| Library / Tipiṭaka / तिपिटक • Tipiṭaka / विमानवत्थु-अट्ठकथा • Vimānavatthu-aṭṭhakathā |
४. अलोमविमानवण्णना
4. Alomavimānavaṇṇanā
अभिक्कन्तेन वण्णेनाति अलोमविमानं। तस्स का उप्पत्ति? भगवा बाराणसियं इसिपतने मिगदाये विहरन्तो पुब्बण्हसमयं निवासेत्वा पत्तचीवरमादाय बाराणसिं पिण्डाय पाविसि । तत्थेका अलोमा नाम दुग्गतित्थी भगवन्तं दिस्वा पसन्नचित्ता अञ्ञं दातब्बं अपस्सन्ती ‘‘ईदिसम्पि भगवतो दिन्नं मय्हं महप्फलं भविस्सती’’ति चिन्तेत्वा परिभिन्नवण्णं अलोणं सुक्खकुम्मासं उपनेसि, भगवा पटिग्गहेसि। सा तं दानं आरम्मणं कत्वा सोमनस्सं पवेदेसि, सा अपरभागे कालं कत्वा तावतिंसेसु निब्बत्ति। तं आयस्मा महामोग्गल्लानो –
Abhikkantenavaṇṇenāti alomavimānaṃ. Tassa kā uppatti? Bhagavā bārāṇasiyaṃ isipatane migadāye viharanto pubbaṇhasamayaṃ nivāsetvā pattacīvaramādāya bārāṇasiṃ piṇḍāya pāvisi . Tatthekā alomā nāma duggatitthī bhagavantaṃ disvā pasannacittā aññaṃ dātabbaṃ apassantī ‘‘īdisampi bhagavato dinnaṃ mayhaṃ mahapphalaṃ bhavissatī’’ti cintetvā paribhinnavaṇṇaṃ aloṇaṃ sukkhakummāsaṃ upanesi, bhagavā paṭiggahesi. Sā taṃ dānaṃ ārammaṇaṃ katvā somanassaṃ pavedesi, sā aparabhāge kālaṃ katvā tāvatiṃsesu nibbatti. Taṃ āyasmā mahāmoggallāno –
७११.
711.
‘‘अभिक्कन्तेन वण्णेन…पे॰… वण्णो च ते सब्बदिसा पभासती’’ति॥ –
‘‘Abhikkantena vaṇṇena…pe… vaṇṇo ca te sabbadisā pabhāsatī’’ti. –
पुच्छि। सापि तस्स ब्याकासि, तं दस्सेतुं –
Pucchi. Sāpi tassa byākāsi, taṃ dassetuṃ –
७१४.
714.
‘‘सा देवता अत्तमना…पे॰… यस्स कम्मस्सिदं फल’’न्ति॥ – वुत्तं।
‘‘Sā devatā attamanā…pe… yassa kammassidaṃ phala’’nti. – vuttaṃ;
७१५.
715.
‘‘अहञ्च बाराणसियं, बुद्धस्सादिच्चबन्धुनो।
‘‘Ahañca bārāṇasiyaṃ, buddhassādiccabandhuno;
अदासिं सुक्खकुम्मासं, पसन्ना सेहि पाणिभि॥
Adāsiṃ sukkhakummāsaṃ, pasannā sehi pāṇibhi.
७१६.
716.
‘‘सुक्खाय अलोणिकाय च, पस्स फलं कुम्मासपिण्डिया।
‘‘Sukkhāya aloṇikāya ca, passa phalaṃ kummāsapiṇḍiyā;
अलोमं सुखितं दिस्वा, को पुञ्ञं न करिस्सति॥
Alomaṃ sukhitaṃ disvā, ko puññaṃ na karissati.
७१७.
717.
‘‘तेन मेतादिसो वण्णो…पे॰… वण्णो च मे सब्बदिसा पभासती’’ति॥
‘‘Tena metādiso vaṇṇo…pe… vaṇṇo ca me sabbadisā pabhāsatī’’ti.
७१६. तत्थ अलोमं सुखितं दिस्वाति अलोमम्पि नाम सुक्खकुम्मासमत्तं दत्वा एवं दिब्बसुखेन सुखितं दिस्वा। को पुञ्ञं न करिस्सतीति को नाम अत्तनो हितसुखं इच्छन्तो पुञ्ञं न करिस्सतीति। सेसं वुत्तनयमेव।
716. Tattha alomaṃ sukhitaṃ disvāti alomampi nāma sukkhakummāsamattaṃ datvā evaṃ dibbasukhena sukhitaṃ disvā. Ko puññaṃ na karissatīti ko nāma attano hitasukhaṃ icchanto puññaṃ na karissatīti. Sesaṃ vuttanayameva.
अलोमविमानवण्णना निट्ठिता।
Alomavimānavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / विमानवत्थुपाळि • Vimānavatthupāḷi / ४. अलोमविमानवत्थु • 4. Alomavimānavatthu
