| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৫. ভিক্খুনীসংযুত্তং
5. Bhikkhunīsaṃyuttaṃ
১. আল়ৰিকাসুত্তৰণ্ণনা
1. Āḷavikāsuttavaṇṇanā
১৬২. ভিক্খুনীসংযুত্তস্স পঠমে আল়ৰিকাতি আল়ৰিযং জাতা আল়ৰিনগরতোযেৰ চ নিক্খম্ম পব্বজিতা। অন্ধৰনন্তি কস্সপসম্মাসম্বুদ্ধস্স চেতিযে নৰকম্মত্থায ধনং সমাদপেত্ৰা আগচ্ছন্তস্স যসোধরস্স নাম ধম্মভাণকস্স অরিযপুগ্গলস্স অক্খীনি উপ্পাটেত্ৰা তত্থেৰ অক্খিভেদপ্পত্তেহি পঞ্চহি চোরসতেহি নিৰুত্থত্তা ততো পট্ঠায ‘‘অন্ধৰন’’ন্তি সঙ্খং গতং ৰনং। তং কির সাৰত্থিতো দক্খিণপস্সে গাৰুতমত্তে হোতি রাজারক্খায গুত্তং। তত্থ পৰিৰেককামা ভিক্খূ চ ভিক্খুনিযো চ গচ্ছন্তি। তস্মা অযম্পি কাযৰিৰেকত্থিনী যেন তং ৰনং, তেনুপসঙ্কমি। নিস্সরণন্তি নিব্বানং। পঞ্ঞাযাতি পচ্চৰেক্খণঞাণেন। ন ত্ৰং জানাসি তং পদন্তি ত্ৰং এতং নিব্বানপদং ৰা নিব্বানগামিমগ্গপদং ৰা ন জানাসি। সত্তিসূলূপমাতি ৰিনিৰিজ্ঝনত্থেন সত্তিসূলসদিসা। খন্ধাসং অধিকুট্টনাতি খন্ধা তেসং অধিকুট্টনভণ্ডিকা। পঠমং।
162. Bhikkhunīsaṃyuttassa paṭhame āḷavikāti āḷaviyaṃ jātā āḷavinagaratoyeva ca nikkhamma pabbajitā. Andhavananti kassapasammāsambuddhassa cetiye navakammatthāya dhanaṃ samādapetvā āgacchantassa yasodharassa nāma dhammabhāṇakassa ariyapuggalassa akkhīni uppāṭetvā tattheva akkhibhedappattehi pañcahi corasatehi nivutthattā tato paṭṭhāya ‘‘andhavana’’nti saṅkhaṃ gataṃ vanaṃ. Taṃ kira sāvatthito dakkhiṇapasse gāvutamatte hoti rājārakkhāya guttaṃ. Tattha pavivekakāmā bhikkhū ca bhikkhuniyo ca gacchanti. Tasmā ayampi kāyavivekatthinī yena taṃ vanaṃ, tenupasaṅkami. Nissaraṇanti nibbānaṃ. Paññāyāti paccavekkhaṇañāṇena. Na tvaṃ jānāsi taṃ padanti tvaṃ etaṃ nibbānapadaṃ vā nibbānagāmimaggapadaṃ vā na jānāsi. Sattisūlūpamāti vinivijjhanatthena sattisūlasadisā. Khandhāsaṃ adhikuṭṭanāti khandhā tesaṃ adhikuṭṭanabhaṇḍikā. Paṭhamaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. আল়ৰিকাসুত্তং • 1. Āḷavikāsuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. আল়ৰিকাসুত্তৰণ্ণনা • 1. Āḷavikāsuttavaṇṇanā
