| Library / Tipiṭaka / तिपिटक • Tipiṭaka / सुत्तनिपातपाळि • Suttanipātapāḷi |
२. आमगन्धसुत्तं
2. Āmagandhasuttaṃ
२४२.
242.
‘‘सामाकचिङ्गूलकचीनकानि च, पत्तप्फलं मूलफलं गविप्फलं।
‘‘Sāmākaciṅgūlakacīnakāni ca, pattapphalaṃ mūlaphalaṃ gavipphalaṃ;
धम्मेन लद्धं सतमस्नमाना 1, न कामकामा अलिकं भणन्ति॥
Dhammena laddhaṃ satamasnamānā 2, na kāmakāmā alikaṃ bhaṇanti.
२४३.
243.
‘‘यदस्नमानो सुकतं सुनिट्ठितं, परेहि दिन्नं पयतं पणीतं।
‘‘Yadasnamāno sukataṃ suniṭṭhitaṃ, parehi dinnaṃ payataṃ paṇītaṃ;
सालीनमन्नं परिभुञ्जमानो, सो भुञ्जसी कस्सप आमगन्धं॥
Sālīnamannaṃ paribhuñjamāno, so bhuñjasī kassapa āmagandhaṃ.
२४४.
244.
‘‘न आमगन्धो मम कप्पतीति, इच्चेव त्वं भाससि ब्रह्मबन्धु।
‘‘Na āmagandho mama kappatīti, icceva tvaṃ bhāsasi brahmabandhu;
सालीनमन्नं परिभुञ्जमानो, सकुन्तमंसेहि सुसङ्खतेहि।
Sālīnamannaṃ paribhuñjamāno, sakuntamaṃsehi susaṅkhatehi;
पुच्छामि तं कस्सप एतमत्थं, कथं पकारो तव आमगन्धो’’॥
Pucchāmi taṃ kassapa etamatthaṃ, kathaṃ pakāro tava āmagandho’’.
२४५.
245.
‘‘पाणातिपातो वधछेदबन्धनं, थेय्यं मुसावादो निकतिवञ्चनानि च।
‘‘Pāṇātipāto vadhachedabandhanaṃ, theyyaṃ musāvādo nikativañcanāni ca;
अज्झेनकुत्तं 3 परदारसेवना, एसामगन्धो न हि मंसभोजनं॥
Ajjhenakuttaṃ 4 paradārasevanā, esāmagandho na hi maṃsabhojanaṃ.
२४६.
246.
‘‘ये इध कामेसु असञ्ञता जना, रसेसु गिद्धा असुचिभावमस्सिता 5।
‘‘Ye idha kāmesu asaññatā janā, rasesu giddhā asucibhāvamassitā 6;
नत्थिकदिट्ठी विसमा दुरन्नया, एसामगन्धो न हि मंसभोजनं॥
Natthikadiṭṭhī visamā durannayā, esāmagandho na hi maṃsabhojanaṃ.
२४७.
247.
‘‘ये लूखसा दारुणा पिट्ठिमंसिका 7, मित्तद्दुनो निक्करुणातिमानिनो।
‘‘Ye lūkhasā dāruṇā piṭṭhimaṃsikā 8, mittadduno nikkaruṇātimānino;
अदानसीला न च देन्ति कस्सचि, एसामगन्धो न हि मंसभोजनं॥
Adānasīlā na ca denti kassaci, esāmagandho na hi maṃsabhojanaṃ.
२४८.
248.
‘‘कोधो मदो थम्भो पच्चुपट्ठापना 9, माया उसूया भस्ससमुस्सयो च।
‘‘Kodho mado thambho paccupaṭṭhāpanā 10, māyā usūyā bhassasamussayo ca;
मानातिमानो च असब्भि सन्थवो, एसामगन्धो न हि मंसभोजनं॥
Mānātimāno ca asabbhi santhavo, esāmagandho na hi maṃsabhojanaṃ.
२४९.
249.
‘‘ये पापसीला इणघातसूचका, वोहारकूटा इध पाटिरूपिका 11।
‘‘Ye pāpasīlā iṇaghātasūcakā, vohārakūṭā idha pāṭirūpikā 12;
नराधमा येध करोन्ति किब्बिसं, एसामगन्धो न हि मंसभोजनं॥
Narādhamā yedha karonti kibbisaṃ, esāmagandho na hi maṃsabhojanaṃ.
२५०.
250.
‘‘ये इध पाणेसु असञ्ञता जना, परेसमादाय विहेसमुय्युता।
‘‘Ye idha pāṇesu asaññatā janā, paresamādāya vihesamuyyutā;
दुस्सीललुद्दा फरुसा अनादरा, एसामगन्धो न हि मंसभोजनं॥
Dussīlaluddā pharusā anādarā, esāmagandho na hi maṃsabhojanaṃ.
२५१.
251.
‘‘एतेसु गिद्धा विरुद्धातिपातिनो, निच्चुय्युता पेच्च तमं वजन्ति ये।
‘‘Etesu giddhā viruddhātipātino, niccuyyutā pecca tamaṃ vajanti ye;
पतन्ति सत्ता निरयं अवंसिरा, एसामगन्धो न हि मंसभोजनं॥
Patanti sattā nirayaṃ avaṃsirā, esāmagandho na hi maṃsabhojanaṃ.
२५२.
252.
‘‘न मच्छमंसानमनासकत्तं 13, न नग्गियं न मुण्डियं जटाजल्लं।
‘‘Na macchamaṃsānamanāsakattaṃ 14, na naggiyaṃ na muṇḍiyaṃ jaṭājallaṃ;
खराजिनानि नाग्गिहुत्तस्सुपसेवना, ये वापि लोके अमरा बहू तपा।
Kharājināni nāggihuttassupasevanā, ye vāpi loke amarā bahū tapā;
मन्ताहुती यञ्ञमुतूपसेवना, सोधेन्ति मच्चं अवितिण्णकङ्खं॥
Mantāhutī yaññamutūpasevanā, sodhenti maccaṃ avitiṇṇakaṅkhaṃ.
२५३.
253.
‘‘यो तेसु 15 गुत्तो विदितिन्द्रियो चरे, धम्मे ठितो अज्जवमद्दवे रतो।
‘‘Yo tesu 16 gutto viditindriyo care, dhamme ṭhito ajjavamaddave rato;
सङ्गातिगो सब्बदुक्खप्पहीनो, न लिप्पति 17 दिट्ठसुतेसु धीरो’’॥
Saṅgātigo sabbadukkhappahīno, na lippati 18 diṭṭhasutesu dhīro’’.
२५४.
254.
इच्चेतमत्थं भगवा पुनप्पुनं, अक्खासि नं 19 वेदयि मन्तपारगू।
Iccetamatthaṃ bhagavā punappunaṃ, akkhāsi naṃ 20 vedayi mantapāragū;
चित्राहि गाथाहि मुनी पकासयि, निरामगन्धो असितो दुरन्नयो॥
Citrāhi gāthāhi munī pakāsayi, nirāmagandho asito durannayo.
२५५.
255.
सुत्वान बुद्धस्स सुभासितं पदं, निरामगन्धं सब्बदुक्खप्पनूदनं।
Sutvāna buddhassa subhāsitaṃ padaṃ, nirāmagandhaṃ sabbadukkhappanūdanaṃ;
नीचमनो वन्दि तथागतस्स, तत्थेव पब्बज्जमरोचयित्थाति॥
Nīcamano vandi tathāgatassa, tattheva pabbajjamarocayitthāti.
आमगन्धसुत्तं दुतियं निट्ठितं।
Āmagandhasuttaṃ dutiyaṃ niṭṭhitaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / सुत्तनिपात-अट्ठकथा • Suttanipāta-aṭṭhakathā / २. आमगन्धसुत्तवण्णना • 2. Āmagandhasuttavaṇṇanā
