| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৮. অম্বদাযকত্থেরঅপদানৰণ্ণনা
8. Ambadāyakattheraapadānavaṇṇanā
অনোমদস্সী ভগৰাতিআদিকং আযস্মতো অম্বদাযকত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো অনোমদস্সিস্স ভগৰতো কালে ৰানরযোনিযং নিব্বত্তো হিমৰন্তে কপিরাজা হুত্ৰা পটিৰসতি। তস্মিং সমযে অনোমদস্সী ভগৰা তস্সানুকম্পায হিমৰন্তমগমাসি। অথ সো কপিরাজা ভগৰন্তং দিস্ৰা পসন্নমানসো সুমধুরং অম্বফলং খুদ্দমধুনা অদাসি। অথ ভগৰা তস্স পস্সন্তস্সেৰ তং সব্বং পরিভুঞ্জিত্ৰা অনুমোদনং ৰত্ৰা পক্কামি। অথ সো সোমনস্সসম্পন্নহদযো তেনেৰ পীতিসোমনস্সেন যাৰতাযুকং ঠত্ৰা ততো চুতো দেৰলোকে নিব্বত্তো অপরাপরং তত্থ দিব্বসুখমনুভৰিত্ৰা মনুস্সেসু চ মনুস্সসম্পত্তিং অনুভৰিত্ৰা ইমস্মিং বুদ্ধুপ্পাদে ৰিভৰসম্পন্নে একস্মিং কুলগেহে নিব্বত্তো সত্থরি পসীদিত্ৰা পব্বজিত্ৰা নচিরস্সেৰ ছল়ভিঞ্ঞপ্পত্তো অহোসি। পুব্বপুঞ্ঞনামেন অম্বদাযকত্থেরোতি পাকটো।
Anomadassī bhagavātiādikaṃ āyasmato ambadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto anomadassissa bhagavato kāle vānarayoniyaṃ nibbatto himavante kapirājā hutvā paṭivasati. Tasmiṃ samaye anomadassī bhagavā tassānukampāya himavantamagamāsi. Atha so kapirājā bhagavantaṃ disvā pasannamānaso sumadhuraṃ ambaphalaṃ khuddamadhunā adāsi. Atha bhagavā tassa passantasseva taṃ sabbaṃ paribhuñjitvā anumodanaṃ vatvā pakkāmi. Atha so somanassasampannahadayo teneva pītisomanassena yāvatāyukaṃ ṭhatvā tato cuto devaloke nibbatto aparāparaṃ tattha dibbasukhamanubhavitvā manussesu ca manussasampattiṃ anubhavitvā imasmiṃ buddhuppāde vibhavasampanne ekasmiṃ kulagehe nibbatto satthari pasīditvā pabbajitvā nacirasseva chaḷabhiññappatto ahosi. Pubbapuññanāmena ambadāyakattheroti pākaṭo.
৫৩. সো অপরভাগে অত্তনা কতকুসলবীজং দিস্ৰা সোমনস্সজাতো অত্তনো পুব্বচরিতাপদানং পকাসেন্তো অনোমদস্সী ভগৰাতিআদিমাহ। মেত্তায অফরি লোকে, অপ্পমাণে নিরূপধীতি সো ভগৰা সব্বলোকে অপ্পমাণে সত্তে ‘‘সুখী হোন্তূ’’তিআদিনা নিরুপধি উপধিৰিরহিতং কত্ৰা মেত্তায মেত্তচিত্তেন অফরি পত্থরি ৰড্ঢেসীতি অত্থো।
53. So aparabhāge attanā katakusalabījaṃ disvā somanassajāto attano pubbacaritāpadānaṃ pakāsento anomadassī bhagavātiādimāha. Mettāya aphari loke, appamāṇe nirūpadhīti so bhagavā sabbaloke appamāṇe satte ‘‘sukhī hontū’’tiādinā nirupadhi upadhivirahitaṃ katvā mettāya mettacittena aphari patthari vaḍḍhesīti attho.
৫৪. কপি অহং তদা আসিন্তি তদা তস্সাগমনকালে কপিরাজা অহোসিন্তি অত্থো।
54.Kapi ahaṃ tadā āsinti tadā tassāgamanakāle kapirājā ahosinti attho.
অম্বদাযকত্থেরঅপদানৰণ্ণনা সমত্তা।
Ambadāyakattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৮. অম্বদাযকত্থেরঅপদানং • 8. Ambadāyakattheraapadānaṃ
