| Library / Tipiṭaka / তিপিটক • Tipiṭaka / মজ্ঝিমনিকায • Majjhimanikāya |
২. ভিক্খুৰগ্গো
2. Bhikkhuvaggo
১. অম্বলট্ঠিকরাহুলোৰাদসুত্তং
1. Ambalaṭṭhikarāhulovādasuttaṃ
১০৭. এৰং মে সুতং – একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে। তেন খো পন সমযেন আযস্মা রাহুলো অম্বলট্ঠিকাযং ৰিহরতি। অথ খো ভগৰা সাযন্হসমযং পটিসল্লানা ৰুট্ঠিতো যেন অম্বলট্ঠিকা যেনাযস্মা রাহুলো তেনুপসঙ্কমি। অদ্দসা খো আযস্মা রাহুলো ভগৰন্তং দূরতোৰ আগচ্ছন্তং। দিস্ৰান আসনং পঞ্ঞাপেসি, উদকঞ্চ পাদানং। নিসীদি ভগৰা পঞ্ঞত্তে আসনে। নিসজ্জ পাদে পক্খালেসি। আযস্মাপি খো রাহুলো ভগৰন্তং অভিৰাদেত্ৰা একমন্তং নিসীদি।
107. Evaṃ me sutaṃ – ekaṃ samayaṃ bhagavā rājagahe viharati veḷuvane kalandakanivāpe. Tena kho pana samayena āyasmā rāhulo ambalaṭṭhikāyaṃ viharati. Atha kho bhagavā sāyanhasamayaṃ paṭisallānā vuṭṭhito yena ambalaṭṭhikā yenāyasmā rāhulo tenupasaṅkami. Addasā kho āyasmā rāhulo bhagavantaṃ dūratova āgacchantaṃ. Disvāna āsanaṃ paññāpesi, udakañca pādānaṃ. Nisīdi bhagavā paññatte āsane. Nisajja pāde pakkhālesi. Āyasmāpi kho rāhulo bhagavantaṃ abhivādetvā ekamantaṃ nisīdi.
১০৮. অথ খো ভগৰা পরিত্তং উদকাৰসেসং উদকাধানে ঠপেত্ৰা আযস্মন্তং রাহুলং আমন্তেসি – ‘‘পস্সসি নো ত্ৰং, রাহুল, ইমং পরিত্তং উদকাৰসেসং উদকাধানে ঠপিত’’ন্তি? ‘‘এৰং, ভন্তে’’। ‘‘এৰং পরিত্তকং খো, রাহুল, তেসং সামঞ্ঞং যেসং নত্থি সম্পজানমুসাৰাদে লজ্জা’’তি। অথ খো ভগৰা পরিত্তং উদকাৰসেসং ছড্ডেত্ৰা আযস্মন্তং রাহুলং আমন্তেসি – ‘‘পস্সসি নো ত্ৰং, রাহুল, পরিত্তং উদকাৰসেসং ছড্ডিত’’ন্তি? ‘‘এৰং, ভন্তে’’। ‘‘এৰং ছড্ডিতং খো, রাহুল, তেসং সামঞ্ঞং যেসং নত্থি সম্পজানমুসাৰাদে লজ্জা’’তি। অথ খো ভগৰা তং উদকাধানং নিক্কুজ্জিত্ৰা আযস্মন্তং রাহুলং আমন্তেসি – ‘‘পস্সসি নো ত্ৰং, রাহুল, ইমং উদকাধানং নিক্কুজ্জিত’’ন্তি? ‘‘এৰং, ভন্তে’’। ‘‘এৰং নিক্কুজ্জিতং খো, রাহুল, তেসং সামঞ্ঞং যেসং নত্থি সম্পজানমুসাৰাদে লজ্জা’’তি। অথ খো ভগৰা তং উদকাধানং উক্কুজ্জিত্ৰা আযস্মন্তং রাহুলং আমন্তেসি – ‘‘পস্সসি নো ত্ৰং, রাহুল, ইমং উদকাধানং রিত্তং তুচ্ছ’’ন্তি? ‘‘এৰং, ভন্তে’’। ‘‘এৰং রিত্তং তুচ্ছং খো, রাহুল, তেসং সামঞ্ঞং যেসং নত্থি সম্পজানমুসাৰাদে লজ্জাতি। সেয্যথাপি, রাহুল, রঞ্ঞো নাগো ঈসাদন্তো উরূল়্হৰা 1 অভিজাতো সঙ্গামাৰচরো সঙ্গামগতো পুরিমেহিপি পাদেহি কম্মং করোতি, পচ্ছিমেহিপি পাদেহি কম্মং করোতি, পুরিমেনপি কাযেন কম্মং করোতি, পচ্ছিমেনপি কাযেন কম্মং করোতি, সীসেনপি কম্মং করোতি, কণ্ণেহিপি কম্মং করোতি, দন্তেহিপি কম্মং করোতি, নঙ্গুট্ঠেনপি কম্মং করোতি; রক্খতেৰ সোণ্ডং। তত্থ হত্থারোহস্স এৰং হোতি – ‘অযং খো রঞ্ঞো নাগো ঈসাদন্তো উরূল়্হৰা অভিজাতো সঙ্গামাৰচরো সঙ্গামগতো পুরিমেহিপি পাদেহি কম্মং করোতি, পচ্ছিমেহিপি পাদেহি কম্মং করোতি…পে॰… নঙ্গুট্ঠেনপি কম্মং করোতি; রক্খতেৰ সোণ্ডং । অপরিচ্চত্তং খো রঞ্ঞো নাগস্স জীৰিত’ন্তি। যতো খো, রাহুল, রঞ্ঞো নাগো ঈসাদন্তো উরূল়্হৰা অভিজাতো সঙ্গামাৰচরো সঙ্গামগতো পুরিমেহিপি পাদেহি কম্মং করোতি, পচ্ছিমেহিপি পাদেহি কম্মং করোতি…পে॰… নঙ্গুট্ঠেনপি কম্মং করোতি, সোণ্ডাযপি কম্মং করোতি, তত্থ হত্থারোহস্স এৰং হোতি – ‘অযং খো রঞ্ঞো নাগো ঈসাদন্তো উরূল়্হৰা অভিজাতো সঙ্গামাৰচরো সঙ্গামগতো পুরিমেহিপি পাদেহি কম্মং করোতি, পচ্ছিমেহিপি পাদেহি কম্মং করোতি, পুরিমেনপি কাযেন কম্মং করোতি, পচ্ছিমেনপি কাযেন কম্মং করোতি, সীসেনপি কম্মং করোতি, কণ্ণেহিপি কম্মং করোতি, দন্তেহিপি কম্মং করোতি, নঙ্গুট্ঠেনপি কম্মং করোতি, সোণ্ডাযপি কম্মং করোতি। পরিচ্চত্তং খো রঞ্ঞো নাগস্স জীৰিতং। নত্থি দানি কিঞ্চি রঞ্ঞো নাগস্স অকরণীয’ন্তি। এৰমেৰ খো, রাহুল, যস্স কস্সচি সম্পজানমুসাৰাদে নত্থি লজ্জা, নাহং তস্স কিঞ্চি পাপং অকরণীযন্তি ৰদামি। তস্মাতিহ তে, রাহুল, ‘হস্সাপি ন মুসা ভণিস্সামী’তি – এৰঞ্হি তে, রাহুল, সিক্খিতব্বং।
108. Atha kho bhagavā parittaṃ udakāvasesaṃ udakādhāne ṭhapetvā āyasmantaṃ rāhulaṃ āmantesi – ‘‘passasi no tvaṃ, rāhula, imaṃ parittaṃ udakāvasesaṃ udakādhāne ṭhapita’’nti? ‘‘Evaṃ, bhante’’. ‘‘Evaṃ parittakaṃ kho, rāhula, tesaṃ sāmaññaṃ yesaṃ natthi sampajānamusāvāde lajjā’’ti. Atha kho bhagavā parittaṃ udakāvasesaṃ chaḍḍetvā āyasmantaṃ rāhulaṃ āmantesi – ‘‘passasi no tvaṃ, rāhula, parittaṃ udakāvasesaṃ chaḍḍita’’nti? ‘‘Evaṃ, bhante’’. ‘‘Evaṃ chaḍḍitaṃ kho, rāhula, tesaṃ sāmaññaṃ yesaṃ natthi sampajānamusāvāde lajjā’’ti. Atha kho bhagavā taṃ udakādhānaṃ nikkujjitvā āyasmantaṃ rāhulaṃ āmantesi – ‘‘passasi no tvaṃ, rāhula, imaṃ udakādhānaṃ nikkujjita’’nti? ‘‘Evaṃ, bhante’’. ‘‘Evaṃ nikkujjitaṃ kho, rāhula, tesaṃ sāmaññaṃ yesaṃ natthi sampajānamusāvāde lajjā’’ti. Atha kho bhagavā taṃ udakādhānaṃ ukkujjitvā āyasmantaṃ rāhulaṃ āmantesi – ‘‘passasi no tvaṃ, rāhula, imaṃ udakādhānaṃ rittaṃ tuccha’’nti? ‘‘Evaṃ, bhante’’. ‘‘Evaṃ rittaṃ tucchaṃ kho, rāhula, tesaṃ sāmaññaṃ yesaṃ natthi sampajānamusāvāde lajjāti. Seyyathāpi, rāhula, rañño nāgo īsādanto urūḷhavā 2 abhijāto saṅgāmāvacaro saṅgāmagato purimehipi pādehi kammaṃ karoti, pacchimehipi pādehi kammaṃ karoti, purimenapi kāyena kammaṃ karoti, pacchimenapi kāyena kammaṃ karoti, sīsenapi kammaṃ karoti, kaṇṇehipi kammaṃ karoti, dantehipi kammaṃ karoti, naṅguṭṭhenapi kammaṃ karoti; rakkhateva soṇḍaṃ. Tattha hatthārohassa evaṃ hoti – ‘ayaṃ kho rañño nāgo īsādanto urūḷhavā abhijāto saṅgāmāvacaro saṅgāmagato purimehipi pādehi kammaṃ karoti, pacchimehipi pādehi kammaṃ karoti…pe… naṅguṭṭhenapi kammaṃ karoti; rakkhateva soṇḍaṃ . Apariccattaṃ kho rañño nāgassa jīvita’nti. Yato kho, rāhula, rañño nāgo īsādanto urūḷhavā abhijāto saṅgāmāvacaro saṅgāmagato purimehipi pādehi kammaṃ karoti, pacchimehipi pādehi kammaṃ karoti…pe… naṅguṭṭhenapi kammaṃ karoti, soṇḍāyapi kammaṃ karoti, tattha hatthārohassa evaṃ hoti – ‘ayaṃ kho rañño nāgo īsādanto urūḷhavā abhijāto saṅgāmāvacaro saṅgāmagato purimehipi pādehi kammaṃ karoti, pacchimehipi pādehi kammaṃ karoti, purimenapi kāyena kammaṃ karoti, pacchimenapi kāyena kammaṃ karoti, sīsenapi kammaṃ karoti, kaṇṇehipi kammaṃ karoti, dantehipi kammaṃ karoti, naṅguṭṭhenapi kammaṃ karoti, soṇḍāyapi kammaṃ karoti. Pariccattaṃ kho rañño nāgassa jīvitaṃ. Natthi dāni kiñci rañño nāgassa akaraṇīya’nti. Evameva kho, rāhula, yassa kassaci sampajānamusāvāde natthi lajjā, nāhaṃ tassa kiñci pāpaṃ akaraṇīyanti vadāmi. Tasmātiha te, rāhula, ‘hassāpi na musā bhaṇissāmī’ti – evañhi te, rāhula, sikkhitabbaṃ.
১০৯. ‘‘তং কিং মঞ্ঞসি, রাহুল, কিমত্থিযো আদাসো’’তি? ‘‘পচ্চৰেক্খণত্থো, ভন্তে’’তি। ‘‘এৰমেৰ খো, রাহুল, পচ্চৰেক্খিত্ৰা পচ্চৰেক্খিত্ৰা কাযেন কম্মং কত্তব্বং, পচ্চৰেক্খিত্ৰা পচ্চৰেক্খিত্ৰা ৰাচায কম্মং কত্তব্বং, পচ্চৰেক্খিত্ৰা পচ্চৰেক্খিত্ৰা মনসা কম্মং কত্তব্বং। যদেৰ ত্ৰং, রাহুল, কাযেন কম্মং কত্তুকামো অহোসি, তদেৰ তে কাযকম্মং পচ্চৰেক্খিতব্বং – ‘যং নু খো অহং ইদং কাযেন কম্মং কত্তুকামো ইদং মে কাযকম্মং অত্তব্যাবাধাযপি সংৰত্তেয্য, পরব্যাবাধাযপি সংৰত্তেয্য, উভযব্যাবাধাযপি সংৰত্তেয্য – অকুসলং ইদং কাযকম্মং দুক্খুদ্রযং 3 দুক্খৰিপাক’ন্তি? সচে ত্ৰং, রাহুল, পচ্চৰেক্খমানো এৰং জানেয্যাসি – ‘যং খো অহং ইদং কাযেন কম্মং কত্তুকামো ইদং মে কাযকম্মং অত্তব্যাবাধাযপি সংৰত্তেয্য, পরব্যাবাধাযপি সংৰত্তেয্য, উভযব্যাবাধাযপি সংৰত্তেয্য – অকুসলং ইদং কাযকম্মং দুক্খুদ্রযং দুক্খৰিপাক’ন্তি, এৰরূপং তে, রাহুল, কাযেন কম্মং সসক্কং ন করণীযং 4। সচে পন ত্ৰং, রাহুল, পচ্চৰেক্খমানো এৰং জানেয্যাসি – ‘যং খো অহং ইদং কাযেন কম্মং কত্তুকামো ইদং মে কাযকম্মং নেৰত্তব্যাবাধাযপি সংৰত্তেয্য, ন পরব্যাবাধাযপি সংৰত্তেয্য, ন উভযব্যাবাধাযপি সংৰত্তেয্য – কুসলং ইদং কাযকম্মং সুখুদ্রযং সুখৰিপাক’ন্তি, এৰরূপং তে, রাহুল, কাযেন কম্মং করণীযং।
109. ‘‘Taṃ kiṃ maññasi, rāhula, kimatthiyo ādāso’’ti? ‘‘Paccavekkhaṇattho, bhante’’ti. ‘‘Evameva kho, rāhula, paccavekkhitvā paccavekkhitvā kāyena kammaṃ kattabbaṃ, paccavekkhitvā paccavekkhitvā vācāya kammaṃ kattabbaṃ, paccavekkhitvā paccavekkhitvā manasā kammaṃ kattabbaṃ. Yadeva tvaṃ, rāhula, kāyena kammaṃ kattukāmo ahosi, tadeva te kāyakammaṃ paccavekkhitabbaṃ – ‘yaṃ nu kho ahaṃ idaṃ kāyena kammaṃ kattukāmo idaṃ me kāyakammaṃ attabyābādhāyapi saṃvatteyya, parabyābādhāyapi saṃvatteyya, ubhayabyābādhāyapi saṃvatteyya – akusalaṃ idaṃ kāyakammaṃ dukkhudrayaṃ 5 dukkhavipāka’nti? Sace tvaṃ, rāhula, paccavekkhamāno evaṃ jāneyyāsi – ‘yaṃ kho ahaṃ idaṃ kāyena kammaṃ kattukāmo idaṃ me kāyakammaṃ attabyābādhāyapi saṃvatteyya, parabyābādhāyapi saṃvatteyya, ubhayabyābādhāyapi saṃvatteyya – akusalaṃ idaṃ kāyakammaṃ dukkhudrayaṃ dukkhavipāka’nti, evarūpaṃ te, rāhula, kāyena kammaṃ sasakkaṃ na karaṇīyaṃ 6. Sace pana tvaṃ, rāhula, paccavekkhamāno evaṃ jāneyyāsi – ‘yaṃ kho ahaṃ idaṃ kāyena kammaṃ kattukāmo idaṃ me kāyakammaṃ nevattabyābādhāyapi saṃvatteyya, na parabyābādhāyapi saṃvatteyya, na ubhayabyābādhāyapi saṃvatteyya – kusalaṃ idaṃ kāyakammaṃ sukhudrayaṃ sukhavipāka’nti, evarūpaṃ te, rāhula, kāyena kammaṃ karaṇīyaṃ.
‘‘করোন্তেনপি তে, রাহুল, কাযেন কম্মং তদেৰ তে কাযকম্মং পচ্চৰেক্খিতব্বং – ‘যং নু খো অহং ইদং কাযেন কম্মং করোমি ইদং মে কাযকম্মং অত্তব্যাবাধাযপি সংৰত্ততি, পরব্যাবাধাযপি সংৰত্ততি, উভযব্যাবাধাযপি সংৰত্ততি – অকুসলং ইদং কাযকম্মং দুক্খুদ্রযং দুক্খৰিপাক’ন্তি? সচে পন ত্ৰং, রাহুল, পচ্চৰেক্খমানো এৰং জানেয্যাসি – ‘যং খো অহং ইদং কাযেন কম্মং করোমি ইদং মে কাযকম্মং অত্তব্যাবাধাযপি সংৰত্ততি, পরব্যাবাধাযপি সংৰত্ততি, উভযব্যাবাধাযপি সংৰত্ততি – অকুসলং ইদং কাযকম্মং দুক্খুদ্রযং দুক্খৰিপাক’ন্তি, পটিসংহরেয্যাসি ত্ৰং, রাহুল, এৰরূপং কাযকম্মং। সচে পন ত্ৰং, রাহুল, পচ্চৰেক্খমানো এৰং জানেয্যাসি – ‘যং খো অহং ইদং কাযেন কম্মং করোমি ইদং মে কাযকম্মং নেৰত্তব্যাবাধাযপি সংৰত্ততি, ন পরব্যাবাধাযপি সংৰত্ততি, ন উভযব্যাবাধাযপি সংৰত্ততি – কুসলং ইদং কাযকম্মং সুখুদ্রযং সুখৰিপাক’ন্তি, অনুপদজ্জেয্যাসি ত্ৰং, রাহুল, এৰরূপং কাযকম্মং।
‘‘Karontenapi te, rāhula, kāyena kammaṃ tadeva te kāyakammaṃ paccavekkhitabbaṃ – ‘yaṃ nu kho ahaṃ idaṃ kāyena kammaṃ karomi idaṃ me kāyakammaṃ attabyābādhāyapi saṃvattati, parabyābādhāyapi saṃvattati, ubhayabyābādhāyapi saṃvattati – akusalaṃ idaṃ kāyakammaṃ dukkhudrayaṃ dukkhavipāka’nti? Sace pana tvaṃ, rāhula, paccavekkhamāno evaṃ jāneyyāsi – ‘yaṃ kho ahaṃ idaṃ kāyena kammaṃ karomi idaṃ me kāyakammaṃ attabyābādhāyapi saṃvattati, parabyābādhāyapi saṃvattati, ubhayabyābādhāyapi saṃvattati – akusalaṃ idaṃ kāyakammaṃ dukkhudrayaṃ dukkhavipāka’nti, paṭisaṃhareyyāsi tvaṃ, rāhula, evarūpaṃ kāyakammaṃ. Sace pana tvaṃ, rāhula, paccavekkhamāno evaṃ jāneyyāsi – ‘yaṃ kho ahaṃ idaṃ kāyena kammaṃ karomi idaṃ me kāyakammaṃ nevattabyābādhāyapi saṃvattati, na parabyābādhāyapi saṃvattati, na ubhayabyābādhāyapi saṃvattati – kusalaṃ idaṃ kāyakammaṃ sukhudrayaṃ sukhavipāka’nti, anupadajjeyyāsi tvaṃ, rāhula, evarūpaṃ kāyakammaṃ.
‘‘কত্ৰাপি তে, রাহুল, কাযেন কম্মং তদেৰ তে কাযকম্মং পচ্চৰেক্খিতব্বং – ‘যং নু খো অহং ইদং কাযেন কম্মং অকাসিং ইদং মে কাযকম্মং অত্তব্যাবাধাযপি সংৰত্ততি 7, পরব্যাবাধাযপি সংৰত্ততি, উভযব্যাবাধাযপি সংৰত্ততি – অকুসলং ইদং কাযকম্মং দুক্খুদ্রযং দুক্খৰিপাক’ন্তি? সচে খো ত্ৰং, রাহুল, পচ্চৰেক্খমানো এৰং জানেয্যাসি – ‘যং খো অহং ইদং কাযেন কম্মং অকাসিং, ইদং মে কাযকম্মং অত্তব্যাবাধাযপি সংৰত্ততি, পরব্যাবাধাযপি সংৰত্ততি, উভযব্যাবাধাযপি সংৰত্ততি – অকুসলং ইদং কাযকম্মং দুক্খুদ্রযং দুক্খৰিপাক’ন্তি, এৰরূপং তে, রাহুল, কাযকম্মং সত্থরি ৰা ৰিঞ্ঞূসু ৰা সব্রহ্মচারীসু দেসেতব্বং, ৰিৰরিতব্বং, উত্তানীকাতব্বং; দেসেত্ৰা ৰিৰরিত্ৰা উত্তানীকত্ৰা আযতিং সংৰরং আপজ্জিতব্বং । সচে পন ত্ৰং, রাহুল, পচ্চৰেক্খমানো এৰং জানেয্যাসি – ‘যং খো অহং ইদং কাযেন কম্মং অকাসিং ইদং মে কাযকম্মং নেৰত্তব্যাবাধাযপি সংৰত্ততি, ন পরব্যাবাধাযপি সংৰত্ততি, ন উভযব্যাবাধাযপি সংৰত্ততি – কুসলং ইদং কাযকম্মং সুখুদ্রযং সুখৰিপাক’ন্তি, তেনেৰ ত্ৰং, রাহুল, পীতিপামোজ্জেন ৰিহরেয্যাসি অহোরত্তানুসিক্খী কুসলেসু ধম্মেসু।
‘‘Katvāpi te, rāhula, kāyena kammaṃ tadeva te kāyakammaṃ paccavekkhitabbaṃ – ‘yaṃ nu kho ahaṃ idaṃ kāyena kammaṃ akāsiṃ idaṃ me kāyakammaṃ attabyābādhāyapi saṃvattati 8, parabyābādhāyapi saṃvattati, ubhayabyābādhāyapi saṃvattati – akusalaṃ idaṃ kāyakammaṃ dukkhudrayaṃ dukkhavipāka’nti? Sace kho tvaṃ, rāhula, paccavekkhamāno evaṃ jāneyyāsi – ‘yaṃ kho ahaṃ idaṃ kāyena kammaṃ akāsiṃ, idaṃ me kāyakammaṃ attabyābādhāyapi saṃvattati, parabyābādhāyapi saṃvattati, ubhayabyābādhāyapi saṃvattati – akusalaṃ idaṃ kāyakammaṃ dukkhudrayaṃ dukkhavipāka’nti, evarūpaṃ te, rāhula, kāyakammaṃ satthari vā viññūsu vā sabrahmacārīsu desetabbaṃ, vivaritabbaṃ, uttānīkātabbaṃ; desetvā vivaritvā uttānīkatvā āyatiṃ saṃvaraṃ āpajjitabbaṃ . Sace pana tvaṃ, rāhula, paccavekkhamāno evaṃ jāneyyāsi – ‘yaṃ kho ahaṃ idaṃ kāyena kammaṃ akāsiṃ idaṃ me kāyakammaṃ nevattabyābādhāyapi saṃvattati, na parabyābādhāyapi saṃvattati, na ubhayabyābādhāyapi saṃvattati – kusalaṃ idaṃ kāyakammaṃ sukhudrayaṃ sukhavipāka’nti, teneva tvaṃ, rāhula, pītipāmojjena vihareyyāsi ahorattānusikkhī kusalesu dhammesu.
১১০. ‘‘যদেৰ ত্ৰং, রাহুল, ৰাচায কম্মং কত্তুকামো অহোসি, তদেৰ তে ৰচীকম্মং পচ্চৰেক্খিতব্বং – ‘যং নু খো অহং ইদং ৰাচায কম্মং কত্তুকামো ইদং মে ৰচীকম্মং অত্তব্যাবাধাযপি সংৰত্তেয্য, পরব্যাবাধাযপি সংৰত্তেয্য, উভযব্যাবাধাযপি সংৰত্তেয্য – অকুসলং ইদং ৰচীকম্মং দুক্খুদ্রযং দুক্খৰিপাক’ন্তি? সচে ত্ৰং, রাহুল, পচ্চৰেক্খমানো এৰং জানেয্যাসি – ‘যং খো অহং ইদং ৰাচায কম্মং কত্তুকামো ইদং মে ৰচীকম্মং অত্তব্যাবাধাযপি সংৰত্তেয্য, পরব্যাবাধাযপি সংৰত্তেয্য, উভযব্যাবাধাযপি সংৰত্তেয্য – অকুসলং ইদং ৰচীকম্মং দুক্খুদ্রযং দুক্খৰিপাক’ন্তি, এৰরূপং তে, রাহুল, ৰাচায কম্মং সসক্কং ন করণীযং। সচে পন ত্ৰং, রাহুল, পচ্চৰেক্খমানো এৰং জানেয্যাসি – ‘যং খো অহং ইদং ৰাচায কম্মং কত্তুকামো ইদং মে ৰচীকম্মং নেৰত্তব্যাবাধাযপি সংৰত্তেয্য, ন পরব্যাবাধাযপি সংৰত্তেয্য – কুসলং ইদং ৰচীকম্মং সুখুদ্রযং সুখৰিপাক’ন্তি, এৰরূপং তে, রাহুল, ৰাচায কম্মং করণীযং।
110. ‘‘Yadeva tvaṃ, rāhula, vācāya kammaṃ kattukāmo ahosi, tadeva te vacīkammaṃ paccavekkhitabbaṃ – ‘yaṃ nu kho ahaṃ idaṃ vācāya kammaṃ kattukāmo idaṃ me vacīkammaṃ attabyābādhāyapi saṃvatteyya, parabyābādhāyapi saṃvatteyya, ubhayabyābādhāyapi saṃvatteyya – akusalaṃ idaṃ vacīkammaṃ dukkhudrayaṃ dukkhavipāka’nti? Sace tvaṃ, rāhula, paccavekkhamāno evaṃ jāneyyāsi – ‘yaṃ kho ahaṃ idaṃ vācāya kammaṃ kattukāmo idaṃ me vacīkammaṃ attabyābādhāyapi saṃvatteyya, parabyābādhāyapi saṃvatteyya, ubhayabyābādhāyapi saṃvatteyya – akusalaṃ idaṃ vacīkammaṃ dukkhudrayaṃ dukkhavipāka’nti, evarūpaṃ te, rāhula, vācāya kammaṃ sasakkaṃ na karaṇīyaṃ. Sace pana tvaṃ, rāhula, paccavekkhamāno evaṃ jāneyyāsi – ‘yaṃ kho ahaṃ idaṃ vācāya kammaṃ kattukāmo idaṃ me vacīkammaṃ nevattabyābādhāyapi saṃvatteyya, na parabyābādhāyapi saṃvatteyya – kusalaṃ idaṃ vacīkammaṃ sukhudrayaṃ sukhavipāka’nti, evarūpaṃ te, rāhula, vācāya kammaṃ karaṇīyaṃ.
‘‘করোন্তেনপি, রাহুল, ৰাচায কম্মং তদেৰ তে ৰচীকম্মং পচ্চৰেক্খিতব্বং – ‘যং নু খো অহং ইদং ৰাচায কম্মং করোমি ইদং মে ৰচীকম্মং অত্তব্যাবাধাযপি সংৰত্ততি, পরব্যাবাধাযপি সংৰত্ততি, উভযব্যাবাধাযপি সংৰত্ততি – অকুসলং ইদং ৰচীকম্মং দুক্খুদ্রযং দুক্খৰিপাক’ন্তি? সচে পন ত্ৰং, রাহুল, পচ্চৰেক্খমানো এৰং জানেয্যাসি – ‘যং খো অহং ইদং ৰাচায কম্মং করোমি ইদং মে ৰচীকম্মং অত্তব্যাবাধাযপি সংৰত্ততি, পরব্যাবাধাযপি সংৰত্ততি, উভযব্যাবাধাযপি সংৰত্ততি – অকুসলং ইদং ৰচীকম্মং দুক্খুদ্রযং দুক্খৰিপাক’ন্তি, পটিসংহরেয্যাসি ত্ৰং, রাহুল, এৰরূপং ৰচীকম্মং। সচে পন ত্ৰং, রাহুল, পচ্চৰেক্খমানো এৰং জানেয্যাসি – ‘যং খো অহং ইদং ৰাচায কম্মং করোমি ইদং মে ৰচীকম্মং নেৰত্তব্যাবাধাযপি সংৰত্ততি, ন পরব্যাবাধাযপি সংৰত্ততি, ন উভযব্যাবাধাযপি সংৰত্ততি – কুসলং ইদং ৰচীকম্মং সুখুদ্রযং সুখৰিপাক’ন্তি, অনুপদজ্জেয্যাসি, ত্ৰং রাহুল, এৰরূপং ৰচীকম্মং।
‘‘Karontenapi, rāhula, vācāya kammaṃ tadeva te vacīkammaṃ paccavekkhitabbaṃ – ‘yaṃ nu kho ahaṃ idaṃ vācāya kammaṃ karomi idaṃ me vacīkammaṃ attabyābādhāyapi saṃvattati, parabyābādhāyapi saṃvattati, ubhayabyābādhāyapi saṃvattati – akusalaṃ idaṃ vacīkammaṃ dukkhudrayaṃ dukkhavipāka’nti? Sace pana tvaṃ, rāhula, paccavekkhamāno evaṃ jāneyyāsi – ‘yaṃ kho ahaṃ idaṃ vācāya kammaṃ karomi idaṃ me vacīkammaṃ attabyābādhāyapi saṃvattati, parabyābādhāyapi saṃvattati, ubhayabyābādhāyapi saṃvattati – akusalaṃ idaṃ vacīkammaṃ dukkhudrayaṃ dukkhavipāka’nti, paṭisaṃhareyyāsi tvaṃ, rāhula, evarūpaṃ vacīkammaṃ. Sace pana tvaṃ, rāhula, paccavekkhamāno evaṃ jāneyyāsi – ‘yaṃ kho ahaṃ idaṃ vācāya kammaṃ karomi idaṃ me vacīkammaṃ nevattabyābādhāyapi saṃvattati, na parabyābādhāyapi saṃvattati, na ubhayabyābādhāyapi saṃvattati – kusalaṃ idaṃ vacīkammaṃ sukhudrayaṃ sukhavipāka’nti, anupadajjeyyāsi, tvaṃ rāhula, evarūpaṃ vacīkammaṃ.
‘‘কত্ৰাপি তে, রাহুল, ৰাচায কম্মং তদেৰ তে ৰচীকম্মং পচ্চৰেক্খিতব্বং – ‘যং নু খো অহং ইদং ৰাচায কম্মং অকাসিং ইদং মে ৰচীকম্মং অত্তব্যাবাধাযপি সংৰত্ততি 9, পরব্যাবাধাযপি সংৰত্ততি, উভযব্যাবাধাযপি সংৰত্ততি – অকুসলং ইদং ৰচীকম্মং দুক্খুদ্রযং দুক্খৰিপাক’ন্তি? সচে খো ত্ৰং, রাহুল, পচ্চৰেক্খমানো এৰং জানেয্যাসি – ‘যং খো অহং ইদং ৰাচায কম্মং অকাসিং ইদং মে ৰচীকম্মং অত্তব্যাবাধাযপি সংৰত্ততি, পরব্যাবাধাযপি সংৰত্ততি, উভযব্যাবাধাযপি সংৰত্ততি – অকুসলং ইদং ৰচীকম্মং দুক্খুদ্রযং দুক্খৰিপাক’ন্তি, এৰরূপং তে, রাহুল, ৰচীকম্মং সত্থরি ৰা ৰিঞ্ঞূসু ৰা সব্রহ্মচারীসু দেসেতব্বং, ৰিৰরিতব্বং, উত্তানীকত্তব্বং ; দেসেত্ৰা ৰিৰরিত্ৰা উত্তানীকত্ৰা আযতিং সংৰরং আপজ্জিতব্বং। সচে পন ত্ৰং, রাহুল, পচ্চৰেক্খমানো এৰং জানেয্যাসি – ‘যং খো অহং ইদং ৰাচায কম্মং অকাসিং ইদং মে ৰচীকম্মং নেৰত্তব্যাবাধাযপি সংৰত্ততি, ন পরব্যাবাধাযপি সংৰত্ততি, ন উভযব্যাবাধাযপি সংৰত্ততি – কুসলং ইদং ৰচীকম্মং সুখুদ্রযং সুখৰিপাক’ন্তি, তেনেৰ ত্ৰং, রাহুল, পীতিপামোজ্জেন ৰিহরেয্যাসি অহোরত্তানুসিক্খী কুসলেসু ধম্মেসু।
‘‘Katvāpi te, rāhula, vācāya kammaṃ tadeva te vacīkammaṃ paccavekkhitabbaṃ – ‘yaṃ nu kho ahaṃ idaṃ vācāya kammaṃ akāsiṃ idaṃ me vacīkammaṃ attabyābādhāyapi saṃvattati 10, parabyābādhāyapi saṃvattati, ubhayabyābādhāyapi saṃvattati – akusalaṃ idaṃ vacīkammaṃ dukkhudrayaṃ dukkhavipāka’nti? Sace kho tvaṃ, rāhula, paccavekkhamāno evaṃ jāneyyāsi – ‘yaṃ kho ahaṃ idaṃ vācāya kammaṃ akāsiṃ idaṃ me vacīkammaṃ attabyābādhāyapi saṃvattati, parabyābādhāyapi saṃvattati, ubhayabyābādhāyapi saṃvattati – akusalaṃ idaṃ vacīkammaṃ dukkhudrayaṃ dukkhavipāka’nti, evarūpaṃ te, rāhula, vacīkammaṃ satthari vā viññūsu vā sabrahmacārīsu desetabbaṃ, vivaritabbaṃ, uttānīkattabbaṃ ; desetvā vivaritvā uttānīkatvā āyatiṃ saṃvaraṃ āpajjitabbaṃ. Sace pana tvaṃ, rāhula, paccavekkhamāno evaṃ jāneyyāsi – ‘yaṃ kho ahaṃ idaṃ vācāya kammaṃ akāsiṃ idaṃ me vacīkammaṃ nevattabyābādhāyapi saṃvattati, na parabyābādhāyapi saṃvattati, na ubhayabyābādhāyapi saṃvattati – kusalaṃ idaṃ vacīkammaṃ sukhudrayaṃ sukhavipāka’nti, teneva tvaṃ, rāhula, pītipāmojjena vihareyyāsi ahorattānusikkhī kusalesu dhammesu.
১১১. ‘‘যদেৰ ত্ৰং, রাহুল, মনসা কম্মং কত্তুকামো অহোসি, তদেৰ তে মনোকম্মং পচ্চৰেক্খিতব্বং – ‘যং নু খো অহং ইদং মনসা কম্মং কত্তুকামো ইদং মে মনোকম্মং অত্তব্যাবাধাযপি সংৰত্তেয্য, পরব্যাবাধাযপি সংৰত্তেয্য, উভযব্যাবাধাযপি সংৰত্তেয্য – অকুসলং ইদং মনোকম্মং দুক্খুদ্রযং দুক্খৰিপাক’ন্তি? সচে ত্ৰং, রাহুল, পচ্চৰেক্খমানো এৰং জানেয্যাসি – ‘যং খো অহং ইদং মনসা কম্মং কত্তুকামো ইদং মে মনোকম্মং অত্তব্যাবাধাযপি সংৰত্তেয্য, পরব্যাবাধাযপি সংৰত্তেয্য, উভযব্যাবাধাযপি সংৰত্তেয্য – অকুসলং ইদং মনোকম্মং দুক্খুদ্রযং দুক্খৰিপাক’ন্তি, এৰরূপং তে, রাহুল, মনসা কম্মং সসক্কং ন করণীযং। সচে পন ত্ৰং, রাহুল, পচ্চৰেক্খমানো এৰং জানেয্যাসি – ‘যং খো অহং ইদং মনসা কম্মং কত্তুকামো ইদং মে মনোকম্মং নেৰত্তব্যাবাধাযপি সংৰত্তেয্য, ন পরব্যাবাধাযপি সংৰত্তেয্য, ন উভযব্যাবাধাযপি সংৰত্তেয্য – কুসলং ইদং মনোকম্মং সুখুদ্রযং সুখৰিপাক’ন্তি, এৰরূপং তে, রাহুল, মনসা কম্মং করণীযং।
111. ‘‘Yadeva tvaṃ, rāhula, manasā kammaṃ kattukāmo ahosi, tadeva te manokammaṃ paccavekkhitabbaṃ – ‘yaṃ nu kho ahaṃ idaṃ manasā kammaṃ kattukāmo idaṃ me manokammaṃ attabyābādhāyapi saṃvatteyya, parabyābādhāyapi saṃvatteyya, ubhayabyābādhāyapi saṃvatteyya – akusalaṃ idaṃ manokammaṃ dukkhudrayaṃ dukkhavipāka’nti? Sace tvaṃ, rāhula, paccavekkhamāno evaṃ jāneyyāsi – ‘yaṃ kho ahaṃ idaṃ manasā kammaṃ kattukāmo idaṃ me manokammaṃ attabyābādhāyapi saṃvatteyya, parabyābādhāyapi saṃvatteyya, ubhayabyābādhāyapi saṃvatteyya – akusalaṃ idaṃ manokammaṃ dukkhudrayaṃ dukkhavipāka’nti, evarūpaṃ te, rāhula, manasā kammaṃ sasakkaṃ na karaṇīyaṃ. Sace pana tvaṃ, rāhula, paccavekkhamāno evaṃ jāneyyāsi – ‘yaṃ kho ahaṃ idaṃ manasā kammaṃ kattukāmo idaṃ me manokammaṃ nevattabyābādhāyapi saṃvatteyya, na parabyābādhāyapi saṃvatteyya, na ubhayabyābādhāyapi saṃvatteyya – kusalaṃ idaṃ manokammaṃ sukhudrayaṃ sukhavipāka’nti, evarūpaṃ te, rāhula, manasā kammaṃ karaṇīyaṃ.
‘‘করোন্তেনপি তে, রাহুল, মনসা কম্মং তদেৰ তে মনোকম্মং পচ্চৰেক্খিতব্বং – ‘যং নু খো অহং ইদং মনসা কম্মং করোমি ইদং মে মনোকম্মং অত্তব্যাবাধাযপি সংৰত্ততি, পরব্যাবাধাযপি সংৰত্ততি, উভযব্যাবাধাযপি সংৰত্ততি – অকুসলং ইদং মনোকম্মং দুক্খুদ্রযং দুক্খৰিপাক’ন্তি? সচে পন ত্ৰং, রাহুল, পচ্চৰেক্খমানো এৰং জানেয্যাসি – ‘যং খো অহং ইদং মনসা কম্মং করোমি ইদং মে মনোকম্মং অত্তব্যাবাধাযপি সংৰত্ততি, পরব্যাবাধাযপি সংৰত্ততি, উভযব্যাবাধাযপি সংৰত্ততি – অকুসলং ইদং মনোকম্মং দুক্খুদ্রযং দুক্খৰিপাক’ন্তি, পটিসংহরেয্যাসি ত্ৰং, রাহুল, এৰরূপং মনোকম্মং। সচে পন ত্ৰং, রাহুল, পচ্চৰেক্খমানো এৰং জানেয্যাসি – ‘যং খো অহং ইদং মনসা কম্মং করোমি ইদং মে মনোকম্মং নেৰত্তব্যাবাধাযপি সংৰত্ততি, ন পরব্যাবাধাযপি সংৰত্ততি, ন উভযব্যাবাধাযপি সংৰত্ততি – কুসলং ইদং মনোকম্মং সুখুদ্রযং সুখৰিপাক’ন্তি, অনুপদজ্জেয্যাসি ত্ৰং, রাহুল, এৰরূপং মনোকম্মং।
‘‘Karontenapi te, rāhula, manasā kammaṃ tadeva te manokammaṃ paccavekkhitabbaṃ – ‘yaṃ nu kho ahaṃ idaṃ manasā kammaṃ karomi idaṃ me manokammaṃ attabyābādhāyapi saṃvattati, parabyābādhāyapi saṃvattati, ubhayabyābādhāyapi saṃvattati – akusalaṃ idaṃ manokammaṃ dukkhudrayaṃ dukkhavipāka’nti? Sace pana tvaṃ, rāhula, paccavekkhamāno evaṃ jāneyyāsi – ‘yaṃ kho ahaṃ idaṃ manasā kammaṃ karomi idaṃ me manokammaṃ attabyābādhāyapi saṃvattati, parabyābādhāyapi saṃvattati, ubhayabyābādhāyapi saṃvattati – akusalaṃ idaṃ manokammaṃ dukkhudrayaṃ dukkhavipāka’nti, paṭisaṃhareyyāsi tvaṃ, rāhula, evarūpaṃ manokammaṃ. Sace pana tvaṃ, rāhula, paccavekkhamāno evaṃ jāneyyāsi – ‘yaṃ kho ahaṃ idaṃ manasā kammaṃ karomi idaṃ me manokammaṃ nevattabyābādhāyapi saṃvattati, na parabyābādhāyapi saṃvattati, na ubhayabyābādhāyapi saṃvattati – kusalaṃ idaṃ manokammaṃ sukhudrayaṃ sukhavipāka’nti, anupadajjeyyāsi tvaṃ, rāhula, evarūpaṃ manokammaṃ.
‘‘কত্ৰাপি তে, রাহুল, মনসা কম্মং তদেৰ তে মনোকম্মং পচ্চৰেক্খিতব্বং – ‘যং নু খো অহং ইদং মনসা কম্মং অকাসিং ইদং মে মনোকম্মং অত্তব্যাবাধাযপি সংৰত্ততি 11, পরব্যাবাধাযপি সংৰত্ততি, উভযব্যাবাধাযপি সংৰত্ততি – অকুসলং ইদং মনোকম্মং দুক্খুদ্রযং দুক্খৰিপাক’ন্তি? সচে খো ত্ৰং, রাহুল, পচ্চৰেক্খমানো এৰং জানেয্যাসি – ‘যং খো অহং ইদং মনসা কম্মং অকাসিং ইদং মে মনোকম্মং অত্তব্যাবাধাযপি সংৰত্ততি, পরব্যাবাধাযপি সংৰত্ততি, উভযব্যাবাধাযপি সংৰত্ততি – অকুসলং ইদং মনোকম্মং দুক্খুদ্রযং দুক্খৰিপাক’ন্তি, এৰরূপং পন 12 তে, রাহুল, মনোকম্মং 13 অট্টীযিতব্বং হরাযিতব্বং জিগুচ্ছিতব্বং; অট্টীযিত্ৰা হরাযিত্ৰা জিগুচ্ছিত্ৰা আযতিং সংৰরং আপজ্জিতব্বং। সচে পন ত্ৰং, রাহুল, পচ্চৰেক্খমানো এৰং জানেয্যাসি – ‘যং খো অহং ইদং মনসা কম্মং অকাসিং ইদং মে মনোকম্মং নেৰত্তব্যাবাধাযপি সংৰত্ততি, ন পরব্যাবাধাযপি সংৰত্ততি, ন উভযব্যাবাধাযপি সংৰত্ততি – কুসলং ইদং মনোকম্মং সুখুদ্রযং সুখৰিপাক’ন্তি, তেনেৰ ত্ৰং, রাহুল, পীতিপামোজ্জেন ৰিহরেয্যাসি অহোরত্তানুসিক্খী কুসলেসু ধম্মেসু।
‘‘Katvāpi te, rāhula, manasā kammaṃ tadeva te manokammaṃ paccavekkhitabbaṃ – ‘yaṃ nu kho ahaṃ idaṃ manasā kammaṃ akāsiṃ idaṃ me manokammaṃ attabyābādhāyapi saṃvattati 14, parabyābādhāyapi saṃvattati, ubhayabyābādhāyapi saṃvattati – akusalaṃ idaṃ manokammaṃ dukkhudrayaṃ dukkhavipāka’nti? Sace kho tvaṃ, rāhula, paccavekkhamāno evaṃ jāneyyāsi – ‘yaṃ kho ahaṃ idaṃ manasā kammaṃ akāsiṃ idaṃ me manokammaṃ attabyābādhāyapi saṃvattati, parabyābādhāyapi saṃvattati, ubhayabyābādhāyapi saṃvattati – akusalaṃ idaṃ manokammaṃ dukkhudrayaṃ dukkhavipāka’nti, evarūpaṃ pana 15 te, rāhula, manokammaṃ 16 aṭṭīyitabbaṃ harāyitabbaṃ jigucchitabbaṃ; aṭṭīyitvā harāyitvā jigucchitvā āyatiṃ saṃvaraṃ āpajjitabbaṃ. Sace pana tvaṃ, rāhula, paccavekkhamāno evaṃ jāneyyāsi – ‘yaṃ kho ahaṃ idaṃ manasā kammaṃ akāsiṃ idaṃ me manokammaṃ nevattabyābādhāyapi saṃvattati, na parabyābādhāyapi saṃvattati, na ubhayabyābādhāyapi saṃvattati – kusalaṃ idaṃ manokammaṃ sukhudrayaṃ sukhavipāka’nti, teneva tvaṃ, rāhula, pītipāmojjena vihareyyāsi ahorattānusikkhī kusalesu dhammesu.
১১২. ‘‘যে হি কেচি, রাহুল, অতীতমদ্ধানং সমণা ৰা ব্রাহ্মণা ৰা কাযকম্মং পরিসোধেসুং, ৰচীকম্মং পরিসোধেসুং, মনোকম্মং পরিসোধেসুং, সব্বে তে এৰমেৰং পচ্চৰেক্খিত্ৰা পচ্চৰেক্খিত্ৰা কাযকম্মং পরিসোধেসুং, পচ্চৰেক্খিত্ৰা পচ্চৰেক্খিত্ৰা ৰচীকম্মং পরিসোধেসুং, পচ্চৰেক্খিত্ৰা পচ্চৰেক্খিত্ৰা মনোকম্মং পরিসোধেসুং। যেপি হি কেচি, রাহুল, অনাগতমদ্ধানং সমণা ৰা ব্রাহ্মণা ৰা কাযকম্মং পরিসোধেস্সন্তি, ৰচীকম্মং পরিসোধেস্সন্তি, মনোকম্মং পরিসোধেস্সন্তি, সব্বে তে এৰমেৰং পচ্চৰেক্খিত্ৰা পচ্চৰেক্খিত্ৰা কাযকম্মং পরিসোধেস্সন্তি, পচ্চৰেক্খিত্ৰা পচ্চৰেক্খিত্ৰা ৰচীকম্মং পরিসোধেস্সন্তি , পচ্চৰেক্খিত্ৰা পচ্চৰেক্খিত্ৰা মনোকম্মং পরিসোধেস্সন্তি। যেপি হি কেচি, রাহুল, এতরহি সমণা ৰা ব্রাহ্মণা ৰা কাযকম্মং পরিসোধেন্তি, ৰচীকম্মং পরিসোধেন্তি, মনোকম্মং পরিসোধেন্তি, সব্বে তে এৰমেৰং পচ্চৰেক্খিত্ৰা পচ্চৰেক্খিত্ৰা কাযকম্মং পরিসোধেন্তি, পচ্চৰেক্খিত্ৰা পচ্চৰেক্খিত্ৰা ৰচীকম্মং পরিসোধেন্তি, পচ্চৰেক্খিত্ৰা পচ্চৰেক্খিত্ৰা মনোকম্মং পরিসোধেন্তি। তস্মাতিহ, রাহুল, ‘পচ্চৰেক্খিত্ৰা পচ্চৰেক্খিত্ৰা কাযকম্মং পরিসোধেস্সামি, পচ্চৰেক্খিত্ৰা পচ্চৰেক্খিত্ৰা ৰচীকম্মং পরিসোধেস্সামি, পচ্চৰেক্খিত্ৰা পচ্চৰেক্খিত্ৰা মনোকম্মং পরিসোধেস্সামী’তি – এৰঞ্হি তে, রাহুল, সিক্খিতব্ব’’ন্তি।
112. ‘‘Ye hi keci, rāhula, atītamaddhānaṃ samaṇā vā brāhmaṇā vā kāyakammaṃ parisodhesuṃ, vacīkammaṃ parisodhesuṃ, manokammaṃ parisodhesuṃ, sabbe te evamevaṃ paccavekkhitvā paccavekkhitvā kāyakammaṃ parisodhesuṃ, paccavekkhitvā paccavekkhitvā vacīkammaṃ parisodhesuṃ, paccavekkhitvā paccavekkhitvā manokammaṃ parisodhesuṃ. Yepi hi keci, rāhula, anāgatamaddhānaṃ samaṇā vā brāhmaṇā vā kāyakammaṃ parisodhessanti, vacīkammaṃ parisodhessanti, manokammaṃ parisodhessanti, sabbe te evamevaṃ paccavekkhitvā paccavekkhitvā kāyakammaṃ parisodhessanti, paccavekkhitvā paccavekkhitvā vacīkammaṃ parisodhessanti , paccavekkhitvā paccavekkhitvā manokammaṃ parisodhessanti. Yepi hi keci, rāhula, etarahi samaṇā vā brāhmaṇā vā kāyakammaṃ parisodhenti, vacīkammaṃ parisodhenti, manokammaṃ parisodhenti, sabbe te evamevaṃ paccavekkhitvā paccavekkhitvā kāyakammaṃ parisodhenti, paccavekkhitvā paccavekkhitvā vacīkammaṃ parisodhenti, paccavekkhitvā paccavekkhitvā manokammaṃ parisodhenti. Tasmātiha, rāhula, ‘paccavekkhitvā paccavekkhitvā kāyakammaṃ parisodhessāmi, paccavekkhitvā paccavekkhitvā vacīkammaṃ parisodhessāmi, paccavekkhitvā paccavekkhitvā manokammaṃ parisodhessāmī’ti – evañhi te, rāhula, sikkhitabba’’nti.
ইদমৰোচ ভগৰা। অত্তমনো আযস্মা রাহুলো ভগৰতো ভাসিতং অভিনন্দীতি।
Idamavoca bhagavā. Attamano āyasmā rāhulo bhagavato bhāsitaṃ abhinandīti.
অম্বলট্ঠিকরাহুলোৰাদসুত্তং নিট্ঠিতং পঠমং।
Ambalaṭṭhikarāhulovādasuttaṃ niṭṭhitaṃ paṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ১. অম্বলট্ঠিকরাহুলোৰাদসুত্তৰণ্ণনা • 1. Ambalaṭṭhikarāhulovādasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ১. অম্বলট্ঠিকরাহুলোৰাদসুত্তৰণ্ণনা • 1. Ambalaṭṭhikarāhulovādasuttavaṇṇanā
