| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༡༧༦. ཨམྦཔཱལཱིཝཏྠུ
176. Ambapālīvatthu
༢༨༨. 1 ཨསྶོསི ཁོ ཨམྦཔཱལཱི གཎིཀཱ – བྷགཝཱ ཀིར ཀོཊིགཱམཾ ཨནུཔྤཏྟོཏི། ཨཐ ཁོ ཨམྦཔཱལཱི གཎིཀཱ བྷདྲཱནི བྷདྲཱནི ཡཱནཱནི ཡོཛཱཔེཏྭཱ བྷདྲཾ བྷདྲཾ ཡཱནཾ ཨབྷིརུཧིཏྭཱ བྷདྲེཧི བྷདྲེཧི ཡཱནེཧི ཝེསཱལིཡཱ ནིཡྻཱསི བྷགཝནྟཾ དསྶནཱཡ། ཡཱཝཏིཀཱ ཡཱནསྶ བྷཱུམི, ཡཱནེན གནྟྭཱ, ཡཱནཱ པཙྩོརོཧིཏྭཱ, པཏྟིཀཱཝ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣཾ ཁོ ཨམྦཔཱལིཾ གཎིཀཾ བྷགཝཱ དྷམྨིཡཱ ཀཐཱཡ སནྡསྶེསི སམཱདཔེསི སམུཏྟེཛེསི སམྤཧཾསེསི། ཨཐ ཁོ ཨམྦཔཱལཱི གཎིཀཱ བྷགཝཏཱ དྷམྨིཡཱ ཀཐཱཡ སནྡསྶིཏཱ སམཱདཔིཏཱ སམུཏྟེཛིཏཱ སམྤཧཾསིཏཱ བྷགཝནྟཾ ཨེཏདཝོཙ – ‘‘ཨདྷིཝཱསེཏུ མེ, བྷནྟེ, བྷགཝཱ སྭཱཏནཱཡ བྷཏྟཾ སདྡྷིཾ བྷིཀྑུསངྒྷེནཱ’’ཏི། ཨདྷིཝཱསེསི བྷགཝཱ ཏུཎྷཱིབྷཱཝེན། ཨཐ ཁོ ཨམྦཔཱལཱི གཎིཀཱ བྷགཝཏོ ཨདྷིཝཱསནཾ ཝིདིཏྭཱ ཨུཊྛཱཡཱསནཱ བྷགཝནྟཾ ཨབྷིཝཱདེཏྭཱ པདཀྑིཎཾ ཀཏྭཱ པཀྐཱམི།
288.2 Assosi kho ambapālī gaṇikā – bhagavā kira koṭigāmaṃ anuppattoti. Atha kho ambapālī gaṇikā bhadrāni bhadrāni yānāni yojāpetvā bhadraṃ bhadraṃ yānaṃ abhiruhitvā bhadrehi bhadrehi yānehi vesāliyā niyyāsi bhagavantaṃ dassanāya. Yāvatikā yānassa bhūmi, yānena gantvā, yānā paccorohitvā, pattikāva yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho ambapāliṃ gaṇikaṃ bhagavā dhammiyā kathāya sandassesi samādapesi samuttejesi sampahaṃsesi. Atha kho ambapālī gaṇikā bhagavatā dhammiyā kathāya sandassitā samādapitā samuttejitā sampahaṃsitā bhagavantaṃ etadavoca – ‘‘adhivāsetu me, bhante, bhagavā svātanāya bhattaṃ saddhiṃ bhikkhusaṅghenā’’ti. Adhivāsesi bhagavā tuṇhībhāvena. Atha kho ambapālī gaṇikā bhagavato adhivāsanaṃ viditvā uṭṭhāyāsanā bhagavantaṃ abhivādetvā padakkhiṇaṃ katvā pakkāmi.
ཨམྦཔཱལཱིཝཏྠུ ནིཊྛིཏཾ།
Ambapālīvatthu niṭṭhitaṃ.
Footnotes:
Related texts:
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ཨམྦཔཱལཱིཝཏྠུཀཐཱཝཎྞནཱ • Ambapālīvatthukathāvaṇṇanā
