| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
2. பி⁴க்கு²வக்³கோ³
2. Bhikkhuvaggo
1. அம்ப³லட்டி²கராஹுலோவாத³ஸுத்தவண்ணனா
1. Ambalaṭṭhikarāhulovādasuttavaṇṇanā
107. அம்ப³லட்டி²காயந்தி எத்த² அம்ப³லட்டி²கா வுச்சதி ஸுஜாதோ தருணம்ப³ருக்கோ², தஸ்ஸ பன அவிதூ³ரே கதோ பாஸாதோ³ இத⁴ ‘‘அம்ப³லட்டி²கா’’தி அதி⁴ப்பேதோ. தேனாஹ ‘‘வேளுவனவிஹாரஸ்ஸா’’திஆதி³. பதா⁴னக⁴ரஸங்கே²பேதி பா⁴வனாகே³ஹப்பகாரே யோகீ³னங் கே³ஹேதி அத்தோ². திகி²ணோவ ஹோதி, ந தஸ்ஸ திகி²ணபா⁴வோ கேனசி காதப்³போ³ ஸபா⁴வஸித்³த⁴த்தா. ஏவமேவ அத்தனோ விமுத்திபரிபாசனகம்முனா திக்க²விஸத³பா⁴வப்பத்தியா அயம்பி ஆயஸ்மா…பே॰… தத்த² விஹாஸி. பகதிபஞ்ஞத்தமேவாதி பகதியா பஞ்ஞத்தங் பு³த்³தா⁴னங் உபக³மனதோ புரேதரமேவ சாரித்தவஸேன பஞ்ஞத்தங்.
107.Ambalaṭṭhikāyanti ettha ambalaṭṭhikā vuccati sujāto taruṇambarukkho, tassa pana avidūre kato pāsādo idha ‘‘ambalaṭṭhikā’’ti adhippeto. Tenāha ‘‘veḷuvanavihārassā’’tiādi. Padhānagharasaṅkhepeti bhāvanāgehappakāre yogīnaṃ geheti attho. Tikhiṇova hoti, na tassa tikhiṇabhāvo kenaci kātabbo sabhāvasiddhattā. Evameva attano vimuttiparipācanakammunā tikkhavisadabhāvappattiyā ayampi āyasmā…pe… tattha vihāsi. Pakatipaññattamevāti pakatiyā paññattaṃ buddhānaṃ upagamanato puretarameva cārittavasena paññattaṃ.
108. உத³கங் அனேன தீ⁴யதி, ட²பீயதி வா எத்தா²தி உத³காதா⁴னங். உத³கட்டா²னந்தி ச கு²த்³த³கபா⁴ஜனங். ‘‘ஓவாத³தா³னத்த²ங் ஆமந்தேஸீ’’தி வத்வா தங் பனஸ்ஸ ஓவாத³தா³னங் ந இதே⁴வ, அத² கோ² ப³ஹூஸு டா²னேஸு ப³ஹுக்க²த்துங் பவத்திதந்தி தானி தானி ஸங்கே²பதோ த³ஸ்ஸெத்வா இத⁴ ஸங்வண்ணனத்த²ங் ‘‘ப⁴க³வதா ஹீ’’திஆதி³ வுத்தங்.
108. Udakaṃ anena dhīyati, ṭhapīyati vā etthāti udakādhānaṃ. Udakaṭṭhānanti ca khuddakabhājanaṃ. ‘‘Ovādadānatthaṃ āmantesī’’ti vatvā taṃ panassa ovādadānaṃ na idheva, atha kho bahūsu ṭhānesu bahukkhattuṃ pavattitanti tāni tāni saṅkhepato dassetvā idha saṃvaṇṇanatthaṃ ‘‘bhagavatā hī’’tiādi vuttaṃ.
தத்த² ஸப்³ப³பு³த்³தே⁴ஹி அவிஜஹிதந்தி இமினா ஸப்³பே³ஸங் பு³த்³தா⁴னங் ஸாஸனே குமாரபஞ்ஹா நாம ஹோதீதி த³ஸ்ஸேதி. ஏகேகதோ பட்டா²ய யாவ த³ஸகா பவத்தா த³ஸ புச்சா² ஏதஸ்ஸாதி த³ஸபுச்ச²ங், ஏகேகதோ பட்டா²ய யாவ த³ஸகா ஏகுத்தரவஸேன பவத்தங் விஸ்ஸஜ்ஜனத்தா²ய பஞ்சபண்ணஸவிஸ்ஸஜ்ஜனங் ஸாமணேரபஞ்ஹந்தி ஸம்ப³ந்தோ⁴. யங் பனெத்த² வத்தப்³ப³ங், தங் பரமத்த²ஜோதிகாயங் கு²த்³த³கட்ட²கதா²யங் (கு²॰ பா॰ அட்ட²॰ 4.குமாரபஞ்ஹவண்ணனா) வுத்தனயேனேவ வேதி³தப்³ப³ங். அனாதீ³னவத³ஸ்ஸிதாய அபி⁴ண்ஹங் முஸா ஸமுதா³சரணதோ ‘‘பியமுஸாவாதா³’’தி வுத்தங், உத³காவஸேஸச²ட்³ட³னஉத³காதா⁴னநிகுஜ்ஜனஉக்குஜ்ஜனத³ஸ்ஸனஸஞ்ஞிதா சதஸ்ஸோ உத³காதா⁴னூபமாயோ ஸப்³ப³ஸ்ஸ யுத்³த⁴கம்மஸ்ஸ அகரணகரணவஸேன த³ஸ்ஸிதா த்³வே ஹத்தி²உபமாயோ.
Tattha sabbabuddhehi avijahitanti iminā sabbesaṃ buddhānaṃ sāsane kumārapañhā nāma hotīti dasseti. Ekekato paṭṭhāya yāva dasakā pavattā dasa pucchā etassāti dasapucchaṃ, ekekato paṭṭhāya yāva dasakā ekuttaravasena pavattaṃ vissajjanatthāya pañcapaṇṇasavissajjanaṃ sāmaṇerapañhanti sambandho. Yaṃ panettha vattabbaṃ, taṃ paramatthajotikāyaṃ khuddakaṭṭhakathāyaṃ (khu. pā. aṭṭha. 4.kumārapañhavaṇṇanā) vuttanayeneva veditabbaṃ. Anādīnavadassitāya abhiṇhaṃ musā samudācaraṇato ‘‘piyamusāvādā’’ti vuttaṃ, udakāvasesachaḍḍanaudakādhānanikujjanaukkujjanadassanasaññitā catasso udakādhānūpamāyo sabbassa yuddhakammassa akaraṇakaraṇavasena dassitā dve hatthiupamāyo.
தத்த² ராஹுலஸுத்தந்தி ஸுத்தனிபாதே ஆக³தங் ராஹுலஸுத்தங் (ஸு॰ நி॰ 337 ஆத³யோ). அபி⁴ண்ஹோவாத³வஸேன வுத்தந்தி இமினா அந்தரந்தரா தங் ஸுத்தங் கதெ²த்வா ப⁴க³வா தே²ரங் ஓவத³தீதி த³ஸ்ஸேதி. இத³ஞ்ச பனாதி இத³ங் யதா²வுத்தங் ப⁴க³வதோ தங்தங்காலானுரூபங் அத்தனோ ஓவாத³தா³னங் ஸந்தா⁴ய. பீ³ஜந்தி அண்ட³ங். பஸ்ஸஸி நூதி நு-ஸத்³தோ³ அனுஜானநே, நனு பஸ்ஸஸீதி அத்தோ². ஸச்சத⁴ம்மங் லங்கி⁴த்வா டி²தஸ்ஸ கிஞ்சிபி அகத்தப்³ப³ங் நாம பாபங் நத்தீ²தி ஆஹ – ‘‘ஸம்பஜானமுஸாவாதே³ ஸங்வரரஹிதஸ்ஸ ஓபம்மத³ஸ்ஸனத்த²ங் வுத்தா’’தி. ததா² ஹி –
Tattharāhulasuttanti suttanipāte āgataṃ rāhulasuttaṃ (su. ni. 337 ādayo). Abhiṇhovādavasena vuttanti iminā antarantarā taṃ suttaṃ kathetvā bhagavā theraṃ ovadatīti dasseti. Idañca panāti idaṃ yathāvuttaṃ bhagavato taṃtaṃkālānurūpaṃ attano ovādadānaṃ sandhāya. Bījanti aṇḍaṃ. Passasi nūti nu-saddo anujānane, nanu passasīti attho. Saccadhammaṃ laṅghitvā ṭhitassa kiñcipi akattabbaṃ nāma pāpaṃ natthīti āha – ‘‘sampajānamusāvāde saṃvararahitassa opammadassanatthaṃ vuttā’’ti. Tathā hi –
‘‘ஏகங் த⁴ம்மமதீதஸ்ஸ, முஸாவாதி³ஸ்ஸ ஜந்துனோ;
‘‘Ekaṃ dhammamatītassa, musāvādissa jantuno;
விதிண்ணபரலோகஸ்ஸ, நத்தி² பாபமகாரிய’’ந்தி. (த⁴॰ ப॰ 176);
Vitiṇṇaparalokassa, natthi pāpamakāriya’’nti. (dha. pa. 176);
உருள்ஹவாதி உருள்ஹோ ஹுத்வா உஸ்ஸிதோ. ஸோ பன த³மவஸேன அபி⁴ருய்ஹ வட்³டி⁴தோ ஆரோஹனயொக்³யோ ச ஹோதீதி ஆஹ ‘‘அபி⁴வட்³டி⁴தோ ஆரோஹஸம்பன்னோ’’தி. ஆக³தாக³தேதி அத்தனோ யொக்³யபதே³ஸங் ஆக³தாக³தே. படிஸேனாய ப²லககொட்ட²கமுண்ட³பாகாராத³யோதி படிஸேனாய அத்தனோ ஆரக்க²த்தா²ய ட²பிதே ப²லககொட்ட²கே சேவ உத்³த⁴ச்ச²த³பாகாராதி³கே ச. ஏதங் பதே³ஸந்தி ஏதங் பரஸேனாபதே³ஸங். எத்தகேனாதி ஓலோகனமத்தேன. தஸ்ஸ ஓலோகனாகாரத³ஸ்ஸனேனேவ. ஸதம்பி ஸஹஸ்ஸம்பி ஸேனானீகங் த்³வேதா⁴ பி⁴ஜ்ஜதி, தீரபாதிகங் மத்³தி³தங் ஹுத்வா பதா³தா ஹுத்வா த்³வேதா⁴ ஹுத்வா பலாயந்தி. கண்ணேஹி பஹரித்வாதி பகே³வ ஸரானங் ஆக³மனஸத்³த³ங் உபதா⁴ரெத்வா யதா² வேகோ³ ந ஹோதி, ஏவங் ஸமுட்டா²பெத்வா தேஹி பஹரித்வா பாதனங். படிஹத்தி²படிஅஸ்ஸாதிஆதி³னா பச்சேகங் பதி-ஸத்³தோ³ யோஜேதப்³போ³தி. தீ³கா⁴ஸிலட்டி²யாதி தீ³க⁴லதாய அஸிலட்டி²யா.
Uruḷhavāti uruḷho hutvā ussito. So pana damavasena abhiruyha vaḍḍhito ārohanayogyo ca hotīti āha ‘‘abhivaḍḍhito ārohasampanno’’ti. Āgatāgateti attano yogyapadesaṃ āgatāgate. Paṭisenāya phalakakoṭṭhakamuṇḍapākārādayoti paṭisenāya attano ārakkhatthāya ṭhapite phalakakoṭṭhake ceva uddhacchadapākārādike ca. Etaṃ padesanti etaṃ parasenāpadesaṃ. Ettakenāti olokanamattena. Tassa olokanākāradassaneneva. Satampi sahassampi senānīkaṃ dvedhā bhijjati, tīrapātikaṃ madditaṃ hutvā padātā hutvā dvedhā hutvā palāyanti. Kaṇṇehi paharitvāti pageva sarānaṃ āgamanasaddaṃ upadhāretvā yathā vego na hoti, evaṃ samuṭṭhāpetvā tehi paharitvā pātanaṃ. Paṭihatthipaṭiassātiādinā paccekaṃ pati-saddo yojetabboti. Dīghāsilaṭṭhiyāti dīghalatāya asilaṭṭhiyā.
கரணேதி கம்மகரணே. மஞ்ஞதி ஹத்தா²ரோஹோ. அயமுக்³க³ரந்தி தாதி³ஸே காலே க³ஹிதமுக்³க³ரங். ஓலோகெத்வாதி ஞாணசக்கு²னா தி³ஸ்வா, அபி⁴ண்ஹங் ஸம்பஜஞ்ஞங் உபட்ட²பெத்வாதி அத்தோ².
Karaṇeti kammakaraṇe. Maññati hatthāroho. Ayamuggaranti tādise kāle gahitamuggaraṃ. Oloketvāti ñāṇacakkhunā disvā, abhiṇhaṃ sampajaññaṃ upaṭṭhapetvāti attho.
109. ஸஸக்கந்தி பஸ்ஸிதுங் யுத்தங் கத்வா உஸ்ஸாஹங் ஜனெத்வா ந கரணீயங், தாதி³ஸங் நியமதோ அகத்தப்³ப³ங் ஹோதீதி ஆஹ ‘‘ஏகங்ஸேனேவ ந காதப்³ப³’’ந்தி. படிஸங்ஹரெய்யாஸீதி கரணதோ ஸங்கோசங் ஆபஜ்ஜெய்யாஸி. யதா²பூ⁴தோ அஸந்தோ நிவத்தோ அகரொந்தோ நாம ஹோதீதி ஆஹ ‘‘நிவத்தெய்யாஸி மா கரெய்யாஸீ’’தி. அனுபதெ³ய்யாஸீதி அனுப³லப்பதா³யீ ப⁴வெய்யாஸி. தேனாஹ ‘‘உபத்த²ம்பெ⁴ய்யாஸீ’’தி. தங் பன அனுப³லப்பதா³னங் உபத்த²ம்ப⁴னங் புனப்புனங் கரணமேவாதி ஆஹ ‘‘புனப்புனங் கரெய்யாஸீ’’தி . ஸிக்க²மானோதி தங்யேவ அதி⁴ஸீலஸிக்க²ங் தன்னிஸ்ஸயஞ்ச ஸிக்கா²த்³வயங் ஸிக்க²ந்தோ ஸம்பாதெ³ந்தோ.
109.Sasakkanti passituṃ yuttaṃ katvā ussāhaṃ janetvā na karaṇīyaṃ, tādisaṃ niyamato akattabbaṃ hotīti āha ‘‘ekaṃseneva na kātabba’’nti. Paṭisaṃhareyyāsīti karaṇato saṅkocaṃ āpajjeyyāsi. Yathābhūto asanto nivatto akaronto nāma hotīti āha ‘‘nivatteyyāsi mā kareyyāsī’’ti. Anupadeyyāsīti anubalappadāyī bhaveyyāsi. Tenāha ‘‘upatthambheyyāsī’’ti. Taṃ pana anubalappadānaṃ upatthambhanaṃ punappunaṃ karaṇamevāti āha ‘‘punappunaṃ kareyyāsī’’ti . Sikkhamānoti taṃyeva adhisīlasikkhaṃ tannissayañca sikkhādvayaṃ sikkhanto sampādento.
111. கித்தகே பன டா²னேதி கித்தகே டா²னே பவத்தானி. அவிதூ³ரே ஏவ பவத்தானீதி த³ஸ்ஸெந்தோ ‘‘ஏகஸ்மிங் புரேப⁴த்தேயேவ ஸோதே⁴தப்³பா³னீ’’தி ஆஹ. ஏவஞ்ஹி தானி ஸுஸோதி⁴தானி ஹொந்தி ஸுபரிஸுத்³தா⁴னி. பரேஸங் அப்பியங் க³ருங் கா³ரய்ஹங், யதா²வுத்தட்டா²னதோ பன அஞ்ஞங் வா கம்மட்டா²னமனஸிகாரேனேவ காயகம்மாதீ³னி பரிஸோதி⁴தானி ஹொந்தீதி ந க³ஹிதங். படிக⁴ங் வாதி எத்த² வா-ஸத்³தே³ன அஸமபெக்க²ணே மோஹஸ்ஸ ஸங்க³ஹோ த³ட்ட²ப்³போ³.
111.Kittakepana ṭhāneti kittake ṭhāne pavattāni. Avidūre eva pavattānīti dassento ‘‘ekasmiṃ purebhatteyeva sodhetabbānī’’ti āha. Evañhi tāni susodhitāni honti suparisuddhāni. Paresaṃ appiyaṃ garuṃ gārayhaṃ, yathāvuttaṭṭhānato pana aññaṃ vā kammaṭṭhānamanasikāreneva kāyakammādīni parisodhitāni hontīti na gahitaṃ. Paṭighaṃ vāti ettha vā-saddena asamapekkhaṇe mohassa saṅgaho daṭṭhabbo.
112. வுத்தனயேன காயகம்மாதி³பரிஸோத⁴னங் நாம இதே⁴வ, ந இதோ ப³ஹித்³தா⁴தி ஆஹ ‘‘பு³த்³தா⁴…பே॰… ஸாவகா வா’’தி. தே ஹி அத்த²தோ ஸமணப்³ராஹ்மணா வாதி. தஸ்மாதி யஸ்மா ஸப்³ப³பு³த்³த⁴பச்சேகபு³த்³த⁴ஸாவகேஹி ஆருள்ஹமக்³கோ³, ராஹுல, மயா துய்ஹங் ஆசிக்கி²தோ, தஸ்மா. தேன அனுஸிக்க²ந்தேன தயா ஏவங் ஸிக்கி²தப்³ப³ந்தி ஓவாத³ங் அதா³ஸி. ஸேஸங் வுத்தனயத்தா ஸுவிஞ்ஞெய்யமேவ.
112. Vuttanayena kāyakammādiparisodhanaṃ nāma idheva, na ito bahiddhāti āha ‘‘buddhā…pe… sāvakā vā’’ti. Te hi atthato samaṇabrāhmaṇā vāti. Tasmāti yasmā sabbabuddhapaccekabuddhasāvakehi āruḷhamaggo, rāhula, mayā tuyhaṃ ācikkhito, tasmā. Tena anusikkhantena tayā evaṃ sikkhitabbanti ovādaṃ adāsi. Sesaṃ vuttanayattā suviññeyyameva.
அம்ப³லட்டி²கராஹுலோவாத³ஸுத்தவண்ணனாய லீனத்த²ப்பகாஸனா
Ambalaṭṭhikarāhulovādasuttavaṇṇanāya līnatthappakāsanā
ஸமத்தா.
Samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 1. அம்ப³லட்டி²கராஹுலோவாத³ஸுத்தங் • 1. Ambalaṭṭhikarāhulovādasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 1. அம்ப³லட்டி²கராஹுலோவாத³ஸுத்தவண்ணனா • 1. Ambalaṭṭhikarāhulovādasuttavaṇṇanā
