| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
5. භික්‌ඛුනීසංයුත්‌තං
5. Bhikkhunīsaṃyuttaṃ
1. ආළවිකාසුත්‌තවණ්‌ණනා
1. Āḷavikāsuttavaṇṇanā
162. භික්‌ඛුනීසංයුත්‌තස්‌ස පඨමෙ ආළවිකාති ආළවියං ජාතා ආළවිනගරතොයෙව ච නික්‌ඛම්‌ම පබ්‌බජිතා. අන්‌ධවනන්‌ති කස්‌සපසම්‌මාසම්‌බුද්‌ධස්‌ස චෙතියෙ නවකම්‌මත්‌ථාය ධනං සමාදපෙත්‌වා ආගච්‌ඡන්‌තස්‌ස යසොධරස්‌ස නාම ධම්‌මභාණකස්‌ස අරියපුග්‌ගලස්‌ස අක්‌ඛීනි උප්‌පාටෙත්‌වා තත්‌ථෙව අක්‌ඛිභෙදප්‌පත්‌තෙහි පඤ්‌චහි චොරසතෙහි නිවුත්‌ථත්‌තා තතො පට්‌ඨාය ‘‘අන්‌ධවන’’න්‌ති සඞ්‌ඛං ගතං වනං. තං කිර සාවත්‌ථිතො දක්‌ඛිණපස්‌සෙ ගාවුතමත්‌තෙ හොති රාජාරක්‌ඛාය ගුත්‌තං. තත්‌ථ පවිවෙකකාමා භික්‌ඛූ ච භික්‌ඛුනියො ච ගච්‌ඡන්‌ති. තස්‌මා අයම්‌පි කායවිවෙකත්‌ථිනී යෙන තං වනං, තෙනුපසඞ්‌කමි. නිස්‌සරණන්‌ති නිබ්‌බානං. පඤ්‌ඤායාති පච්‌චවෙක්‌ඛණඤාණෙන. න ත්‌වං ජානාසි තං පදන්‌ති ත්‌වං එතං නිබ්‌බානපදං වා නිබ්‌බානගාමිමග්‌ගපදං වා න ජානාසි. සත්‌තිසූලූපමාති විනිවිජ්‌ඣනත්‌ථෙන සත්‌තිසූලසදිසා. ඛන්‌ධාසං අධිකුට්‌ටනාති ඛන්‌ධා තෙසං අධිකුට්‌ටනභණ්‌ඩිකා. පඨමං.
162. Bhikkhunīsaṃyuttassa paṭhame āḷavikāti āḷaviyaṃ jātā āḷavinagaratoyeva ca nikkhamma pabbajitā. Andhavananti kassapasammāsambuddhassa cetiye navakammatthāya dhanaṃ samādapetvā āgacchantassa yasodharassa nāma dhammabhāṇakassa ariyapuggalassa akkhīni uppāṭetvā tattheva akkhibhedappattehi pañcahi corasatehi nivutthattā tato paṭṭhāya ‘‘andhavana’’nti saṅkhaṃ gataṃ vanaṃ. Taṃ kira sāvatthito dakkhiṇapasse gāvutamatte hoti rājārakkhāya guttaṃ. Tattha pavivekakāmā bhikkhū ca bhikkhuniyo ca gacchanti. Tasmā ayampi kāyavivekatthinī yena taṃ vanaṃ, tenupasaṅkami. Nissaraṇanti nibbānaṃ. Paññāyāti paccavekkhaṇañāṇena. Na tvaṃ jānāsi taṃ padanti tvaṃ etaṃ nibbānapadaṃ vā nibbānagāmimaggapadaṃ vā na jānāsi. Sattisūlūpamāti vinivijjhanatthena sattisūlasadisā. Khandhāsaṃ adhikuṭṭanāti khandhā tesaṃ adhikuṭṭanabhaṇḍikā. Paṭhamaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 1. ආළවිකාසුත්‌තං • 1. Āḷavikāsuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1. ආළවිකාසුත්‌තවණ්‌ණනා • 1. Āḷavikāsuttavaṇṇanā
