| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၈. အမရာဒေဝီပဉ္ဟော
8. Amarādevīpañho
၈. ‘‘ဘန္တေ နာဂသေန, ဘာသိတမ္ပေတံ ဘဂဝတာ –
8. ‘‘Bhante nāgasena, bhāsitampetaṃ bhagavatā –
‘‘‘သစေ လဘေထ ခဏံ ဝာ ရဟော ဝာ၊ နိမန္တကံ 1 ဝာပိ လဘေထ တာဒိသံ။
‘‘‘Sace labhetha khaṇaṃ vā raho vā, nimantakaṃ 2 vāpi labhetha tādisaṃ;
‘‘ပုန စ ကထီယတိ ‘မဟောသဓသ္သ ဘရိယာ အမရာ နာမ ဣတ္ထီ ဂာမကေ ဌပိတာ ပဝုတ္ထပတိကာ ရဟော နိသိန္နာ ဝိဝိတ္တာ ရာဇပ္ပဋိသမံ သာမိကံ ကရိတ္ဝာ သဟသ္သေန နိမန္တီယမာနာ ပာပံ နာကာသီ’တိ။ ယဒိ, ဘန္တေ နာဂသေန, ဘဂဝတာ ဘဏိတံ ‘သစေ။ပေ.။ သဒ္ဓိ’န္တိ တေန ဟိ ‘မဟောသဓသ္သ ဘရိယာ။ပေ.။ နာကာသီ’တိ ယံ ဝစနံ, တံ မိစ္ဆာ။ ယဒိ မဟောသဓသ္သ ဘရိယာ။ပေ.။ နာကာသိ, တေန ဟိ ‘သစေ။ပေ.။ သဒ္ဓိ’န္တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝာနုပ္ပတ္တော, သော တယာ နိဗ္ဗာဟိတဗ္ဗော’’တိ။
‘‘Puna ca kathīyati ‘mahosadhassa bhariyā amarā nāma itthī gāmake ṭhapitā pavutthapatikā raho nisinnā vivittā rājappaṭisamaṃ sāmikaṃ karitvā sahassena nimantīyamānā pāpaṃ nākāsī’ti. Yadi, bhante nāgasena, bhagavatā bhaṇitaṃ ‘sace…pe… saddhi’nti tena hi ‘mahosadhassa bhariyā…pe… nākāsī’ti yaṃ vacanaṃ, taṃ micchā. Yadi mahosadhassa bhariyā…pe… nākāsi, tena hi ‘sace…pe… saddhi’nti tampi vacanaṃ micchā. Ayampi ubhato koṭiko pañho tavānuppatto, so tayā nibbāhitabbo’’ti.
‘‘ဘာသိတမ္ပေတံ, မဟာရာဇ, ဘဂဝတာ ‘သစေ။ပေ.။ သဒ္ဓိ’န္တိ။ ကထီယတိ စ ‘မဟောသဓသ္သ ဘရိယာ ။ပေ.။ နာကာသီ’တိ။ ကရေယ္ယ သာ, မဟာရာဇ, ဣတ္ထီ သဟသ္သံ လဘမာနာ တာဒိသေန ပုရိသေန သဒ္ဓိံ ပာပကမ္မံ, န သာ ကရေယ္ယ သစေ ခဏံ ဝာ ရဟော ဝာ နိမန္တကံ ဝာပိ တာဒိသံ လဘေယ္ယ, ဝိစိနန္တီ သာ, မဟာရာဇ, အမရာ ဣတ္ထီ န အဒ္ဒသ ခဏံ ဝာ ရဟော ဝာ နိမန္တကံ ဝာပိ တာဒိသံ။
‘‘Bhāsitampetaṃ, mahārāja, bhagavatā ‘sace…pe… saddhi’nti. Kathīyati ca ‘mahosadhassa bhariyā …pe… nākāsī’ti. Kareyya sā, mahārāja, itthī sahassaṃ labhamānā tādisena purisena saddhiṃ pāpakammaṃ, na sā kareyya sace khaṇaṃ vā raho vā nimantakaṃ vāpi tādisaṃ labheyya, vicinantī sā, mahārāja, amarā itthī na addasa khaṇaṃ vā raho vā nimantakaṃ vāpi tādisaṃ.
‘‘ဣဓ လောကေ ဂရဟဘယာ ခဏံ န ပသ္သိ, ပရလောကေ နိရယဘယာ ခဏံ န ပသ္သိ, ကဋုကဝိပာကံ ပာပန္တိ ခဏံ န ပသ္သိ, ပိယံ အမုဉ္စိတုကာမာ ခဏံ န ပသ္သိ, သာမိကသ္သ ဂရုကတာယ ခဏံ န ပသ္သိ, ဓမ္မံ အပစာယန္တီ ခဏံ န ပသ္သိ, အနရိယံ ဂရဟန္တီ ခဏံ န ပသ္သိ, ကိရိယံ အဘိန္ဒိတုကာမာ ခဏံ န ပသ္သိ။ ဧဝရူပေဟိ ဗဟူဟိ ကာရဏေဟိ ခဏံ န ပသ္သိ။
‘‘Idha loke garahabhayā khaṇaṃ na passi, paraloke nirayabhayā khaṇaṃ na passi, kaṭukavipākaṃ pāpanti khaṇaṃ na passi, piyaṃ amuñcitukāmā khaṇaṃ na passi, sāmikassa garukatāya khaṇaṃ na passi, dhammaṃ apacāyantī khaṇaṃ na passi, anariyaṃ garahantī khaṇaṃ na passi, kiriyaṃ abhinditukāmā khaṇaṃ na passi. Evarūpehi bahūhi kāraṇehi khaṇaṃ na passi.
‘‘ရဟောပိ သာ လောကေ ဝိစိနိတ္ဝာ အပသ္သန္တီ ပာပံ နာကာသိ။ သစေ သာ မနုသ္သေဟိ ရဟော လဘေယ္ယ, အထ အမနုသ္သေဟိ ရဟော န လဘေယ္ယ။ သစေ အမနုသ္သေဟိ ရဟော လဘေယ္ယ, အထ ပရစိတ္တဝိဒူဟိ ပဗ္ဗဇိတေဟိ ရဟော န လဘေယ္ယ။ သစေ ပရစိတ္တဝိဒူဟိ ပဗ္ဗဇိတေဟိ ရဟော လဘေယ္ယ, အထ ပရစိတ္တဝိဒူနီဟိ ဒေဝတာဟိ ရဟော န လဘေယ္ယ။ သစေ ပရစိတ္တဝိဒူနီဟိ ဒေဝတာဟိ ရဟော လဘေယ္ယ, အတ္တနာဝ ပာပေဟိ ရဟော န လဘေယ္ယ။ သစေ အတ္တနာဝ ပာပေဟိ ရဟော လဘေယ္ယ, အထ အဓမ္မေန ရဟော န လဘေယ္ယ။ ဧဝရူပေဟိ ဗဟုဝိဓေဟိ ကာရဏေဟိ ရဟော အလဘိတ္ဝာ ပာပံ နာကာသိ။
‘‘Rahopi sā loke vicinitvā apassantī pāpaṃ nākāsi. Sace sā manussehi raho labheyya, atha amanussehi raho na labheyya. Sace amanussehi raho labheyya, atha paracittavidūhi pabbajitehi raho na labheyya. Sace paracittavidūhi pabbajitehi raho labheyya, atha paracittavidūnīhi devatāhi raho na labheyya. Sace paracittavidūnīhi devatāhi raho labheyya, attanāva pāpehi raho na labheyya. Sace attanāva pāpehi raho labheyya, atha adhammena raho na labheyya. Evarūpehi bahuvidhehi kāraṇehi raho alabhitvā pāpaṃ nākāsi.
‘‘နိမန္တကမ္ပိ သာ လောကေ ဝိစိနိတ္ဝာ တာဒိသံ အလဘန္တီ ပာပံ နာကာသိ။ မဟောသဓော, မဟာရာဇ, ပဏ္ဍိတော အဋ္ဌဝီသတိယာ အင္ဂေဟိ သမန္နာဂတော။ ကတမေဟိ အဋ္ဌဝီသတိယာ အင္ဂေဟိ သမန္နာဂတော? မဟောသဓော, မဟာရာဇ, သူရော ဟိရိမာ ဩတ္တပ္ပီ သပက္ခော မိတ္တသမ္ပန္နော ခမော သီလဝာ သစ္စဝာဒီ သောစေယ္ယသမ္ပန္နော အက္ကောဓနော အနတိမာနီ အနုသူယကော ဝီရိယဝာ အာယူဟကော သင္ဂာဟကော သံဝိဘာဂီ သခိလော နိဝာတဝုတ္တိ သဏ္ဟော အသဌော အမာယာဝီ အတိဗုဒ္ဓိသမ္ပန္နော ကိတ္တိမာ ဝိဇ္ဇာသမ္ပန္နော ဟိတေသီ ဥပနိသ္သိတာနံ ပတ္ထိတော သဗ္ဗဇနသ္သ ဓနဝာ ယသဝာ။ မဟောသဓော, မဟာရာဇ, ပဏ္ဍိတော ဣမေဟိ အဋ္ဌဝီသတိယာ အင္ဂေဟိ သမန္နာဂတော။ သာ အညံ တာဒိသံ နိမန္တကံ အလဘိတ္ဝာ ပာပံ နာကာသီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။
‘‘Nimantakampi sā loke vicinitvā tādisaṃ alabhantī pāpaṃ nākāsi. Mahosadho, mahārāja, paṇḍito aṭṭhavīsatiyā aṅgehi samannāgato. Katamehi aṭṭhavīsatiyā aṅgehi samannāgato? Mahosadho, mahārāja, sūro hirimā ottappī sapakkho mittasampanno khamo sīlavā saccavādī soceyyasampanno akkodhano anatimānī anusūyako vīriyavā āyūhako saṅgāhako saṃvibhāgī sakhilo nivātavutti saṇho asaṭho amāyāvī atibuddhisampanno kittimā vijjāsampanno hitesī upanissitānaṃ patthito sabbajanassa dhanavā yasavā. Mahosadho, mahārāja, paṇḍito imehi aṭṭhavīsatiyā aṅgehi samannāgato. Sā aññaṃ tādisaṃ nimantakaṃ alabhitvā pāpaṃ nākāsī’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
အမရာဒေဝီပဉ္ဟော အဋ္ဌမော။
Amarādevīpañho aṭṭhamo.
Footnotes:
