| Library / Tipiṭaka / ತಿಪಿಟಕ • Tipiṭaka / ವಜಿರಬುದ್ಧಿ-ಟೀಕಾ • Vajirabuddhi-ṭīkā |
ಅಲಜ್ಜೀನಿಸ್ಸಯವತ್ಥುಕಥಾವಣ್ಣನಾ
Alajjīnissayavatthukathāvaṇṇanā
೧೨೦. ‘‘ನ , ಭಿಕ್ಖವೇ, ಅಲಜ್ಜೀನಂ ನಿಸ್ಸಯೋ ದಾತಬ್ಬೋ’’ತಿ ಇಮಿನಾ ಅಲಜ್ಜೀಹಿ ಭಿಕ್ಖೂಹಿ, ಸಾಮಣೇರೇಹಿ ವಾ ಸದ್ಧಿಂ ದ್ವೇಪಿ ಧಮ್ಮಾಮಿಸಪರಿಭೋಗಾ ಪಟಿಕ್ಖಿತ್ತಾ ಹೋನ್ತಿ ನಿಸ್ಸಯಭಾವೇ ಭಾವತೋ ತೇಸಂ। ಯಥಾಹ ‘‘ಆಚರಿಯೇನ, ಭಿಕ್ಖವೇ, ಅನ್ತೇವಾಸಿಕೋ ಸಙ್ಗಹೇತಬ್ಬೋ ಅನುಗ್ಗಹೇತಬ್ಬೋ ಉದ್ದೇಸೇನ ಪರಿಪುಚ್ಛಾಯ ಓವಾದೇನ ಅನುಸಾಸನಿಯಾ’’ತಿಆದಿ (ಮಹಾವ॰ ೭೯) ಉಪಜ್ಝಾಯಸ್ಸಪಿ ನಿಸ್ಸಯಪ್ಪಣಾಮನಸಮ್ಭವತೋ, ಸೋಪಿ ಸದ್ಧಿವಿಹಾರಿಕಸ್ಸ ನಿಸ್ಸಯೋತಿ ವೇದಿತಬ್ಬಂ, ತಸ್ಮಾ ಉಪಜ್ಝಾಯೋ ಚೇ ಅಲಜ್ಜೀ ಹೋತಿ, ನ ತಂ ನಿಸ್ಸಾಯ ವಸಿತಬ್ಬನ್ತಿ ಸಿದ್ಧಂ ಹೋತಿ। ಭಿಕ್ಖೂನಂ ಸಮ್ಮಾಪಟಿಪತ್ತಿಯಾ ಸಮಾನಭಾಗೋ ಭಿಕ್ಖು ಸಭಾಗೋ। ತಸ್ಸಭಾವೋ ಭಿಕ್ಖುಸಭಾಗತಾ। ತಂ ಭಿಕ್ಖುಸಭಾಗತಂ। ಯಾವ ಜಾನಾಮೀತಿ ಅಧಿಪ್ಪಾಯೇನ ವಸಿತುಂ ವಟ್ಟತಿ। ಭಿಕ್ಖೂಹಿ ಸಭಾಗತಂ। ಕಿಂ ತಂ? ಲಜ್ಜಿಭಾವಂ। ‘‘ಸತ್ತಾಹಂ…ಪೇ॰… ಗಹೇತಬ್ಬೋ’’ತಿ ಏತ್ಥ ‘‘ಸತ್ತಾಹಮತ್ತಂ ವಸಿಸ್ಸಾಮಿ, ಕಿಂ ಭಿಕ್ಖುಸಭಾಗತಾಜಾನನೇನಾತಿ ಜಾನನೇ ಧುರಂ ನಿಕ್ಖಿಪಿತ್ವಾ ವಸಿತುಂ ನ ಲಭತೀತಿ ಅತ್ಥೋ’’ತಿ ಲಿಖಿತಂ। ‘‘ಭಿಕ್ಖುಸಭಾಗತಂ ಪನ ಜಾನನ್ತೋ ಸ್ವೇವ ಗಮಿಸ್ಸಾಮಿ, ಕಿಂ ಮೇ ನಿಸ್ಸಯಾರೋಚನೇನಾ’’ತಿ ಅರುಣಂ ಉಟ್ಠಪೇತುಂ ನ ಲಭತಿ। ‘‘ಪುರೇ ಅರುಣಂ ಉಟ್ಠಹಿತ್ವಾ ಗಮಿಸ್ಸಾಮೀ’’ತಿ ಆಭೋಗೇನ ಸಯನ್ತಸ್ಸ ಚೇ ಅರುಣೋ ಉಗ್ಗಚ್ಛತಿ, ವಟ್ಟತಿ।
120. ‘‘Na , bhikkhave, alajjīnaṃ nissayo dātabbo’’ti iminā alajjīhi bhikkhūhi, sāmaṇerehi vā saddhiṃ dvepi dhammāmisaparibhogā paṭikkhittā honti nissayabhāve bhāvato tesaṃ. Yathāha ‘‘ācariyena, bhikkhave, antevāsiko saṅgahetabbo anuggahetabbo uddesena paripucchāya ovādena anusāsaniyā’’tiādi (mahāva. 79) upajjhāyassapi nissayappaṇāmanasambhavato, sopi saddhivihārikassa nissayoti veditabbaṃ, tasmā upajjhāyo ce alajjī hoti, na taṃ nissāya vasitabbanti siddhaṃ hoti. Bhikkhūnaṃ sammāpaṭipattiyā samānabhāgo bhikkhu sabhāgo. Tassabhāvo bhikkhusabhāgatā. Taṃ bhikkhusabhāgataṃ. Yāva jānāmīti adhippāyena vasituṃ vaṭṭati. Bhikkhūhi sabhāgataṃ. Kiṃ taṃ? Lajjibhāvaṃ. ‘‘Sattāhaṃ…pe… gahetabbo’’ti ettha ‘‘sattāhamattaṃ vasissāmi, kiṃ bhikkhusabhāgatājānanenāti jānane dhuraṃ nikkhipitvā vasituṃ na labhatīti attho’’ti likhitaṃ. ‘‘Bhikkhusabhāgataṃ pana jānanto sveva gamissāmi, kiṃ me nissayārocanenā’’ti aruṇaṃ uṭṭhapetuṃ na labhati. ‘‘Pure aruṇaṃ uṭṭhahitvā gamissāmī’’ti ābhogena sayantassa ce aruṇo uggacchati, vaṭṭati.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೫೮. ಅಲಜ್ಜೀನಿಸ್ಸಯವತ್ಥೂನಿ • 58. Alajjīnissayavatthūni
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ಅಲಜ್ಜೀನಿಸ್ಸಯವತ್ಥುಕಥಾ • Alajjīnissayavatthukathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಅಲಜ್ಜೀನಿಸ್ಸಯವತ್ಥುಕಥಾವಣ್ಣನಾ • Alajjīnissayavatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಅಲಜ್ಜಿನಿಸ್ಸಯವತ್ಥುಕಥಾವಣ್ಣನಾ • Alajjinissayavatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೫೮. ಅಲಜ್ಜೀನಿಸ್ಸಯವತ್ಥುಕಥಾ • 58. Alajjīnissayavatthukathā
