| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
5. අම්‌බසුත්‌තං
5. Ambasuttaṃ
105. ‘‘චත්‌තාරිමානි, භික්‌ඛවෙ, අම්‌බානි. කතමානි චත්‌තාරි? ආමං පක්‌කවණ්‌ණි 1, පක්‌කං ආමවණ්‌ණි 2, ආමං ආමවණ්‌ණි, පක්‌කං පක්‌කවණ්‌ණි – ඉමානි ඛො, භික්‌ඛවෙ, චත්‌තාරි අම්‌බානි. එවමෙවං ඛො, භික්‌ඛවෙ, චත්‌තාරො අම්‌බූපමා 3 පුග්‌ගලා සන්‌තො සංවිජ්‌ජමානා ලොකස්‌මිං. කතමෙ චත්‌තාරො? ආමො පක්‌කවණ්‌ණී, පක්‌කො ආමවණ්‌ණී, ආමො ආමවණ්‌ණී, පක්‌කො පක්‌කවණ්‌ණී.
105. ‘‘Cattārimāni, bhikkhave, ambāni. Katamāni cattāri? Āmaṃ pakkavaṇṇi 4, pakkaṃ āmavaṇṇi 5, āmaṃ āmavaṇṇi, pakkaṃ pakkavaṇṇi – imāni kho, bhikkhave, cattāri ambāni. Evamevaṃ kho, bhikkhave, cattāro ambūpamā 6 puggalā santo saṃvijjamānā lokasmiṃ. Katame cattāro? Āmo pakkavaṇṇī, pakko āmavaṇṇī, āmo āmavaṇṇī, pakko pakkavaṇṇī.
‘‘කථඤ්‌ච, භික්‌ඛවෙ, පුග්‌ගලො ආමො හොති පක්‌කවණ්‌ණී? ඉධ , භික්‌ඛවෙ, එකච්‌චස්‌ස පුග්‌ගලස්‌ස පාසාදිකං හොති අභික්‌කන්‌තං පටික්‌කන්‌තං ආලොකිතං විලොකිතං සමිඤ්‌ජිතං පසාරිතං සඞ්‌ඝාටිපත්‌තචීවරධාරණං. සො ‘ඉදං දුක්‌ඛ’න්‌ති යථාභූතං නප්‌පජානාති…පෙ.… ‘අයං දුක්‌ඛනිරොධගාමිනී පටිපදා’ති යථාභූතං නප්‌පජානාති. එවං ඛො, භික්‌ඛවෙ, පුග්‌ගලො ආමො හොති පක්‌කවණ්‌ණී. සෙය්‍යථාපි තං, භික්‌ඛවෙ, අම්‌බං ආමං පක්‌කවණ්‌ණි; තථූපමාහං, භික්‌ඛවෙ, ඉමං පුග්‌ගලං වදාමි.
‘‘Kathañca, bhikkhave, puggalo āmo hoti pakkavaṇṇī? Idha , bhikkhave, ekaccassa puggalassa pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ. So ‘idaṃ dukkha’nti yathābhūtaṃ nappajānāti…pe… ‘ayaṃ dukkhanirodhagāminī paṭipadā’ti yathābhūtaṃ nappajānāti. Evaṃ kho, bhikkhave, puggalo āmo hoti pakkavaṇṇī. Seyyathāpi taṃ, bhikkhave, ambaṃ āmaṃ pakkavaṇṇi; tathūpamāhaṃ, bhikkhave, imaṃ puggalaṃ vadāmi.
‘‘කථඤ්‌ච, භික්‌ඛවෙ, පුග්‌ගලො පක්‌කො හොති ආමවණ්‌ණී? ඉධ, භික්‌ඛවෙ, එකච්‌චස්‌ස පුග්‌ගලස්‌ස න පාසාදිකං හොති අභික්‌කන්‌තං පටික්‌කන්‌තං ආලොකිතං විලොකිතං සමිඤ්‌ජිතං පසාරිතං සඞ්‌ඝාටිපත්‌තචීවරධාරණං. සො ‘ඉදං දුක්‌ඛ’න්‌ති යථාභූතං පජානාති…පෙ.… ‘අයං දුක්‌ඛනිරොධගාමිනී පටිපදා’ති යථාභූතං පජානාති. එවං ඛො, භික්‌ඛවෙ, පුග්‌ගලො පක්‌කො හොති ආමවණ්‌ණී. සෙය්‍යථාපි තං, භික්‌ඛවෙ, අම්‌බං පක්‌කං ආමවණ්‌ණි; තථූපමාහං, භික්‌ඛවෙ, ඉමං පුග්‌ගලං වදාමි.
‘‘Kathañca, bhikkhave, puggalo pakko hoti āmavaṇṇī? Idha, bhikkhave, ekaccassa puggalassa na pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ. So ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti. Evaṃ kho, bhikkhave, puggalo pakko hoti āmavaṇṇī. Seyyathāpi taṃ, bhikkhave, ambaṃ pakkaṃ āmavaṇṇi; tathūpamāhaṃ, bhikkhave, imaṃ puggalaṃ vadāmi.
‘‘කථඤ්‌ච, භික්‌ඛවෙ, පුග්‌ගලො ආමො හොති ආමවණ්‌ණී? ඉධ, භික්‌ඛවෙ, එකච්‌චස්‌ස පුග්‌ගලස්‌ස න පාසාදිකං හොති අභික්‌කන්‌තං පටික්‌කන්‌තං ආලොකිතං විලොකිතං සමිඤ්‌ජිතං පසාරිතං සඞ්‌ඝාටිපත්‌තචීවරධාරණං. සො ‘ඉදං දුක්‌ඛ’න්‌ති යථාභූතං නප්‌පජානාති…පෙ.… ‘අයං දුක්‌ඛනිරොධගාමිනී පටිපදා’ති යථාභූතං නප්‌පජානාති. එවං ඛො, භික්‌ඛවෙ, පුග්‌ගලො ආමො හොති ආමවණ්‌ණී . සෙය්‍යථාපි තං, භික්‌ඛවෙ, අම්‌බං ආමං ආමවණ්‌ණි; තථූපමාහං, භික්‌ඛවෙ, ඉමං පුග්‌ගලං වදාමි.
‘‘Kathañca, bhikkhave, puggalo āmo hoti āmavaṇṇī? Idha, bhikkhave, ekaccassa puggalassa na pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ. So ‘idaṃ dukkha’nti yathābhūtaṃ nappajānāti…pe… ‘ayaṃ dukkhanirodhagāminī paṭipadā’ti yathābhūtaṃ nappajānāti. Evaṃ kho, bhikkhave, puggalo āmo hoti āmavaṇṇī . Seyyathāpi taṃ, bhikkhave, ambaṃ āmaṃ āmavaṇṇi; tathūpamāhaṃ, bhikkhave, imaṃ puggalaṃ vadāmi.
‘‘කථඤ්‌ච, භික්‌ඛවෙ, පුග්‌ගලො පක්‌කො හොති පක්‌කවණ්‌ණී? ඉධ, භික්‌ඛවෙ, එකච්‌චස්‌ස පුග්‌ගලස්‌ස පාසාදිකං හොති අභික්‌කන්‌තං පටික්‌කන්‌තං ආලොකිතං විලොකිතං සමිඤ්‌ජිතං පසාරිතං සඞ්‌ඝාටිපත්‌තචීවරධාරණං. සො ‘ඉදං දුක්‌ඛ’න්‌ති යථාභූතං පජානාති…පෙ.… ‘අයං දුක්‌ඛනිරොධගාමිනී පටිපදා’ති යථාභූතං පජානාති. එවං ඛො, භික්‌ඛවෙ, පුග්‌ගලො පක්‌කො හොති පක්‌කවණ්‌ණී. සෙය්‍යථාපි තං, භික්‌ඛවෙ, අම්‌බං පක්‌කං පක්‌කවණ්‌ණි; තථූපමාහං, භික්‌ඛවෙ, ඉමං පුග්‌ගලං වදාමි. ඉමෙ ඛො, භික්‌ඛවෙ, චත්‌තාරො අම්‌බූපමා පුග්‌ගලා සන්‌තො සංවිජ්‌ජමානා ලොකස්‌මි’’න්‌ති. පඤ්‌චමං.
‘‘Kathañca, bhikkhave, puggalo pakko hoti pakkavaṇṇī? Idha, bhikkhave, ekaccassa puggalassa pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ. So ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti. Evaṃ kho, bhikkhave, puggalo pakko hoti pakkavaṇṇī. Seyyathāpi taṃ, bhikkhave, ambaṃ pakkaṃ pakkavaṇṇi; tathūpamāhaṃ, bhikkhave, imaṃ puggalaṃ vadāmi. Ime kho, bhikkhave, cattāro ambūpamā puggalā santo saṃvijjamānā lokasmi’’nti. Pañcamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 5-6. අම්‌බසුත්‌තවණ්‌ණනා • 5-6. Ambasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 5-6. අම්‌බසුත්‌තාදිවණ්‌ණනා • 5-6. Ambasuttādivaṇṇanā
