| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
9. அம்ப³பாலிவனஸுத்தங்
9. Ambapālivanasuttaṃ
907. ஏகங் ஸமயங் ஆயஸ்மா ச அனுருத்³தோ⁴ ஆயஸ்மா ச ஸாரிபுத்தோ வேஸாலியங் விஹரந்தி அம்ப³பாலிவனே. அத² கோ² ஆயஸ்மா ஸாரிபுத்தோ ஸாயன்ஹஸமயங் படிஸல்லானா வுட்டி²தோ…பே॰… ஏகமந்தங் நிஸின்னோ கோ² ஆயஸ்மா ஸாரிபுத்தோ ஆயஸ்மந்தங் அனுருத்³த⁴ங் ஏதத³வோச –
907. Ekaṃ samayaṃ āyasmā ca anuruddho āyasmā ca sāriputto vesāliyaṃ viharanti ambapālivane. Atha kho āyasmā sāriputto sāyanhasamayaṃ paṭisallānā vuṭṭhito…pe… ekamantaṃ nisinno kho āyasmā sāriputto āyasmantaṃ anuruddhaṃ etadavoca –
‘‘விப்பஸன்னானி கோ² தே, ஆவுஸோ அனுருத்³த⁴, இந்த்³ரியானி, பரிஸுத்³தோ⁴ முக²வண்ணோ பரியோதா³தோ. கதமேனாயஸ்மா அனுருத்³தோ⁴ விஹாரேன ஏதரஹி ப³ஹுலங் விஹரதீ’’தி? ‘‘சதூஸு க்²வாஹங், ஆவுஸோ, ஸதிபட்டா²னேஸு ஸுப்பதிட்டி²தசித்தோ ஏதரஹி ப³ஹுலங் விஹராமி. கதமேஸு சதூஸு? இதா⁴ஹங், ஆவுஸோ, காயே காயானுபஸ்ஸீ விஹராமி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங்; வேத³னாஸு…பே॰… சித்தே…பே॰… த⁴ம்மேஸு த⁴ம்மானுபஸ்ஸீ விஹராமி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங் – இமேஸு க்²வாஹங், ஆவுஸோ, சதூஸு ஸதிபட்டா²னேஸு ஸுப்பதிட்டி²தசித்தோ ஏதரஹி ப³ஹுலங் விஹராமி. யோ ஸோ, ஆவுஸோ, பி⁴க்கு² அரஹங் கீ²ணாஸவோ வுஸிதவா கதகரணீயோ ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸங்யோஜனோ ஸம்மத³ஞ்ஞா விமுத்தோ, ஸோ இமேஸு சதூஸு ஸதிபட்டா²னேஸு ஸுப்பதிட்டி²தசித்தோ ப³ஹுலங் விஹரதீ’’தி.
‘‘Vippasannāni kho te, āvuso anuruddha, indriyāni, parisuddho mukhavaṇṇo pariyodāto. Katamenāyasmā anuruddho vihārena etarahi bahulaṃ viharatī’’ti? ‘‘Catūsu khvāhaṃ, āvuso, satipaṭṭhānesu suppatiṭṭhitacitto etarahi bahulaṃ viharāmi. Katamesu catūsu? Idhāhaṃ, āvuso, kāye kāyānupassī viharāmi ātāpī sampajāno satimā, vineyya loke abhijjhādomanassaṃ; vedanāsu…pe… citte…pe… dhammesu dhammānupassī viharāmi ātāpī sampajāno satimā, vineyya loke abhijjhādomanassaṃ – imesu khvāhaṃ, āvuso, catūsu satipaṭṭhānesu suppatiṭṭhitacitto etarahi bahulaṃ viharāmi. Yo so, āvuso, bhikkhu arahaṃ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṃyojano sammadaññā vimutto, so imesu catūsu satipaṭṭhānesu suppatiṭṭhitacitto bahulaṃ viharatī’’ti.
‘‘லாபா⁴ வத நோ, ஆவுஸோ, ஸுலத்³த⁴ங் வத நோ, ஆவுஸோ! யே மயங் ஆயஸ்மதோ அனுருத்³த⁴ஸ்ஸ ஸம்முகா²வ அஸ்ஸும்ஹ ஆஸபி⁴ங் வாசங் பா⁴ஸமானஸ்ஸா’’தி. நவமங்.
‘‘Lābhā vata no, āvuso, suladdhaṃ vata no, āvuso! Ye mayaṃ āyasmato anuruddhassa sammukhāva assumha āsabhiṃ vācaṃ bhāsamānassā’’ti. Navamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9. அம்ப³பாலிவனஸுத்தவண்ணனா • 9. Ambapālivanasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. அம்ப³பாலிவனஸுத்தவண்ணனா • 9. Ambapālivanasuttavaṇṇanā
