| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
১২. আল়ৰকসুত্তৰণ্ণনা
12. Āḷavakasuttavaṇṇanā
২৪৬. আল়ৰিযন্তি ইত্থিলিঙ্গৰসেন তং রট্ঠম্পি নগরম্পি ৰুচ্চতি। রট্ঠে অধিপ্পেতেপি ন এত্থ বহুৰচনং তথারুল়্হিযা অভাৰতো। তঞ্চ ভৰনন্তি তঞ্চ আল়ৰকস্স যক্খস্স ভৰনং। তত্থাতি আল়ৰকস্স ভৰনে। ‘‘অথ খো আল়ৰকো যক্খো যেন ভগৰা তেনুপসঙ্কমী’’তি এত্থ তস্মিং পাঠপদেসে। অযমনুপুব্বিকথাতি অযং ইদানি ৰুচ্চমানা অনুপুব্বতো আগতা কথা। আল়ৰিযা ইস্সরোতি আল়ৰো, আল়ৰকোতি চ রাজা ৰুত্তো। কদাচি চোরপটিবাহনত্থং, কদাচি উস্সাহসত্তিৰিভাৰনৰসেন পটিরাজনিসেধনত্থং, কদাচি লক্খযোগ্যৰিনিযোগৰসেন ব্যাযামকরণত্থঞ্চ। মিগানং ৰননতো ৰসনতো ৰানতো ৰা ‘‘মিগৰা’’তি লদ্ধসমঞ্ঞং মিগৰং। তস্সেৰাতি রঞ্ঞো এৰ। মিগোতি একো এণিমিগো। তিযোজনন্তি অচ্চন্তসংযোগে উপযোগৰচনং। উদকং ৰিয পৰিসিত্ৰা ঠিতন্তি যথা পরিস্সমপ্পত্তো উদকং পৰিসিত্ৰা ঠিতো নিরস্সাসো হোতি, এৰং ৰিয ঠিতং। মূলন্তি সমীপং। যক্খং দিস্ৰাৰ রঞ্ঞো ভযং ছম্ভিতত্তং ঊরুত্থম্ভং অহোসি, তস্মা রাজা পলাযিতুং নাসক্খি। তেন ৰুত্তং ‘‘খাদিতুং উপগতো’’তি। অথ রাজা দ্ৰিধা ছিন্নং মিগং দত্ৰা অত্তানং মোচেতুকামো অহোসি। যক্খো ‘‘ননু মম হত্থগতকালতো পট্ঠায মিগোপি মম সন্তকো, তত্থ কিন্নাম তে কেরাটিযমিদং দত্ৰা অত্তনো মোচন’’ন্তি রাজানং ন মুঞ্চি। অথ রাজা তস্স তাদিসং পটিঞ্ঞাতং অকাসি। তেন ৰুত্তং ‘‘রাজা তেন সদ্ধি’’ন্তিআদি। ভৰনং অনুপগতন্তি ইদং মম ভৰনং অনুপগতং। অননুঞ্ঞাতন্তি উপগতেন সামিভূতেন অননুঞ্ঞাতঞ্চ। এতেন উপগতং তং, ইদানি তাদিসেন অনুঞ্ঞাতঞ্চ খাদিতুং লভামীতি দস্সেতি।
246.Āḷaviyanti itthiliṅgavasena taṃ raṭṭhampi nagarampi vuccati. Raṭṭhe adhippetepi na ettha bahuvacanaṃ tathāruḷhiyā abhāvato. Tañca bhavananti tañca āḷavakassa yakkhassa bhavanaṃ. Tatthāti āḷavakassa bhavane. ‘‘Atha kho āḷavako yakkho yena bhagavā tenupasaṅkamī’’ti ettha tasmiṃ pāṭhapadese. Ayamanupubbikathāti ayaṃ idāni vuccamānā anupubbato āgatā kathā. Āḷaviyā issaroti āḷavo, āḷavakoti ca rājā vutto. Kadāci corapaṭibāhanatthaṃ, kadāci ussāhasattivibhāvanavasena paṭirājanisedhanatthaṃ, kadāci lakkhayogyaviniyogavasena byāyāmakaraṇatthañca. Migānaṃ vananato vasanato vānato vā ‘‘migavā’’ti laddhasamaññaṃ migavaṃ. Tassevāti rañño eva. Migoti eko eṇimigo. Tiyojananti accantasaṃyoge upayogavacanaṃ. Udakaṃ viya pavisitvā ṭhitanti yathā parissamappatto udakaṃ pavisitvā ṭhito nirassāso hoti, evaṃ viya ṭhitaṃ. Mūlanti samīpaṃ. Yakkhaṃ disvāva rañño bhayaṃ chambhitattaṃ ūrutthambhaṃ ahosi, tasmā rājā palāyituṃ nāsakkhi. Tena vuttaṃ ‘‘khādituṃ upagato’’ti. Atha rājā dvidhā chinnaṃ migaṃ datvā attānaṃ mocetukāmo ahosi. Yakkho ‘‘nanu mama hatthagatakālato paṭṭhāya migopi mama santako, tattha kinnāma te kerāṭiyamidaṃ datvā attano mocana’’nti rājānaṃ na muñci. Atha rājā tassa tādisaṃ paṭiññātaṃ akāsi. Tena vuttaṃ ‘‘rājā tena saddhi’’ntiādi. Bhavanaṃ anupagatanti idaṃ mama bhavanaṃ anupagataṃ. Ananuññātanti upagatena sāmibhūtena ananuññātañca. Etena upagataṃ taṃ, idāni tādisena anuññātañca khādituṃ labhāmīti dasseti.
মচ্চুপথেতি মচ্চুগোচরে। আসন্নমরণতায এৰমাহংসু।
Maccupatheti maccugocare. Āsannamaraṇatāya evamāhaṃsu.
তং আল়ৰককুমারং আদায পক্কমিংসূতি যোজনা। তস্স রঞ্ঞো মহেসী আল়ৰককুমারস্স মাতাতি ৰুত্তা। দেৰিসহস্সানং ৰিপ্পলপন্তীনন্তি ৰচনং পরিণামেতব্বং।
Taṃ āḷavakakumāraṃ ādāya pakkamiṃsūti yojanā. Tassa rañño mahesī āḷavakakumārassa mātāti vuttā. Devisahassānaṃ vippalapantīnanti vacanaṃ pariṇāmetabbaṃ.
দেসনাপরিযোসানেতি যক্খং দমেত্ৰা পচ্চাগন্ত্ৰা নগরদ্ৰারসমীপে রুক্খমূলে নিসিন্নেন ভগৰতা সরাজিকায মহতিযা পরিসায দেসিতদেসনায পরিযোসানে। সোতি ভগৰা। ভৰনে এৰাতি ৰিমানে এৰ। ভগৰাপি পস্সতি পকতিচক্খুনাৰ নিগ্রোধস্স উপরি নিব্বত্তত্তা।
Desanāpariyosāneti yakkhaṃ dametvā paccāgantvā nagaradvārasamīpe rukkhamūle nisinnena bhagavatā sarājikāya mahatiyā parisāya desitadesanāya pariyosāne. Soti bhagavā. Bhavane evāti vimāne eva. Bhagavāpi passati pakaticakkhunāva nigrodhassa upari nibbattattā.
তত্রাতি তস্মিং ‘‘রোসেতুকামতাযা’’তি ৰচনে। তেসন্তি সাতাগিরিহেমৰতানং। কালদীপদেসকুলজনেত্তিআযুপ্পমাণৰিসযং পঞ্চমহাৰিলোকিতং। ‘‘সীতং ব্যপগতং হোতি, উণ্হঞ্চ উপসম্মতী’’তিআদিনা (বু॰ ৰং॰ ২.৮৩) আগতানি দ্ৰত্তিংস পুব্বনিমিত্তানি। কটিপ্পদেসৰত্থিকোসকণ্ণতো তিধা। সদ্দোতি আল়ৰকস্স উগ্ঘোসিতসদ্দো।
Tatrāti tasmiṃ ‘‘rosetukāmatāyā’’ti vacane. Tesanti sātāgirihemavatānaṃ. Kāladīpadesakulajanettiāyuppamāṇavisayaṃ pañcamahāvilokitaṃ. ‘‘Sītaṃ byapagataṃ hoti, uṇhañca upasammatī’’tiādinā (bu. vaṃ. 2.83) āgatāni dvattiṃsa pubbanimittāni. Kaṭippadesavatthikosakaṇṇato tidhā. Saddoti āḷavakassa ugghositasaddo.
ইমিনা পসঙ্গেন সকলজম্বুদীপং ব্যাপেত্ৰা পৰত্তে অপরেপি তযো সদ্দে যথা এতে, এৰং আল়ৰকস্স উগ্ঘোসিতসদ্দোপীতি দস্সেতুং ‘‘চত্তারো’’তিআদি ৰুত্তং। ওসক্কন্তেতি পরিহাযমানে।
Iminā pasaṅgena sakalajambudīpaṃ byāpetvā pavatte aparepi tayo sadde yathā ete, evaṃ āḷavakassa ugghositasaddopīti dassetuṃ ‘‘cattāro’’tiādi vuttaṃ. Osakkanteti parihāyamāne.
চুণ্ণেন্তাতি চুণ্ণেতুং সমত্থতং সন্ধায ৰুত্তং, ন পন চুণ্ণনৰসেন ৰুত্তং। তেনাহ ‘‘মা কস্সচী’’তিআদি। উস্সাৰবিন্দুমত্তম্পীতি উস্সাৰপতনমত্তম্পি। খুরপ্পং সল্লং।
Cuṇṇentāti cuṇṇetuṃ samatthataṃ sandhāya vuttaṃ, na pana cuṇṇanavasena vuttaṃ. Tenāha ‘‘mā kassacī’’tiādi. Ussāvabindumattampīti ussāvapatanamattampi. Khurappaṃ sallaṃ.
সেট্ঠানীতি অজেয্যেন অপ্পটিহতভাৰেন উত্তমানি। দুস্সাৰুধন্তি আৰুধকিচ্চকরং উত্তরিযং দুস্সং। ইমানি কির সক্কাদীনং পুঞ্ঞানুভাৰেন নিব্বত্তানি অপ্পটিহতপ্পভাৰানি পটিপক্খৰিধমনযুত্তানি অৰজ্ঝানি আৰুধানি। তেনাহ ‘‘যদি হী’’তিআদি।
Seṭṭhānīti ajeyyena appaṭihatabhāvena uttamāni. Dussāvudhanti āvudhakiccakaraṃ uttariyaṃ dussaṃ. Imāni kira sakkādīnaṃ puññānubhāvena nibbattāni appaṭihatappabhāvāni paṭipakkhavidhamanayuttāni avajjhāni āvudhāni. Tenāha ‘‘yadi hī’’tiādi.
অসনিৰিচক্কং ৰিযাতি অসনিমণ্ডলং ৰিয।
Asanivicakkaṃ viyāti asanimaṇḍalaṃ viya.
পিত্তন্তি অলগদ্দপিত্তং। ভিন্দেয্যাতি আসিঞ্চেয্য। সুখন্তি সুকরং। মুদুভূতচিত্তৰৰত্থানকরণত্থন্তি মুদুভূতং অত্তনো চিত্তে ৰৰত্থানস্স করণত্থং।
Pittanti alagaddapittaṃ. Bhindeyyāti āsiñceyya. Sukhanti sukaraṃ. Mudubhūtacittavavatthānakaraṇatthanti mudubhūtaṃ attano citte vavatthānassa karaṇatthaṃ.
এৰং ৰুত্তেতি ‘‘ন খ্ৰাহ’’ন্তি এৰং ৰুত্তে। ভগৰতো সাসনে ঠিতে পযিরুপাসিত্ৰা উগ্গহিতং ভগৰন্তং পযিরূপাসিত্ৰা উগ্গহিতমেৰ নামাতি আহ ‘‘কস্সপং…পে॰.. উগ্গহেসু’’ন্তি। পুট্ঠপঞ্হাতি সম্মাসম্বুদ্ধেন পুট্ঠপঞ্হা। যস্মা বুদ্ধৰিসযে পুট্ঠপঞ্হা, তস্মা বুদ্ধৰিসযাৰ হোন্তি।
Evaṃ vutteti ‘‘na khvāha’’nti evaṃ vutte. Bhagavato sāsane ṭhite payirupāsitvā uggahitaṃ bhagavantaṃ payirūpāsitvā uggahitameva nāmāti āha ‘‘kassapaṃ…pe... uggahesu’’nti. Puṭṭhapañhāti sammāsambuddhena puṭṭhapañhā. Yasmā buddhavisaye puṭṭhapañhā, tasmā buddhavisayāva honti.
পটিসেধেত্ৰাতি ৰাচায অসক্কুণেয্যভাৰেনেৰ পটিসেধেত্ৰা। ‘‘যদাকঙ্খসী’’তি পদসন্ধিৰসেন নিদ্দেসোতি আহ ‘‘যদি আকঙ্খসী’’তি। তেন তুয্হং পুচ্ছং তাৰ সুত্ৰা ৰিস্সজ্জেস্সন্তি দস্সেতি। তেনাহ ‘‘ন মে’’তিআদি। দুতিযৰিকপ্পে দ-কারো পদসন্ধিকরোতি আহ ‘‘যং আকঙ্খসী’’তি। ‘‘পুচ্ছ, আৰুসো, সুত্ৰা জানিস্সামী’’তি অৰত্ৰা সব্বঞ্ঞুবুদ্ধস্স অনিযমেত্ৰা ৰচনং সব্বৰিসযং হোতীতি আহ ‘‘সব্বং তে’’তিআদি।
Paṭisedhetvāti vācāya asakkuṇeyyabhāveneva paṭisedhetvā. ‘‘Yadākaṅkhasī’’ti padasandhivasena niddesoti āha ‘‘yadi ākaṅkhasī’’ti. Tena tuyhaṃ pucchaṃ tāva sutvā vissajjessanti dasseti. Tenāha ‘‘na me’’tiādi. Dutiyavikappe da-kāro padasandhikaroti āha ‘‘yaṃ ākaṅkhasī’’ti. ‘‘Puccha, āvuso, sutvā jānissāmī’’ti avatvā sabbaññubuddhassa aniyametvā vacanaṃ sabbavisayaṃ hotīti āha ‘‘sabbaṃ te’’tiādi.
কিং সূতি এত্থ কিন্তি পুচ্ছাযং, সূতি সংসযে, কিং নূতি অত্থো? ইধাতি ইমস্মিং লোকে। তস্মা ৰিত্তন্তি যস্মা ৰিত্তিকরণতো ৰিত্তং। সুকতন্তি সুট্ঠু সক্কচ্চং কতং। সুখন্তি ইট্ঠফলং। তত্থ যং পধানং, তং দস্সেতুং ‘‘কাযিকচেতসিকং সাত’’ন্তিআদি ৰুত্তং। নিস্সন্দফলঞ্হি তগ্গহণেন গহিতমেৰ হোতি। অপ্পেতীতি পাপেতি। অতিসযত্থজোতনো তর-সদ্দোতি আহ ‘‘অতিসযেন সাদূ’’তি। রসসঞ্ঞিতায ইট্ঠানং রাগাদিধম্মানং। কেন পকারেনাতি কথং-সদ্দস্স অত্থমাহ। কথংজীৰিন্তি যদি সমাসপদমেতং, ‘‘কথ’’ন্তি সানুনাসিকা কতাতি আহ ‘‘গাথাবন্ধসুখত্থ’’ন্তিআদি।
Kiṃsūti ettha kinti pucchāyaṃ, sūti saṃsaye, kiṃ nūti attho? Idhāti imasmiṃ loke. Tasmā vittanti yasmā vittikaraṇato vittaṃ. Sukatanti suṭṭhu sakkaccaṃ kataṃ. Sukhanti iṭṭhaphalaṃ. Tattha yaṃ padhānaṃ, taṃ dassetuṃ ‘‘kāyikacetasikaṃ sāta’’ntiādi vuttaṃ. Nissandaphalañhi taggahaṇena gahitameva hoti. Appetīti pāpeti. Atisayatthajotano tara-saddoti āha ‘‘atisayena sādū’’ti. Rasasaññitāya iṭṭhānaṃ rāgādidhammānaṃ. Kena pakārenāti kathaṃ-saddassa atthamāha. Kathaṃjīvinti yadi samāsapadametaṃ, ‘‘katha’’nti sānunāsikā katāti āha ‘‘gāthābandhasukhattha’’ntiādi.
সদ্ধীধ ৰিত্তন্তি একদেসেন সমুদাযদস্সনং সমুদ্দপব্বতনিদস্সনং ৰিয। ইতি-সদ্দো আদিঅত্থো দট্ঠব্বো। ‘‘ৰিত্তিকরণতো ৰিত্ত’’ন্তি ৰুত্তমত্থং সন্ধায হেতূপমাহি যোজেত্ৰা দস্সেতুং ‘‘যথা হী’’তিআদি ৰুত্তং। তেন সুখাৰহনতো, দুক্খপটিবাহনতো, দালিদ্দিযূপসমনতো, রতনপটিলাভহেতুতো, লোকসন্ততিআৰহনতো চ সদ্ধা ৰিত্তং যথা তং হিরঞ্ঞসুৰণ্ণাদীনি। তেনাহ ‘‘এৰ’’ন্তিআদি। ননু চেতনা সম্মাদিট্ঠিআদযো চ সাতিসযং ৰিপাকসুখং আৰহন্তি, তং কথং সদ্ধা আৰহতীতি? সদ্ধাধুরভাৰসভাৰতো। তেনাহ ‘‘সদ্ধাধুরেন পটিপন্নান’’ন্তি। তস্স চ সেসপদেসুপি যোজেতব্বং।
Saddhīdha vittanti ekadesena samudāyadassanaṃ samuddapabbatanidassanaṃ viya. Iti-saddo ādiattho daṭṭhabbo. ‘‘Vittikaraṇato vitta’’nti vuttamatthaṃ sandhāya hetūpamāhi yojetvā dassetuṃ ‘‘yathā hī’’tiādi vuttaṃ. Tena sukhāvahanato, dukkhapaṭibāhanato, dāliddiyūpasamanato, ratanapaṭilābhahetuto, lokasantatiāvahanato ca saddhā vittaṃ yathā taṃ hiraññasuvaṇṇādīni. Tenāha ‘‘eva’’ntiādi. Nanu cetanā sammādiṭṭhiādayo ca sātisayaṃ vipākasukhaṃ āvahanti, taṃ kathaṃ saddhā āvahatīti? Saddhādhurabhāvasabhāvato. Tenāha ‘‘saddhādhurena paṭipannāna’’nti. Tassa ca sesapadesupi yojetabbaṃ.
ইদানি যং হিরঞ্ঞসুৰণ্ণাদি সদ্ধাৰিত্তস্স ওপম্মং, তং হীনং, সদ্ধাৰিত্তমেৰ উত্তমন্তি পাল়িযং সেট্ঠগ্গহণং কতন্তি দস্সেতুং ‘‘যস্মা পনা’’তিআদি ৰুত্তং। পরলোকং গতং অনুগচ্ছতীতি অনুগামিকং। অঞ্ঞেহি ন সাধারণন্তি অনঞ্ঞসাধারণং। সব্বসম্পত্তিহেতূতি সব্বাসং সীলসম্পদাদীনং লোকিযলোকুত্তরানং সম্পত্তীনং হেতু। অনত্থায হোতি অনুপাযপটিপত্তিতো। তস্মা অনুগামিকত্তা। অনঞ্ঞসাধারণত্তা সব্বসম্পত্তিহেতুভাৰতো হিরঞ্ঞাদিৰিত্তনিদানত্তা চ সদ্ধাৰিত্তমেৰ সেট্ঠং। উক্কট্ঠপরিচ্ছেদদেসনা যথা ‘‘সত্থা দেৰমনুস্সান’’ন্তি।
Idāni yaṃ hiraññasuvaṇṇādi saddhāvittassa opammaṃ, taṃ hīnaṃ, saddhāvittameva uttamanti pāḷiyaṃ seṭṭhaggahaṇaṃ katanti dassetuṃ ‘‘yasmā panā’’tiādi vuttaṃ. Paralokaṃ gataṃ anugacchatīti anugāmikaṃ. Aññehi na sādhāraṇanti anaññasādhāraṇaṃ. Sabbasampattihetūti sabbāsaṃ sīlasampadādīnaṃ lokiyalokuttarānaṃ sampattīnaṃ hetu. Anatthāya hoti anupāyapaṭipattito. Tasmā anugāmikattā. Anaññasādhāraṇattā sabbasampattihetubhāvato hiraññādivittanidānattā ca saddhāvittameva seṭṭhaṃ. Ukkaṭṭhaparicchedadesanā yathā ‘‘satthā devamanussāna’’nti.
‘‘দসকুসলধম্মো’’তি ইমিনা একচ্চানংযেৰ দানাদিধম্মানং সঙ্গহো, ন সব্বেসন্তি অসঙ্গহিতসঙ্গণ্হনত্থং ‘‘দানসীলভাৰনাধম্মো ৰা’’তি ৰুত্তং। ‘‘সুখ’’ন্তি তিৰিধস্সপি সুখস্স সাধারণগ্গহণমেতন্তি তং সৰিসেসলদ্ধং পুগ্গলৰসেন দস্সেন্তো ‘‘সোণসেট্ঠি…পে॰… আৰহতী’’তি আহ। যো সো পদুমৰতিযা দেৰিযা পুত্তো মহাপদুমো নাম রাজা দিব্বসুখসদিসং রজ্জসুখমনুভৰিত্ৰা পচ্ছা পচ্চেকবুদ্ধো হুত্ৰা নিব্বানসুখমনুভৰি, তং নিদস্সনভাৰেন গহেত্ৰা আহ ‘‘মহাপদুমাদীনং ৰিয নিব্বানসুখঞ্চ আৰহতী’’তি।
‘‘Dasakusaladhammo’’ti iminā ekaccānaṃyeva dānādidhammānaṃ saṅgaho, na sabbesanti asaṅgahitasaṅgaṇhanatthaṃ ‘‘dānasīlabhāvanādhammo vā’’ti vuttaṃ. ‘‘Sukha’’nti tividhassapi sukhassa sādhāraṇaggahaṇametanti taṃ savisesaladdhaṃ puggalavasena dassento ‘‘soṇaseṭṭhi…pe… āvahatī’’ti āha. Yo so padumavatiyā deviyā putto mahāpadumo nāma rājā dibbasukhasadisaṃ rajjasukhamanubhavitvā pacchā paccekabuddho hutvā nibbānasukhamanubhavi, taṃ nidassanabhāvena gahetvā āha ‘‘mahāpadumādīnaṃ viya nibbānasukhañca āvahatī’’ti.
অত্থুদ্ধারনযেন সচ্চসদ্দং সংৰণ্ণেন্তো ‘‘অনেকেসু অত্থেসু দিস্সতী’’তি আহ। ৰাচাসচ্চে দিস্সতি সচ্চসদ্দো ‘‘ভণে’’তি ৰুত্তত্তাতি অধিপ্পাযো। ৰিরতিসচ্চে দিস্সতি। ৰেরমণীসু হি পতিট্ঠিতা সমণব্রাহ্মণা ‘‘সচ্চে ঠিতা’’তি ৰুচ্চন্তি। অত্তাকারম্পি ৰত্থুং ইদমেৰ সচ্চং মোঘমঞ্ঞন্তি পৰত্তিযাকারং উপাদায দিট্ঠি এৰ সচ্চন্তি দিট্ঠিসচ্চং, তস্মিং দিট্ঠিসচ্চে দিস্সতীতি যোজনা। ব্রাহ্মণসচ্চানীতি পরমত্থব্রহ্মানং সচ্চানি, যানি ‘‘সব্বে পাণা অৰজ্ঝা, সব্বে কামা অনিচ্চা, সব্বে ভৰা অনিচ্চা, নাহং ক্ৰচনি কস্সচি কিঞ্চনতস্মি’’ন্তিআদিনা (অ॰ নি॰ ৪.১৮৫) চতুক্কনিপাতে আগতানি। পরমত্থভূতং সচ্চং নিব্বানং। অব্ভন্তরং কত্ৰাতি অন্তোগধমেৰ কত্ৰা, তেহি সদ্ধিন্তি অত্থো পরমত্থসচ্চানম্পি সাদুতরত্তা। যস্সানুভাৰেনাতি যস্স ৰাচাসচ্চস্স আনুভাৰেন।
Atthuddhāranayena saccasaddaṃ saṃvaṇṇento ‘‘anekesu atthesu dissatī’’ti āha. Vācāsacce dissati saccasaddo ‘‘bhaṇe’’ti vuttattāti adhippāyo. Viratisacce dissati. Veramaṇīsu hi patiṭṭhitā samaṇabrāhmaṇā ‘‘sacce ṭhitā’’ti vuccanti. Attākārampi vatthuṃ idameva saccaṃ moghamaññanti pavattiyākāraṃ upādāya diṭṭhi eva saccanti diṭṭhisaccaṃ, tasmiṃ diṭṭhisacce dissatīti yojanā. Brāhmaṇasaccānīti paramatthabrahmānaṃ saccāni, yāni ‘‘sabbe pāṇā avajjhā, sabbe kāmā aniccā, sabbe bhavā aniccā, nāhaṃ kvacani kassaci kiñcanatasmi’’ntiādinā (a. ni. 4.185) catukkanipāte āgatāni. Paramatthabhūtaṃ saccaṃ nibbānaṃ. Abbhantaraṃ katvāti antogadhameva katvā, tehi saddhinti attho paramatthasaccānampi sādutarattā. Yassānubhāvenāti yassa vācāsaccassa ānubhāvena.
উদকম্হি ধাৰতীতি উদকপিট্ঠিযং অভিজ্জমানাযং পথৰিযা ৰিয ধাৰতি গচ্ছতি মহাকপ্পিনরাজা ৰিয। ৰিসম্পি সচ্চেন হনন্তি পণ্ডিতাতি কণ্হদীপাযনাদযো ৰিয। সচ্চেনাতি মচ্ছজাতকে বোধিসত্তস্স ৰিয সচ্চেন দেৰো থনযং পৰস্সতি। সচ্চে ঠিতাতি ৰিরতিসচ্চে ৰাচাসচ্চে চ ঠিতা তযোপি বোধিসত্তা। নিব্বুতিন্তি নিব্বানং পত্থযন্তি। সাদুতরন্তি সাততরং ইট্ঠতরৰিপাকদানতো।
Udakamhi dhāvatīti udakapiṭṭhiyaṃ abhijjamānāyaṃ pathaviyā viya dhāvati gacchati mahākappinarājā viya. Visampi saccena hananti paṇḍitāti kaṇhadīpāyanādayo viya. Saccenāti macchajātake bodhisattassa viya saccena devo thanayaṃ pavassati. Sacce ṭhitāti viratisacce vācāsacce ca ṭhitā tayopi bodhisattā. Nibbutinti nibbānaṃ patthayanti. Sādutaranti sātataraṃ iṭṭhataravipākadānato.
রসানন্তি নিদ্ধারণত্থে সামিৰচনং। নিদ্ধারণঞ্চ কোচি কুতোচি কেনচি ইমন্তি কস্সচি ৰচনং ন সাধেতীতি দস্সেন্তো ‘‘যে ইমে’’তিআদিমাহ। তেন হি নিব্বানং রসসমুদাযতো সাদুতরতাৰিসেসেন নিদ্ধারীযতি। তত্থ যে ইমে ৰুচ্চন্তীতি যোজনা। সাযনীযধম্মাতি জিৰ্হায সাযিতব্বা ধম্মা। রসাযতনং রসোতি আহ ‘‘মূলরসো খন্ধরসো’’তিআদি। ফলরসন্তি ফলস্স রসং, ফলং পীল়েত্ৰা তাপেত্ৰা গহেতব্বরসন্তি অত্থো। অরসরূপোতি আচাররহিতসভাৰো। রূপস্স অস্সাদনৰসেন উপ্পজ্জনকসুখধম্মা রূপরসা। এস নযো সদ্দরসাদীসু। সদ্দরসোতি ব্যঞ্জনসম্ভূতো রসো। ৰিমুত্তিরসোতি ৰিমুত্তিসম্পত্তিকো রসো। অত্থরসোতি অত্থস্স পটিৰিজ্ঝনৰসেন উপ্পজ্জনকসুখং অত্থরসো, তথা ধম্মরসো ৰেদিতব্বো। রূপাচারাতিআদীসু রসগ্গহণেন ফলরসং ৰদতি। সো হি ফলস্স রূপো চ, রসিতব্বতো আসাদেতব্বতো রসো চাতি ‘‘রূপরসো’’তি ৰুচ্চতি। আচারো পন সামগ্গীরসহেতুতায ‘‘রসো’’তি ৰুত্তো। সচ্চং হৰেতি এত্থ হৰেতি একংসত্থে নিপাতো, একংসত্থো চ অৰধারণমেৰাতি আহ ‘‘সচ্চমেৰ সাদুতর’’ন্তিআদি। সরীরমুপব্রূহেন্তি, ন চিত্তং। ননু চ সুখুপ্পত্তিপযোজনত্তা চিত্তম্পি উপব্রূহেন্তীতি? ন, সুখস্স সরীরব্রূহনং পটিচ্চ উপ্পন্নত্তা। ৰিরতিসচ্চৰাচাতি সচ্চৰিসেসেন সম্পজ্জনং ৰদতি। চিত্তমুপব্রূহেতি পদালিকায ৰিরতিৰাচায সচ্চরসে সতি সমথৰিপস্সনাদীহি চিত্তপরিব্রূহনস্স সম্ভৰতো মগ্গফলানিসংসং গণ্হাতি। অসংকিলেসিকঞ্চ সুখমাৰহতি ৰিৰট্টসন্নিস্সিতত্তা। ৰিমুত্তিরসোতি ফলসুখং ৰদতি নিব্বানসুখম্পি ৰা। পরমত্থসচ্চরসো নাম নিব্বানরসো। তথা হি তং ‘‘অচ্চুতিরসং অস্সাসকরণরস’’ন্তিপি ৰুচ্চতি। তেন পরিভাৰিতত্তাতি ৰিমুত্তিরসস্স সাদুতরভাৰদস্সনত্থং। এৰং সন্তেপি ‘‘ৰিমুত্তিরসপরিভাৰিতত্তা’’তি এতেন কামং ৰিমুত্তিরসো ৰা পরমত্থসচ্চরসো ৰা সাদুতররসাতি দস্সেতি। তদধিগমূপাযভূতন্তি তস্স পরমত্থসচ্চস্স অধিগমূপাযভূতং। অত্থঞ্চ ধম্মঞ্চাতি ফলঞ্চ কারণঞ্চ নিস্সায পৰত্তিতো অত্থরসা ধম্মরসা চ সাদূ, ততোপি পরমত্থসচ্চমেৰ সাদুরসন্তি অধিপ্পাযো।
Rasānanti niddhāraṇatthe sāmivacanaṃ. Niddhāraṇañca koci kutoci kenaci imanti kassaci vacanaṃ na sādhetīti dassento ‘‘ye ime’’tiādimāha. Tena hi nibbānaṃ rasasamudāyato sādutaratāvisesena niddhārīyati. Tattha ye ime vuccantīti yojanā. Sāyanīyadhammāti jivhāya sāyitabbā dhammā. Rasāyatanaṃ rasoti āha ‘‘mūlaraso khandharaso’’tiādi. Phalarasanti phalassa rasaṃ, phalaṃ pīḷetvā tāpetvā gahetabbarasanti attho. Arasarūpoti ācārarahitasabhāvo. Rūpassa assādanavasena uppajjanakasukhadhammā rūparasā. Esa nayo saddarasādīsu. Saddarasoti byañjanasambhūto raso. Vimuttirasoti vimuttisampattiko raso. Attharasoti atthassa paṭivijjhanavasena uppajjanakasukhaṃ attharaso, tathā dhammaraso veditabbo. Rūpācārātiādīsu rasaggahaṇena phalarasaṃ vadati. So hi phalassa rūpo ca, rasitabbato āsādetabbato raso cāti ‘‘rūparaso’’ti vuccati. Ācāro pana sāmaggīrasahetutāya ‘‘raso’’ti vutto. Saccaṃ haveti ettha haveti ekaṃsatthe nipāto, ekaṃsattho ca avadhāraṇamevāti āha ‘‘saccameva sādutara’’ntiādi. Sarīramupabrūhenti, na cittaṃ. Nanu ca sukhuppattipayojanattā cittampi upabrūhentīti? Na, sukhassa sarīrabrūhanaṃ paṭicca uppannattā. Viratisaccavācāti saccavisesena sampajjanaṃ vadati. Cittamupabrūheti padālikāya virativācāya saccarase sati samathavipassanādīhi cittaparibrūhanassa sambhavato maggaphalānisaṃsaṃ gaṇhāti. Asaṃkilesikañca sukhamāvahati vivaṭṭasannissitattā. Vimuttirasoti phalasukhaṃ vadati nibbānasukhampi vā. Paramatthasaccaraso nāma nibbānaraso. Tathā hi taṃ ‘‘accutirasaṃ assāsakaraṇarasa’’ntipi vuccati. Tena paribhāvitattāti vimuttirasassa sādutarabhāvadassanatthaṃ. Evaṃ santepi ‘‘vimuttirasaparibhāvitattā’’ti etena kāmaṃ vimuttiraso vā paramatthasaccaraso vā sādutararasāti dasseti. Tadadhigamūpāyabhūtanti tassa paramatthasaccassa adhigamūpāyabhūtaṃ. Atthañca dhammañcāti phalañca kāraṇañca nissāya pavattito attharasā dhammarasā ca sādū, tatopi paramatthasaccameva sādurasanti adhippāyo.
লোকুত্তরং লোকিযঞ্চ অত্থং অজানন্তো অন্ধো, লোকিযত্থমেৰ জানন্তো একচক্খু, উভযং জানন্তো দ্ৰিচক্খু। পরহিতং অত্তহিতঞ্চ অজানন্তো অন্ধো, অত্তহিতমেৰ জানন্তো একচক্খু, উভযত্থং জানন্তো দ্ৰিচক্খু। সো দ্ৰিচক্খুপুগ্গলো পঞ্ঞাজীৰী। তং পন গহট্ঠপব্বজিতৰসেন ৰিভজিত্ৰা দস্সেতুং ‘‘গহট্ঠো ৰা’’তিআদি ৰুত্তং। গহট্ঠপটিপদং আরাধেত্ৰা চাতি যোজনা। আরাধেত্ৰাতি চ সাধেত্ৰাতি অত্থো।
Lokuttaraṃ lokiyañca atthaṃ ajānanto andho, lokiyatthameva jānanto ekacakkhu, ubhayaṃ jānanto dvicakkhu. Parahitaṃ attahitañca ajānanto andho, attahitameva jānanto ekacakkhu, ubhayatthaṃ jānanto dvicakkhu. So dvicakkhupuggalo paññājīvī. Taṃ pana gahaṭṭhapabbajitavasena vibhajitvā dassetuṃ ‘‘gahaṭṭho vā’’tiādi vuttaṃ. Gahaṭṭhapaṭipadaṃ ārādhetvā cāti yojanā. Ārādhetvāti ca sādhetvāti attho.
পুরিমনযেনেৰাতি কস্সপসম্মাসম্বুদ্ধৰিস্সজ্জিতনযেনেৰ। কিঞ্চাপীতি অনুজাননসন্দস্সনত্থে নিপাতো। কিং অনুজানাতীতি? গাথায চতূহি পদেহি ৰুত্তেসু অত্থেসু একস্স অত্থস্স সিদ্ধিযং ইতরেসম্পি সিদ্ধিং অনুজানাতি। তেনাহ ‘‘যো চতুব্বিধমোঘং…পে॰… পরিসুজ্ঝতী’’তি। কিং সন্দস্সেতীতি? যেসং পাপধম্মানং বলৰভাৰেন ওঘতরণাদি ন সিজ্ঝতি, তেসং পটিপক্খানং নিস্সন্দেহৰসেন সন্দস্সনং। তেনাহ ‘‘এৰং সন্তেপী’’তিআদি। ওঘতরণন্তি ওঘতরণপটিপত্তিং। অসদ্দহন্তোতি এৰং পটিপজ্জন্তো ইমায পটিপত্তিযা ওঘং তরতীতি ন সদ্দহন্তো। ন পক্খন্দতীতি পক্খন্দনলক্খণায সদ্ধায ন উগ্ঘাটীযতীতি ন ওতরতি। চিত্তৰোস্সগ্গেনাতি যথাকামাচারৰসেন চিত্তস্স ৰোস্সজ্জনেন। পমত্তো পমাদং আপন্নো। তত্থেৰাতি কামেসু এৰ। ৰিসত্তত্তা লগ্গত্তা। ৰোকিণ্ণোতি ৰিসেৰিতো। তস্মাতি ৰুত্তস্স চতুব্বিধস্সপি অত্থস্স হেতুভাৰেন পচ্চামসনং। তপ্পটিপক্খন্তি অস্সদ্ধিযাদীনং পটিপক্খং সদ্ধাদীনং ওকাসত্তা।
Purimanayenevāti kassapasammāsambuddhavissajjitanayeneva. Kiñcāpīti anujānanasandassanatthe nipāto. Kiṃ anujānātīti? Gāthāya catūhi padehi vuttesu atthesu ekassa atthassa siddhiyaṃ itaresampi siddhiṃ anujānāti. Tenāha ‘‘yo catubbidhamoghaṃ…pe… parisujjhatī’’ti. Kiṃ sandassetīti? Yesaṃ pāpadhammānaṃ balavabhāvena oghataraṇādi na sijjhati, tesaṃ paṭipakkhānaṃ nissandehavasena sandassanaṃ. Tenāha ‘‘evaṃ santepī’’tiādi. Oghataraṇanti oghataraṇapaṭipattiṃ. Asaddahantoti evaṃ paṭipajjanto imāya paṭipattiyā oghaṃ taratīti na saddahanto. Na pakkhandatīti pakkhandanalakkhaṇāya saddhāya na ugghāṭīyatīti na otarati. Cittavossaggenāti yathākāmācāravasena cittassa vossajjanena. Pamatto pamādaṃ āpanno. Tatthevāti kāmesu eva. Visattattā laggattā. Vokiṇṇoti visevito. Tasmāti vuttassa catubbidhassapi atthassa hetubhāvena paccāmasanaṃ. Tappaṭipakkhanti assaddhiyādīnaṃ paṭipakkhaṃ saddhādīnaṃ okāsattā.
এতাযাতি গাথাযং ইমিনা পদেনাতি সম্বন্ধো। সপ্পুরিসসংসেৰো সদ্ধম্মস্সৰনং যোনিসোমনসিকারো ধম্মানুধম্মপটিপত্তীতি ইমেসং সোতাপত্তিমগ্গাধিগমস্স অঙ্গানং আসন্নকারণং সদ্ধিন্দ্রিযন্তি আহ ‘‘সোতাপত্তিযঙ্গপদট্ঠানং সদ্ধিন্দ্রিয’’ন্তি। ৰুত্তঞ্হেতং – ‘‘সদ্ধাজাতো উপসঙ্কমতি , উপসঙ্কমন্তো পযিরুপাসতি, পযিরুপাসন্তো সোতং ওদহতি, ওহিতসোতো ধম্মং সুণাতী’’তিআদি (ম॰ নি॰ ২.১৮৩, ৪৩২)। দিট্ঠোঘং তরতি এতেনাতি দিট্ঠোঘতরণং, দিট্ঠোঘস্স তরণং। কামঞ্চেত্থ ‘‘তরতি ওঘ’’ন্তি ৰুত্তং, ৰত্তমানসমীপেপি পন ৰত্তমানং ৰিয ৰোহরণং যুত্তং দিট্ঠোঘস্স তিণ্ণভাৰস্স একন্তিকত্তাতি ‘‘সোতাপন্নঞ্চ পকাসেতী’’তি ৰুত্তং। এস নযো সেসেসুপি। দিট্ঠিৰিচিকিচ্ছাদিপটিপত্তন্তরাযকরানং পাপধম্মানং সমুচ্ছিন্নত্তা সোতাপন্নো…পে॰… অপ্পমাদেন সমন্নাগতো। ‘‘সোতাপত্তি…পে॰… তরতী’’তি এত্তকে ৰুত্তে সকিদেৰ ইমস্স লোকস্স আগমনম্পি গহিতং সিযাতি তন্নিৰত্তনত্থং ‘‘আরাধেত্ৰা…পে॰… অৰসেস’’ন্তি ৰুত্তং। ননু ‘‘অৰসেস’’ন্তি ৰুত্তত্তা সোতাপত্তিমগ্গেন অতিণ্ণং অনৰসেসং ভৰোঘৰত্থু গহিতমেৰ সিযাতি? ন, উপরি দ্ৰীহি মগ্গেহি তরিতব্বানং তেসং পরতো দ্ৰিন্নং পহানৰসেন ৰুচ্চমানত্তা। অপৰাদৰিসযম্পি পরিহরতি – ‘‘এৰং এসা চোদনা অত্তনো ৰিসযে ন পতিট্ঠাতী’’তি। অনাদিকালভাৰত্তা কামসঞ্ঞায কামোঘতরণং মহতা এৰ ৰীরিযেন সাধেতব্বন্তি আহ ‘‘ৰীরিযেনা’’তি। ততিযং মগ্গং আরাধেত্ৰা। কামোঘস্স ৰত্থু কামোঘৰত্থু, কামগুণেহি সদ্ধিং সব্বো কামভৰো। কামোঘসঞ্ঞিতন্তি কামোঘসঙ্খাতং। কামনট্ঠেন কামো চ সো দুক্খো চাতি কামদুক্খং। অস্সাদনট্ঠেন কামো এৰ সঞ্ঞাতি কামসঞ্ঞা, সব্বসো সমুচ্ছিন্নত্তা ৰিগতা কামসঞ্ঞা এতিস্সাতি ৰিগতকামসঞ্ঞা । সব্বেসং রাগাদিমলানং মূলভূতত্তা সত্তসন্তানস্স ৰিসেসতো মলীনসভাৰাপাদনতো পরমং উক্কংসগতং মলন্তি পরমমলং, অৰিজ্জা। তেনাহ ভগৰা – ‘‘অৰিজ্জাপরমং মল’’ন্তি (ধ॰ প॰ ২৪৩)।
Etāyāti gāthāyaṃ iminā padenāti sambandho. Sappurisasaṃsevo saddhammassavanaṃ yonisomanasikāro dhammānudhammapaṭipattīti imesaṃ sotāpattimaggādhigamassa aṅgānaṃ āsannakāraṇaṃ saddhindriyanti āha ‘‘sotāpattiyaṅgapadaṭṭhānaṃ saddhindriya’’nti. Vuttañhetaṃ – ‘‘saddhājāto upasaṅkamati , upasaṅkamanto payirupāsati, payirupāsanto sotaṃ odahati, ohitasoto dhammaṃ suṇātī’’tiādi (ma. ni. 2.183, 432). Diṭṭhoghaṃ tarati etenāti diṭṭhoghataraṇaṃ, diṭṭhoghassa taraṇaṃ. Kāmañcettha ‘‘tarati ogha’’nti vuttaṃ, vattamānasamīpepi pana vattamānaṃ viya voharaṇaṃ yuttaṃ diṭṭhoghassa tiṇṇabhāvassa ekantikattāti ‘‘sotāpannañca pakāsetī’’ti vuttaṃ. Esa nayo sesesupi. Diṭṭhivicikicchādipaṭipattantarāyakarānaṃ pāpadhammānaṃ samucchinnattā sotāpanno…pe… appamādena samannāgato. ‘‘Sotāpatti…pe… taratī’’ti ettake vutte sakideva imassa lokassa āgamanampi gahitaṃ siyāti tannivattanatthaṃ ‘‘ārādhetvā…pe… avasesa’’nti vuttaṃ. Nanu ‘‘avasesa’’nti vuttattā sotāpattimaggena atiṇṇaṃ anavasesaṃ bhavoghavatthu gahitameva siyāti? Na, upari dvīhi maggehi taritabbānaṃ tesaṃ parato dvinnaṃ pahānavasena vuccamānattā. Apavādavisayampi pariharati – ‘‘evaṃ esā codanā attano visaye na patiṭṭhātī’’ti. Anādikālabhāvattā kāmasaññāya kāmoghataraṇaṃ mahatā eva vīriyena sādhetabbanti āha ‘‘vīriyenā’’ti. Tatiyaṃ maggaṃ ārādhetvā. Kāmoghassa vatthu kāmoghavatthu, kāmaguṇehi saddhiṃ sabbo kāmabhavo. Kāmoghasaññitanti kāmoghasaṅkhātaṃ. Kāmanaṭṭhena kāmo ca so dukkho cāti kāmadukkhaṃ. Assādanaṭṭhena kāmo eva saññāti kāmasaññā, sabbaso samucchinnattā vigatā kāmasaññā etissāti vigatakāmasaññā. Sabbesaṃ rāgādimalānaṃ mūlabhūtattā sattasantānassa visesato malīnasabhāvāpādanato paramaṃ ukkaṃsagataṃ malanti paramamalaṃ, avijjā. Tenāha bhagavā – ‘‘avijjāparamaṃ mala’’nti (dha. pa. 243).
পঞ্ঞাপদং গহেত্ৰাতি যথাৰুত্তং পঞ্ঞাপদং হদযে ঠপেত্ৰা। তপ্পসঙ্গেন অত্তনো পটিভানেন সব্বেহি ৰিয উগ্গহিতনিযামেন। সব্বত্থেৰাতি পঞ্চসুপি ঠানেসু। অত্থযুত্তিপুচ্ছাতি পঞ্ঞাদিঅত্থসমধিগমস্স যুত্তিযা কারণস্স পুচ্ছা। তেনাহ ‘‘অযং হী’’তিআদি। পঞ্ঞাদিঅত্থং ঞত্ৰাতি পঞ্ঞাধন-কিত্তি-মিত্ত-অভিসম্পরাযসঙ্খাতং অত্থং সরূপতো সচ্চপটিৰেধনিপ্ফাদনেন ঞাণেন জানিত্ৰা। ননু এস লোকুত্তরং সোতাপত্তিমগ্গফলপঞ্ঞং তদধিগমূপাযং লোকিযপঞ্ঞঞ্চ অভিভৰিত্ৰা ঠিতো, সো কস্মা তত্থ অত্থযুত্তিং পুচ্ছতীতি? সচ্চমেতং, উপরি পন সমাধিস্স যুত্তিং পুচ্ছিতুকামো পঞ্ঞায সেট্ঠভাৰতো, তস্স চ একদেসেনেৰ অধিগতত্তা তমেৰ আদিং কত্ৰা পুচ্ছতি। ‘‘কায যুত্তিযা’’তিআদি অত্থৰণ্ণনং অতিদিস্সতি ‘‘এস নযো ধনাদীসূ’’তি। তত্থাপি অত্থযুত্তিপুচ্ছাভাৰো পন ‘‘সব্বত্থেৰা’’তি ইমিনা ৰিভাৰিতোতি।
Paññāpadaṃ gahetvāti yathāvuttaṃ paññāpadaṃ hadaye ṭhapetvā. Tappasaṅgena attano paṭibhānena sabbehi viya uggahitaniyāmena. Sabbatthevāti pañcasupi ṭhānesu. Atthayuttipucchāti paññādiatthasamadhigamassa yuttiyā kāraṇassa pucchā. Tenāha ‘‘ayaṃ hī’’tiādi. Paññādiatthaṃ ñatvāti paññādhana-kitti-mitta-abhisamparāyasaṅkhātaṃ atthaṃ sarūpato saccapaṭivedhanipphādanena ñāṇena jānitvā. Nanu esa lokuttaraṃ sotāpattimaggaphalapaññaṃ tadadhigamūpāyaṃ lokiyapaññañca abhibhavitvā ṭhito, so kasmā tattha atthayuttiṃ pucchatīti? Saccametaṃ, upari pana samādhissa yuttiṃ pucchitukāmo paññāya seṭṭhabhāvato, tassa ca ekadeseneva adhigatattā tameva ādiṃ katvā pucchati. ‘‘Kāya yuttiyā’’tiādi atthavaṇṇanaṃ atidissati ‘‘esa nayo dhanādīsū’’ti. Tatthāpi atthayuttipucchābhāvo pana ‘‘sabbatthevā’’ti iminā vibhāvitoti.
সদ্ধাসুস্সূসাঅপ্পমাদউট্ঠানসঙ্খাতেহি চতূহি কারণেহি। কাযসুচরিতাদিভেদেন আজীৰট্ঠমকসীলভূতেন। সমথৰিপস্সনাভূতেন নিপ্পরিযাযেন বোধিপক্খিযে এৰ গণ্হন্তো ‘‘অপরভাগে’’তি আহ। পরিযাযবোধিপক্খিযা পন ৰিসেসতো ৰুট্ঠানগামিনিৰিপস্সনাকালেপি লব্ভন্তি। পুব্বভাগেতি ৰা তরুণৰিপস্সনাকালং। ততো পুব্বসাধনঞ্চ সন্ধায ‘‘অপরভাগে’’তি পুনাহ, ততো পরন্তি অত্থো। ধম্মন্তি পটিপত্তিধম্মং। ন সদ্ধামত্তকেনেৰ পঞ্ঞং লভতীতি যোজনা। যদি এৰং কস্মা ‘‘সদ্দহানো’’তি ৰুত্তন্তি আহ ‘‘যস্মা পনা’’তিআদি। কিং ৰুত্তং হোতীতিআদিনা ৰুত্তমেৰ অত্থং ৰিৰরতি। ন কেৰলং সুস্সূসামত্তেন পঞ্ঞাপটিলাভো, অথ খো অপ্পমাদেন পঞ্ঞং লভতীতি দস্সেতুং পাল়িযং ‘‘অপ্পমত্তো ৰিচক্খণো’’তি ৰুত্তন্তি তদত্থং দস্সেন্তো ‘‘এৰ’’ন্তিআদিমাহ।
Saddhāsussūsāappamādauṭṭhānasaṅkhātehi catūhi kāraṇehi. Kāyasucaritādibhedena ājīvaṭṭhamakasīlabhūtena. Samathavipassanābhūtena nippariyāyena bodhipakkhiye eva gaṇhanto ‘‘aparabhāge’’ti āha. Pariyāyabodhipakkhiyā pana visesato vuṭṭhānagāminivipassanākālepi labbhanti. Pubbabhāgeti vā taruṇavipassanākālaṃ. Tato pubbasādhanañca sandhāya ‘‘aparabhāge’’ti punāha, tato paranti attho. Dhammanti paṭipattidhammaṃ. Na saddhāmattakeneva paññaṃ labhatīti yojanā. Yadi evaṃ kasmā ‘‘saddahāno’’ti vuttanti āha ‘‘yasmā panā’’tiādi. Kiṃ vuttaṃ hotītiādinā vuttameva atthaṃ vivarati. Na kevalaṃ sussūsāmattena paññāpaṭilābho, atha kho appamādena paññaṃ labhatīti dassetuṃ pāḷiyaṃ ‘‘appamatto vicakkhaṇo’’ti vuttanti tadatthaṃ dassento ‘‘eva’’ntiādimāha.
ইদানি সদ্ধাদীনং পঞ্ঞাপটিলাভস্স তংতংৰিসেসপচ্চযানি নীহরিত্ৰা দস্সেতুং ‘‘এৰ’’ন্তি ৰুত্তং। সুস্সূসাযাতি সোতুকামতায। সা অত্থতো উপসঙ্কমনাদি। পঞ্ঞাধিগমূপাযন্তি পরিযত্তিধম্মমাহ। তেনাহ ‘‘সুণাতী’’তি। গহিতং ন পমুস্সতি, সতিঅৰিপ্পৰাসলক্খণো হি অপ্পমাদোতি। ন কেৰলং যাথাৰতো গহণকোসল্লমেৰ ৰিচক্খণতা, অথ খো যাথাৰতো পঞ্ঞাসম্পৰেধনঞ্চাতি আহ ‘‘ৰিত্থারিকং করোতী’’তি। ইদানি পঞ্ঞাপটিলাভহেতুং মত্থকং পাপেত্ৰা দস্সেতুং ‘‘সুস্সূসায ৰা’’তিআদি ৰুত্তং। অত্থমুপপরিক্খতীতি সুতকতানং ধম্মানং পাল়িঅত্থূপপরিক্খাপুব্বকং রূপারূপৰিভাগং পরমত্থং সলক্খণতো সামঞ্ঞলক্খণতো চ উপপরিক্খতি ৰীমংসতি। অনুপুব্বেনাতি এৰং ঞাতপরিঞ্ঞং পত্ৰা তীরণপরিঞ্ঞায ততো অনুক্কমেন তীরণপরিঞ্ঞং পহানপরিঞ্ঞঞ্চ মত্থকং পাপেন্তো মগ্গপ্পটিপাটিযা পরমত্থসচ্চভূতং নিব্বানং সচ্ছিকরোতি।
Idāni saddhādīnaṃ paññāpaṭilābhassa taṃtaṃvisesapaccayāni nīharitvā dassetuṃ ‘‘eva’’nti vuttaṃ. Sussūsāyāti sotukāmatāya. Sā atthato upasaṅkamanādi. Paññādhigamūpāyanti pariyattidhammamāha. Tenāha ‘‘suṇātī’’ti. Gahitaṃ na pamussati, satiavippavāsalakkhaṇo hi appamādoti. Na kevalaṃ yāthāvato gahaṇakosallameva vicakkhaṇatā, atha kho yāthāvato paññāsampavedhanañcāti āha ‘‘vitthārikaṃ karotī’’ti. Idāni paññāpaṭilābhahetuṃ matthakaṃ pāpetvā dassetuṃ ‘‘sussūsāya vā’’tiādi vuttaṃ. Atthamupaparikkhatīti sutakatānaṃ dhammānaṃ pāḷiatthūpaparikkhāpubbakaṃ rūpārūpavibhāgaṃ paramatthaṃ salakkhaṇato sāmaññalakkhaṇato ca upaparikkhati vīmaṃsati. Anupubbenāti evaṃ ñātapariññaṃ patvā tīraṇapariññāya tato anukkamena tīraṇapariññaṃ pahānapariññañca matthakaṃ pāpento maggappaṭipāṭiyā paramatthasaccabhūtaṃ nibbānaṃ sacchikaroti.
ইমানি সদ্ধাদীনি চত্তারি কারণানি মত্থকং পাপেত্ৰা দস্সেন্তো আহ ‘‘দেসকালাদীনি অহাপেত্ৰা’’তি। যস্মিং দেসে যস্মিং কালে যে চ সহাযকে নিস্সায যং কিচ্চং তিরেতব্বং, তানি দেসকালাদীনি অনতিক্কমিত্ৰা অত্তনো অভিৰুড্ঢিং ইচ্ছন্তেন ‘‘অযং নাম দেসো, যত্থাহং এতরহি ৰসামি, অযং কালো, ইমে মিত্তা, ইমে অমিত্তা, ইমে আযৰযা, অহঞ্চ এদিসো জাতি-কুল-পদেস-বলভোগ-পরিৰারাদীহি, তং কিচ্চং ইদানি আরদ্ধব্বং, ইদানি নারদ্ধব্ব’’ন্তি সব্বং উপপরিক্খিত্ৰা পটিপজ্জিতব্বং। এৰং পটিপজ্জন্তো হি লোকিযস্স ধনস্স পটিরূপাধিগমূপাযং করোতি নাম। লোকুত্তরস্স পন সীলৰিসোধনাদিৰসেন ৰেদিতব্বং। ৰহিতব্বভাৰেন ধুরো ৰিযাতি ধুরো, ভারো। ইধ পন ধুরসম্পগ্গহো উত্তরপদলোপেন ধুরো, ৰীরিযং। সো সাতিসযো এতস্স অত্থীতি ধুরৰা। ‘‘উট্ঠাতা’’তি পদেন কাযিকৰীরিযস্স ৰক্খমানত্তা ‘‘চেতসিকৰীরিযৰসেনা’’তি ৰিসেসিতং। অনিক্খিত্তধুরো ধোরয্হভাৰতো। তিণা ভিয্যো ন মঞ্ঞতীতি তিণং ৰিয পরিভৰন্তো অতিভুয্য ৰত্ততীতি অত্থো। আদিনা নযেনাতি এত্থ আদি-সদ্দেন –
Imāni saddhādīni cattāri kāraṇāni matthakaṃ pāpetvā dassento āha ‘‘desakālādīni ahāpetvā’’ti. Yasmiṃ dese yasmiṃ kāle ye ca sahāyake nissāya yaṃ kiccaṃ tiretabbaṃ, tāni desakālādīni anatikkamitvā attano abhivuḍḍhiṃ icchantena ‘‘ayaṃ nāma deso, yatthāhaṃ etarahi vasāmi, ayaṃ kālo, ime mittā, ime amittā, ime āyavayā, ahañca ediso jāti-kula-padesa-balabhoga-parivārādīhi, taṃ kiccaṃ idāni āraddhabbaṃ, idāni nāraddhabba’’nti sabbaṃ upaparikkhitvā paṭipajjitabbaṃ. Evaṃ paṭipajjanto hi lokiyassa dhanassa paṭirūpādhigamūpāyaṃ karoti nāma. Lokuttarassa pana sīlavisodhanādivasena veditabbaṃ. Vahitabbabhāvena dhuro viyāti dhuro, bhāro. Idha pana dhurasampaggaho uttarapadalopena dhuro, vīriyaṃ. So sātisayo etassa atthīti dhuravā. ‘‘Uṭṭhātā’’ti padena kāyikavīriyassa vakkhamānattā ‘‘cetasikavīriyavasenā’’ti visesitaṃ. Anikkhittadhuro dhorayhabhāvato. Tiṇā bhiyyo na maññatīti tiṇaṃ viya paribhavanto atibhuyya vattatīti attho. Ādinā nayenāti ettha ādi-saddena –
‘‘করং পুরিসকিচ্চানি, সো সুখা ন ৰিহাযতি। (দী॰ নি॰ ৩.২৫৩)।
‘‘Karaṃ purisakiccāni, so sukhā na vihāyati; (Dī. ni. 3.253);
‘‘ন দিৰা সোপ্পসীলেন, রত্তিমুট্ঠানদেস্সিনা।
‘‘Na divā soppasīlena, rattimuṭṭhānadessinā;
নিচ্চং মত্তেন সোণ্ডেন, সক্কা আৰসিতুং ঘর’’ন্তি চ॥ (দী॰ নি॰ ৩.২৫৩)। –
Niccaṃ mattena soṇḍena, sakkā āvasituṃ ghara’’nti ca. (dī. ni. 3.253); –
এৰমাদীনং সঙ্গহো। অসিথিলপরক্কমো অনলসভাৰতো। একমূসিকাযাতি একায মতমূসিকায। নচিরস্সেৰাতি চতুমাসব্ভন্তরেযেৰ। চতুসতসহস্সসঙ্খং চূল়ন্তেৰাসী ৰিযাতি কাকণিকড্ঢকহাপণ-সোল়স-কহাপণ-চতুৰীসতি-কহাপণ-সতহরণক্কমেন দ্ৰে সতসহস্সানি, চূল়কমহাসেট্ঠিনো ধীতুলাভৰসেন দ্ৰে সতসহস্সানীতি এৰং চতুসতসহস্সসঙ্খং ধনং একমূলেন যথা চূল়ন্তেৰাসী ৰিন্দি, এৰং অঞ্ঞোপি পতিরূপকারী ধুরৰা উট্ঠাতা ৰিন্দতে ধনং। অযঞ্চ অত্থো চূল়কসেট্ঠিজাতকেন দীপেতব্বো। ৰুত্তঞ্হেতং –
Evamādīnaṃ saṅgaho. Asithilaparakkamo analasabhāvato. Ekamūsikāyāti ekāya matamūsikāya. Nacirassevāti catumāsabbhantareyeva. Catusatasahassasaṅkhaṃ cūḷantevāsī viyāti kākaṇikaḍḍhakahāpaṇa-soḷasa-kahāpaṇa-catuvīsati-kahāpaṇa-sataharaṇakkamena dve satasahassāni, cūḷakamahāseṭṭhino dhītulābhavasena dve satasahassānīti evaṃ catusatasahassasaṅkhaṃ dhanaṃ ekamūlena yathā cūḷantevāsī vindi, evaṃ aññopi patirūpakārī dhuravā uṭṭhātā vindate dhanaṃ. Ayañca attho cūḷakaseṭṭhijātakena dīpetabbo. Vuttañhetaṃ –
‘‘অপ্পকেনপি মেধাৰী, পাভতেন ৰিচক্খণো।
‘‘Appakenapi medhāvī, pābhatena vicakkhaṇo;
সমুট্ঠাপেতি অত্তানং, অণুং অগ্গিংৰ সন্ধম’’ন্তি॥ (জা॰ ১.১.৪)।
Samuṭṭhāpeti attānaṃ, aṇuṃ aggiṃva sandhama’’nti. (jā. 1.1.4);
ৰত্তং কত্ৰাতি অধিট্ঠানৰত্তং কত্ৰা। ‘‘সচ্চৰাদী ভূতৰাদী’’তি কিত্তিং পপ্পোতীতি যোজনা। ইচ্ছিতপত্থিতন্তি যেহি মিত্তং ইচ্ছতি, তেহি ইতরং পত্থিতং। মিত্তানি গন্থতীতি মিত্তভাৰং ঘটেতি। দানস্স পিযভাৰকরণতো ‘‘দদং পিযো হোতী’’তি ৰুত্তং। যং দানং একন্ততো মিত্তভাৰাৰহং, তং দস্সেন্তো ‘‘দুদ্দদং ৰা দদং তং গন্থতী’’তি আহ। দদন্তি চ লক্খণৰচনমেতন্তি আহ ‘‘দানমুখেন ৰা’’তিআদি।
Vattaṃ katvāti adhiṭṭhānavattaṃ katvā. ‘‘Saccavādī bhūtavādī’’ti kittiṃ pappotīti yojanā. Icchitapatthitanti yehi mittaṃ icchati, tehi itaraṃ patthitaṃ. Mittāni ganthatīti mittabhāvaṃ ghaṭeti. Dānassa piyabhāvakaraṇato ‘‘dadaṃ piyo hotī’’ti vuttaṃ. Yaṃ dānaṃ ekantato mittabhāvāvahaṃ, taṃ dassento ‘‘duddadaṃ vā dadaṃ taṃ ganthatī’’ti āha. Dadanti ca lakkhaṇavacanametanti āha ‘‘dānamukhena vā’’tiādi.
আল়ৰকস্স অজ্ঝাসযানুরূপং গহট্ঠৰসেন ৰিস্সজ্জেন্তো। সদ্ধা এতস্স অত্থীতি সদ্ধো, তস্স সদ্ধস্স। ঘরমেসিনোতি ঘরাৰাসসঙ্খাতং ঘরং এসন্তস্স। ঘরাৰাসসন্নিস্সিতত্তা ‘‘ঘর’’ন্তি কামগুণা ৰুচ্চন্তীতি আহ ‘‘পঞ্চ কামগুণে’’তি। ‘‘এতে চতুরো ধম্মা’’তিআদিনা গহিতা অনন্তরগাথায ৰুত্তধম্মা এৰাতি দস্সেন্তো ‘‘ৰুত্তপ্পকারং সচ্চ’’ন্তিআদিমাহ। তত্থ ‘‘ইমে কুসলা, ইমে অকুসলা’’তিআদিনা তে অত্থে যাথাৰতো ধারণতো উপধারণতো ধম্মো। সঞ্ঞা চিত্তচেতসিকানং ধারণং, অৰিচ্ছেদতো সন্ধারণতো কুসলসন্তানং ধারেতীতি ধিতি, ৰীরিযং। চজতি এতেনাতি চাগো, দানং। পচ্চযৰেকল্লতো ফলুপ্পাদনসমত্থতাৰসেন সন্তি।
Āḷavakassa ajjhāsayānurūpaṃ gahaṭṭhavasena vissajjento. Saddhā etassa atthīti saddho, tassa saddhassa. Gharamesinoti gharāvāsasaṅkhātaṃ gharaṃ esantassa. Gharāvāsasannissitattā ‘‘ghara’’nti kāmaguṇā vuccantīti āha ‘‘pañca kāmaguṇe’’ti. ‘‘Ete caturo dhammā’’tiādinā gahitā anantaragāthāya vuttadhammā evāti dassento ‘‘vuttappakāraṃ sacca’’ntiādimāha. Tattha ‘‘ime kusalā, ime akusalā’’tiādinā te atthe yāthāvato dhāraṇato upadhāraṇato dhammo. Saññā cittacetasikānaṃ dhāraṇaṃ, avicchedato sandhāraṇato kusalasantānaṃ dhāretīti dhiti, vīriyaṃ. Cajati etenāti cāgo, dānaṃ. Paccayavekallato phaluppādanasamatthatāvasena santi.
অঞ্ঞেপীতি ইতো যথাৰুত্তধম্মসমুদাযতো অঞ্ঞেপি ধম্মা যদি সন্তি, তে ধম্মে পুচ্ছস্সূতি। কিলেসে, কাযৰাচাদিকে ৰা দমেতীতি দমো , পঞ্ঞা। উট্ঠহতি উস্সহতি এতেনাতি উট্ঠানং, ৰীরিযং। এত্থাতি এতিস্সা পুচ্ছায। সদ্ধিন্তি সঙ্খেপতো ভাৰত্থপদানং বন্ধনেন সহ। একমেকং পদন্তি পঞ্ঞাদিকমেকেকং পদং। ‘‘পঞ্ঞা ইমস্মিং ঠানে পঞ্ঞাতি ধম্মোতি চ আগতা’’তিআদিনা পঞ্ঞাদিঅত্থস্স উদ্ধরণং অত্থুদ্ধারো। তস্স তস্স অত্থস্স ‘‘পঞ্ঞা পজাননা’’তিআদিনা (ধ॰ স॰ ১৬) ৰেৰচনপদানং উদ্ধরণং পদুদ্ধারো। পজানাতীতি পঞ্ঞা, ধারেতীতি ধম্মো, দমেতীতি দমোতি এৰং পদস্স কথনং পদৰণ্ণনা।
Aññepīti ito yathāvuttadhammasamudāyato aññepi dhammā yadi santi, te dhamme pucchassūti. Kilese, kāyavācādike vā dametīti damo, paññā. Uṭṭhahati ussahati etenāti uṭṭhānaṃ, vīriyaṃ. Etthāti etissā pucchāya. Saddhinti saṅkhepato bhāvatthapadānaṃ bandhanena saha. Ekamekaṃ padanti paññādikamekekaṃ padaṃ. ‘‘Paññā imasmiṃ ṭhāne paññāti dhammoti ca āgatā’’tiādinā paññādiatthassa uddharaṇaṃ atthuddhāro. Tassa tassa atthassa ‘‘paññā pajānanā’’tiādinā (dha. sa. 16) vevacanapadānaṃ uddharaṇaṃ paduddhāro. Pajānātīti paññā, dhāretīti dhammo, dametīti damoti evaṃ padassa kathanaṃ padavaṇṇanā.
অজ্জাতি ৰা এতরহি। যথাৰুত্তেন পকারেনাতি ‘‘সদ্দহানো অরহত’’ন্তিআদিনা ৰুত্তপ্পকারেন। সচ্চসম্পটিৰেধাৰগহণং ৰা যথাৰুত্তেন পকারেন দিট্ঠসচ্চতায ইধলোকপরলোকত্থং যাথাৰতো জানন্তো। এৰঞ্চ যক্খো সত্থু দেসনানুভাৰসিদ্ধং পঞ্হং পুচ্ছনেন অত্তনো পটিলাভসম্পত্তিং ৰিভাৰেন্তো ‘‘কথংসু লভতে পঞ্ঞ’’ন্তিআদিমাহাতি আচরিযা। সম্পরাযিকোতি এত্থ চ-সদ্দো লুত্তনিদ্দিট্ঠো, তেন ‘‘দিট্ঠধম্মিকো চা’’তি অযমত্থো ৰুত্তো এৰাতি দস্সেন্তো ‘‘যো অত্থো…পে॰… দস্সেতী’’তি আহ। অরীযতি ফলং এতস্মাতি অত্থো, কারণং। ৰিচক্খণে সপযোজনতায।
Ajjāti vā etarahi. Yathāvuttena pakārenāti ‘‘saddahāno arahata’’ntiādinā vuttappakārena. Saccasampaṭivedhāvagahaṇaṃ vā yathāvuttena pakārena diṭṭhasaccatāya idhalokaparalokatthaṃ yāthāvato jānanto. Evañca yakkho satthu desanānubhāvasiddhaṃ pañhaṃ pucchanena attano paṭilābhasampattiṃ vibhāvento ‘‘kathaṃsu labhate pañña’’ntiādimāhāti ācariyā. Samparāyikoti ettha ca-saddo luttaniddiṭṭho, tena ‘‘diṭṭhadhammiko cā’’ti ayamattho vutto evāti dassento ‘‘yo attho…pe… dassetī’’ti āha. Arīyati phalaṃ etasmāti attho, kāraṇaṃ. Vicakkhaṇe sapayojanatāya.
তস্স ঞাণস্সাতি তস্স অত্থস্স আৰিভাৰনস্স ঞাণস্স। গুণৰিসেসেহি চ সদিসস্সপি অঞ্ঞস্স অভাৰতো অগ্গদক্খিণেয্যো বুদ্ধো ভগৰা। তেনাহ –
Tassa ñāṇassāti tassa atthassa āvibhāvanassa ñāṇassa. Guṇavisesehi ca sadisassapi aññassa abhāvato aggadakkhiṇeyyo buddho bhagavā. Tenāha –
‘‘নযিমস্মিং লোকে পরস্মিং ৰা পন,
‘‘Nayimasmiṃ loke parasmiṃ vā pana,
বুদ্ধেন সেট্ঠোৰ সমোৰ ৰিজ্জতি।
Buddhena seṭṭhova samova vijjati;
আহুনেয্যানং পরমাহুতিং গতো,
Āhuneyyānaṃ paramāhutiṃ gato,
পুঞ্ঞত্থিকানং ৰিপুলফলেসিন’’ন্তি॥ (ৰি॰ ৰ॰ ১০৪৭)।
Puññatthikānaṃ vipulaphalesina’’nti. (vi. va. 1047);
সহিতপটিপত্তিন্তি পঞ্ঞাসঙ্গাহিকং অত্তনো পটিপত্তিং। সুন্দরা বোধি সুবোধি, বুদ্ধস্স সুবোধি বুদ্ধসুবোধি, সা এৰ বুদ্ধসুবোধিতা। ধম্মস্সৰনত্থং সন্নিপতিতদেৰতাহি সঙ্ঘুট্ঠসাধুকারসদ্দুট্ঠানঞ্চ।
Sahitapaṭipattinti paññāsaṅgāhikaṃ attano paṭipattiṃ. Sundarā bodhi subodhi, buddhassa subodhi buddhasubodhi, sā eva buddhasubodhitā. Dhammassavanatthaṃ sannipatitadevatāhi saṅghuṭṭhasādhukārasadduṭṭhānañca.
সতপুঞ্ঞলক্খণন্তি সতসহস্সকপ্পে পুঞ্ঞসম্ভারস্স কতত্তা তেসং পুঞ্ঞানং ৰসেন সতপুঞ্ঞলক্খণং অনেকপুঞ্ঞনিব্বত্তলক্খণং। অভিনন্দিযতায সব্বেহি অঙ্গেহি সমুপেতং সমন্নাগতং। কতপুঞ্ঞভাৰং ব্যঞ্জেন্তীতি ব্যঞ্জনানি , অঙ্গপচ্চঙ্গানি। তেসং পরিপুণ্ণত্তা পরিপুণ্ণব্যঞ্জনং। তং যক্খো…পে॰… পূরেসীতি গাথাপূরণত্থমেৰ হি ভগৰা তথারূপানি অকাসি। অব্যাধিতাতি অরোগা। ‘‘অব্যথিতা’’তি কেচি পঠন্তি, সযসন্তাসরহিতাতি অত্থো।
Satapuññalakkhaṇanti satasahassakappe puññasambhārassa katattā tesaṃ puññānaṃ vasena satapuññalakkhaṇaṃ anekapuññanibbattalakkhaṇaṃ. Abhinandiyatāya sabbehi aṅgehi samupetaṃ samannāgataṃ. Katapuññabhāvaṃ byañjentīti byañjanāni , aṅgapaccaṅgāni. Tesaṃ paripuṇṇattā paripuṇṇabyañjanaṃ. Taṃ yakkho…pe… pūresīti gāthāpūraṇatthameva hi bhagavā tathārūpāni akāsi. Abyādhitāti arogā. ‘‘Abyathitā’’ti keci paṭhanti, sayasantāsarahitāti attho.
‘‘হত্থযো’’তি ৰত্তব্বে ‘‘হত্থকো’’তি ৰুত্তং। আল়ৰিনগরন্তি আল়ৰিনগরৰাসিনো ৰদতি। ভৰতি হি তত্রট্ঠতায তং-সদ্দো যথা ‘‘গামো আগতো, মঞ্চা উক্কুট্ঠিং করোন্তী’’তি। এককোলাহলেন ৰত্তমানেন।
‘‘Hatthayo’’ti vattabbe ‘‘hatthako’’ti vuttaṃ. Āḷavinagaranti āḷavinagaravāsino vadati. Bhavati hi tatraṭṭhatāya taṃ-saddo yathā ‘‘gāmo āgato, mañcā ukkuṭṭhiṃ karontī’’ti. Ekakolāhalena vattamānena.
সম্পিণ্ডিত্ৰাতি সন্নিপতিত্ৰা। কামং সম্ভারো তেন কতোতি নত্থি, যুদ্ধত্থং পন বহুসো উস্সাহস্স কতত্তা ‘‘যুদ্ধমাদিং কত্ৰা’’তি ৰুত্তং। তমেৰ আল়ৰকসুত্তং কথেসি তস্সা এৰ দেসনায সন্নিপতিতপরিসায সপ্পাযত্তা। তেনাহ ‘‘কথাপরি…পে॰… অহোসী’’তি। চতূহি ৰত্থূহীতি চতূহি সঙ্গহৰত্থূহি। পরিসন্তি অত্তনো পরিসং। ‘‘ইতরঞ্চা’’তিপি ৰদন্তি।
Sampiṇḍitvāti sannipatitvā. Kāmaṃ sambhāro tena katoti natthi, yuddhatthaṃ pana bahuso ussāhassa katattā ‘‘yuddhamādiṃ katvā’’ti vuttaṃ. Tameva āḷavakasuttaṃ kathesi tassā eva desanāya sannipatitaparisāya sappāyattā. Tenāha ‘‘kathāpari…pe… ahosī’’ti. Catūhi vatthūhīti catūhi saṅgahavatthūhi. Parisanti attano parisaṃ. ‘‘Itarañcā’’tipi vadanti.
আল়ৰকসুত্তৰণ্ণনা নিট্ঠিতা।
Āḷavakasuttavaṇṇanā niṭṭhitā.
সারত্থপ্পকাসিনিযা সংযুত্তনিকায-অট্ঠকথায
Sāratthappakāsiniyā saṃyuttanikāya-aṭṭhakathāya
যক্খসংযুত্তৰণ্ণনায লীনত্থপ্পকাসনা সমত্তা।
Yakkhasaṃyuttavaṇṇanāya līnatthappakāsanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১২. আল়ৰকসুত্তং • 12. Āḷavakasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১২. আল়ৰকসুত্তৰণ্ণনা • 12. Āḷavakasuttavaṇṇanā
