| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
২০. অমতৰগ্গৰণ্ণনা
20. Amatavaggavaṇṇanā
৬০০-৬১১. অমতং তে, ভিক্খৰে, ন পরিভুঞ্জন্তীতি মরণৰিরহিতং নিব্বানং ন পরিভুঞ্জন্তীতি অত্থো। ননু চ নিব্বানং লোকুত্তরং, কাযগতাসতি লোকিযা, কথং তং পরিভুঞ্জন্তা অমতং পরিভুঞ্জন্তীতি? তং ভাৰেত্ৰা অধিগন্তব্বতো। কাযগতঞ্হি সতিং ভাৰেন্তো অমতমধিগচ্ছতি, অভাৰেন্তো নাধিগচ্ছতি। তস্মা এৰং ৰুত্তং। এতেনুপাযেন সব্বত্থ অত্থো ৰেদিতব্বো। অপি চেত্থ ৰিরদ্ধন্তি ৰিরাধিতং নাধিগতং। আরদ্ধন্তি পরিপুণ্ণং। পমাদিংসূতি পমজ্জন্তি। পমুট্ঠন্তি সম্মুট্ঠং ৰিস্সরিতং নট্ঠং ৰা। আসেৰিতন্তি আদিতো সেৰিতং। ভাৰিতন্তি ৰড্ঢিতং। বহুলীকতন্তি পুনপ্পুনং কতং। অনভিঞ্ঞাতন্তি ঞাতঅভিঞ্ঞায অজানিতং। অপরিঞ্ঞাতন্তি ঞাতপরিঞ্ঞাৰসেনেৰ অপরিঞ্ঞাতং। অসচ্ছিকতন্তি অপচ্চক্খকতং। সেসং সব্বত্থ উত্তানত্থমেৰাতি।
600-611.Amataṃte, bhikkhave, na paribhuñjantīti maraṇavirahitaṃ nibbānaṃ na paribhuñjantīti attho. Nanu ca nibbānaṃ lokuttaraṃ, kāyagatāsati lokiyā, kathaṃ taṃ paribhuñjantā amataṃ paribhuñjantīti? Taṃ bhāvetvā adhigantabbato. Kāyagatañhi satiṃ bhāvento amatamadhigacchati, abhāvento nādhigacchati. Tasmā evaṃ vuttaṃ. Etenupāyena sabbattha attho veditabbo. Api cettha viraddhanti virādhitaṃ nādhigataṃ. Āraddhanti paripuṇṇaṃ. Pamādiṃsūti pamajjanti. Pamuṭṭhanti sammuṭṭhaṃ vissaritaṃ naṭṭhaṃ vā. Āsevitanti ādito sevitaṃ. Bhāvitanti vaḍḍhitaṃ. Bahulīkatanti punappunaṃ kataṃ. Anabhiññātanti ñātaabhiññāya ajānitaṃ. Apariññātanti ñātapariññāvaseneva apariññātaṃ. Asacchikatanti apaccakkhakataṃ. Sesaṃ sabbattha uttānatthamevāti.
অমতৰগ্গৰণ্ণনা।
Amatavaggavaṇṇanā.
মনোরথপূরণিযা অঙ্গুত্তরনিকায-অট্ঠকথায সহস্সসুত্তন্তপরিমাণস্স
Manorathapūraṇiyā aṅguttaranikāya-aṭṭhakathāya sahassasuttantaparimāṇassa
এককনিপাতস্স সংৰণ্ণনা নিট্ঠিতা।
Ekakanipātassa saṃvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ২০. অমতৰগ্গো • 20. Amatavaggo
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ২০. অমতৰগ্গৰণ্ণনা • 20. Amatavaggavaṇṇanā
