| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੫. ਭਿਕ੍ਖੁਨੀਸਂਯੁਤ੍ਤਂ
5. Bhikkhunīsaṃyuttaṃ
੧. ਆਲ਼વਿਕਾਸੁਤ੍ਤવਣ੍ਣਨਾ
1. Āḷavikāsuttavaṇṇanā
੧੬੨. ਭਿਕ੍ਖੁਨੀਸਂਯੁਤ੍ਤਸ੍ਸ ਪਠਮੇ ਆਲ਼વਿਕਾਤਿ ਆਲ਼વਿਯਂ ਜਾਤਾ ਆਲ਼વਿਨਗਰਤੋਯੇવ ਚ ਨਿਕ੍ਖਮ੍ਮ ਪਬ੍ਬਜਿਤਾ। ਅਨ੍ਧવਨਨ੍ਤਿ ਕਸ੍ਸਪਸਮ੍ਮਾਸਮ੍ਬੁਦ੍ਧਸ੍ਸ ਚੇਤਿਯੇ ਨવਕਮ੍ਮਤ੍ਥਾਯ ਧਨਂ ਸਮਾਦਪੇਤ੍વਾ ਆਗਚ੍ਛਨ੍ਤਸ੍ਸ ਯਸੋਧਰਸ੍ਸ ਨਾਮ ਧਮ੍ਮਭਾਣਕਸ੍ਸ ਅਰਿਯਪੁਗ੍ਗਲਸ੍ਸ ਅਕ੍ਖੀਨਿ ਉਪ੍ਪਾਟੇਤ੍વਾ ਤਤ੍ਥੇવ ਅਕ੍ਖਿਭੇਦਪ੍ਪਤ੍ਤੇਹਿ ਪਞ੍ਚਹਿ ਚੋਰਸਤੇਹਿ ਨਿવੁਤ੍ਥਤ੍ਤਾ ਤਤੋ ਪਟ੍ਠਾਯ ‘‘ਅਨ੍ਧવਨ’’ਨ੍ਤਿ ਸਙ੍ਖਂ ਗਤਂ વਨਂ। ਤਂ ਕਿਰ ਸਾવਤ੍ਥਿਤੋ ਦਕ੍ਖਿਣਪਸ੍ਸੇ ਗਾવੁਤਮਤ੍ਤੇ ਹੋਤਿ ਰਾਜਾਰਕ੍ਖਾਯ ਗੁਤ੍ਤਂ। ਤਤ੍ਥ ਪવਿવੇਕਕਾਮਾ ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਗਚ੍ਛਨ੍ਤਿ। ਤਸ੍ਮਾ ਅਯਮ੍ਪਿ ਕਾਯવਿવੇਕਤ੍ਥਿਨੀ ਯੇਨ ਤਂ વਨਂ, ਤੇਨੁਪਸਙ੍ਕਮਿ। ਨਿਸ੍ਸਰਣਨ੍ਤਿ ਨਿਬ੍ਬਾਨਂ। ਪਞ੍ਞਾਯਾਤਿ ਪਚ੍ਚવੇਕ੍ਖਣਞਾਣੇਨ। ਨ ਤ੍વਂ ਜਾਨਾਸਿ ਤਂ ਪਦਨ੍ਤਿ ਤ੍વਂ ਏਤਂ ਨਿਬ੍ਬਾਨਪਦਂ વਾ ਨਿਬ੍ਬਾਨਗਾਮਿਮਗ੍ਗਪਦਂ વਾ ਨ ਜਾਨਾਸਿ। ਸਤ੍ਤਿਸੂਲੂਪਮਾਤਿ વਿਨਿવਿਜ੍ਝਨਤ੍ਥੇਨ ਸਤ੍ਤਿਸੂਲਸਦਿਸਾ। ਖਨ੍ਧਾਸਂ ਅਧਿਕੁਟ੍ਟਨਾਤਿ ਖਨ੍ਧਾ ਤੇਸਂ ਅਧਿਕੁਟ੍ਟਨਭਣ੍ਡਿਕਾ। ਪਠਮਂ।
162. Bhikkhunīsaṃyuttassa paṭhame āḷavikāti āḷaviyaṃ jātā āḷavinagaratoyeva ca nikkhamma pabbajitā. Andhavananti kassapasammāsambuddhassa cetiye navakammatthāya dhanaṃ samādapetvā āgacchantassa yasodharassa nāma dhammabhāṇakassa ariyapuggalassa akkhīni uppāṭetvā tattheva akkhibhedappattehi pañcahi corasatehi nivutthattā tato paṭṭhāya ‘‘andhavana’’nti saṅkhaṃ gataṃ vanaṃ. Taṃ kira sāvatthito dakkhiṇapasse gāvutamatte hoti rājārakkhāya guttaṃ. Tattha pavivekakāmā bhikkhū ca bhikkhuniyo ca gacchanti. Tasmā ayampi kāyavivekatthinī yena taṃ vanaṃ, tenupasaṅkami. Nissaraṇanti nibbānaṃ. Paññāyāti paccavekkhaṇañāṇena. Na tvaṃ jānāsi taṃ padanti tvaṃ etaṃ nibbānapadaṃ vā nibbānagāmimaggapadaṃ vā na jānāsi. Sattisūlūpamāti vinivijjhanatthena sattisūlasadisā. Khandhāsaṃ adhikuṭṭanāti khandhā tesaṃ adhikuṭṭanabhaṇḍikā. Paṭhamaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੧. ਆਲ਼વਿਕਾਸੁਤ੍ਤਂ • 1. Āḷavikāsuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੧. ਆਲ਼વਿਕਾਸੁਤ੍ਤવਣ੍ਣਨਾ • 1. Āḷavikāsuttavaṇṇanā
