамад̇т̇ааяа н̃аан̣усмааяа усмийгад̇абхаавам̣ бадигкибанд̇аа вад̣̇анд̇и. ман̇губхууд̇од̇и нид̇д̇зж̇абхууд̇о. бад̇д̇агканд̇ход̇и бад̇ид̇агканд̇хо. аббадибхаанод̇и гин̃жи бадибхаанам̣ абассанд̇о бхиннабадибхаано зваруубамби наама нияяаанигасаасанам̣ лабхид̇ваа авирул̣хид̇хаммо гирамхи самуг̇гхаад̇ид̇абажжаяо ж̇аад̇од̇и ад̇д̇ано абхаб̣б̣ад̇ам̣ бажжавзгканд̇о баад̣̇ан̇г̇удтагзна бхуумим̣ кан̣амаано нисийд̣̇и.
Usmīkatopīti , bhikkhave, tumhe kinti maññatha, ayaṃ ariṭṭho evaṃladdhiko sabbaññutaññāṇena paṭivirujjhitvā vesārajjañāṇaṃ paṭibāhitvā tathāgatassa āṇācakke pahāraṃ dadamāno api nu imasmiṃ dhammavinaye usmīkatopi? Yathā nibbutepi mahante aggikkhandhe khajjupanakamattāpi aggipapaṭikā hotiyeva, yaṃ nissāya puna mahāaggikkhandho bhaveyya. Kiṃ nu kho evaṃ imassa appamattikāpi ñāṇusmā atthi, yaṃ nissāya vāyamanto maggaphalāni nibbatteyyāti? No hetaṃ, bhanteti, bhante, evaṃladdhikassa kuto evarūpā ñāṇusmāti? Maggaphalānaṃ paccayasamatthāya ñāṇusmāya usmīkatabhāvaṃ paṭikkhipantā vadanti. Maṅkubhūtoti nittejabhūto. Pattakkhandhoti patitakkhandho. Appaṭibhānoti kiñci paṭibhānaṃ apassanto bhinnapaṭibhāno evarūpampi nāma niyyānikasāsanaṃ labhitvā aviruḷhidhammo kiramhi samugghātitapaccayo jātoti attano abhabbataṃ paccavekkhanto pādaṅguṭṭhakena bhūmiṃ khaṇamāno nisīdi.
бан̃н̃ааяиссаси код̇и аяамби баадиязгго анусанд̇хи. аридто гира жинд̇зси – ‘‘бхаг̇аваа маяхам̣ маг̇г̇апалаанам̣ убаниссаяо бажчиннод̇и вад̣̇ад̇и, на ко бана б̣уд̣̇д̇хаа саубаниссаяаанам̣язва д̇хаммам̣ д̣̇зсзнд̇и, анубаниссаяаанамби д̣̇зсзнд̇и, ахам̣ сад̇т̇у санд̇игаа суг̇ад̇оваад̣̇ам̣ лабхид̇ваа ад̇д̇ано самбад̇д̇уубаг̇ам̣ гусалам̣ гариссаамий’’д̇и. ат̇асса бхаг̇аваа оваад̣̇ам̣ бадибассамбхзнд̇о ‘‘бан̃н̃ааяиссасий’’д̇иаад̣̇имааха. д̇ассад̇т̇о, д̇вам̣язва, могхабуриса, иминаа баабагзна д̣̇идтиг̇ад̇зна нираяаад̣̇ийсу бан̃н̃ааяиссаси, мама санд̇игаа д̇уяхам̣ суг̇ад̇оваад̣̇о наама над̇т̇и, на мз д̇аяаа ад̇т̇о, ид̇хаахам̣ бхигкуу бадибужчиссаамийд̇и.
Paññāyissasikhoti ayampi pāṭiyekko anusandhi. Ariṭṭho kira cintesi – ‘‘bhagavā mayhaṃ maggaphalānaṃ upanissayo pacchinnoti vadati, na kho pana buddhā saupanissayānaṃyeva dhammaṃ desenti, anupanissayānampi desenti, ahaṃ satthu santikā sugatovādaṃ labhitvā attano sampattūpagaṃ kusalaṃ karissāmī’’ti. Athassa bhagavā ovādaṃ paṭipassambhento ‘‘paññāyissasī’’tiādimāha. Tassattho, tvaṃyeva, moghapurisa, iminā pāpakena diṭṭhigatena nirayādīsu paññāyissasi, mama santikā tuyhaṃ sugatovādo nāma natthi, na me tayā attho, idhāhaṃ bhikkhū paṭipucchissāmīti.
237. ат̇а ко бхаг̇аваад̇и аяамби баадиязгго анусанд̇хи. имасмин̃хи таанз бхаг̇аваа барисам̣ сод̇хзд̇и, аридтам̣ г̇ан̣ад̇о ниссаарзд̇и. сажз хи барисаг̇ад̇аанам̣ гассажи звам̣ бхавзяяа – ‘‘аяам̣ аридто бхаг̇авад̇аа агат̇ид̇ам̣ гат̇зд̇ум̣ гим̣ сагкиссад̇и, гажжи ну ко барисамаж̇жхз бхаг̇авад̇аа гат̇ааяа самаарад̣̇д̇хааяа сахасаа гат̇ид̇а’’нд̇и. звам̣ гат̇ид̇ам̣ бана на аридтова сун̣аад̇и, ан̃н̃знаби суд̇ам̣ бхависсад̇и. ат̇аабисса сияаа ‘‘яат̇аа сад̇т̇аа аридтам̣ ниг̇г̇ан̣хаад̇и, мамби звам̣ ниг̇г̇ан̣хзяяаад̇и суд̇вааби д̇ун̣хийбхаавам̣ аабаж̇ж̇зяяаа’’д̇и. ‘‘д̇ам̣ саб̣б̣ам̣ на гариссанд̇ий’’д̇и. маяааби на гат̇ид̇ам̣, ан̃н̃зна суд̇амби над̇т̇ийд̇и ‘‘д̇умхзбимз, бхигкавз’’д̇иаад̣̇инаа барисааяа лад̣̇д̇хим̣ сод̇хзд̇и. барисааяа бана лад̣̇д̇хисод̇ханзнзва аридто г̇ан̣ад̇о ниссаарид̇о наама ход̇и.
237.Atha kho bhagavāti ayampi pāṭiyekko anusandhi. Imasmiñhi ṭhāne bhagavā parisaṃ sodheti, ariṭṭhaṃ gaṇato nissāreti. Sace hi parisagatānaṃ kassaci evaṃ bhaveyya – ‘‘ayaṃ ariṭṭho bhagavatā akathitaṃ kathetuṃ kiṃ sakkhissati, kacci nu kho parisamajjhe bhagavatā kathāya samāraddhāya sahasā kathita’’nti. Evaṃ kathitaṃ pana na ariṭṭhova suṇāti, aññenapi sutaṃ bhavissati. Athāpissa siyā ‘‘yathā satthā ariṭṭhaṃ niggaṇhāti, mampi evaṃ niggaṇheyyāti sutvāpi tuṇhībhāvaṃ āpajjeyyā’’ti. ‘‘Taṃ sabbaṃ na karissantī’’ti. Mayāpi na kathitaṃ, aññena sutampi natthīti ‘‘tumhepime, bhikkhave’’tiādinā parisāya laddhiṃ sodheti. Parisāya pana laddhisodhaneneva ariṭṭho gaṇato nissārito nāma hoti.
ид̣̇аани аридтасса лад̣̇д̇хим̣ багаасзнд̇о со вад̇а, бхигкавзд̇иаад̣̇имааха. д̇ад̇т̇а ан̃н̃ад̇рзва гаамзхийд̇иаад̣̇ийсу яо со, бхигкавз, бхигку ‘‘д̇з бадисзвад̇о наалам̣ анд̇арааяааяаа’’д̇и звам̣лад̣̇д̇хиго, со вад̇а гилзсагаамзхи жзва гилзсагаамасамбаяуд̇д̇зхи сан̃н̃аавид̇аггзхи жа ан̃н̃ад̇ра, зд̇з д̇хаммз бахааяа, винаа зд̇зхи д̇хаммзхи, вад̇т̇угаамз бадисзвиссад̇и, мзт̇унасамаажаарам̣ самаажариссад̇ийд̇и нзд̇ам̣ таанам̣ виж̇ж̇ад̇и. ид̣̇ам̣ гааран̣ам̣ наама над̇т̇и, адтаанамзд̇ам̣ анавагаасод̇и.
Idāni ariṭṭhassa laddhiṃ pakāsento so vata, bhikkhavetiādimāha. Tattha aññatreva kāmehītiādīsu yo so, bhikkhave, bhikkhu ‘‘te paṭisevato nālaṃ antarāyāyā’’ti evaṃladdhiko, so vata kilesakāmehi ceva kilesakāmasampayuttehi saññāvitakkehi ca aññatra, ete dhamme pahāya, vinā etehi dhammehi, vatthukāme paṭisevissati, methunasamācāraṃ samācarissatīti netaṃ ṭhānaṃ vijjati. Idaṃ kāraṇaṃ nāma natthi, aṭṭhānametaṃ anavakāsoti.
238. звам̣ бхаг̇аваа аяам̣ аридто яат̇аа наама раж̇аго суг̇анд̇хааниби д̣̇уг̇г̇анд̇хааниби ж̇ин̣н̣ааниби навааниби суд̣̇д̇хааниби асуд̣̇д̇хааниби вад̇т̇аани згад̇о бхан̣д̣игам̣ гарод̇и, звамзва бхигкуунам̣ нижчанд̣̇арааг̇абан̣ийд̇ажийвараад̣̇ибарибхог̇ан̃жа аниб̣ад̣̇д̇хасийлаанам̣ г̇ахадтаанам̣ анд̇арааяагарам̣ сажчанд̣̇арааг̇абарибхог̇ан̃жа ниб̣ад̣̇д̇хасийлаанам̣ бхигкуунам̣ ааваран̣агарам̣ сажчанд̣̇арааг̇абарибхог̇ан̃жа саб̣б̣ам̣ згасад̣̇исам̣ гарод̇ийд̇и аридтасса лад̣̇д̇хим̣ багаасзд̇ваа ид̣̇аани д̣̇уг̇г̇ахид̇ааяа барияад̇д̇ияаа д̣̇осам̣ д̣̇ассзнд̇о ид̇ха, бхигкавз, згажжзд̇иаад̣̇имааха. д̇ад̇т̇а барияаабун̣анд̇ийд̇и уг̇г̇ан̣ханд̇и. суд̇д̇анд̇иаад̣̇ийсу убхад̇овибхан̇г̇анид̣̇д̣̇зсаканд̇хагабариваараа, суд̇д̇анибаад̇з ман̇г̇аласуд̇д̇арад̇анасуд̇д̇анаалагасуаад̇уваддагасуд̇д̇аани, ан̃н̃амби жа суд̇д̇анаамагам̣ д̇ат̇ааг̇ад̇аважанам̣ суд̇д̇анд̇и взд̣̇ид̇аб̣б̣ам̣. саб̣б̣амби саг̇аат̇агам̣ суд̇д̇ам̣ г̇зяяанд̇и взд̣̇ид̇аб̣б̣ам̣, висзсзна сам̣яуд̇д̇агз сагалоби саг̇аат̇ааваг̇г̇о. сагалам̣ абхид̇хаммабидагам̣, ниг̇г̇аат̇агам̣ суд̇д̇ам̣, яан̃жа ан̃н̃амби адтахи ан̇г̇зхи асан̇г̇ахид̇ам̣ б̣уд̣̇д̇хаважанам̣, д̇ам̣ взяяаагаран̣анд̇и взд̣̇ид̇аб̣б̣ам̣. д̇хаммабад̣̇ам̣, т̇зраг̇аат̇аа, т̇зриг̇аат̇аа, суд̇д̇анибаад̇з носуд̇д̇анаамигаа суд̣̇д̇хигаг̇аат̇аа жа г̇аат̇аад̇и взд̣̇ид̇аб̣б̣аа. соманассан̃аан̣амаяигаг̇аат̇аабадисам̣яуд̇д̇аа д̣̇взасийд̇исуд̇д̇анд̇аа уд̣̇аананд̇и взд̣̇ид̇аб̣б̣аа. ‘‘вуд̇д̇ан̃хзд̇ам̣ бхаг̇авад̇аа’’д̇иаад̣̇инаяаббавад̇д̇аа (ид̇иву. 1,2) д̣̇асуд̇д̇арасад̇асуд̇д̇анд̇аа ид̇ивуд̇д̇аганд̇и взд̣̇ид̇аб̣б̣аа. абан̣н̣агаж̇аад̇агаад̣̇ийни бан̣н̣аасаад̇хигаани бан̃жаж̇аад̇агасад̇аани ж̇аад̇аганд̇и взд̣̇ид̇аб̣б̣аани. ‘‘жад̇д̇ааромз, бхигкавз, ажчарияаа аб̣бхуд̇аа д̇хаммаа аананд̣̇з’’д̇иаад̣̇инаяаббавад̇д̇аа (а. ни. 4.129) саб̣б̣зби ажчарияааб̣бхуд̇ад̇хаммаббадисам̣яуд̇д̇аа суд̇д̇анд̇аа аб̣бхуд̇ад̇хамманд̇и взд̣̇ид̇аб̣б̣аа. жуул̣авзд̣̇алламахаавзд̣̇алласаммаад̣̇идтисаггабан̃хасан̇каарабхааж̇анияамахаабун̣н̣амасуд̇д̇аад̣̇аяо саб̣б̣зби взд̣̇ан̃жа д̇удтин̃жа лад̣̇д̇хаа лад̣̇д̇хаа бужчид̇асуд̇д̇анд̇аа взд̣̇алланд̇и взд̣̇ид̇аб̣б̣аа.
238. Evaṃ bhagavā ayaṃ ariṭṭho yathā nāma rajako sugandhānipi duggandhānipi jiṇṇānipi navānipi suddhānipi asuddhānipi vatthāni ekato bhaṇḍikaṃ karoti, evameva bhikkhūnaṃ nicchandarāgapaṇītacīvarādiparibhogañca anibaddhasīlānaṃ gahaṭṭhānaṃ antarāyakaraṃ sacchandarāgaparibhogañca nibaddhasīlānaṃ bhikkhūnaṃ āvaraṇakaraṃ sacchandarāgaparibhogañca sabbaṃ ekasadisaṃ karotīti ariṭṭhassa laddhiṃ pakāsetvā idāni duggahitāya pariyattiyā dosaṃ dassento idha, bhikkhave, ekaccetiādimāha. Tattha pariyāpuṇantīti uggaṇhanti. Suttantiādīsu ubhatovibhaṅganiddesakhandhakaparivārā, suttanipāte maṅgalasuttaratanasuttanālakasuātuvaṭṭakasuttāni, aññampi ca suttanāmakaṃ tathāgatavacanaṃ suttanti veditabbaṃ. Sabbampi sagāthakaṃ suttaṃ geyyanti veditabbaṃ, visesena saṃyuttake sakalopi sagāthāvaggo. Sakalaṃ abhidhammapiṭakaṃ, niggāthakaṃ suttaṃ, yañca aññampi aṭṭhahi aṅgehi asaṅgahitaṃ buddhavacanaṃ, taṃ veyyākaraṇanti veditabbaṃ. Dhammapadaṃ, theragāthā, therigāthā, suttanipāte nosuttanāmikā suddhikagāthā ca gāthāti veditabbā. Somanassañāṇamayikagāthāpaṭisaṃyuttā dveasītisuttantā udānanti veditabbā. ‘‘Vuttañhetaṃ bhagavatā’’tiādinayappavattā (itivu. 1,2) dasuttarasatasuttantā itivuttakanti veditabbā. Apaṇṇakajātakādīni paṇṇāsādhikāni pañcajātakasatāni jātakanti veditabbāni. ‘‘Cattārome, bhikkhave, acchariyā abbhutā dhammā ānande’’tiādinayappavattā (a. ni. 4.129) sabbepi acchariyaabbhutadhammappaṭisaṃyuttā suttantā abbhutadhammanti veditabbā. Cūḷavedallamahāvedallasammādiṭṭhisakkapañhasaṅkhārabhājaniyamahāpuṇṇamasuttādayo sabbepi vedañca tuṭṭhiñca laddhā laddhā pucchitasuttantā vedallanti veditabbā.
ад̇т̇ам̣ на убабаригканд̇ийд̇и ад̇т̇ад̇т̇ам̣ гааран̣ад̇т̇ам̣ на бассанд̇и на бариг̇г̇ан̣ханд̇и. анубабаригкад̇анд̇и анубабаригканд̇аанам̣. на ниж̇жхаанам̣ каманд̇ийд̇и на убадтаханд̇и на аабаат̇ам̣ ааг̇ажчанд̇и, имасмим̣ таанз сийлам̣ самаад̇хи вибассанаа маг̇г̇о палам̣ ваддам̣ виваддам̣ гат̇ид̇анд̇и звам̣ ж̇аанид̇ум̣ на саггаа хонд̇ийд̇и ад̇т̇о. д̇з убаарамбхаанисам̣саа жзваад̇и д̇з барзсам̣ ваад̣̇з д̣̇осааробанаанисам̣саа худ̇ваа барияаабун̣анд̇ийд̇и ад̇т̇о. ид̇иваад̣̇аббамогкаанисам̣саа жаад̇и звам̣ ваад̣̇абамогкаанисам̣саа, барзхи сагаваад̣̇з д̣̇осз ааробид̇з д̇ам̣ д̣̇осам̣ звам̣ можзссаамаад̇и иминаава гааран̣зна барияаабун̣анд̇ийд̇и ад̇т̇о. д̇ан̃жасса ад̇т̇ам̣ наанубхонд̇ийд̇и яасса жа маг̇г̇асса ваа паласса ваа ад̇т̇ааяа гулабуд̇д̇аа д̇хаммам̣ барияаабун̣анд̇и, д̇ан̃жасса д̇хаммасса ад̇т̇ам̣ зд̇з д̣̇уг̇г̇ахид̇аг̇г̇аахино наанубхонд̇и. абижа барасса ваад̣̇з убаарамбхам̣ ааробзд̇ум̣ ад̇д̇ано ваад̣̇ам̣ можзд̇ум̣ асаггонд̇ааби д̇ан̃жа ад̇т̇ам̣ наанубхонд̇иязва.
Atthaṃ na upaparikkhantīti atthatthaṃ kāraṇatthaṃ na passanti na pariggaṇhanti. Anupaparikkhatanti anupaparikkhantānaṃ. Na nijjhānaṃ khamantīti na upaṭṭhahanti na āpāthaṃ āgacchanti, imasmiṃ ṭhāne sīlaṃ samādhi vipassanā maggo phalaṃ vaṭṭaṃ vivaṭṭaṃ kathitanti evaṃ jānituṃ na sakkā hontīti attho. Te upārambhānisaṃsā cevāti te paresaṃ vāde dosāropanānisaṃsā hutvā pariyāpuṇantīti attho. Itivādappamokkhānisaṃsā cāti evaṃ vādapamokkhānisaṃsā, parehi sakavāde dose āropite taṃ dosaṃ evaṃ mocessāmāti imināva kāraṇena pariyāpuṇantīti attho. Tañcassa atthaṃ nānubhontīti yassa ca maggassa vā phalassa vā atthāya kulaputtā dhammaṃ pariyāpuṇanti, tañcassa dhammassa atthaṃ ete duggahitaggāhino nānubhonti. Apica parassa vāde upārambhaṃ āropetuṃ attano vādaṃ mocetuṃ asakkontāpi tañca atthaṃ nānubhontiyeva.
239. алаг̇ад̣̇д̣̇ад̇т̇игод̇и аасивисаад̇т̇иго. г̇ад̣̇од̇и хи висасса наамам̣, д̇ам̣ д̇асса алам̣ барибун̣н̣ам̣ ад̇т̇ийд̇и алаг̇ад̣̇д̣̇о. бхог̇зд̇и сарийрз. ид̇ха бана, бхигкавз, згажжз гулабуд̇д̇аа д̇хаммам̣ барияаабун̣анд̇ийд̇и нид̇т̇аран̣абарияад̇д̇ивасзна уг̇г̇ан̣ханд̇и. д̇иссо хи барияад̇д̇ияо алаг̇ад̣̇д̣̇абарияад̇д̇и нид̇т̇аран̣абарияад̇д̇и бхан̣д̣ааг̇ааригабарияад̇д̇ийд̇и.
239.Alagaddatthikoti āsivisaatthiko. Gadoti hi visassa nāmaṃ, taṃ tassa alaṃ paripuṇṇaṃ atthīti alagaddo. Bhogeti sarīre. Idha pana, bhikkhave, ekacce kulaputtā dhammaṃ pariyāpuṇantīti nittharaṇapariyattivasena uggaṇhanti. Tisso hi pariyattiyo alagaddapariyatti nittharaṇapariyatti bhaṇḍāgārikapariyattīti.
д̇ад̇т̇а яо б̣уд̣̇д̇хаважанам̣ уг̇г̇ахзд̇ваа звам̣ жийвараад̣̇ийни ваа лабхиссаами, жад̇убарисамаж̇жхз ваа мам̣ ж̇ааниссанд̇ийд̇и лаабхасаггаарахзд̇у барияаабун̣аад̇и, д̇асса саа барияад̇д̇и алаг̇ад̣̇д̣̇абарияад̇д̇и наама. звам̣ барияаабун̣ад̇о хи б̣уд̣̇д̇хаважанам̣ абарияаабун̣ид̇ваа нид̣̇д̣̇оггаманам̣ варад̇арам̣.
Tattha yo buddhavacanaṃ uggahetvā evaṃ cīvarādīni vā labhissāmi, catuparisamajjhe vā maṃ jānissantīti lābhasakkārahetu pariyāpuṇāti, tassa sā pariyatti alagaddapariyatti nāma. Evaṃ pariyāpuṇato hi buddhavacanaṃ apariyāpuṇitvā niddokkamanaṃ varataraṃ.
яо бана б̣уд̣̇д̇хаважанам̣ уг̇г̇ан̣хид̇ваа сийласса ааг̇ад̇адтаанз сийлам̣ буурзд̇ваа самаад̇хисса ааг̇ад̇адтаанз самаад̇хиг̇аб̣бхам̣ г̇ан̣хаабзд̇ваа вибассанааяа ааг̇ад̇адтаанз вибассанам̣ бадтабзд̇ваа маг̇г̇апалаанам̣ ааг̇ад̇адтаанз маг̇г̇ам̣ бхаавзссаами палам̣ сажчигариссаамийд̇и уг̇г̇ан̣хаад̇и, д̇асса саа барияад̇д̇и нид̇т̇аран̣абарияад̇д̇и наама ход̇и.
Yo pana buddhavacanaṃ uggaṇhitvā sīlassa āgataṭṭhāne sīlaṃ pūretvā samādhissa āgataṭṭhāne samādhigabbhaṃ gaṇhāpetvā vipassanāya āgataṭṭhāne vipassanaṃ paṭṭhapetvā maggaphalānaṃ āgataṭṭhāne maggaṃ bhāvessāmi phalaṃ sacchikarissāmīti uggaṇhāti, tassa sā pariyatti nittharaṇapariyatti nāma hoti.
кийн̣аасавасса бана барияад̇д̇и бхан̣д̣ааг̇ааригабарияад̇д̇и наама. д̇асса хи абарин̃н̃аад̇ам̣ аббахийнам̣ абхаавид̇ам̣ асажчигад̇ам̣ ваа над̇т̇и. со хи барин̃н̃аад̇агканд̇хо бахийнагилзсо бхаавид̇амаг̇г̇о сажчигад̇апало, д̇асмаа б̣уд̣̇д̇хаважанам̣ барияаабун̣анд̇о д̇анд̇ид̇хаараго бавзн̣ибаалаго вам̣саанурагкагова худ̇ваа уг̇г̇ан̣хаад̇и. ид̇исса саа барияад̇д̇и бхан̣д̣ааг̇ааригабарияад̇д̇и наама ход̇и.
Khīṇāsavassa pana pariyatti bhaṇḍāgārikapariyatti nāma. Tassa hi apariññātaṃ appahīnaṃ abhāvitaṃ asacchikataṃ vā natthi. So hi pariññātakkhandho pahīnakileso bhāvitamaggo sacchikataphalo, tasmā buddhavacanaṃ pariyāpuṇanto tantidhārako paveṇipālako vaṃsānurakkhakova hutvā uggaṇhāti. Itissa sā pariyatti bhaṇḍāgārikapariyatti nāma hoti.
яо бана бут̇уж̇ж̇ано чаад̇абхаяаад̣̇ийсу г̇ант̇ад̇харзсу згасмим̣ таанз васид̇ум̣ асаггонд̇зсу саяам̣ бхигкаажаарзна агиламамаано ад̇имад̇хурам̣ б̣уд̣̇д̇хаважанам̣ маа нассад̇у, д̇анд̇им̣ д̇хаарзссаами, вам̣сам̣ табзссаами, бавзн̣им̣ баалзссаамийд̇и барияаабун̣аад̇и, д̇асса барияад̇д̇и бхан̣д̣ааг̇ааригабарияад̇д̇и ход̇и, на ход̇ийд̇и? на ход̇и. гасмаа? на ад̇д̇ано таанз тад̇ваа барияаабуд̇ад̇д̇аа. бут̇уж̇ж̇анасса хи барияад̇д̇и наама алаг̇ад̣̇д̣̇аа ваа ход̇и нид̇т̇аран̣аа ваа, сад̇д̇аннам̣ сзгкаанам̣ нид̇т̇аран̣аава, кийн̣аасавасса бхан̣д̣ааг̇ааригабарияад̇д̇иязва. имасмим̣ бана таанз нид̇т̇аран̣абарияад̇д̇и ад̇хиббзд̇аа.
Yo pana puthujjano chātabhayādīsu ganthadharesu ekasmiṃ ṭhāne vasituṃ asakkontesu sayaṃ bhikkhācārena akilamamāno atimadhuraṃ buddhavacanaṃ mā nassatu, tantiṃ dhāressāmi, vaṃsaṃ ṭhapessāmi, paveṇiṃ pālessāmīti pariyāpuṇāti, tassa pariyatti bhaṇḍāgārikapariyatti hoti, na hotīti? Na hoti. Kasmā? Na attano ṭhāne ṭhatvā pariyāputattā. Puthujjanassa hi pariyatti nāma alagaddā vā hoti nittharaṇā vā, sattannaṃ sekkhānaṃ nittharaṇāva, khīṇāsavassa bhaṇḍāgārikapariyattiyeva. Imasmiṃ pana ṭhāne nittharaṇapariyatti adhippetā.
ниж̇жхаанам̣ каманд̇ийд̇и сийлаад̣̇ийнам̣ ааг̇ад̇адтаанзсу ид̇ха сийлам̣ гат̇ид̇ам̣, ид̇ха самаад̇хи, ид̇ха вибассанаа, ид̇ха маг̇г̇о, ид̇ха палам̣, ид̇ха ваддам̣, ид̇ха вивадданд̇и аабаат̇ам̣ ааг̇ажчанд̇и. д̇ан̃жасса ад̇т̇ам̣ анубхонд̇ийд̇и язсам̣ маг̇г̇апалаанам̣ ад̇т̇ааяа барияаабун̣анд̇и. суг̇г̇ахид̇абарияад̇д̇им̣ ниссааяа маг̇г̇ам̣ бхаавзд̇ваа палам̣ сажчигаронд̇аа д̇ан̃жасса д̇хаммасса ад̇т̇ам̣ анубхаванд̇и. бараваад̣̇з убаарамбхам̣ ааробзд̇ум̣ саггонд̇ааби сагаваад̣̇з ааробид̇ам̣ д̣̇осам̣ ижчид̇ижчид̇адтаанам̣ г̇ахзд̇ваа можзд̇ум̣ саггонд̇ааби анубхонд̇иязва. д̣̇ийгхарад̇д̇ам̣ хид̇ааяа сукааяа сам̣вад̇д̇анд̇ийд̇и сийлаад̣̇ийнам̣ ааг̇ад̇адтаанз сийлаад̣̇ийни буурзнд̇аанамби, барзсам̣ ваад̣̇з сахад̇хаммзна убаарамбхам̣ ааробзнд̇аанамби, сагаваад̣̇ад̇о д̣̇осам̣ харанд̇аанамби, арахад̇д̇ам̣ бад̇ваа барисамаж̇жхз д̇хаммам̣ д̣̇зсзд̇ваа д̇хаммад̣̇зсанааяа басаннзхи убанийд̇з жад̇д̇ааро бажжаяз барибхун̃ж̇анд̇аанамби д̣̇ийгхарад̇д̇ам̣ хид̇ааяа сукааяа сам̣вад̇д̇анд̇и.
Nijjhānaṃ khamantīti sīlādīnaṃ āgataṭṭhānesu idha sīlaṃ kathitaṃ, idha samādhi, idha vipassanā, idha maggo, idha phalaṃ, idha vaṭṭaṃ, idha vivaṭṭanti āpāthaṃ āgacchanti. Tañcassa atthaṃ anubhontīti yesaṃ maggaphalānaṃ atthāya pariyāpuṇanti. Suggahitapariyattiṃ nissāya maggaṃ bhāvetvā phalaṃ sacchikarontā tañcassa dhammassa atthaṃ anubhavanti. Paravāde upārambhaṃ āropetuṃ sakkontāpi sakavāde āropitaṃ dosaṃ icchiticchitaṭṭhānaṃ gahetvā mocetuṃ sakkontāpi anubhontiyeva. Dīgharattaṃ hitāya sukhāya saṃvattantīti sīlādīnaṃ āgataṭṭhāne sīlādīni pūrentānampi, paresaṃ vāde sahadhammena upārambhaṃ āropentānampi, sakavādato dosaṃ harantānampi, arahattaṃ patvā parisamajjhe dhammaṃ desetvā dhammadesanāya pasannehi upanīte cattāro paccaye paribhuñjantānampi dīgharattaṃ hitāya sukhāya saṃvattanti.
звам̣ суг̇г̇ахид̇з б̣уд̣̇д̇хаважанз аанисам̣сам̣ д̣̇ассзд̇ваа ид̣̇аани д̇ад̇т̇зва нияож̇знд̇о д̇асмаа д̇иха, бхигкавзд̇иаад̣̇имааха. д̇ад̇т̇а д̇асмаад̇и яасмаа д̣̇уг̇г̇ахид̇абарияад̇д̇и д̣̇уг̇г̇ахид̇аалаг̇ад̣̇д̣̇о вияа д̣̇ийгхарад̇д̇ам̣ ахид̇ааяа д̣̇угкааяа сам̣вад̇д̇ад̇и, суг̇г̇ахид̇абарияад̇д̇и суг̇г̇ахид̇аалаг̇ад̣̇д̣̇о вияа д̣̇ийгхарад̇д̇ам̣ хид̇ааяа сукааяа сам̣вад̇д̇ад̇и, д̇асмаад̇и ад̇т̇о. д̇ат̇аа нам̣ д̇хаарзяяаат̇аад̇и д̇ат̇зва нам̣ д̇хаарзяяаат̇а, д̇знзва ад̇т̇зна г̇ан̣хзяяаат̇а. яз ваа банаассу вияад̇д̇аа бхигкууд̇и яз ваа бана ан̃н̃з саарибуд̇д̇амог̇г̇аллаанамахаагассабамахаагажжаанаад̣̇игаа б̣яад̇д̇аа бан̣д̣ид̇аа бхигкуу ассу, д̇з бужчид̇аб̣б̣аа. аридтзна вияа бана мама саасанз на галалам̣ ваа гажаварам̣ ваа багкибид̇аб̣б̣ам̣.
Evaṃ suggahite buddhavacane ānisaṃsaṃ dassetvā idāni tattheva niyojento tasmā tiha, bhikkhavetiādimāha. Tattha tasmāti yasmā duggahitapariyatti duggahitaalagaddo viya dīgharattaṃ ahitāya dukkhāya saṃvattati, suggahitapariyatti suggahitaalagaddo viya dīgharattaṃ hitāya sukhāya saṃvattati, tasmāti attho. Tathā naṃ dhāreyyāthāti tatheva naṃ dhāreyyātha, teneva atthena gaṇheyyātha. Ye vā panāssu viyattā bhikkhūti ye vā pana aññe sāriputtamoggallānamahākassapamahākaccānādikā byattā paṇḍitā bhikkhū assu, te pucchitabbā. Ariṭṭhena viya pana mama sāsane na kalalaṃ vā kacavaraṃ vā pakkhipitabbaṃ.
240. гуллуубаманд̇и гулласад̣̇исам̣. нид̇т̇аран̣ад̇т̇ааяаад̇и жад̇урогханид̇т̇аран̣ад̇т̇ааяа. уд̣̇аган̣н̣аванд̇и яан̃хи уд̣̇агам̣ г̇амбхийрам̣ на бут̇улам̣. бут̇улам̣ ваа бана на г̇амбхийрам̣, на д̇ам̣ ан̣н̣авод̇и вужжад̇и. яам̣ бана г̇амбхийран̃жзва бут̇улан̃жа, д̇ам̣ ан̣н̣авод̇и вужжад̇и. д̇асмаа маханд̇ам̣ уд̣̇аган̣н̣аванд̇и маханд̇ам̣ бут̇улам̣ г̇амбхийрам̣ уд̣̇аганд̇и аяамзд̇т̇а ад̇т̇о. саасан̇гам̣ наама яад̇т̇а жораанам̣ нивуд̇т̇огаасо д̣̇иссад̇и. тид̇огаасо, нисинногаасо, нибанногаасо д̣̇иссад̇и. саббадибхаяам̣ наама яад̇т̇а жорзхи мануссаа хад̇аа д̣̇иссанд̇и, вилуд̇д̇аа д̣̇иссанд̇и, аагодид̇аа д̣̇иссанд̇и. уд̇д̇арасзд̇ууд̇и уд̣̇аган̣н̣авасса убари б̣ад̣̇д̇хо сзд̇у. гуллам̣ б̣анд̇хид̇ваад̇и гулло наама д̇аран̣ад̇т̇ааяа галаабам̣ гад̇ваа б̣ад̣̇д̇хо. бад̇т̇арид̇ваа б̣ад̣̇д̇хаа бана бад̣̇аражаадиаад̣̇аяо ул̣умбод̇и вужжанд̇и. ужжаарзд̇ваад̇и табзд̇ваа. гижжагаарийд̇и бад̇д̇агаарий яуд̇д̇агаарий, бад̇ируубагаарийд̇и ад̇т̇о. д̇хаммааби во бахаад̇аб̣б̣аад̇и зд̇т̇а д̇хаммаад̇и самат̇авибассанаа. бхаг̇аваа хи самат̇зби чанд̣̇арааг̇ам̣ баж̇ахаабзси, вибассанааяаби. самат̇з чанд̣̇арааг̇ам̣ гад̇т̇а баж̇ахаабзси? ‘‘ид̇и ко, уд̣̇ааяи, нзвасан̃н̃аанаасан̃н̃ааяад̇анассаби бахаанам̣ вад̣̇аами, бассаси но д̇вам̣, уд̣̇ааяи, д̇ам̣ сам̣яож̇анам̣ ан̣ум̣ ваа т̇уулам̣ ваа, яассаахам̣ но бахаанам̣ вад̣̇аамий’’д̇и (ма. ни. 2.156) зд̇т̇а самат̇з чанд̣̇арааг̇ам̣ баж̇ахаабзси. ‘‘имам̣ жз д̇умхз, бхигкавз, д̣̇идтим̣ звам̣ барисуд̣̇д̇хам̣ звам̣ барияод̣̇аад̇ам̣ на аллийязт̇а на гзлааязт̇а на д̇ханааязт̇аа’’д̇и (ма. ни. 1.401) зд̇т̇а вибассанааяа чанд̣̇арааг̇ам̣ баж̇ахаабзси . ид̇ха бана убхаяад̇т̇а баж̇ахаабзнд̇о ‘‘д̇хаммааби во бахаад̇аб̣б̣аа, баг̇зва ад̇хаммаа’’д̇и ааха.
240.Kullūpamanti kullasadisaṃ. Nittharaṇatthāyāti caturoghanittharaṇatthāya. Udakaṇṇavanti yañhi udakaṃ gambhīraṃ na puthulaṃ. Puthulaṃ vā pana na gambhīraṃ, na taṃ aṇṇavoti vuccati. Yaṃ pana gambhīrañceva puthulañca, taṃ aṇṇavoti vuccati. Tasmā mahantaṃ udakaṇṇavanti mahantaṃ puthulaṃ gambhīraṃ udakanti ayamettha attho. Sāsaṅkaṃ nāma yattha corānaṃ nivutthokāso dissati. Ṭhitokāso, nisinnokāso, nipannokāso dissati. Sappaṭibhayaṃ nāma yattha corehi manussā hatā dissanti, viluttā dissanti, ākoṭitā dissanti. Uttarasetūti udakaṇṇavassa upari baddho setu. Kullaṃ bandhitvāti kullo nāma taraṇatthāya kalāpaṃ katvā baddho. Pattharitvā baddhā pana padaracāṭiādayo uḷumpoti vuccanti. Uccāretvāti ṭhapetvā. Kiccakārīti pattakārī yuttakārī, patirūpakārīti attho. Dhammāpi vo pahātabbāti ettha dhammāti samathavipassanā. Bhagavā hi samathepi chandarāgaṃ pajahāpesi, vipassanāyapi. Samathe chandarāgaṃ kattha pajahāpesi? ‘‘Iti kho, udāyi, nevasaññānāsaññāyatanassapi pahānaṃ vadāmi, passasi no tvaṃ, udāyi, taṃ saṃyojanaṃ aṇuṃ vā thūlaṃ vā, yassāhaṃ no pahānaṃ vadāmī’’ti (ma. ni. 2.156) ettha samathe chandarāgaṃ pajahāpesi. ‘‘Imaṃ ce tumhe, bhikkhave, diṭṭhiṃ evaṃ parisuddhaṃ evaṃ pariyodātaṃ na allīyetha na kelāyetha na dhanāyethā’’ti (ma. ni. 1.401) ettha vipassanāya chandarāgaṃ pajahāpesi . Idha pana ubhayattha pajahāpento ‘‘dhammāpi vo pahātabbā, pageva adhammā’’ti āha.
д̇ад̇рааяам̣ ад̇хиббааяо – бхигкавз, ахам̣ зваруубзсу санд̇аббан̣ийд̇зсу д̇хаммзсу чанд̣̇арааг̇аббахаанам̣ вад̣̇аами, гим̣ бана имасмим̣ асад̣̇д̇хаммз г̇аамад̇хаммз васалад̇хаммз д̣̇удтуллз од̣̇аганд̇игз, яад̇т̇а аяам̣ аридто могхабурисо нид̣̇д̣̇осасан̃н̃ий бан̃жасу гаамаг̇ун̣зсу чанд̣̇арааг̇ам̣ наалам̣ анд̇арааяааяаад̇и вад̣̇ад̇и. аридтзна вияа на д̇умхзхи маяхам̣ саасанз галалам̣ ваа гажаварам̣ ваа багкибид̇аб̣б̣анд̇и звам̣ бхаг̇аваа иминааби оваад̣̇зна аридтам̣язва ниг̇г̇ан̣хаад̇и.
Tatrāyaṃ adhippāyo – bhikkhave, ahaṃ evarūpesu santappaṇītesu dhammesu chandarāgappahānaṃ vadāmi, kiṃ pana imasmiṃ asaddhamme gāmadhamme vasaladhamme duṭṭhulle odakantike, yattha ayaṃ ariṭṭho moghapuriso niddosasaññī pañcasu kāmaguṇesu chandarāgaṃ nālaṃ antarāyāyāti vadati. Ariṭṭhena viya na tumhehi mayhaṃ sāsane kalalaṃ vā kacavaraṃ vā pakkhipitabbanti evaṃ bhagavā imināpi ovādena ariṭṭhaṃyeva niggaṇhāti.
241. ид̣̇аани яо бан̃жасу канд̇хзсу д̇ивид̇хаг̇г̇аахавасзна ахам̣ маманд̇и г̇ан̣хаад̇и, со маяхам̣ саасанз аяам̣ аридто вияа галалам̣ гажаварам̣ багкибад̇ийд̇и д̣̇ассзнд̇о чаяимаани, бхигкавзд̇иаад̣̇имааха. д̇ад̇т̇а д̣̇идтидтаанаанийд̇и д̣̇идтиби д̣̇идтидтаанам̣, д̣̇идтияаа аарамман̣амби д̣̇идтидтаанам̣, д̣̇идтияаа бажжаяоби. руубам̣ зд̇ам̣ мамаад̇иаад̣̇ийсу зд̇ам̣ мамаад̇и д̇ан̣хааг̇г̇аахо. зсохамасмийд̇и маанаг̇г̇аахо. зсо мз ад̇д̇аад̇и д̣̇идтиг̇г̇аахо. звам̣ руубаарамман̣аа д̇ан̣хаамаанад̣̇идтияо гат̇ид̇аа хонд̇и. руубам̣ бана ад̇д̇аад̇и на вад̇д̇аб̣б̣ам̣. взд̣̇анаад̣̇ийсуби зсзва наяо. д̣̇идтам̣ руубааяад̇анам̣, суд̇ам̣ сад̣̇д̣̇ааяад̇анам̣ , муд̇ам̣ г̇анд̇хааяад̇анам̣ расааяад̇анам̣ подтаб̣б̣ааяад̇анам̣, д̇ан̃хи бад̇ваа г̇ахзд̇аб̣б̣ад̇о муд̇анд̇и вуд̇д̇ам̣. авасзсаани сад̇д̇ааяад̇анаани вин̃н̃аад̇ам̣ наама. бад̇д̇анд̇и бариязсид̇ваа ваа абариязсид̇ваа ваа бад̇д̇ам̣. бариязсид̇анд̇и бад̇д̇ам̣ ваа аббад̇д̇ам̣ ваа бариязсид̇ам̣. анувижарид̇ам̣ манасаад̇и жид̇д̇зна анусан̃жарид̇ам̣. логасмин̃хи бариязсид̇ваа бад̇д̇амби ад̇т̇и, бариязсид̇ваа нобад̇д̇амби. абариязсид̇ваа бад̇д̇амби ад̇т̇и, абариязсид̇ваа нобад̇д̇амби. д̇ад̇т̇а бариязсид̇ваа бад̇д̇ам̣ бад̇д̇ам̣ наама. бариязсид̇ваа нобад̇д̇ам̣ бариязсид̇ам̣ наама. абариязсид̇ваа бад̇д̇ан̃жа, абариязсид̇ваа нобад̇д̇ан̃жа манасаанувижарид̇ам̣ наама.
241. Idāni yo pañcasu khandhesu tividhaggāhavasena ahaṃ mamanti gaṇhāti, so mayhaṃ sāsane ayaṃ ariṭṭho viya kalalaṃ kacavaraṃ pakkhipatīti dassento chayimāni, bhikkhavetiādimāha. Tattha diṭṭhiṭṭhānānīti diṭṭhipi diṭṭhiṭṭhānaṃ, diṭṭhiyā ārammaṇampi diṭṭhiṭṭhānaṃ, diṭṭhiyā paccayopi. Rūpaṃ etaṃ mamātiādīsu etaṃ mamāti taṇhāggāho. Esohamasmīti mānaggāho. Eso me attāti diṭṭhiggāho. Evaṃ rūpārammaṇā taṇhāmānadiṭṭhiyo kathitā honti. Rūpaṃ pana attāti na vattabbaṃ. Vedanādīsupi eseva nayo. Diṭṭhaṃ rūpāyatanaṃ, sutaṃ saddāyatanaṃ , mutaṃ gandhāyatanaṃ rasāyatanaṃ phoṭṭhabbāyatanaṃ, tañhi patvā gahetabbato mutanti vuttaṃ. Avasesāni sattāyatanāni viññātaṃ nāma. Pattanti pariyesitvā vā apariyesitvā vā pattaṃ. Pariyesitanti pattaṃ vā appattaṃ vā pariyesitaṃ. Anuvicaritaṃ manasāti cittena anusañcaritaṃ. Lokasmiñhi pariyesitvā pattampi atthi, pariyesitvā nopattampi. Apariyesitvā pattampi atthi, apariyesitvā nopattampi. Tattha pariyesitvā pattaṃ pattaṃ nāma. Pariyesitvā nopattaṃ pariyesitaṃ nāma. Apariyesitvā pattañca, apariyesitvā nopattañca manasānuvicaritaṃ nāma.
ат̇а ваа бариязсид̇ваа бад̇д̇амби абариязсид̇ваа бад̇д̇амби бад̇д̇адтзна бад̇д̇ам̣ наама. бариязсид̇ваа нобад̇д̇ам̣ бариязсид̇ам̣ наама. абариязсид̇ваа нобад̇д̇ам̣ манасаанувижарид̇ам̣ наама. саб̣б̣ам̣ ваа зд̇ам̣ манасаа анувижарид̇ад̇д̇аа манасаанувижарид̇ам̣ наама. иминаа вин̃н̃аан̣аарамман̣аа д̇ан̣хаамаанад̣̇идтияо гат̇ид̇аа, д̣̇зсанаавилаасзна хздтаа д̣̇идтаад̣̇иаарамман̣авасзна вин̃н̃аан̣ам̣ д̣̇ассид̇ам̣ . яамби д̇ам̣ д̣̇идтидтаананд̇и яамби зд̇ам̣ со логод̇иаад̣̇инаа наязна бавад̇д̇ам̣ д̣̇идтидтаанам̣.
Atha vā pariyesitvā pattampi apariyesitvā pattampi pattaṭṭhena pattaṃ nāma. Pariyesitvā nopattaṃ pariyesitaṃ nāma. Apariyesitvā nopattaṃ manasānuvicaritaṃ nāma. Sabbaṃ vā etaṃ manasā anuvicaritattā manasānuvicaritaṃ nāma. Iminā viññāṇārammaṇā taṇhāmānadiṭṭhiyo kathitā, desanāvilāsena heṭṭhā diṭṭhādiārammaṇavasena viññāṇaṃ dassitaṃ . Yampi taṃ diṭṭhiṭṭhānanti yampi etaṃ so lokotiādinā nayena pavattaṃ diṭṭhiṭṭhānaṃ.
со лого со ад̇д̇аад̇и яаа зсаа ‘‘руубам̣ ад̇д̇ад̇о саманубассад̇ий’’д̇иаад̣̇инаа наязна бавад̇д̇аа д̣̇идти лого жа ад̇д̇аа жаад̇и г̇ан̣хаад̇и, д̇ам̣ санд̇хааяа вуд̇д̇ам̣. со бзжжа бхависсаамийд̇и со ахам̣ баралогам̣ г̇анд̇ваа нижжо бхависсаами, д̇хуво сассад̇о авибарин̣аамад̇хаммо бхависсаами, синзрумахаабат̇авиймахаасамуд̣̇д̣̇аад̣̇ийхи сассад̇ийхи самам̣ д̇ат̇зва тассаами. д̇амби зд̇ам̣ мамаад̇и д̇амби д̣̇ассанам̣ зд̇ам̣ мама, зсохамасми, зсо мз ад̇д̇аад̇и саманубассад̇и. иминаа д̣̇идтаарамман̣аа д̇ан̣хаамаанад̣̇идтияо гат̇ид̇аа. вибассанааяа бадивибассанаагаалз вияа бажчимад̣̇идтияаа буримад̣̇идтиг̇г̇ахан̣агаалз звам̣ ход̇и.
So loko so attāti yā esā ‘‘rūpaṃ attato samanupassatī’’tiādinā nayena pavattā diṭṭhi loko ca attā cāti gaṇhāti, taṃ sandhāya vuttaṃ. So pecca bhavissāmīti so ahaṃ paralokaṃ gantvā nicco bhavissāmi, dhuvo sassato avipariṇāmadhammo bhavissāmi, sinerumahāpathavīmahāsamuddādīhi sassatīhi samaṃ tatheva ṭhassāmi. Tampi etaṃ mamāti tampi dassanaṃ etaṃ mama, esohamasmi, eso me attāti samanupassati. Iminā diṭṭhārammaṇā taṇhāmānadiṭṭhiyo kathitā. Vipassanāya paṭivipassanākāle viya pacchimadiṭṭhiyā purimadiṭṭhiggahaṇakāle evaṃ hoti.
суггабагкз руубам̣ нзд̇ам̣ мамаад̇и руубз д̇ан̣хаамаанад̣̇идтиг̇г̇аахаа бадигкид̇д̇аа. взд̣̇анаад̣̇ийсуби зсзва наяо. саманубассад̇ийд̇и имасса бана бад̣̇асса д̇ан̣хаасаманубассанаа маанасаманубассанаа д̣̇идтисаманубассанаа н̃аан̣асаманубассанаад̇и жад̇ассо саманубассанаад̇и ад̇т̇о. д̇аа ган̣хабагкз д̇иссаннам̣ саманубассанаанам̣, суггабагкз н̃аан̣асаманубассанааяа васзна взд̣̇ид̇аб̣б̣аа. асад̇и на барид̇ассад̇ийд̇и авиж̇ж̇амаанз бхаяабарид̇ассанааяа д̇ан̣хаабарид̇ассанааяа ваа на барид̇ассад̇и. иминаа бхаг̇аваа аж̇жхад̇д̇агканд̇хавинаасз абарид̇ассамаанам̣ кийн̣аасавам̣ д̣̇ассзнд̇о д̣̇зсанам̣ мад̇т̇агам̣ баабзси.
Sukkapakkhe rūpaṃ netaṃ mamāti rūpe taṇhāmānadiṭṭhiggāhā paṭikkhittā. Vedanādīsupi eseva nayo. Samanupassatīti imassa pana padassa taṇhāsamanupassanā mānasamanupassanā diṭṭhisamanupassanā ñāṇasamanupassanāti catasso samanupassanāti attho. Tā kaṇhapakkhe tissannaṃ samanupassanānaṃ, sukkapakkhe ñāṇasamanupassanāya vasena veditabbā. Asati na paritassatīti avijjamāne bhayaparitassanāya taṇhāparitassanāya vā na paritassati. Iminā bhagavā ajjhattakkhandhavināse aparitassamānaṃ khīṇāsavaṃ dassento desanaṃ matthakaṃ pāpesi.
242. звам̣ вуд̇д̇з ан̃н̃ад̇аро бхигкууд̇и звам̣ бхаг̇авад̇аа вуд̇д̇з ан̃н̃ад̇аро анусанд̇хигусало бхигку – ‘‘бхаг̇авад̇аа аж̇жхад̇д̇агканд̇хавинаасз абарид̇ассанд̇ам̣ кийн̣аасавам̣ д̣̇ассзд̇ваа д̣̇зсанаа нидтаабид̇аа, аж̇жхад̇д̇ам̣ абарид̇ассанд̇з ко бана сад̇и аж̇жхад̇д̇ам̣ барид̇ассагзна б̣ахид̣̇д̇хаа баригкааравинаасз барид̇ассагзна абарид̇ассагзна жааби бхавид̇аб̣б̣ам̣. ид̇и имзхи жад̇уухи гааран̣зхи аяам̣ бан̃хо бужчид̇аб̣б̣о’’д̇и жинд̇зд̇ваа згам̣сам̣ жийварам̣ гад̇ваа ан̃ж̇алим̣ баг̇г̇аяха бхаг̇аванд̇ам̣ зд̇ад̣̇авожа. б̣ахид̣̇д̇хаа асад̇ийд̇и б̣ахид̣̇д̇хаа баригкааравинаасз. аху вад̇а мзд̇и ахоси вад̇а мз бхад̣̇д̣̇агам̣ яаанам̣ вааханам̣ хиран̃н̃ам̣ суван̣н̣анд̇и ад̇т̇о. д̇ам̣ вад̇а мз над̇т̇ийд̇и д̇ам̣ вад̇а ид̣̇аани маяхам̣ над̇т̇и, рааж̇уухи ваа жорзхи ваа хадам̣, аг̇г̇инаа ваа д̣̇ад̣дхам̣, уд̣̇агзна ваа вул̣хам̣, барибхог̇зна ваа ж̇ин̣н̣ам̣. сияаа вад̇а мзд̇и бхавзяяа вад̇а маяхам̣ яаанам̣ вааханам̣ хиран̃н̃ам̣ суван̣н̣ам̣ саали вийхи яаво г̇од̇хумо. д̇ам̣ вад̇аахам̣ на лабхаамийд̇и д̇амахам̣ алабхамаано д̇ад̣̇анужчавигам̣ гаммам̣ агад̇ваа нисиннад̇д̇аа ид̣̇аани на лабхаамийд̇и сожад̇и, аяам̣ аг̇аарияасожанаа, анаг̇аарияасса бад̇д̇ажийвараад̣̇ийнам̣ васзна взд̣̇ид̇аб̣б̣аа.
242.Evaṃvutte aññataro bhikkhūti evaṃ bhagavatā vutte aññataro anusandhikusalo bhikkhu – ‘‘bhagavatā ajjhattakkhandhavināse aparitassantaṃ khīṇāsavaṃ dassetvā desanā niṭṭhāpitā, ajjhattaṃ aparitassante kho pana sati ajjhattaṃ paritassakena bahiddhā parikkhāravināse paritassakena aparitassakena cāpi bhavitabbaṃ. Iti imehi catūhi kāraṇehi ayaṃ pañho pucchitabbo’’ti cintetvā ekaṃsaṃ cīvaraṃ katvā añjaliṃ paggayha bhagavantaṃ etadavoca. Bahiddhā asatīti bahiddhā parikkhāravināse. Ahu vata meti ahosi vata me bhaddakaṃ yānaṃ vāhanaṃ hiraññaṃ suvaṇṇanti attho. Taṃ vata me natthīti taṃ vata idāni mayhaṃ natthi, rājūhi vā corehi vā haṭaṃ, agginā vā daḍḍhaṃ, udakena vā vuḷhaṃ, paribhogena vā jiṇṇaṃ. Siyā vata meti bhaveyya vata mayhaṃ yānaṃ vāhanaṃ hiraññaṃ suvaṇṇaṃ sāli vīhi yavo godhumo. Taṃ vatāhaṃ na labhāmīti tamahaṃ alabhamāno tadanucchavikaṃ kammaṃ akatvā nisinnattā idāni na labhāmīti socati, ayaṃ agāriyasocanā, anagāriyassa pattacīvarādīnaṃ vasena veditabbā.
абарид̇ассанааваарз на звам̣ ход̇ийд̇и язхи гилзсзхи звам̣ бхавзяяа, д̇зсам̣ бахийнад̇д̇аа на звам̣ ход̇и. д̣̇идтидтаанаад̇хидтаанабарияудтаанаабхинивзсаанусаяаананд̇и д̣̇идтийнан̃жа д̣̇идтидтаанаанан̃жа д̣̇идтаад̇хидтаанаанан̃жа д̣̇идтибарияудтаанаанан̃жа абхинивзсаанусаяаанан̃жа. саб̣б̣асан̇каарасамат̇ааяаад̇и ниб̣б̣аанад̇т̇ааяа. ниб̣б̣аанан̃хи ааг̇амма саб̣б̣асан̇каарааин̃ж̇ид̇аани, саб̣б̣асан̇кааражаланаани саб̣б̣асан̇кааравибпанд̣̇ид̇аани самманд̇и вуубасамманд̇и, д̇асмаа д̇ам̣, ‘‘саб̣б̣асан̇каарасамат̇о’’д̇и вужжад̇и. д̇ад̣̇зва жа ааг̇амма канд̇хуубад̇хи гилзсуубад̇хи абхисан̇кааруубад̇хи, бан̃жагаамаг̇ун̣уубад̇хийд̇и имз убад̇хаяо бадиниссаж̇ж̇ияанд̇и, д̇ан̣хаа кийяад̇и вираж̇ж̇ад̇и нируж̇жхад̇и, д̇асмаа д̇ам̣, ‘‘саб̣б̣уубад̇хибадиниссаг̇г̇о д̇ан̣хаагкаяо вирааг̇о нирод̇хо’’д̇и вужжад̇и. ниб̣б̣аанааяаад̇и аяам̣ банасса саруубанид̣̇д̣̇зсо, ид̇и саб̣б̣зхзва имзхи бад̣̇зхи ниб̣б̣аанасса сажчигирияад̇т̇ааяа д̇хаммам̣ д̣̇зсзнд̇ассаад̇и аяамад̇т̇о д̣̇ийбид̇о. д̇ассзвам̣ ход̇ийд̇и д̇асса д̣̇идтиг̇ад̇игасса ужчиж̇ж̇иссаами наамассу, винассиссаами наамассу, наассу наама бхависсаамийд̇и звам̣ ход̇и. д̣̇идтиг̇ад̇игасса хи д̇илагкан̣ам̣ ааробзд̇ваа сун̃н̃ад̇аабадисам̣яуд̇д̇ам̣ гад̇ваа д̣̇зсияамаанам̣ д̇хаммам̣ сун̣анд̇асса д̇аасо уббаж̇ж̇ад̇и. вуд̇д̇ан̃хзд̇ам̣ – ‘‘д̇аасо хзсо, бхигкавз, асуд̇авад̇о бут̇уж̇ж̇анасса но жассам̣, но жа мз сияаа’’д̇и (сам̣. ни. 3.55).
Aparitassanāvāre na evaṃ hotīti yehi kilesehi evaṃ bhaveyya, tesaṃ pahīnattā na evaṃ hoti. Diṭṭhiṭṭhānādhiṭṭhānapariyuṭṭhānābhinivesānusayānanti diṭṭhīnañca diṭṭhiṭṭhānānañca diṭṭhādhiṭṭhānānañca diṭṭhipariyuṭṭhānānañca abhinivesānusayānañca. Sabbasaṅkhārasamathāyāti nibbānatthāya. Nibbānañhi āgamma sabbasaṅkhārāiñjitāni, sabbasaṅkhāracalanāni sabbasaṅkhāravipphanditāni sammanti vūpasammanti, tasmā taṃ, ‘‘sabbasaṅkhārasamatho’’ti vuccati. Tadeva ca āgamma khandhūpadhi kilesūpadhi abhisaṅkhārūpadhi, pañcakāmaguṇūpadhīti ime upadhayo paṭinissajjiyanti, taṇhā khīyati virajjati nirujjhati, tasmā taṃ, ‘‘sabbūpadhipaṭinissaggo taṇhākkhayo virāgo nirodho’’ti vuccati. Nibbānāyāti ayaṃ panassa sarūpaniddeso, iti sabbeheva imehi padehi nibbānassa sacchikiriyatthāya dhammaṃ desentassāti ayamattho dīpito. Tassevaṃ hotīti tassa diṭṭhigatikassa ucchijjissāmi nāmassu, vinassissāmi nāmassu, nāssu nāma bhavissāmīti evaṃ hoti. Diṭṭhigatikassa hi tilakkhaṇaṃ āropetvā suññatāpaṭisaṃyuttaṃ katvā desiyamānaṃ dhammaṃ suṇantassa tāso uppajjati. Vuttañhetaṃ – ‘‘tāso heso, bhikkhave, asutavato puthujjanassa no cassaṃ, no ca me siyā’’ti (saṃ. ni. 3.55).
243. зд̇д̇аавад̇аа б̣ахид̣̇д̇хаабаригкааравинаасз д̇ассанагасса жа нод̇ассанагасса жа аж̇жхад̇д̇агканд̇хавинаасз д̇ассанагасса жа нод̇ассанагасса жаад̇и имзсам̣ васзна жад̇уггодигаа сун̃н̃ад̇аа гат̇ид̇аа. ид̣̇аани б̣ахид̣̇д̇хаа баригкаарам̣ бариг̇г̇ахам̣ наама гад̇ваа, вийсад̇ивад̇т̇угам̣ саггааяад̣̇идтим̣ ад̇д̇аваад̣̇убаад̣̇аанам̣ наама гад̇ваа, саггааяад̣̇идтибамукаа д̣̇ваасадти д̣̇идтияо д̣̇идтиниссаяам̣ наама гад̇ваа д̇игодигам̣ сун̃н̃ад̇ам̣ д̣̇ассзд̇ум̣ д̇ам̣, бхигкавз, бариг̇г̇аханд̇иаад̣̇имааха. д̇ад̇т̇а бариг̇г̇аханд̇и б̣ахид̣̇д̇хаа баригкаарам̣. бариг̇г̇ан̣хзяяаат̇аад̇и яат̇аа вин̃н̃уу мануссо бариг̇г̇ан̣хзяяа . ахамби ко д̇ам̣, бхигкавзд̇и, бхигкавз, д̇умхзби на бассат̇а, ахамби на бассаами, ид̇и зваруубо бариг̇г̇ахо над̇т̇ийд̇и д̣̇ассзд̇и. звам̣ саб̣б̣ад̇т̇а ад̇т̇о взд̣̇ид̇аб̣б̣о.
243. Ettāvatā bahiddhāparikkhāravināse tassanakassa ca notassanakassa ca ajjhattakkhandhavināse tassanakassa ca notassanakassa cāti imesaṃ vasena catukkoṭikā suññatā kathitā. Idāni bahiddhā parikkhāraṃ pariggahaṃ nāma katvā, vīsativatthukaṃ sakkāyadiṭṭhiṃ attavādupādānaṃ nāma katvā, sakkāyadiṭṭhipamukhā dvāsaṭṭhi diṭṭhiyo diṭṭhinissayaṃ nāma katvā tikoṭikaṃ suññataṃ dassetuṃ taṃ, bhikkhave, pariggahantiādimāha. Tattha pariggahanti bahiddhā parikkhāraṃ. Pariggaṇheyyāthāti yathā viññū manusso pariggaṇheyya . Ahampi kho taṃ, bhikkhaveti, bhikkhave, tumhepi na passatha, ahampi na passāmi, iti evarūpo pariggaho natthīti dasseti. Evaṃ sabbattha attho veditabbo.
244. звам̣ д̇игодигам̣ сун̃н̃ад̇ам̣ д̣̇ассзд̇ваа ид̣̇аани аж̇жхад̇д̇агканд̇хз ад̇д̇аад̇и б̣ахид̣̇д̇хаа баригкаарз ад̇д̇анияанд̇и гад̇ваа д̣̇вигодигам̣ д̣̇ассзнд̇о ад̇д̇ани ваа, бхигкавз, сад̇ийд̇иаад̣̇имааха . д̇ад̇т̇а аяам̣ сан̇кзбад̇т̇о, бхигкавз, ад̇д̇ани ваа сад̇и ид̣̇ам̣ мз баригкаараж̇аад̇ам̣ ад̇д̇анияанд̇и асса, ад̇д̇аниязва ваа баригкаарз сад̇и аяам̣ мз ад̇д̇аа имасса баригкаарасса саамийд̇и, звам̣ аханд̇и. сад̇и мамаад̇и, мамаад̇и сад̇и аханд̇и яуд̇д̇ам̣ бхавзяяа. сажжад̇од̇и бхууд̇ад̇о, т̇зд̇ад̇од̇и д̇ат̇ад̇о т̇ирад̇о ваа.
244. Evaṃ tikoṭikaṃ suññataṃ dassetvā idāni ajjhattakkhandhe attāti bahiddhā parikkhāre attaniyanti katvā dvikoṭikaṃ dassento attani vā, bhikkhave, satītiādimāha . Tattha ayaṃ saṅkhepattho, bhikkhave, attani vā sati idaṃ me parikkhārajātaṃ attaniyanti assa, attaniyeva vā parikkhāre sati ayaṃ me attā imassa parikkhārassa sāmīti, evaṃ ahanti. Sati mamāti, mamāti sati ahanti yuttaṃ bhaveyya. Saccatoti bhūtato, thetatoti tathato thirato vā.
ид̣̇аани имз бан̃жагканд̇хз анижжам̣ д̣̇угкам̣ анад̇д̇аад̇и звам̣ д̇ибариваддавасзна аг̇г̇ан̣ханд̇о аяам̣ аридто вияа маяхам̣ саасанз галалам̣ гажаварам̣ багкибад̇ийд̇и д̣̇ассзнд̇о д̇ам̣ гим̣ ман̃н̃ат̇а, бхигкавз, руубам̣ нижжам̣ ваад̇иаад̣̇имааха. д̇ад̇т̇а анижжам̣, бханд̇зд̇и, бханд̇з, яасмаа худ̇ваа на ход̇и, д̇асмаа анижжам̣. уббаад̣̇аваяавад̇д̇ид̇о вибарин̣аамад̇аавагаалиганижжабадигкзбадтзна ваад̇и жад̇уухи гааран̣зхи анижжам̣. д̣̇угкам̣, бханд̇зд̇и, бханд̇з, бадибийл̣анаагаарзна д̣̇угкам̣, санд̇аабад̣̇угкамад̣̇угкавад̇т̇угасукабадигкзбадтзна ваад̇и жад̇уухи гааран̣зхи д̣̇угкам̣. вибарин̣аамад̇хамманд̇и бхавасан̇ганд̇иубаг̇аманасабхаавам̣ багад̇ибхаававиж̇аханасабхаавам̣. галлам̣ ну д̇ам̣ саманубассид̇ум̣ зд̇ам̣ мама, зсохамасми, зсо мз ад̇д̇аад̇и яуд̇д̇ам̣ ну ко д̇ам̣ имзсам̣ д̇ин̣н̣ам̣ д̇ан̣хаамаанад̣̇идтиг̇г̇аахаанам̣ васзна ахам̣ мамаад̇и звам̣ г̇ахзд̇ум̣. но хзд̇ам̣, бханд̇зд̇и иминаа д̇з бхигкуу авасавад̇д̇анаагаарзна руубам̣, бханд̇з, анад̇д̇аад̇и бадиж̇аананд̇и. сун̃н̃аассаамигааниссараад̇д̇абадигкзбадтзна ваад̇и жад̇уухи гааран̣зхи анад̇д̇аа.
Idāni ime pañcakkhandhe aniccaṃ dukkhaṃ anattāti evaṃ tiparivaṭṭavasena aggaṇhanto ayaṃ ariṭṭho viya mayhaṃ sāsane kalalaṃ kacavaraṃ pakkhipatīti dassento taṃ kiṃ maññatha, bhikkhave, rūpaṃ niccaṃ vātiādimāha. Tattha aniccaṃ, bhanteti, bhante, yasmā hutvā na hoti, tasmā aniccaṃ. Uppādavayavattito vipariṇāmatāvakālikaniccapaṭikkhepaṭṭhena vāti catūhi kāraṇehi aniccaṃ. Dukkhaṃ, bhanteti, bhante, paṭipīḷanākārena dukkhaṃ, santāpadukkhamadukkhavatthukasukhapaṭikkhepaṭṭhena vāti catūhi kāraṇehi dukkhaṃ. Vipariṇāmadhammanti bhavasaṅkantiupagamanasabhāvaṃ pakatibhāvavijahanasabhāvaṃ. Kallaṃ nu taṃ samanupassituṃ etaṃ mama, esohamasmi, eso me attāti yuttaṃ nu kho taṃ imesaṃ tiṇṇaṃ taṇhāmānadiṭṭhiggāhānaṃ vasena ahaṃ mamāti evaṃ gahetuṃ. No hetaṃ, bhanteti iminā te bhikkhū avasavattanākārena rūpaṃ, bhante, anattāti paṭijānanti. Suññaassāmikaanissaraattapaṭikkhepaṭṭhena vāti catūhi kāraṇehi anattā.
бхаг̇аваа хи гад̇т̇ажи анижжавасзна анад̇д̇ад̇д̇ам̣ д̣̇ассзд̇и, гад̇т̇ажи д̣̇угкавасзна, гад̇т̇ажи убхаяавасзна. ‘‘жагку ад̇д̇аад̇и яо вад̣̇зяяа, д̇ам̣ на убабаж̇ж̇ад̇и, жагкусса уббаад̣̇оби ваяоби бан̃н̃ааяад̇и. яасса ко бана уббаад̣̇оби ваяоби бан̃н̃ааяад̇и, ад̇д̇аа мз уббаж̇ж̇ад̇и жа взд̇и жаад̇и ижжасса звамааг̇ад̇ам̣ ход̇и, д̇асмаа д̇ам̣ на убабаж̇ж̇ад̇и жагку ад̇д̇аад̇и яо вад̣̇зяяа, ид̇и жагку анад̇д̇аа’’д̇и (ма. ни. 3.422) имасмин̃хи чачаггасуд̇д̇з анижжавасзна анад̇д̇ад̇ам̣ д̣̇ассзд̇и. ‘‘руубан̃жа хид̣̇ам̣, бхигкавз , ад̇д̇аа абхависса, наяид̣̇ам̣ руубам̣ ааб̣аад̇хааяа сам̣вад̇д̇зяяа, лаб̣бхзт̇а жа руубз ‘звам̣ мз руубам̣ ход̇у, звам̣ мз руубам̣ маа ахосий’д̇и. яасмаа жа ко, бхигкавз, руубам̣ анад̇д̇аа, д̇асмаа руубам̣ ааб̣аад̇хааяа сам̣вад̇д̇ад̇и, на жа лаб̣бхад̇и руубз ‘звам̣ мз руубам̣ ход̇у, звам̣ мз руубам̣ маа ахосий’’’д̇и (махаава. 20; сам̣. ни. 3.59) имасмим̣ анад̇д̇алагкан̣асуд̇д̇з д̣̇угкавасзна анад̇д̇ад̇ам̣ д̣̇ассзд̇и. ‘‘руубам̣, бхигкавз, анижжам̣, яад̣̇анижжам̣ д̇ам̣ д̣̇угкам̣, яам̣ д̣̇угкам̣ д̇ад̣̇анад̇д̇аа, яад̣̇анад̇д̇аа д̇ам̣ ‘нзд̇ам̣ мама, нзсохамасми, на мзсо ад̇д̇аа’д̇и звамзд̇ам̣ яат̇аабхууд̇ам̣ саммаббан̃н̃ааяа д̣̇адтаб̣б̣а’’нд̇и (сам̣. ни. 3.76) имасмим̣ арахад̇д̇асуд̇д̇з убхаяавасзна анад̇д̇ад̇ам̣ д̣̇ассзд̇и. гасмаа? анижжам̣ д̣̇угкан̃жа баагадам̣. анад̇д̇аад̇и на баагадам̣.
Bhagavā hi katthaci aniccavasena anattattaṃ dasseti, katthaci dukkhavasena, katthaci ubhayavasena. ‘‘Cakkhu attāti yo vadeyya, taṃ na upapajjati, cakkhussa uppādopi vayopi paññāyati. Yassa kho pana uppādopi vayopi paññāyati, attā me uppajjati ca veti cāti iccassa evamāgataṃ hoti, tasmā taṃ na upapajjati cakkhu attāti yo vadeyya, iti cakkhu anattā’’ti (ma. ni. 3.422) imasmiñhi chachakkasutte aniccavasena anattataṃ dasseti. ‘‘Rūpañca hidaṃ, bhikkhave , attā abhavissa, nayidaṃ rūpaṃ ābādhāya saṃvatteyya, labbhetha ca rūpe ‘evaṃ me rūpaṃ hotu, evaṃ me rūpaṃ mā ahosī’ti. Yasmā ca kho, bhikkhave, rūpaṃ anattā, tasmā rūpaṃ ābādhāya saṃvattati, na ca labbhati rūpe ‘evaṃ me rūpaṃ hotu, evaṃ me rūpaṃ mā ahosī’’’ti (mahāva. 20; saṃ. ni. 3.59) imasmiṃ anattalakkhaṇasutte dukkhavasena anattataṃ dasseti. ‘‘Rūpaṃ, bhikkhave, aniccaṃ, yadaniccaṃ taṃ dukkhaṃ, yaṃ dukkhaṃ tadanattā, yadanattā taṃ ‘netaṃ mama, nesohamasmi, na meso attā’ti evametaṃ yathābhūtaṃ sammappaññāya daṭṭhabba’’nti (saṃ. ni. 3.76) imasmiṃ arahattasutte ubhayavasena anattataṃ dasseti. Kasmā? Aniccaṃ dukkhañca pākaṭaṃ. Anattāti na pākaṭaṃ.
барибхог̇абхааж̇анаад̣̇ийсу хи бхиннзсу ахо анижжанд̇и вад̣̇анд̇и, ахо анад̇д̇аад̇и вад̇д̇аа наама над̇т̇и. сарийрз г̇ан̣д̣абил̣агаад̣̇ийсу ваа удтид̇аасу ган̣дагзна ваа вид̣̇д̇хаа ахо д̣̇угканд̇и вад̣̇анд̇и, ахо анад̇д̇аад̇и бана вад̇д̇аа наама над̇т̇и. гасмаа? ид̣̇ан̃хи анад̇д̇алагкан̣ам̣ наама авибхууд̇ам̣ д̣̇уд̣̇д̣̇асам̣ д̣̇уббан̃н̃аабанам̣. д̇зна д̇ам̣ бхаг̇аваа анижжавасзна ваа д̣̇угкавасзна ваа убхаяавасзна ваа д̣̇ассзд̇и. д̇аяид̣̇ам̣ имасмимби д̇збариваддз анижжад̣̇угкавасзнзва д̣̇ассид̇ам̣. взд̣̇анаад̣̇ийсуби зсзва наяо.
Paribhogabhājanādīsu hi bhinnesu aho aniccanti vadanti, aho anattāti vattā nāma natthi. Sarīre gaṇḍapiḷakādīsu vā uṭṭhitāsu kaṇṭakena vā viddhā aho dukkhanti vadanti, aho anattāti pana vattā nāma natthi. Kasmā? Idañhi anattalakkhaṇaṃ nāma avibhūtaṃ duddasaṃ duppaññāpanaṃ. Tena taṃ bhagavā aniccavasena vā dukkhavasena vā ubhayavasena vā dasseti. Tayidaṃ imasmimpi teparivaṭṭe aniccadukkhavaseneva dassitaṃ. Vedanādīsupi eseva nayo.
д̇асмаа д̇иха, бхигкавзд̇и, бхигкавз, яасмаа зд̇арахи ан̃н̃ад̣̇ааби руубам̣ анижжам̣ д̣̇угкам̣ анад̇д̇аа, д̇асмаад̇и ад̇т̇о. яам̣гин̃жи руубанд̇иаад̣̇ийни висуд̣̇д̇химаг̇г̇з канд̇ханид̣̇д̣̇зсз вид̇т̇аарид̇аанзва.
Tasmā tiha, bhikkhaveti, bhikkhave, yasmā etarahi aññadāpi rūpaṃ aniccaṃ dukkhaṃ anattā, tasmāti attho. Yaṃkiñci rūpantiādīni visuddhimagge khandhaniddese vitthāritāneva.
245. ниб̣б̣инд̣̇ад̇ийд̇и угган̣тад̇и. зд̇т̇а жа ниб̣б̣ид̣̇аад̇и вудтаанаг̇ааминийвибассанаа ад̇хиббзд̇аа. вудтаанаг̇ааминийвибассанааяа хи б̣ахууни наамаани. зсаа хи гад̇т̇ажи сан̃н̃аг̇г̇анд̇и вуд̇д̇аа. гад̇т̇ажи д̇хаммадтид̇ин̃аан̣анд̇и. гад̇т̇ажи баарисуд̣̇д̇хибад̇хаанияан̇г̇анд̇и. гад̇т̇ажи бадибад̣̇аан̃аан̣ад̣̇ассанависуд̣̇д̇хийд̇и . гад̇т̇ажи д̇аммаяад̇аабарияаад̣̇аананд̇и. гад̇т̇ажи д̇ийхи наамзхи. гад̇т̇ажи д̣̇вийхийд̇и.
245.Nibbindatīti ukkaṇṭhati. Ettha ca nibbidāti vuṭṭhānagāminīvipassanā adhippetā. Vuṭṭhānagāminīvipassanāya hi bahūni nāmāni. Esā hi katthaci saññagganti vuttā. Katthaci dhammaṭṭhitiñāṇanti. Katthaci pārisuddhipadhāniyaṅganti. Katthaci paṭipadāñāṇadassanavisuddhīti . Katthaci tammayatāpariyādānanti. Katthaci tīhi nāmehi. Katthaci dvīhīti.
д̇ад̇т̇а бодтабаад̣̇асуд̇д̇з д̇аава ‘‘сан̃н̃аа ко, бодтабаад̣̇а, батамам̣ уббаж̇ж̇ад̇и, бажчаа н̃аан̣а’’нд̇и (д̣̇ий. ни. 1.416) звам̣ сан̃н̃аг̇г̇анд̇и вуд̇д̇аа. сусимасуд̇д̇з ‘‘буб̣б̣з ко, сусима, д̇хаммадтид̇ин̃аан̣ам̣ , бажчаа ниб̣б̣аанз н̃аан̣а’’нд̇и (сам̣. ни. 2.70) звам̣ д̇хаммадтид̇ин̃аан̣анд̇и вуд̇д̇аа. д̣̇асуд̇д̇арасуд̇д̇з ‘‘бадибад̣̇аан̃аан̣ад̣̇ассанависуд̣̇д̇хибад̇хаанияан̇г̇а’’нд̇и (д̣̇ий. ни. 3.359) звам̣ баарисуд̣̇д̇хибад̣̇аанияан̇г̇анд̇и вуд̇д̇аа. рат̇авинийд̇з ‘‘гим̣ ну ко, аавусо, бадибад̣̇аан̃аан̣ад̣̇ассанависуд̣̇д̇хад̇т̇ам̣ бхаг̇авад̇и б̣рахмажарияам̣ вуссад̇ий’’д̇и (ма. ни. 1.257) звам̣ бадибад̣̇аан̃аан̣ад̣̇ассанависуд̣̇д̇хийд̇и вуд̇д̇аа. сал̣ааяад̇анавибхан̇г̇з ‘‘ад̇аммаяад̇ам̣, бхигкавз, ниссааяа ад̇аммаяад̇ам̣ ааг̇амма яааяам̣ убзгкаа наанад̇д̇аа наанад̇д̇асид̇аа, д̇ам̣ абхиниваж̇ж̇зд̇ваа яааяам̣ убзгкаа згад̇д̇аа згад̇д̇асид̇аа, д̇ам̣ ниссааяа д̇ам̣ ааг̇амма звамзд̇иссаа бахаанам̣ ход̇и, звамзд̇иссаа самад̇иггамо ход̇ий’’д̇и (д̣̇ий. ни. 3.310) звам̣ д̇аммаяад̇аабарияаад̣̇аананд̇и вуд̇д̇аа. бадисамбхид̣̇аамаг̇г̇з ‘‘яаа жа мун̃жид̇угамяад̇аа, яаа жа бадисан̇каанубассанаа, яаа жа сан̇каарубзгкаа, имз д̇хаммаа згад̇т̇аа б̣яан̃ж̇анамзва наана’’нд̇и (бади. ма. 1.54) звам̣ д̇ийхи наамзхи вуд̇д̇аа. бадтаанз ‘‘ануломам̣ г̇од̇рабхусса ананд̇арабажжаязна бажжаяо, ануломам̣ вод̣̇аанасса ананд̇арабажжаязна бажжаяо’’д̇и (бадтаа. 1.1.417) звам̣ д̣̇вийхи наамзхи вуд̇д̇аа. имасмим̣ бана алаг̇ад̣̇д̣̇асуд̇д̇з ниб̣б̣инд̣̇ад̇ийд̇и ниб̣б̣ид̣̇аанаамзна ааг̇ад̇аа.
Tattha poṭṭhapādasutte tāva ‘‘saññā kho, poṭṭhapāda, paṭhamaṃ uppajjati, pacchā ñāṇa’’nti (dī. ni. 1.416) evaṃ saññagganti vuttā. Susimasutte ‘‘pubbe kho, susima, dhammaṭṭhitiñāṇaṃ , pacchā nibbāne ñāṇa’’nti (saṃ. ni. 2.70) evaṃ dhammaṭṭhitiñāṇanti vuttā. Dasuttarasutte ‘‘paṭipadāñāṇadassanavisuddhipadhāniyaṅga’’nti (dī. ni. 3.359) evaṃ pārisuddhipadāniyaṅganti vuttā. Rathavinīte ‘‘kiṃ nu kho, āvuso, paṭipadāñāṇadassanavisuddhatthaṃ bhagavati brahmacariyaṃ vussatī’’ti (ma. ni. 1.257) evaṃ paṭipadāñāṇadassanavisuddhīti vuttā. Saḷāyatanavibhaṅge ‘‘atammayataṃ, bhikkhave, nissāya atammayataṃ āgamma yāyaṃ upekkhā nānattā nānattasitā, taṃ abhinivajjetvā yāyaṃ upekkhā ekattā ekattasitā, taṃ nissāya taṃ āgamma evametissā pahānaṃ hoti, evametissā samatikkamo hotī’’ti (dī. ni. 3.310) evaṃ tammayatāpariyādānanti vuttā. Paṭisambhidāmagge ‘‘yā ca muñcitukamyatā, yā ca paṭisaṅkhānupassanā, yā ca saṅkhārupekkhā, ime dhammā ekatthā byañjanameva nāna’’nti (paṭi. ma. 1.54) evaṃ tīhi nāmehi vuttā. Paṭṭhāne ‘‘anulomaṃ gotrabhussa anantarapaccayena paccayo, anulomaṃ vodānassa anantarapaccayena paccayo’’ti (paṭṭhā. 1.1.417) evaṃ dvīhi nāmehi vuttā. Imasmiṃ pana alagaddasutte nibbindatīti nibbidānāmena āgatā.
ниб̣б̣ид̣̇аа вираж̇ж̇ад̇ийд̇и зд̇т̇а вирааг̇од̇и маг̇г̇о вирааг̇аа вимужжад̇ийд̇и зд̇т̇а вирааг̇зна маг̇г̇зна вимужжад̇ийд̇и палам̣ гат̇ид̇ам̣. вимуд̇д̇асмим̣ вимуд̇д̇амид̇и н̃аан̣ам̣ ход̇ийд̇и ид̇ха бажжавзгкан̣аа гат̇ид̇аа.
Nibbidā virajjatīti ettha virāgoti maggo virāgā vimuccatīti ettha virāgena maggena vimuccatīti phalaṃ kathitaṃ. Vimuttasmiṃ vimuttamiti ñāṇaṃ hotīti idha paccavekkhaṇā kathitā.
звам̣ вимуд̇д̇ажид̇д̇ам̣ махаакийн̣аасавам̣ д̣̇ассзд̇ваа ид̣̇аани д̇асса яат̇аабхууд̇зхи бан̃жахи гааран̣зхи наамам̣ г̇ан̣ханд̇о аяам̣ вужжад̇и, бхигкавзд̇иаад̣̇имааха. авиж̇ж̇аад̇и ваддамуулигаа авиж̇ж̇аа. аяан̃хи д̣̇уругкибанадтзна балигход̇и вужжад̇и. д̇знзса д̇асса угкид̇д̇ад̇д̇аа угкид̇д̇абалигход̇и вуд̇д̇о. д̇аалаавад̇т̇угад̇аад̇и сийсажчиннад̇аало вияа гад̇аа, самуулам̣ ваа д̇аалам̣ уд̣̇д̇харид̇ваа д̇ааласса вад̇т̇у вияа гад̇аа, яат̇аа д̇асмим̣ вад̇т̇усмим̣ буна со д̇аало на бан̃н̃ааяад̇и, звам̣ буна абан̃н̃ад̇д̇ибхаавам̣ нийд̇аад̇и ад̇т̇о. боноб̣бхавигод̇и бунаб̣бхавад̣̇ааяаго. ж̇аад̇исам̣саарод̇иаад̣̇ийсу ж̇ааяанавасзна жзва сам̣саран̣авасзна жа звам̣ лад̣̇д̇ханаамаанам̣ бунаб̣бхаваканд̇хаанам̣ бажжаяо гаммаабхисан̇кааро. со хи бунаббунам̣ уббад̇д̇игаран̣авасзна баригкибид̇ваа тид̇ад̇д̇аа баригкаад̇и вужжад̇и, д̇знзса д̇ассаа сам̣гин̣н̣ад̇д̇аа вигин̣н̣ад̇д̇аа сам̣гин̣н̣абаригкод̇и вуд̇д̇о. д̇ан̣хаад̇и ваддамуулигаа д̇ан̣хаа. аяан̃хи г̇амбхийраануг̇ад̇адтзна зсигаад̇и вужжад̇и. д̇знзса д̇ассаа аб̣б̣уул̣хад̇д̇аа лун̃жид̇ваа чад̣д̣ид̇ад̇д̇аа аб̣б̣уул̣хзсигод̇и вуд̇д̇о. орамбхааг̇ияаанийд̇и орам̣ бхаж̇анагаани гаамабхавз убабад̇д̇ибажжаяаани. зд̇аани хи гаваадам̣ вияа наг̇арад̣̇ваарам̣ жид̇д̇ам̣ бид̣̇ахид̇ваа тид̇ад̇д̇аа аг̇г̇ал̣аад̇и вужжанд̇и. д̇знзса д̇зсам̣ нираагад̇ад̇д̇аа бхиннад̇д̇аа нираг̇г̇ал̣од̇и вуд̇д̇о. арияод̇и ниггилзсо барисуд̣̇д̇хо. баннад̣̇д̇хаж̇од̇и бад̇ид̇амаанад̣̇д̇хаж̇о. баннабхаарод̇и канд̇хабхаарагилзсабхаараабхисан̇каарабхаарабан̃жгаамаг̇ун̣абхаараа баннаа орохид̇аа ассаад̇и баннабхааро. абижа ид̇ха маанабхаарассзва оробид̇ад̇д̇аа баннабхаарод̇и ад̇хиббзд̇о. висам̣яуд̇д̇од̇и жад̇уухи яог̇зхи саб̣б̣агилзсзхи жа висам̣яуд̇д̇о. ид̇ха бана маанасам̣яог̇знзва висам̣яуд̇д̇ад̇д̇аа висам̣яуд̇д̇од̇и ад̇хиббзд̇о. асмимаанод̇и руубз асмийд̇и маано, взд̣̇анааяа… сан̃н̃ааяа… сан̇каарзсу… вин̃н̃аан̣з асмийд̇и маано.
Evaṃ vimuttacittaṃ mahākhīṇāsavaṃ dassetvā idāni tassa yathābhūtehi pañcahi kāraṇehi nāmaṃ gaṇhanto ayaṃ vuccati, bhikkhavetiādimāha. Avijjāti vaṭṭamūlikā avijjā. Ayañhi durukkhipanaṭṭhena palighoti vuccati. Tenesa tassa ukkhittattā ukkhittapalighoti vutto. Tālāvatthukatāti sīsacchinnatālo viya katā, samūlaṃ vā tālaṃ uddharitvā tālassa vatthu viya katā, yathā tasmiṃ vatthusmiṃ puna so tālo na paññāyati, evaṃ puna apaññattibhāvaṃ nītāti attho. Ponobbhavikoti punabbhavadāyako. Jātisaṃsārotiādīsu jāyanavasena ceva saṃsaraṇavasena ca evaṃ laddhanāmānaṃ punabbhavakhandhānaṃ paccayo kammābhisaṅkhāro. So hi punappunaṃ uppattikaraṇavasena parikkhipitvā ṭhitattā parikkhāti vuccati, tenesa tassā saṃkiṇṇattā vikiṇṇattā saṃkiṇṇaparikkhoti vutto. Taṇhāti vaṭṭamūlikā taṇhā. Ayañhi gambhīrānugataṭṭhena esikāti vuccati. Tenesa tassā abbūḷhattā luñcitvā chaḍḍitattā abbūḷhesikoti vutto. Orambhāgiyānīti oraṃ bhajanakāni kāmabhave upapattipaccayāni. Etāni hi kavāṭaṃ viya nagaradvāraṃ cittaṃ pidahitvā ṭhitattā aggaḷāti vuccanti. Tenesa tesaṃ nirākatattā bhinnattā niraggaḷoti vutto. Ariyoti nikkileso parisuddho. Pannaddhajoti patitamānaddhajo. Pannabhāroti khandhabhārakilesabhāraabhisaṅkhārabhārapañckāmaguṇabhārā pannā orohitā assāti pannabhāro. Apica idha mānabhārasseva oropitattā pannabhāroti adhippeto. Visaṃyuttoti catūhi yogehi sabbakilesehi ca visaṃyutto. Idha pana mānasaṃyogeneva visaṃyuttattā visaṃyuttoti adhippeto. Asmimānoti rūpe asmīti māno, vedanāya… saññāya… saṅkhāresu… viññāṇe asmīti māno.
зд̇д̇аавад̇аа бхаг̇авад̇аа маг̇г̇зна гилзсз кзбзд̇ваа нирод̇хасаяанавараг̇ад̇асса ниб̣б̣аанаарамман̣ам̣ паласамаабад̇д̇им̣ аббзд̇ваа вихарад̇о кийн̣аасавасса гаало д̣̇ассид̇о. яат̇аа хи д̣̇вз наг̇араани згам̣ жоранаг̇арам̣, згам̣ кзманаг̇арам̣. ат̇а згасса махааяод̇хасса звам̣ бхавзяяа – ‘‘яаавимам̣ жоранаг̇арам̣ д̇идтад̇и, д̇аава кзманаг̇арам̣ бхаяад̇о на мужжад̇и, жоранаг̇арам̣ анаг̇арам̣ гариссаамий’’д̇и саннаахам̣ гад̇ваа каг̇г̇ам̣ г̇ахзд̇ваа жоранаг̇арам̣ убасан̇гамид̇ваа наг̇арад̣̇ваарз уссаабид̇з зсигад̇т̇амбхз каг̇г̇зна чинд̣̇ид̇ваа сад̣̇ваараб̣аахагам̣ гаваадам̣ чинд̣̇ид̇ваа балигхам̣ угкибид̇ваа баагаарам̣ бхинд̣̇анд̇о баригкам̣ сам̣гирид̇ваа наг̇арасобханад̇т̇ааяа уссид̇з д̇хаж̇з баад̇зд̇ваа наг̇арам̣ аг̇г̇инаа жхаабзд̇ваа кзманаг̇арам̣ бависид̇ваа баасаад̣̇ам̣ абхируяха н̃аад̇иг̇ан̣абаривуд̇о сурасабхож̇анам̣ бхун̃ж̇зяяа, звам̣ жоранаг̇арам̣ вияа саггааяо, кзманаг̇арам̣ вияа ниб̣б̣аанам̣, махааяод̇хо вияа яог̇ааважаро. д̇ассзвам̣ ход̇и, ‘‘яаава саггааяаваддам̣ вад̇д̇ад̇и, д̇аава д̣̇вад̇д̇им̣сагаммагааран̣аадтанавуд̇ирог̇абан̃жавийсад̇имахаабхаязхи баримужжанам̣ над̇т̇ий’’д̇и. со махааяод̇хо вияа саннаахам̣ сийласаннаахам̣ гад̇ваа, бан̃н̃аакаг̇г̇ам̣ г̇ахзд̇ваа каг̇г̇зна зсигад̇т̇амбхз вияа арахад̇д̇амаг̇г̇зна д̇ан̣хзсигам̣ лун̃жид̇ваа, со яод̇хо сад̣̇ваараб̣аахагам̣ наг̇арагаваадам̣ вияа бан̃жорамбхааг̇ияасам̣яож̇анаг̇г̇ал̣ам̣ уг̇гхаадзд̇ваа, со яод̇хо балигхам̣ вияа, авиж̇ж̇аабалигхам̣ угкибид̇ваа , со яод̇хо баагаарам̣ бхинд̣̇анд̇о баригкам̣ вияа гаммаабхисан̇каарам̣ бхинд̣̇анд̇о ж̇аад̇исам̣саарабаригкам̣ сам̣гирид̇ваа, со яод̇хо наг̇арасобханад̇т̇ааяа уссаабид̇з д̇хаж̇з вияа маанад̣̇д̇хаж̇з баад̇зд̇ваа саггааяанаг̇арам̣ жхаабзд̇ваа, со яод̇хо кзманаг̇арз убарибаасаад̣̇з сурасабхож̇анам̣ вияа гилзсаниб̣б̣аанам̣ наг̇арам̣ бависид̇ваа амад̇анирод̇хаарамман̣ам̣ паласамаабад̇д̇исукам̣ анубхавамаано гаалам̣ вийд̇инаамзд̇и.
Ettāvatā bhagavatā maggena kilese khepetvā nirodhasayanavaragatassa nibbānārammaṇaṃ phalasamāpattiṃ appetvā viharato khīṇāsavassa kālo dassito. Yathā hi dve nagarāni ekaṃ coranagaraṃ, ekaṃ khemanagaraṃ. Atha ekassa mahāyodhassa evaṃ bhaveyya – ‘‘yāvimaṃ coranagaraṃ tiṭṭhati, tāva khemanagaraṃ bhayato na muccati, coranagaraṃ anagaraṃ karissāmī’’ti sannāhaṃ katvā khaggaṃ gahetvā coranagaraṃ upasaṅkamitvā nagaradvāre ussāpite esikatthambhe khaggena chinditvā sadvārabāhakaṃ kavāṭaṃ chinditvā palighaṃ ukkhipitvā pākāraṃ bhindanto parikkhaṃ saṃkiritvā nagarasobhanatthāya ussite dhaje pātetvā nagaraṃ agginā jhāpetvā khemanagaraṃ pavisitvā pāsādaṃ abhiruyha ñātigaṇaparivuto surasabhojanaṃ bhuñjeyya, evaṃ coranagaraṃ viya sakkāyo, khemanagaraṃ viya nibbānaṃ, mahāyodho viya yogāvacaro. Tassevaṃ hoti, ‘‘yāva sakkāyavaṭṭaṃ vattati, tāva dvattiṃsakammakāraṇaaṭṭhanavutirogapañcavīsatimahābhayehi parimuccanaṃ natthī’’ti. So mahāyodho viya sannāhaṃ sīlasannāhaṃ katvā, paññākhaggaṃ gahetvā khaggena esikatthambhe viya arahattamaggena taṇhesikaṃ luñcitvā, so yodho sadvārabāhakaṃ nagarakavāṭaṃ viya pañcorambhāgiyasaṃyojanaggaḷaṃ ugghāṭetvā, so yodho palighaṃ viya, avijjāpalighaṃ ukkhipitvā , so yodho pākāraṃ bhindanto parikkhaṃ viya kammābhisaṅkhāraṃ bhindanto jātisaṃsāraparikkhaṃ saṃkiritvā, so yodho nagarasobhanatthāya ussāpite dhaje viya mānaddhaje pātetvā sakkāyanagaraṃ jhāpetvā, so yodho khemanagare uparipāsāde surasabhojanaṃ viya kilesanibbānaṃ nagaraṃ pavisitvā amatanirodhārammaṇaṃ phalasamāpattisukhaṃ anubhavamāno kālaṃ vītināmeti.
246. ид̣̇аани звам̣ вимуд̇д̇ажид̇д̇асса кийн̣аасавасса барзхи анад̇хиг̇аманийяавин̃н̃аан̣ад̇ам̣ д̣̇ассзнд̇о звам̣ вимуд̇д̇ажид̇д̇ам̣ код̇иаад̣̇имааха. д̇ад̇т̇а анвзсанд̇и анвзсанд̇аа г̇авзсанд̇аа. ид̣̇ам̣ ниссид̇анд̇и ид̣̇ам̣ наама ниссид̇ам̣. д̇ат̇ааг̇ад̇ассаад̇и зд̇т̇а сад̇д̇оби д̇ат̇ааг̇ад̇од̇и ад̇хиббзд̇о, уд̇д̇амабуг̇г̇ало кийн̣аасавоби. ананувиж̇ж̇од̇и асам̣виж̇ж̇амаано ваа авинд̣̇зяяо ваа. д̇ат̇ааг̇ад̇од̇и хи сад̇д̇з г̇ахид̇з асам̣виж̇ж̇амаанод̇и ад̇т̇о ваддад̇и, кийн̣аасавз г̇ахид̇з авинд̣̇зяяод̇и ад̇т̇о ваддад̇и.
246. Idāni evaṃ vimuttacittassa khīṇāsavassa parehi anadhigamanīyaviññāṇataṃ dassento evaṃ vimuttacittaṃ khotiādimāha. Tattha anvesanti anvesantā gavesantā. Idaṃ nissitanti idaṃ nāma nissitaṃ. Tathāgatassāti ettha sattopi tathāgatoti adhippeto, uttamapuggalo khīṇāsavopi. Ananuvijjoti asaṃvijjamāno vā avindeyyo vā. Tathāgatoti hi satte gahite asaṃvijjamānoti attho vaṭṭati, khīṇāsave gahite avindeyyoti attho vaṭṭati.
д̇ад̇т̇а буриманаяз аяамад̇хиббааяо – бхигкавз, ахам̣ д̣̇идтзва д̇хаммз д̇харамаанагам̣язва кийн̣аасавам̣ д̇ат̇ааг̇ад̇о сад̇д̇о буг̇г̇алод̇и на бан̃н̃абзми. аббадисанд̇хигам̣ бана бариниб̣б̣уд̇ам̣ кийн̣аасавам̣ сад̇д̇од̇и ваа буг̇г̇алод̇и ваа гим̣ бан̃н̃абзссаами? ананувиж̇ж̇о д̇ат̇ааг̇ад̇о. на хи барамад̇т̇ад̇о сад̇д̇о наама гожи ад̇т̇и, д̇асса авиж̇ж̇амаанасса ид̣̇ам̣ ниссид̇ам̣ вин̃н̃аан̣анд̇и анвзсанд̇ааби гим̣ ад̇хиг̇ажчиссанд̇и? гат̇ам̣ бадилабхиссанд̇ийд̇и ад̇т̇о. д̣̇уд̇ияанаяз аяамад̇хиббааяо – бхигкавз, ахам̣ д̣̇идтзва д̇хаммз д̇харамаанагам̣язва кийн̣аасавам̣ вин̃н̃аан̣авасзна инд̣̇аад̣̇ийхи авинд̣̇ияам̣ вад̣̇аами. на хи саинд̣̇аа д̣̇зваа саб̣рахмагаа сабаж̇аабад̇игаа анвзсанд̇ааби кийн̣аасавасса вибассанаажид̇д̇ам̣ ваа маг̇г̇ажид̇д̇ам̣ ваа палажид̇д̇ам̣ ваа, ид̣̇ам̣ наама аарамман̣ам̣ ниссааяа вад̇д̇ад̇ийд̇и ж̇аанид̇ум̣ саггонд̇и. д̇з аббадисанд̇хигасса бариниб̣б̣уд̇асса гим̣ ж̇ааниссанд̇ийд̇и?
Tattha purimanaye ayamadhippāyo – bhikkhave, ahaṃ diṭṭheva dhamme dharamānakaṃyeva khīṇāsavaṃ tathāgato satto puggaloti na paññapemi. Appaṭisandhikaṃ pana parinibbutaṃ khīṇāsavaṃ sattoti vā puggaloti vā kiṃ paññapessāmi? Ananuvijjo tathāgato. Na hi paramatthato satto nāma koci atthi, tassa avijjamānassa idaṃ nissitaṃ viññāṇanti anvesantāpi kiṃ adhigacchissanti? Kathaṃ paṭilabhissantīti attho. Dutiyanaye ayamadhippāyo – bhikkhave, ahaṃ diṭṭheva dhamme dharamānakaṃyeva khīṇāsavaṃ viññāṇavasena indādīhi avindiyaṃ vadāmi. Na hi saindā devā sabrahmakā sapajāpatikā anvesantāpi khīṇāsavassa vipassanācittaṃ vā maggacittaṃ vā phalacittaṃ vā, idaṃ nāma ārammaṇaṃ nissāya vattatīti jānituṃ sakkonti. Te appaṭisandhikassa parinibbutassa kiṃ jānissantīti?
асад̇аад̇и асанд̇зна. д̇ужчаад̇и д̇ужчагзна. мусаад̇и мусааваад̣̇зна. абхууд̇знаад̇и яам̣ над̇т̇и, д̇зна. аб̣бхаажигканд̇ийд̇и абхиаажигканд̇и, абхибхавид̇ваа вад̣̇анд̇и. взнаяигод̇и винаяад̇и винаасзд̇ийд̇и винаяо, со зва взнаяиго, сад̇д̇авинаасагод̇и ад̇хиббааяо. яат̇аа жаахам̣ на, бхигкавзд̇и, бхигкавз, язна ваагаарзна ахам̣ на сад̇д̇авинаасаго. яат̇аа жаахам̣ на вад̣̇аамийд̇и язна ваа гааран̣зна ахам̣ сад̇д̇авинаасам̣ на бан̃н̃абзми . ид̣̇ам̣ вуд̇д̇ам̣ ход̇и – яат̇аахам̣ на сад̇д̇авинаасаго, яат̇аа жа на сад̇д̇авинаасам̣ бан̃н̃абзми, д̇ат̇аа мам̣ д̇з бхонд̇о саман̣аб̣раахман̣аа ‘‘взнаяиго саман̣о г̇од̇амо’’д̇и вад̣̇анд̇аа сад̇д̇авинаасаго саман̣о г̇од̇амод̇и жа, ‘‘сад̇о сад̇д̇асса ужчзд̣̇ам̣ винаасам̣ вибхавам̣ бан̃н̃абзд̇ий’’д̇и вад̣̇анд̇аа сад̇д̇авинаасам̣ бан̃н̃абзд̇ийд̇и жа асад̇аа д̇ужчаа мусаа абхууд̇зна аб̣бхаажигканд̇ийд̇и.
Asatāti asantena. Tucchāti tucchakena. Musāti musāvādena. Abhūtenāti yaṃ natthi, tena. Abbhācikkhantīti abhiācikkhanti, abhibhavitvā vadanti. Venayikoti vinayati vināsetīti vinayo, so eva venayiko, sattavināsakoti adhippāyo. Yathā cāhaṃ na, bhikkhaveti, bhikkhave, yena vākārena ahaṃ na sattavināsako. Yathā cāhaṃ na vadāmīti yena vā kāraṇena ahaṃ sattavināsaṃ na paññapemi . Idaṃ vuttaṃ hoti – yathāhaṃ na sattavināsako, yathā ca na sattavināsaṃ paññapemi, tathā maṃ te bhonto samaṇabrāhmaṇā ‘‘venayiko samaṇo gotamo’’ti vadantā sattavināsako samaṇo gotamoti ca, ‘‘sato sattassa ucchedaṃ vināsaṃ vibhavaṃ paññapetī’’ti vadantā sattavināsaṃ paññapetīti ca asatā tucchā musā abhūtena abbhācikkhantīti.
буб̣б̣з жаад̇и буб̣б̣з махааб̣од̇химан̣д̣амхиязва жа. зд̇арахи жаад̇и зд̇арахи д̇хаммад̣̇зсанааяан̃жа. д̣̇угкан̃жзва бан̃н̃абзми, д̣̇угкасса жа нирод̇ханд̇и д̇хаммажаггам̣ аббавад̇д̇зд̇ваа б̣од̇химан̣д̣з вихаранд̇оби д̇хаммажаггаббавад̇д̇анад̇о бадтааяа д̇хаммам̣ д̣̇зсзнд̇оби жад̇усажжамзва бан̃н̃абзмийд̇и ад̇т̇о. зд̇т̇а хи д̣̇угкаг̇г̇ахан̣зна д̇асса муулабхууд̇о самуд̣̇аяо, нирод̇хаг̇г̇ахан̣зна д̇ам̣самбаабаго маг̇г̇о г̇ахид̇ова ход̇ийд̇и взд̣̇ид̇аб̣б̣о. д̇ад̇ра жзд̇и д̇асмим̣ жад̇усажжаббагаасанз. барзд̇и сажжаани ааж̇аанид̇ум̣ бадивиж̇жхид̇ум̣ асамад̇т̇абуг̇г̇алаа. аггосанд̇ийд̇и д̣̇асахи аггосавад̇т̇уухи аггосанд̇и. барибхаасанд̇ийд̇и ваажааяа барибхаасанд̇и. росзнд̇и вихзсзнд̇ийд̇и росзссаама вихзсзссаамаад̇и ад̇хиббааязна гхаддзнд̇и д̣̇угкаабзнд̇и. д̇ад̇раад̇и д̇зсу аггосаад̣̇ийсу, д̇зсу ваа барабуг̇г̇алзсу. аагхаад̇од̇и гобо. аббажжаяод̇и д̣̇оманассам̣. анабхирад̣̇д̇хийд̇и ад̇удти.
Pubbe cāti pubbe mahābodhimaṇḍamhiyeva ca. Etarahi cāti etarahi dhammadesanāyañca. Dukkhañceva paññapemi, dukkhassa ca nirodhanti dhammacakkaṃ appavattetvā bodhimaṇḍe viharantopi dhammacakkappavattanato paṭṭhāya dhammaṃ desentopi catusaccameva paññapemīti attho. Ettha hi dukkhaggahaṇena tassa mūlabhūto samudayo, nirodhaggahaṇena taṃsampāpako maggo gahitova hotīti veditabbo. Tatra ceti tasmiṃ catusaccappakāsane. Pareti saccāni ājānituṃ paṭivijjhituṃ asamatthapuggalā. Akkosantīti dasahi akkosavatthūhi akkosanti. Paribhāsantīti vācāya paribhāsanti. Rosenti vihesentīti rosessāma vihesessāmāti adhippāyena ghaṭṭenti dukkhāpenti. Tatrāti tesu akkosādīsu, tesu vā parapuggalesu. Āghātoti kopo. Appaccayoti domanassaṃ. Anabhiraddhīti atuṭṭhi.
д̇ад̇ра жзд̇и жад̇усажжаббагаасанзязва. барзд̇и жад̇усажжаббагаасанам̣ ааж̇аанид̇ум̣ бадивиж̇жхид̇ум̣ самад̇т̇абуг̇г̇алаа. аананд̣̇од̇и аананд̣̇абийд̇и. уббилаавид̇ад̇д̇анд̇и уббилаабанабийд̇и. д̇ад̇ра жзд̇и жад̇усажжаббагаасанамхиязва. д̇ад̇раад̇и саггаараад̣̇ийсу. яам̣ ко ид̣̇ам̣ буб̣б̣з барин̃н̃аад̇анд̇и ид̣̇ам̣ канд̇хабан̃жагам̣ буб̣б̣з б̣од̇химан̣д̣з д̇ийхи барин̃н̃аахи барин̃н̃аад̇ам̣. д̇ад̇т̇амзд̇и д̇асмим̣ канд̇хабан̃жагз имз. гим̣ вуд̇д̇ам̣ ход̇и? д̇ад̇рааби д̇ат̇ааг̇ад̇асса имз саггаараа маяи гарийяанд̇ийд̇и ваа ахам̣ зд̇з анубхаваамийд̇и ваа на ход̇и. буб̣б̣з барин̃н̃аад̇агканд̇хабан̃жагам̣язва зд̇з саггаарз анубход̇ийд̇и зд̇д̇агамзва ход̇ийд̇и. д̇асмаад̇и яасмаа сажжаани бадивиж̇жхид̇ум̣ асамад̇т̇аа д̇ат̇ааг̇ад̇амби аггосанд̇и, д̇асмаа. сзсам̣ вуд̇д̇анаязнзва взд̣̇ид̇аб̣б̣ам̣.
Tatra ceti catusaccappakāsaneyeva. Pareti catusaccappakāsanaṃ ājānituṃ paṭivijjhituṃ samatthapuggalā. Ānandoti ānandapīti. Uppilāvitattanti uppilāpanapīti. Tatra ceti catusaccappakāsanamhiyeva. Tatrāti sakkārādīsu. Yaṃ kho idaṃ pubbe pariññātanti idaṃ khandhapañcakaṃ pubbe bodhimaṇḍe tīhi pariññāhi pariññātaṃ. Tatthameti tasmiṃ khandhapañcake ime. Kiṃ vuttaṃ hoti? Tatrāpi tathāgatassa ime sakkārā mayi karīyantīti vā ahaṃ ete anubhavāmīti vā na hoti. Pubbe pariññātakkhandhapañcakaṃyeva ete sakkāre anubhotīti ettakameva hotīti. Tasmāti yasmā saccāni paṭivijjhituṃ asamatthā tathāgatampi akkosanti, tasmā. Sesaṃ vuttanayeneva veditabbaṃ.
247. д̇асмаа д̇иха , бхигкавз, яам̣ на д̇умхааганд̇и яасмаа ад̇д̇аниязби чанд̣̇арааг̇аббахаанам̣ д̣̇ийгхарад̇д̇ам̣ хид̇ааяа сукааяа сам̣вад̇д̇ад̇и, д̇асмаа яам̣ на д̇умхаагам̣, д̇ам̣ баж̇ахат̇аад̇и ад̇т̇о. яат̇аабажжаяам̣ ваа гарзяяаад̇и яат̇аа яат̇аа ижчзяяа д̇ат̇аа д̇ат̇аа гарзяяа. на хи но зд̇ам̣, бханд̇з, ад̇д̇аа ваад̇и, бханд̇з, зд̇ам̣ д̇ин̣агадтасаакаабалаасам̣ амхаагам̣ нзва ад̇д̇аа на амхаагам̣ руубам̣ на вин̃н̃аан̣анд̇и вад̣̇анд̇и. ад̇д̇анияам̣ ваад̇и амхаагам̣ жийвараад̣̇ибаригкаароби на ход̇ийд̇и ад̇т̇о. звамзва ко, бхигкавз, яам̣ на д̇умхаагам̣ д̇ам̣ баж̇ахат̇аад̇и бхаг̇аваа, канд̇хабан̃жагам̣язва на д̇умхааганд̇и д̣̇ассзд̇ваа баж̇ахаабзд̇и, д̇ан̃жа ко на уббаадзд̇ваа, лун̃жид̇ваа ваа. чанд̣̇арааг̇авинаязна банзд̇ам̣ баж̇ахаабзд̇и.
247.Tasmā tiha, bhikkhave, yaṃ na tumhākanti yasmā attaniyepi chandarāgappahānaṃ dīgharattaṃ hitāya sukhāya saṃvattati, tasmā yaṃ na tumhākaṃ, taṃ pajahathāti attho. Yathāpaccayaṃ vākareyyāti yathā yathā iccheyya tathā tathā kareyya. Na hi no etaṃ, bhante, attā vāti, bhante, etaṃ tiṇakaṭṭhasākhāpalāsaṃ amhākaṃ neva attā na amhākaṃ rūpaṃ na viññāṇanti vadanti. Attaniyaṃ vāti amhākaṃ cīvarādiparikkhāropi na hotīti attho. Evameva kho, bhikkhave, yaṃ na tumhākaṃ taṃ pajahathāti bhagavā, khandhapañcakaṃyeva na tumhākanti dassetvā pajahāpeti, tañca kho na uppāṭetvā, luñcitvā vā. Chandarāgavinayena panetaṃ pajahāpeti.
248. звам̣ сваагкаад̇од̇и зд̇т̇а д̇ибариваддад̇о бадтааяа яаава имам̣ таанам̣ аахарид̇умби ваддад̇и, бадиломзна бзмамад̇д̇агзна саг̇г̇абарааяан̣ад̇о бадтааяа яаава имам̣ таанам̣ аахарид̇умби ваддад̇и. сваагкаад̇од̇и сугат̇ид̇о. сугат̇ид̇ад̇д̇аа зва уд̇д̇аано вивадо багаасид̇о. чиннабилод̇игод̇и билод̇игаа вужжад̇и чиннам̣ бхиннам̣ д̇ад̇т̇а д̇ад̇т̇а сиб̣б̣ид̇ам̣ г̇ан̣тигад̇ам̣ ж̇ин̣н̣ам̣ вад̇т̇ам̣, д̇ам̣ яасса над̇т̇и, адтахад̇т̇ам̣ ваа навахад̇т̇ам̣ ваа ахад̇асаадагам̣ нивад̇т̇о, со чиннабилод̇иго наама. аяамби д̇хаммо д̇аад̣̇исо, на хзд̇т̇а гохан̃н̃аад̣̇ивасзна чиннабхиннасиб̣б̣ид̇аг̇ан̣тигад̇абхааво ад̇т̇и. абижа гажаваро билод̇игод̇и вужжад̇и. имасмин̃жа саасанз саман̣агажаварам̣ наама бад̇идтаад̇ум̣ на лабхад̇и. д̇знзвааха –
248.Evaṃ svākkhātoti ettha tiparivaṭṭato paṭṭhāya yāva imaṃ ṭhānaṃ āharitumpi vaṭṭati, paṭilomena pemamattakena saggaparāyaṇato paṭṭhāya yāva imaṃ ṭhānaṃ āharitumpi vaṭṭati. Svākkhātoti sukathito. Sukathitattā eva uttāno vivaṭo pakāsito. Chinnapilotikoti pilotikā vuccati chinnaṃ bhinnaṃ tattha tattha sibbitaṃ gaṇṭhikataṃ jiṇṇaṃ vatthaṃ, taṃ yassa natthi, aṭṭhahatthaṃ vā navahatthaṃ vā ahatasāṭakaṃ nivattho, so chinnapilotiko nāma. Ayampi dhammo tādiso, na hettha kohaññādivasena chinnabhinnasibbitagaṇṭhikatabhāvo atthi. Apica kacavaro pilotikoti vuccati. Imasmiñca sāsane samaṇakacavaraṃ nāma patiṭṭhātuṃ na labhati. Tenevāha –
‘‘гааран̣д̣авам̣ нид̣̇д̇хамат̇а, гасамб̣ун̃жаабагассат̇а;
‘‘Kāraṇḍavaṃ niddhamatha, kasambuñcāpakassatha;
д̇ад̇о балаабз ваахзт̇а, ассаман̣з саман̣амаанинз.
Tato palāpe vāhetha, assamaṇe samaṇamānine.
нид̣̇д̇хамид̇ваана баабижчз, баабааажаараг̇ожарз;
Niddhamitvāna pāpicche, pāpaācāragocare;
суд̣̇д̇хаа суд̣̇д̇хзхи сам̣ваасам̣, габбаяавхо бад̇иссад̇аа;
Suddhā suddhehi saṃvāsaṃ, kappayavho patissatā;
д̇ад̇о самаг̇г̇аа нибагаа, д̣̇угкассанд̇ам̣ гариссат̇аа’’д̇и. (су. ни. 283-285);
Tato samaggā nipakā, dukkhassantaṃ karissathā’’ti. (su. ni. 283-285);
ид̇и саман̣агажаварасса чиннад̇д̇ааби аяам̣ д̇хаммо чиннабилод̇иго наама ход̇и. ваддам̣ д̇зсам̣ над̇т̇и бан̃н̃аабанааяаад̇и д̇зсам̣ ваддам̣ абан̃н̃ад̇д̇ибхаавам̣ г̇ад̇ам̣ ниббан̃н̃ад̇д̇игам̣ ж̇аад̇ам̣. зваруубо махаакийн̣аасаво звам̣ сваагкаад̇з саасанзязва уббаж̇ж̇ад̇и. яат̇аа жа кийн̣аасаво, звам̣ анааг̇аамиаад̣̇аяоби.
Iti samaṇakacavarassa chinnattāpi ayaṃ dhammo chinnapilotiko nāma hoti. Vaṭṭaṃ tesaṃ natthi paññāpanāyāti tesaṃ vaṭṭaṃ apaññattibhāvaṃ gataṃ nippaññattikaṃ jātaṃ. Evarūpo mahākhīṇāsavo evaṃ svākkhāte sāsaneyeva uppajjati. Yathā ca khīṇāsavo, evaṃ anāgāmiādayopi.
д̇ад̇т̇а д̇хаммаанусаарино сад̣̇д̇хаанусааринод̇и имз д̣̇вз сод̇аабад̇д̇имаг̇г̇адтаа хонд̇и. яат̇ааха – ‘‘гад̇амо жа буг̇г̇ало д̇хаммаанусаарий? яасса буг̇г̇аласса сод̇аабад̇д̇ипаласажчигирияааяа бадибаннасса бан̃н̃инд̣̇рияам̣ ад̇химад̇д̇ам̣ ход̇и, бан̃н̃ааваахим̣ бан̃н̃аабуб̣б̣ан̇г̇амам̣ арияамаг̇г̇ам̣ бхаавзд̇и. аяам̣ вужжад̇и буг̇г̇ало д̇хаммаанусаарий. сод̇аабад̇д̇ипаласажчигирияааяа бадибанно буг̇г̇ало д̇хаммаанусаарий, палз тид̇о д̣̇идтиббад̇д̇о. гад̇амо жа буг̇г̇ало сад̣̇д̇хаанусаарий? яасса буг̇г̇аласса сод̇аабад̇д̇ипаласажчигирияааяа бадибаннасса сад̣̇д̇хинд̣̇рияам̣ ад̇химад̇д̇ам̣ ход̇и, сад̣̇д̇хааваахим̣ сад̣̇д̇хаабуб̣б̣ан̇г̇амам̣ арияамаг̇г̇ам̣ бхаавзд̇и. аяам̣ вужжад̇и буг̇г̇ало сад̣̇д̇хаанусаарий. сод̇аабад̇д̇ипаласажчигирияааяа бадибанно буг̇г̇ало сад̣̇д̇хаанусаарий, палз тид̇о сад̣̇д̇хаавимуд̇д̇о’’д̇и (бу. ба. 30). язсам̣ маяи сад̣̇д̇хаамад̇д̇ам̣ бзмамад̇д̇анд̇и иминаа язсам̣ ан̃н̃о арияад̇хаммо над̇т̇и, д̇ат̇ааг̇ад̇з бана сад̣̇д̇хаамад̇д̇ам̣ бзмамад̇д̇амзва ход̇и. д̇з вибассагабуг̇г̇алаа ад̇хиббзд̇аа. вибассагабхигкуунан̃хи звам̣ вибассанам̣ бадтабзд̇ваа нисиннаанам̣ д̣̇асаб̣алз згаа сад̣̇д̇хаа згам̣ бзмам̣ уббаж̇ж̇ад̇и. д̇ааяа сад̣̇д̇хааяа д̇зна бзмзна хад̇т̇з г̇ахзд̇ваа саг̇г̇з табид̇аа вияа хонд̇и, нияад̇аг̇ад̇игаа гира зд̇з. бораан̣агад̇т̇зраа бана зваруубам̣ бхигкум̣ жуул̣асод̇аабаннод̇и вад̣̇анд̇и. сзсам̣ саб̣б̣ад̇т̇а уд̇д̇аанад̇т̇амзваад̇и.
Tattha dhammānusārino saddhānusārinoti ime dve sotāpattimaggaṭṭhā honti. Yathāha – ‘‘katamo ca puggalo dhammānusārī? Yassa puggalassa sotāpattiphalasacchikiriyāya paṭipannassa paññindriyaṃ adhimattaṃ hoti, paññāvāhiṃ paññāpubbaṅgamaṃ ariyamaggaṃ bhāveti. Ayaṃ vuccati puggalo dhammānusārī. Sotāpattiphalasacchikiriyāya paṭipanno puggalo dhammānusārī, phale ṭhito diṭṭhippatto. Katamo ca puggalo saddhānusārī? Yassa puggalassa sotāpattiphalasacchikiriyāya paṭipannassa saddhindriyaṃ adhimattaṃ hoti, saddhāvāhiṃ saddhāpubbaṅgamaṃ ariyamaggaṃ bhāveti. Ayaṃ vuccati puggalo saddhānusārī. Sotāpattiphalasacchikiriyāya paṭipanno puggalo saddhānusārī, phale ṭhito saddhāvimutto’’ti (pu. pa. 30). Yesaṃ mayi saddhāmattaṃ pemamattanti iminā yesaṃ añño ariyadhammo natthi, tathāgate pana saddhāmattaṃ pemamattameva hoti. Te vipassakapuggalā adhippetā. Vipassakabhikkhūnañhi evaṃ vipassanaṃ paṭṭhapetvā nisinnānaṃ dasabale ekā saddhā ekaṃ pemaṃ uppajjati. Tāya saddhāya tena pemena hatthe gahetvā sagge ṭhapitā viya honti, niyatagatikā kira ete. Porāṇakattherā pana evarūpaṃ bhikkhuṃ cūḷasotāpannoti vadanti. Sesaṃ sabbattha uttānatthamevāti.
бабан̃жасууд̣̇анияаа маж̇жхиманигааяадтагат̇ааяа
Papañcasūdaniyā majjhimanikāyaṭṭhakathāya
алаг̇ад̣̇д̣̇уубамасуд̇д̇аван̣н̣анаа нидтид̇аа.
Alagaddūpamasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 2. алаг̇ад̣̇д̣̇уубамасуд̇д̇ам̣ • 2. Alagaddūpamasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 2. алаг̇ад̣̇д̣̇уубамасуд̇д̇аван̣н̣анаа • 2. Alagaddūpamasuttavaṇṇanā
