| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
8. අම්‌බදායකත්‌ථෙරඅපදානවණ්‌ණනා
8. Ambadāyakattheraapadānavaṇṇanā
අනොමදස්‌සී භගවාතිආදිකං ආයස්‌මතො අම්‌බදායකත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො අනොමදස්‌සිස්‌ස භගවතො කාලෙ වානරයොනියං නිබ්‌බත්‌තො හිමවන්‌තෙ කපිරාජා හුත්‌වා පටිවසති. තස්‌මිං සමයෙ අනොමදස්‌සී භගවා තස්‌සානුකම්‌පාය හිමවන්‌තමගමාසි. අථ සො කපිරාජා භගවන්‌තං දිස්‌වා පසන්‌නමානසො සුමධුරං අම්‌බඵලං ඛුද්‌දමධුනා අදාසි. අථ භගවා තස්‌ස පස්‌සන්‌තස්‌සෙව තං සබ්‌බං පරිභුඤ්‌ජිත්‌වා අනුමොදනං වත්‌වා පක්‌කාමි. අථ සො සොමනස්‌සසම්‌පන්‌නහදයො තෙනෙව පීතිසොමනස්‌සෙන යාවතායුකං ඨත්‌වා තතො චුතො දෙවලොකෙ නිබ්‌බත්‌තො අපරාපරං තත්‌ථ දිබ්‌බසුඛමනුභවිත්‌වා මනුස්‌සෙසු ච මනුස්‌සසම්‌පත්‌තිං අනුභවිත්‌වා ඉමස්‌මිං බුද්‌ධුප්‌පාදෙ විභවසම්‌පන්‌නෙ එකස්‌මිං කුලගෙහෙ නිබ්‌බත්‌තො සත්‌ථරි පසීදිත්‌වා පබ්‌බජිත්‌වා නචිරස්‌සෙව ඡළභිඤ්‌ඤප්‌පත්‌තො අහොසි. පුබ්‌බපුඤ්‌ඤනාමෙන අම්‌බදායකත්‌ථෙරොති පාකටො.
Anomadassī bhagavātiādikaṃ āyasmato ambadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto anomadassissa bhagavato kāle vānarayoniyaṃ nibbatto himavante kapirājā hutvā paṭivasati. Tasmiṃ samaye anomadassī bhagavā tassānukampāya himavantamagamāsi. Atha so kapirājā bhagavantaṃ disvā pasannamānaso sumadhuraṃ ambaphalaṃ khuddamadhunā adāsi. Atha bhagavā tassa passantasseva taṃ sabbaṃ paribhuñjitvā anumodanaṃ vatvā pakkāmi. Atha so somanassasampannahadayo teneva pītisomanassena yāvatāyukaṃ ṭhatvā tato cuto devaloke nibbatto aparāparaṃ tattha dibbasukhamanubhavitvā manussesu ca manussasampattiṃ anubhavitvā imasmiṃ buddhuppāde vibhavasampanne ekasmiṃ kulagehe nibbatto satthari pasīditvā pabbajitvā nacirasseva chaḷabhiññappatto ahosi. Pubbapuññanāmena ambadāyakattheroti pākaṭo.
53. සො අපරභාගෙ අත්‌තනා කතකුසලබීජං දිස්‌වා සොමනස්‌සජාතො අත්‌තනො පුබ්‌බචරිතාපදානං පකාසෙන්‌තො අනොමදස්‌සී භගවාතිආදිමාහ. මෙත්‌තාය අඵරි ලොකෙ, අප්‌පමාණෙ නිරූපධීති සො භගවා සබ්‌බලොකෙ අප්‌පමාණෙ සත්‌තෙ ‘‘සුඛී හොන්‌තූ’’තිආදිනා නිරුපධි උපධිවිරහිතං කත්‌වා මෙත්‌තාය මෙත්‌තචිත්‌තෙන අඵරි පත්‌ථරි වඩ්‌ඪෙසීති අත්‌ථො.
53. So aparabhāge attanā katakusalabījaṃ disvā somanassajāto attano pubbacaritāpadānaṃ pakāsento anomadassī bhagavātiādimāha. Mettāya aphari loke, appamāṇe nirūpadhīti so bhagavā sabbaloke appamāṇe satte ‘‘sukhī hontū’’tiādinā nirupadhi upadhivirahitaṃ katvā mettāya mettacittena aphari patthari vaḍḍhesīti attho.
54. කපි අහං තදා ආසින්‌ති තදා තස්‌සාගමනකාලෙ කපිරාජා අහොසින්‌ති අත්‌ථො.
54.Kapi ahaṃ tadā āsinti tadā tassāgamanakāle kapirājā ahosinti attho.
අම්‌බදායකත්‌ථෙරඅපදානවණ්‌ණනා සමත්‌තා.
Ambadāyakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 8. අම්‌බදායකත්‌ථෙරඅපදානං • 8. Ambadāyakattheraapadānaṃ
