| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၈. အမ္ဗဒာယကတ္ထေရအပဒာနဝဏ္ဏနာ
8. Ambadāyakattheraapadānavaṇṇanā
အနောမဒသ္သီ ဘဂဝာတိအာဒိကံ အာယသ္မတော အမ္ဗဒာယကတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော အနောမဒသ္သိသ္သ ဘဂဝတော ကာလေ ဝာနရယောနိယံ နိဗ္ဗတ္တော ဟိမဝန္တေ ကပိရာဇာ ဟုတ္ဝာ ပဋိဝသတိ။ တသ္မိံ သမယေ အနောမဒသ္သီ ဘဂဝာ တသ္သာနုကမ္ပာယ ဟိမဝန္တမဂမာသိ။ အထ သော ကပိရာဇာ ဘဂဝန္တံ ဒိသ္ဝာ ပသန္နမာနသော သုမဓုရံ အမ္ဗဖလံ ခုဒ္ဒမဓုနာ အဒာသိ။ အထ ဘဂဝာ တသ္သ ပသ္သန္တသ္သေဝ တံ သဗ္ဗံ ပရိဘုဉ္ဇိတ္ဝာ အနုမောဒနံ ဝတ္ဝာ ပက္ကာမိ။ အထ သော သောမနသ္သသမ္ပန္နဟဒယော တေနေဝ ပီတိသောမနသ္သေန ယာဝတာယုကံ ဌတ္ဝာ တတော စုတော ဒေဝလောကေ နိဗ္ဗတ္တော အပရာပရံ တတ္ထ ဒိဗ္ဗသုခမနုဘဝိတ္ဝာ မနုသ္သေသု စ မနုသ္သသမ္ပတ္တိံ အနုဘဝိတ္ဝာ ဣမသ္မိံ ဗုဒ္ဓုပ္ပာဒေ ဝိဘဝသမ္ပန္နေ ဧကသ္မိံ ကုလဂေဟေ နိဗ္ဗတ္တော သတ္ထရိ ပသီဒိတ္ဝာ ပဗ္ဗဇိတ္ဝာ နစိရသ္သေဝ ဆဠဘိညပ္ပတ္တော အဟောသိ။ ပုဗ္ဗပုညနာမေန အမ္ဗဒာယကတ္ထေရောတိ ပာကဋော။
Anomadassī bhagavātiādikaṃ āyasmato ambadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto anomadassissa bhagavato kāle vānarayoniyaṃ nibbatto himavante kapirājā hutvā paṭivasati. Tasmiṃ samaye anomadassī bhagavā tassānukampāya himavantamagamāsi. Atha so kapirājā bhagavantaṃ disvā pasannamānaso sumadhuraṃ ambaphalaṃ khuddamadhunā adāsi. Atha bhagavā tassa passantasseva taṃ sabbaṃ paribhuñjitvā anumodanaṃ vatvā pakkāmi. Atha so somanassasampannahadayo teneva pītisomanassena yāvatāyukaṃ ṭhatvā tato cuto devaloke nibbatto aparāparaṃ tattha dibbasukhamanubhavitvā manussesu ca manussasampattiṃ anubhavitvā imasmiṃ buddhuppāde vibhavasampanne ekasmiṃ kulagehe nibbatto satthari pasīditvā pabbajitvā nacirasseva chaḷabhiññappatto ahosi. Pubbapuññanāmena ambadāyakattheroti pākaṭo.
၅၃. သော အပရဘာဂေ အတ္တနာ ကတကုသလဗီဇံ ဒိသ္ဝာ သောမနသ္သဇာတော အတ္တနော ပုဗ္ဗစရိတာပဒာနံ ပကာသေန္တော အနောမဒသ္သီ ဘဂဝာတိအာဒိမာဟ။ မေတ္တာယ အဖရိ လောကေ, အပ္ပမာဏေ နိရူပဓီတိ သော ဘဂဝာ သဗ္ဗလောကေ အပ္ပမာဏေ သတ္တေ ‘‘သုခီ ဟောန္တူ’’တိအာဒိနာ နိရုပဓိ ဥပဓိဝိရဟိတံ ကတ္ဝာ မေတ္တာယ မေတ္တစိတ္တေန အဖရိ ပတ္ထရိ ဝဍ္ဎေသီတိ အတ္ထော။
53. So aparabhāge attanā katakusalabījaṃ disvā somanassajāto attano pubbacaritāpadānaṃ pakāsento anomadassī bhagavātiādimāha. Mettāya aphari loke, appamāṇe nirūpadhīti so bhagavā sabbaloke appamāṇe satte ‘‘sukhī hontū’’tiādinā nirupadhi upadhivirahitaṃ katvā mettāya mettacittena aphari patthari vaḍḍhesīti attho.
၅၄. ကပိ အဟံ တဒာ အာသိန္တိ တဒာ တသ္သာဂမနကာလေ ကပိရာဇာ အဟောသိန္တိ အတ္ထော။
54.Kapi ahaṃ tadā āsinti tadā tassāgamanakāle kapirājā ahosinti attho.
အမ္ဗဒာယကတ္ထေရအပဒာနဝဏ္ဏနာ သမတ္တာ။
Ambadāyakattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၈. အမ္ဗဒာယကတ္ထေရအပဒာနံ • 8. Ambadāyakattheraapadānaṃ
