| Library / Tipiṭaka / ཏིཔིཊཀ • Tipiṭaka / པེཏཝཏྠུ-ཨཊྛཀཐཱ • Petavatthu-aṭṭhakathā |
༤. མཧཱཝགྒོ
4. Mahāvaggo
༡. ཨམྦསཀྐརཔེཏཝཏྠུཝཎྞནཱ
1. Ambasakkarapetavatthuvaṇṇanā
ཝེསཱལཱི ནཱམ ནགརཏྠི ཝཛྫཱིནནྟི ཨིདཾ ཨམྦསཀྐརཔེཏཝཏྠུ། ཏསྶ ཀཱ ཨུཔྤཏྟི? བྷགཝཏི ཛེཏཝནེ ཝིཧརནྟེ ཨམྦསཀྐརོ ནཱམ ལིཙྪཝིརཱཛཱ མིཙྪཱདིཊྛིཀོ ནཏྠིཀཝཱདོ ཝེསཱལིཡཾ རཛྫཾ ཀཱརེསི། ཏེན ཙ སམཡེན ཝེསཱལིནགརེ ཨཉྙཏརསྶ ཝཱཎིཛསྶ ཨཱཔཎསམཱིཔེ ཙིཀྑལླཾ ཧོཏི, ཏཏྠ བཧཱུ ཛནཱ ཨུཔྤཏིཏྭཱ ཨཏིཀྐམནྟཱ ཀིལམནྟི, ཀེཙི ཀདྡམེན ལིམྤནྟི། ཏཾ དིསྭཱ སོ ཝཱཎིཛོ ‘‘མཱ ཨིམེ མནུསྶཱ ཀལལཾ ཨཀྐམིཾསཱུ’’ཏི ཨཔགཏདུགྒནྡྷཾ སངྑཝཎྞཔཊིབྷཱགཾ གོསཱིསཊྛིཾ ཨཱཧརཱཔེཏྭཱ ནིཀྑིཔཱཔེསི། པཀཏིཡཱ ཙ སཱིལཝཱ ཨཧོསི ཨཀྐོདྷནོ སཎྷཝཱཙོ, པརེསཉྩ ཡཐཱབྷཱུཏཾ གུཎཾ ཀིཏྟེཏི།
Vesālīnāma nagaratthi vajjīnanti idaṃ ambasakkarapetavatthu. Tassa kā uppatti? Bhagavati jetavane viharante ambasakkaro nāma licchavirājā micchādiṭṭhiko natthikavādo vesāliyaṃ rajjaṃ kāresi. Tena ca samayena vesālinagare aññatarassa vāṇijassa āpaṇasamīpe cikkhallaṃ hoti, tattha bahū janā uppatitvā atikkamantā kilamanti, keci kaddamena limpanti. Taṃ disvā so vāṇijo ‘‘mā ime manussā kalalaṃ akkamiṃsū’’ti apagataduggandhaṃ saṅkhavaṇṇapaṭibhāgaṃ gosīsaṭṭhiṃ āharāpetvā nikkhipāpesi. Pakatiyā ca sīlavā ahosi akkodhano saṇhavāco, paresañca yathābhūtaṃ guṇaṃ kitteti.
སོ ཨེཀསྨིཾ དིཝསེ ཨཏྟནོ སཧཱཡསྶ ནྷཱཡནྟསྶ པམཱདེན ཨནོལོཀེནྟསྶ ནིཝཱསནཝཏྠཾ ཀཱིལཱ༹དྷིཔྤཱཡེན ཨཔནིདྷཱཡ ཏཾ དུཀྑཱཔེཏྭཱ ཨདཱསི། བྷཱགིནེཡྻོ པནསྶ ཙོརིཀཱཡ པརགེཧཏོ བྷཎྜཾ ཨཱཧརིཏྭཱ ཏསྶེཝ ཨཱཔཎེ ནིཀྑིཔི། བྷཎྜསཱམིཀཱ ཝཱིམཾསནྟཱ བྷཎྜེན སདྡྷིཾ ཏསྶ བྷཱགིནེཡྻཾ ཏཉྩ རཉྙོ དསྶེསུཾ། རཱཛཱ ‘‘ཨིམསྶ སཱིསཾ ཚིནྡཐ, བྷཱགིནེཡྻཾ པནསྶ སཱུལེ ཨཱརོཔེཐཱ’’ཏི ཨཱཎཱཔེསི། རཱཛཔུརིསཱ ཏཐཱ ཨཀཾསུ། སོ ཀཱལཾ ཀཏྭཱ བྷུམྨདེཝེསུ ཨུཔྤཛྫི། སོ གོསཱིསེན སེཏུནོ ཀཏཏྟཱ སེཏཝཎྞཾ དིབྦཾ མནོཛཝཾ ཨསྶཱཛཱནཱིཡཾ པཊིལབྷི, གུཎཝནྟཱནཾ ཝཎྞཀཐནེན ཏསྶ གཏྟཏོ དིབྦགནྡྷོ ཝཱཡཏི, སཱཊཀསྶ པན ཨཔནིཧིཏཏྟཱ ནགྒོ ཨཧོསི། སོ ཨཏྟནཱ པུབྦེ ཀཏཀམྨཾ ཨོལོཀེནྟོ ཏདནུསཱརེན ཨཏྟནོ བྷཱགིནེཡྻཾ སཱུལེ ཨཱརོཔིཏཾ དིསྭཱ ཀརུཎཱཡ ཙོདིཡམཱནོ མནོཛཝཾ ཨསྶཾ ཨབྷིརུཧིཏྭཱ ཨཌྜྷརཏྟིསམཡེ ཏསྶ སཱུལཱ རོཔིཏཊྛཱནཾ གནྟྭཱ ཨཝིདཱུརེ ཋིཏོ ‘‘ཛཱིཝ, བྷོ, ཛཱིཝིཏམེཝ སེཡྻོ’’ཏི དིཝསེ དིཝསེ ཝདཏི།
So ekasmiṃ divase attano sahāyassa nhāyantassa pamādena anolokentassa nivāsanavatthaṃ kīḷādhippāyena apanidhāya taṃ dukkhāpetvā adāsi. Bhāgineyyo panassa corikāya paragehato bhaṇḍaṃ āharitvā tasseva āpaṇe nikkhipi. Bhaṇḍasāmikā vīmaṃsantā bhaṇḍena saddhiṃ tassa bhāgineyyaṃ tañca rañño dassesuṃ. Rājā ‘‘imassa sīsaṃ chindatha, bhāgineyyaṃ panassa sūle āropethā’’ti āṇāpesi. Rājapurisā tathā akaṃsu. So kālaṃ katvā bhummadevesu uppajji. So gosīsena setuno katattā setavaṇṇaṃ dibbaṃ manojavaṃ assājānīyaṃ paṭilabhi, guṇavantānaṃ vaṇṇakathanena tassa gattato dibbagandho vāyati, sāṭakassa pana apanihitattā naggo ahosi. So attanā pubbe katakammaṃ olokento tadanusārena attano bhāgineyyaṃ sūle āropitaṃ disvā karuṇāya codiyamāno manojavaṃ assaṃ abhiruhitvā aḍḍharattisamaye tassa sūlā ropitaṭṭhānaṃ gantvā avidūre ṭhito ‘‘jīva, bho, jīvitameva seyyo’’ti divase divase vadati.
ཏེན ཙ སམཡེན ཨམྦསཀྐརོ རཱཛཱ ཧཏྠིཀྑནྡྷཝརགཏོ ནགརཾ པདཀྑིཎཾ ཀརོནྟོ ཨཉྙཏརསྨིཾ གེཧེ ཝཱཏཔཱནཾ ཝིཝརིཏྭཱ རཱཛཝིབྷཱུཏིཾ པསྶནྟིཾ ཨེཀཾ ཨིཏྠིཾ དིསྭཱ པཊིབདྡྷཙིཏྟོ ཧུཏྭཱ པཙྪཱསནེ ནིསིནྣསྶ པུརིསསྶ ‘‘ཨིམཾ གྷརཾ ཨིམཉྩ ཨིཏྠིཾ ཨུཔདྷཱརེཧཱི’’ཏི སཉྙཾ དཏྭཱ ཨནུཀྐམེན ཨཏྟནོ རཱཛགེཧཾ པཝིཊྛོ ཏཾ པུརིསཾ པེསེསི – ‘‘གཙྪ, བྷཎེ, ཏསྶཱ ཨིཏྠིཡཱ སསཱམིཀབྷཱཝཾ ཝཱ ཨསཱམིཀབྷཱཝཾ ཝཱ ཛཱནཱཧཱི’’ཏི། སོ གནྟྭཱ ཏསྶཱ སསཱམིཀབྷཱཝཾ ཉཏྭཱ རཉྙོ ཨཱརོཙེསི། རཱཛཱ ཏསྶཱ ཨིཏྠིཡཱ པརིགྒཧཎཱུཔཱཡཾ ཙིནྟེནྟོ ཏསྶཱ སཱམིཀཾ པཀྐོསཱཔེཏྭཱ ‘‘ཨེཧི, བྷཎེ, མཾ ཨུཔཊྛཱཧཱི’’ཏི ཨཱཧ། སོ ཨནིཙྪནྟོཔི ‘‘རཱཛཱ ཨཏྟནོ ཝཙནཾ ཨཀརོནྟེ མཡི རཱཛདཎྜཾ ཀརེཡྻཱ’’ཏི བྷཡེན རཱཛུཔཊྛཱནཾ སམྤཊིཙྪིཏྭཱ དིཝསེ དིཝསེ རཱཛུཔཊྛཱནཾ གཙྪཏི། རཱཛཱཔི ཏསྶ བྷཏྟཝེཏནཾ དཱཔེཏྭཱ ཀཏིཔཡདིཝསཱཏིཀྐམེན པཱཏོཝ ཨུཔཊྛཱནཾ ཨཱགཏཾ ཨེཝམཱཧ – ‘‘གཙྪ, བྷཎེ, ཨམུམྷི ཋཱནེ ཨེཀཱ པོཀྑརཎཱི ཨཏྠི, ཏཏོ ཨརུཎཝཎྞམཏྟིཀཾ རཏྟུཔྤལཱནི ཙ ཨཱནེཧི, སཙེ ཨཛྫེཝ ནཱགཙྪེཡྻཱསི, ཛཱིཝིཏཾ ཏེ ནཏྠཱི’’ཏི། ཏསྨིཉྩ གཏེ དྭཱརཔཱལཾ ཨཱཧ – ‘‘ཨཛྫ ཨནཏྠངྒཏེ ཨེཝ སཱུརིཡེ སབྦདྭཱརཱནི ཐཀེཏབྦཱནཱི’’ཏི།
Tena ca samayena ambasakkaro rājā hatthikkhandhavaragato nagaraṃ padakkhiṇaṃ karonto aññatarasmiṃ gehe vātapānaṃ vivaritvā rājavibhūtiṃ passantiṃ ekaṃ itthiṃ disvā paṭibaddhacitto hutvā pacchāsane nisinnassa purisassa ‘‘imaṃ gharaṃ imañca itthiṃ upadhārehī’’ti saññaṃ datvā anukkamena attano rājagehaṃ paviṭṭho taṃ purisaṃ pesesi – ‘‘gaccha, bhaṇe, tassā itthiyā sasāmikabhāvaṃ vā asāmikabhāvaṃ vā jānāhī’’ti. So gantvā tassā sasāmikabhāvaṃ ñatvā rañño ārocesi. Rājā tassā itthiyā pariggahaṇūpāyaṃ cintento tassā sāmikaṃ pakkosāpetvā ‘‘ehi, bhaṇe, maṃ upaṭṭhāhī’’ti āha. So anicchantopi ‘‘rājā attano vacanaṃ akaronte mayi rājadaṇḍaṃ kareyyā’’ti bhayena rājupaṭṭhānaṃ sampaṭicchitvā divase divase rājupaṭṭhānaṃ gacchati. Rājāpi tassa bhattavetanaṃ dāpetvā katipayadivasātikkamena pātova upaṭṭhānaṃ āgataṃ evamāha – ‘‘gaccha, bhaṇe, amumhi ṭhāne ekā pokkharaṇī atthi, tato aruṇavaṇṇamattikaṃ rattuppalāni ca ānehi, sace ajjeva nāgaccheyyāsi, jīvitaṃ te natthī’’ti. Tasmiñca gate dvārapālaṃ āha – ‘‘ajja anatthaṅgate eva sūriye sabbadvārāni thaketabbānī’’ti.
སཱ ཙ པོཀྑརཎཱི ཝེསཱལིཡཱ ཏིཡོཛནམཏྠཀེ ཧོཏི, ཏཐཱཔི སོ པུརིསོ མརཎབྷཡཏཛྫིཏོ ཝཱཏཝེགེན པུབྦཎྷེཡེཝ ཏཾ པོཀྑརཎིཾ སམྤཱཔུཎི། ‘‘སཱ ཙ པོཀྑརཎཱི ཨམནུསྶཔརིགྒཧིཏཱ’’ཏི པགེཝ སུཏཏྟཱ བྷཡེན སོ ‘‘ཨཏྠི ནུ ཁོ ཨེཏྠ ཀོཙི པརིསྶཡོ’’ཏི སམནྟཏོ ཨནུཔརིཡཱཡཏི། ཏཾ དིསྭཱ པོཀྑརཎིཔཱལཀོ ཨམནུསྶོ ཀརུཎཱཡམཱནརཱུཔོ མནུསྶརཱུཔེན ཨུཔསངྐམིཏྭཱ ‘‘ཀིམཏྠཾ, བྷོ པུརིས, ཨིདྷཱགཏོསཱི’’ཏི ཨཱཧ། སོ ཏསྶ ཏཾ པཝཏྟིཾ ཀཐེསི། སོ ‘‘ཡདི ཨེཝཾ ཡཱཝདཏྠཾ གཎྷཱཧཱི’’ཏི ཨཏྟནོ དིབྦརཱུཔཾ དསྶེཏྭཱ ཨནྟརདྷཱཡི།
Sā ca pokkharaṇī vesāliyā tiyojanamatthake hoti, tathāpi so puriso maraṇabhayatajjito vātavegena pubbaṇheyeva taṃ pokkharaṇiṃ sampāpuṇi. ‘‘Sā ca pokkharaṇī amanussapariggahitā’’ti pageva sutattā bhayena so ‘‘atthi nu kho ettha koci parissayo’’ti samantato anupariyāyati. Taṃ disvā pokkharaṇipālako amanusso karuṇāyamānarūpo manussarūpena upasaṅkamitvā ‘‘kimatthaṃ, bho purisa, idhāgatosī’’ti āha. So tassa taṃ pavattiṃ kathesi. So ‘‘yadi evaṃ yāvadatthaṃ gaṇhāhī’’ti attano dibbarūpaṃ dassetvā antaradhāyi.
སོ ཏཏྠ ཨརུཎཝཎྞམཏྟིཀཾ རཏྟུཔྤལཱནི ཙ གཧེཏྭཱ ཨནཏྠངྒཏེཡེཝ སཱུརིཡེ ནགརདྭཱརཾ སམྤཱཔུཎི། ཏཾ དིསྭཱ དྭཱརཔཱལོ ཏསྶ ཝིརཝནྟསྶེཝ དྭཱརཾ ཐཀེསི། སོ ཐཀིཏེ དྭཱརེ པཝེསནཾ ཨལབྷནྟོ དྭཱརསམཱིཔེ སཱུལེ ཨཱརོཔིཏཾ པུརིསཾ དིསྭཱ ‘‘ཨེཏེ མཡི ཨནཏྠངྒཏེ ཨེཝ སཱུརིཡེ ཨཱགཏེ ཝིརཝནྟེ ཨེཝཾ དྭཱརཾ ཐཀེསུཾ། ‘ཨཧཾ ཀཱལེཡེཝ ཨཱགཏོ, མམ དཱསོ ནཏྠཱི’ཏི ཏཡཱཔི ཉཱཏཾ ཧོཏཱུ’’ཏི སཀྑིམཀཱསི། ཏཾ སུཏྭཱ སོ ཨཱཧ ‘‘ཨཧཾ སཱུལེ ཨཱཝུཏོ ཝཛ྄ཛྷོ མརཎཱབྷིམུཁོ, ཀཐཾ ཏཝ སཀྑི ཧོམི། ཨེཀོ པནེཏྠ པེཏོ མཧིདྡྷིཀོ མམ སམཱིཔཾ ཨཱགམིསྶཏི, ཏཾ སཀྑིཾ ཀརོཧཱི’’ཏི། ‘‘ཀཐཾ པན སོ མཡཱ དཊྛབྦོ’’ཏི? ཨིདྷེཝ ཏྭཾ ཏིཊྛ, ‘‘སཡམེཝ དཀྑིསྶསཱི’’ཏི། སོ ཏཏྠ ཋིཏོ མཛ྄ཛྷིམཡཱམེ ཏཾ པེཏཾ ཨཱགཏཾ དིསྭཱ སཀྑིཾ ཨཀཱསི། ཝིབྷཱཏཱཡ ཙ རཏྟིཡཱ རཉྙཱ ‘‘མམ ཨཱཎཱ ཏཡཱ ཨཏིཀྐནྟཱ, ཏསྨཱ རཱཛདཎྜཾ ཏེ ཀརིསྶཱམཱི’’ཏི ཝུཏྟེ, དེཝ, མཡཱ ཏཝ ཨཱཎཱ ནཱཏིཀྐནྟཱ, ཨནཏྠངྒཏེ ཨེཝ སཱུརིཡེ ཨཧཾ ཨིདྷཱགཏོཏི། ཏཏྠ ཀོ ཏེ སཀྑཱིཏི? སོ ཏསྶ སཱུལཱཝུཏསྶ པུརིསསྶ སནྟིཀེ ཨཱགཙྪནྟཾ ནགྒཔེཏཾ ‘‘སཀྑཱི’’ཏི ནིདྡིསིཏྭཱ ‘‘ཀཐམེཏཾ ཨམྷེཧི སདྡྷཱཏབྦ’’ནྟི རཉྙཱ ཝུཏྟེ ‘‘ཨཛྫ རཏྟིཡཾ ཏུམྷེཧི སདྡྷཱཏབྦཾ པུརིསཾ མཡཱ སདྡྷིཾ པེསེཐཱ’’ཏི ཨཱཧ། ཏཾ སུཏྭཱ རཱཛཱ སཡམེཝ ཏེན སདྡྷིཾ ཏཏྠ གནྟྭཱ ཋིཏོ པེཏེན ཙ ཏཏྠཱགནྟྭཱ ‘‘ཛཱིཝ, བྷོ, ཛཱིཝིཏམེཝ སེཡྻོ’’ཏི ཝུཏྟེ ཏཾ ‘‘སེཡྻཱ ནིསཛྫཱ ནཡིམསྶ ཨཏྠཱི’’ཏིཨཱདིནཱ པཉྩཧི གཱཐཱཧི པཊིཔུཙྪི། ཨིདཱནི ཨཱདིཏོ པན ‘‘ཝེསཱལི ནཱམ ནགརཏྠི ཝཛྫཱིན’’ནྟི གཱཐཱ ཏཱསཾ སམྦནྡྷདསྶནཏྠཾ སངྒཱིཏིཀཱརེཧི ཋཔིཏཱ –
So tattha aruṇavaṇṇamattikaṃ rattuppalāni ca gahetvā anatthaṅgateyeva sūriye nagaradvāraṃ sampāpuṇi. Taṃ disvā dvārapālo tassa viravantasseva dvāraṃ thakesi. So thakite dvāre pavesanaṃ alabhanto dvārasamīpe sūle āropitaṃ purisaṃ disvā ‘‘ete mayi anatthaṅgate eva sūriye āgate viravante evaṃ dvāraṃ thakesuṃ. ‘Ahaṃ kāleyeva āgato, mama dāso natthī’ti tayāpi ñātaṃ hotū’’ti sakkhimakāsi. Taṃ sutvā so āha ‘‘ahaṃ sūle āvuto vajjho maraṇābhimukho, kathaṃ tava sakkhi homi. Eko panettha peto mahiddhiko mama samīpaṃ āgamissati, taṃ sakkhiṃ karohī’’ti. ‘‘Kathaṃ pana so mayā daṭṭhabbo’’ti? Idheva tvaṃ tiṭṭha, ‘‘sayameva dakkhissasī’’ti. So tattha ṭhito majjhimayāme taṃ petaṃ āgataṃ disvā sakkhiṃ akāsi. Vibhātāya ca rattiyā raññā ‘‘mama āṇā tayā atikkantā, tasmā rājadaṇḍaṃ te karissāmī’’ti vutte, deva, mayā tava āṇā nātikkantā, anatthaṅgate eva sūriye ahaṃ idhāgatoti. Tattha ko te sakkhīti? So tassa sūlāvutassa purisassa santike āgacchantaṃ naggapetaṃ ‘‘sakkhī’’ti niddisitvā ‘‘kathametaṃ amhehi saddhātabba’’nti raññā vutte ‘‘ajja rattiyaṃ tumhehi saddhātabbaṃ purisaṃ mayā saddhiṃ pesethā’’ti āha. Taṃ sutvā rājā sayameva tena saddhiṃ tattha gantvā ṭhito petena ca tatthāgantvā ‘‘jīva, bho, jīvitameva seyyo’’ti vutte taṃ ‘‘seyyā nisajjā nayimassa atthī’’tiādinā pañcahi gāthāhi paṭipucchi. Idāni ādito pana ‘‘vesāli nāma nagaratthi vajjīna’’nti gāthā tāsaṃ sambandhadassanatthaṃ saṅgītikārehi ṭhapitā –
༥༡༧.
517.
‘‘ཝེསཱལཱི ནཱམ ནགརཏྠི ཝཛྫཱིནཾ, ཏཏྠ ཨཧུ ལིཙྪཝི ཨམྦསཀྐརོ།
‘‘Vesālī nāma nagaratthi vajjīnaṃ, tattha ahu licchavi ambasakkaro;
དིསྭཱན པེཏཾ ནགརསྶ བཱཧིརཾ, ཏཏྠེཝ པུཙྪིཏྠ ཏཾ ཀཱརཎཏྠིཀོ༎
Disvāna petaṃ nagarassa bāhiraṃ, tattheva pucchittha taṃ kāraṇatthiko.
༥༡༨.
518.
‘‘སེཡྻཱ ནིསཛྫཱ ནཡིམསྶ ཨཏྠི, ཨབྷིཀྐམོ ནཏྠི པཊིཀྐམོ ཙ།
‘‘Seyyā nisajjā nayimassa atthi, abhikkamo natthi paṭikkamo ca;
ཨསིཏཔཱིཏཁཱཡིཏཝཏྠབྷོགཱ, པརིཙཱརཎཱ སཱཔི ཨིམསྶ ནཏྠི༎
Asitapītakhāyitavatthabhogā, paricāraṇā sāpi imassa natthi.
༥༡༩.
519.
‘‘ཡེ ཉཱཏཀཱ དིཊྛསུཏཱ སུཧཛྫཱ, ཨནུཀམྤཀཱ ཡསྶ ཨཧེསུཾ པུབྦེ།
‘‘Ye ñātakā diṭṭhasutā suhajjā, anukampakā yassa ahesuṃ pubbe;
དཊྛུམྤི ཏེ དཱནི ན ཏཾ ལབྷནྟི, ཝིརཱཛིཏཏོ ཧི ཛནེན ཏེན༎
Daṭṭhumpi te dāni na taṃ labhanti, virājitato hi janena tena.
༥༢༠.
520.
‘‘ན ཨོགྒཏཏྟསྶ བྷཝནྟི མིཏྟཱ, ཛཧནྟི མིཏྟཱ ཝིཀལཾ ཝིདིཏྭཱ།
‘‘Na oggatattassa bhavanti mittā, jahanti mittā vikalaṃ viditvā;
ཨཏྠཉྩ དིསྭཱ པརིཝཱརཡནྟི, བཧཱུ མིཏྟཱ ཨུགྒཏཏྟསྶ ཧོནྟི༎
Atthañca disvā parivārayanti, bahū mittā uggatattassa honti.
༥༢༡.
521.
‘‘ནིཧཱིནཏྟོ སབྦབྷོགེཧི ཀིཙྪོ, སམྨཀྑིཏོ སམྤརིབྷིནྣགཏྟོ།
‘‘Nihīnatto sabbabhogehi kiccho, sammakkhito samparibhinnagatto;
ཨུསྶཱཝབིནྡཱུཝ པལིམྤམཱནཱ, ཨཛྫ སུཝེ ཛཱིཝིཏསྶཱུཔརོདྷོ༎
Ussāvabindūva palimpamānā, ajja suve jīvitassūparodho.
༥༢༢.
522.
‘‘ཨེཏཱདིསཾ ཨུཏྟམཀིཙྪཔྤཏྟཾ,
‘‘Etādisaṃ uttamakicchappattaṃ,
ཨུཏྟཱསིཏཾ པུཙིམནྡསྶ སཱུལེ།
Uttāsitaṃ pucimandassa sūle;
ཨཐ ཏྭཾ ཀེན ཝཎྞེན ཝདེསི ཡཀྑ,
Atha tvaṃ kena vaṇṇena vadesi yakkha,
‘ཛཱིཝ བྷོ ཛཱིཝིཏམེཝ སེཡྻོ’’’ཏི༎
‘Jīva bho jīvitameva seyyo’’’ti.
༥༡༧. ཏཏྠ ཏཏྠཱཏི ཏསྶཾ ཝེསཱལིཡཾ། ནགརསྶ བཱཧིརནྟི ནགརསྶ བཧི བྷཝཾ, ཝེསཱལིནགརསྶ བཧི ཨེཝ ཛཱཏཾ པཝཏྟཾ སམྦནྡྷཾ། ཏཏྠེཝཱཏི ཡཏྠ ཏཾ པསྶི, ཏཏྠེཝ ཋཱནེ། ཏནྟི ཏཾ པེཏཾ། ཀཱརཎཏྠིཀོཏི ‘‘ཛཱིཝ, བྷོ, ཛཱིཝིཏམེཝ སེཡྻོ’’ཏི ཝུཏྟཨཏྠསྶ ཀཱརཎེན ཨཏྠིཀོ ཧུཏྭཱ།
517. Tattha tatthāti tassaṃ vesāliyaṃ. Nagarassa bāhiranti nagarassa bahi bhavaṃ, vesālinagarassa bahi eva jātaṃ pavattaṃ sambandhaṃ. Tatthevāti yattha taṃ passi, tattheva ṭhāne. Tanti taṃ petaṃ. Kāraṇatthikoti ‘‘jīva, bho, jīvitameva seyyo’’ti vuttaatthassa kāraṇena atthiko hutvā.
༥༡༨. སེཡྻཱ ནིསཛྫཱ ནཡིམསྶ ཨཏྠཱིཏི པིཊྛིཔསཱརཎལཀྑཎཱ སེཡྻཱ, པལླངྐཱབྷུཛནལཀྑཎཱ ནིསཛྫཱ ཙ ཨིམསྶ སཱུལེ ཨཱརོཔིཏཔུགྒལསྶ ནཏྠི། ཨབྷིཀྐམོ ནཏྠི པཊིཀྐམོ ཙཱཏི ཨབྷིཀྐམཱདིལཀྑཎཾ ཨཔྤམཏྟཀམྤི གམནཾ ཨིམསྶ ནཏྠི། པརིཙཱརིཀཱ སཱཔཱིཏི ཡཱ ཨསིཏཔཱིཏཁཱཡིཏཝཏྠཔརིབྷོགཱདིལཀྑཎཱ ཨིནྡྲིཡཱནཾ པརིཙཱརཎཱ, སཱཔི ཨིམསྶ ནཏྠི། ‘‘པརིཧརཎཱ སཱཔཱི’’ཏི ཝཱ པཱཋོ, ཨསིཏཱདིཔརིབྷོགཝསེན ཨིནྡྲིཡཱནཾ པརིཧརཎཱ, སཱཔི ཨིམསྶ ནཏྠི ཝིགཏཛཱིཝིཏཏྟཱཏི ཨཏྠོ། ‘‘པརིཙཱརཎཱ སཱཔཱི’’ཏི ཀེཙི པཋནྟི།
518.Seyyā nisajjā nayimassa atthīti piṭṭhipasāraṇalakkhaṇā seyyā, pallaṅkābhujanalakkhaṇā nisajjā ca imassa sūle āropitapuggalassa natthi. Abhikkamo natthi paṭikkamo cāti abhikkamādilakkhaṇaṃ appamattakampi gamanaṃ imassa natthi. Paricārikā sāpīti yā asitapītakhāyitavatthaparibhogādilakkhaṇā indriyānaṃ paricāraṇā, sāpi imassa natthi. ‘‘Pariharaṇā sāpī’’ti vā pāṭho, asitādiparibhogavasena indriyānaṃ pariharaṇā, sāpi imassa natthi vigatajīvitattāti attho. ‘‘Paricāraṇā sāpī’’ti keci paṭhanti.
༥༡༩. དིཊྛསུཏཱ སུཧཛྫཱ, ཨནུཀམྤཀཱ ཡསྶ ཨཧེསུཾ པུབྦེཏི སནྡིཊྛསཧཱཡཱ ཙེཝ ཨདིཊྛསཧཱཡཱ ཙ ཡསྶ མིཏྟཱ ཨནུདྡཡཱཝནྟོ ཡེ ཨསྶ ཨིམསྶ པུབྦེ ཨཧེསུཾ། དཊྛུམྤཱིཏི པསྶིཏུམྤི ན ལབྷནྟི, ཀུཏོ སཧ ཝསིཏུནྟི ཨཏྠོ། ཝིརཱཛིཏཏྟོཏི པརིཙྩཏྟསབྷཱཝོ། ཛནེན ཏེནཱཏི ཏེན ཉཱཏིཨཱདིཛནེན།
519.Diṭṭhasutā suhajjā, anukampakā yassa ahesuṃ pubbeti sandiṭṭhasahāyā ceva adiṭṭhasahāyā ca yassa mittā anuddayāvanto ye assa imassa pubbe ahesuṃ. Daṭṭhumpīti passitumpi na labhanti, kuto saha vasitunti attho. Virājitattoti pariccattasabhāvo. Janena tenāti tena ñātiādijanena.
༥༢༠. ན ཨོགྒཏཏྟསྶ བྷཝནྟི མིཏྟཱཏི ཨཔགཏཝིཉྙཱཎསྶ མཏསྶ མིཏྟཱ ནཱམ ན ཧོནྟི ཏསྶ མིཏྟེཧི ཀཱཏབྦཀིཙྩསྶ ཨཏིཀྐནྟཏྟཱ། ཛཧནྟི མིཏྟཱ ཝིཀལཾ ཝིདིཏྭཱཏི མཏོ ཏཱཝ ཏིཊྛཏུ, ཛཱིཝནྟམྤི བྷོགཝིཀལཾ པུརིསཾ ཝིདིཏྭཱ ‘‘ན ཨིཏོ ཀིཉྩི གཡ྄ཧཱུཔག’’ནྟི མིཏྟཱ པཛཧནྟི། ཨཏྠཉྩ དིསྭཱ པརིཝཱརཡནྟཱིཏི ཏསྶ པན སནྟཀཾ ཨཏྠཾ དྷནཾ དིསྭཱ པིཡཝཱདིནོ མུཁུལློཀིཀཱ ཧུཏྭཱ ཏཾ པརིཝཱརེནྟི། བཧཱུ མིཏྟཱ ཨུགྒཏཏྟསྶ ཧོནྟཱིཏི ཝིབྷཝསམྤཏྟིཡཱ ཨུགྒཏསབྷཱཝསྶ སམིདྡྷསྶ བཧཱུ ཨནེཀཱ མིཏྟཱ ཧོནྟི, ཨཡཾ ལོཀིཡསབྷཱཝོཏི ཨཏྠོ།
520.Na oggatattassa bhavanti mittāti apagataviññāṇassa matassa mittā nāma na honti tassa mittehi kātabbakiccassa atikkantattā. Jahanti mittā vikalaṃ viditvāti mato tāva tiṭṭhatu, jīvantampi bhogavikalaṃ purisaṃ viditvā ‘‘na ito kiñci gayhūpaga’’nti mittā pajahanti. Atthañca disvā parivārayantīti tassa pana santakaṃ atthaṃ dhanaṃ disvā piyavādino mukhullokikā hutvā taṃ parivārenti. Bahū mittā uggatattassa hontīti vibhavasampattiyā uggatasabhāvassa samiddhassa bahū anekā mittā honti, ayaṃ lokiyasabhāvoti attho.
༥༢༡. ནིཧཱིནཏྟོ སབྦབྷོགེཧཱིཏི སབྦེཧི ཨུཔབྷོགཔརིབྷོགཝཏྠཱུཧི པརིཧཱིནཏྟོ། ཀིཙྪོཏི དུཀྑིཏོ། སམྨཀྑིཏོཏི རུཧིརེཧི སམྨཀྑིཏསརཱིརོ། སམྤརིབྷིནྣགཏྟོཏི སཱུལེན ཨབྦྷནྟརེ ཝིདཱལིཏགཏྟོ། ཨུསྶཱཝབིནྡཱུཝ པལིམྤམཱནོཏི ཏིཎགྒེ ལིམྤམཱནཨུསྶཱཝབིནྡུསདིསོ། ཨཛྫ སུཝེཏི ཨཛྫ ཝཱ སུཝེ ཝཱ ཨིམསྶ ནཱམ པུརིསསྶ ཛཱིཝིཏསྶ ཨུཔརོདྷོ ནིརོདྷོ, ཏཏོ ཨུདྡྷཾ ནཔྤཝཏྟཏཱིཏི ཨཏྠོ།
521.Nihīnatto sabbabhogehīti sabbehi upabhogaparibhogavatthūhi parihīnatto. Kicchoti dukkhito. Sammakkhitoti ruhirehi sammakkhitasarīro. Samparibhinnagattoti sūlena abbhantare vidālitagatto. Ussāvabindūva palimpamānoti tiṇagge limpamānaussāvabindusadiso. Ajja suveti ajja vā suve vā imassa nāma purisassa jīvitassa uparodho nirodho, tato uddhaṃ nappavattatīti attho.
༥༢༢. ཨུཏྟཱསིཏནྟི ཨཱཝུཏཾ ཨཱརོཔིཏཾ། པུཙིམནྡསྶ སཱུལེཏི ནིམྦརུཀྑསྶ དཎྜེན ཀཏསཱུལེ ། ཀེན ཝཎྞེནཱཏི ཀེན ཀཱརཎེན། ཛཱིཝ, བྷོ, ཛཱིཝིཏམེཝ སེཡྻོཏི, བྷོ པུརིས, ཛཱིཝ། ཀསྨཱ? སཱུལཾ ཨཱརོཔིཏསྶཱཔི ཧི ཏེ ཨིདྷ ཛཱིཝིཏམེཝ ཨིཏོ ཙུཏསྶ ཛཱིཝིཏཏོ སཏབྷཱགེན སཧསྶབྷཱགེན སེཡྻོ སུནྡརཏརོཏི།
522.Uttāsitanti āvutaṃ āropitaṃ. Pucimandassa sūleti nimbarukkhassa daṇḍena katasūle . Kena vaṇṇenāti kena kāraṇena. Jīva, bho, jīvitameva seyyoti, bho purisa, jīva. Kasmā? Sūlaṃ āropitassāpi hi te idha jīvitameva ito cutassa jīvitato satabhāgena sahassabhāgena seyyo sundarataroti.
ཨེཝཾ ཏེན རཉྙཱ པུཙྪིཏོ སོ པེཏོ ཨཏྟནོ ཨདྷིཔྤཱཡཾ པཀཱསེནྟོ –
Evaṃ tena raññā pucchito so peto attano adhippāyaṃ pakāsento –
༥༢༣.
523.
‘‘སཱལོཧིཏོ ཨེས ཨཧོསི མཡ྄ཧཾ, ཨཧཾ སརཱམི པུརིམཱཡ ཛཱཏིཡཱ།
‘‘Sālohito esa ahosi mayhaṃ, ahaṃ sarāmi purimāya jātiyā;
དིསྭཱ ཙ མེ ཀཱརུཉྙམཧོསི རཱཛ, མཱ པཱཔདྷམྨོ ནིརཡཾ པཏཱཡཾ༎
Disvā ca me kāruññamahosi rāja, mā pāpadhammo nirayaṃ patāyaṃ.
༥༢༤.
524.
‘‘ཨིཏོ ཙུཏོ ལིཙྪཝི ཨེས པོསོ, སཏྠུསྶདཾ ནིརཡཾ གྷོརརཱུཔཾ།
‘‘Ito cuto licchavi esa poso, satthussadaṃ nirayaṃ ghorarūpaṃ;
ཨུཔཔཛྫཏི དུཀྐཊཀམྨཀཱརཱི, མཧཱབྷིཏཱཔཾ ཀཊུཀཾ བྷཡཱནཀཾ༎
Upapajjati dukkaṭakammakārī, mahābhitāpaṃ kaṭukaṃ bhayānakaṃ.
༥༢༥.
525.
‘‘ཨནེཀབྷཱགེན གུཎེན སེཡྻོ, ཨཡམེཝ སཱུལོ ནིརཡེན ཏེན།
‘‘Anekabhāgena guṇena seyyo, ayameva sūlo nirayena tena;
ཨེཀནྟདུཀྑཾ ཀཊུཀཾ བྷཡཱནཀཾ, ཨེཀནྟཏིབྦཾ ནིརཡཾ པཏཱཡཾ༎
Ekantadukkhaṃ kaṭukaṃ bhayānakaṃ, ekantatibbaṃ nirayaṃ patāyaṃ.
༥༢༦.
526.
‘‘ཨིདཉྩ སུཏྭཱ ཝཙནཾ མམེསོ, དུཀྑཱུཔནཱིཏོ ཝིཛཧེཡྻ པཱཎཾ།
‘‘Idañca sutvā vacanaṃ mameso, dukkhūpanīto vijaheyya pāṇaṃ;
ཏསྨཱ ཨཧཾ སནྟིཀེ ན བྷཎཱམི, མཱ མེཀཏོ ཛཱིཝིཏསྶཱུཔརོདྷོ’’ཏི༎ –
Tasmā ahaṃ santike na bhaṇāmi, mā mekato jīvitassūparodho’’ti. –
ཙཏསྶོ གཱཐཱ ཨབྷཱསི།
Catasso gāthā abhāsi.
༥༢༣. ཏཏྠ སཱལོཧིཏོ སམཱནལོཧིཏོ ཡོནིསམྦནྡྷེན སམྦནྡྷོ, ཉཱཏཀོཏི ཨཏྠོ། པུརིམཱཡ ཛཱཏིཡཱཏི པུརིམཏྟབྷཱཝེ། མཱ པཱཔདྷམྨོ ནིརཡཾ པཏཱཡནྟི ཨཡཾ པཱཔདྷམྨོ པུརིསོ ནིརཡཾ མཱ པཏི, མཱ ནིརཡཾ ཨུཔཔཛྫཱིཏི ཨིམཾ དིསྭཱ མེ ཀཱརུཉྙཾ ཨཧོསཱིཏི ཡོཛནཱ།
523. Tattha sālohito samānalohito yonisambandhena sambandho, ñātakoti attho. Purimāya jātiyāti purimattabhāve. Mā pāpadhammo nirayaṃ patāyanti ayaṃ pāpadhammo puriso nirayaṃ mā pati, mā nirayaṃ upapajjīti imaṃ disvā me kāruññaṃ ahosīti yojanā.
༥༢༤. སཏྟུསྶདནྟི པཱཔཀཱརཱིཧི སཏྟེཧི ཨུསྶནྣཾ, ཨཐ ཝཱ པཉྩཝིདྷབནྡྷནཾ, མུཁེ ཏཏྟལོཧསེཙནཾ, ཨངྒཱརཔབྦཏཱརོཔནཾ, ལོཧཀུམྦྷིཔཀྑེཔནཾ, ཨསིཔཏྟཝནཔྤཝེསནཾ, ཝེཏྟརཎིཡཾ སམོཏརཎཾ, མཧཱནིརཡེ པཀྑེཔོཏི། ཨིམེཧི སཏྟཧི པཉྩཝིདྷབནྡྷནཱདཱིཧི དཱརུཎཀཱརཎེཧི ཨུསྶནྣཾ, ཨུཔརཱུཔརི ནིཙིཏནྟི ཨཏྠོ། མཧཱབྷིཏཱཔནྟི མཧཱདུཀྑཾ, མཧཱཨགྒིསནྟཱཔཾ ཝཱ། ཀཊུཀནྟི ཨནིཊྛཾ། བྷཡཱནཀནྟི བྷཡཛནཀཾ།
524.Sattussadanti pāpakārīhi sattehi ussannaṃ, atha vā pañcavidhabandhanaṃ, mukhe tattalohasecanaṃ, aṅgārapabbatāropanaṃ, lohakumbhipakkhepanaṃ, asipattavanappavesanaṃ, vettaraṇiyaṃ samotaraṇaṃ, mahāniraye pakkhepoti. Imehi sattahi pañcavidhabandhanādīhi dāruṇakāraṇehi ussannaṃ, uparūpari nicitanti attho. Mahābhitāpanti mahādukkhaṃ, mahāaggisantāpaṃ vā. Kaṭukanti aniṭṭhaṃ. Bhayānakanti bhayajanakaṃ.
༥༢༥. ཨནེཀབྷཱགེན གུཎེནཱཏི ཨནེཀཀོཊྛཱསེན ཨཱནིསཾསེན། ཨཡམེཝ སཱུལོ ནིརཡེན ཏེནཱཏི ཏཏོ ཨིམསྶ ཨུཔྤཏྟིཊྛཱནབྷཱུཏཏོ ནིརཡཏོ ཨཡམེཝ སཱུལོ སེཡྻོཏི། ནིསྶཀྐེ ཧི ཨིདཾ ཀརཎཝཙནཾ། ཨེཀནྟ ཏིབྦནྟི ཨེཀནྟེནེཝ ཏིཁིཎདུཀྑཾ, ནིཡཏམཧཱདུཀྑནྟི ཨཏྠོ།
525.Anekabhāgenaguṇenāti anekakoṭṭhāsena ānisaṃsena. Ayameva sūlo nirayena tenāti tato imassa uppattiṭṭhānabhūtato nirayato ayameva sūlo seyyoti. Nissakke hi idaṃ karaṇavacanaṃ. Ekanta tibbanti ekanteneva tikhiṇadukkhaṃ, niyatamahādukkhanti attho.
༥༢༦. ཨིདཉྩ སུཏྭཱ ཝཙནཾ མམེསོཏི ‘‘ཨིཏོ ཙུཏོ’’ཏིཨཱདིནཱ ཝུཏྟཾ མམ ཝཙནཾ སུཏྭཱ ཨེསོ པུརིསོ དུཀྑཱུཔནཱིཏོ མམ ཝཙནེན ནིརཡདུཀྑཾ ཨུཔནཱིཏོ ཝིཡ ཧུཏྭཱ། ཝིཛཧེཡྻ པཱཎནྟི ཨཏྟནོ ཛཱིཝིཏཾ པརིཙྩཛེཡྻ། ཏསྨཱཏི ཏེན ཀཱརཎེན། མཱ མེཀཏོཏི ‘‘མཡཱ ཨེཀཏོ ཨིམསྶ པུརིསསྶ ཛཱིཝིཏསྶ ཨུཔརོདྷོ མཱ ཧོཏཱུ’’ཏི ཨིམསྶ སནྟིཀེ ཨིདཾ ཝཙནཾ ཨཧཾ ན བྷཎཱམི, ཨཐ ཁོ ‘‘ཛཱིཝ, བྷོ, ཛཱིཝིཏམེཝ སེཡྻོ’’ཏི ཨིདམེཝ བྷཎཱམཱིཏི ཨདྷིཔྤཱཡོ།
526.Idañca sutvā vacanaṃ mamesoti ‘‘ito cuto’’tiādinā vuttaṃ mama vacanaṃ sutvā eso puriso dukkhūpanīto mama vacanena nirayadukkhaṃ upanīto viya hutvā. Vijaheyya pāṇanti attano jīvitaṃ pariccajeyya. Tasmāti tena kāraṇena. Mā mekatoti ‘‘mayā ekato imassa purisassa jīvitassa uparodho mā hotū’’ti imassa santike idaṃ vacanaṃ ahaṃ na bhaṇāmi, atha kho ‘‘jīva, bho, jīvitameva seyyo’’ti idameva bhaṇāmīti adhippāyo.
ཨེཝཾ པེཏེན ཨཏྟནོ ཨདྷིཔྤཱཡེ པཀཱསིཏེ པུན རཱཛཱ པེཏསྶ པཝཏྟིཾ པུཙྪིཏུཾ ཨོཀཱསཾ ཀརོནྟོ ཨིམཾ གཱཐམཱཧ –
Evaṃ petena attano adhippāye pakāsite puna rājā petassa pavattiṃ pucchituṃ okāsaṃ karonto imaṃ gāthamāha –
༥༢༧.
527.
‘‘ཨཉྙཱཏོ ཨེསོ པུརིསསྶ ཨཏྠོ, ཨཉྙམྤི ཨིཙྪཱམསེ པུཙྪིཏུཾ ཏུཝཾ།
‘‘Aññāto eso purisassa attho, aññampi icchāmase pucchituṃ tuvaṃ;
ཨོཀཱསཀམྨཾ སཙེ ནོ ཀརོསི, པུཙྪཱམ ཏཾ ནོ ན ཙ ཀུཛ྄ཛྷིཏབྦ’’ནྟི༎
Okāsakammaṃ sace no karosi, pucchāma taṃ no na ca kujjhitabba’’nti.
༥༢༨.
528.
‘‘ཨདྡྷཱ པཊིཉྙཱ མེ ཏདཱ ཨཧུ, ནཱཙིཀྑཎཱ ཨཔྤསནྣསྶ ཧོཏི།
‘‘Addhā paṭiññā me tadā ahu, nācikkhaṇā appasannassa hoti;
ཨཀཱམཱ སདྡྷེཡྻཝཙོཏི ཀཏྭཱ, པུཙྪསྶུ མཾ ཀཱམཾ ཡཐཱ ཝིསཡ྄ཧ’’ནྟི༎ –
Akāmā saddheyyavacoti katvā, pucchassu maṃ kāmaṃ yathā visayha’’nti. –
ཨིམཱ རཉྙོ པེཏསྶ ཙ ཝཙནཔཊིཝཙནགཱཐཱ།
Imā rañño petassa ca vacanapaṭivacanagāthā.
༥༢༧. ཏཏྠ ཨཉྙཱཏོཏི ཨཝགཏོ། ཨིཙྪཱམསེཏི ཨིཙྪཱམ། ནོཏི ཨམྷཱཀཾ། ན ཙ ཀུཛ྄ཛྷིཏབྦནྟི ‘‘ཨིམེ མནུསྶཱ ཡཾཀིཉྩི པུཙྪནྟཱི’’ཏི ཀོདྷོ ན ཀཱཏབྦོ།
527. Tattha aññātoti avagato. Icchāmaseti icchāma. Noti amhākaṃ. Na ca kujjhitabbanti ‘‘ime manussā yaṃkiñci pucchantī’’ti kodho na kātabbo.
༥༢༨. ཨདྡྷཱཏི ཨེཀཾསེན། པཊིཉྙཱ མེཏི ཉཱཎཝསེན མཡ྄ཧཾ ‘‘པུཙྪསྶཱུ’’ཏི པཊིཉྙཱ, ཨོཀཱསདཱནནྟི ཨཏྠོ། ཏདཱ ཨཧཱུཏི ཏསྨིཾ ཀཱལེ པཋམདསྶནེ ཨཧོསི། ནཱཙིཀྑཎཱ ཨཔྤསནྣསྶ ཧོཏཱིཏི ཨཀཐནཱ ཨཔྤསནྣསྶ ཧོཏི། པསནྣོ ཨེཝ ཧི པསནྣསྶ ཀིཉྩི ཀཐེཏི། ཏྭཾ པན ཏདཱ མཡི ཨཔྤསནྣོ, ཨཧཉྩ ཏཡི, ཏེན པཊིཛཱནིཏྭཱ ཀཐེཏུཀཱམོ ནཱཧོསི། ཨིདཱནི པནཱཧཾ ཏུཡ྄ཧཾ ཨཀཱམཱ སདྡྷེཡྻཝཙོ ཨཀཱམོ ཨེཝ སདྡྷཱཏབྦཝཙནོ ཨིཏི ཀཏྭཱ ཨིམིནཱ ཀཱརཎེན ། པུཙྪསྶུ མཾ ཀཱམཾ ཡཐཱ ཝིསཡ྄ཧནྟི ཏྭཾ ཡཐཱ ཨིཙྪསི, ཏམཏྠཾ མཾ པུཙྪསྶུ། ཨཧཾ པན ཡཐཱ ཝིསཡ྄ཧཾ ཡཐཱ མཡ྄ཧཾ སཧིཏུཾ སཀྐཱ, ཏཐཱ ཨཏྟནོ ཉཱཎབལཱནུརཱུཔཾ ཀཐེསྶཱམཱིཏི ཨདྷིཔྤཱཡོ།
528.Addhāti ekaṃsena. Paṭiññā meti ñāṇavasena mayhaṃ ‘‘pucchassū’’ti paṭiññā, okāsadānanti attho. Tadā ahūti tasmiṃ kāle paṭhamadassane ahosi. Nācikkhaṇā appasannassa hotīti akathanā appasannassa hoti. Pasanno eva hi pasannassa kiñci katheti. Tvaṃ pana tadā mayi appasanno, ahañca tayi, tena paṭijānitvā kathetukāmo nāhosi. Idāni panāhaṃ tuyhaṃ akāmā saddheyyavaco akāmo eva saddhātabbavacano iti katvā iminā kāraṇena . Pucchassumaṃ kāmaṃ yathā visayhanti tvaṃ yathā icchasi, tamatthaṃ maṃ pucchassu. Ahaṃ pana yathā visayhaṃ yathā mayhaṃ sahituṃ sakkā, tathā attano ñāṇabalānurūpaṃ kathessāmīti adhippāyo.
ཨེཝཾ པེཏེན པུཙྪནཱཡ ཨོཀཱསེ ཀཏེ རཱཛཱ –
Evaṃ petena pucchanāya okāse kate rājā –
༥༢༩.
529.
‘‘ཡཾ ཀིཉྩཧཾ ཙཀྑུནཱ པསྶིསཱམི,
‘‘Yaṃ kiñcahaṃ cakkhunā passisāmi,
སབྦམྤི ཏཱཧཾ ཨབྷིསདྡཧེཡྻཾ།
Sabbampi tāhaṃ abhisaddaheyyaṃ;
དིསྭཱཝ ཏཾ ནོཔི ཙེ སདྡཧེཡྻཾ,
Disvāva taṃ nopi ce saddaheyyaṃ,
ཀརེཡྻཱསི མེ ཡཀྑ ནིཡསྶཀམྨ’’ནྟི༎ –
Kareyyāsi me yakkha niyassakamma’’nti. –
གཱཐམཱཧ། ཏསྶཏྠོ – ཨཧཾ ཡཾ ཀིཉྩིདེཝ ཙཀྑུནཱ པསྶིསྶཱམི, ཏཾ སབྦམྤི ཏཐེཝ ཨཧཾ ཨབྷིསདྡཧེཡྻཾ, ཏཾ པན དིསྭཱཝ ཏཾ ཝཙནཾ ནོཔི ཙེ སདྡཧེཡྻཾ། ཡཀྑ, མཡ྄ཧཾ ནིཡསྶཀམྨཾ ནིགྒཧཀམྨཾ ཀརེཡྻཱསཱིཏི། ཨཐ ཝཱ ཡཾ ཀིཉྩཧཾ ཙཀྑུནཱ པསྶིསྶཱམཱིཏི ཨཧཾ ཡཾ ཀིཉྩིདེཝ ཙཀྑུནཱ པསྶིསྶཱམི ཨཙཀྑུགོཙརསྶ ཨདསྶནཏོ། སབྦམྤི ཏཱཧཾ ཨབྷིསདྡཧེཡྻནྟི སབྦམྤི ཏེ ཨཧཾ དིཊྛཾ སུཏཾ ཨཉྙཾ ཝཱ ཨབྷིསདྡཧེཡྻཾ། ཏཱདིསོ ཧི མཡ྄ཧཾ ཏཡི ཨབྷིཔྤསཱདོཏི ཨདྷིཔྤཱཡོ། པཙྪིམཔདསྶ པན ཡཐཱཝུཏྟོཝ ཨཏྠོ།
Gāthamāha. Tassattho – ahaṃ yaṃ kiñcideva cakkhunā passissāmi, taṃ sabbampi tatheva ahaṃ abhisaddaheyyaṃ, taṃ pana disvāva taṃ vacanaṃ nopi ce saddaheyyaṃ. Yakkha, mayhaṃ niyassakammaṃ niggahakammaṃ kareyyāsīti. Atha vā yaṃ kiñcahaṃ cakkhunā passissāmīti ahaṃ yaṃ kiñcideva cakkhunā passissāmi acakkhugocarassa adassanato. Sabbampi tāhaṃ abhisaddaheyyanti sabbampi te ahaṃ diṭṭhaṃ sutaṃ aññaṃ vā abhisaddaheyyaṃ. Tādiso hi mayhaṃ tayi abhippasādoti adhippāyo. Pacchimapadassa pana yathāvuttova attho.
ཏཾ སུཏྭཱ པེཏོ –
Taṃ sutvā peto –
༥༣༠.
530.
‘‘སཙྩཔྤཊིཉྙཱ ཏཝ མེསཱ ཧོཏུ, སུཏྭཱན དྷམྨཾ ལབྷ སུཔྤསཱདཾ།
‘‘Saccappaṭiññā tava mesā hotu, sutvāna dhammaṃ labha suppasādaṃ;
ཨཉྙཏྠིཀོ ནོ ཙ པདུཊྛཙིཏྟོ, ཡཾ ཏེ སུཏཾ ཨསུཏཉྩཱཔི དྷམྨཾ།
Aññatthiko no ca paduṭṭhacitto, yaṃ te sutaṃ asutañcāpi dhammaṃ;
སབྦམྤི ཨཀྑིསྶཾ ཡཐཱ པཛཱན’’ནྟི༎ – གཱཐམཱཧ ། ཨིཏོ པརཾ –
Sabbampi akkhissaṃ yathā pajāna’’nti. – gāthamāha ; Ito paraṃ –
༥༣༡.
531.
‘‘སེཏེན ཨསྶེན ཨལངྐཏེན, ཨུཔཡཱསི སཱུལཱཝུཏཀསྶ སནྟིཀེ།
‘‘Setena assena alaṅkatena, upayāsi sūlāvutakassa santike;
ཡཱནཾ ཨིདཾ ཨབྦྷུཏཾ དསྶནེཡྻཾ, ཀིསྶེཏཾ ཀམྨསྶ ཨཡཾ ཝིཔཱཀོཏི༎
Yānaṃ idaṃ abbhutaṃ dassaneyyaṃ, kissetaṃ kammassa ayaṃ vipākoti.
༥༣༢.
532.
‘‘ཝེསཱལིཡཱ ནགརསྶ མཛ྄ཛྷེ, ཙིཀྑལླམགྒེ ནརཀཾ ཨཧོསི།
‘‘Vesāliyā nagarassa majjhe, cikkhallamagge narakaṃ ahosi;
གོསཱིསམེཀཱཧཾ པསནྣཙིཏྟོ, སེཏཾ གཧེཏྭཱ ནརཀསྨིཾ ནིཀྑིཔིཾ༎
Gosīsamekāhaṃ pasannacitto, setaṃ gahetvā narakasmiṃ nikkhipiṃ.
༥༣༣.
533.
‘‘ཨེཏསྨིཾ པཱདཱནི པཏིཊྛཔེཏྭཱ, མཡཉྩ ཨཉྙེ ཙ ཨཏིཀྐམིམྷཱ།
‘‘Etasmiṃ pādāni patiṭṭhapetvā, mayañca aññe ca atikkamimhā;
ཡཱནཾ ཨིདཾ ཨབྦྷུཏཾ དསྶནེཡྻཾ, ཏསྶེཝ ཀམྨསྶ ཨཡཾ ཝིཔཱཀོཏི༎
Yānaṃ idaṃ abbhutaṃ dassaneyyaṃ, tasseva kammassa ayaṃ vipākoti.
༥༣༤.
534.
‘‘ཝཎྞོ ཙ ཏེ སབྦདིསཱ པབྷཱསཏི, གནྡྷོ ཙ ཏེ སབྦདིསཱ པཝཱཡཏི།
‘‘Vaṇṇo ca te sabbadisā pabhāsati, gandho ca te sabbadisā pavāyati;
ཡཀྑིདྡྷིཔཏྟོསི མཧཱནུབྷཱཝོ, ནགྒོ ཙཱསི ཀིསྶ ཨཡཾ ཝིཔཱཀོཏི༎
Yakkhiddhipattosi mahānubhāvo, naggo cāsi kissa ayaṃ vipākoti.
༥༣༥.
535.
‘‘ཨཀྐོདྷནོ ནིཙྩཔསནྣཙིཏྟོ, སཎྷཱཧི ཝཱཙཱཧི ཛནཾ ཨུཔེམི།
‘‘Akkodhano niccapasannacitto, saṇhāhi vācāhi janaṃ upemi;
ཏསྶེཝ ཀམྨསྶ ཨཡཾ ཝིཔཱཀོ, དིབྦོ མེ ཝཎྞོ སཏཏཾ པབྷཱསཏི༎
Tasseva kammassa ayaṃ vipāko, dibbo me vaṇṇo satataṃ pabhāsati.
༥༣༦.
536.
‘‘ཡསཉྩ ཀིཏྟིཉྩ དྷམྨེ ཋིཏཱནཾ, དིསྭཱན མནྟེམི པསནྣཙིཏྟོ།
‘‘Yasañca kittiñca dhamme ṭhitānaṃ, disvāna mantemi pasannacitto;
ཏསྶེཝ ཀམྨསྶ ཨཡཾ ཝིཔཱཀོ, དིབྦོ མེ གནྡྷོ སཏཏཾ པཝཱཡཏི༎
Tasseva kammassa ayaṃ vipāko, dibbo me gandho satataṃ pavāyati.
༥༣༧.
537.
‘‘སཧཱཡཱནཾ ཏིཏྠསྨིཾ ནྷཱཡནྟཱནཾ, ཐལེ གཧེཏྭཱ ནིདཧིསྶ དུསྶཾ།
‘‘Sahāyānaṃ titthasmiṃ nhāyantānaṃ, thale gahetvā nidahissa dussaṃ;
ཁིཌྜཏྠིཀོ ནོ ཙ པདུཊྛཙིཏྟོ, ཏེནམྷི ནགྒོ ཀསིརཱ ཙ ཝུཏྟཱིཏི༎
Khiḍḍatthiko no ca paduṭṭhacitto, tenamhi naggo kasirā ca vuttīti.
༥༣༨.
538.
‘‘ཡོ ཀཱིལ༹མཱནོ པཀརོཏི པཱཔཾ, ཏསྶེདིསཾ ཀམྨཝིཔཱཀམཱཧུ།
‘‘Yo kīḷamāno pakaroti pāpaṃ, tassedisaṃ kammavipākamāhu;
ཨཀཱིལ༹མཱནོ པན ཡོ ཀརོཏི, ཀིཾ ཏསྶ ཀམྨསྶ ཝིཔཱཀམཱཧཱུཏི༎
Akīḷamāno pana yo karoti, kiṃ tassa kammassa vipākamāhūti.
༥༣༩.
539.
‘‘ཡེ དུཊྛསངྐཔྤམནཱ མནུསྶཱ, ཀཱཡེན ཝཱཙཱཡ ཙ སཾཀིལིཊྛཱ།
‘‘Ye duṭṭhasaṅkappamanā manussā, kāyena vācāya ca saṃkiliṭṭhā;
ཀཱཡསྶ བྷེདཱ ཨབྷིསམྤརཱཡཾ, ཨསཾསཡཾ ཏེ ནིརཡཾ ཨུཔེནྟི༎
Kāyassa bhedā abhisamparāyaṃ, asaṃsayaṃ te nirayaṃ upenti.
༥༤༠.
540.
‘‘ཨཔརེ པན སུགཏིམཱསམཱནཱ, དཱནེ རཏཱ སངྒཧིཏཏྟབྷཱཝཱ།
‘‘Apare pana sugatimāsamānā, dāne ratā saṅgahitattabhāvā;
ཀཱཡསྶ བྷེདཱ ཨབྷིསམྤརཱཡཾ, ཨསཾསཡཾ ཏེ སུགཏིཾ ཨུཔེནྟཱི’’ཏི༎ –
Kāyassa bhedā abhisamparāyaṃ, asaṃsayaṃ te sugatiṃ upentī’’ti. –
ཏེསཾ ཨུབྷིནྣཾ ཝཙནཔཊིཝཙནགཱཐཱ ཧོནྟི།
Tesaṃ ubhinnaṃ vacanapaṭivacanagāthā honti.
༥༣༠. ཏཏྠ སཙྩཔྤཊིཉྙཱ ཏཝ མེསཱ ཧོཏཱུཏི ‘‘སབྦམྤི ཏཱཧཾ ཨབྷིསདྡཧེཡྻ’’ནྟི ཏཝ ཨེསཱ པཊིཉྙཱ མཡ྄ཧཾ སཙྩཾ ཧོཏུ། སུཏྭཱན དྷམྨཾ ལབྷ སུཔྤསཱདནྟི མཡཱ ཝུཙྩམཱནཾ དྷམྨཾ སུཏྭཱ སུནྡརཾ པསཱདཾ ལབྷསྶུ། ཨཉྙཏྠིཀོཏི ཨཱཛཱནནཏྠིཀོ། ཡཐཱ པཛཱནནྟི ཡཐཱ ཨཉྙོཔི པཛཱནནྟོ, ‘‘ཡཐཱཔི ཉཱཏ’’ནྟི ཝཱ མཡཱ ཡཐཱ ཉཱཏནྟི ཨཏྠོ།
530. Tattha saccappaṭiññā tava mesā hotūti ‘‘sabbampi tāhaṃ abhisaddaheyya’’nti tava esā paṭiññā mayhaṃ saccaṃ hotu. Sutvāna dhammaṃ labha suppasādanti mayā vuccamānaṃ dhammaṃ sutvā sundaraṃ pasādaṃ labhassu. Aññatthikoti ājānanatthiko. Yathā pajānanti yathā aññopi pajānanto, ‘‘yathāpi ñāta’’nti vā mayā yathā ñātanti attho.
༥༣༡. ཀིསྶེཏཾ ཀམྨསྶ ཨཡཾ ཝིཔཱཀོཏི ཀིསྶེཏཾ ཀིསྶ ནཱམ ཨེཏཾ, ཀིསྶ ཀམྨསྶ ཨཡཾ ཝིཔཱཀོ། ཨེཏནྟི ཝཱ ནིཔཱཏམཏྟཾ, ཀིསྶ ཀམྨསྶཱཏི ཡོཛནཱ། ‘‘ཀིསྶ ཏེ’’ཏི ཙ ཀེཙི པཋནྟི།
531.Kissetaṃ kammassa ayaṃ vipākoti kissetaṃ kissa nāma etaṃ, kissa kammassa ayaṃ vipāko. Etanti vā nipātamattaṃ, kissa kammassāti yojanā. ‘‘Kissa te’’ti ca keci paṭhanti.
༥༣༢-༣༣. ཙིཀྑལླམགྒེཏི ཙིཀྑལླཝཏི པཐམྷི། ནརཀནྟི ཨཱཝཱཊཾ། ཨེཀཱཧནྟི ཨེཀཾ ཨཧཾ། ནརཀསྨིཾ ནིཀྑིཔིནྟི ཡཐཱ ཀདྡམོ ན ཨཀྐམཱིཡཏི, ཨེཝཾ ཏསྨིཾ ཙིཀྑལླཱཝཱཊེ ཋཔེསིཾ། ཏསྶཱཏི ཏསྶ གོསཱིསེན སེཏུཀརཎསྶ།
532-33.Cikkhallamaggeti cikkhallavati pathamhi. Narakanti āvāṭaṃ. Ekāhanti ekaṃ ahaṃ. Narakasmiṃ nikkhipinti yathā kaddamo na akkamīyati, evaṃ tasmiṃ cikkhallāvāṭe ṭhapesiṃ. Tassāti tassa gosīsena setukaraṇassa.
༥༣༦-༧. དྷམྨེ ཋིཏཱནནྟི དྷམྨཙཱརཱིནཾ སམཙཱརཱིནཾ། མནྟེམཱིཏི ཀཐེམི ཀིཏྟཡཱམི། ཁིཌྜཏྠིཀོཏི ཧསཱདྷིཔྤཱཡོ། ནོ ཙ པདུཊྛཙིཏྟོཏི དུསྶསཱམིཀེ ན དཱུསིཏཙིཏྟོ, ན ཨཝཧརཎཱདྷིཔྤཱཡོ ནཱཔི ཝིནཱསཱདྷིཔྤཱཡོཏི ཨཏྠོ།
536-7.Dhamme ṭhitānanti dhammacārīnaṃ samacārīnaṃ. Mantemīti kathemi kittayāmi. Khiḍḍatthikoti hasādhippāyo. No ca paduṭṭhacittoti dussasāmike na dūsitacitto, na avaharaṇādhippāyo nāpi vināsādhippāyoti attho.
༥༣༨. ཨཀཱིལ༹མཱནོཏི ཨཁིཌྜཱདྷིཔྤཱཡོ, ལོབྷཱདཱིཧི དཱུསིཏཙིཏྟོ། ཀིཾ ཏསྶ ཀམྨསྶ ཝིཔཱཀམཱཧཱུཏི ཏསྶ ཏཐཱ ཀཏསྶ པཱཔཀམྨསྶ ཀཱིཝ ཀཊུཀཾ དུཀྑཝིཔཱཀཾ པཎྜིཏཱ ཨཱཧུ།
538.Akīḷamānoti akhiḍḍādhippāyo, lobhādīhi dūsitacitto. Kiṃ tassa kammassa vipākamāhūti tassa tathā katassa pāpakammassa kīva kaṭukaṃ dukkhavipākaṃ paṇḍitā āhu.
༥༣༩-༤༠. དུཊྛསངྐཔྤམནཱཏི ཀཱམསངྐཔྤཱདིཝསེན དཱུསིཏམནོཝིཏཀྐཱ, ཨེཏེན མནོདུཙྩརིཏམཱཧ། ཀཱཡེན ཝཱཙཱཡ ཙ སཾཀིལིཊྛཱཏི པཱཎཱཏིཔཱཏཱདིཝསེན ཀཱཡཝཱཙཱཧི མལིནཱ། ཨཱསམཱནཱཏི ཨཱསཱིསམཱནཱ པཏྠཡམཱནཱ།
539-40.Duṭṭhasaṅkappamanāti kāmasaṅkappādivasena dūsitamanovitakkā, etena manoduccaritamāha. Kāyena vācāya ca saṃkiliṭṭhāti pāṇātipātādivasena kāyavācāhi malinā. Āsamānāti āsīsamānā patthayamānā.
ཨེཝཾ པེཏེན སངྑེཔེནེཝ ཀམྨཕལེསུ ཝིབྷཛིཏྭཱ དསྶིཏེསུ ཏཾ ཨསདྡཧནྟོ རཱཛཱ –
Evaṃ petena saṅkhepeneva kammaphalesu vibhajitvā dassitesu taṃ asaddahanto rājā –
༥༤༡.
541.
‘‘ཏཾ ཀིནྟི ཛཱནེཡྻམཧཾ ཨཝེཙྩ, ཀལྱཱཎཔཱཔསྶ ཨཡཾ ཝིཔཱཀོ།
‘‘Taṃ kinti jāneyyamahaṃ avecca, kalyāṇapāpassa ayaṃ vipāko;
ཀིཾ ཝཱཧཾ དིསྭཱ ཨབྷིསདྡཧེཡྻཾ, ཀོ ཝཱཔི མཾ སདྡཧཱཔེཡྻ ཨེཏ’’ནྟི༎ –
Kiṃ vāhaṃ disvā abhisaddaheyyaṃ, ko vāpi maṃ saddahāpeyya eta’’nti. –
གཱཐམཱཧ། ཏཏྠ ཏཾ ཀིནྟི ཛཱནེཡྻམཧཾ ཨཝེཙྩཱཏི ཡོཡཾ ཏཡཱ ‘‘ཡེ དུཊྛསངྐཔྤམནཱ མནུསྶཱ, ཀཱཡེན ཝཱཙཱཡ ཙ སཾཀིལིཊྛཱ’’ཏིཨཱདིནཱ། ‘‘ཨཔརེ པན སུགཏིམཱསམཱནཱ’’ཏིཨཱདིནཱ ཙ ཀལྱཱཎསྶ པཱཔསྶ ཙ ཀམྨསྶ ཝིཔཱཀོ ཝིབྷཛིཏྭཱ ཝུཏྟོ, ཏཾ ཀིནྟི ཀེན ཀཱརཎེན ཨཧཾ ཨཝེཙྩ ཨཔརཔཙྩཡབྷཱཝེན སདྡཧེཡྻཾ། ཀིཾ ཝཱཧཾ དིསྭཱ ཨབྷིསདྡཧེཡྻནྟི ཀཱིདིསཾ ཝཱ པནཱཧཾ པཙྩཀྑབྷཱུཏཾ ནིདསྶནཾ དིསྭཱ པཊིསདྡཧེཡྻཾ། ཀོ ཝཱཔི མཾ སདྡཧཱཔེཡྻ ཨེཏནྟི ཀོ ཝཱ ཝིཉྙཱུ པུརིསོ པཎྜིཏོ ཨེཏམཏྠཾ མཾ སདྡཧཱཔེཡྻ, ཏཾ ཀཐེཧཱིཏི ཨཏྠོ།
Gāthamāha. Tattha taṃ kinti jāneyyamahaṃ aveccāti yoyaṃ tayā ‘‘ye duṭṭhasaṅkappamanā manussā, kāyena vācāya ca saṃkiliṭṭhā’’tiādinā. ‘‘Apare pana sugatimāsamānā’’tiādinā ca kalyāṇassa pāpassa ca kammassa vipāko vibhajitvā vutto, taṃ kinti kena kāraṇena ahaṃ avecca aparapaccayabhāvena saddaheyyaṃ. Kiṃ vāhaṃ disvā abhisaddaheyyanti kīdisaṃ vā panāhaṃ paccakkhabhūtaṃ nidassanaṃ disvā paṭisaddaheyyaṃ. Ko vāpi maṃ saddahāpeyya etanti ko vā viññū puriso paṇḍito etamatthaṃ maṃ saddahāpeyya, taṃ kathehīti attho.
ཏཾ སུཏྭཱ པེཏོ ཀཱརཎེན ཏམཏྠཾ ཏསྶ པཀཱསེནྟོ –
Taṃ sutvā peto kāraṇena tamatthaṃ tassa pakāsento –
༥༤༢.
542.
‘‘དིསྭཱ ཙ སུཏྭཱ ཨབྷིསདྡཧསྶུ, ཀལྱཱཎཔཱཔསྶ ཨཡཾ ཝིཔཱཀོ།
‘‘Disvā ca sutvā abhisaddahassu, kalyāṇapāpassa ayaṃ vipāko;
ཀལྱཱཎཔཱཔེ ཨུབྷཡེ ཨསནྟེ, སིཡཱ ནུ སཏྟཱ སུགཏཱ དུགྒཏཱ ཝཱ༎
Kalyāṇapāpe ubhaye asante, siyā nu sattā sugatā duggatā vā.
༥༤༣.
543.
‘‘ནོ ཙེཏྠ ཀམྨཱནི ཀརེཡྻུཾ མཙྩཱ, ཀལྱཱཎཔཱཔཱནི མནུསྶལོཀེ།
‘‘No cettha kammāni kareyyuṃ maccā, kalyāṇapāpāni manussaloke;
ནཱཧེསུཾ སཏྟཱ སུགཏཱ དུགྒཏཱ ཝཱ, ཧཱིནཱ པཎཱིཏཱ ཙ མནུསྶལོཀེ༎
Nāhesuṃ sattā sugatā duggatā vā, hīnā paṇītā ca manussaloke.
༥༤༤.
544.
‘‘ཡསྨཱ ཙ ཀམྨཱནི ཀརོནྟི མཙྩཱ, ཀལྱཱཎཔཱཔཱནི མནུསྶལོཀེ།
‘‘Yasmā ca kammāni karonti maccā, kalyāṇapāpāni manussaloke;
ཏསྨཱ ཧི སཏྟཱ སུགཏཱ དུགྒཏཱ ཝཱ, ཧཱིནཱ པཎཱིཏཱ ཙ མནུསྶལོཀེ༎
Tasmā hi sattā sugatā duggatā vā, hīnā paṇītā ca manussaloke.
༥༤༥.
545.
‘‘དྭཡཛྫ ཀམྨཱནཾ ཝིཔཱཀམཱཧུ, སུཁསྶ དུཀྑསྶ ཙ ཝེདནཱིཡཾ།
‘‘Dvayajja kammānaṃ vipākamāhu, sukhassa dukkhassa ca vedanīyaṃ;
ཏཱ དེཝཏཱཡོ པརིཙཱརཡནྟི, པཙྩེནྟི བཱལཱ དྭཡཏཾ ཨཔསྶིནོ’’ཏི༎ –
Tā devatāyo paricārayanti, paccenti bālā dvayataṃ apassino’’ti. –
གཱཐཱ ཨབྷཱསི།
Gāthā abhāsi.
༥༤༢. ཏཏྠ དིསྭཱ ཙཱཏི པཙྩཀྑཏོ དིསྭཱཔི། སུཏྭཱཏི དྷམྨཾ སུཏྭཱ ཏདནུསཱརེན ནཡཾ ནེནྟོ ཨནུམིནནྟོ། ཀལྱཱཎཔཱཔསྶཱཏི ཀུསལསྶ ཨཀུསལསྶ ཙ ཀམྨསྶ ཨཡཾ སུཁོ ཨཡཾ དུཀྑོ ཙ ཝིཔཱཀོཏི ཨབྷིསདྡཧསྶུ། ཨུབྷཡེ ཨསནྟེཏི ཀལྱཱཎེ པཱཔེ ཙཱཏི དུཝིདྷེ ཀམྨེ ཨཝིཛྫམཱནེ། སིཡཱ ནུ སཏྟཱ སུགཏཱ དུགྒཏཱ ཝཱཏི ‘‘ཨིམེ སཏྟཱ སུགཏིཾ གཏཱ དུགྒཏིཾ གཏཱ ཝཱ, སུགཏིཡཾ ཝཱ ཨཌྜྷཱ དུགྒཏིཡཾ དལིདྡཱ ཝཱ’’ཏི ཨཡམཏྠོ ཀིཾ ནུ སིཡཱ ཀཐཾ སམྦྷཝེཡྻཱཏི ཨཏྠོ།
542. Tattha disvā cāti paccakkhato disvāpi. Sutvāti dhammaṃ sutvā tadanusārena nayaṃ nento anuminanto. Kalyāṇapāpassāti kusalassa akusalassa ca kammassa ayaṃ sukho ayaṃ dukkho ca vipākoti abhisaddahassu. Ubhaye asanteti kalyāṇe pāpe cāti duvidhe kamme avijjamāne. Siyā nu sattā sugatā duggatā vāti ‘‘ime sattā sugatiṃ gatā duggatiṃ gatā vā, sugatiyaṃ vā aḍḍhā duggatiyaṃ daliddā vā’’ti ayamattho kiṃ nu siyā kathaṃ sambhaveyyāti attho.
༥༤༣-༤. ཨིདཱནི ཡཐཱཝུཏྟམཏྠཾ ‘‘ནོ ཙེཏྠ ཀམྨཱནཱི’’ཏི ཙ ‘‘ཡསྨཱ ཙ ཀམྨཱནཱི’’ཏི ཙ གཱཐཱདྭཡེན བྱཏིརེཀཏོ ཨནྭཡཏོ ཙ ཝིབྷཱཝེཏི། ཏཏྠ ཧཱིནཱ པཎཱིཏཱཏི ཀུལརཱུཔཱརོགྱཔརིཝཱརཱདཱིཧི ཧཱིནཱ ཨུལཱ༹རཱ ཙ།
543-4. Idāni yathāvuttamatthaṃ ‘‘nocettha kammānī’’ti ca ‘‘yasmā ca kammānī’’ti ca gāthādvayena byatirekato anvayato ca vibhāveti. Tattha hīnā paṇītāti kularūpārogyaparivārādīhi hīnā uḷārā ca.
༥༤༥. དྭཡཛྫ ཀམྨཱནཾ ཝིཔཱཀམཱཧཱུཏི དྭཡཾ དུཝིདྷཾ ཨཛྫ ཨིདཱནི ཀམྨཱནཾ སུཙརིཏདུཙྩརིཏཱནཾ ཝིཔཱཀཾ ཝདནྟི ཀཐེནྟི། ཀིཾ ཏནྟི ཨཱཧ ‘‘སུཁསྶ དུཀྑསྶ ཙ ཝེདནཱིཡ’’ནྟི, ཨིཊྛསྶ ཙ ཨནིཊྛསྶ ཙ ཨནུབྷཝནཡོགྒཾ། ཏཱ དེཝཏཱཡོ པརིཙཱརཡནྟཱིཏི ཡེ ཨུཀྐཾསཝསེན སུཁཝེདནཱིཡཾ ཝིཔཱཀཾ པཊིལབྷནྟི, ཏེ དེཝལོཀེ ཏཱ དེཝཏཱ ཧུཏྭཱ དིབྦསུཁསམཔྤིཏཱ ཨིནྡྲིཡཱནི པརིཙཱརེནྟི། པཙྩེནྟི བཱལཱ དྭཡཏཾ ཨཔསྶིནོཏི ཡེ བཱལཱ ཀམྨཉྩ ཀམྨཕལཉྩཱཏི དྭཡཾ ཨཔསྶནྟཱ ཨསདྡཧནྟཱ, ཏེ པཱཔཔྤསུཏཱ དུཀྑཝེདནཱིཡཾ ཝིཔཱཀཾ ཨནུབྷཝནྟཱ ནིརཡཱདཱིསུ ཀམྨུནཱ པཙྩེནྟི དུཀྑཾ པཱཔུཎནྟི།
545.Dvayajja kammānaṃ vipākamāhūti dvayaṃ duvidhaṃ ajja idāni kammānaṃ sucaritaduccaritānaṃ vipākaṃ vadanti kathenti. Kiṃ tanti āha ‘‘sukhassa dukkhassa ca vedanīya’’nti, iṭṭhassa ca aniṭṭhassa ca anubhavanayoggaṃ. Tā devatāyo paricārayantīti ye ukkaṃsavasena sukhavedanīyaṃ vipākaṃ paṭilabhanti, te devaloke tā devatā hutvā dibbasukhasamappitā indriyāni paricārenti. Paccenti bālā dvayataṃ apassinoti ye bālā kammañca kammaphalañcāti dvayaṃ apassantā asaddahantā, te pāpappasutā dukkhavedanīyaṃ vipākaṃ anubhavantā nirayādīsu kammunā paccenti dukkhaṃ pāpuṇanti.
ཨེཝཾ ཀམྨཕལཾ སདྡཧནྟོ པན ཏྭཾ ཀསྨཱ ཨེཝརཱུཔཾ དུཀྑཾ པཙྩནུབྷཝསཱིཏི ཨནུཡོགཾ སནྡྷཱཡ –
Evaṃ kammaphalaṃ saddahanto pana tvaṃ kasmā evarūpaṃ dukkhaṃ paccanubhavasīti anuyogaṃ sandhāya –
༥༤༦.
546.
‘‘ན མཏྠི ཀམྨཱནི སཡཾཀཏཱནི, དཏྭཱཔི མེ ནཏྠི ཡོ ཨཱདིསེཡྻ།
‘‘Na matthi kammāni sayaṃkatāni, datvāpi me natthi yo ādiseyya;
ཨཙྪཱདནཾ སཡནམཐནྣཔཱནཾ, ཏེནམྷི ནགྒོ ཀསིརཱ ཙ ཝུཏྟཱི’’ཏི༎ –
Acchādanaṃ sayanamathannapānaṃ, tenamhi naggo kasirā ca vuttī’’ti. –
གཱཐམཱཧ། ཏཏྠ ན མཏྠི ཀམྨཱནི སཡཾཀཏཱནཱིཏི ཡསྨཱ སཡཾ ཨཏྟནཱ པུབྦེ ཀཏཱནི པུཉྙཀམྨཱནི མམ ནཏྠི ན ཝིཛྫནྟི, ཡེཧི ཨིདཱནི ཨཙྪཱདནཱདཱིནི ལབྷེཡྻཾ། དཏྭཱཔི མེ ནཏྠི ཡོ ཨཱདིསེཡྻཱཏི ཡོ སམཎབྲཱཧྨཎཱནཾ དཱནཾ དཏྭཱ ‘‘ཨསུཀསྶ པེཏསྶ ཧོཏཱུ’’ཏི མེ ཨཱདིསེཡྻ ཨུདྡིསེཡྻ, སོ ནཏྠི། ཏེནམྷི ནགྒོ ཀསིརཱ ཙ ཝུཏྟཱིཏི ཏེན དུཝིདྷེནཱཔི ཀཱརཎེན ཨིདཱནི ནགྒོ ནིཙྩོལོ༹ ཨམྷི, ཀསིརཱ དུཀྑཱ ཙ ཝུཏྟི ཛཱིཝིཀཱ ཧོཏཱིཏི།
Gāthamāha. Tattha na matthi kammāni sayaṃkatānīti yasmā sayaṃ attanā pubbe katāni puññakammāni mama natthi na vijjanti, yehi idāni acchādanādīni labheyyaṃ. Datvāpi me natthi yo ādiseyyāti yo samaṇabrāhmaṇānaṃ dānaṃ datvā ‘‘asukassa petassa hotū’’ti me ādiseyya uddiseyya, so natthi. Tenamhi naggo kasirā ca vuttīti tena duvidhenāpi kāraṇena idāni naggo niccoḷo amhi, kasirā dukkhā ca vutti jīvikā hotīti.
ཏཾ སུཏྭཱ རཱཛཱ ཏསྶ ཨཙྪཱདནཱདིལཱབྷཾ ཨཱཀངྑནྟོ –
Taṃ sutvā rājā tassa acchādanādilābhaṃ ākaṅkhanto –
༥༤༧.
547.
‘‘སིཡཱ ནུ ཁོ ཀཱརཎཾ ཀིཉྩི ཡཀྑ, ཨཙྪཱདནཾ ཡེན ཏུཝཾ ལབྷེཐ།
‘‘Siyā nu kho kāraṇaṃ kiñci yakkha, acchādanaṃ yena tuvaṃ labhetha;
ཨཱཙིཀྑ མེ ཏྭཾ ཡདཏྠི ཧེཏུ, སདྡྷཱཡིཀཾ ཧེཏུཝཙོ སུཎོམཱ’’ཏི༎ –
Ācikkha me tvaṃ yadatthi hetu, saddhāyikaṃ hetuvaco suṇomā’’ti. –
གཱཐམཱཧ། ཏཏྠ ཡེནཱཏི ཡེན ཀཱརཎེན ཏྭཾ ཨཙྪཱདནཾ ལབྷེཐ ལབྷེཡྻཱསི, ཀིཉྩི ཏཾ ཀཱརཎཾ སིཡཱ ནུ ཁོ བྷཝེཡྻ ནུ ཁོཏི ཨཏྠོ། ཡདཏྠཱིཏི ཡདི ཨཏྠི།
Gāthamāha. Tattha yenāti yena kāraṇena tvaṃ acchādanaṃ labhetha labheyyāsi, kiñci taṃ kāraṇaṃ siyā nu kho bhaveyya nu khoti attho. Yadatthīti yadi atthi.
ཨཐསྶ པེཏོ ཏཾ ཀཱརཎཾ ཨཱཙིཀྑནྟོ –
Athassa peto taṃ kāraṇaṃ ācikkhanto –
༥༤༨.
548.
‘‘ཀཔྤིཏཀོ ནཱམ ཨིདྷཏྠི བྷིཀྑུ, ཛྷཱཡཱི སུསཱིལོ ཨརཧཱ ཝིམུཏྟོ།
‘‘Kappitako nāma idhatthi bhikkhu, jhāyī susīlo arahā vimutto;
གུཏྟིནྡྲིཡོ སཾཝུཏཔཱཏིམོཀྑོ, སཱིཏིབྷཱུཏོ ཨུཏྟམདིཊྛིཔཏྟོ༎
Guttindriyo saṃvutapātimokkho, sītibhūto uttamadiṭṭhipatto.
༥༤༩.
549.
‘‘སཁིལོ ཝདཉྙཱུ སུཝཙོ སུམུཁོ, སྭཱགམོ སུཔྤཊིམུཏྟཀོ ཙ།
‘‘Sakhilo vadaññū suvaco sumukho, svāgamo suppaṭimuttako ca;
པུཉྙསྶ ཁེཏྟཾ ཨརཎཝིཧཱརཱི, དེཝམནུསྶཱནཉྩ དཀྑིཎེཡྻོ༎
Puññassa khettaṃ araṇavihārī, devamanussānañca dakkhiṇeyyo.
༥༥༠.
550.
‘‘སནྟོ ཝིདྷཱུམོ ཨནཱིགྷོ ནིརཱསོ, མུཏྟོ ཝིསལློ ཨམམོ ཨཝངྐོ།
‘‘Santo vidhūmo anīgho nirāso, mutto visallo amamo avaṅko;
ནིརཱུཔདྷཱི སབྦཔཔཉྩཁཱིཎོ, ཏིསྶོ ཝིཛྫཱ ཨནུཔྤཏྟོ ཛུཏིམཱ༎
Nirūpadhī sabbapapañcakhīṇo, tisso vijjā anuppatto jutimā.
༥༥༡.
551.
‘‘ཨཔྤཉྙཱཏོ དིསྭཱཔི ན ཙ སུཛཱནོ, མུནཱིཏི ནཾ ཝཛྫིསུ ཝོཧརནྟི།
‘‘Appaññāto disvāpi na ca sujāno, munīti naṃ vajjisu voharanti;
ཛཱནནྟི ཏཾ ཡཀྑབྷཱུཏཱ ཨནེཛཾ, ཀལྱཱཎདྷམྨཾ ཝིཙརནྟཾ ལོཀེ༎
Jānanti taṃ yakkhabhūtā anejaṃ, kalyāṇadhammaṃ vicarantaṃ loke.
༥༥༢.
552.
‘‘ཏསྶ ཏུཝཾ ཨེཀཡུགཾ དུཝེ ཝཱ, མམུདྡིསིཏྭཱན སཙེ དདེཐ།
‘‘Tassa tuvaṃ ekayugaṃ duve vā, mamuddisitvāna sace dadetha;
པཊིགྒཧཱིཏཱནི ཙ ཏཱནི ཨསྶུ, མམཉྩ པསྶེཐ སནྣདྡྷདུསྶ’’ནྟི༎ –
Paṭiggahītāni ca tāni assu, mamañca passetha sannaddhadussa’’nti. –
གཱཐཱ ཨབྷཱསི།
Gāthā abhāsi.
༥༤༨. ཏཏྠ ཀཔྤིཏཏོ ནཱམཱཏི ཛཊིལསཧསྶསྶ ཨབྦྷནྟརེ ཨཱཡསྨཏོ ཨུཔཱལིཏྠེརསྶ ཨུཔཛ྄ཛྷཱཡཾ སནྡྷཱཡ ཝདཏི། ཨིདྷཱཏི ཨིམིསྶཱ ཝེསཱལིཡཱ སམཱིཔེ། ཛྷཱཡཱིཏི ཨགྒཕལཛྷཱནེན ཛྷཱཡཱི། སཱིཏིབྷཱུཏོཏི སབྦཀིལེསདརཐཔརིལཱ༹ཧཝཱུཔསམེན སཱིཏིབྷཱཝཔྤཏྟོ། ཨུཏྟམདིཊྛིཔཏྟོཏི ཨུཏྟམཾ ཨགྒཕལཾ སམྨཱདིཊྛིཾ པཏྟོ།
548. Tattha kappitato nāmāti jaṭilasahassassa abbhantare āyasmato upālittherassa upajjhāyaṃ sandhāya vadati. Idhāti imissā vesāliyā samīpe. Jhāyīti aggaphalajhānena jhāyī. Sītibhūtoti sabbakilesadarathapariḷāhavūpasamena sītibhāvappatto. Uttamadiṭṭhipattoti uttamaṃ aggaphalaṃ sammādiṭṭhiṃ patto.
༥༤༩. སཁིལོཏི མུདུ། སུཝཙོཏི སུབྦཙོ། སྭཱགམོཏི སུཊྛུ ཨཱགཏཱགམོ། སུཔྤཊིམུཏྟཀོཏི སུཊྛུ པཊིམུཏྟཀཝཱཙོ, མུཏྟབྷཱཎཱིཏི ཨཏྠོ། ཨརཎཝིཧཱརཱིཏི མེཏྟཱཝིཧཱརཱི།
549.Sakhiloti mudu. Suvacoti subbaco. Svāgamoti suṭṭhu āgatāgamo. Suppaṭimuttakoti suṭṭhu paṭimuttakavāco, muttabhāṇīti attho. Araṇavihārīti mettāvihārī.
༥༥༠. སནྟོཏི ཨུཔསནྟཀིལེསོ། ཝིདྷཱུམོཏི ཝིགཏམིཙྪཱཝིཏཀྐདྷཱུམོ། ཨནཱིགྷོཏི ནིདྡུཀྑོ། ནིརཱསོཏི ནིཏྟཎྷོ། མུཏྟོཏི སབྦབྷཝེཧི ཝིམུཏྟོ། ཝིསལློཏི ཝཱིཏརཱགཱདིསལློ། ཨམམོཏི མམཾཀཱརཝིརཧིཏོ། ཨཝངྐོཏི ཀཱཡཝངྐཱདིཝངྐཝིརཧིཏོ། ནིརཱུཔདྷཱིཏི ཀིལེསཱབྷིསངྑཱརཱདིཨུཔདྷིཔྤཧཱཡཱི། སབྦཔཔཉྩཁཱིཎོཏི པརིཀྑཱིཎཏཎྷཱདིཔཔཉྩོ། ཛུཏིམཱཏི ཨནུཏྟརཱཡ ཉཱཎཛུཏིཡཱ ཛུཏིམཱ། ཨཔྤཉྙཱཏོཏི པརམཔྤིཙྪཏཱཡ པཊིཙྪནྣགུཎཏཱཡ ཙ ན པཱཀཊོ།
550.Santoti upasantakileso. Vidhūmoti vigatamicchāvitakkadhūmo. Anīghoti niddukkho. Nirāsoti nittaṇho. Muttoti sabbabhavehi vimutto. Visalloti vītarāgādisallo. Amamoti mamaṃkāravirahito. Avaṅkoti kāyavaṅkādivaṅkavirahito. Nirūpadhīti kilesābhisaṅkhārādiupadhippahāyī. Sabbapapañcakhīṇoti parikkhīṇataṇhādipapañco. Jutimāti anuttarāya ñāṇajutiyā jutimā. Appaññātoti paramappicchatāya paṭicchannaguṇatāya ca na pākaṭo.
༥༥༡. དིསྭཱཔི ན ཙ སུཛཱནོཏི གམྦྷཱིརབྷཱཝེན དིསྭཱཔི ‘‘ཨེཝཾསཱིལོ, ཨེཝཾདྷམྨོ, ཨེཝཾཔཉྙོ’’ཏི ན སུཝིཉྙེཡྻོ། ཛཱནནྟི ཏཾ ཡཀྑབྷཱུཏཱ ཨནེཛནྟི ཡཀྑབྷཱུཏཱ ཙ ཨནེཛཾ ནིཏྟཎྷཾ ‘‘ཨརཧཱ’’ཏི ཏཾ ཛཱནནྟི། ཀལྱཱཎདྷམྨནྟི སུནྡརསཱིལཱདིགུཎཾ།
551.Disvāpi na ca sujānoti gambhīrabhāvena disvāpi ‘‘evaṃsīlo, evaṃdhammo, evaṃpañño’’ti na suviññeyyo. Jānanti taṃ yakkhabhūtā anejanti yakkhabhūtā ca anejaṃ nittaṇhaṃ ‘‘arahā’’ti taṃ jānanti. Kalyāṇadhammanti sundarasīlādiguṇaṃ.
༥༥༢. ཏསྶཱཏི ཏསྶ ཀཔྤིཏཀམཧཱཐེརསྶ། ཨེཀཡུགནྟི ཨེཀཾ ཝཏྠཡུགཾ། དུཝེ ཝཱཏི དྭེ ཝཱ ཝཏྠཡུགཱནི། མམུདྡིསིཏྭཱནཱཏི མམཾ ཨུདྡིསིཏྭཱ། པཊིགྒཧཱིཏཱནི ཙ ཏཱནི ཨསྶཱུཏི ཏཱནི ཝཏྠཡུགཱནི ཏེན པཊིགྒཧིཏཱནི ཙ ཨསྶུ བྷཝེཡྻུཾ། སནྣདྡྷདུསྶནྟི དུསྶེན ཀཏསནྣཱཧཾ, ལདྡྷཝཏྠཾ ནིཝཏྠཔཱརུཏདུསྶནྟི ཨཏྠོ།
552.Tassāti tassa kappitakamahātherassa. Ekayuganti ekaṃ vatthayugaṃ. Duve vāti dve vā vatthayugāni. Mamuddisitvānāti mamaṃ uddisitvā. Paṭiggahītānicatāni assūti tāni vatthayugāni tena paṭiggahitāni ca assu bhaveyyuṃ. Sannaddhadussanti dussena katasannāhaṃ, laddhavatthaṃ nivatthapārutadussanti attho.
ཏཏོ རཱཛཱ –
Tato rājā –
༥༥༣.
553.
‘‘ཀསྨིཾ པདེསེ སམཎཾ ཝསནྟཾ, གནྟྭཱན པསྶེམུ མཡཾ ཨིདཱནི།
‘‘Kasmiṃ padese samaṇaṃ vasantaṃ, gantvāna passemu mayaṃ idāni;
ཡོ མཛྫ ཀངྑཾ ཝིཙིཀིཙྪིཏཉྩ, དིཊྛཱིཝིསཱུཀཱནི ཝིནོདཡེཡྻཱ’’ཏི༎ –
Yo majja kaṅkhaṃ vicikicchitañca, diṭṭhīvisūkāni vinodayeyyā’’ti. –
ཐེརསྶ ཝསནཊྛཱནཾ པུཙྪི། ཏཏྠ ཀསྨིཾ པདེསེཏི ཀཏརསྨིཾ པདེསེ། ཡོ མཛྫཱཏི ཡོ ཨཛྫ, མ-ཀཱརོ པདསནྡྷིཀརོ།
Therassa vasanaṭṭhānaṃ pucchi. Tattha kasmiṃ padeseti katarasmiṃ padese. Yo majjāti yo ajja, ma-kāro padasandhikaro.
ཏཏོ པེཏོ –
Tato peto –
༥༥༤.
554.
‘‘ཨེསོ ནིསིནྣོ ཀཔིནཙྩནཱཡཾ, པརིཝཱརིཏོ དེཝཏཱཧི བཧཱུཧི།
‘‘Eso nisinno kapinaccanāyaṃ, parivārito devatāhi bahūhi;
དྷམྨིཾ ཀཐཾ བྷཱསཏི སཙྩནཱམོ, སཀསྨིམཱཙེརཀེ ཨཔྤམཏྟོ’’ཏི༎ –
Dhammiṃ kathaṃ bhāsati saccanāmo, sakasmimācerake appamatto’’ti. –
གཱཐམཱཧ། ཏཏྠ ཀཔིནཙྩནཱཡནྟི ཀཔཱིནཾ ཝཱནརཱནཾ ནཙྩནེན ‘‘ཀཔིནཙྩནཱ’’ཏི ལདྡྷཝོཧཱརེ པདེསེ། སཙྩནཱམོཏི ཛྷཱཡཱི སུསཱིལོ ཨརཧཱ ཝིམུཏྟོཏིཨཱདཱིཧི གུཎནཱམེཧི ཡཱཐཱཝནཱམོ ཨཝིཔརཱིཏནཱམོ །
Gāthamāha. Tattha kapinaccanāyanti kapīnaṃ vānarānaṃ naccanena ‘‘kapinaccanā’’ti laddhavohāre padese. Saccanāmoti jhāyī susīlo arahā vimuttotiādīhi guṇanāmehi yāthāvanāmo aviparītanāmo .
ཨེཝཾ པེཏེན ཝུཏྟེ རཱཛཱ ཏཱཝདེཝ ཐེརསྶ སནྟིཀཾ གནྟུཀཱམོ –
Evaṃ petena vutte rājā tāvadeva therassa santikaṃ gantukāmo –
༥༥༥.
555.
‘‘ཏཐཱཧཾ ཀསྶཱམི གནྟྭཱ ཨིདཱནི, ཨཙྪཱདཡིསྶཾ སམཎཾ ཡུགེན།
‘‘Tathāhaṃ kassāmi gantvā idāni, acchādayissaṃ samaṇaṃ yugena;
པཊིགྒཧཱིཏཱནི ཙ ཏཱནི ཨསྶུ, ཏུཝཉྩ པསྶེམུ སནྣདྡྷདུསྶ’’ནྟི༎ –
Paṭiggahītāni ca tāni assu, tuvañca passemu sannaddhadussa’’nti. –
གཱཐམཱཧ། ཏཏྠ ཀསྶཱམཱིཏི ཀརིསྶཱམི།
Gāthamāha. Tattha kassāmīti karissāmi.
ཨཐ པེཏོ ‘‘དེཝཏཱནཾ ཐེརོ དྷམྨཾ དེསེཏི, ཏསྨཱ ནཱཡཾ ཨུཔསངྐམནཀཱལོ’’ཏི དསྶེནྟོ –
Atha peto ‘‘devatānaṃ thero dhammaṃ deseti, tasmā nāyaṃ upasaṅkamanakālo’’ti dassento –
༥༥༦.
556.
‘‘མཱ ཨཀྑཎེ པབྦཛིཏཾ ཨུཔཱགམི, སཱདྷུ ཝོ ལིཙྪཝི ནེས དྷམྨོ།
‘‘Mā akkhaṇe pabbajitaṃ upāgami, sādhu vo licchavi nesa dhammo;
ཏཏོ ཙ ཀཱལེ ཨུཔསངྐམིཏྭཱ, ཏཏྠེཝ པསྶཱཧི རཧོ ནིསིནྣ’’ནྟི༎ –
Tato ca kāle upasaṅkamitvā, tattheva passāhi raho nisinna’’nti. –
གཱཐམཱཧ། ཏཏྠ སཱདྷཱུཏི ཨཱཡཱཙནེ ནིཔཱཏོ། ཝོ ལིཙྪཝི ནེས དྷམྨོཏི, ལིཙྪཝིརཱཛ, ཏུམྷཱཀཾ རཱཛཱུནཾ ཨེས དྷམྨོ ན ཧོཏི, ཡཾ ཨཀཱལེ ཨུཔསངྐམནཾ། ཏཏྠེཝཱཏི ཏསྨིཾཡེཝ ཋཱནེ།
Gāthamāha. Tattha sādhūti āyācane nipāto. Vo licchavi nesa dhammoti, licchavirāja, tumhākaṃ rājūnaṃ esa dhammo na hoti, yaṃ akāle upasaṅkamanaṃ. Tatthevāti tasmiṃyeva ṭhāne.
ཨེཝཾ པེཏེན ཝུཏྟེ རཱཛཱ ‘‘སཱདྷཱུ’’ཏི སམྤཊིཙྪིཏྭཱ ཨཏྟནོ ནིཝེསནམེཝ གནྟྭཱ པུན ཡུཏྟཔཏྟཀཱལེ ཨཊྛ ཝཏྠུཡུགཱནི གཱཧཱཔེཏྭཱ ཐེརཾ ཨུཔསངྐམིཏྭཱ ཨེཀམནྟཾ ནིསིནྣོ པཊིསནྠཱརཾ ཀཏྭཱ ‘‘ཨིམཱནི, བྷནྟེ, ཨཊྛ ཝཏྠཡུགཱནི པཊིགྒཎྷཱ’’ཏི ཨཱཧ། ཏཾ སུཏྭཱ ཐེརོ ཀཐཱསམུཊྛཱཔནཏྠཾ ‘‘མཧཱརཱཛ, པུབྦེ ཏྭཾ ཨདཱནསཱིལོ སམཎབྲཱཧྨཎཱནཾ ཝིཧེཋནཛཱཏིཀོཝ ཀཐཾ པཎཱིཏཱནི ཝཏྠཱནི དཱཏུཀཱམོ ཛཱཏོ’’ཏི ཨཱཧ། ཏཾ སུཏྭཱ རཱཛཱ ཏསྶ ཀཱརཎཾ ཨཱཙིཀྑནྟོ པེཏེན སམཱགམཾ, ཏེན ཙ ཨཏྟནཱ ཙ ཀཐིཏཾ སབྦཾ ཐེརསྶ ཨཱརོཙེཏྭཱ ཝཏྠཱནི དཏྭཱ པེཏསྶ ཨུདྡིསི། ཏེན པེཏོ དིབྦཝཏྠདྷརོ ཨལངྐཏཔཊིཡཏྟོ ཨསྶཱརུལ༹ྷོ ཐེརསྶ ཙ རཉྙོ ཙ པུརཏོ པཱཏུབྷཝི། ཏཾ དིསྭཱ རཱཛཱ ཨཏྟམནོ པམུདིཏོ པཱིཏིསོམནསྶཛཱཏོ ‘‘པཙྩཀྑཏོ ཝཏ མཡཱ ཀམྨཕལཾ དིཊྛཾ, ན དཱནཱཧཾ པཱཔཾ ཀརིསྶཱམི, པུཉྙམེཝ ཀརིསྶཱམཱི’’ཏི ཝཏྭཱ ཏེན པེཏེན སཀྑིཾ ཨཀཱསི། སོ ཙ པེཏོ ‘‘སཙེ, ཏྭཾ ལིཙྪཝིརཱཛ, ཨིཏོ པཊྛཱཡ ཨདྷམྨཾ པཧཱཡ དྷམྨཾ ཙརསི, ཨེཝཱཧཾ ཏཝ སཀྑིཾ ཀརིསྶཱམི, སནྟིཀཉྩ ཏེ ཨཱགམིསྶཱམི, སཱུལཱཝུཏཉྩ པུརིསཾ སཱིགྷཾ སཱུལཏོ མོཙེཧི, ཨེཝཾ སོ ཛཱིཝིཏཾ ལབྷིཏྭཱ དྷམྨཾ ཙརནྟོ དུཀྑཏོ མུཙྩིསྶཏི, ཐེརཉྩ ཀཱལེན ཀཱལཾ ཨུཔསངྐམིཏྭཱ དྷམྨཾ སུཎནྟོ པུཉྙཱནི ཀརོཧཱི’’ཏི ཝཏྭཱ གཏོ།
Evaṃ petena vutte rājā ‘‘sādhū’’ti sampaṭicchitvā attano nivesanameva gantvā puna yuttapattakāle aṭṭha vatthuyugāni gāhāpetvā theraṃ upasaṅkamitvā ekamantaṃ nisinno paṭisanthāraṃ katvā ‘‘imāni, bhante, aṭṭha vatthayugāni paṭiggaṇhā’’ti āha. Taṃ sutvā thero kathāsamuṭṭhāpanatthaṃ ‘‘mahārāja, pubbe tvaṃ adānasīlo samaṇabrāhmaṇānaṃ viheṭhanajātikova kathaṃ paṇītāni vatthāni dātukāmo jāto’’ti āha. Taṃ sutvā rājā tassa kāraṇaṃ ācikkhanto petena samāgamaṃ, tena ca attanā ca kathitaṃ sabbaṃ therassa ārocetvā vatthāni datvā petassa uddisi. Tena peto dibbavatthadharo alaṅkatapaṭiyatto assāruḷho therassa ca rañño ca purato pātubhavi. Taṃ disvā rājā attamano pamudito pītisomanassajāto ‘‘paccakkhato vata mayā kammaphalaṃ diṭṭhaṃ, na dānāhaṃ pāpaṃ karissāmi, puññameva karissāmī’’ti vatvā tena petena sakkhiṃ akāsi. So ca peto ‘‘sace, tvaṃ licchavirāja, ito paṭṭhāya adhammaṃ pahāya dhammaṃ carasi, evāhaṃ tava sakkhiṃ karissāmi, santikañca te āgamissāmi, sūlāvutañca purisaṃ sīghaṃ sūlato mocehi, evaṃ so jīvitaṃ labhitvā dhammaṃ caranto dukkhato muccissati, therañca kālena kālaṃ upasaṅkamitvā dhammaṃ suṇanto puññāni karohī’’ti vatvā gato.
ཨཐ རཱཛཱ ཐེརཾ ཝནྡིཏྭཱ ནགརཾ པཝིསིཏྭཱ སཱིགྷཾ སཱིགྷཾ ལིཙྪཝིཔརིསཾ སནྣིཔཱཏེཏྭཱ ཏེ ཨནུཛཱནཱཔེཏྭཱ ཏཾ པུརིསཾ སཱུལཏོ མོཙེཏྭཱ ‘‘ཨིམཾ ཨརོགཾ ཀརོཐཱ’’ཏི ཏིཀིཙྪཀེ ཨཱཎཱཔེསི། ཐེརཉྩ ཨུཔསངྐམིཏྭཱ པུཙྪི – ‘‘སིཡཱ ནུ ཁོ, བྷནྟེ, ནིརཡགཱམིཀམྨཾ ཀཏྭཱ ཋིཏསྶ ནིརཡཏོ མུཏྟཱི’’ཏི། སིཡཱ, མཧཱརཱཛ, སཙེ ཨུལཱ༹རཾ པུཉྙཾ ཀརོཏི, མུཙྩཏཱིཏི ཝཏྭཱ ཐེརོ རཱཛཱནཾ སརཎེསུ ཙ སཱིལེསུ ཙ པཏིཊྛཱཔེསི། སོ ཏཏྠ པཏིཊྛིཏོ ཐེརསྶ ཨོཝཱདེ ཋཏྭཱ སོཏཱཔནྣོ ཨཧོསི, སཱུལཱཝུཏོ པན པུརིསོ ཨརོགོ ཧུཏྭཱ སཾཝེགཛཱཏོ བྷིཀྑཱུསུ པབྦཛིཏྭཱ ནཙིརསྶེཝ ཨརཧཏྟཾ པཱཔུཎི། ཏམཏྠཾ དསྶེནྟཱ སངྒཱིཏིཀཱརཱ –
Atha rājā theraṃ vanditvā nagaraṃ pavisitvā sīghaṃ sīghaṃ licchaviparisaṃ sannipātetvā te anujānāpetvā taṃ purisaṃ sūlato mocetvā ‘‘imaṃ arogaṃ karothā’’ti tikicchake āṇāpesi. Therañca upasaṅkamitvā pucchi – ‘‘siyā nu kho, bhante, nirayagāmikammaṃ katvā ṭhitassa nirayato muttī’’ti. Siyā, mahārāja, sace uḷāraṃ puññaṃ karoti, muccatīti vatvā thero rājānaṃ saraṇesu ca sīlesu ca patiṭṭhāpesi. So tattha patiṭṭhito therassa ovāde ṭhatvā sotāpanno ahosi, sūlāvuto pana puriso arogo hutvā saṃvegajāto bhikkhūsu pabbajitvā nacirasseva arahattaṃ pāpuṇi. Tamatthaṃ dassentā saṅgītikārā –
༥༥༧.
557.
‘‘ཏཐཱཏི ཝཏྭཱ ཨགམཱསི ཏཏྠ, པརིཝཱརིཏོ དཱསགཎེན ལིཙྪཝི།
‘‘Tathāti vatvā agamāsi tattha, parivārito dāsagaṇena licchavi;
སོ ཏཾ ནགརཾ ཨུཔསངྐམིཏྭཱ, ཝཱསཱུཔགཙྪིཏྠ སཀེ ནིཝེསནེ༎
So taṃ nagaraṃ upasaṅkamitvā, vāsūpagacchittha sake nivesane.
༥༥༨.
558.
‘‘ཏཏོ ཙ ཀཱལེ གིཧིཀིཙྩཱནི ཀཏྭཱ,
‘‘Tato ca kāle gihikiccāni katvā,
ནྷཏྭཱ པིཝིཏྭཱ ཙ ཁཎཾ ལབྷིཏྭཱ།
Nhatvā pivitvā ca khaṇaṃ labhitvā;
ཝིཙེཡྻ པེལཱ༹ཏོ ཙ ཡུགཱནི ཨཊྛ,
Viceyya peḷāto ca yugāni aṭṭha,
གཱཧཱཔཡཱི དཱསགཎེན ལིཙྪཝི༎
Gāhāpayī dāsagaṇena licchavi.
༥༥༩.
559.
‘‘སོ ཏཾ པདེསཾ ཨུཔསངྐམིཏྭཱ, ཏཾ ཨདྡས སམཎཾ སནྟཙིཏྟཾ།
‘‘So taṃ padesaṃ upasaṅkamitvā, taṃ addasa samaṇaṃ santacittaṃ;
པཊིཀྐནྟཾ གོཙརཏོ ནིཝཏྟཾ, སཱིཏིབྷཱུཏཾ རུཀྑམཱུལེ ནིསིནྣཾ༎
Paṭikkantaṃ gocarato nivattaṃ, sītibhūtaṃ rukkhamūle nisinnaṃ.
༥༦༠.
560.
‘‘ཏམེནམཝོཙ ཨུཔསངྐམིཏྭཱ, ཨཔྤཱབཱདྷཾ ཕཱསུཝིཧཱརཉྩ པུཙྪི།
‘‘Tamenamavoca upasaṅkamitvā, appābādhaṃ phāsuvihārañca pucchi;
ཝེསཱལིཡཾ ལིཙྪཝིཧཾ བྷདནྟེ, ཛཱནནྟི མཾ ལིཙྪཝི ཨམྦསཀྐརོ༎
Vesāliyaṃ licchavihaṃ bhadante, jānanti maṃ licchavi ambasakkaro.
༥༦༡.
561.
‘‘ཨིམཱནི མེ ཨཊྛ ཡུགཱ སུབྷཱནི, པཊིགྒཎྷ བྷནྟེ པདདཱམི ཏུཡ྄ཧཾ།
‘‘Imāni me aṭṭha yugā subhāni, paṭiggaṇha bhante padadāmi tuyhaṃ;
ཏེནེཝ ཨཏྠེན ཨིདྷཱགཏོསྨི, ཡཐཱ ཨཧཾ ཨཏྟམནོ བྷཝེཡྻནྟི༎
Teneva atthena idhāgatosmi, yathā ahaṃ attamano bhaveyyanti.
༥༦༢.
562.
‘‘དཱུརཏོཝ སམཎཱ བྲཱཧྨཎཱ ཙ, ནིཝེསནཾ ཏེ པརིཝཛྫཡནྟི།
‘‘Dūratova samaṇā brāhmaṇā ca, nivesanaṃ te parivajjayanti;
པཏྟཱནི བྷིཛྫནྟི ཙ ཏེ ནིཝེསནེ, སངྒྷཱཊིཡོ ཙཱཔི ཝིདཱལཡནྟི༎
Pattāni bhijjanti ca te nivesane, saṅghāṭiyo cāpi vidālayanti.
༥༦༣.
563.
‘‘ཨཐཱཔརེ པཱདཀུཋཱརིཀཱཧི, ཨཝཾསིརཱ སམཎཱ པཱཏཡནྟི།
‘‘Athāpare pādakuṭhārikāhi, avaṃsirā samaṇā pātayanti;
ཨེཏཱདིསཾ པབྦཛིཏཱ ཝིཧེསཾ, ཏཡཱ ཀཏཾ སམཎཱ པཱཔུཎནྟི༎
Etādisaṃ pabbajitā vihesaṃ, tayā kataṃ samaṇā pāpuṇanti.
༥༦༤.
564.
‘‘ཏིཎེན ཏེལམྤི ན ཏྭཾ ཨདཱསི, མཱུལ༹ྷསྶ མགྒམྤི ན པཱཝདཱསི།
‘‘Tiṇena telampi na tvaṃ adāsi, mūḷhassa maggampi na pāvadāsi;
ཨནྡྷསྶ དཎྜཾ སཡམཱདིཡཱསི, ཨེཏཱདིསོ ཀདརིཡོ ཨསཾཝུཏོ ཏུཝཾ།
Andhassa daṇḍaṃ sayamādiyāsi, etādiso kadariyo asaṃvuto tuvaṃ;
ཨཐ ཏྭཾ ཀེན ཝཎྞེན ཀིམེཝ དིསྭཱ, ཨམྷེཧི སཧ སཾཝིབྷཱགཾ ཀརོསཱིཏི༎
Atha tvaṃ kena vaṇṇena kimeva disvā, amhehi saha saṃvibhāgaṃ karosīti.
༥༦༥.
565.
‘‘པཙྩེམི བྷནྟེ ཡཾ ཏྭཾ ཝདེསི, ཝིཧེསཡིཾ སམཎེ བྲཱཧྨཎེ ཙ།
‘‘Paccemi bhante yaṃ tvaṃ vadesi, vihesayiṃ samaṇe brāhmaṇe ca;
ཁིཌྜཏྠིཀོ ནོ ཙ པདུཊྛཙིཏྟོ, ཨེཏམྤི མེ དུཀྐཊམེཝ བྷནྟེ༎
Khiḍḍatthiko no ca paduṭṭhacitto, etampi me dukkaṭameva bhante.
༥༦༦.
566.
ཁིཌྜཱཡ ཡཀྑོ པསཝིཏྭཱ པཱཔཾ, ཝེདེཏི དུཀྑཾ ཨསམཏྟབྷོགཱི།
Khiḍḍāya yakkho pasavitvā pāpaṃ, vedeti dukkhaṃ asamattabhogī;
དཧརོ ཡུཝཱ ནགྒནིཡསྶ བྷཱགཱི, ཀིཾ སུ ཏཏོ དུཀྑཏརསྶ ཧོཏི༎
Daharo yuvā nagganiyassa bhāgī, kiṃ su tato dukkhatarassa hoti.
༥༦༧.
567.
‘‘ཏཾ དིསྭཱ སཾཝེགམལཏྠཾ བྷནྟེ, ཏཔྤཙྩཡཱ ཝཱཔི དདཱམི དཱནཾ།
‘‘Taṃ disvā saṃvegamalatthaṃ bhante, tappaccayā vāpi dadāmi dānaṃ;
པཊིགྒཎྷ བྷནྟེ ཝཏྠཡུགཱནི ཨཊྛ, ཡཀྑསྶིམཱ གཙྪནྟུ དཀྑིཎཱཡོཏི༎
Paṭiggaṇha bhante vatthayugāni aṭṭha, yakkhassimā gacchantu dakkhiṇāyoti.
༥༦༨.
568.
‘‘ཨདྡྷཱ ཧི དཱནཾ བཧུདྷཱ པསཏྠཾ, དདཏོ ཙ ཏེ ཨཀྑཡདྷམྨམཏྠུ།
‘‘Addhā hi dānaṃ bahudhā pasatthaṃ, dadato ca te akkhayadhammamatthu;
པཊིགཎྷཱམི ཏེ ཝཏྠཡུགཱནི ཨཊྛ, ཡཀྑསྶིམཱ གཙྪནྟུ དཀྑིཎཱཡོཏི༎
Paṭigaṇhāmi te vatthayugāni aṭṭha, yakkhassimā gacchantu dakkhiṇāyoti.
༥༦༩.
569.
‘‘ཏཏོ ཧི སོ ཨཱཙམཡིཏྭཱ ལིཙྪཝི, ཐེརསྶ དཏྭཱན ཡུགཱནི ཨཊྛ།
‘‘Tato hi so ācamayitvā licchavi, therassa datvāna yugāni aṭṭha;
པཊིགྒཧཱིཏཱནི ཙ ཏཱནི ཨསྶུ, ཡཀྑཉྩ པསྶེཐ སནྣདྡྷདུསྶཾ༎
Paṭiggahītāni ca tāni assu, yakkhañca passetha sannaddhadussaṃ.
༥༧༠.
570.
‘‘ཏམདྡསཱ ཙནྡནསཱརལིཏྟཾ, ཨཱཛཉྙམཱརཱུལ༹ྷམུལཱ༹རཝཎྞཾ།
‘‘Tamaddasā candanasāralittaṃ, ājaññamārūḷhamuḷāravaṇṇaṃ;
ཨལངྐཏཾ སཱདྷུནིཝཏྠདུསྶཾ, པརིཝཱརིཏཾ ཡཀྑམཧིདྡྷིཔཏྟཾ༎
Alaṅkataṃ sādhunivatthadussaṃ, parivāritaṃ yakkhamahiddhipattaṃ.
༥༧༡.
571.
‘‘སོ ཏཾ དིསྭཱ ཨཏྟམནོ ཨུདགྒོ, པཧཊྛཙིཏྟོ ཙ སུབྷགྒརཱུཔོ།
‘‘So taṃ disvā attamano udaggo, pahaṭṭhacitto ca subhaggarūpo;
ཀམྨཉྩ དིསྭཱན མཧཱཝིཔཱཀཾ, སནྡིཊྛིཀཾ ཙཀྑུནཱ སཙྪིཀཏྭཱ༎
Kammañca disvāna mahāvipākaṃ, sandiṭṭhikaṃ cakkhunā sacchikatvā.
༥༧༢.
572.
‘‘ཏམེནམཝོཙ ཨུཔསངྐམིཏྭཱ, དསྶཱམི དཱནཾ སམཎབྲཱཧྨཎཱནཾ།
‘‘Tamenamavoca upasaṅkamitvā, dassāmi dānaṃ samaṇabrāhmaṇānaṃ;
ན ཙཱཔི མེ ཀིཉྩི ཨདེཡྻམཏྠི, ཏུཝཉྩ མེ ཡཀྑ བཧཱུཔཀཱརོཏི༎
Na cāpi me kiñci adeyyamatthi, tuvañca me yakkha bahūpakāroti.
༥༧༣.
573.
‘‘ཏུཝཉྩ མེ ལིཙྪཝི ཨེཀདེསཾ, ཨདཱསི དཱནཱནི ཨམོགྷམེཏཾ།
‘‘Tuvañca me licchavi ekadesaṃ, adāsi dānāni amoghametaṃ;
སྭཱཧཾ ཀརིསྶཱམི ཏཡཱཝ སཀྑིཾ, ཨམཱནུསོ མཱནུསཀེན སདྡྷིནྟི༎
Svāhaṃ karissāmi tayāva sakkhiṃ, amānuso mānusakena saddhinti.
༥༧༤.
574.
‘‘གཏཱི ཙ བནྡྷཱུ ཙ པརཱཡཎཉྩ, མིཏྟོ མམཱསི ཨཐ དེཝཏཱ མེ།
‘‘Gatī ca bandhū ca parāyaṇañca, mitto mamāsi atha devatā me;
ཡཱཙཱམི ཏཾ པཉྫལིཀོ བྷཝིཏྭཱ, ཨིཙྪཱམི ཏཾ ཡཀྑ པུནཔི དཊྛུནྟི༎
Yācāmi taṃ pañjaliko bhavitvā, icchāmi taṃ yakkha punapi daṭṭhunti.
༥༧༥.
575.
‘‘སཙེ ཏུཝཾ ཨསྶདྡྷོ བྷཝིསྶསི, ཀདརིཡརཱུཔོ ཝིཔྤཊིཔནྣཙིཏྟོ།
‘‘Sace tuvaṃ assaddho bhavissasi, kadariyarūpo vippaṭipannacitto;
ཏྭཾ ནེཝ མཾ ལཙྪསི དསྶནཱཡ, དིསྭཱ ཙ ཏཾ ནོཔི ཙ ཨཱལཔིསྶཾ༎
Tvaṃ neva maṃ lacchasi dassanāya, disvā ca taṃ nopi ca ālapissaṃ.
༥༧༦.
576.
‘‘སཙེ པན ཏྭཾ བྷཝིསྶསི དྷམྨགཱརཝོ, དཱནེ རཏོ སངྒཧིཏཏྟབྷཱཝོ།
‘‘Sace pana tvaṃ bhavissasi dhammagāravo, dāne rato saṅgahitattabhāvo;
ཨོཔཱནབྷཱུཏོ སམཎབྲཱཧྨཎཱནཾ, ཨེཝཾ མམཾ ལཙྪསི དསྶནཱཡ༎
Opānabhūto samaṇabrāhmaṇānaṃ, evaṃ mamaṃ lacchasi dassanāya.
༥༧༧.
577.
‘‘དིསྭཱ ཙ ཏཾ ཨཱལཔིསྶཾ བྷདནྟེ, ཨིམཉྩ སཱུལཏོ ལཧུཾ པམུཉྩ།
‘‘Disvā ca taṃ ālapissaṃ bhadante, imañca sūlato lahuṃ pamuñca;
ཡཏོནིདཱནཾ ཨཀརིམྷ སཀྑིཾ, མཉྙཱམི སཱུལཱཝུཏཀསྶ ཀཱརཎཱ༎
Yatonidānaṃ akarimha sakkhiṃ, maññāmi sūlāvutakassa kāraṇā.
༥༧༨.
578.
‘‘ཏེ ཨཉྙམཉྙཾ ཨཀརིམྷ སཀྑིཾ, ཨཡཉྩ སཱུལཏོ ལཧུཾ པམུཏྟོ།
‘‘Te aññamaññaṃ akarimha sakkhiṃ, ayañca sūlato lahuṃ pamutto;
སཀྐཙྩ དྷམྨཱནི སམཱཙརནྟོ, མུཙྩེཡྻ སོ ནིརཡཱ ཙ ཏམྷཱ།
Sakkacca dhammāni samācaranto, mucceyya so nirayā ca tamhā;
ཀམྨཾ སིཡཱ ཨཉྙཏྲ ཝེདནཱིཡཾ༎
Kammaṃ siyā aññatra vedanīyaṃ.
༥༧༩.
579.
‘‘ཀཔྤིཏཀཉྩ ཨུཔསངྐམིཏྭཱ, ཏེནེཝ སཧ སཾཝིབྷཛིཏྭཱ ཀཱལེ།
‘‘Kappitakañca upasaṅkamitvā, teneva saha saṃvibhajitvā kāle;
སཡཾ མུཁེནཱུཔནིསཛྫ པུཙྪ, སོ ཏེ ཨཀྑིསྶཏི ཨེཏམཏྠཾ༎
Sayaṃ mukhenūpanisajja puccha, so te akkhissati etamatthaṃ.
༥༨༠.
580.
‘‘ཏམེཝ བྷིཀྑུཾ ཨུཔསངྐམིཏྭཱ, པུཙྪསྶུ ཨཉྙཏྠིཀོ ནོ ཙ པདུཊྛཙིཏྟོ།
‘‘Tameva bhikkhuṃ upasaṅkamitvā, pucchassu aññatthiko no ca paduṭṭhacitto;
སོ ཏེ སུཏཾ ཨསུཏཉྩཱཔི དྷམྨཾ, སབྦམྤི ཨཀྑིསྶཏི ཡཐཱ པཛཱནནྟི༎
So te sutaṃ asutañcāpi dhammaṃ, sabbampi akkhissati yathā pajānanti.
༥༨༡.
581.
‘‘སོ ཏཏྠ རཧསྶཾ སམུལླཔིཏྭཱ, སཀྑིཾ ཀརིཏྭཱན ཨམཱནུསེན།
‘‘So tattha rahassaṃ samullapitvā, sakkhiṃ karitvāna amānusena;
པཀྐཱམི སོ ལིཙྪཝིནཾ སཀཱསཾ, ཨཐ བྲཝི པརིསཾ སནྣིསིནྣཾ༎
Pakkāmi so licchavinaṃ sakāsaṃ, atha bravi parisaṃ sannisinnaṃ.
༥༨༢.
582.
‘‘‘སུཎནྟུ བྷོནྟོ མམ ཨེཀཝཱཀྱཾ, ཝརཾ ཝརིསྶཾ ལབྷིསྶཱམི ཨཏྠཾ།
‘‘‘Suṇantu bhonto mama ekavākyaṃ, varaṃ varissaṃ labhissāmi atthaṃ;
སཱུལཱཝུཏོ པུརིསོ ལུདྡཀམྨོ, པཎིཧིཏདཎྜོ ཨནུསཏྟརཱུཔོ༎
Sūlāvuto puriso luddakammo, paṇihitadaṇḍo anusattarūpo.
༥༨༣.
583.
‘‘‘ཨེཏྟཱཝཏཱ ཝཱིསཏིརཏྟིམཏྟཱ, ཡཏོ ཨཱཝུཏོ ནེཝ ཛཱིཝཏི ན མཏོ།
‘‘‘Ettāvatā vīsatirattimattā, yato āvuto neva jīvati na mato;
ཏཱཧཾ མོཙཡིསྶཱམི དཱནི, ཡཐཱམཏིཾ ཨནུཛཱནཱཏུ སངྒྷོ’ཏི༎
Tāhaṃ mocayissāmi dāni, yathāmatiṃ anujānātu saṅgho’ti.
༥༨༤.
584.
‘‘‘ཨེཏཉྩ ཨཉྙཉྩ ལཧུཾ པམུཉྩ, ཀོ ཏཾ ཝདེཐ ཏཐཱ ཀརོནྟཾ།
‘‘‘Etañca aññañca lahuṃ pamuñca, ko taṃ vadetha tathā karontaṃ;
ཡཐཱ པཛཱནཱསི ཏཐཱ ཀརོཧི, ཡཐཱམཏིཾ ཨནུཛཱནཱཏི སངྒྷོ’ཏི༎
Yathā pajānāsi tathā karohi, yathāmatiṃ anujānāti saṅgho’ti.
༥༨༥.
585.
‘‘སོ ཏཾ པདེསཾ ཨུཔསངྐམིཏྭཱ, སཱུལཱཝུཏཾ མོཙཡི ཁིཔྤམེཝ།
‘‘So taṃ padesaṃ upasaṅkamitvā, sūlāvutaṃ mocayi khippameva;
མཱ བྷཱཡི སམྨཱཏི ཙ ཏཾ ཨཝོཙ, ཏིཀིཙྪཀཱནཉྩ ཨུཔཊྛཔེསི༎
Mā bhāyi sammāti ca taṃ avoca, tikicchakānañca upaṭṭhapesi.
༥༨༦.
586.
‘‘ཀཔྤིཏཀཉྩ ཨུཔསངྐམིཏྭཱ, ཏེནེཝ སཧ སཾཝིབྷཛིཏྭཱ ཀཱལེ།
‘‘Kappitakañca upasaṅkamitvā, teneva saha saṃvibhajitvā kāle;
སཡཾ མུཁེནཱུཔནིསཛྫ ལིཙྪཝི, ཏཐེཝ པུཙྪིཏྠ ནཾ ཀཱརཎཏྠིཀོ༎
Sayaṃ mukhenūpanisajja licchavi, tatheva pucchittha naṃ kāraṇatthiko.
༥༨༧.
587.
‘‘སཱུལཱཝུཏོ པུརིསོ ལུདྡཀམྨོ, པཎཱིཏདཎྜོ ཨནུསཏྟརཱུཔོ།
‘‘Sūlāvuto puriso luddakammo, paṇītadaṇḍo anusattarūpo;
ཨེཏྟཱཝཏཱ ཝཱིསཏིརཏྟིམཏྟཱ, ཡཏོ ཨཱཝུཏོ ནེཝ ཛཱིཝཏི ན མཏོ༎
Ettāvatā vīsatirattimattā, yato āvuto neva jīvati na mato.
༥༨༨.
588.
‘‘སོ མོཙིཏོ གནྟྭཱ མཡཱ ཨིདཱནི, ཨེཏསྶ ཡཀྑསྶ ཝཙོ ཧི བྷནྟེ།
‘‘So mocito gantvā mayā idāni, etassa yakkhassa vaco hi bhante;
སིཡཱ ནུ ཁོ ཀཱརཎཾ ཀིཉྩིདེཝ, ཡེན སོ ནིརཡཾ ནོ ཝཛེཡྻ༎
Siyā nu kho kāraṇaṃ kiñcideva, yena so nirayaṃ no vajeyya.
༥༨༩.
589.
‘‘ཨཱཙིཀྑ བྷནྟེ ཡདི ཨཏྠི ཧེཏུ, སདྡྷཱཡིཀཾ ཧེཏུཝཙོ སུཎོམ།
‘‘Ācikkha bhante yadi atthi hetu, saddhāyikaṃ hetuvaco suṇoma;
ན ཏེསཾ ཀམྨཱནཾ ཝིནཱསམཏྠི, ཨཝེདཡིཏྭཱ ཨིདྷ བྱནྟིབྷཱཝོཏི༎
Na tesaṃ kammānaṃ vināsamatthi, avedayitvā idha byantibhāvoti.
༥༩༠.
590.
‘‘སཙེ ས དྷམྨཱནི སམཱཙརེཡྻ, སཀྐཙྩ རཏྟིནྡིཝམཔྤམཏྟོ།
‘‘Sace sa dhammāni samācareyya, sakkacca rattindivamappamatto;
མུཙྩེཡྻ སོ ནིརཡཱ ཙ ཏམྷཱ, ཀམྨཾ སིཡཱ ཨཉྙཏྲ ཝེདནཱིཡནྟི༎
Mucceyya so nirayā ca tamhā, kammaṃ siyā aññatra vedanīyanti.
༥༩༡.
591.
‘‘ཨཉྙཱཏོ ཨེསོ པུརིསསྶ ཨཏྠོ, མམམྤི དཱནི ཨནུཀམྤ བྷནྟེ།
‘‘Aññāto eso purisassa attho, mamampi dāni anukampa bhante;
ཨནུསཱས མཾ ཨོཝད བྷཱུརིཔཉྙ, ཡཐཱ ཨཧཾ ནོ ནིརཡཾ ཝཛེཡྻནྟི༎
Anusāsa maṃ ovada bhūripañña, yathā ahaṃ no nirayaṃ vajeyyanti.
༥༩༢.
592.
‘‘ཨཛྫེཝ བུདྡྷཾ སརཎཾ ཨུཔེཧི, དྷམྨཉྩ སངྒྷཉྩ པསནྣཙིཏྟོ།
‘‘Ajjeva buddhaṃ saraṇaṃ upehi, dhammañca saṅghañca pasannacitto;
ཏཐེཝ སིཀྑཱཡ པདཱནི པཉྩ, ཨཁཎྜཕུལླཱནི སམཱདིཡསྶུ༎
Tatheva sikkhāya padāni pañca, akhaṇḍaphullāni samādiyassu.
༥༩༣.
593.
‘‘པཱཎཱཏིཔཱཏཱ ཝིརམསྶུ ཁིཔྤཾ, ལོཀེ ཨདིནྣཾ པརིཝཛྫཡསྶུ།
‘‘Pāṇātipātā viramassu khippaṃ, loke adinnaṃ parivajjayassu;
ཨམཛྫཔོ མཱ ཙ མུསཱ ཨབྷཱཎཱི, སཀེན དཱརེན ཙ ཧོཏི ཏུཊྛོ།
Amajjapo mā ca musā abhāṇī, sakena dārena ca hoti tuṭṭho;
ཨིམཉྩ ཨརིཡཾ ཨཊྛངྒཝརེནུཔེཏཾ, སམཱདིཡཱཧི ཀུསལཾ སུཁུདྲཡཾ༎
Imañca ariyaṃ aṭṭhaṅgavarenupetaṃ, samādiyāhi kusalaṃ sukhudrayaṃ.
༥༩༤.
594.
‘‘ཙཱིཝརཾ པིཎྜཔཱཏཉྩ, པཙྩཡཾ སཡནཱསནཾ།
‘‘Cīvaraṃ piṇḍapātañca, paccayaṃ sayanāsanaṃ;
ཨནྣཾ པཱནཾ ཁཱདནཱིཡཾ, ཝཏྠསེནཱསནཱནི ཙ།
Annaṃ pānaṃ khādanīyaṃ, vatthasenāsanāni ca;
དདཱཧི ཨུཛུབྷཱུཏེསུ, ཝིཔྤསནྣེན ཙེཏསཱ༎
Dadāhi ujubhūtesu, vippasannena cetasā.
༥༩༥.
595.
‘‘བྷིཀྑཱུཔི སཱིལསམྤནྣེ, ཝཱིཏརཱགེ བཧུསྶུཏེ།
‘‘Bhikkhūpi sīlasampanne, vītarāge bahussute;
ཏཔྤེཧི ཨནྣཔཱནེན, སདཱ པུཉྙཾ པཝཌྜྷཏི༎
Tappehi annapānena, sadā puññaṃ pavaḍḍhati.
༥༩༦.
596.
‘‘ཨེཝཉྩ དྷམྨཱནི སམཱཙརནྟོ, སཀྐཙྩ རཏྟིནྡིཝམཔྤམཏྟོ།
‘‘Evañca dhammāni samācaranto, sakkacca rattindivamappamatto;
མུཉྩ ཏུཝཾ ནིརཡཱ ཙ ཏམྷཱ, ཀམྨཾ སིཡཱ ཨཉྙཏྲ ཝེདནཱིཡནྟི༎
Muñca tuvaṃ nirayā ca tamhā, kammaṃ siyā aññatra vedanīyanti.
༥༩༧.
597.
‘‘ཨཛྫེཝ བུདྡྷཾ སརཎཾ ཨུཔེམི, དྷམྨཉྩ སངྒྷཉྩ པསནྣཙིཏྟོ།
‘‘Ajjeva buddhaṃ saraṇaṃ upemi, dhammañca saṅghañca pasannacitto;
ཏཐེཝ སིཀྑཱཡ པདཱནི པཉྩ, ཨཁཎྜཕུལླཱནི སམཱདིཡཱམི༎
Tatheva sikkhāya padāni pañca, akhaṇḍaphullāni samādiyāmi.
༥༩༨.
598.
‘‘པཱཎཱཏིཔཱཏཱ ཝིརམཱམི ཁིཔྤཾ, ལོཀེ ཨདིནྣཾ པརིཝཛྫཡཱམི།
‘‘Pāṇātipātā viramāmi khippaṃ, loke adinnaṃ parivajjayāmi;
ཨམཛྫཔོ ནོ ཙ མུསཱ བྷཎཱམི, སཀེན དཱརེན ཙ ཧོམི ཏུཊྛོ།
Amajjapo no ca musā bhaṇāmi, sakena dārena ca homi tuṭṭho;
ཨིམཉྩ ཨརིཡཾ ཨཊྛངྒཝརེནུཔེཏཾ, སམཱདིཡཱམི ཀུསལཾ སུཁུདྲཡཾ༎
Imañca ariyaṃ aṭṭhaṅgavarenupetaṃ, samādiyāmi kusalaṃ sukhudrayaṃ.
༥༩༩.
599.
‘‘ཙཱིཝརཾ པིཎྜཔཱཏཉྩ, པཙྩཡཾ སཡནཱསནཾ།
‘‘Cīvaraṃ piṇḍapātañca, paccayaṃ sayanāsanaṃ;
ཨནྣཾ པཱནཾ ཁཱདནཱིཡཾ, ཝཏྠསེནཱསནཱནི ཙ༎
Annaṃ pānaṃ khādanīyaṃ, vatthasenāsanāni ca.
༦༠༠.
600.
‘‘བྷིཀྑཱུ ཙ སཱིལསམྤནྣེ, ཝཱིཏརཱགེ བཧུསྶུཏེ།
‘‘Bhikkhū ca sīlasampanne, vītarāge bahussute;
དདཱམི ན ཝིཀམྤཱམི, བུདྡྷཱནཾ སཱསནེ རཏོཏི༎
Dadāmi na vikampāmi, buddhānaṃ sāsane ratoti.
༦༠༡.
601.
‘‘ཨེཏཱདིསོ ལིཙྪཝི ཨམྦསཀྐརོ, ཝེསཱལིཡཾ ཨཉྙཏརོ ཨུཔཱསཀོ།
‘‘Etādiso licchavi ambasakkaro, vesāliyaṃ aññataro upāsako;
སདྡྷོ མུདཱུ ཀཱརཀརོ ཙ བྷིཀྑུ, སངྒྷཉྩ སཀྐཙྩ ཏདཱ ཨུཔཊྛཧི༎
Saddho mudū kārakaro ca bhikkhu, saṅghañca sakkacca tadā upaṭṭhahi.
༦༠༢.
602.
‘‘སཱུལཱཝུཏོ ཙ ཨརོགོ ཧུཏྭཱ, སེརཱི སུཁཱི པབྦཛྫཾ ཨུཔཱགམི།
‘‘Sūlāvuto ca arogo hutvā, serī sukhī pabbajjaṃ upāgami;
བྷིཀྑུཉྩ ཨཱགམྨ ཀཔྤིཏཀུཏྟམཾ, ཨུབྷོཔི སཱམཉྙཕལཱནི ཨཛ྄ཛྷགུཾ༎
Bhikkhuñca āgamma kappitakuttamaṃ, ubhopi sāmaññaphalāni ajjhaguṃ.
༦༠༣.
603.
‘‘ཨེཏཱདིསཱ སཔྤུརིསཱན སེཝནཱ, མཧཔྥལཱ ཧོཏི སཏཾ ཝིཛཱནཏཾ།
‘‘Etādisā sappurisāna sevanā, mahapphalā hoti sataṃ vijānataṃ;
སཱུལཱཝུཏོ ཨགྒཕལཾ ཨཕསྶཡི, ཕལཾ ཀནིཊྛཾ པན ཨམྦསཀྐརོ’’ཏི༎ –
Sūlāvuto aggaphalaṃ aphassayi, phalaṃ kaniṭṭhaṃ pana ambasakkaro’’ti. –
གཱཐཱཡོ ཨཝོཙུཾ།
Gāthāyo avocuṃ.
༥༥༧-༥༦༠. ཏཏྠ ཝཱསཱུཔགཙྪིཏྠཱཏི ཝཱསཾ ཨུཔགཙྪི། གིཧིཀིཙྩཱནཱིཏི གེཧཾ ཨཱཝསནྟེན ཀཱཏབྦཀུཊུམྦཀིཙྩཱནི། ཝིཙེཡྻཱཏི སུནྡརཝཏྠགཧཎཏྠཾ ཝིཙིནིཏྭཱ། པཊིཀྐནྟནྟི པིཎྜཔཱཏཏོ པཊིཀྐནྟཾ། ཏེནཱཧ ‘‘གོཙརཏོ ནིཝཏྟ’’ནྟི། ཨཝོཙཱཏི ‘‘ཝེསཱལིཡཾ ལིཙྪཝིཧཾ, བྷདནྟེ’’ཏིཨཱདིཀཾ ཨཝོཙ།
557-560. Tattha vāsūpagacchitthāti vāsaṃ upagacchi. Gihikiccānīti gehaṃ āvasantena kātabbakuṭumbakiccāni. Viceyyāti sundaravatthagahaṇatthaṃ vicinitvā. Paṭikkantanti piṇḍapātato paṭikkantaṃ. Tenāha ‘‘gocarato nivatta’’nti. Avocāti ‘‘vesāliyaṃ licchavihaṃ, bhadante’’tiādikaṃ avoca.
༥༦༢-༣. ཝིདཱལཡནྟཱིཏི ཝིཕཱལཡནྟི། པཱདཀུཋཱརིཀཱཧཱིཏི པཱདསངྑཱཏཱཧི ཀུཋཱརཱིཧི། པཱཏཡནྟཱིཏི པརིཔཱཏཡནྟི།
562-3.Vidālayantīti viphālayanti. Pādakuṭhārikāhīti pādasaṅkhātāhi kuṭhārīhi. Pātayantīti paripātayanti.
༥༦༤. ཏིཎེནཱཏི ཏིཎགྒེནཱཔི། མཱུལ༹ྷསྶ མགྒམྤི ན པཱཝདཱསཱིཏི མགྒམཱུལ༹ྷསྶ མགྒམྤི ཏྭཾ ན ཀཐཡསི ‘‘ཨེཝཱཡཾ པུརིསཱ ཨིཏོ ཙིཏོ ཙ པརིབྦྷམཏཱུ’’ཏི། ཀེལཱི༹སཱིལོ ཧི ཨཡཾ རཱཛཱ། སཡམཱདིཡཱསཱིཏི ཨནྡྷསྶ ཧཏྠཏོ ཡཊྛིཾ སཡམེཝ ཨཙྪིནྡིཏྭཱ གཎྷསི། སཾཝིབྷཱགཾ ཀརོསཱིཏི ཨཏྟནཱ པརིབྷུཉྫིཏབྦཝཏྠུཏོ ཨེཀཙྩཱནི དཏྭཱ སཾཝིབྷཛསི།
564.Tiṇenāti tiṇaggenāpi. Mūḷhassa maggampi na pāvadāsīti maggamūḷhassa maggampi tvaṃ na kathayasi ‘‘evāyaṃ purisā ito cito ca paribbhamatū’’ti. Keḷīsīlo hi ayaṃ rājā. Sayamādiyāsīti andhassa hatthato yaṭṭhiṃ sayameva acchinditvā gaṇhasi. Saṃvibhāgaṃ karosīti attanā paribhuñjitabbavatthuto ekaccāni datvā saṃvibhajasi.
༥༦༥. པཙྩེམི, བྷནྟེ, ཡཾ ཏྭཾ ཝདེསཱིཏི ‘‘བྷནྟེ, ཏྭཾ པཏྟཱནི བྷིཛྫནྟཱི’’ཏིཨཱདིནཱ ཡཾ ཝདེསི, ཏཾ པཊིཛཱནཱམི, སབྦམེཝེཏཾ མཡཱ ཀཏཾ ཀཱརཱཔིཏཉྩཱཏི དསྶེཏི། ཨེཏམྤཱིཏི ཨེཏཾ ཁིཌྜཱདྷིཔྤཱཡེན ཀཏམྤི།
565.Paccemi, bhante, yaṃ tvaṃ vadesīti ‘‘bhante, tvaṃ pattāni bhijjantī’’tiādinā yaṃ vadesi, taṃ paṭijānāmi, sabbamevetaṃ mayā kataṃ kārāpitañcāti dasseti. Etampīti etaṃ khiḍḍādhippāyena katampi.
༥༦༦-༧. ཁིཌྜཱཏི ཁིཌྜཱཡ། པསཝིཏྭཱཏི ཨུཔཙིནིཏྭཱ། ཝེདེཏཱིཏི ཨནུབྷཝཏི། ཨསམཏྟབྷོགཱིཏི ཨཔརིཔུཎྞབྷོགོ། ཏམེཝ ཨཔརིཔུཎྞབྷོགཏཾ དསྶེཏུཾ ‘‘དཧརོ ཡུཝཱ’’ཏིཨཱདི ཝུཏྟཾ། ནགྒནིཡསྶཱཏི ནགྒབྷཱཝསྶ། ཀིཾ སུ ཏཏོ དུཀྑཏརསྶ ཧོཏཱིཏི ཀིཾ སུ ནཱམ ཏཏོ ནགྒབྷཱཝཏོ དུཀྑཏརཾ ཨསྶ པེཏསྶ ཧོཏི། ཡཀྑསྶིམཱ གཙྪནྟུ དཀྑིཎཱཡོཏི ཨིམཱ མཡཱ དིཡྻམཱནཝཏྠདཀྑིཎཱཡོ པེཏསྶ ཨུཔཀཔྤནྟུ།
566-7.Khiḍḍāti khiḍḍāya. Pasavitvāti upacinitvā. Vedetīti anubhavati. Asamattabhogīti aparipuṇṇabhogo. Tameva aparipuṇṇabhogataṃ dassetuṃ ‘‘daharo yuvā’’tiādi vuttaṃ. Nagganiyassāti naggabhāvassa. Kiṃ su tato dukkhatarassa hotīti kiṃ su nāma tato naggabhāvato dukkhataraṃ assa petassa hoti. Yakkhassimā gacchantu dakkhiṇāyoti imā mayā diyyamānavatthadakkhiṇāyo petassa upakappantu.
༥༦༨-༧༢. བཧུདྷཱ པསཏྠནྟི བཧཱུཧི པཀཱརེཧི བུདྡྷཱདཱིཧི ཝཎྞིཏཾ། ཨཀྑཡདྷམྨམཏྠཱུཏི ཨཔརིཀྑཡདྷམྨཾ ཧོཏུ། ཨཱཙམཡིཏྭཱཏི ཧཏྠཔཱདདྷོཝནཔུབྦཀཾ མུཁཾ ཝིཀྑཱལེཏྭཱ། ཙནྡནསཱརལིཏྟནྟི སཱརབྷཱུཏཙནྡནལིཏྟཾ། ཨུལཱ༹རཝཎྞནྟི སེཊྛརཱུཔཾ། པརིཝཱརིཏནྟི ཨནུཀུལཝུཏྟིནཱ པརིཛནེན པརིཝཱརིཏཾ། ཡཀྑམཧིདྡྷིཔཏྟནྟི མཧཏིཾ ཡཀྑིདྡྷིཾ, དེཝིདྡྷིཾ པཏྭཱ ཋིཏཾ། ཏམེནམཝོཙཱཏི ཏམེནཾ ཨཝོཙ།
568-72.Bahudhāpasatthanti bahūhi pakārehi buddhādīhi vaṇṇitaṃ. Akkhayadhammamatthūti aparikkhayadhammaṃ hotu. Ācamayitvāti hatthapādadhovanapubbakaṃ mukhaṃ vikkhāletvā. Candanasāralittanti sārabhūtacandanalittaṃ. Uḷāravaṇṇanti seṭṭharūpaṃ. Parivāritanti anukulavuttinā parijanena parivāritaṃ. Yakkhamahiddhipattanti mahatiṃ yakkhiddhiṃ, deviddhiṃ patvā ṭhitaṃ. Tamenamavocāti tamenaṃ avoca.
༥༧༣. ཨེཀདེསཾ ཨདཱསཱིཏི ཙཏཱུསུ པཙྩཡེསུ ཨེཀདེསབྷཱུཏཾ ཝཏྠདཱནཾ སནྡྷཱཡ ཝདཏི། སཀྑིནྟི སཀྑིབྷཱཝཾ།
573.Ekadesaṃ adāsīti catūsu paccayesu ekadesabhūtaṃ vatthadānaṃ sandhāya vadati. Sakkhinti sakkhibhāvaṃ.
༥༧༤. མམཱསཱིཏི མེ ཨཱསི། དེཝཏཱ མེཏི མཡ྄ཧཾ དེཝཏཱ ཨཱསཱིཏི ཡོཛནཱ།
574.Mamāsīti me āsi. Devatā meti mayhaṃ devatā āsīti yojanā.
༥༧༥-༧. ཝིཔྤཊིཔནྣཙིཏྟོཏི མིཙྪཱདིཊྛིཾ པཊིཔནྣམཱནསོ, དྷམྨིཡཾ པཊིཔདཾ པཧཱཡ ཨདྷམྨིཡཾ པཊིཔདཾ པཊིཔནྣོཏི ཨཏྠོ། ཡཏོནིདཱནནྟི ཡནྣིམིཏྟཾ ཡསྶ སནྟིཀཾ ཨཱགམནཧེཏུ།
575-7.Vippaṭipannacittoti micchādiṭṭhiṃ paṭipannamānaso, dhammiyaṃ paṭipadaṃ pahāya adhammiyaṃ paṭipadaṃ paṭipannoti attho. Yatonidānanti yannimittaṃ yassa santikaṃ āgamanahetu.
༥༧༩. སཾཝིབྷཛིཏྭཱཏི དཱནསཾཝིབྷཱགཾ ཀཏྭཱ། སཡཾ མུཁེནཱུཔནིསཛྫ པུཙྪཱཏི ཨཉྙེ པུརིསེ ཨཔེསེཏྭཱ ཨུཔིནིསཱིདིཏྭཱ སམྨུཁེནེཝ པུཙྪ།
579.Saṃvibhajitvāti dānasaṃvibhāgaṃ katvā. Sayaṃ mukhenūpanisajja pucchāti aññe purise apesetvā upinisīditvā sammukheneva puccha.
༥༨༡-༣. སནྣིསིནྣནྟི སནྣིཔཏིཏཝསེན ནིསིནྣཾ། ལབྷིསྶཱམི ཨཏྠནྟི མཡཱ ཨིཙྪིཏམྤི ཨཏྠཾ ལབྷིསྶཱམི། པཎིཧིཏདཎྜོཏི ཋཔིཏསརཱིརདཎྜོ། ཨནུསཏྟརཱུཔོཏི རཱཛིནི ཨནུསཏྟསབྷཱཝོ། ཝཱིསཏིརཏྟིམཏྟཱཏི ཝཱིསཏིམཏྟཱ རཏྟིཡོ ཨཏིཝཏྟཱཏི ཨཏྠོ། ཏཱཧནྟི ཏཾ ཨཧཾ། ཡཐཱམཏིནྟི མཡ྄ཧཾ ཡཐཱརུཙི།
581-3.Sannisinnanti sannipatitavasena nisinnaṃ. Labhissāmi atthanti mayā icchitampi atthaṃ labhissāmi. Paṇihitadaṇḍoti ṭhapitasarīradaṇḍo. Anusattarūpoti rājini anusattasabhāvo. Vīsatirattimattāti vīsatimattā rattiyo ativattāti attho. Tāhanti taṃ ahaṃ. Yathāmatinti mayhaṃ yathāruci.
༥༨༤. ཨེཏཉྩ ཨཉྙཉྩཱཏི ཨེཏཾ སཱུལེ ཨཱཝུཏཾ པུརིསཾ ཨཉྙཉྩ ཡསྶ རཱཛཱཎཱ པཎིཧིཏཱ, ཏཉྩ། ལཧུཾ པམུཉྩཱཏི སཱིགྷཾ མོཙེཧི། ཀོ ཏཾ ཝདེཐ ཏཐཱ ཀརོནྟནྟི ཏཐཱ དྷམྨིཡཀམྨཾ ཀརོནྟཾ ཏཾ ཨིམསྨིཾ ཝཛྫིརཊྛེ ཀོ ནཱམ ‘‘ན པམོཙེཧཱི’’ཏི ཝདེཡྻ, ཨེཝཾ ཝཏྟུཾ ཀོཙིཔི ན ལབྷཏཱིཏི ཨཏྠོ།
584.Etañcaaññañcāti etaṃ sūle āvutaṃ purisaṃ aññañca yassa rājāṇā paṇihitā, tañca. Lahuṃ pamuñcāti sīghaṃ mocehi. Ko taṃ vadetha tathā karontanti tathā dhammiyakammaṃ karontaṃ taṃ imasmiṃ vajjiraṭṭhe ko nāma ‘‘na pamocehī’’ti vadeyya, evaṃ vattuṃ kocipi na labhatīti attho.
༥༨༥. ཏིཀིཙྪཀཱནཉྩཱཏི ཏིཀིཙྪཀེ ཙ།
585.Tikicchakānañcāti tikicchake ca.
༥༨༨. ཡཀྑསྶ ཝཙོཏི པེཏསྶ ཝཙནཾ, ཏསྶ, བྷནྟེ, པེཏསྶ ཝཙནེན ཨེཝམཀཱསིནྟི དསྶེཏི།
588.Yakkhassa vacoti petassa vacanaṃ, tassa, bhante, petassa vacanena evamakāsinti dasseti.
༥༩༠. དྷམྨཱནཱིཏི པུབྦེ ཀཏཾ པཱཔཀམྨཾ ཨབྷིབྷཝིཏུཾ སམཏྠེ པུཉྙདྷམྨེ། ཀམྨཾ སིཡཱ ཨཉྙཏྲ ཝེདནཱིཡནྟི ཡཾ ཏསྨིཾ པཱཔཀམྨེ ཨུཔཔཛྫཝེདནཱིཡཾ, ཏཾ ཨཧོསིཀམྨཾ ནཱམ ཧོཏི། ཡཾ པན ཨཔརཔརིཡཱཡཝེདནཱིཡཾ, ཏཾ ཨཉྙཏྲ ཨཔརཔརིཡཱཡེ ཝེདཡིཏབྦཕལཾ ཧོཏི སཏི སཾསཱརཔྤཝཏྟིཡནྟི ཨཏྠོ།
590.Dhammānīti pubbe kataṃ pāpakammaṃ abhibhavituṃ samatthe puññadhamme. Kammaṃ siyā aññatra vedanīyanti yaṃ tasmiṃ pāpakamme upapajjavedanīyaṃ, taṃ ahosikammaṃ nāma hoti. Yaṃ pana aparapariyāyavedanīyaṃ, taṃ aññatra aparapariyāye vedayitabbaphalaṃ hoti sati saṃsārappavattiyanti attho.
༥༩༣. ཨིམཉྩཱཏི ཨཏྟནཱ ཝུཙྩམཱནཾ ཏཱཡ ཨཱསནྣཾ པཙྩཀྑཾ ཝཱཏི ཀཏྭཱ ཝུཏྟཾ། ཨརིཡཾ ཨཊྛངྒཝརེནུཔེཏནྟི པརིསུདྡྷཊྛེན ཨརིཡཾ, པཱཎཱཏིཔཱཏཱཝེརམཎིཨཱདཱིཧི ཨཊྛཧི ཨངྒེཧི ཨུཔེཏཾ ཡུཏྟཾ ཨུཏྟམཾ ཨུཔོསཐསཱིལཾ། ཀུསལནྟི ཨནཝཛྫཾ། སུཁུདྲཡནྟི སུཁཝིཔཱཀཾ།
593.Imañcāti attanā vuccamānaṃ tāya āsannaṃ paccakkhaṃ vāti katvā vuttaṃ. Ariyaṃ aṭṭhaṅgavarenupetanti parisuddhaṭṭhena ariyaṃ, pāṇātipātāveramaṇiādīhi aṭṭhahi aṅgehi upetaṃ yuttaṃ uttamaṃ uposathasīlaṃ. Kusalanti anavajjaṃ. Sukhudrayanti sukhavipākaṃ.
༥༩༥. སདཱ པུཉྙཾ པཝཌྜྷཏཱིཏི སཀིདེཝ པུཉྙཾ ཀཏྭཱ ‘‘ཨལམེཏྟཱཝཏཱ’’ཏི ཨཔརིཏུཊྛོ ཧུཏྭཱ ཨཔརཱཔརཾ སུཙརིཏཾ པཱུརེནྟསྶ སབྦཀཱལཾ པུཉྙཾ ཨབྷིཝཌྜྷཏི, ཨཔརཱཔརཾ ཝཱ སུཙརིཏཾ པཱུརེནྟསྶ པུཉྙསངྑཱཏཾ པུཉྙཕལཾ ཨུཔརཱུཔརི ཝཌྜྷཏི པརིཔཱུརེཏཱིཏི ཨཏྠོ།
595.Sadā puññaṃ pavaḍḍhatīti sakideva puññaṃ katvā ‘‘alamettāvatā’’ti aparituṭṭho hutvā aparāparaṃ sucaritaṃ pūrentassa sabbakālaṃ puññaṃ abhivaḍḍhati, aparāparaṃ vā sucaritaṃ pūrentassa puññasaṅkhātaṃ puññaphalaṃ uparūpari vaḍḍhati paripūretīti attho.
༥༩༧. ཨེཝཾ ཐེརེན ཝུཏྟེ རཱཛཱ ཨཔཱཡདུཀྑཏོ ཨུཏྲསྟཙིཏྟོ རཏནཏྟཡེ པུཉྙདྷམྨེ ཙ ཨབྷིཝཌྜྷམཱནཔསཱདོ ཏཏོ པཊྛཱཡ སརཎཱནི སཱིལཱནི ཙ སམཱདིཡནྟོ ‘‘ཨཛྫེཝ བུདྡྷཾ སརཎཾ ཨུཔེམཱི’’ཏིཨཱདིམཱཧ།
597. Evaṃ therena vutte rājā apāyadukkhato utrastacitto ratanattaye puññadhamme ca abhivaḍḍhamānapasādo tato paṭṭhāya saraṇāni sīlāni ca samādiyanto ‘‘ajjeva buddhaṃ saraṇaṃ upemī’’tiādimāha.
༦༠༡. ཏཏྠ ཨེཏཱདིསོཏི ཨེདིསོ ཡཐཱཝུཏྟརཱུཔོ། ཝེསཱལིཡཾ ཨཉྙཏརོ ཨུཔཱསཀོཏི ཝེསཱལིཡཾ ཨནེཀསཧསྶེསུ ཨུཔཱསཀེསུ ཨཉྙཏརོ ཨུཔཱསཀོ ཧུཏྭཱ། སདྡྷོཏིཨཱདི ཀལྱཱཎམིཏྟསནྣིསྶཡེན ཏསྶ པུརིམབྷཱཝཏོ ཨཉྙཱདིསཏཾ དསྶེཏུཾ ཝུཏྟཾ། པུབྦེ ཧི སོ ཨསྶདྡྷོ ཀཀྑལོ༹ བྷིཀྑཱུནཾ ཨཀྐོསཀཱརཀོ སངྒྷསྶ ཙ ཨནུཔཊྛཱཀོ ཨཧོསི། ཨིདཱནི པན སདྡྷོ མུདུཀོ ཧུཏྭཱ བྷིཀྑུསངྒྷཉྩ སཀྐཙྩཾ ཏདཱ ཨུཔཊྛཧཱིཏི། ཏཏྟ ཀཱརཀརོཏི ཨུཔཀཱརཀཱརཱི།
601. Tattha etādisoti ediso yathāvuttarūpo. Vesāliyaṃ aññataro upāsakoti vesāliyaṃ anekasahassesu upāsakesu aññataro upāsako hutvā. Saddhotiādi kalyāṇamittasannissayena tassa purimabhāvato aññādisataṃ dassetuṃ vuttaṃ. Pubbe hi so assaddho kakkhaḷo bhikkhūnaṃ akkosakārako saṅghassa ca anupaṭṭhāko ahosi. Idāni pana saddho muduko hutvā bhikkhusaṅghañca sakkaccaṃ tadā upaṭṭhahīti. Tatta kārakaroti upakārakārī.
༦༠༢. ཨུབྷོཔཱིཏི དྭེཔི སཱུལཱཝུཏོ རཱཛཱ ཙ། སཱམཉྙཕལཱནི ཨཛ྄ཛྷགུནྟི ཡཐཱརཧཾ སཱམཉྙཕལཱནི ཨདྷིགཙྪིཾསུ། ཏཡིདཾ ཡཐཱརཧཾ དསྶེཏུཾ ‘‘སཱུལཱཝུཏོ ཨགྒཕལཾ ཨཕསྶཡི, ཕལཾ ཀནིཊྛཾ པན ཨམྦསཀྐརོ’’ཏི ཝུཏྟཾ། ཏཏྠ ཕལཾ ཀནིཊྛནྟི སོཏཱཔཏྟིཕལཾ སནྡྷཱཡཱཧ། ཡཾ པནེཏྠ ཨཏྠཏོ ཨཝིབྷཏྟཾ, ཏཾ སུཝིཉྙེཡྻམེཝ།
602.Ubhopīti dvepi sūlāvuto rājā ca. Sāmaññaphalāni ajjhagunti yathārahaṃ sāmaññaphalāni adhigacchiṃsu. Tayidaṃ yathārahaṃ dassetuṃ ‘‘sūlāvuto aggaphalaṃ aphassayi, phalaṃ kaniṭṭhaṃ pana ambasakkaro’’ti vuttaṃ. Tattha phalaṃ kaniṭṭhanti sotāpattiphalaṃ sandhāyāha. Yaṃ panettha atthato avibhattaṃ, taṃ suviññeyyameva.
ཨེཝཾ རཉྙཱ པེཏེན ཨཏྟནཱ ཙ ཝུཏྟམཏྠཾ ཨཱཡསྨཱ ཀཔྤིཏཀོ སཏྠཱརཾ ཝནྡིཏུཾ སཱཝཏྠིཾ གཏོ བྷགཝཏོ ཨཱརོཙེསི ། སཏྠཱ ཏམཏྠཾ ཨཊྛུཔྤཏྟིཾ ཀཏྭཱ སམྤཏྟཔརིསཱཡ དྷམྨཾ དེསེསི། སཱ དེསནཱ མཧཱཛནསྶ སཱཏྠིཀཱ ཨཧོསཱིཏི།
Evaṃ raññā petena attanā ca vuttamatthaṃ āyasmā kappitako satthāraṃ vandituṃ sāvatthiṃ gato bhagavato ārocesi . Satthā tamatthaṃ aṭṭhuppattiṃ katvā sampattaparisāya dhammaṃ desesi. Sā desanā mahājanassa sātthikā ahosīti.
ཨམྦསཀྐརཔེཏཝཏྠུཝཎྞནཱ ནིཊྛིཏཱ།
Ambasakkarapetavatthuvaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / པེཏཝཏྠུཔཱལི༹ • Petavatthupāḷi / ༡. ཨམྦསཀྐརཔེཏཝཏྠུ • 1. Ambasakkarapetavatthu
