| Library / Tipiṭaka / ತಿಪಿಟಕ • Tipiṭaka / ವಿಮಾನವತ್ಥು-ಅಟ್ಠಕಥಾ • Vimānavatthu-aṭṭhakathā |
೪. ಅಲೋಮವಿಮಾನವಣ್ಣನಾ
4. Alomavimānavaṇṇanā
ಅಭಿಕ್ಕನ್ತೇನ ವಣ್ಣೇನಾತಿ ಅಲೋಮವಿಮಾನಂ। ತಸ್ಸ ಕಾ ಉಪ್ಪತ್ತಿ? ಭಗವಾ ಬಾರಾಣಸಿಯಂ ಇಸಿಪತನೇ ಮಿಗದಾಯೇ ವಿಹರನ್ತೋ ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ಬಾರಾಣಸಿಂ ಪಿಣ್ಡಾಯ ಪಾವಿಸಿ । ತತ್ಥೇಕಾ ಅಲೋಮಾ ನಾಮ ದುಗ್ಗತಿತ್ಥೀ ಭಗವನ್ತಂ ದಿಸ್ವಾ ಪಸನ್ನಚಿತ್ತಾ ಅಞ್ಞಂ ದಾತಬ್ಬಂ ಅಪಸ್ಸನ್ತೀ ‘‘ಈದಿಸಮ್ಪಿ ಭಗವತೋ ದಿನ್ನಂ ಮಯ್ಹಂ ಮಹಪ್ಫಲಂ ಭವಿಸ್ಸತೀ’’ತಿ ಚಿನ್ತೇತ್ವಾ ಪರಿಭಿನ್ನವಣ್ಣಂ ಅಲೋಣಂ ಸುಕ್ಖಕುಮ್ಮಾಸಂ ಉಪನೇಸಿ, ಭಗವಾ ಪಟಿಗ್ಗಹೇಸಿ। ಸಾ ತಂ ದಾನಂ ಆರಮ್ಮಣಂ ಕತ್ವಾ ಸೋಮನಸ್ಸಂ ಪವೇದೇಸಿ, ಸಾ ಅಪರಭಾಗೇ ಕಾಲಂ ಕತ್ವಾ ತಾವತಿಂಸೇಸು ನಿಬ್ಬತ್ತಿ। ತಂ ಆಯಸ್ಮಾ ಮಹಾಮೋಗ್ಗಲ್ಲಾನೋ –
Abhikkantenavaṇṇenāti alomavimānaṃ. Tassa kā uppatti? Bhagavā bārāṇasiyaṃ isipatane migadāye viharanto pubbaṇhasamayaṃ nivāsetvā pattacīvaramādāya bārāṇasiṃ piṇḍāya pāvisi . Tatthekā alomā nāma duggatitthī bhagavantaṃ disvā pasannacittā aññaṃ dātabbaṃ apassantī ‘‘īdisampi bhagavato dinnaṃ mayhaṃ mahapphalaṃ bhavissatī’’ti cintetvā paribhinnavaṇṇaṃ aloṇaṃ sukkhakummāsaṃ upanesi, bhagavā paṭiggahesi. Sā taṃ dānaṃ ārammaṇaṃ katvā somanassaṃ pavedesi, sā aparabhāge kālaṃ katvā tāvatiṃsesu nibbatti. Taṃ āyasmā mahāmoggallāno –
೭೧೧.
711.
‘‘ಅಭಿಕ್ಕನ್ತೇನ ವಣ್ಣೇನ…ಪೇ॰… ವಣ್ಣೋ ಚ ತೇ ಸಬ್ಬದಿಸಾ ಪಭಾಸತೀ’’ತಿ॥ –
‘‘Abhikkantena vaṇṇena…pe… vaṇṇo ca te sabbadisā pabhāsatī’’ti. –
ಪುಚ್ಛಿ। ಸಾಪಿ ತಸ್ಸ ಬ್ಯಾಕಾಸಿ, ತಂ ದಸ್ಸೇತುಂ –
Pucchi. Sāpi tassa byākāsi, taṃ dassetuṃ –
೭೧೪.
714.
‘‘ಸಾ ದೇವತಾ ಅತ್ತಮನಾ…ಪೇ॰… ಯಸ್ಸ ಕಮ್ಮಸ್ಸಿದಂ ಫಲ’’ನ್ತಿ॥ – ವುತ್ತಂ।
‘‘Sā devatā attamanā…pe… yassa kammassidaṃ phala’’nti. – vuttaṃ;
೭೧೫.
715.
‘‘ಅಹಞ್ಚ ಬಾರಾಣಸಿಯಂ, ಬುದ್ಧಸ್ಸಾದಿಚ್ಚಬನ್ಧುನೋ।
‘‘Ahañca bārāṇasiyaṃ, buddhassādiccabandhuno;
ಅದಾಸಿಂ ಸುಕ್ಖಕುಮ್ಮಾಸಂ, ಪಸನ್ನಾ ಸೇಹಿ ಪಾಣಿಭಿ॥
Adāsiṃ sukkhakummāsaṃ, pasannā sehi pāṇibhi.
೭೧೬.
716.
‘‘ಸುಕ್ಖಾಯ ಅಲೋಣಿಕಾಯ ಚ, ಪಸ್ಸ ಫಲಂ ಕುಮ್ಮಾಸಪಿಣ್ಡಿಯಾ।
‘‘Sukkhāya aloṇikāya ca, passa phalaṃ kummāsapiṇḍiyā;
ಅಲೋಮಂ ಸುಖಿತಂ ದಿಸ್ವಾ, ಕೋ ಪುಞ್ಞಂ ನ ಕರಿಸ್ಸತಿ॥
Alomaṃ sukhitaṃ disvā, ko puññaṃ na karissati.
೭೧೭.
717.
‘‘ತೇನ ಮೇತಾದಿಸೋ ವಣ್ಣೋ…ಪೇ॰… ವಣ್ಣೋ ಚ ಮೇ ಸಬ್ಬದಿಸಾ ಪಭಾಸತೀ’’ತಿ॥
‘‘Tena metādiso vaṇṇo…pe… vaṇṇo ca me sabbadisā pabhāsatī’’ti.
೭೧೬. ತತ್ಥ ಅಲೋಮಂ ಸುಖಿತಂ ದಿಸ್ವಾತಿ ಅಲೋಮಮ್ಪಿ ನಾಮ ಸುಕ್ಖಕುಮ್ಮಾಸಮತ್ತಂ ದತ್ವಾ ಏವಂ ದಿಬ್ಬಸುಖೇನ ಸುಖಿತಂ ದಿಸ್ವಾ। ಕೋ ಪುಞ್ಞಂ ನ ಕರಿಸ್ಸತೀತಿ ಕೋ ನಾಮ ಅತ್ತನೋ ಹಿತಸುಖಂ ಇಚ್ಛನ್ತೋ ಪುಞ್ಞಂ ನ ಕರಿಸ್ಸತೀತಿ। ಸೇಸಂ ವುತ್ತನಯಮೇವ।
716. Tattha alomaṃ sukhitaṃ disvāti alomampi nāma sukkhakummāsamattaṃ datvā evaṃ dibbasukhena sukhitaṃ disvā. Ko puññaṃ na karissatīti ko nāma attano hitasukhaṃ icchanto puññaṃ na karissatīti. Sesaṃ vuttanayameva.
ಅಲೋಮವಿಮಾನವಣ್ಣನಾ ನಿಟ್ಠಿತಾ।
Alomavimānavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ವಿಮಾನವತ್ಥುಪಾಳಿ • Vimānavatthupāḷi / ೪. ಅಲೋಮವಿಮಾನವತ್ಥು • 4. Alomavimānavatthu
