| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১২. আল়ৰকসুত্তং
12. Āḷavakasuttaṃ
২৪৬. এৰং মে সুতং – একং সমযং ভগৰা আল়ৰিযং ৰিহরতি আল়ৰকস্স যক্খস্স ভৰনে। অথ খো আল়ৰকো যক্খো যেন ভগৰা তেনুপসঙ্কমি; উপসঙ্কমিত্ৰা ভগৰন্তং এতদৰোচ – ‘‘নিক্খম, সমণা’’তি। ‘‘সাধাৰুসো’’তি ভগৰা নিক্খমি। ‘‘পৰিস, সমণা’’তি। ‘‘সাধাৰুসো’’তি ভগৰা পাৰিসি। দুতিযম্পি খো আল়ৰকো যক্খো ভগৰন্তং এতদৰোচ – ‘‘নিক্খম, সমণা’’তি। ‘‘সাধাৰুসো’’তি ভগৰা নিক্খমি। ‘‘পৰিস, সমণা’’তি। ‘‘সাধাৰুসো’’তি ভগৰা পাৰিসি। ততিযম্পি খো আল়ৰকো যক্খো ভগৰন্তং এতদৰোচ – ‘‘নিক্খম, সমণা’’তি। ‘‘সাধাৰুসো’’তি ভগৰা নিক্খমি। ‘‘পৰিস, সমণা’’তি। ‘‘সাধাৰুসো’’তি ভগৰা পাৰিসি। চতুত্থম্পি খো আল়ৰকো যক্খো ভগৰন্তং এতদৰোচ – ‘‘নিক্খম, সমণা’’তি। ‘‘ন খ্ৰাহং তং, আৰুসো, নিক্খমিস্সামি। যং তে করণীযং তং করোহী’’তি। ‘‘পঞ্হং তং, সমণ, পুচ্ছিস্সামি। সচে মে ন ব্যাকরিস্সসি, চিত্তং ৰা তে খিপিস্সামি, হদযং ৰা তে ফালেস্সামি, পাদেসু ৰা গহেত্ৰা পারগঙ্গায খিপিস্সামী’’তি। ‘‘ন খ্ৰাহং তং, আৰুসো, পস্সামি সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায, যে মে চিত্তং ৰা খিপেয্য হদযং ৰা ফালেয্য, পাদেসু ৰা গহেত্ৰা পারগঙ্গায খিপেয্য। অপি চ ত্ৰং, আৰুসো, পুচ্ছ যদা কঙ্খসী’’তি 1।
246. Evaṃ me sutaṃ – ekaṃ samayaṃ bhagavā āḷaviyaṃ viharati āḷavakassa yakkhassa bhavane. Atha kho āḷavako yakkho yena bhagavā tenupasaṅkami; upasaṅkamitvā bhagavantaṃ etadavoca – ‘‘nikkhama, samaṇā’’ti. ‘‘Sādhāvuso’’ti bhagavā nikkhami. ‘‘Pavisa, samaṇā’’ti. ‘‘Sādhāvuso’’ti bhagavā pāvisi. Dutiyampi kho āḷavako yakkho bhagavantaṃ etadavoca – ‘‘nikkhama, samaṇā’’ti. ‘‘Sādhāvuso’’ti bhagavā nikkhami. ‘‘Pavisa, samaṇā’’ti. ‘‘Sādhāvuso’’ti bhagavā pāvisi. Tatiyampi kho āḷavako yakkho bhagavantaṃ etadavoca – ‘‘nikkhama, samaṇā’’ti. ‘‘Sādhāvuso’’ti bhagavā nikkhami. ‘‘Pavisa, samaṇā’’ti. ‘‘Sādhāvuso’’ti bhagavā pāvisi. Catutthampi kho āḷavako yakkho bhagavantaṃ etadavoca – ‘‘nikkhama, samaṇā’’ti. ‘‘Na khvāhaṃ taṃ, āvuso, nikkhamissāmi. Yaṃ te karaṇīyaṃ taṃ karohī’’ti. ‘‘Pañhaṃ taṃ, samaṇa, pucchissāmi. Sace me na byākarissasi, cittaṃ vā te khipissāmi, hadayaṃ vā te phālessāmi, pādesu vā gahetvā pāragaṅgāya khipissāmī’’ti. ‘‘Na khvāhaṃ taṃ, āvuso, passāmi sadevake loke samārake sabrahmake sassamaṇabrāhmaṇiyā pajāya sadevamanussāya, ye me cittaṃ vā khipeyya hadayaṃ vā phāleyya, pādesu vā gahetvā pāragaṅgāya khipeyya. Api ca tvaṃ, āvuso, puccha yadā kaṅkhasī’’ti 2.
‘‘কিংসূধ ৰিত্তং পুরিসস্স সেট্ঠং, কিংসু সুচিণ্ণং সুখমাৰহাতি।
‘‘Kiṃsūdha vittaṃ purisassa seṭṭhaṃ, kiṃsu suciṇṇaṃ sukhamāvahāti;
কিংসু হৰে সাদুতরং রসানং, কথংজীৰিং জীৰিতমাহু সেট্ঠ’’ন্তি॥
Kiṃsu have sādutaraṃ rasānaṃ, kathaṃjīviṃ jīvitamāhu seṭṭha’’nti.
‘‘সদ্ধীধ ৰিত্তং পুরিস্স সেট্ঠং, ধম্মো সুচিণ্ণো সুখমাৰহাতি।
‘‘Saddhīdha vittaṃ purissa seṭṭhaṃ, dhammo suciṇṇo sukhamāvahāti;
সচ্চং হৰে সাদুতরং রসানং, পঞ্ঞাজীৰিং জীৰিতমাহু সেট্ঠ’’ন্তি॥
Saccaṃ have sādutaraṃ rasānaṃ, paññājīviṃ jīvitamāhu seṭṭha’’nti.
‘‘কথংসু তরতি ওঘং, কথংসু তরতি অণ্ণৰং।
‘‘Kathaṃsu tarati oghaṃ, kathaṃsu tarati aṇṇavaṃ;
কথংসু দুক্খমচ্চেতি, কথংসু পরিসুজ্ঝতী’’তি॥
Kathaṃsu dukkhamacceti, kathaṃsu parisujjhatī’’ti.
‘‘সদ্ধায তরতি ওঘং, অপ্পমাদেন অণ্ণৰং।
‘‘Saddhāya tarati oghaṃ, appamādena aṇṇavaṃ;
ৰীরিযেন দুক্খমচ্চেতি, পঞ্ঞায পরিসুজ্ঝতী’’তি॥
Vīriyena dukkhamacceti, paññāya parisujjhatī’’ti.
‘‘কথংসু লভতে পঞ্ঞং, কথংসু ৰিন্দতে ধনং।
‘‘Kathaṃsu labhate paññaṃ, kathaṃsu vindate dhanaṃ;
কথংসু কিত্তিং পপ্পোতি, কথং মিত্তানি গন্থতি।
Kathaṃsu kittiṃ pappoti, kathaṃ mittāni ganthati;
অস্মা লোকা পরং লোকং, কথং পেচ্চ ন সোচতী’’তি॥
Asmā lokā paraṃ lokaṃ, kathaṃ pecca na socatī’’ti.
‘‘সদ্দহানো অরহতং, ধম্মং নিব্বানপত্তিযা।
‘‘Saddahāno arahataṃ, dhammaṃ nibbānapattiyā;
‘‘পতিরূপকারী ধুরৰা, উট্ঠাতা ৰিন্দতে ধনং।
‘‘Patirūpakārī dhuravā, uṭṭhātā vindate dhanaṃ;
সচ্চেন কিত্তিং পপ্পোতি, দদং মিত্তানি গন্থতি।
Saccena kittiṃ pappoti, dadaṃ mittāni ganthati;
অস্মা লোকা পরং লোকং, এৰং পেচ্চ ন সোচতি॥
Asmā lokā paraṃ lokaṃ, evaṃ pecca na socati.
‘‘যস্সেতে চতুরো ধম্মা, সদ্ধস্স ঘরমেসিনো।
‘‘Yassete caturo dhammā, saddhassa gharamesino;
সচ্চং দম্মো ধিতি চাগো, স ৰে পেচ্চ ন সোচতি॥
Saccaṃ dammo dhiti cāgo, sa ve pecca na socati.
‘‘ইঙ্ঘ অঞ্ঞেপি পুচ্ছস্সু, পুথূ সমণব্রাহ্মণে।
‘‘Iṅgha aññepi pucchassu, puthū samaṇabrāhmaṇe;
যদি সচ্চা দম্মা চাগা, খন্ত্যা ভিয্যোধ ৰিজ্জতী’’তি॥
Yadi saccā dammā cāgā, khantyā bhiyyodha vijjatī’’ti.
‘‘কথং নু দানি পুচ্ছেয্যং, পুথূ সমণব্রাহ্মণে।
‘‘Kathaṃ nu dāni puccheyyaṃ, puthū samaṇabrāhmaṇe;
‘‘সো অহং ৰিচরিস্সামি, গামা গামং পুরা পুরং।
‘‘So ahaṃ vicarissāmi, gāmā gāmaṃ purā puraṃ;
নমস্সমানো সম্বুদ্ধং, ধম্মস্স চ সুধম্মত’’ন্তি॥
Namassamāno sambuddhaṃ, dhammassa ca sudhammata’’nti.
যক্খসংযুত্তং সমত্তং।
Yakkhasaṃyuttaṃ samattaṃ.
তস্সুদ্দানং –
Tassuddānaṃ –
ইন্দকো সক্ক সূচি চ, মণিভদ্দো চ সানু চ।
Indako sakka sūci ca, maṇibhaddo ca sānu ca;
পিযঙ্কর পুনব্বসু সুদত্তো চ, দ্ৰে সুক্কা চীরআল়ৰীতি দ্ৰাদস॥
Piyaṅkara punabbasu sudatto ca, dve sukkā cīraāḷavīti dvādasa.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১২. আল়ৰকসুত্তৰণ্ণনা • 12. Āḷavakasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১২. আল়ৰকসুত্তৰণ্ণনা • 12. Āḷavakasuttavaṇṇanā
