| Library / Tipiṭaka / ਤਿਪਿਟਕ • Tipiṭaka / ਮਜ੍ਝਿਮਨਿਕਾਯ (ਟੀਕਾ) • Majjhimanikāya (ṭīkā) |
੨. ਭਿਕ੍ਖੁવਗ੍ਗੋ
2. Bhikkhuvaggo
੧. ਅਮ੍ਬਲਟ੍ਠਿਕਰਾਹੁਲੋવਾਦਸੁਤ੍ਤવਣ੍ਣਨਾ
1. Ambalaṭṭhikarāhulovādasuttavaṇṇanā
੧੦੭. ਅਮ੍ਬਲਟ੍ਠਿਕਾਯਨ੍ਤਿ ਏਤ੍ਥ ਅਮ੍ਬਲਟ੍ਠਿਕਾ વੁਚ੍ਚਤਿ ਸੁਜਾਤੋ ਤਰੁਣਮ੍ਬਰੁਕ੍ਖੋ, ਤਸ੍ਸ ਪਨ ਅવਿਦੂਰੇ ਕਤੋ ਪਾਸਾਦੋ ਇਧ ‘‘ਅਮ੍ਬਲਟ੍ਠਿਕਾ’’ਤਿ ਅਧਿਪ੍ਪੇਤੋ। ਤੇਨਾਹ ‘‘વੇਲ਼ੁવਨવਿਹਾਰਸ੍ਸਾ’’ਤਿਆਦਿ। ਪਧਾਨਘਰਸਙ੍ਖੇਪੇਤਿ ਭਾવਨਾਗੇਹਪ੍ਪਕਾਰੇ ਯੋਗੀਨਂ ਗੇਹੇਤਿ ਅਤ੍ਥੋ। ਤਿਖਿਣੋવ ਹੋਤਿ, ਨ ਤਸ੍ਸ ਤਿਖਿਣਭਾવੋ ਕੇਨਚਿ ਕਾਤਬ੍ਬੋ ਸਭਾવਸਿਦ੍ਧਤ੍ਤਾ। ਏવਮੇવ ਅਤ੍ਤਨੋ વਿਮੁਤ੍ਤਿਪਰਿਪਾਚਨਕਮ੍ਮੁਨਾ ਤਿਕ੍ਖવਿਸਦਭਾવਪ੍ਪਤ੍ਤਿਯਾ ਅਯਮ੍ਪਿ ਆਯਸ੍ਮਾ…ਪੇ॰… ਤਤ੍ਥ વਿਹਾਸਿ। ਪਕਤਿਪਞ੍ਞਤ੍ਤਮੇવਾਤਿ ਪਕਤਿਯਾ ਪਞ੍ਞਤ੍ਤਂ ਬੁਦ੍ਧਾਨਂ ਉਪਗਮਨਤੋ ਪੁਰੇਤਰਮੇવ ਚਾਰਿਤ੍ਤવਸੇਨ ਪਞ੍ਞਤ੍ਤਂ।
107.Ambalaṭṭhikāyanti ettha ambalaṭṭhikā vuccati sujāto taruṇambarukkho, tassa pana avidūre kato pāsādo idha ‘‘ambalaṭṭhikā’’ti adhippeto. Tenāha ‘‘veḷuvanavihārassā’’tiādi. Padhānagharasaṅkhepeti bhāvanāgehappakāre yogīnaṃ geheti attho. Tikhiṇova hoti, na tassa tikhiṇabhāvo kenaci kātabbo sabhāvasiddhattā. Evameva attano vimuttiparipācanakammunā tikkhavisadabhāvappattiyā ayampi āyasmā…pe… tattha vihāsi. Pakatipaññattamevāti pakatiyā paññattaṃ buddhānaṃ upagamanato puretarameva cārittavasena paññattaṃ.
੧੦੮. ਉਦਕਂ ਅਨੇਨ ਧੀਯਤਿ, ਠਪੀਯਤਿ વਾ ਏਤ੍ਥਾਤਿ ਉਦਕਾਧਾਨਂ। ਉਦਕਟ੍ਠਾਨਨ੍ਤਿ ਚ ਖੁਦ੍ਦਕਭਾਜਨਂ। ‘‘ਓવਾਦਦਾਨਤ੍ਥਂ ਆਮਨ੍ਤੇਸੀ’’ਤਿ વਤ੍વਾ ਤਂ ਪਨਸ੍ਸ ਓવਾਦਦਾਨਂ ਨ ਇਧੇવ, ਅਥ ਖੋ ਬਹੂਸੁ ਠਾਨੇਸੁ ਬਹੁਕ੍ਖਤ੍ਤੁਂ ਪવਤ੍ਤਿਤਨ੍ਤਿ ਤਾਨਿ ਤਾਨਿ ਸਙ੍ਖੇਪਤੋ ਦਸ੍ਸੇਤ੍વਾ ਇਧ ਸਂવਣ੍ਣਨਤ੍ਥਂ ‘‘ਭਗવਤਾ ਹੀ’’ਤਿਆਦਿ વੁਤ੍ਤਂ।
108. Udakaṃ anena dhīyati, ṭhapīyati vā etthāti udakādhānaṃ. Udakaṭṭhānanti ca khuddakabhājanaṃ. ‘‘Ovādadānatthaṃ āmantesī’’ti vatvā taṃ panassa ovādadānaṃ na idheva, atha kho bahūsu ṭhānesu bahukkhattuṃ pavattitanti tāni tāni saṅkhepato dassetvā idha saṃvaṇṇanatthaṃ ‘‘bhagavatā hī’’tiādi vuttaṃ.
ਤਤ੍ਥ ਸਬ੍ਬਬੁਦ੍ਧੇਹਿ ਅવਿਜਹਿਤਨ੍ਤਿ ਇਮਿਨਾ ਸਬ੍ਬੇਸਂ ਬੁਦ੍ਧਾਨਂ ਸਾਸਨੇ ਕੁਮਾਰਪਞ੍ਹਾ ਨਾਮ ਹੋਤੀਤਿ ਦਸ੍ਸੇਤਿ। ਏਕੇਕਤੋ ਪਟ੍ਠਾਯ ਯਾવ ਦਸਕਾ ਪવਤ੍ਤਾ ਦਸ ਪੁਚ੍ਛਾ ਏਤਸ੍ਸਾਤਿ ਦਸਪੁਚ੍ਛਂ, ਏਕੇਕਤੋ ਪਟ੍ਠਾਯ ਯਾવ ਦਸਕਾ ਏਕੁਤ੍ਤਰવਸੇਨ ਪવਤ੍ਤਂ વਿਸ੍ਸਜ੍ਜਨਤ੍ਥਾਯ ਪਞ੍ਚਪਣ੍ਣਸવਿਸ੍ਸਜ੍ਜਨਂ ਸਾਮਣੇਰਪਞ੍ਹਨ੍ਤਿ ਸਮ੍ਬਨ੍ਧੋ। ਯਂ ਪਨੇਤ੍ਥ વਤ੍ਤਬ੍ਬਂ, ਤਂ ਪਰਮਤ੍ਥਜੋਤਿਕਾਯਂ ਖੁਦ੍ਦਕਟ੍ਠਕਥਾਯਂ (ਖੁ॰ ਪਾ॰ ਅਟ੍ਠ॰ ੪.ਕੁਮਾਰਪਞ੍ਹવਣ੍ਣਨਾ) વੁਤ੍ਤਨਯੇਨੇવ વੇਦਿਤਬ੍ਬਂ। ਅਨਾਦੀਨવਦਸ੍ਸਿਤਾਯ ਅਭਿਣ੍ਹਂ ਮੁਸਾ ਸਮੁਦਾਚਰਣਤੋ ‘‘ਪਿਯਮੁਸਾવਾਦਾ’’ਤਿ વੁਤ੍ਤਂ, ਉਦਕਾવਸੇਸਛਡ੍ਡਨਉਦਕਾਧਾਨਨਿਕੁਜ੍ਜਨਉਕ੍ਕੁਜ੍ਜਨਦਸ੍ਸਨਸਞ੍ਞਿਤਾ ਚਤਸ੍ਸੋ ਉਦਕਾਧਾਨੂਪਮਾਯੋ ਸਬ੍ਬਸ੍ਸ ਯੁਦ੍ਧਕਮ੍ਮਸ੍ਸ ਅਕਰਣਕਰਣવਸੇਨ ਦਸ੍ਸਿਤਾ ਦ੍વੇ ਹਤ੍ਥਿਉਪਮਾਯੋ।
Tattha sabbabuddhehi avijahitanti iminā sabbesaṃ buddhānaṃ sāsane kumārapañhā nāma hotīti dasseti. Ekekato paṭṭhāya yāva dasakā pavattā dasa pucchā etassāti dasapucchaṃ, ekekato paṭṭhāya yāva dasakā ekuttaravasena pavattaṃ vissajjanatthāya pañcapaṇṇasavissajjanaṃ sāmaṇerapañhanti sambandho. Yaṃ panettha vattabbaṃ, taṃ paramatthajotikāyaṃ khuddakaṭṭhakathāyaṃ (khu. pā. aṭṭha. 4.kumārapañhavaṇṇanā) vuttanayeneva veditabbaṃ. Anādīnavadassitāya abhiṇhaṃ musā samudācaraṇato ‘‘piyamusāvādā’’ti vuttaṃ, udakāvasesachaḍḍanaudakādhānanikujjanaukkujjanadassanasaññitā catasso udakādhānūpamāyo sabbassa yuddhakammassa akaraṇakaraṇavasena dassitā dve hatthiupamāyo.
ਤਤ੍ਥ ਰਾਹੁਲਸੁਤ੍ਤਨ੍ਤਿ ਸੁਤ੍ਤਨਿਪਾਤੇ ਆਗਤਂ ਰਾਹੁਲਸੁਤ੍ਤਂ (ਸੁ॰ ਨਿ॰ ੩੩੭ ਆਦਯੋ)। ਅਭਿਣ੍ਹੋવਾਦવਸੇਨ વੁਤ੍ਤਨ੍ਤਿ ਇਮਿਨਾ ਅਨ੍ਤਰਨ੍ਤਰਾ ਤਂ ਸੁਤ੍ਤਂ ਕਥੇਤ੍વਾ ਭਗવਾ ਥੇਰਂ ਓવਦਤੀਤਿ ਦਸ੍ਸੇਤਿ। ਇਦਞ੍ਚ ਪਨਾਤਿ ਇਦਂ ਯਥਾવੁਤ੍ਤਂ ਭਗવਤੋ ਤਂਤਂਕਾਲਾਨੁਰੂਪਂ ਅਤ੍ਤਨੋ ਓવਾਦਦਾਨਂ ਸਨ੍ਧਾਯ। ਬੀਜਨ੍ਤਿ ਅਣ੍ਡਂ। ਪਸ੍ਸਸਿ ਨੂਤਿ ਨੁ-ਸਦ੍ਦੋ ਅਨੁਜਾਨਨੇ, ਨਨੁ ਪਸ੍ਸਸੀਤਿ ਅਤ੍ਥੋ। ਸਚ੍ਚਧਮ੍ਮਂ ਲਙ੍ਘਿਤ੍વਾ ਠਿਤਸ੍ਸ ਕਿਞ੍ਚਿਪਿ ਅਕਤ੍ਤਬ੍ਬਂ ਨਾਮ ਪਾਪਂ ਨਤ੍ਥੀਤਿ ਆਹ – ‘‘ਸਮ੍ਪਜਾਨਮੁਸਾવਾਦੇ ਸਂવਰਰਹਿਤਸ੍ਸ ਓਪਮ੍ਮਦਸ੍ਸਨਤ੍ਥਂ વੁਤ੍ਤਾ’’ਤਿ। ਤਥਾ ਹਿ –
Tattharāhulasuttanti suttanipāte āgataṃ rāhulasuttaṃ (su. ni. 337 ādayo). Abhiṇhovādavasena vuttanti iminā antarantarā taṃ suttaṃ kathetvā bhagavā theraṃ ovadatīti dasseti. Idañca panāti idaṃ yathāvuttaṃ bhagavato taṃtaṃkālānurūpaṃ attano ovādadānaṃ sandhāya. Bījanti aṇḍaṃ. Passasi nūti nu-saddo anujānane, nanu passasīti attho. Saccadhammaṃ laṅghitvā ṭhitassa kiñcipi akattabbaṃ nāma pāpaṃ natthīti āha – ‘‘sampajānamusāvāde saṃvararahitassa opammadassanatthaṃ vuttā’’ti. Tathā hi –
‘‘ਏਕਂ ਧਮ੍ਮਮਤੀਤਸ੍ਸ, ਮੁਸਾવਾਦਿਸ੍ਸ ਜਨ੍ਤੁਨੋ।
‘‘Ekaṃ dhammamatītassa, musāvādissa jantuno;
વਿਤਿਣ੍ਣਪਰਲੋਕਸ੍ਸ, ਨਤ੍ਥਿ ਪਾਪਮਕਾਰਿਯ’’ਨ੍ਤਿ॥ (ਧ॰ ਪ॰ ੧੭੬)।
Vitiṇṇaparalokassa, natthi pāpamakāriya’’nti. (dha. pa. 176);
ਉਰੁਲ਼੍ਹવਾਤਿ ਉਰੁਲ਼੍ਹੋ ਹੁਤ੍વਾ ਉਸ੍ਸਿਤੋ। ਸੋ ਪਨ ਦਮવਸੇਨ ਅਭਿਰੁਯ੍ਹ વਡ੍ਢਿਤੋ ਆਰੋਹਨਯੋਗ੍ਯੋ ਚ ਹੋਤੀਤਿ ਆਹ ‘‘ਅਭਿવਡ੍ਢਿਤੋ ਆਰੋਹਸਮ੍ਪਨ੍ਨੋ’’ਤਿ। ਆਗਤਾਗਤੇਤਿ ਅਤ੍ਤਨੋ ਯੋਗ੍ਯਪਦੇਸਂ ਆਗਤਾਗਤੇ। ਪਟਿਸੇਨਾਯ ਫਲਕਕੋਟ੍ਠਕਮੁਣ੍ਡਪਾਕਾਰਾਦਯੋਤਿ ਪਟਿਸੇਨਾਯ ਅਤ੍ਤਨੋ ਆਰਕ੍ਖਤ੍ਥਾਯ ਠਪਿਤੇ ਫਲਕਕੋਟ੍ਠਕੇ ਚੇવ ਉਦ੍ਧਚ੍ਛਦਪਾਕਾਰਾਦਿਕੇ ਚ। ਏਤਂ ਪਦੇਸਨ੍ਤਿ ਏਤਂ ਪਰਸੇਨਾਪਦੇਸਂ। ਏਤ੍ਤਕੇਨਾਤਿ ਓਲੋਕਨਮਤ੍ਤੇਨ। ਤਸ੍ਸ ਓਲੋਕਨਾਕਾਰਦਸ੍ਸਨੇਨੇવ। ਸਤਮ੍ਪਿ ਸਹਸ੍ਸਮ੍ਪਿ ਸੇਨਾਨੀਕਂ ਦ੍વੇਧਾ ਭਿਜ੍ਜਤਿ, ਤੀਰਪਾਤਿਕਂ ਮਦ੍ਦਿਤਂ ਹੁਤ੍વਾ ਪਦਾਤਾ ਹੁਤ੍વਾ ਦ੍વੇਧਾ ਹੁਤ੍વਾ ਪਲਾਯਨ੍ਤਿ। ਕਣ੍ਣੇਹਿ ਪਹਰਿਤ੍વਾਤਿ ਪਗੇવ ਸਰਾਨਂ ਆਗਮਨਸਦ੍ਦਂ ਉਪਧਾਰੇਤ੍વਾ ਯਥਾ વੇਗੋ ਨ ਹੋਤਿ, ਏવਂ ਸਮੁਟ੍ਠਾਪੇਤ੍વਾ ਤੇਹਿ ਪਹਰਿਤ੍વਾ ਪਾਤਨਂ। ਪਟਿਹਤ੍ਥਿਪਟਿਅਸ੍ਸਾਤਿਆਦਿਨਾ ਪਚ੍ਚੇਕਂ ਪਤਿ-ਸਦ੍ਦੋ ਯੋਜੇਤਬ੍ਬੋਤਿ। ਦੀਘਾਸਿਲਟ੍ਠਿਯਾਤਿ ਦੀਘਲਤਾਯ ਅਸਿਲਟ੍ਠਿਯਾ।
Uruḷhavāti uruḷho hutvā ussito. So pana damavasena abhiruyha vaḍḍhito ārohanayogyo ca hotīti āha ‘‘abhivaḍḍhito ārohasampanno’’ti. Āgatāgateti attano yogyapadesaṃ āgatāgate. Paṭisenāya phalakakoṭṭhakamuṇḍapākārādayoti paṭisenāya attano ārakkhatthāya ṭhapite phalakakoṭṭhake ceva uddhacchadapākārādike ca. Etaṃ padesanti etaṃ parasenāpadesaṃ. Ettakenāti olokanamattena. Tassa olokanākāradassaneneva. Satampi sahassampi senānīkaṃ dvedhā bhijjati, tīrapātikaṃ madditaṃ hutvā padātā hutvā dvedhā hutvā palāyanti. Kaṇṇehi paharitvāti pageva sarānaṃ āgamanasaddaṃ upadhāretvā yathā vego na hoti, evaṃ samuṭṭhāpetvā tehi paharitvā pātanaṃ. Paṭihatthipaṭiassātiādinā paccekaṃ pati-saddo yojetabboti. Dīghāsilaṭṭhiyāti dīghalatāya asilaṭṭhiyā.
ਕਰਣੇਤਿ ਕਮ੍ਮਕਰਣੇ। ਮਞ੍ਞਤਿ ਹਤ੍ਥਾਰੋਹੋ। ਅਯਮੁਗ੍ਗਰਨ੍ਤਿ ਤਾਦਿਸੇ ਕਾਲੇ ਗਹਿਤਮੁਗ੍ਗਰਂ। ਓਲੋਕੇਤ੍વਾਤਿ ਞਾਣਚਕ੍ਖੁਨਾ ਦਿਸ੍વਾ, ਅਭਿਣ੍ਹਂ ਸਮ੍ਪਜਞ੍ਞਂ ਉਪਟ੍ਠਪੇਤ੍વਾਤਿ ਅਤ੍ਥੋ।
Karaṇeti kammakaraṇe. Maññati hatthāroho. Ayamuggaranti tādise kāle gahitamuggaraṃ. Oloketvāti ñāṇacakkhunā disvā, abhiṇhaṃ sampajaññaṃ upaṭṭhapetvāti attho.
੧੦੯. ਸਸਕ੍ਕਨ੍ਤਿ ਪਸ੍ਸਿਤੁਂ ਯੁਤ੍ਤਂ ਕਤ੍વਾ ਉਸ੍ਸਾਹਂ ਜਨੇਤ੍વਾ ਨ ਕਰਣੀਯਂ, ਤਾਦਿਸਂ ਨਿਯਮਤੋ ਅਕਤ੍ਤਬ੍ਬਂ ਹੋਤੀਤਿ ਆਹ ‘‘ਏਕਂਸੇਨੇવ ਨ ਕਾਤਬ੍ਬ’’ਨ੍ਤਿ। ਪਟਿਸਂਹਰੇਯ੍ਯਾਸੀਤਿ ਕਰਣਤੋ ਸਙ੍ਕੋਚਂ ਆਪਜ੍ਜੇਯ੍ਯਾਸਿ। ਯਥਾਭੂਤੋ ਅਸਨ੍ਤੋ ਨਿવਤ੍ਤੋ ਅਕਰੋਨ੍ਤੋ ਨਾਮ ਹੋਤੀਤਿ ਆਹ ‘‘ਨਿવਤ੍ਤੇਯ੍ਯਾਸਿ ਮਾ ਕਰੇਯ੍ਯਾਸੀ’’ਤਿ। ਅਨੁਪਦੇਯ੍ਯਾਸੀਤਿ ਅਨੁਬਲਪ੍ਪਦਾਯੀ ਭવੇਯ੍ਯਾਸਿ। ਤੇਨਾਹ ‘‘ਉਪਤ੍ਥਮ੍ਭੇਯ੍ਯਾਸੀ’’ਤਿ। ਤਂ ਪਨ ਅਨੁਬਲਪ੍ਪਦਾਨਂ ਉਪਤ੍ਥਮ੍ਭਨਂ ਪੁਨਪ੍ਪੁਨਂ ਕਰਣਮੇવਾਤਿ ਆਹ ‘‘ਪੁਨਪ੍ਪੁਨਂ ਕਰੇਯ੍ਯਾਸੀ’’ਤਿ । ਸਿਕ੍ਖਮਾਨੋਤਿ ਤਂਯੇવ ਅਧਿਸੀਲਸਿਕ੍ਖਂ ਤਨ੍ਨਿਸ੍ਸਯਞ੍ਚ ਸਿਕ੍ਖਾਦ੍વਯਂ ਸਿਕ੍ਖਨ੍ਤੋ ਸਮ੍ਪਾਦੇਨ੍ਤੋ।
109.Sasakkanti passituṃ yuttaṃ katvā ussāhaṃ janetvā na karaṇīyaṃ, tādisaṃ niyamato akattabbaṃ hotīti āha ‘‘ekaṃseneva na kātabba’’nti. Paṭisaṃhareyyāsīti karaṇato saṅkocaṃ āpajjeyyāsi. Yathābhūto asanto nivatto akaronto nāma hotīti āha ‘‘nivatteyyāsi mā kareyyāsī’’ti. Anupadeyyāsīti anubalappadāyī bhaveyyāsi. Tenāha ‘‘upatthambheyyāsī’’ti. Taṃ pana anubalappadānaṃ upatthambhanaṃ punappunaṃ karaṇamevāti āha ‘‘punappunaṃ kareyyāsī’’ti . Sikkhamānoti taṃyeva adhisīlasikkhaṃ tannissayañca sikkhādvayaṃ sikkhanto sampādento.
੧੧੧. ਕਿਤ੍ਤਕੇ ਪਨ ਠਾਨੇਤਿ ਕਿਤ੍ਤਕੇ ਠਾਨੇ ਪવਤ੍ਤਾਨਿ। ਅવਿਦੂਰੇ ਏવ ਪવਤ੍ਤਾਨੀਤਿ ਦਸ੍ਸੇਨ੍ਤੋ ‘‘ਏਕਸ੍ਮਿਂ ਪੁਰੇਭਤ੍ਤੇਯੇવ ਸੋਧੇਤਬ੍ਬਾਨੀ’’ਤਿ ਆਹ। ਏવਞ੍ਹਿ ਤਾਨਿ ਸੁਸੋਧਿਤਾਨਿ ਹੋਨ੍ਤਿ ਸੁਪਰਿਸੁਦ੍ਧਾਨਿ। ਪਰੇਸਂ ਅਪ੍ਪਿਯਂ ਗਰੁਂ ਗਾਰਯ੍ਹਂ, ਯਥਾવੁਤ੍ਤਟ੍ਠਾਨਤੋ ਪਨ ਅਞ੍ਞਂ વਾ ਕਮ੍ਮਟ੍ਠਾਨਮਨਸਿਕਾਰੇਨੇવ ਕਾਯਕਮ੍ਮਾਦੀਨਿ ਪਰਿਸੋਧਿਤਾਨਿ ਹੋਨ੍ਤੀਤਿ ਨ ਗਹਿਤਂ। ਪਟਿਘਂ વਾਤਿ ਏਤ੍ਥ વਾ-ਸਦ੍ਦੇਨ ਅਸਮਪੇਕ੍ਖਣੇ ਮੋਹਸ੍ਸ ਸਙ੍ਗਹੋ ਦਟ੍ਠਬ੍ਬੋ।
111.Kittakepana ṭhāneti kittake ṭhāne pavattāni. Avidūre eva pavattānīti dassento ‘‘ekasmiṃ purebhatteyeva sodhetabbānī’’ti āha. Evañhi tāni susodhitāni honti suparisuddhāni. Paresaṃ appiyaṃ garuṃ gārayhaṃ, yathāvuttaṭṭhānato pana aññaṃ vā kammaṭṭhānamanasikāreneva kāyakammādīni parisodhitāni hontīti na gahitaṃ. Paṭighaṃ vāti ettha vā-saddena asamapekkhaṇe mohassa saṅgaho daṭṭhabbo.
੧੧੨. વੁਤ੍ਤਨਯੇਨ ਕਾਯਕਮ੍ਮਾਦਿਪਰਿਸੋਧਨਂ ਨਾਮ ਇਧੇવ, ਨ ਇਤੋ ਬਹਿਦ੍ਧਾਤਿ ਆਹ ‘‘ਬੁਦ੍ਧਾ…ਪੇ॰… ਸਾવਕਾ વਾ’’ਤਿ। ਤੇ ਹਿ ਅਤ੍ਥਤੋ ਸਮਣਬ੍ਰਾਹ੍ਮਣਾ વਾਤਿ। ਤਸ੍ਮਾਤਿ ਯਸ੍ਮਾ ਸਬ੍ਬਬੁਦ੍ਧਪਚ੍ਚੇਕਬੁਦ੍ਧਸਾવਕੇਹਿ ਆਰੁਲ਼੍ਹਮਗ੍ਗੋ, ਰਾਹੁਲ, ਮਯਾ ਤੁਯ੍ਹਂ ਆਚਿਕ੍ਖਿਤੋ, ਤਸ੍ਮਾ। ਤੇਨ ਅਨੁਸਿਕ੍ਖਨ੍ਤੇਨ ਤਯਾ ਏવਂ ਸਿਕ੍ਖਿਤਬ੍ਬਨ੍ਤਿ ਓવਾਦਂ ਅਦਾਸਿ। ਸੇਸਂ વੁਤ੍ਤਨਯਤ੍ਤਾ ਸੁવਿਞ੍ਞੇਯ੍ਯਮੇવ।
112. Vuttanayena kāyakammādiparisodhanaṃ nāma idheva, na ito bahiddhāti āha ‘‘buddhā…pe… sāvakā vā’’ti. Te hi atthato samaṇabrāhmaṇā vāti. Tasmāti yasmā sabbabuddhapaccekabuddhasāvakehi āruḷhamaggo, rāhula, mayā tuyhaṃ ācikkhito, tasmā. Tena anusikkhantena tayā evaṃ sikkhitabbanti ovādaṃ adāsi. Sesaṃ vuttanayattā suviññeyyameva.
ਅਮ੍ਬਲਟ੍ਠਿਕਰਾਹੁਲੋવਾਦਸੁਤ੍ਤવਣ੍ਣਨਾਯ ਲੀਨਤ੍ਥਪ੍ਪਕਾਸਨਾ
Ambalaṭṭhikarāhulovādasuttavaṇṇanāya līnatthappakāsanā
ਸਮਤ੍ਤਾ।
Samattā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਮਜ੍ਝਿਮਨਿਕਾਯ • Majjhimanikāya / ੧. ਅਮ੍ਬਲਟ੍ਠਿਕਰਾਹੁਲੋવਾਦਸੁਤ੍ਤਂ • 1. Ambalaṭṭhikarāhulovādasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਮਜ੍ਝਿਮਨਿਕਾਯ (ਅਟ੍ਠਕਥਾ) • Majjhimanikāya (aṭṭhakathā) / ੧. ਅਮ੍ਬਲਟ੍ਠਿਕਰਾਹੁਲੋવਾਦਸੁਤ੍ਤવਣ੍ਣਨਾ • 1. Ambalaṭṭhikarāhulovādasuttavaṇṇanā
