| Library / Tipiṭaka / তিপিটক • Tipiṭaka / মজ্ঝিমনিকায (টীকা) • Majjhimanikāya (ṭīkā) |
২. ভিক্খুৰগ্গো
2. Bhikkhuvaggo
১. অম্বলট্ঠিকরাহুলোৰাদসুত্তৰণ্ণনা
1. Ambalaṭṭhikarāhulovādasuttavaṇṇanā
১০৭. অম্বলট্ঠিকাযন্তি এত্থ অম্বলট্ঠিকা ৰুচ্চতি সুজাতো তরুণম্বরুক্খো, তস্স পন অৰিদূরে কতো পাসাদো ইধ ‘‘অম্বলট্ঠিকা’’তি অধিপ্পেতো। তেনাহ ‘‘ৰেল়ুৰনৰিহারস্সা’’তিআদি। পধানঘরসঙ্খেপেতি ভাৰনাগেহপ্পকারে যোগীনং গেহেতি অত্থো। তিখিণোৰ হোতি, ন তস্স তিখিণভাৰো কেনচি কাতব্বো সভাৰসিদ্ধত্তা। এৰমেৰ অত্তনো ৰিমুত্তিপরিপাচনকম্মুনা তিক্খৰিসদভাৰপ্পত্তিযা অযম্পি আযস্মা…পে॰… তত্থ ৰিহাসি। পকতিপঞ্ঞত্তমেৰাতি পকতিযা পঞ্ঞত্তং বুদ্ধানং উপগমনতো পুরেতরমেৰ চারিত্তৰসেন পঞ্ঞত্তং।
107.Ambalaṭṭhikāyanti ettha ambalaṭṭhikā vuccati sujāto taruṇambarukkho, tassa pana avidūre kato pāsādo idha ‘‘ambalaṭṭhikā’’ti adhippeto. Tenāha ‘‘veḷuvanavihārassā’’tiādi. Padhānagharasaṅkhepeti bhāvanāgehappakāre yogīnaṃ geheti attho. Tikhiṇova hoti, na tassa tikhiṇabhāvo kenaci kātabbo sabhāvasiddhattā. Evameva attano vimuttiparipācanakammunā tikkhavisadabhāvappattiyā ayampi āyasmā…pe… tattha vihāsi. Pakatipaññattamevāti pakatiyā paññattaṃ buddhānaṃ upagamanato puretarameva cārittavasena paññattaṃ.
১০৮. উদকং অনেন ধীযতি, ঠপীযতি ৰা এত্থাতি উদকাধানং। উদকট্ঠানন্তি চ খুদ্দকভাজনং। ‘‘ওৰাদদানত্থং আমন্তেসী’’তি ৰত্ৰা তং পনস্স ওৰাদদানং ন ইধেৰ, অথ খো বহূসু ঠানেসু বহুক্খত্তুং পৰত্তিতন্তি তানি তানি সঙ্খেপতো দস্সেত্ৰা ইধ সংৰণ্ণনত্থং ‘‘ভগৰতা হী’’তিআদি ৰুত্তং।
108. Udakaṃ anena dhīyati, ṭhapīyati vā etthāti udakādhānaṃ. Udakaṭṭhānanti ca khuddakabhājanaṃ. ‘‘Ovādadānatthaṃ āmantesī’’ti vatvā taṃ panassa ovādadānaṃ na idheva, atha kho bahūsu ṭhānesu bahukkhattuṃ pavattitanti tāni tāni saṅkhepato dassetvā idha saṃvaṇṇanatthaṃ ‘‘bhagavatā hī’’tiādi vuttaṃ.
তত্থ সব্ববুদ্ধেহি অৰিজহিতন্তি ইমিনা সব্বেসং বুদ্ধানং সাসনে কুমারপঞ্হা নাম হোতীতি দস্সেতি। একেকতো পট্ঠায যাৰ দসকা পৰত্তা দস পুচ্ছা এতস্সাতি দসপুচ্ছং, একেকতো পট্ঠায যাৰ দসকা একুত্তরৰসেন পৰত্তং ৰিস্সজ্জনত্থায পঞ্চপণ্ণসৰিস্সজ্জনং সামণেরপঞ্হন্তি সম্বন্ধো। যং পনেত্থ ৰত্তব্বং, তং পরমত্থজোতিকাযং খুদ্দকট্ঠকথাযং (খু॰ পা॰ অট্ঠ॰ ৪.কুমারপঞ্হৰণ্ণনা) ৰুত্তনযেনেৰ ৰেদিতব্বং। অনাদীনৰদস্সিতায অভিণ্হং মুসা সমুদাচরণতো ‘‘পিযমুসাৰাদা’’তি ৰুত্তং, উদকাৰসেসছড্ডনউদকাধাননিকুজ্জনউক্কুজ্জনদস্সনসঞ্ঞিতা চতস্সো উদকাধানূপমাযো সব্বস্স যুদ্ধকম্মস্স অকরণকরণৰসেন দস্সিতা দ্ৰে হত্থিউপমাযো।
Tattha sabbabuddhehi avijahitanti iminā sabbesaṃ buddhānaṃ sāsane kumārapañhā nāma hotīti dasseti. Ekekato paṭṭhāya yāva dasakā pavattā dasa pucchā etassāti dasapucchaṃ, ekekato paṭṭhāya yāva dasakā ekuttaravasena pavattaṃ vissajjanatthāya pañcapaṇṇasavissajjanaṃ sāmaṇerapañhanti sambandho. Yaṃ panettha vattabbaṃ, taṃ paramatthajotikāyaṃ khuddakaṭṭhakathāyaṃ (khu. pā. aṭṭha. 4.kumārapañhavaṇṇanā) vuttanayeneva veditabbaṃ. Anādīnavadassitāya abhiṇhaṃ musā samudācaraṇato ‘‘piyamusāvādā’’ti vuttaṃ, udakāvasesachaḍḍanaudakādhānanikujjanaukkujjanadassanasaññitā catasso udakādhānūpamāyo sabbassa yuddhakammassa akaraṇakaraṇavasena dassitā dve hatthiupamāyo.
তত্থ রাহুলসুত্তন্তি সুত্তনিপাতে আগতং রাহুলসুত্তং (সু॰ নি॰ ৩৩৭ আদযো)। অভিণ্হোৰাদৰসেন ৰুত্তন্তি ইমিনা অন্তরন্তরা তং সুত্তং কথেত্ৰা ভগৰা থেরং ওৰদতীতি দস্সেতি। ইদঞ্চ পনাতি ইদং যথাৰুত্তং ভগৰতো তংতংকালানুরূপং অত্তনো ওৰাদদানং সন্ধায। বীজন্তি অণ্ডং। পস্সসি নূতি নু-সদ্দো অনুজাননে, ননু পস্সসীতি অত্থো। সচ্চধম্মং লঙ্ঘিত্ৰা ঠিতস্স কিঞ্চিপি অকত্তব্বং নাম পাপং নত্থীতি আহ – ‘‘সম্পজানমুসাৰাদে সংৰররহিতস্স ওপম্মদস্সনত্থং ৰুত্তা’’তি। তথা হি –
Tattharāhulasuttanti suttanipāte āgataṃ rāhulasuttaṃ (su. ni. 337 ādayo). Abhiṇhovādavasena vuttanti iminā antarantarā taṃ suttaṃ kathetvā bhagavā theraṃ ovadatīti dasseti. Idañca panāti idaṃ yathāvuttaṃ bhagavato taṃtaṃkālānurūpaṃ attano ovādadānaṃ sandhāya. Bījanti aṇḍaṃ. Passasi nūti nu-saddo anujānane, nanu passasīti attho. Saccadhammaṃ laṅghitvā ṭhitassa kiñcipi akattabbaṃ nāma pāpaṃ natthīti āha – ‘‘sampajānamusāvāde saṃvararahitassa opammadassanatthaṃ vuttā’’ti. Tathā hi –
‘‘একং ধম্মমতীতস্স, মুসাৰাদিস্স জন্তুনো।
‘‘Ekaṃ dhammamatītassa, musāvādissa jantuno;
ৰিতিণ্ণপরলোকস্স, নত্থি পাপমকারিয’’ন্তি॥ (ধ॰ প॰ ১৭৬)।
Vitiṇṇaparalokassa, natthi pāpamakāriya’’nti. (dha. pa. 176);
উরুল়্হৰাতি উরুল়্হো হুত্ৰা উস্সিতো। সো পন দমৰসেন অভিরুয্হ ৰড্ঢিতো আরোহনযোগ্যো চ হোতীতি আহ ‘‘অভিৰড্ঢিতো আরোহসম্পন্নো’’তি। আগতাগতেতি অত্তনো যোগ্যপদেসং আগতাগতে। পটিসেনায ফলককোট্ঠকমুণ্ডপাকারাদযোতি পটিসেনায অত্তনো আরক্খত্থায ঠপিতে ফলককোট্ঠকে চেৰ উদ্ধচ্ছদপাকারাদিকে চ। এতং পদেসন্তি এতং পরসেনাপদেসং। এত্তকেনাতি ওলোকনমত্তেন। তস্স ওলোকনাকারদস্সনেনেৰ। সতম্পি সহস্সম্পি সেনানীকং দ্ৰেধা ভিজ্জতি, তীরপাতিকং মদ্দিতং হুত্ৰা পদাতা হুত্ৰা দ্ৰেধা হুত্ৰা পলাযন্তি। কণ্ণেহি পহরিত্ৰাতি পগেৰ সরানং আগমনসদ্দং উপধারেত্ৰা যথা ৰেগো ন হোতি, এৰং সমুট্ঠাপেত্ৰা তেহি পহরিত্ৰা পাতনং। পটিহত্থিপটিঅস্সাতিআদিনা পচ্চেকং পতি-সদ্দো যোজেতব্বোতি। দীঘাসিলট্ঠিযাতি দীঘলতায অসিলট্ঠিযা।
Uruḷhavāti uruḷho hutvā ussito. So pana damavasena abhiruyha vaḍḍhito ārohanayogyo ca hotīti āha ‘‘abhivaḍḍhito ārohasampanno’’ti. Āgatāgateti attano yogyapadesaṃ āgatāgate. Paṭisenāya phalakakoṭṭhakamuṇḍapākārādayoti paṭisenāya attano ārakkhatthāya ṭhapite phalakakoṭṭhake ceva uddhacchadapākārādike ca. Etaṃ padesanti etaṃ parasenāpadesaṃ. Ettakenāti olokanamattena. Tassa olokanākāradassaneneva. Satampi sahassampi senānīkaṃ dvedhā bhijjati, tīrapātikaṃ madditaṃ hutvā padātā hutvā dvedhā hutvā palāyanti. Kaṇṇehi paharitvāti pageva sarānaṃ āgamanasaddaṃ upadhāretvā yathā vego na hoti, evaṃ samuṭṭhāpetvā tehi paharitvā pātanaṃ. Paṭihatthipaṭiassātiādinā paccekaṃ pati-saddo yojetabboti. Dīghāsilaṭṭhiyāti dīghalatāya asilaṭṭhiyā.
করণেতি কম্মকরণে। মঞ্ঞতি হত্থারোহো। অযমুগ্গরন্তি তাদিসে কালে গহিতমুগ্গরং। ওলোকেত্ৰাতি ঞাণচক্খুনা দিস্ৰা, অভিণ্হং সম্পজঞ্ঞং উপট্ঠপেত্ৰাতি অত্থো।
Karaṇeti kammakaraṇe. Maññati hatthāroho. Ayamuggaranti tādise kāle gahitamuggaraṃ. Oloketvāti ñāṇacakkhunā disvā, abhiṇhaṃ sampajaññaṃ upaṭṭhapetvāti attho.
১০৯. সসক্কন্তি পস্সিতুং যুত্তং কত্ৰা উস্সাহং জনেত্ৰা ন করণীযং, তাদিসং নিযমতো অকত্তব্বং হোতীতি আহ ‘‘একংসেনেৰ ন কাতব্ব’’ন্তি। পটিসংহরেয্যাসীতি করণতো সঙ্কোচং আপজ্জেয্যাসি। যথাভূতো অসন্তো নিৰত্তো অকরোন্তো নাম হোতীতি আহ ‘‘নিৰত্তেয্যাসি মা করেয্যাসী’’তি। অনুপদেয্যাসীতি অনুবলপ্পদাযী ভৰেয্যাসি। তেনাহ ‘‘উপত্থম্ভেয্যাসী’’তি। তং পন অনুবলপ্পদানং উপত্থম্ভনং পুনপ্পুনং করণমেৰাতি আহ ‘‘পুনপ্পুনং করেয্যাসী’’তি । সিক্খমানোতি তংযেৰ অধিসীলসিক্খং তন্নিস্সযঞ্চ সিক্খাদ্ৰযং সিক্খন্তো সম্পাদেন্তো।
109.Sasakkanti passituṃ yuttaṃ katvā ussāhaṃ janetvā na karaṇīyaṃ, tādisaṃ niyamato akattabbaṃ hotīti āha ‘‘ekaṃseneva na kātabba’’nti. Paṭisaṃhareyyāsīti karaṇato saṅkocaṃ āpajjeyyāsi. Yathābhūto asanto nivatto akaronto nāma hotīti āha ‘‘nivatteyyāsi mā kareyyāsī’’ti. Anupadeyyāsīti anubalappadāyī bhaveyyāsi. Tenāha ‘‘upatthambheyyāsī’’ti. Taṃ pana anubalappadānaṃ upatthambhanaṃ punappunaṃ karaṇamevāti āha ‘‘punappunaṃ kareyyāsī’’ti . Sikkhamānoti taṃyeva adhisīlasikkhaṃ tannissayañca sikkhādvayaṃ sikkhanto sampādento.
১১১. কিত্তকে পন ঠানেতি কিত্তকে ঠানে পৰত্তানি। অৰিদূরে এৰ পৰত্তানীতি দস্সেন্তো ‘‘একস্মিং পুরেভত্তেযেৰ সোধেতব্বানী’’তি আহ। এৰঞ্হি তানি সুসোধিতানি হোন্তি সুপরিসুদ্ধানি। পরেসং অপ্পিযং গরুং গারয্হং, যথাৰুত্তট্ঠানতো পন অঞ্ঞং ৰা কম্মট্ঠানমনসিকারেনেৰ কাযকম্মাদীনি পরিসোধিতানি হোন্তীতি ন গহিতং। পটিঘং ৰাতি এত্থ ৰা-সদ্দেন অসমপেক্খণে মোহস্স সঙ্গহো দট্ঠব্বো।
111.Kittakepana ṭhāneti kittake ṭhāne pavattāni. Avidūre eva pavattānīti dassento ‘‘ekasmiṃ purebhatteyeva sodhetabbānī’’ti āha. Evañhi tāni susodhitāni honti suparisuddhāni. Paresaṃ appiyaṃ garuṃ gārayhaṃ, yathāvuttaṭṭhānato pana aññaṃ vā kammaṭṭhānamanasikāreneva kāyakammādīni parisodhitāni hontīti na gahitaṃ. Paṭighaṃ vāti ettha vā-saddena asamapekkhaṇe mohassa saṅgaho daṭṭhabbo.
১১২. ৰুত্তনযেন কাযকম্মাদিপরিসোধনং নাম ইধেৰ, ন ইতো বহিদ্ধাতি আহ ‘‘বুদ্ধা…পে॰… সাৰকা ৰা’’তি। তে হি অত্থতো সমণব্রাহ্মণা ৰাতি। তস্মাতি যস্মা সব্ববুদ্ধপচ্চেকবুদ্ধসাৰকেহি আরুল়্হমগ্গো, রাহুল, মযা তুয্হং আচিক্খিতো, তস্মা। তেন অনুসিক্খন্তেন তযা এৰং সিক্খিতব্বন্তি ওৰাদং অদাসি। সেসং ৰুত্তনযত্তা সুৰিঞ্ঞেয্যমেৰ।
112. Vuttanayena kāyakammādiparisodhanaṃ nāma idheva, na ito bahiddhāti āha ‘‘buddhā…pe… sāvakā vā’’ti. Te hi atthato samaṇabrāhmaṇā vāti. Tasmāti yasmā sabbabuddhapaccekabuddhasāvakehi āruḷhamaggo, rāhula, mayā tuyhaṃ ācikkhito, tasmā. Tena anusikkhantena tayā evaṃ sikkhitabbanti ovādaṃ adāsi. Sesaṃ vuttanayattā suviññeyyameva.
অম্বলট্ঠিকরাহুলোৰাদসুত্তৰণ্ণনায লীনত্থপ্পকাসনা
Ambalaṭṭhikarāhulovādasuttavaṇṇanāya līnatthappakāsanā
সমত্তা।
Samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ১. অম্বলট্ঠিকরাহুলোৰাদসুত্তং • 1. Ambalaṭṭhikarāhulovādasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ১. অম্বলট্ঠিকরাহুলোৰাদসুত্তৰণ্ণনা • 1. Ambalaṭṭhikarāhulovādasuttavaṇṇanā
