| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၅. ဘိက္ခုနီသံယုတ္တံ
5. Bhikkhunīsaṃyuttaṃ
၁. အာဠဝိကာသုတ္တဝဏ္ဏနာ
1. Āḷavikāsuttavaṇṇanā
၁၆၂. ဘိက္ခုနီသံယုတ္တသ္သ ပဌမေ အာဠဝိကာတိ အာဠဝိယံ ဇာတာ အာဠဝိနဂရတောယေဝ စ နိက္ခမ္မ ပဗ္ဗဇိတာ။ အန္ဓဝနန္တိ ကသ္သပသမ္မာသမ္ဗုဒ္ဓသ္သ စေတိယေ နဝကမ္မတ္ထာယ ဓနံ သမာဒပေတ္ဝာ အာဂစ္ဆန္တသ္သ ယသောဓရသ္သ နာမ ဓမ္မဘာဏကသ္သ အရိယပုဂ္ဂလသ္သ အက္ခီနိ ဥပ္ပာဋေတ္ဝာ တတ္ထေဝ အက္ခိဘေဒပ္ပတ္တေဟိ ပဉ္စဟိ စောရသတေဟိ နိဝုတ္ထတ္တာ တတော ပဋ္ဌာယ ‘‘အန္ဓဝန’’န္တိ သင္ခံ ဂတံ ဝနံ။ တံ ကိရ သာဝတ္ထိတော ဒက္ခိဏပသ္သေ ဂာဝုတမတ္တေ ဟောတိ ရာဇာရက္ခာယ ဂုတ္တံ။ တတ္ထ ပဝိဝေကကာမာ ဘိက္ခူ စ ဘိက္ခုနိယော စ ဂစ္ဆန္တိ။ တသ္မာ အယမ္ပိ ကာယဝိဝေကတ္ထိနီ ယေန တံ ဝနံ, တေနုပသင္ကမိ။ နိသ္သရဏန္တိ နိဗ္ဗာနံ။ ပညာယာတိ ပစ္စဝေက္ခဏဉာဏေန။ န တ္ဝံ ဇာနာသိ တံ ပဒန္တိ တ္ဝံ ဧတံ နိဗ္ဗာနပဒံ ဝာ နိဗ္ဗာနဂာမိမဂ္ဂပဒံ ဝာ န ဇာနာသိ။ သတ္တိသူလူပမာတိ ဝိနိဝိဇ္ဈနတ္ထေန သတ္တိသူလသဒိသာ။ ခန္ဓာသံ အဓိကုဋ္ဋနာတိ ခန္ဓာ တေသံ အဓိကုဋ္ဋနဘဏ္ဍိကာ။ ပဌမံ။
162. Bhikkhunīsaṃyuttassa paṭhame āḷavikāti āḷaviyaṃ jātā āḷavinagaratoyeva ca nikkhamma pabbajitā. Andhavananti kassapasammāsambuddhassa cetiye navakammatthāya dhanaṃ samādapetvā āgacchantassa yasodharassa nāma dhammabhāṇakassa ariyapuggalassa akkhīni uppāṭetvā tattheva akkhibhedappattehi pañcahi corasatehi nivutthattā tato paṭṭhāya ‘‘andhavana’’nti saṅkhaṃ gataṃ vanaṃ. Taṃ kira sāvatthito dakkhiṇapasse gāvutamatte hoti rājārakkhāya guttaṃ. Tattha pavivekakāmā bhikkhū ca bhikkhuniyo ca gacchanti. Tasmā ayampi kāyavivekatthinī yena taṃ vanaṃ, tenupasaṅkami. Nissaraṇanti nibbānaṃ. Paññāyāti paccavekkhaṇañāṇena. Na tvaṃ jānāsi taṃ padanti tvaṃ etaṃ nibbānapadaṃ vā nibbānagāmimaggapadaṃ vā na jānāsi. Sattisūlūpamāti vinivijjhanatthena sattisūlasadisā. Khandhāsaṃ adhikuṭṭanāti khandhā tesaṃ adhikuṭṭanabhaṇḍikā. Paṭhamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. အာဠဝိကာသုတ္တံ • 1. Āḷavikāsuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁. အာဠဝိကာသုတ္တဝဏ္ဏနာ • 1. Āḷavikāsuttavaṇṇanā
