| Library / Tipiṭaka / තිපිටක • Tipiṭaka / අපදානපාළි • Apadānapāḷi |
23. ආලම්‌බණදායකවග්‌ගො
23. Ālambaṇadāyakavaggo
1. ආලම්‌බණදායකත්‌ථෙරඅපදානං
1. Ālambaṇadāyakattheraapadānaṃ
1.
1.
‘‘අත්‌ථදස්‌සිස්‌ස භගවතො, ලොකජෙට්‌ඨස්‌ස තාදිනො;
‘‘Atthadassissa bhagavato, lokajeṭṭhassa tādino;
ආලම්‌බණං මයා දින්‌නං, ද්‌විපදින්‌දස්‌ස තාදිනො.
Ālambaṇaṃ mayā dinnaṃ, dvipadindassa tādino.
2.
2.
‘‘ධරණිං පටිපජ්‌ජාමි, විපුලං සාගරප්‌පරං;
‘‘Dharaṇiṃ paṭipajjāmi, vipulaṃ sāgarapparaṃ;
පාණෙසු ච ඉස්‌සරියං, වත්‌තෙමි වසුධාය ච.
Pāṇesu ca issariyaṃ, vattemi vasudhāya ca.
3.
3.
‘‘කිලෙසා ඣාපිතා මය්‌හං, භවා සබ්‌බෙ සමූහතා;
‘‘Kilesā jhāpitā mayhaṃ, bhavā sabbe samūhatā;
තිස්‌සො විජ්‌ජා අනුප්‌පත්‌තා, කතං බුද්‌ධස්‌ස සාසනං.
Tisso vijjā anuppattā, kataṃ buddhassa sāsanaṃ.
4.
4.
‘‘ඉතො ද්‌වෙසට්‌ඨිකප්‌පම්‌හි, තයො ආසිංසු ඛත්‌තියා;
‘‘Ito dvesaṭṭhikappamhi, tayo āsiṃsu khattiyā;
එකාපස්‌සිතනාමා තෙ, චක්‌කවත්‌තී මහබ්‌බලා.
Ekāpassitanāmā te, cakkavattī mahabbalā.
5.
5.
‘‘පටිසම්‌භිදා චතස්‌සො, විමොක්‌ඛාපි ච අට්‌ඨිමෙ;
‘‘Paṭisambhidā catasso, vimokkhāpi ca aṭṭhime;
ඡළභිඤ්‌ඤා සච්‌ඡිකතා, කතං බුද්‌ධස්‌ස සාසනං’’.
Chaḷabhiññā sacchikatā, kataṃ buddhassa sāsanaṃ’’.
ඉත්‌ථං සුදං ආයස්‌මා ආලම්‌බණදායකො ථෙරො ඉමා ගාථායො අභාසිත්‌ථාති.
Itthaṃ sudaṃ āyasmā ālambaṇadāyako thero imā gāthāyo abhāsitthāti.
ආලම්‌බණදායකත්‌ථෙරස්‌සාපදානං පඨමං.
Ālambaṇadāyakattherassāpadānaṃ paṭhamaṃ.
