| Library / Tipiṭaka / තිපිටක • Tipiṭaka / සුත්‌තනිපාතපාළි • Suttanipātapāḷi |
2. ආමගන්‌ධසුත්‌තං
2. Āmagandhasuttaṃ
242.
242.
‘‘සාමාකචිඞ්‌ගූලකචීනකානි ච, පත්‌තප්‌ඵලං මූලඵලං ගවිප්‌ඵලං;
‘‘Sāmākaciṅgūlakacīnakāni ca, pattapphalaṃ mūlaphalaṃ gavipphalaṃ;
ධම්‌මෙන ලද්‌ධං සතමස්‌නමානා 1, න කාමකාමා අලිකං භණන්‌ති.
Dhammena laddhaṃ satamasnamānā 2, na kāmakāmā alikaṃ bhaṇanti.
243.
243.
‘‘යදස්‌නමානො සුකතං සුනිට්‌ඨිතං, පරෙහි දින්‌නං පයතං පණීතං;
‘‘Yadasnamāno sukataṃ suniṭṭhitaṃ, parehi dinnaṃ payataṃ paṇītaṃ;
සාලීනමන්‌නං පරිභුඤ්‌ජමානො, සො භුඤ්‌ජසී කස්‌සප ආමගන්‌ධං.
Sālīnamannaṃ paribhuñjamāno, so bhuñjasī kassapa āmagandhaṃ.
244.
244.
‘‘න ආමගන්‌ධො මම කප්‌පතීති, ඉච්‌චෙව ත්‌වං භාසසි බ්‍රහ්‌මබන්‌ධු;
‘‘Na āmagandho mama kappatīti, icceva tvaṃ bhāsasi brahmabandhu;
සාලීනමන්‌නං පරිභුඤ්‌ජමානො, සකුන්‌තමංසෙහි සුසඞ්‌ඛතෙහි;
Sālīnamannaṃ paribhuñjamāno, sakuntamaṃsehi susaṅkhatehi;
පුච්‌ඡාමි තං කස්‌සප එතමත්‌ථං, කථං පකාරො තව ආමගන්‌ධො’’.
Pucchāmi taṃ kassapa etamatthaṃ, kathaṃ pakāro tava āmagandho’’.
245.
245.
‘‘පාණාතිපාතො වධඡෙදබන්‌ධනං, ථෙය්‍යං මුසාවාදො නිකතිවඤ්‌චනානි ච;
‘‘Pāṇātipāto vadhachedabandhanaṃ, theyyaṃ musāvādo nikativañcanāni ca;
අජ්‌ඣෙනකුත්‌තං 3 පරදාරසෙවනා, එසාමගන්‌ධො න හි මංසභොජනං.
Ajjhenakuttaṃ 4 paradārasevanā, esāmagandho na hi maṃsabhojanaṃ.
246.
246.
‘‘යෙ ඉධ කාමෙසු අසඤ්‌ඤතා ජනා, රසෙසු ගිද්‌ධා අසුචිභාවමස්‌සිතා 5;
‘‘Ye idha kāmesu asaññatā janā, rasesu giddhā asucibhāvamassitā 6;
නත්‌ථිකදිට්‌ඨී විසමා දුරන්‌නයා, එසාමගන්‌ධො න හි මංසභොජනං.
Natthikadiṭṭhī visamā durannayā, esāmagandho na hi maṃsabhojanaṃ.
247.
247.
‘‘යෙ ලූඛසා දාරුණා පිට්‌ඨිමංසිකා 7, මිත්‌තද්‌දුනො නික්‌කරුණාතිමානිනො;
‘‘Ye lūkhasā dāruṇā piṭṭhimaṃsikā 8, mittadduno nikkaruṇātimānino;
අදානසීලා න ච දෙන්‌ති කස්‌සචි, එසාමගන්‌ධො න හි මංසභොජනං.
Adānasīlā na ca denti kassaci, esāmagandho na hi maṃsabhojanaṃ.
248.
248.
‘‘කොධො මදො ථම්‌භො පච්‌චුපට්‌ඨාපනා 9, මායා උසූයා භස්‌සසමුස්‌සයො ච;
‘‘Kodho mado thambho paccupaṭṭhāpanā 10, māyā usūyā bhassasamussayo ca;
මානාතිමානො ච අසබ්‌භි සන්‌ථවො, එසාමගන්‌ධො න හි මංසභොජනං.
Mānātimāno ca asabbhi santhavo, esāmagandho na hi maṃsabhojanaṃ.
249.
249.
‘‘යෙ පාපසීලා ඉණඝාතසූචකා, වොහාරකූටා ඉධ පාටිරූපිකා 11;
‘‘Ye pāpasīlā iṇaghātasūcakā, vohārakūṭā idha pāṭirūpikā 12;
නරාධමා යෙධ කරොන්‌ති කිබ්‌බිසං, එසාමගන්‌ධො න හි මංසභොජනං.
Narādhamā yedha karonti kibbisaṃ, esāmagandho na hi maṃsabhojanaṃ.
250.
250.
‘‘යෙ ඉධ පාණෙසු අසඤ්‌ඤතා ජනා, පරෙසමාදාය විහෙසමුය්‍යුතා;
‘‘Ye idha pāṇesu asaññatā janā, paresamādāya vihesamuyyutā;
දුස්‌සීලලුද්‌දා ඵරුසා අනාදරා, එසාමගන්‌ධො න හි මංසභොජනං.
Dussīlaluddā pharusā anādarā, esāmagandho na hi maṃsabhojanaṃ.
251.
251.
‘‘එතෙසු ගිද්‌ධා විරුද්‌ධාතිපාතිනො, නිච්‌චුය්‍යුතා පෙච්‌ච තමං වජන්‌ති යෙ;
‘‘Etesu giddhā viruddhātipātino, niccuyyutā pecca tamaṃ vajanti ye;
පතන්‌ති සත්‌තා නිරයං අවංසිරා, එසාමගන්‌ධො න හි මංසභොජනං.
Patanti sattā nirayaṃ avaṃsirā, esāmagandho na hi maṃsabhojanaṃ.
252.
252.
‘‘න මච්‌ඡමංසානමනාසකත්‌තං 13, න නග්‌ගියං න මුණ්‌ඩියං ජටාජල්‌ලං;
‘‘Na macchamaṃsānamanāsakattaṃ 14, na naggiyaṃ na muṇḍiyaṃ jaṭājallaṃ;
ඛරාජිනානි නාග්‌ගිහුත්‌තස්‌සුපසෙවනා, යෙ වාපි ලොකෙ අමරා බහූ තපා;
Kharājināni nāggihuttassupasevanā, ye vāpi loke amarā bahū tapā;
මන්‌තාහුතී යඤ්‌ඤමුතූපසෙවනා, සොධෙන්‌ති මච්‌චං අවිතිණ්‌ණකඞ්‌ඛං.
Mantāhutī yaññamutūpasevanā, sodhenti maccaṃ avitiṇṇakaṅkhaṃ.
253.
253.
‘‘යො තෙසු 15 ගුත්‌තො විදිතින්‌ද්‍රියො චරෙ, ධම්‌මෙ ඨිතො අජ්‌ජවමද්‌දවෙ රතො;
‘‘Yo tesu 16 gutto viditindriyo care, dhamme ṭhito ajjavamaddave rato;
සඞ්‌ගාතිගො සබ්‌බදුක්‌ඛප්‌පහීනො, න ලිප්‌පති 17 දිට්‌ඨසුතෙසු ධීරො’’.
Saṅgātigo sabbadukkhappahīno, na lippati 18 diṭṭhasutesu dhīro’’.
254.
254.
ඉච්‌චෙතමත්‌ථං භගවා පුනප්‌පුනං, අක්‌ඛාසි නං 19 වෙදයි මන්‌තපාරගූ;
Iccetamatthaṃ bhagavā punappunaṃ, akkhāsi naṃ 20 vedayi mantapāragū;
චිත්‍රාහි ගාථාහි මුනී පකාසයි, නිරාමගන්‌ධො අසිතො දුරන්‌නයො.
Citrāhi gāthāhi munī pakāsayi, nirāmagandho asito durannayo.
255.
255.
සුත්‌වාන බුද්‌ධස්‌ස සුභාසිතං පදං, නිරාමගන්‌ධං සබ්‌බදුක්‌ඛප්‌පනූදනං;
Sutvāna buddhassa subhāsitaṃ padaṃ, nirāmagandhaṃ sabbadukkhappanūdanaṃ;
නීචමනො වන්‌දි තථාගතස්‌ස, තත්‌ථෙව පබ්‌බජ්‌ජමරොචයිත්‌ථාති.
Nīcamano vandi tathāgatassa, tattheva pabbajjamarocayitthāti.
ආමගන්‌ධසුත්‌තං දුතියං නිට්‌ඨිතං.
Āmagandhasuttaṃ dutiyaṃ niṭṭhitaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / සුත්‌තනිපාත-අට්‌ඨකථා • Suttanipāta-aṭṭhakathā / 2. ආමගන්‌ධසුත්‌තවණ්‌ණනා • 2. Āmagandhasuttavaṇṇanā
