| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
8. අමරාදෙවීපඤ්‌හො
8. Amarādevīpañho
8. ‘‘භන්‌තෙ නාගසෙන, භාසිතම්‌පෙතං භගවතා –
8. ‘‘Bhante nāgasena, bhāsitampetaṃ bhagavatā –
‘‘‘සචෙ ලභෙථ ඛණං වා රහො වා, නිමන්‌තකං 1 වාපි ලභෙථ තාදිසං;
‘‘‘Sace labhetha khaṇaṃ vā raho vā, nimantakaṃ 2 vāpi labhetha tādisaṃ;
‘‘පුන ච කථීයති ‘මහොසධස්‌ස භරියා අමරා නාම ඉත්‌ථී ගාමකෙ ඨපිතා පවුත්‌ථපතිකා රහො නිසින්‌නා විවිත්‌තා රාජප්‌පටිසමං සාමිකං කරිත්‌වා සහස්‌සෙන නිමන්‌තීයමානා පාපං නාකාසී’ති. යදි, භන්‌තෙ නාගසෙන, භගවතා භණිතං ‘සචෙ…පෙ.… සද්‌ධි’න්‌ති තෙන හි ‘මහොසධස්‌ස භරියා…පෙ.… නාකාසී’ති යං වචනං, තං මිච්‌ඡා. යදි මහොසධස්‌ස භරියා…පෙ.… නාකාසි, තෙන හි ‘සචෙ…පෙ.… සද්‌ධි’න්‌ති තම්‌පි වචනං මිච්‌ඡා. අයම්‌පි උභතො කොටිකො පඤ්‌හො තවානුප්‌පත්‌තො, සො තයා නිබ්‌බාහිතබ්‌බො’’ති.
‘‘Puna ca kathīyati ‘mahosadhassa bhariyā amarā nāma itthī gāmake ṭhapitā pavutthapatikā raho nisinnā vivittā rājappaṭisamaṃ sāmikaṃ karitvā sahassena nimantīyamānā pāpaṃ nākāsī’ti. Yadi, bhante nāgasena, bhagavatā bhaṇitaṃ ‘sace…pe… saddhi’nti tena hi ‘mahosadhassa bhariyā…pe… nākāsī’ti yaṃ vacanaṃ, taṃ micchā. Yadi mahosadhassa bhariyā…pe… nākāsi, tena hi ‘sace…pe… saddhi’nti tampi vacanaṃ micchā. Ayampi ubhato koṭiko pañho tavānuppatto, so tayā nibbāhitabbo’’ti.
‘‘භාසිතම්‌පෙතං, මහාරාජ, භගවතා ‘සචෙ…පෙ.… සද්‌ධි’න්‌ති. කථීයති ච ‘මහොසධස්‌ස භරියා …පෙ.… නාකාසී’ති. කරෙය්‍ය සා, මහාරාජ, ඉත්‌ථී සහස්‌සං ලභමානා තාදිසෙන පුරිසෙන සද්‌ධිං පාපකම්‌මං, න සා කරෙය්‍ය සචෙ ඛණං වා රහො වා නිමන්‌තකං වාපි තාදිසං ලභෙය්‍ය, විචිනන්‌තී සා, මහාරාජ, අමරා ඉත්‌ථී න අද්‌දස ඛණං වා රහො වා නිමන්‌තකං වාපි තාදිසං.
‘‘Bhāsitampetaṃ, mahārāja, bhagavatā ‘sace…pe… saddhi’nti. Kathīyati ca ‘mahosadhassa bhariyā …pe… nākāsī’ti. Kareyya sā, mahārāja, itthī sahassaṃ labhamānā tādisena purisena saddhiṃ pāpakammaṃ, na sā kareyya sace khaṇaṃ vā raho vā nimantakaṃ vāpi tādisaṃ labheyya, vicinantī sā, mahārāja, amarā itthī na addasa khaṇaṃ vā raho vā nimantakaṃ vāpi tādisaṃ.
‘‘ඉධ ලොකෙ ගරහභයා ඛණං න පස්‌සි, පරලොකෙ නිරයභයා ඛණං න පස්‌සි, කටුකවිපාකං පාපන්‌ති ඛණං න පස්‌සි, පියං අමුඤ්‌චිතුකාමා ඛණං න පස්‌සි, සාමිකස්‌ස ගරුකතාය ඛණං න පස්‌සි, ධම්‌මං අපචායන්‌තී ඛණං න පස්‌සි, අනරියං ගරහන්‌තී ඛණං න පස්‌සි, කිරියං අභින්‌දිතුකාමා ඛණං න පස්‌සි. එවරූපෙහි බහූහි කාරණෙහි ඛණං න පස්‌සි.
‘‘Idha loke garahabhayā khaṇaṃ na passi, paraloke nirayabhayā khaṇaṃ na passi, kaṭukavipākaṃ pāpanti khaṇaṃ na passi, piyaṃ amuñcitukāmā khaṇaṃ na passi, sāmikassa garukatāya khaṇaṃ na passi, dhammaṃ apacāyantī khaṇaṃ na passi, anariyaṃ garahantī khaṇaṃ na passi, kiriyaṃ abhinditukāmā khaṇaṃ na passi. Evarūpehi bahūhi kāraṇehi khaṇaṃ na passi.
‘‘රහොපි සා ලොකෙ විචිනිත්‌වා අපස්‌සන්‌තී පාපං නාකාසි. සචෙ සා මනුස්‌සෙහි රහො ලභෙය්‍ය, අථ අමනුස්‌සෙහි රහො න ලභෙය්‍ය. සචෙ අමනුස්‌සෙහි රහො ලභෙය්‍ය, අථ පරචිත්‌තවිදූහි පබ්‌බජිතෙහි රහො න ලභෙය්‍ය. සචෙ පරචිත්‌තවිදූහි පබ්‌බජිතෙහි රහො ලභෙය්‍ය, අථ පරචිත්‌තවිදූනීහි දෙවතාහි රහො න ලභෙය්‍ය. සචෙ පරචිත්‌තවිදූනීහි දෙවතාහි රහො ලභෙය්‍ය, අත්‌තනාව පාපෙහි රහො න ලභෙය්‍ය. සචෙ අත්‌තනාව පාපෙහි රහො ලභෙය්‍ය, අථ අධම්‌මෙන රහො න ලභෙය්‍ය. එවරූපෙහි බහුවිධෙහි කාරණෙහි රහො අලභිත්‌වා පාපං නාකාසි.
‘‘Rahopi sā loke vicinitvā apassantī pāpaṃ nākāsi. Sace sā manussehi raho labheyya, atha amanussehi raho na labheyya. Sace amanussehi raho labheyya, atha paracittavidūhi pabbajitehi raho na labheyya. Sace paracittavidūhi pabbajitehi raho labheyya, atha paracittavidūnīhi devatāhi raho na labheyya. Sace paracittavidūnīhi devatāhi raho labheyya, attanāva pāpehi raho na labheyya. Sace attanāva pāpehi raho labheyya, atha adhammena raho na labheyya. Evarūpehi bahuvidhehi kāraṇehi raho alabhitvā pāpaṃ nākāsi.
‘‘නිමන්‌තකම්‌පි සා ලොකෙ විචිනිත්‌වා තාදිසං අලභන්‌තී පාපං නාකාසි. මහොසධො, මහාරාජ, පණ්‌ඩිතො අට්‌ඨවීසතියා අඞ්‌ගෙහි සමන්‌නාගතො. කතමෙහි අට්‌ඨවීසතියා අඞ්‌ගෙහි සමන්‌නාගතො? මහොසධො, මහාරාජ, සූරො හිරිමා ඔත්‌තප්‌පී සපක්‌ඛො මිත්‌තසම්‌පන්‌නො ඛමො සීලවා සච්‌චවාදී සොචෙය්‍යසම්‌පන්‌නො අක්‌කොධනො අනතිමානී අනුසූයකො වීරියවා ආයූහකො සඞ්‌ගාහකො සංවිභාගී සඛිලො නිවාතවුත්‌ති සණ්‌හො අසඨො අමායාවී අතිබුද්‌ධිසම්‌පන්‌නො කිත්‌තිමා විජ්‌ජාසම්‌පන්‌නො හිතෙසී උපනිස්‌සිතානං පත්‌ථිතො සබ්‌බජනස්‌ස ධනවා යසවා. මහොසධො, මහාරාජ, පණ්‌ඩිතො ඉමෙහි අට්‌ඨවීසතියා අඞ්‌ගෙහි සමන්‌නාගතො. සා අඤ්‌ඤං තාදිසං නිමන්‌තකං අලභිත්‌වා පාපං නාකාසී’’ති. ‘‘සාධු, භන්‌තෙ නාගසෙන, එවමෙතං තථා සම්‌පටිච්‌ඡාමී’’ති.
‘‘Nimantakampi sā loke vicinitvā tādisaṃ alabhantī pāpaṃ nākāsi. Mahosadho, mahārāja, paṇḍito aṭṭhavīsatiyā aṅgehi samannāgato. Katamehi aṭṭhavīsatiyā aṅgehi samannāgato? Mahosadho, mahārāja, sūro hirimā ottappī sapakkho mittasampanno khamo sīlavā saccavādī soceyyasampanno akkodhano anatimānī anusūyako vīriyavā āyūhako saṅgāhako saṃvibhāgī sakhilo nivātavutti saṇho asaṭho amāyāvī atibuddhisampanno kittimā vijjāsampanno hitesī upanissitānaṃ patthito sabbajanassa dhanavā yasavā. Mahosadho, mahārāja, paṇḍito imehi aṭṭhavīsatiyā aṅgehi samannāgato. Sā aññaṃ tādisaṃ nimantakaṃ alabhitvā pāpaṃ nākāsī’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
අමරාදෙවීපඤ්‌හො අට්‌ඨමො.
Amarādevīpañho aṭṭhamo.
Footnotes:
