| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၂၀. အမတဝဂ္ဂဝဏ္ဏနာ
20. Amatavaggavaṇṇanā
၆၀၀-၆၁၁. အမတံ တေ, ဘိက္ခဝေ, န ပရိဘုဉ္ဇန္တီတိ မရဏဝိရဟိတံ နိဗ္ဗာနံ န ပရိဘုဉ္ဇန္တီတိ အတ္ထော။ နနု စ နိဗ္ဗာနံ လောကုတ္တရံ, ကာယဂတာသတိ လောကိယာ, ကထံ တံ ပရိဘုဉ္ဇန္တာ အမတံ ပရိဘုဉ္ဇန္တီတိ? တံ ဘာဝေတ္ဝာ အဓိဂန္တဗ္ဗတော။ ကာယဂတဉ္ဟိ သတိံ ဘာဝေန္တော အမတမဓိဂစ္ဆတိ, အဘာဝေန္တော နာဓိဂစ္ဆတိ။ တသ္မာ ဧဝံ ဝုတ္တံ။ ဧတေနုပာယေန သဗ္ဗတ္ထ အတ္ထော ဝေဒိတဗ္ဗော။ အပိ စေတ္ထ ဝိရဒ္ဓန္တိ ဝိရာဓိတံ နာဓိဂတံ။ အာရဒ္ဓန္တိ ပရိပုဏ္ဏံ။ ပမာဒိံသူတိ ပမဇ္ဇန္တိ။ ပမုဋ္ဌန္တိ သမ္မုဋ္ဌံ ဝိသ္သရိတံ နဋ္ဌံ ဝာ။ အာသေဝိတန္တိ အာဒိတော သေဝိတံ။ ဘာဝိတန္တိ ဝဍ္ဎိတံ။ ဗဟုလီကတန္တိ ပုနပ္ပုနံ ကတံ။ အနဘိညာတန္တိ ဉာတအဘိညာယ အဇာနိတံ။ အပရိညာတန္တိ ဉာတပရိညာဝသေနေဝ အပရိညာတံ။ အသစ္ဆိကတန္တိ အပစ္စက္ခကတံ။ သေသံ သဗ္ဗတ္ထ ဥတ္တာနတ္ထမေဝာတိ။
600-611.Amataṃte, bhikkhave, na paribhuñjantīti maraṇavirahitaṃ nibbānaṃ na paribhuñjantīti attho. Nanu ca nibbānaṃ lokuttaraṃ, kāyagatāsati lokiyā, kathaṃ taṃ paribhuñjantā amataṃ paribhuñjantīti? Taṃ bhāvetvā adhigantabbato. Kāyagatañhi satiṃ bhāvento amatamadhigacchati, abhāvento nādhigacchati. Tasmā evaṃ vuttaṃ. Etenupāyena sabbattha attho veditabbo. Api cettha viraddhanti virādhitaṃ nādhigataṃ. Āraddhanti paripuṇṇaṃ. Pamādiṃsūti pamajjanti. Pamuṭṭhanti sammuṭṭhaṃ vissaritaṃ naṭṭhaṃ vā. Āsevitanti ādito sevitaṃ. Bhāvitanti vaḍḍhitaṃ. Bahulīkatanti punappunaṃ kataṃ. Anabhiññātanti ñātaabhiññāya ajānitaṃ. Apariññātanti ñātapariññāvaseneva apariññātaṃ. Asacchikatanti apaccakkhakataṃ. Sesaṃ sabbattha uttānatthamevāti.
အမတဝဂ္ဂဝဏ္ဏနာ။
Amatavaggavaṇṇanā.
မနောရထပူရဏိယာ အင္ဂုတ္တရနိကာယ-အဋ္ဌကထာယ သဟသ္သသုတ္တန္တပရိမာဏသ္သ
Manorathapūraṇiyā aṅguttaranikāya-aṭṭhakathāya sahassasuttantaparimāṇassa
ဧကကနိပာတသ္သ သံဝဏ္ဏနာ နိဋ္ဌိတာ။
Ekakanipātassa saṃvaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၂၀. အမတဝဂ္ဂော • 20. Amatavaggo
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၂၀. အမတဝဂ္ဂဝဏ္ဏနာ • 20. Amatavaggavaṇṇanā
