Library / Tipiṭaka / ཏིཔིཊཀ • Tipiṭaka / དཱིགྷ ནིཀཱཡ (ཨཊྛཀཐཱ) • Dīgha nikāya (aṭṭhakathā)

    ༣. ཨམྦཊྛསུཏྟཝཎྞནཱ

    3. Ambaṭṭhasuttavaṇṇanā

    ཨདྡྷཱནགམནཝཎྞནཱ

    Addhānagamanavaṇṇanā

    ༢༥༤. ཨེཝཾ མེ སུཏཾ…པེ॰… ཀོསལེསཱུཏི ཨམྦཊྛསུཏྟཾ། ཏཏྲཱཡཾ ཨཔུབྦཔདཝཎྞནཱ། ཀོསལེསཱུཏི ཀོསལཱ ནཱམ ཛཱནཔདིནོ རཱཛཀུམཱརཱ། ཏེསཾ ནིཝཱསོ ཨེཀོཔི ཛནཔདོ རཱུལ༹ྷཱིསདྡེན ཀོསལཱཏི ཝུཙྩཏི, ཏསྨིཾ ཀོསལེསུ ཛནཔདེ། པོརཱཎཱ པནཱཧུ – ཡསྨཱ པུབྦེ མཧཱཔནཱདཾ རཱཛཀུམཱརཾ ནཱནཱནཱཊཀཱདཱིནི དིསྭཱ སིཏམཏྟམྤི ཨཀརོནྟཾ སུཏྭཱ རཱཛཱ ཨཱཧ – ‘‘ཡོ མམ པུཏྟཾ ཧསཱཔེཏི, སབྦཱལངྐཱརེན ནཾ ཨལངྐརོམཱི’’ཏི། ཏཏོ ནངྒལཱནིཔི ཚཌྜེཏྭཱ མཧཱཛནཀཱཡེ སནྣིཔཏིཏེ མནུསྶཱ སཱཏིརེཀཱནི སཏྟཝསྶཱནི ནཱནཱཀཱིལཱ༹ཡོ དསྶེཏྭཱཔི ཏཾ ཧསཱཔེཏུཾ ནཱསཀྑིཾསུ, ཏཏོ སཀྐོ དེཝརཱཛཱ ནཱཊཀཾ པེསེསི, སོ དིབྦནཱཊཀཾ དསྶེཏྭཱ ཧསཱཔེསི། ཨཐ ཏེ མནུསྶཱ ཨཏྟནོ ཨཏྟནོ ཝསནོཀཱསཱབྷིམུཁཱ པཀྐམིཾསུ། ཏེ པཊིཔཐེ མིཏྟསུཧཛྫཱདཡོ དིསྭཱ པཊིསནྠཱརཾ ཀརོནྟཱ – ‘‘ཀཙྩི བྷོ ཀུསལཾ, ཀཙྩི བྷོ ཀུསལ’’ནྟི ཨཱཧཾསུ། ཏསྨཱ ཏཾ ‘‘ཀུསལ’’ནྟི ཝཙནཾ ཨུཔཱདཱཡ སོ པདེསོ ཀོསལཱཏི ཝུཙྩཏཱིཏི།

    254. Evaṃ me sutaṃ…pe… kosalesūti ambaṭṭhasuttaṃ. Tatrāyaṃ apubbapadavaṇṇanā. Kosalesūti kosalā nāma jānapadino rājakumārā. Tesaṃ nivāso ekopi janapado rūḷhīsaddena kosalāti vuccati, tasmiṃ kosalesu janapade. Porāṇā panāhu – yasmā pubbe mahāpanādaṃ rājakumāraṃ nānānāṭakādīni disvā sitamattampi akarontaṃ sutvā rājā āha – ‘‘yo mama puttaṃ hasāpeti, sabbālaṅkārena naṃ alaṅkaromī’’ti. Tato naṅgalānipi chaḍḍetvā mahājanakāye sannipatite manussā sātirekāni sattavassāni nānākīḷāyo dassetvāpi taṃ hasāpetuṃ nāsakkhiṃsu, tato sakko devarājā nāṭakaṃ pesesi, so dibbanāṭakaṃ dassetvā hasāpesi. Atha te manussā attano attano vasanokāsābhimukhā pakkamiṃsu. Te paṭipathe mittasuhajjādayo disvā paṭisanthāraṃ karontā – ‘‘kacci bho kusalaṃ, kacci bho kusala’’nti āhaṃsu. Tasmā taṃ ‘‘kusala’’nti vacanaṃ upādāya so padeso kosalāti vuccatīti.

    ཙཱརིཀཾ ཙརམཱནོཏི ཨདྡྷཱནགམནཾ གཙྪནྟོ། ཙཱརིཀཱ ཙ ནཱམེསཱ བྷགཝཏོ དུཝིདྷཱ ཧོཏི – ཏུརིཏཙཱརིཀཱ ཙ, ཨཏུརིཏཙཱརིཀཱ ཙ། ཏཏྠ དཱུརེཔི བོདྷནེཡྻཔུགྒལཾ དིསྭཱ ཏསྶ བོདྷནཏྠཱཡ སཧསཱ གམནཾ ཏུརིཏཙཱརིཀཱ ནཱམ, སཱ མཧཱཀསྶཔསྶ པཙྩུགྒམནཱདཱིསུ དཊྛབྦཱ། བྷགཝཱ ཧི མཧཱཀསྶཔཏྠེརཾ པཙྩུགྒཙྪནྟོ མུཧུཏྟེན ཏིགཱཝུཏཾ མགྒཾ ཨགམཱསི། ཨཱལ༹ཝཀསྶཏྠཱཡ ཏིཾསཡོཛནཾ, ཏཐཱ ཨངྒུལིམཱལསྶ། པཀྐུསཱཏིསྶ པན པཉྩཙཏྟཱལཱིསཡོཛནཾ། མཧཱཀཔྤིནསྶ ཝཱིསཡོཛནསཏཾ། དྷནིཡསྶཏྠཱཡ སཏྟཡོཛནསཏཱནི ཨགམཱསི། དྷམྨསེནཱཔཏིནོ སདྡྷིཝིཧཱརིཀསྶ ཝནཝཱསཱིཏིསྶསཱམཎེརསྶ ཏིགཱཝུཏཱདྷིཀཾ ཝཱིསཡོཛནསཏཾ།

    Cārikaṃ caramānoti addhānagamanaṃ gacchanto. Cārikā ca nāmesā bhagavato duvidhā hoti – turitacārikā ca, aturitacārikā ca. Tattha dūrepi bodhaneyyapuggalaṃ disvā tassa bodhanatthāya sahasā gamanaṃ turitacārikā nāma, sā mahākassapassa paccuggamanādīsu daṭṭhabbā. Bhagavā hi mahākassapattheraṃ paccuggacchanto muhuttena tigāvutaṃ maggaṃ agamāsi. Āḷavakassatthāya tiṃsayojanaṃ, tathā aṅgulimālassa. Pakkusātissa pana pañcacattālīsayojanaṃ. Mahākappinassa vīsayojanasataṃ. Dhaniyassatthāya sattayojanasatāni agamāsi. Dhammasenāpatino saddhivihārikassa vanavāsītissasāmaṇerassa tigāvutādhikaṃ vīsayojanasataṃ.

    ཨེཀདིཝསཾ ཀིར ཐེརོ – ‘‘ཏིསྶསཱམཎེརསྶ སནྟིཀཾ, བྷནྟེ, གཙྪཱམཱི’’ཏི ཨཱཧ། བྷགཝཱ – ‘‘ཨཧམྤི གམིསྶཱམཱི’’ཏི ཝཏྭཱ ཨཱཡསྨནྟཾ ཨཱནནྡཾ ཨཱམནྟེསི – ‘‘ཨཱནནྡ, ཝཱིསཏིསཧསྶཱནཾ ཚལ༹བྷིཉྙཱནཾ ཨཱརོཙེཧི, བྷགཝཱ ཀིར ཝནཝཱསིསྶ ཏིསྶསཱམཎེརསྶ སནྟིཀཾ གམིསྶཏཱི’’ཏི། ཏཏོ དུཏིཡདིཝསེ ཝཱིསཏིསཧསྶཁཱིཎཱསཝཔརིཝཱརོ ཨཱཀཱསེ ཨུཔྤཏིཏྭཱ ཝཱིསཏིཡོཛནསཏམཏྠཀེ ཏསྶ གོཙརགཱམདྭཱརེ ཨོཏརིཏྭཱ ཙཱིཝརཾ པཱརུཔི། ཏཾ ཀམྨནྟཾ གཙྪམཱནཱ མནུསྶཱ དིསྭཱ – ‘‘སཏྠཱ ནོ ཨཱགཏོ, མཱ ཀམྨནྟཾ ཨགམིཏྠཱ’’ཏི ཝཏྭཱ ཨཱསནཱནི པཉྙཔེཏྭཱ ཡཱགུཾ དཏྭཱ པཱཏརཱསབྷཏྟཾ ཀརོནྟཱ – ‘‘ཀུཧིཾ, བྷནྟེ, བྷགཝཱ གཙྪཏཱི’’ཏི དཧརབྷིཀྑཱུ པུཙྪིཾསུ། ཨུཔཱསཀཱ ན བྷགཝཱ ཨཉྙཏྠ གཙྪཏི, ཨིདྷེཝ ཏིསྶསཱམཎེརསྶ དསྶནཏྠཱཡཱགཏོཏི། ཏེ – ‘‘ཨམྷཱཀཾ ཀུལཱུཔཀསྶ ཀིར ཐེརསྶ དསྶནཏྠཱཡ སཏྠཱ ཨཱགཏོ, ནོ ཝཏ ནོ ཐེརོ ཨོརམཏྟཀོ’’ཏི སོམནསྶཛཱཏཱ ཨཧེསུཾ།

    Ekadivasaṃ kira thero – ‘‘tissasāmaṇerassa santikaṃ, bhante, gacchāmī’’ti āha. Bhagavā – ‘‘ahampi gamissāmī’’ti vatvā āyasmantaṃ ānandaṃ āmantesi – ‘‘ānanda, vīsatisahassānaṃ chaḷabhiññānaṃ ārocehi, bhagavā kira vanavāsissa tissasāmaṇerassa santikaṃ gamissatī’’ti. Tato dutiyadivase vīsatisahassakhīṇāsavaparivāro ākāse uppatitvā vīsatiyojanasatamatthake tassa gocaragāmadvāre otaritvā cīvaraṃ pārupi. Taṃ kammantaṃ gacchamānā manussā disvā – ‘‘satthā no āgato, mā kammantaṃ agamitthā’’ti vatvā āsanāni paññapetvā yāguṃ datvā pātarāsabhattaṃ karontā – ‘‘kuhiṃ, bhante, bhagavā gacchatī’’ti daharabhikkhū pucchiṃsu. Upāsakā na bhagavā aññattha gacchati, idheva tissasāmaṇerassa dassanatthāyāgatoti. Te – ‘‘amhākaṃ kulūpakassa kira therassa dassanatthāya satthā āgato, no vata no thero oramattako’’ti somanassajātā ahesuṃ.

    ཨཐ ཁོ བྷགཝཏོ བྷཏྟཀིཙྩཔརིཡོསཱནེ སཱམཎེརོ གཱམེ པིཎྜཱཡ ཙརིཏྭཱ – ‘‘ཨུཔཱསཀཱ, མཧཱབྷིཀྑུསངྒྷོ’’ཏི པུཙྪི། ཨཐསྶ ཏེ ‘‘སཏྠཱ, བྷནྟེ, ཨཱགཏོ’’ཏི ཨཱརོཙེསུཾ། སོ བྷགཝནྟཾ ཨུཔསངྐམིཏྭཱ པིཎྜཔཱཏེན ཨཱཔུཙྪི། སཏྠཱ ཏསྶ པཏྟཾ ཧཏྠེན གཧེཏྭཱ – ‘‘ཨལཾ, ཏིསྶ, ནིཊྛིཏཾ བྷཏྟཀིཙྩ’’ནྟི ཨཱཧ། ཏཏོ ཨུཔཛ྄ཛྷཱཡཾ ཨཱཔུཙྪིཏྭཱ ཨཏྟནོ པཏྟཱསནེ ནིསཱིདིཏྭཱ བྷཏྟཀིཙྩམཀཱསི། ཨཐསྶ བྷཏྟཀིཙྩཔརིཡོསཱནེ སཏྠཱ མངྒལཾ ཝཏྭཱ ནིཀྑམིཏྭཱ གཱམདྭཱརེ ཋཏྭཱ – ‘‘ཀཏརོ ཏེ, ཏིསྶ, ཝསནཊྛཱནཾ གཏམགྒོ’’ཏི ཨཱཧ། ཨཡཾ བྷགཝཱཏི། མགྒཾ དེསཡམཱནོ པུརཏོ ཡཱཧི ཏིསྶཱཏི། བྷགཝཱ ཀིར སདེཝཀསྶ ལོཀསྶ མགྒདེསཀོཔི སམཱནོ སཀལེ ཏིགཱཝུཏེ མགྒེ ‘སཱམཎེརཾ དཊྛུཾ ལཙྪཱམཱི’ཏི ཏཾ མགྒདེསཀཾ ཨཀཱསི།

    Atha kho bhagavato bhattakiccapariyosāne sāmaṇero gāme piṇḍāya caritvā – ‘‘upāsakā, mahābhikkhusaṅgho’’ti pucchi. Athassa te ‘‘satthā, bhante, āgato’’ti ārocesuṃ. So bhagavantaṃ upasaṅkamitvā piṇḍapātena āpucchi. Satthā tassa pattaṃ hatthena gahetvā – ‘‘alaṃ, tissa, niṭṭhitaṃ bhattakicca’’nti āha. Tato upajjhāyaṃ āpucchitvā attano pattāsane nisīditvā bhattakiccamakāsi. Athassa bhattakiccapariyosāne satthā maṅgalaṃ vatvā nikkhamitvā gāmadvāre ṭhatvā – ‘‘kataro te, tissa, vasanaṭṭhānaṃ gatamaggo’’ti āha. Ayaṃ bhagavāti. Maggaṃ desayamāno purato yāhi tissāti. Bhagavā kira sadevakassa lokassa maggadesakopi samāno sakale tigāvute magge ‘sāmaṇeraṃ daṭṭhuṃ lacchāmī’ti taṃ maggadesakaṃ akāsi.

    སོ ཨཏྟནོ ཝསནཊྛཱནཾ གནྟྭཱ བྷགཝཏོ ཝཏྟམཀཱསི། ཨཐ ནཾ བྷགཝཱ – ‘‘ཀཏརོ ཏེ, ཏིསྶ, ཙངྐམོ’’ཏི པུཙྪིཏྭཱ ཏཏྠ གནྟྭཱ སཱམཎེརསྶ ནིསཱིདནཔཱསཱཎེ ནིསཱིདིཏྭཱ – ‘‘ཏིསྶ, ཨིམསྨིཾ ཋཱནེ སུཁཾ ཝསཱི’’ཏི པུཙྪི། སོ ཨཱཧ – ‘‘ཨཱམ, བྷནྟེ, ཨིམསྨིཾ ཋཱནེ ཝསནྟསྶ སཱིཧབྱགྒྷཧཏྠིམིགམོརཱདཱིནཾ སདྡཾ སུཎཏོ ཨརཉྙསཉྙཱ ཨུཔྤཛྫཏི, ཏཱཡ སུཁཾ ཝསཱམཱི’’ཏི། ཨཐ ནཾ བྷགཝཱ – ‘‘ཏིསྶ, བྷིཀྑུསངྒྷཾ སནྣིཔཱཏེཧི, བུདྡྷདཱཡཛྫཾ ཏེ དསྶཱམཱི’’ཏི ཝཏྭཱ སནྣིཔཏིཏེ བྷིཀྑུསངྒྷེ ཨུཔསམྤཱདེཏྭཱ ཨཏྟནོ ཝསནཊྛཱནམེཝ ཨགམཱསཱིཏི། ཨཡཾ ཏུརིཏཙཱརིཀཱ ནཱམ། ཡཾ པན གཱམནིགམཔཊིཔཱཊིཡཱ དེཝསིཀཾ ཡོཛནདྭིཡོཛནཝསེན པིཎྜཔཱཏཙརིཡཱདཱིཧི ལོཀཾ ཨནུགྒཎྷནྟསྶ གམནཾ, ཨཡཾ ཨཏུརིཏཙཱརིཀཱ ནཱམ།

    So attano vasanaṭṭhānaṃ gantvā bhagavato vattamakāsi. Atha naṃ bhagavā – ‘‘kataro te, tissa, caṅkamo’’ti pucchitvā tattha gantvā sāmaṇerassa nisīdanapāsāṇe nisīditvā – ‘‘tissa, imasmiṃ ṭhāne sukhaṃ vasī’’ti pucchi. So āha – ‘‘āma, bhante, imasmiṃ ṭhāne vasantassa sīhabyagghahatthimigamorādīnaṃ saddaṃ suṇato araññasaññā uppajjati, tāya sukhaṃ vasāmī’’ti. Atha naṃ bhagavā – ‘‘tissa, bhikkhusaṅghaṃ sannipātehi, buddhadāyajjaṃ te dassāmī’’ti vatvā sannipatite bhikkhusaṅghe upasampādetvā attano vasanaṭṭhānameva agamāsīti. Ayaṃ turitacārikā nāma. Yaṃ pana gāmanigamapaṭipāṭiyā devasikaṃ yojanadviyojanavasena piṇḍapātacariyādīhi lokaṃ anuggaṇhantassa gamanaṃ, ayaṃ aturitacārikā nāma.

    ཨིམཾ པན ཙཱརིཀཾ ཙརནྟོ བྷགཝཱ མཧཱམཎྜལཾ, མཛ྄ཛྷིམམཎྜལཾ, ཨནྟོམཎྜལནྟི ཨིམེསཾ ཏིཎྞཾ མཎྜལཱནཾ ཨཉྙཏརསྨིཾ ཙརཏི། ཏཏྠ མཧཱམཎྜལཾ ནཝཡོཛནསཏིཀཾ, མཛ྄ཛྷིམམཎྜལཾ ཚཡོཛནསཏིཀཾ , ཨནྟོམཎྜལཾ ཏིཡོཛནསཏིཀཾ། ཡདཱ མཧཱམཎྜལེ ཙཱརིཀཾ ཙརིཏུཀཱམོ ཧོཏི, མཧཱཔཝཱརཎཱཡ པཝཱརེཏྭཱ པཱཊིཔདདིཝསེ མཧཱབྷིཀྑུསངྒྷཔརིཝཱརོ ནིཀྑམཏི། སམནྟཱ ཡོཛནསཏཾ ཨེཀཀོལཱཧལཾ ཧོཏི། པུརིམཾ པུརིམཾ ཨཱགཏཱ ནིམནྟེཏུཾ ལབྷནྟི། ཨིཏརེསུ དྭཱིསུ མཎྜལེསུ སཀྐཱརོ མཧཱམཎྜལེ ཨོསརཏི། ཏཏྠ བྷགཝཱ ཏེསུ ཏེསུ གཱམནིགམེསུ ཨེཀཱཧཾ དྭཱིཧཾ ཝསནྟོ མཧཱཛནཾ ཨཱམིསཔྤཊིགྒཧེན ཨནུགྒཎྷནྟོ དྷམྨདཱནེན ཙསྶ ཝིཝཊྚསནྣིསྶིཏཾ ཀུསལཾ ཝཌྜྷེནྟོ ནཝཧི མཱསེཧི ཙཱརིཀཾ པརིཡོསཱཔེཏི། སཙེ པན ཨནྟོཝསྶེ བྷིཀྑཱུནཾ སམཐཝིཔསྶནཱ ཏརུཎཱ ཧོནྟི, མཧཱཔཝཱརཎཱཡ ཨཔཝཱརེཏྭཱ པཝཱརཎཱསངྒཧཾ དཏྭཱ ཀཏྟིཀཔུཎྞམཱཡཾ པཝཱརེཏྭཱ མིགསིརསྶ པཋམཔཱཊིཔདདིཝསེ མཧཱབྷིཀྑུསངྒྷཔརིཝཱརོ ནིཀྑམིཏྭཱ མཛ྄ཛྷིམམཎྜལེ ཨོསརཏི། ཨཉྙེནཔི ཀཱརཎེན མཛ྄ཛྷིམམཎྜལེ ཙཱརིཀཾ ཙརིཏུཀཱམོ ཙཏུམཱསཾ ཝསིཏྭཱཝ ནིཀྑམཏི། ཝུཏྟནཡེནེཝ ཨིཏརེསུ དྭཱིསུ མཎྜལེསུ སཀྐཱརོ མཛ྄ཛྷིམམཎྜལེ ཨོསརཏི། བྷགཝཱ པུརིམནཡེནེཝ ལོཀཾ ཨནུགྒཎྷནྟོ ཨཊྛཧི མཱསེཧི ཙཱརིཀཾ པརིཡོསཱཔེཏི། སཙེ པན ཙཏུམཱསཾ ཝུཏྠཝསྶསྶཱཔི བྷགཝཏོ ཝེནེཡྻསཏྟཱ ཨཔརིཔཀྐིནྡྲིཡཱ ཧོནྟི, ཏེསཾ ཨིནྡྲིཡཔརིཔཱཀཾ ཨཱགམཡམཱནོ ཨཔརམྤི ཨེཀམཱསཾ ཝཱ དྭིཏིཙཏུམཱསཾ ཝཱ ཏཏྠེཝ ཝསིཏྭཱ མཧཱབྷིཀྑུསངྒྷཔརིཝཱརོ ནིཀྑམཏི། ཝུཏྟནཡེནེཝ ཨིཏརེསུ དྭཱིསུ མཎྜལེསུ སཀྐཱརོ ཨནྟོམཎྜལེ ཨོསརཏི། བྷགཝཱ པུརིམནཡེནེཝ ལོཀཾ ཨནུགྒཎྷནྟོ སཏྟཧི ཝཱ ཚཧི ཝཱ པཉྩཧི ཝཱ ཙཏཱུཧི ཝཱ མཱསེཧི ཙཱརིཀཾ པརིཡོསཱཔེཏི། ཨིཏི ཨིམེསུ ཏཱིསུ མཎྜལེསུ ཡཏྠ ཀཏྠཙི ཙཱརིཀཾ ཙརནྟོ ན ཙཱིཝརཱདིཧེཏུ ཙརཏི། ཨཐ ཁོ ཡེ དུགྒཏབཱལཛིཎྞབྱཱདྷིཏཱ, ཏེ ཀདཱ ཏཐཱགཏཾ ཨཱགནྟྭཱ པསྶིསྶནྟི། མཡི པན ཙཱརིཀཾ ཙརནྟེ མཧཱཛནོ ཏཐཱགཏསྶ དསྶནཾ ལབྷིསྶཏི། ཏཏྠ ཀེཙི ཙིཏྟཱནི པསཱདེསྶནྟི , ཀེཙི མཱལཱདཱིཧི པཱུཛེསྶནྟི, ཀེཙི ཀཊཙྪུབྷིཀྑཾ དསྶནྟི, ཀེཙི མིཙྪཱདསྶནཾ པཧཱཡ སམྨཱདིཊྛིཀཱ བྷཝིསྶནྟི། ཏཾ ནེསཾ བྷཝིསྶཏི དཱིགྷརཏྟཾ ཧིཏཱཡ སུཁཱཡཱཏི། ཨེཝཾ ལོཀཱནུཀམྤཀཱཡ ཙཱརིཀཾ ཙརཏི།

    Imaṃ pana cārikaṃ caranto bhagavā mahāmaṇḍalaṃ, majjhimamaṇḍalaṃ, antomaṇḍalanti imesaṃ tiṇṇaṃ maṇḍalānaṃ aññatarasmiṃ carati. Tattha mahāmaṇḍalaṃ navayojanasatikaṃ, majjhimamaṇḍalaṃ chayojanasatikaṃ , antomaṇḍalaṃ tiyojanasatikaṃ. Yadā mahāmaṇḍale cārikaṃ caritukāmo hoti, mahāpavāraṇāya pavāretvā pāṭipadadivase mahābhikkhusaṅghaparivāro nikkhamati. Samantā yojanasataṃ ekakolāhalaṃ hoti. Purimaṃ purimaṃ āgatā nimantetuṃ labhanti. Itaresu dvīsu maṇḍalesu sakkāro mahāmaṇḍale osarati. Tattha bhagavā tesu tesu gāmanigamesu ekāhaṃ dvīhaṃ vasanto mahājanaṃ āmisappaṭiggahena anuggaṇhanto dhammadānena cassa vivaṭṭasannissitaṃ kusalaṃ vaḍḍhento navahi māsehi cārikaṃ pariyosāpeti. Sace pana antovasse bhikkhūnaṃ samathavipassanā taruṇā honti, mahāpavāraṇāya apavāretvā pavāraṇāsaṅgahaṃ datvā kattikapuṇṇamāyaṃ pavāretvā migasirassa paṭhamapāṭipadadivase mahābhikkhusaṅghaparivāro nikkhamitvā majjhimamaṇḍale osarati. Aññenapi kāraṇena majjhimamaṇḍale cārikaṃ caritukāmo catumāsaṃ vasitvāva nikkhamati. Vuttanayeneva itaresu dvīsu maṇḍalesu sakkāro majjhimamaṇḍale osarati. Bhagavā purimanayeneva lokaṃ anuggaṇhanto aṭṭhahi māsehi cārikaṃ pariyosāpeti. Sace pana catumāsaṃ vutthavassassāpi bhagavato veneyyasattā aparipakkindriyā honti, tesaṃ indriyaparipākaṃ āgamayamāno aparampi ekamāsaṃ vā dviticatumāsaṃ vā tattheva vasitvā mahābhikkhusaṅghaparivāro nikkhamati. Vuttanayeneva itaresu dvīsu maṇḍalesu sakkāro antomaṇḍale osarati. Bhagavā purimanayeneva lokaṃ anuggaṇhanto sattahi vā chahi vā pañcahi vā catūhi vā māsehi cārikaṃ pariyosāpeti. Iti imesu tīsu maṇḍalesu yattha katthaci cārikaṃ caranto na cīvarādihetu carati. Atha kho ye duggatabālajiṇṇabyādhitā, te kadā tathāgataṃ āgantvā passissanti. Mayi pana cārikaṃ carante mahājano tathāgatassa dassanaṃ labhissati. Tattha keci cittāni pasādessanti , keci mālādīhi pūjessanti, keci kaṭacchubhikkhaṃ dassanti, keci micchādassanaṃ pahāya sammādiṭṭhikā bhavissanti. Taṃ nesaṃ bhavissati dīgharattaṃ hitāya sukhāyāti. Evaṃ lokānukampakāya cārikaṃ carati.

    ཨཔི ཙ ཙཏཱུཧི ཀཱརཎེཧི བུདྡྷཱ བྷགཝནྟོ ཙཱརིཀཾ ཙརནྟི, ཛངྒྷཝིཧཱརཝསེན སརཱིརཕཱསུཀཏྠཱཡ, ཨཏྠུཔྤཏྟིཀཱལཱབྷིཀངྑནཏྠཱཡ, བྷིཀྑཱུནཾ སིཀྑཱཔདཔཉྙཱཔནཏྠཱཡ, ཏཏྠ ཏཏྠ པརིཔཱཀགཏིནྡྲིཡེ བོདྷནེཡྻསཏྟེ བོདྷནཏྠཱཡཱཏི། ཨཔརེཧིཔི ཙཏཱུཧི ཀཱརཎེཧི བུདྡྷཱ བྷགཝནྟོ ཙཱརིཀཾ ཙརནྟི བུདྡྷཾ སརཎཾ གཙྪིསྶནྟཱིཏི ཝཱ, དྷམྨཾ, སངྒྷཾ སརཎཾ གཙྪིསྶནྟཱིཏི ཝཱ, མཧཏཱ དྷམྨཝསྶེན ཙཏསྶོ པརིསཱ སནྟཔྤེསྶཱམཱིཏི ཝཱ། ཨཔརེཧིཔི པཉྩཧི ཀཱརཎེཧི བུདྡྷཱ བྷགཝནྟོ ཙཱརིཀཾ ཙརནྟི པཱཎཱཏིཔཱཏཱ ཝིརམིསྶནྟཱིཏི ཝཱ, ཨདིནྣཱདཱནཱ , ཀཱམེསུམིཙྪཱཙཱརཱ, མུསཱཝཱདཱ, སུརཱམེརཡམཛྫཔམཱདཊྛཱནཱ ཝིརམིསྶནྟཱིཏི ཝཱ། ཨཔརེཧིཔི ཨཊྛཧི ཀཱརཎེཧི བུདྡྷཱ བྷགཝནྟོ ཙཱརིཀཾ ཙརནྟི – པཋམཾ ཛྷཱནཾ པཊིལབྷིསྶནྟཱིཏི ཝཱ, དུཏིཡཾ ཛྷཱནཾ…པེ॰… ནེཝསཉྙཱནཱསཉྙཱཡཏནསམཱཔཏྟིཾ པཊིལབྷིསྶནྟཱིཏི ཝཱ། ཨཔརེཧིཔི ཨཊྛཧི ཀཱརཎེཧི བུདྡྷཱ བྷགཝནྟོ ཙཱརིཀཾ ཙརནྟི – སོཏཱཔཏྟིམགྒཾ ཨདྷིགམིསྶནྟཱིཏི ཝཱ, སོཏཱཔཏྟིཕལཾ…པེ॰… ཨརཧཏྟཕལཾ སཙྪིཀརིསྶནྟཱིཏི ཝཱཏི། ཨཡཾ ཨཏུརིཏཙཱརིཀཱ, ཨིདྷ ཙཱརིཀཱཏི ཨདྷིཔྤེཏཱ། སཱ པནེསཱ དུཝིདྷཱ ཧོཏི – ཨནིབདྡྷཙཱརིཀཱ ཙ ནིབདྡྷཙཱརིཀཱ ཙ། ཏཏྠ ཡཾ གཱམནིགམནགརཔཊིཔཱཊིཝསེན ཙརཏི, ཨཡཾ ཨནིབདྡྷཙཱརིཀཱ ནཱམ། ཡཾ པནེཀསྶེཝ བོདྷནེཡྻསཏྟསྶཏྠཱཡ གཙྪཏི, ཨཡཾ ནིབདྡྷཙཱརིཀཱ ནཱམ། ཨེསཱ ཨིདྷ ཨདྷིཔྤེཏཱ།

    Api ca catūhi kāraṇehi buddhā bhagavanto cārikaṃ caranti, jaṅghavihāravasena sarīraphāsukatthāya, atthuppattikālābhikaṅkhanatthāya, bhikkhūnaṃ sikkhāpadapaññāpanatthāya, tattha tattha paripākagatindriye bodhaneyyasatte bodhanatthāyāti. Aparehipi catūhi kāraṇehi buddhā bhagavanto cārikaṃ caranti buddhaṃ saraṇaṃ gacchissantīti vā, dhammaṃ, saṅghaṃ saraṇaṃ gacchissantīti vā, mahatā dhammavassena catasso parisā santappessāmīti vā. Aparehipi pañcahi kāraṇehi buddhā bhagavanto cārikaṃ caranti pāṇātipātā viramissantīti vā, adinnādānā , kāmesumicchācārā, musāvādā, surāmerayamajjapamādaṭṭhānā viramissantīti vā. Aparehipi aṭṭhahi kāraṇehi buddhā bhagavanto cārikaṃ caranti – paṭhamaṃ jhānaṃ paṭilabhissantīti vā, dutiyaṃ jhānaṃ…pe… nevasaññānāsaññāyatanasamāpattiṃ paṭilabhissantīti vā. Aparehipi aṭṭhahi kāraṇehi buddhā bhagavanto cārikaṃ caranti – sotāpattimaggaṃ adhigamissantīti vā, sotāpattiphalaṃ…pe… arahattaphalaṃ sacchikarissantīti vāti. Ayaṃ aturitacārikā, idha cārikāti adhippetā. Sā panesā duvidhā hoti – anibaddhacārikā ca nibaddhacārikā ca. Tattha yaṃ gāmanigamanagarapaṭipāṭivasena carati, ayaṃ anibaddhacārikā nāma. Yaṃ panekasseva bodhaneyyasattassatthāya gacchati, ayaṃ nibaddhacārikā nāma. Esā idha adhippetā.

    ཏདཱ ཀིར བྷགཝཏོ པཙྪིམཡཱམཀིཙྩཔརིཡོསཱནེ དསསཧསྶིལོཀདྷཱཏུཡཱ ཉཱཎཛཱལཾ པཏྠརིཏྭཱ བོདྷནེཡྻབནྡྷཝེ ཨོལོཀེནྟསྶ པོཀྑརསཱཏིབྲཱཧྨཎོ སབྦཉྙུཏཉྙཱཎཛཱལསྶ ཨནྟོ པཝིཊྛོ། ཨཐ བྷགཝཱ ཨཡཾ བྲཱཧྨཎོ མཡ྄ཧཾ ཉཱཎཛཱལེ པཉྙཱཡཏི, ‘‘ཨཏྠི ནུ ཁྭསྶ ཨུཔནིསྶཡོ’’ཏི ཝཱིམཾསནྟོ སོཏཱཔཏྟིམགྒསྶ ཨུཔནིསྶཡཾ དིསྭཱ – ‘‘ཨེསོ མཡི ཨེཏཾ ཛནཔདཾ གཏེ ལཀྑཎཔརིཡེསནཏྠཾ ཨམྦཊྛཾ ཨནྟེཝཱསིཾ པཧིཎིསྶཏི, སོ མཡཱ སདྡྷིཾ ཝཱདཔཊིཝཱདཾ ཀཏྭཱ ནཱནཔྤཀཱརཾ ཨསབྦྷིཝཱཀྱཾ ཝཀྑཏི, ཏམཧཾ དམེཏྭཱ ནིབྦིསེཝནཾ ཀརིསྶཱམི། སོ ཨཱཙརིཡསྶ ཀཐེསྶཏི, ཨཐསྶཱཙརིཡོ ཏཾ ཀཐཾ སུཏྭཱ ཨཱགམྨ མམ ལཀྑཎཱནི པརིཡེསིསྶཏི, ཏསྶཱཧཾ དྷམྨཾ དེསེསྶཱམི། སོ དེསནཱཔརིཡོསཱནེ སོཏཱཔཏྟིཕལེ པཏིཊྛཧིསྶཏི། དེསནཱ མཧཱཛནསྶ སཕལཱ བྷཝིསྶཏཱི’’ཏི པཉྩབྷིཀྑུསཏཔརིཝཱརོ ཏཾ ཛནཔདཾ པཊིཔནྣོ། ཏེན ཝུཏྟཾ – ‘‘ཀོསལེསུ ཙཱརིཀཾ ཙརམཱནོ མཧཏཱ བྷིཀྑུསངྒྷེན སདྡྷིཾ པཉྩམཏྟེཧི བྷིཀྑུསཏེཧཱི’’ཏི།

    Tadā kira bhagavato pacchimayāmakiccapariyosāne dasasahassilokadhātuyā ñāṇajālaṃ pattharitvā bodhaneyyabandhave olokentassa pokkharasātibrāhmaṇo sabbaññutaññāṇajālassa anto paviṭṭho. Atha bhagavā ayaṃ brāhmaṇo mayhaṃ ñāṇajāle paññāyati, ‘‘atthi nu khvassa upanissayo’’ti vīmaṃsanto sotāpattimaggassa upanissayaṃ disvā – ‘‘eso mayi etaṃ janapadaṃ gate lakkhaṇapariyesanatthaṃ ambaṭṭhaṃ antevāsiṃ pahiṇissati, so mayā saddhiṃ vādapaṭivādaṃ katvā nānappakāraṃ asabbhivākyaṃ vakkhati, tamahaṃ dametvā nibbisevanaṃ karissāmi. So ācariyassa kathessati, athassācariyo taṃ kathaṃ sutvā āgamma mama lakkhaṇāni pariyesissati, tassāhaṃ dhammaṃ desessāmi. So desanāpariyosāne sotāpattiphale patiṭṭhahissati. Desanā mahājanassa saphalā bhavissatī’’ti pañcabhikkhusataparivāro taṃ janapadaṃ paṭipanno. Tena vuttaṃ – ‘‘kosalesu cārikaṃ caramāno mahatā bhikkhusaṅghena saddhiṃ pañcamattehi bhikkhusatehī’’ti.

    ཡེན ཨིཙྪཱནངྒལནྟི ཡེན དིསཱབྷཱགེན ཨིཙྪཱནངྒལཾ ཨཝསརིཏབྦཾ། ཡསྨིཾ ཝཱ པདེསེ ཨིཙྪཱནངྒལཾ། ཨིཛ྄ཛྷཱནངྒལནྟིཔི པཱཋོ། ཏདཝསརཱིཏི ཏེན ཨཝསརི, ཏཾ ཝཱ ཨཝསརི། ཏེན དིསཱབྷཱགེན གཏོ, ཏཾ ཝཱ པདེསཾ གཏོཏི ཨཏྠོ། ཨིཙྪཱནངྒལེ ཝིཧརཏི ཨིཙྪཱནངྒལཝནསཎྜེཏི ཨིཙྪཱནངྒལཾ ཨུཔནིསྶཱཡ ཨིཙྪཱནངྒལཝནསཎྜེ སཱིལཁནྡྷཱཝཱརཾ བནྡྷིཏྭཱ སམཱདྷིཀོནྟཾ ཨུསྶཱཔེཏྭཱ སབྦཉྙུཏཉྙཱཎསརཾ པརིཝཏྟཡམཱནོ དྷམྨརཱཛཱ ཡཐཱབྷིརུཙིཏེན ཝིཧཱརེན ཝིཧརཏི།

    Yena icchānaṅgalanti yena disābhāgena icchānaṅgalaṃ avasaritabbaṃ. Yasmiṃ vā padese icchānaṅgalaṃ. Ijjhānaṅgalantipi pāṭho. Tadavasarīti tena avasari, taṃ vā avasari. Tena disābhāgena gato, taṃ vā padesaṃ gatoti attho. Icchānaṅgale viharati icchānaṅgalavanasaṇḍeti icchānaṅgalaṃ upanissāya icchānaṅgalavanasaṇḍe sīlakhandhāvāraṃ bandhitvā samādhikontaṃ ussāpetvā sabbaññutaññāṇasaraṃ parivattayamāno dhammarājā yathābhirucitena vihārena viharati.

    པོཀྑརསཱཏིཝཏྠུཝཎྞནཱ

    Pokkharasātivatthuvaṇṇanā

    ༢༥༥. ཏེན ཁོ པན སམཡེནཱཏི ཡེན སམཡེན བྷགཝཱ ཏཏྠ ཝིཧརཏི, ཏེན སམཡེན, ཏསྨིཾ སམཡེཏི ཨཡམཏྠོ། བྲཧྨཾ ཨཎཏཱིཏི བྲཱཧྨཎོ, མནྟེ སཛ྄ཛྷཱཡཏཱིཏི ཨཏྠོ། ཨིདམེཝ ཧི ཛཱཏིབྲཱཧྨཎཱནཾ ནིརུཏྟིཝཙནཾ། ཨརིཡཱ པན བཱཧིཏཔཱཔཏྟཱ བྲཱཧྨཎཱཏི ཝུཙྩནྟི། པོཀྑརསཱཏཱིཏི ཨིདཾ ཏསྶ ནཱམཾ། ཀསྨཱ པོཀྑརསཱཏཱིཏི ཝུཙྩཏི། ཏསྶ ཀིར ཀཱཡོ སེཏཔོཀྑརསདིསོ, དེཝནགརེ ཨུསྶཱཔིཏརཛཏཏོརཎཾ ཝིཡ སོབྷཏི། སཱིསཾ པནསྶ ཀཱལ༹ཝཎྞཾ ཨིནྡནཱིལམཎིམཡཾ ཝིཡ། མསྶུཔི ཙནྡམཎྜལེ ཀཱལ༹མེགྷརཱཛི ཝིཡ ཁཱཡཏི། ཨཀྑཱིནི ནཱིལུཔྤལསདིསཱནི། ནཱསཱ རཛཏཔནཱལི༹ཀཱ ཝིཡ སུཝཊྚིཏཱ སུཔརིསུདྡྷཱ། ཧཏྠཔཱདཏལཱནི ཙེཝ མུཁདྭཱརཉྩ ཀཏལཱཁཱརསཔརིཀམྨཾ ཝིཡ སོབྷཏི, ཨཏིཝིཡ སོབྷགྒཔྤཏྟོ བྲཱཧྨཎསྶ ཨཏྟབྷཱཝོ། ཨརཱཛཀེ ཋཱནེ རཱཛཱནཾ ཀཱཏུཾ ཡུཏྟམིམཾ བྲཱཧྨཎཾ། ཨེཝམེས སསྶིརིཀོ། ཨིཏི ནཾ པོཀྑརསདིསཏྟཱ པོཀྑརསཱཏཱིཏི སཉྫཱནནྟི།

    255.Tena kho pana samayenāti yena samayena bhagavā tattha viharati, tena samayena, tasmiṃ samayeti ayamattho. Brahmaṃ aṇatīti brāhmaṇo, mante sajjhāyatīti attho. Idameva hi jātibrāhmaṇānaṃ niruttivacanaṃ. Ariyā pana bāhitapāpattā brāhmaṇāti vuccanti. Pokkharasātīti idaṃ tassa nāmaṃ. Kasmā pokkharasātīti vuccati. Tassa kira kāyo setapokkharasadiso, devanagare ussāpitarajatatoraṇaṃ viya sobhati. Sīsaṃ panassa kāḷavaṇṇaṃ indanīlamaṇimayaṃ viya. Massupi candamaṇḍale kāḷamegharāji viya khāyati. Akkhīni nīluppalasadisāni. Nāsā rajatapanāḷikā viya suvaṭṭitā suparisuddhā. Hatthapādatalāni ceva mukhadvārañca katalākhārasaparikammaṃ viya sobhati, ativiya sobhaggappatto brāhmaṇassa attabhāvo. Arājake ṭhāne rājānaṃ kātuṃ yuttamimaṃ brāhmaṇaṃ. Evamesa sassiriko. Iti naṃ pokkharasadisattā pokkharasātīti sañjānanti.

    ཨཡཾ པན ཀསྶཔསམྨཱསམྦུདྡྷཀཱལེ ཏིཎྞཾ ཝེདཱནཾ པཱརགཱུ དསབལསྶ དཱནཾ དཏྭཱ དྷམྨདེསནཾ སུཏྭཱ དེཝལོཀེ ནིབྦཏྟི། སོ ཏཏོ མནུསྶལོཀམཱགཙྪནྟོ མཱཏུཀུཙྪིཝཱསཾ ཛིགུཙྪིཏྭཱ ཧིམཝནྟཔདེསེ མཧཱསརེ པདུམགབྦྷེ ནིབྦཏྟི། ཏསྶ ཙ སརསྶ ཨཝིདཱུརེ ཏཱཔསོ པཎྞསཱལཱཡ ཝསཏི། སོ ཏཱིརེ ཋིཏོ ཏཾ པདུམཾ དིསྭཱ – ‘‘ཨིདཾ པདུམཾ ཨཝསེསཔདུམེཧི མཧནྟཏརཾ། པུཔྥིཏཀཱལེ ནཾ གཧེསྶཱམཱི’’ཏི ཙིནྟེསི། ཏཾ སཏྟཱཧེནཱཔི ན པུཔྥཏི། ཏཱཔསོ ཀསྨཱ ནུ ཁོ ཨིདཾ སཏྟཱཧེནཱཔི ན པུཔྥཏི། ཧནྡ ནཾ གཧེསྶཱམཱིཏི ཨོཏརིཏྭཱ གཎྷི། ཏཾ ཏེན ནཱལ༹ཏོ ཚིནྣམཏྟཾཡེཝ པུཔྥིཏཾ། ཨཐསྶབྦྷནྟརེ སུཝཎྞཙུཎྞཔིཉྫརཾ ཝིཡ རཛཏབིམྦཀཾ པདུམརེཎུཔིཉྫརཾ སེཏཝཎྞཾ དཱརཀཾ ཨདྡས། སོ མཧཱཔུཉྙོ ཨེས བྷཝིསྶཏི། ཧནྡ ནཾ པཊིཛགྒཱམཱིཏི པཎྞསཱལཾ ནེཏྭཱ པཊིཛགྒིཏྭཱ སཏྟཝསྶཀཱལཏོ པཊྛཱཡ ཏཡོ ཝེདེ ཨུགྒཎྷཱཔེསི། དཱརཀོ ཏིཎྞཾ ཝེདཱནཾ པཱརཾ གནྟྭཱ པཎྜིཏོ བྱཏྟོ ཛམྦུདཱིཔེ ཨགྒབྲཱཧྨཎོ ཨཧོསི། སོ ཨཔརེན སམཡེན རཉྙོ ཀོསལསྶ སིཔྤཾ དསྶེསི། ཨཐསྶ སིཔྤེ པསནྣོ རཱཛཱ ཨུཀྐཊྛཾ ནཱམ མཧཱནགརཾ བྲཧྨདེཡྻཾ ཨདཱསི། ཨིཏི ནཾ པོཀྑརེ སཡིཏཏྟཱ པོཀྑརསཱཏཱིཏི སཉྫཱནནྟི།

    Ayaṃ pana kassapasammāsambuddhakāle tiṇṇaṃ vedānaṃ pāragū dasabalassa dānaṃ datvā dhammadesanaṃ sutvā devaloke nibbatti. So tato manussalokamāgacchanto mātukucchivāsaṃ jigucchitvā himavantapadese mahāsare padumagabbhe nibbatti. Tassa ca sarassa avidūre tāpaso paṇṇasālāya vasati. So tīre ṭhito taṃ padumaṃ disvā – ‘‘idaṃ padumaṃ avasesapadumehi mahantataraṃ. Pupphitakāle naṃ gahessāmī’’ti cintesi. Taṃ sattāhenāpi na pupphati. Tāpaso kasmā nu kho idaṃ sattāhenāpi na pupphati. Handa naṃ gahessāmīti otaritvā gaṇhi. Taṃ tena nāḷato chinnamattaṃyeva pupphitaṃ. Athassabbhantare suvaṇṇacuṇṇapiñjaraṃ viya rajatabimbakaṃ padumareṇupiñjaraṃ setavaṇṇaṃ dārakaṃ addasa. So mahāpuñño esa bhavissati. Handa naṃ paṭijaggāmīti paṇṇasālaṃ netvā paṭijaggitvā sattavassakālato paṭṭhāya tayo vede uggaṇhāpesi. Dārako tiṇṇaṃ vedānaṃ pāraṃ gantvā paṇḍito byatto jambudīpe aggabrāhmaṇo ahosi. So aparena samayena rañño kosalassa sippaṃ dassesi. Athassa sippe pasanno rājā ukkaṭṭhaṃ nāma mahānagaraṃ brahmadeyyaṃ adāsi. Iti naṃ pokkhare sayitattā pokkharasātīti sañjānanti.

    ཨུཀྐཊྛཾ ཨཛ྄ཛྷཱཝསཏཱིཏི ཨུཀྐཊྛནཱམཀེ ནགརེ ཝསཏི། ཨབྷིབྷཝིཏྭཱ ཝཱ ཨཱཝསཏི། ཏསྶ ནགརསྶ སཱམིཀོ ཧུཏྭཱ ཡཱཡ མརིཡཱདཱཡ ཏཏྠ ཝསིཏབྦཾ, ཏཱཡ མརིཡཱདཱཡ ཝསི། ཏསྶ ཀིར ནགརསྶ ཝཏྠུཾ ཨུཀྐཱ ཋཔེཏྭཱ ཨུཀྐཱསུ ཛལམཱནཱསུ ཨགྒཧེསུཾ, ཏསྨཱ ཏཾ ཨུཀྐཊྛནྟི ཝུཙྩཏི། ཨོཀྐཊྛནྟིཔི པཱཋོ, སོཡེཝཏྠོ། ཨུཔསགྒཝསེན པནེཏྠ བྷུམྨཏྠེ ཨུཔཡོགཝཙནཾ ཝེདིཏབྦཾ། ཏསྶ ཨནུཔཡོགཏྟཱ ཙ སེསཔདེསུ། ཏཏྠ ལཀྑཎཾ སདྡསཏྠཏོ པརིཡེསིཏབྦཾ།

    Ukkaṭṭhaṃ ajjhāvasatīti ukkaṭṭhanāmake nagare vasati. Abhibhavitvā vā āvasati. Tassa nagarassa sāmiko hutvā yāya mariyādāya tattha vasitabbaṃ, tāya mariyādāya vasi. Tassa kira nagarassa vatthuṃ ukkā ṭhapetvā ukkāsu jalamānāsu aggahesuṃ, tasmā taṃ ukkaṭṭhanti vuccati. Okkaṭṭhantipi pāṭho, soyevattho. Upasaggavasena panettha bhummatthe upayogavacanaṃ veditabbaṃ. Tassa anupayogattā ca sesapadesu. Tattha lakkhaṇaṃ saddasatthato pariyesitabbaṃ.

    སཏྟུསྶདནྟི སཏྟེཧི ཨུསྶདཾ, ཨུསྶནྣཾ བཧུཛནཾ ཨཱཀིཎྞམནུསྶཾ། པོསཱཝནིཡཧཏྠིཨསྶམོརམིགཱདིཨནེཀསཏྟསམཱཀིཎྞཉྩཱཏི ཨཏྠོ། ཡསྨཱ པནེཏཾ ནགརཾ བཧི ཨཱཝིཛ྄ཛྷིཏྭཱ ཛཱཏེན ཧཏྠིཨསྶཱདཱིནཾ གྷཱསཏིཎེན ཙེཝ གེཧཙྪཱདནཏིཎེན ཙ སམྤནྣཾ། ཏཐཱ དཱརུཀཊྛེཧི ཙེཝ གེཧསམྦྷཱརཀཊྛེཧི ཙ། ཡསྨཱ ཙསྶབྦྷནྟརེ ཝཊྚཙཏུརསྶཱདིསཎྛཱནཱ བཧཱུ པོཀྑརཎིཡོ ཛལཛཀུསུམཝིཙིཏྟཱནི ཙ བཧཱུནི ཨནེཀཱནི ཏལཱ༹ཀཱནི ཨུདཀསྶ ནིཙྩབྷརིཏཱནེཝ ཧོནྟི, ཏསྨཱ སཏིཎཀཊྛོདཀནྟི ཝུཏྟཾ། སཧ དྷཉྙེནཱཏི སདྷཉྙཾ པུབྦཎྞཱཔརཎྞཱདིབྷེདཾ བཧུདྷཉྙསནྣིཙཡནྟི ཨཏྠོ ། ཨེཏྟཱཝཏཱ ཡསྨིཾ ནགརེ བྲཱཧྨཎོ སེཏཙྪཏྟཾ ཨུསྶཱཔེཏྭཱ རཱཛལཱིལཱཡ ཝསཏི, ཏསྶ སམིདྡྷིསམྤཏྟི དཱིཔིཏཱ ཧོཏི།

    Sattussadanti sattehi ussadaṃ, ussannaṃ bahujanaṃ ākiṇṇamanussaṃ. Posāvaniyahatthiassamoramigādianekasattasamākiṇṇañcāti attho. Yasmā panetaṃ nagaraṃ bahi āvijjhitvā jātena hatthiassādīnaṃ ghāsatiṇena ceva gehacchādanatiṇena ca sampannaṃ. Tathā dārukaṭṭhehi ceva gehasambhārakaṭṭhehi ca. Yasmā cassabbhantare vaṭṭacaturassādisaṇṭhānā bahū pokkharaṇiyo jalajakusumavicittāni ca bahūni anekāni taḷākāni udakassa niccabharitāneva honti, tasmā satiṇakaṭṭhodakanti vuttaṃ. Saha dhaññenāti sadhaññaṃ pubbaṇṇāparaṇṇādibhedaṃ bahudhaññasannicayanti attho . Ettāvatā yasmiṃ nagare brāhmaṇo setacchattaṃ ussāpetvā rājalīlāya vasati, tassa samiddhisampatti dīpitā hoti.

    རཱཛཏོ ལདྡྷཾ བྷོགྒཾ རཱཛབྷོགྒཾ། ཀེན དིནྣནྟི ཙེ? རཉྙཱ པསེནདིནཱ ཀོསལེན དིནྣཾ། རཱཛདཱཡནྟི རཉྙོ དཱཡབྷཱུཏཾ, དཱཡཛྫནྟི ཨཏྠོ། བྲཧྨདེཡྻནྟི སེཊྛདེཡྻཾ, ཚཏྟཾ ཨུསྶཱཔེཏྭཱ རཱཛསངྑེཔེན བྷུཉྫིཏབྦནྟི ཨཏྠོ། ཨཐ ཝཱ རཱཛབྷོགྒནྟི སབྦཾ ཚེཛྫབྷེཛྫཾ ཨནུསཱསནྟེན ནདཱིཏིཏྠཔབྦཏཱདཱིསུ སུངྐཾ གཎྷནྟེན སེཏཙྪཏྟཾ ཨུསྶཱཔེཏྭཱ རཉྙཱ ཧུཏྭཱ བྷུཉྫིཏབྦཾ། རཉྙཱ པསེནདིནཱ ཀོསལེན དིནྣཾ རཱཛདཱཡནྟི ཨེཏྠ ཏཾ ནགརཾ རཉྙཱ དིནྣཏྟཱ རཱཛདཱཡཾ དཱཡཀརཱཛདཱིཔནཏྠཾ པནསྶ ‘‘རཉྙཱ པསེནདིནཱ ཀོསལེན དིནྣ’’ནྟི ཨིདཾ ཝུཏྟཾ། བྲཧྨདེཡྻནྟི སེཊྛདེཡྻཾ། ཡཐཱ དིནྣཾ ན པུན གཧེཏབྦཾ ཧོཏི, ནིསྶཊྛཾ པརིཙྩཏྟཾ། ཨེཝཾ དིནྣནྟི ཨཏྠོ།

    Rājato laddhaṃ bhoggaṃ rājabhoggaṃ. Kena dinnanti ce? Raññā pasenadinā kosalena dinnaṃ. Rājadāyanti rañño dāyabhūtaṃ, dāyajjanti attho. Brahmadeyyanti seṭṭhadeyyaṃ, chattaṃ ussāpetvā rājasaṅkhepena bhuñjitabbanti attho. Atha vā rājabhogganti sabbaṃ chejjabhejjaṃ anusāsantena nadītitthapabbatādīsu suṅkaṃ gaṇhantena setacchattaṃ ussāpetvā raññā hutvā bhuñjitabbaṃ. Raññā pasenadinā kosalena dinnaṃ rājadāyanti ettha taṃ nagaraṃ raññā dinnattā rājadāyaṃ dāyakarājadīpanatthaṃ panassa ‘‘raññā pasenadinā kosalena dinna’’nti idaṃ vuttaṃ. Brahmadeyyanti seṭṭhadeyyaṃ. Yathā dinnaṃ na puna gahetabbaṃ hoti, nissaṭṭhaṃ pariccattaṃ. Evaṃ dinnanti attho.

    ཨསྶོསཱིཏི སུཎི ཨུཔལབྷི, སོཏདྭཱརསམྤཏྟཝཙནནིགྒྷོསཱནུསཱརེན ཨཉྙཱསི། ཁོཏི ཨཝདྷཱརཎཏྠེ པདཔཱུརཎམཏྟེ ཝཱ ནིཔཱཏོ། ཏཏྠ ཨཝདྷཱརཎཏྠེན ཨསྶོསི ཨེཝ, ནཱསྶ ཀོཙི སཝནནྟརཱཡོ ཨཧོསཱིཏི ཨཡམཏྠོ ཝེདིཏབྦོ། པདཔཱུརཎེན པན པདབྱཉྫནསིལིཊྛཏཱམཏྟམེཝ།

    Assosīti suṇi upalabhi, sotadvārasampattavacananigghosānusārena aññāsi. Khoti avadhāraṇatthe padapūraṇamatte vā nipāto. Tattha avadhāraṇatthena assosi eva, nāssa koci savanantarāyo ahosīti ayamattho veditabbo. Padapūraṇena pana padabyañjanasiliṭṭhatāmattameva.

    ཨིདཱནི ཡམཏྠཾ བྲཱཧྨཎོ པོཀྑརསཱཏི ཨསྶོསི, ཏཾ པཀཱསེནྟོ – ‘‘སམཎོ ཁལུ བྷོ གོཏམོ’’ཏིཨཱདིམཱཧ། ཏཏྠ སམིཏཔཱཔཏྟཱ སམཎོཏི ཝེདིཏབྦོ། ཝུཏྟཉྷེཏཾ – ‘‘སམིཏཱསྶ ཧོནྟི པཱཔཀཱ ཨཀུསལཱ དྷམྨཱ’’ཏིཨཱདི (མ॰ ནི॰ ༡.༤༣༤)། བྷགཝཱ ཙ ཨནུཏྟརེན ཨརིཡམགྒེན སམིཏཔཱཔོ། ཏེནསྶ ཡཐཱབྷཱུཏགུཎཱདྷིགཏམེཏཾ ནཱམཾ, ཡདིདཾ སམཎོཏི། ཁལཱུཏི ཨནུསྶཝནཏྠེ ནིཔཱཏོ། བྷོཏི བྲཱཧྨཎཛཱཏིསམུདཱགཏཾ ཨཱལཔནམཏྟཾ། ཝུཏྟམྤི ཙེཏཾ – ‘‘བྷོཝཱདཱི ནཱམ སོ ཧོཏི, སཙེ ཧོཏི སཀིཉྩནོ’’ཏི (དྷ॰ པ॰ ༥༥)། གོཏམོཏི བྷགཝནྟཾ གོཏྟཝསེན པརིཀིཏྟེཏི། ཏསྨཱ སམཎོ ཁལུ བྷོ གོཏམོཏི ཨེཏྠ སམཎོ ཀིར བྷོ གོཏམགོཏྟོཏི ཨེཝམཏྠོ དཊྛབྦོ།

    Idāni yamatthaṃ brāhmaṇo pokkharasāti assosi, taṃ pakāsento – ‘‘samaṇo khalu bho gotamo’’tiādimāha. Tattha samitapāpattā samaṇoti veditabbo. Vuttañhetaṃ – ‘‘samitāssa honti pāpakā akusalā dhammā’’tiādi (ma. ni. 1.434). Bhagavā ca anuttarena ariyamaggena samitapāpo. Tenassa yathābhūtaguṇādhigatametaṃ nāmaṃ, yadidaṃ samaṇoti. Khalūti anussavanatthe nipāto. Bhoti brāhmaṇajātisamudāgataṃ ālapanamattaṃ. Vuttampi cetaṃ – ‘‘bhovādī nāma so hoti, sace hoti sakiñcano’’ti (dha. pa. 55). Gotamoti bhagavantaṃ gottavasena parikitteti. Tasmā samaṇo khalu bho gotamoti ettha samaṇo kira bho gotamagottoti evamattho daṭṭhabbo.

    སཀྱཔུཏྟོཏི ཨིདཾ པན བྷགཝཏོ ཨུཙྩཱཀུལཔརིདཱིཔནཾ ། སཀྱཀུལཱ པབྦཛིཏོཏི སདྡྷཱཔབྦཛིཏབྷཱཝཔརིདཱིཔནཾ། ཀེནཙི པཱརིཛུཉྙེན ཨནབྷིབྷཱུཏོ ཨཔརིཀྑཱིཎཾཡེཝ ཏཾ ཀུལཾ པཧཱཡ སདྡྷཱཡ པབྦཛིཏོཏི ཝུཏྟཾ ཧོཏི། ཏཏོ པརཾ ཝུཏྟཏྠམེཝ། ཏཾ ཁོ པནཱཏིཨཱདི སཱམཉྙཕལེ ཝུཏྟམེཝ། སཱདྷུ ཁོ པནཱཏི སུནྡརཾ ཁོ པན། ཨཏྠཱཝཧཾ སུཁཱཝཧནྟི ཝུཏྟཾ ཧོཏི། ཏཐཱརཱུཔཱནཾ ཨརཧཏནྟི ཡཐཱརཱུཔོ སོ བྷཝཾ གོཏམོ, ཨེཝརཱུཔཱནཾ ཡཐཱབྷཱུཏགུཎཱདྷིགམེན ལོཀེ ཨརཧནྟོཏི ལདྡྷསདྡྷཱནཾ ཨརཧཏཾ། དསྶནཾ ཧོཏཱིཏི པསཱདསོམྨཱནི ཨཀྑཱིནི ཨུམྨཱིལེཏྭཱ དསྶནམཏྟམྤི སཱདྷུ ཧོཏཱིཏི, ཨེཝཾ ཨཛ྄ཛྷཱསཡཾ ཀཏྭཱ།

    Sakyaputtoti idaṃ pana bhagavato uccākulaparidīpanaṃ . Sakyakulā pabbajitoti saddhāpabbajitabhāvaparidīpanaṃ. Kenaci pārijuññena anabhibhūto aparikkhīṇaṃyeva taṃ kulaṃ pahāya saddhāya pabbajitoti vuttaṃ hoti. Tato paraṃ vuttatthameva. Taṃ kho panātiādi sāmaññaphale vuttameva. Sādhu kho panāti sundaraṃ kho pana. Atthāvahaṃ sukhāvahanti vuttaṃ hoti. Tathārūpānaṃ arahatanti yathārūpo so bhavaṃ gotamo, evarūpānaṃ yathābhūtaguṇādhigamena loke arahantoti laddhasaddhānaṃ arahataṃ. Dassanaṃ hotīti pasādasommāni akkhīni ummīletvā dassanamattampi sādhu hotīti, evaṃ ajjhāsayaṃ katvā.

    ཨམྦཊྛམཱཎཝཀཐཱ

    Ambaṭṭhamāṇavakathā

    ༢༥༦. ཨཛ྄ཛྷཱཡཀོཏི ཨིདཾ – ‘‘ན དཱནིམེ ཛྷཱཡནྟི, ན དཱནིམེ ཛྷཱཡནྟཱིཏི ཁོ, ཝཱསེཊྛ, ཨཛ྄ཛྷཱཡཀཱ ཨཛ྄ཛྷཱཡཀཱ ཏྭེཝ ཏཏིཡཾ ཨཀྑརཾ ཨུཔནིབྦཏྟ’’ནྟི, ཨེཝཾ པཋམཀཔྤིཀཀཱལེ ཛྷཱནཝིརཧིཏཱནཾ བྲཱཧྨཎཱནཾ གརཧཝཙནཾ། ཨིདཱནི པན ཏཾ ཨཛ྄ཛྷཱཡཏཱིཏི ཨཛ྄ཛྷཱཡཀོ། མནྟེ པརིཝཏྟེཏཱིཏི ཨིམིནཱ ཨཏྠེན པསཾསཱཝཙནཾ ཀཏྭཱ ཝོཧརནྟི། མནྟེ དྷཱརེཏཱིཏི མནྟདྷརོ།

    256.Ajjhāyakoti idaṃ – ‘‘na dānime jhāyanti, na dānime jhāyantīti kho, vāseṭṭha, ajjhāyakā ajjhāyakā tveva tatiyaṃ akkharaṃ upanibbatta’’nti, evaṃ paṭhamakappikakāle jhānavirahitānaṃ brāhmaṇānaṃ garahavacanaṃ. Idāni pana taṃ ajjhāyatīti ajjhāyako. Mante parivattetīti iminā atthena pasaṃsāvacanaṃ katvā voharanti. Mante dhāretīti mantadharo.

    ཏིཎྞཾ ཝེདཱནནྟི ཨིརུཝེདཡཛུཝེདསཱམཝེདཱནཾ། ཨོཊྛཔཧཏཀརཎཝསེན པཱརཾ གཏོཏི པཱརགཱུ། སཧ ནིགྷཎྜུནཱ ཙ ཀེཊུབྷེན ཙ སནིགྷཎྜུཀེཊུབྷཱནཾ། ནིགྷཎྜཱུཏི ནིགྷཎྜུརུཀྑཱདཱིནཾ ཝེཝཙནཔཀཱསཀཾ སཏྠཾ། ཀེཊུབྷནྟི ཀིརིཡཱཀཔྤཝིཀཔྤོ ཀཝཱིནཾ ཨུཔཀཱརཱཝཧཾ སཏྠཾ། སཧ ཨཀྑརཔྤབྷེདེན སཱཀྑརཔྤབྷེདཱནཾ། ཨཀྑརཔྤབྷེདོཏི སིཀྑཱ ཙ ནིརུཏྟི ཙ། ཨིཏིཧཱསཔཉྩམཱནནྟི ཨཱཐབྦཎཝེདཾ ཙཏུཏྠཾ ཀཏྭཱ ཨིཏིཧ ཨཱས, ཨིཏིཧ ཨཱསཱཏི ཨཱིདིསཝཙནཔཊིསཾཡུཏྟོ པུརཱཎཀཐཱསངྑཱཏོ ཨིཏིཧཱསོ པཉྩམོ ཨེཏེསནྟི ཨིཏིཧཱསཔཉྩམཱ, ཏེསཾ ཨིཏིཧཱསཔཉྩམཱནཾ ཝེདཱནཾ།

    Tiṇṇaṃ vedānanti iruvedayajuvedasāmavedānaṃ. Oṭṭhapahatakaraṇavasena pāraṃ gatoti pāragū. Saha nighaṇḍunā ca keṭubhena ca sanighaṇḍukeṭubhānaṃ. Nighaṇḍūti nighaṇḍurukkhādīnaṃ vevacanapakāsakaṃ satthaṃ. Keṭubhanti kiriyākappavikappo kavīnaṃ upakārāvahaṃ satthaṃ. Saha akkharappabhedena sākkharappabhedānaṃ. Akkharappabhedoti sikkhā ca nirutti ca. Itihāsapañcamānanti āthabbaṇavedaṃ catutthaṃ katvā itiha āsa, itiha āsāti īdisavacanapaṭisaṃyutto purāṇakathāsaṅkhāto itihāso pañcamo etesanti itihāsapañcamā, tesaṃ itihāsapañcamānaṃ vedānaṃ.

    པདཾ ཏདཝསེསཉྩ བྱཱཀརཎཾ ཨདྷཱིཡཏི ཝེདེཏི ཙཱཏི པདཀོ ཝེཡྻཱཀརཎོ། ལོཀཱཡཏཾ ཝུཙྩཏི ཝིཏཎྜཝཱདསཏྠཾ། མཧཱཔུརིསལཀྑཎནྟི མཧཱཔུརིསཱནཾ བུདྡྷཱདཱིནཾ ལཀྑཎདཱིཔཀཾ དྭཱདསསཧསྶགནྠཔམཱཎཾ སཏྠཾ། ཡཏྠ སོལ༹སསཧསྶགཱཐཱཔརིམཱཎཱ བུདྡྷམནྟཱ ནཱམ ཨཧེསུཾ, ཡེསཾ ཝསེན ཨིམིནཱ ལཀྑཎེན སམནྣཱགཏཱ བུདྡྷཱ ནཱམ ཧོནྟི, ཨིམིནཱ པཙྩེཀབུདྡྷཱ, ཨིམིནཱ དྭེ ཨགྒསཱཝཀཱ, ཨསཱིཏི མཧཱསཱཝཀཱ , བུདྡྷམཱཏཱ, བུདྡྷཔིཏཱ, ཨགྒུཔཊྛཱཀོ, ཨགྒུཔཊྛཱཡིཀཱ, རཱཛཱ ཙཀྐཝཏྟཱིཏི ཨཡཾ ཝིསེསོ པཉྙཱཡཏི།

    Padaṃ tadavasesañca byākaraṇaṃ adhīyati vedeti cāti padako veyyākaraṇo. Lokāyataṃ vuccati vitaṇḍavādasatthaṃ. Mahāpurisalakkhaṇanti mahāpurisānaṃ buddhādīnaṃ lakkhaṇadīpakaṃ dvādasasahassaganthapamāṇaṃ satthaṃ. Yattha soḷasasahassagāthāparimāṇā buddhamantā nāma ahesuṃ, yesaṃ vasena iminā lakkhaṇena samannāgatā buddhā nāma honti, iminā paccekabuddhā, iminā dve aggasāvakā, asīti mahāsāvakā , buddhamātā, buddhapitā, aggupaṭṭhāko, aggupaṭṭhāyikā, rājā cakkavattīti ayaṃ viseso paññāyati.

    ཨནཝཡོཏི ཨིམེསུ ལོཀཱཡཏམཧཱཔུརིསལཀྑཎེསུ ཨནཱུནོ པརིཔཱུརཀཱརཱི, ཨཝཡོ ན ཧོཏཱིཏི ཝུཏྟཾ ཧོཏི། ཨཝཡོ ནཱམ ཡོ ཏཱནི ཨཏྠཏོ ཙ གནྠཏོ ཙ སནྡྷཱརེཏུཾ ན སཀྐོཏི། ཨནུཉྙཱཏཔཊིཉྙཱཏོཏི ཨནུཉྙཱཏོ ཙེཝ པཊིཉྙཱཏོ ཙ། ཨཱཙརིཡེནསྶ ‘‘ཡཾ ཨཧཾ ཛཱནཱམི, ཏཾ ཏྭཾ ཛཱནཱསཱི’’ཏིཨཱདིནཱ ཨནུཉྙཱཏོ། ‘‘ཨཱམ ཨཱཙརིཡཱ’’ཏི ཨཏྟནཱ ཏསྶ པཊིཝཙནདཱནཔཊིཉྙཱཡ པཊིཉྙཱཏོཏི ཨཏྠོ། ཀཏརསྨིཾ ཨདྷིཀཱརེ? སཀེ ཨཱཙརིཡཀེ ཏེཝིཛྫཀེ པཱཝཙནེ། ཨེས ཀིར བྲཱཧྨཎོ ཙིནྟེསི ‘‘ཨིམསྨིཾ ལོཀེ ‘ཨཧཾ བུདྡྷོ, ཨཧཾ བུདྡྷོ’ཏི ཨུགྒཏསྶ ནཱམཾ གཧེཏྭཱ བཧཱུ ཛནཱ ཝིཙརནྟི། ཏསྨཱ ན མེ ཨནུསྶཝམཏྟེནེཝ ཨུཔསངྐམིཏུཾ ཡུཏྟཾ། ཨེཀཙྩཉྷི ཨུཔསངྐམནྟསྶ ཨཔཀྐམནམྤི གརུ ཧོཏི, ཨནཏྠོཔི ཨུཔྤཛྫཏི། ཡཾནཱུནཱཧཾ མམ ཨནྟེཝཱསིཀཾ པེསེཏྭཱ – ‘བུདྡྷོ ཝཱ, ནོ ཝཱ’ཏི ཛཱནིཏྭཱཝ ཨུཔསངྐམེཡྻ’’ནྟི, ཏསྨཱ མཱཎཝཾ ཨཱམནྟེཏྭཱ ཨཡཾ ཏཱཏཱཏིཨཱདིམཱཧ།

    Anavayoti imesu lokāyatamahāpurisalakkhaṇesu anūno paripūrakārī, avayo na hotīti vuttaṃ hoti. Avayo nāma yo tāni atthato ca ganthato ca sandhāretuṃ na sakkoti. Anuññātapaṭiññātoti anuññāto ceva paṭiññāto ca. Ācariyenassa ‘‘yaṃ ahaṃ jānāmi, taṃ tvaṃ jānāsī’’tiādinā anuññāto. ‘‘Āma ācariyā’’ti attanā tassa paṭivacanadānapaṭiññāya paṭiññātoti attho. Katarasmiṃ adhikāre? Sake ācariyake tevijjake pāvacane. Esa kira brāhmaṇo cintesi ‘‘imasmiṃ loke ‘ahaṃ buddho, ahaṃ buddho’ti uggatassa nāmaṃ gahetvā bahū janā vicaranti. Tasmā na me anussavamatteneva upasaṅkamituṃ yuttaṃ. Ekaccañhi upasaṅkamantassa apakkamanampi garu hoti, anatthopi uppajjati. Yaṃnūnāhaṃ mama antevāsikaṃ pesetvā – ‘buddho vā, no vā’ti jānitvāva upasaṅkameyya’’nti, tasmā māṇavaṃ āmantetvā ayaṃ tātātiādimāha.

    ༢༥༧. ཏཾ བྷཝནྟནྟི ཏསྶ བྷོཏོ གོཏམསྶ། ཏཐཱ སནྟཾ ཡེཝཱཏི ཏཐཱ སཏོཡེཝ། ཨིདྷཱཔི ཧི ཨིཏྠམྦྷཱུཏཱཁྱཱནཏྠཝསེནེཝ ཨུཔཡོགཝཙནཾ།

    257.Taṃ bhavantanti tassa bhoto gotamassa. Tathā santaṃ yevāti tathā satoyeva. Idhāpi hi itthambhūtākhyānatthavaseneva upayogavacanaṃ.

    ༢༥༨. ཡཐཱ ཀཐཾ པནཱཧཾ, བྷོ, ཏནྟི ཨེཏྠ ཀཐཾ པནཱཧཾ བྷོ ཏཾ བྷཝནྟཾ གོཏམཾ ཛཱནིསྶཱམི, ཡཐཱ སཀྐཱ སོ ཉཱཏུཾ, ཏཐཱ མེ ཨཱཙིཀྑཱཧཱིཏི ཨཏྠོ། ཡཐཱཏི ཝཱ ནིཔཱཏམཏྟམེཝེཏཾ། ཀཐནྟི ཨཡཾ ཨཱཀཱརཔུཙྪཱ། ཀེནཱཀཱརེནཱཧཾ ཏཾ བྷཝནྟཾ གོཏམཾ ཛཱནིསྶཱམཱིཏི ཨཏྠོ། ཨེཝཾ ཝུཏྟེ ཀིར ནཾ ཨུཔཛ྄ཛྷཱཡོ ‘‘ཀིཾ ཏྭཾ, ཏཱཏ, པཐཝིཡཾ ཋིཏོ, པཐཝིཾ ན པསྶཱམཱིཏི ཝིཡ; ཙནྡིམསཱུརིཡཱནཾ ཨོབྷཱསེ ཋིཏོ, ཙནྡིམསཱུརིཡེ ན པསྶཱམཱིཏི ཝིཡ ཝདསཱི’’ཏིཨཱདཱིནི ཝཏྭཱ ཛཱནནཱཀཱརཾ དསྶེནྟོ ཨཱགཏཱནི ཁོ, ཏཱཏཱཏིཨཱདིམཱཧ།

    258.Yathā kathaṃ panāhaṃ, bho, tanti ettha kathaṃ panāhaṃ bho taṃ bhavantaṃ gotamaṃ jānissāmi, yathā sakkā so ñātuṃ, tathā me ācikkhāhīti attho. Yathāti vā nipātamattamevetaṃ. Kathanti ayaṃ ākārapucchā. Kenākārenāhaṃ taṃ bhavantaṃ gotamaṃ jānissāmīti attho. Evaṃ vutte kira naṃ upajjhāyo ‘‘kiṃ tvaṃ, tāta, pathaviyaṃ ṭhito, pathaviṃ na passāmīti viya; candimasūriyānaṃ obhāse ṭhito, candimasūriye na passāmīti viya vadasī’’tiādīni vatvā jānanākāraṃ dassento āgatāni kho, tātātiādimāha.

    ཏཏྠ མནྟེསཱུཏི ཝེདེསུ། ཏཐཱགཏོ ཀིར ཨུཔྤཛྫིསྶཏཱིཏི པཊིཀཙྩེཝ སུདྡྷཱཝཱསཱ དེཝཱ ཝེདེསུ ལཀྑཎཱནི པཀྑིཔིཏྭཱ བུདྡྷམནྟཱ ནཱམེཏེཏི བྲཱཧྨཎཝེསེནེཝ ཝེདེ ཝཱཙེནྟི། ཏདནུསཱརེན མཧེསཀྑཱ སཏྟཱ ཏཐཱགཏཾ ཛཱནིསྶནྟཱིཏི། ཏེན པུབྦེ ཝེདེསུ མཧཱཔུརིསལཀྑཎཱནི ཨཱགཙྪནྟི། པརིནིབྦུཏེ པན ཏཐཱགཏེ ཨནུཀྐམེན ཨནྟརདྷཱཡནྟི། ཏེནེཏརཧི ནཏྠཱིཏི། མཧཱཔུརིསསྶཱཏི པཎིདྷིསམཱདཱནཉཱཎཀརུཎཱདིགུཎམཧཏོ པུརིསསྶ། དྭེཡེཝ གཏིཡོཏི དྭེཡེཝ ནིཊྛཱ། ཀཱམཉྩཱཡཾ གཏིསདྡོ ‘‘པཉྩ ཁོ ཨིམཱ, སཱརིཔུཏྟ, གཏིཡོ’’ཏིཨཱདཱིསུ (མ॰ ནི॰ ༡.༡༥༣) བྷཝབྷེདེ ཝཏྟཏི། ‘‘གཏི མིགཱནཾ པཝན’’ནྟིཨཱདཱིསུ (པརི॰ ༣༩༩) ནིཝཱསཊྛཱནེ། ‘‘ཨེཝཾ ཨདྷིམཏྟགཏིམནྟོ’’ཏིཨཱདཱིསུ པཉྙཱཡཾ། ‘‘གཏིགཏ’’ནྟིཨཱདཱིསུ ཝིསཊབྷཱཝེ། ཨིདྷ པན ནིཊྛཱཡཾ ཝཏྟཏཱིཏི ཝེདིཏབྦོ།

    Tattha mantesūti vedesu. Tathāgato kira uppajjissatīti paṭikacceva suddhāvāsā devā vedesu lakkhaṇāni pakkhipitvā buddhamantā nāmeteti brāhmaṇaveseneva vede vācenti. Tadanusārena mahesakkhā sattā tathāgataṃ jānissantīti. Tena pubbe vedesu mahāpurisalakkhaṇāni āgacchanti. Parinibbute pana tathāgate anukkamena antaradhāyanti. Tenetarahi natthīti. Mahāpurisassāti paṇidhisamādānañāṇakaruṇādiguṇamahato purisassa. Dveyeva gatiyoti dveyeva niṭṭhā. Kāmañcāyaṃ gatisaddo ‘‘pañca kho imā, sāriputta, gatiyo’’tiādīsu (ma. ni. 1.153) bhavabhede vattati. ‘‘Gati migānaṃ pavana’’ntiādīsu (pari. 399) nivāsaṭṭhāne. ‘‘Evaṃ adhimattagatimanto’’tiādīsu paññāyaṃ. ‘‘Gatigata’’ntiādīsu visaṭabhāve. Idha pana niṭṭhāyaṃ vattatīti veditabbo.

    ཏཏྠ ཀིཉྩཱཔི ཡེཧི ལཀྑཎེཧི སམནྣཱགཏོ རཱཛཱ ཙཀྐཝཏྟཱི ཧོཏི, ན ཏེཧེཝ བུདྡྷོ ཧོཏི; ཛཱཏིསཱམཉྙཏོ པན ཏཱནིཡེཝ ཏཱནཱིཏི ཝུཙྩནྟི། ཏེན ཝུཏྟཾ – ‘‘ཡེཧི སམནྣཱགཏསྶཱ’’ཏི། སཙེ ཨགཱརཾ ཨཛ྄ཛྷཱཝསཏཱིཏི ཡདི ཨགཱརེ ཝསཏི། རཱཛཱ ཧོཏི ཙཀྐཝཏྟཱིཏི ཙཏཱུཧི ཨཙྪརིཡདྷམྨེཧི, སངྒཧཝཏྠཱུཧི ཙ ལོཀཾ རཉྫནཏོ རཱཛཱ, ཙཀྐརཏནཾ ཝཏྟེཏི, ཙཏཱུཧི སམྤཏྟིཙཀྐེཧི ཝཏྟཏི, ཏེཧི ཙ པརཾ ཝཏྟེཏི, པརཧིཏཱཡ ཙ ཨིརིཡཱཔཐཙཀྐཱནཾ ཝཏྟོ ཨེཏསྨིཾ ཨཏྠཱིཏི ཙཀྐཝཏྟཱི། ཨེཏྠ ཙ རཱཛཱཏི སཱམཉྙཾ། ཙཀྐཝཏྟཱིཏི ཝིསེསཾ། དྷམྨེན ཙརཏཱིཏི དྷམྨིཀོ། ཉཱཡེན སམེན ཝཏྟཏཱིཏི ཨཏྠོ། དྷམྨེན རཛྫཾ ལབྷིཏྭཱ རཱཛཱ ཛཱཏོཏི དྷམྨརཱཛཱ། པརཧིཏདྷམྨཀརཎེན ཝཱ དྷམྨིཀོ། ཨཏྟཧིཏདྷམྨཀརཎེན དྷམྨརཱཛཱ། ཙཏུརནྟཱཡ ཨིསྶརོཏི ཙཱཏུརནྟོ, ཙཏུསམུདྡཨནྟཱཡ, ཙཏུབྦིདྷདཱིཔཝིབྷཱུསིཏཱཡ པཐཝིཡཱ ཨིསྶརོཏི ཨཏྠོ། ཨཛ྄ཛྷཏྟཾ ཀོཔཱདིཔཙྩཏྠིཀེ བཧིདྡྷཱ ཙ སབྦརཱཛཱནོ ཝིཛེཏཱིཏི ཝིཛིཏཱཝཱི། ཛནཔདཏྠཱཝརིཡཔྤཏྟོཏི ཛནཔདེ དྷུཝབྷཱཝཾ ཐཱཝརབྷཱཝཾ པཏྟོ, ན སཀྐཱ ཀེནཙི ཙཱལེཏུཾ། ཛནཔདོ ཝཱ ཏམྷི ཐཱཝརིཡཔྤཏྟོ ཨནུཡུཏྟོ སཀམྨནིརཏོ ཨཙལོ ཨསམྤཝེདྷཱིཏི ཛནཔདཏྠཱཝརིཡཔྤཏྟོ།

    Tattha kiñcāpi yehi lakkhaṇehi samannāgato rājā cakkavattī hoti, na teheva buddho hoti; jātisāmaññato pana tāniyeva tānīti vuccanti. Tena vuttaṃ – ‘‘yehi samannāgatassā’’ti. Sace agāraṃ ajjhāvasatīti yadi agāre vasati. Rājā hoti cakkavattīti catūhi acchariyadhammehi, saṅgahavatthūhi ca lokaṃ rañjanato rājā, cakkaratanaṃ vatteti, catūhi sampatticakkehi vattati, tehi ca paraṃ vatteti, parahitāya ca iriyāpathacakkānaṃ vatto etasmiṃ atthīti cakkavattī. Ettha ca rājāti sāmaññaṃ. Cakkavattīti visesaṃ. Dhammena caratīti dhammiko. Ñāyena samena vattatīti attho. Dhammena rajjaṃ labhitvā rājā jātoti dhammarājā. Parahitadhammakaraṇena vā dhammiko. Attahitadhammakaraṇena dhammarājā. Caturantāya issaroti cāturanto, catusamuddaantāya, catubbidhadīpavibhūsitāya pathaviyā issaroti attho. Ajjhattaṃ kopādipaccatthike bahiddhā ca sabbarājāno vijetīti vijitāvī. Janapadatthāvariyappattoti janapade dhuvabhāvaṃ thāvarabhāvaṃ patto, na sakkā kenaci cāletuṃ. Janapado vā tamhi thāvariyappatto anuyutto sakammanirato acalo asampavedhīti janapadatthāvariyappatto.

    སེཡྻཐིདནྟི ནིཔཱཏོ, ཏསྶ ཙེཏཱནི ཀཏམཱནཱིཏི ཨཏྠོ། ཙཀྐརཏནནྟིཨཱདཱིསུ ཙཀྐཉྩ, ཏཾ རཏིཛནནཊྛེན རཏནཉྩཱཏི ཙཀྐརཏནཾ། ཨེས ནཡོ སབྦཏྠ། ཨིམེསུ པན རཏནེསུ ཨཡཾ ཙཀྐཝཏྟིརཱཛཱ ཙཀྐརཏནེན ཨཛིཏཾ ཛིནཱཏི, ཧཏྠིཨསྶརཏནེཧི ཝིཛིཏེ ཡཐཱསུཁཾ ཨནུཙརཏི, པརིཎཱཡཀརཏནེན ཝིཛིཏམནུརཀྑཏི, ཨཝསེསེཧི ཨུཔབྷོགསུཁམནུབྷཝཏི། པཋམེན ཙསྶ ཨུསྶཱཧསཏྟིཡོགོ, པཙྪིམེན མནྟསཏྟིཡོགོ, ཧཏྠིཨསྶགཧཔཏིརཏནེཧི པབྷུསཏྟིཡོགོ སུཔརིཔུཎྞོ ཧོཏི, ཨིཏྠིམཎིརཏནེཧི ཏིཝིདྷསཏྟིཡོགཕལཾ། སོ ཨིཏྠིམཎིརཏནེཧི བྷོགསུཁམནུབྷཝཏི, སེསེཧི ཨིསྶརིཡསུཁཾ། ཝིསེསཏོ ཙསྶ པུརིམཱནི ཏཱིཎི ཨདོསཀུསལམཱུལཛནིཏཀམྨཱནུབྷཱཝེན སམྤཛྫནྟི, མཛ྄ཛྷིམཱནི ཨལོབྷཀུསལམཱུལཛནིཏཀམྨཱནུབྷཱཝེན, པཙྪིམམེཀཾ ཨམོཧཀུསལམཱུལཛནིཏཀམྨཱནུབྷཱཝེནཱཏི ཝེདིཏབྦཾ། ཨཡམེཏྠ སངྑེཔོ། ཝིཏྠཱརོ པན བོཛ྄ཛྷངྒསཾཡུཏྟེ རཏནསུཏྟསྶ ཨུཔདེསཏོ གཧེཏབྦོ།

    Seyyathidanti nipāto, tassa cetāni katamānīti attho. Cakkaratanantiādīsu cakkañca, taṃ ratijananaṭṭhena ratanañcāti cakkaratanaṃ. Esa nayo sabbattha. Imesu pana ratanesu ayaṃ cakkavattirājā cakkaratanena ajitaṃ jināti, hatthiassaratanehi vijite yathāsukhaṃ anucarati, pariṇāyakaratanena vijitamanurakkhati, avasesehi upabhogasukhamanubhavati. Paṭhamena cassa ussāhasattiyogo, pacchimena mantasattiyogo, hatthiassagahapatiratanehi pabhusattiyogo suparipuṇṇo hoti, itthimaṇiratanehi tividhasattiyogaphalaṃ. So itthimaṇiratanehi bhogasukhamanubhavati, sesehi issariyasukhaṃ. Visesato cassa purimāni tīṇi adosakusalamūlajanitakammānubhāvena sampajjanti, majjhimāni alobhakusalamūlajanitakammānubhāvena, pacchimamekaṃ amohakusalamūlajanitakammānubhāvenāti veditabbaṃ. Ayamettha saṅkhepo. Vitthāro pana bojjhaṅgasaṃyutte ratanasuttassa upadesato gahetabbo.

    པརོསཧསྶནྟི ཨཏིརེཀསཧསྶཾ། སཱུརཱཏི ཨབྷཱིརུཀཛཱཏིཀཱ། ཝཱིརངྒརཱུཔཱཏི དེཝཔུཏྟསདིསཀཱཡཱ། ཨེཝཾ ཏཱཝ ཨེཀེ ཝཎྞཡནྟི། ཨཡཾ པནེཏྠ སབྦྷཱཝོ། ཝཱིརཱཏི ཨུཏྟམསཱུརཱ ཝུཙྩནྟི, ཝཱིརཱནཾ ཨངྒཾ ཝཱིརངྒཾ, ཝཱིརཀཱརཎཾ ཝཱིརིཡནྟི ཝུཏྟཾ ཧོཏི། ཝཱིརངྒརཱུཔཾ ཨེཏེསནྟི ཝཱིརངྒརཱུཔཱ, ཝཱིརིཡམཡསརཱིརཱ ཝིཡཱཏི ཝུཏྟཾ ཧོཏི། པརསེནཔྤམདྡནཱཏི སཙེ པཊིམུཁཾ ཏིཊྛེཡྻ པརསེནཱ ཏཾ པརིམདྡིཏུཾ སམཏྠཱཏི ཨདྷིཔྤཱཡོ། དྷམྨེནཱཏི ‘‘པཱཎོ ན ཧནྟབྦོ’’ཏིཨཱདིནཱ པཉྩསཱིལདྷམྨེན ། ཨརཧཾ ཧོཏི སམྨཱསམྦུདྡྷོ ལོཀེ ཝིཝཊྚཙྪདོཏི ཨེཏྠ རཱགདོསམོཧམཱནདིཊྛིཨཝིཛྫཱདུཙྩརིཏཚདནེཧི སཏྟཧི པཊིཙྪནྣེ ཀིལེསནྡྷཀཱརེ ལོཀེ ཏཾ ཚདནཾ ཝིཝཊྚེཏྭཱ སམནྟཏོ སཉྫཱཏཱལོཀོ ཧུཏྭཱ ཋིཏོཏི ཝིཝཊྚཙྪདོ། ཏཏྠ པཋམེན པདེན པཱུཛཱརཧཏཱ། དུཏིཡེན ཏསྶཱ ཧེཏུ, ཡསྨཱ སམྨཱསམྦུདྡྷོཏི, ཏཏིཡེན བུདྡྷཏྟཧེཏུབྷཱུཏཱ ཝིཝཊྚཙྪདཏཱ ཝུཏྟཱཏི ཝེདིཏབྦཱ། ཨཐ ཝཱ ཝིཝཊྚོ ཙ ཝིཙྪདོ ཙཱཏི ཝིཝཊྚཙྪདོ, ཝཊྚརཧིཏོ ཚདནརཧིཏོ ཙཱཏི ཝུཏྟཾ ཧོཏི། ཏེན ཨརཧཾ ཝཊྚཱབྷཱཝེན, སམྨཱསམྦུདྡྷོ ཚདནཱབྷཱཝེནཱཏི ཨེཝཾ པུརིམཔདདྭཡསྶེཝ ཧེཏུདྭཡཾ ཝུཏྟཾ ཧོཏི, དུཏིཡེན ཝེསཱརཛྫེན ཙེཏྠ པུརིམསིདྡྷི, པཋམེན དུཏིཡསིདྡྷི, ཏཏིཡཙཏུཏྠེཧི ཏཏིཡསིདྡྷི ཧོཏི། པུརིམཉྩ དྷམྨཙཀྑུཾ, དུཏིཡཾ བུདྡྷཙཀྑུཾ, ཏཏིཡཾ སམནྟཙཀྑུཾ སཱདྷེཏཱིཏི ཝེདིཏབྦཾ། ཏྭཾ མནྟཱནཾ པཊིགྒཧེཏཱཏི ཨིམིནཱ’སྶ མནྟེསུ སཱུརབྷཱཝཾ ཛནེཏི།

    Parosahassanti atirekasahassaṃ. Sūrāti abhīrukajātikā. Vīraṅgarūpāti devaputtasadisakāyā. Evaṃ tāva eke vaṇṇayanti. Ayaṃ panettha sabbhāvo. Vīrāti uttamasūrā vuccanti, vīrānaṃ aṅgaṃ vīraṅgaṃ, vīrakāraṇaṃ vīriyanti vuttaṃ hoti. Vīraṅgarūpaṃ etesanti vīraṅgarūpā, vīriyamayasarīrā viyāti vuttaṃ hoti. Parasenappamaddanāti sace paṭimukhaṃ tiṭṭheyya parasenā taṃ parimaddituṃ samatthāti adhippāyo. Dhammenāti ‘‘pāṇo na hantabbo’’tiādinā pañcasīladhammena . Arahaṃ hoti sammāsambuddho loke vivaṭṭacchadoti ettha rāgadosamohamānadiṭṭhiavijjāduccaritachadanehi sattahi paṭicchanne kilesandhakāre loke taṃ chadanaṃ vivaṭṭetvā samantato sañjātāloko hutvā ṭhitoti vivaṭṭacchado. Tattha paṭhamena padena pūjārahatā. Dutiyena tassā hetu, yasmā sammāsambuddhoti, tatiyena buddhattahetubhūtā vivaṭṭacchadatā vuttāti veditabbā. Atha vā vivaṭṭo ca vicchado cāti vivaṭṭacchado, vaṭṭarahito chadanarahito cāti vuttaṃ hoti. Tena arahaṃ vaṭṭābhāvena, sammāsambuddho chadanābhāvenāti evaṃ purimapadadvayasseva hetudvayaṃ vuttaṃ hoti, dutiyena vesārajjena cettha purimasiddhi, paṭhamena dutiyasiddhi, tatiyacatutthehi tatiyasiddhi hoti. Purimañca dhammacakkhuṃ, dutiyaṃ buddhacakkhuṃ, tatiyaṃ samantacakkhuṃ sādhetīti veditabbaṃ. Tvaṃ mantānaṃ paṭiggahetāti iminā’ssa mantesu sūrabhāvaṃ janeti.

    ༢༥༩. སོཔི ཏཱཡ ཨཱཙརིཡཀཐཱཡ ལཀྑཎེསུ ཝིགཏསམྨོཧོ ཨེཀོབྷཱསཛཱཏེ ཝིཡ བུདྡྷམནྟེ སམྤསྶམཱནོ ཨེཝཾ བྷོཏི ཨཱཧ། ཏསྶཏྠོ – ‘ཡཐཱ, བྷོ, ཏྭཾ ཝདསི, ཨེཝཾ ཀརིསྶཱམཱི’ཏི། ཝལ༹ཝཱརཐམཱརུཡ྄ཧཱཏི ཝལ༹ཝཱཡུཏྟཾ རཐཾ ཨབྷིརཱུཧིཏྭཱ། བྲཱཧྨཎོ ཀིར ཡེན རཐེན སཡཾ ཝིཙརཏི, ཏམེཝ རཐཾ དཏྭཱ མཱཎཝཾ པེསེསི། མཱཎཝཱཔི པོཀྑརསཱཏིསྶེཝ ཨནྟེཝཱསིཀཱ། སོ ཀིར ཏེསཾ – ‘‘ཨམྦཊྛེན སདྡྷིཾ གཙྪཐཱ’’ཏི སཉྙཾ ཨདཱསི།

    259. Sopi tāya ācariyakathāya lakkhaṇesu vigatasammoho ekobhāsajāte viya buddhamante sampassamāno evaṃ bhoti āha. Tassattho – ‘yathā, bho, tvaṃ vadasi, evaṃ karissāmī’ti. Vaḷavārathamāruyhāti vaḷavāyuttaṃ rathaṃ abhirūhitvā. Brāhmaṇo kira yena rathena sayaṃ vicarati, tameva rathaṃ datvā māṇavaṃ pesesi. Māṇavāpi pokkharasātisseva antevāsikā. So kira tesaṃ – ‘‘ambaṭṭhena saddhiṃ gacchathā’’ti saññaṃ adāsi.

    ཡཱཝཏིཀཱ ཡཱནསྶ བྷཱུམཱིཏི ཡཏྟཀཾ སཀྐཱ ཧོཏི ཡཱནེན གནྟུཾ, ཨཡཾ ཡཱནསྶ བྷཱུམི ནཱམ། ཡཱནཱ པཙྩོརོཧིཏྭཱཏི ཨཡཱནབྷཱུམིཾ, དྭཱརཀོཊྛཀསམཱིཔཾ གནྟྭཱ ཡཱནཏོ པཊིཨོརོཧིཏྭཱ།

    Yāvatikā yānassa bhūmīti yattakaṃ sakkā hoti yānena gantuṃ, ayaṃ yānassa bhūmi nāma. Yānā paccorohitvāti ayānabhūmiṃ, dvārakoṭṭhakasamīpaṃ gantvā yānato paṭiorohitvā.

    ཏེན ཁོ པན སམཡེནཱཏི ཡསྨིཾ སམཡེ ཨམྦཊྛོ ཨཱརཱམཾ པཱཝིསི། ཏསྨིཾ པན སམཡེ, ཋིཏམཛ྄ཛྷནྷིཀསམཡེ། ཀསྨཱ པན ཏསྨིཾ སམཡེ ཙངྐམནྟཱིཏི? པཎཱིཏབྷོཛནཔཙྩཡསྶ ཐིནམིདྡྷསྶ ཝིནོདནཏྠཾ, དིཝཱཔདྷཱནིཀཱ ཝཱ ཏེ། ཏཱདིསཱནཉྷི པཙྪཱབྷཏྟཾ ཙངྐམིཏྭཱ ནྷཱཡིཏྭཱ སརཱིརཾ ཨུཏུཾ གཱཧཱཔེཏྭཱ ནིསཛྫ སམཎདྷམྨཾ ཀརོནྟཱནཾ ཙིཏྟཾ ཨེཀགྒཾ ཧོཏི། ཡེན ཏེ བྷིཀྑཱུཏི སོ ཀིར – ‘‘ཀུཧིཾ སམཎོ གོཏམོ’’ཏི པརིཝེཎཏོ པརིཝེཎཾ ཨནཱགནྟྭཱ ‘‘པུཙྪིཏྭཱཝ པཝིསིསྶཱམཱི’’ཏི ཝིལོཀེནྟོ ཨརཉྙཧཏྠཱི ཝིཡ མཧཱཙངྐམེ ཙངྐམམཱནེ པཾསུཀཱུལིཀེ བྷིཀྑཱུ དིསྭཱ ཏེསཾ སནྟིཀཾ ཨགམཱསི། ཏཾ སནྡྷཱཡ ཡེན ཏེ བྷིཀྑཱུཏིཨཱདི ཝུཏྟཾ། དསྶནཱཡཱཏི དཊྛུཾ, པསྶིཏུཀཱམཱ ཧུཏྭཱཏི ཨཏྠོ།

    Tena kho pana samayenāti yasmiṃ samaye ambaṭṭho ārāmaṃ pāvisi. Tasmiṃ pana samaye, ṭhitamajjhanhikasamaye. Kasmā pana tasmiṃ samaye caṅkamantīti? Paṇītabhojanapaccayassa thinamiddhassa vinodanatthaṃ, divāpadhānikā vā te. Tādisānañhi pacchābhattaṃ caṅkamitvā nhāyitvā sarīraṃ utuṃ gāhāpetvā nisajja samaṇadhammaṃ karontānaṃ cittaṃ ekaggaṃ hoti. Yena te bhikkhūti so kira – ‘‘kuhiṃ samaṇo gotamo’’ti pariveṇato pariveṇaṃ anāgantvā ‘‘pucchitvāva pavisissāmī’’ti vilokento araññahatthī viya mahācaṅkame caṅkamamāne paṃsukūlike bhikkhū disvā tesaṃ santikaṃ agamāsi. Taṃ sandhāya yena te bhikkhūtiādi vuttaṃ. Dassanāyāti daṭṭhuṃ, passitukāmā hutvāti attho.

    ༢༦༠. ཨབྷིཉྙཱཏཀོལཉྙོཏི པཱཀཊཀུལཛོ། ཏདཱ ཀིར ཛམྦུདཱིཔེ ཨམྦཊྛཀུལཾ ནཱམ པཱཀཊཀུལམཧོསི ། ཨབྷིཉྙཱཏསྶཱཏི རཱུཔཛཱཏིམནྟཀུལཱཔདེསེཧི པཱཀཊསྶ། ཨགརཱུཏི ཨབྷཱརིཀོ། ཡོ ཧི ཨམྦཊྛཾ ཉཱཔེཏུཾ ན སཀྐུཎེཡྻ, ཏསྶ ཏེན སདྡྷིཾ ཀཐཱསལླཱཔོ གརུ བྷཝེཡྻ། བྷགཝཏོ པན ཏཱདིསཱནཾ མཱཎཝཱནཾ སཏེནཱཔི སཧསྶེནཱཔི པཉྷཾ པུཊྛསྶ ཝིསྶཛྫནེ དནྡྷཱཡིཏཏྟཾ ནཏྠཱིཏི མཉྙམཱནཱ – ‘‘ཨགརུ ཁོ པནཱ’’ཏི ཙིནྟཡིཾསུ། ཝིཧཱརོཏི གནྡྷཀུཊིཾ སནྡྷཱཡ ཨཱཧཾསུ།

    260.Abhiññātakolaññoti pākaṭakulajo. Tadā kira jambudīpe ambaṭṭhakulaṃ nāma pākaṭakulamahosi . Abhiññātassāti rūpajātimantakulāpadesehi pākaṭassa. Agarūti abhāriko. Yo hi ambaṭṭhaṃ ñāpetuṃ na sakkuṇeyya, tassa tena saddhiṃ kathāsallāpo garu bhaveyya. Bhagavato pana tādisānaṃ māṇavānaṃ satenāpi sahassenāpi pañhaṃ puṭṭhassa vissajjane dandhāyitattaṃ natthīti maññamānā – ‘‘agaru kho panā’’ti cintayiṃsu. Vihāroti gandhakuṭiṃ sandhāya āhaṃsu.

    ཨཏརམཱནོཏི ཨཏུརིཏོ, སཎིཀཾ པདཔྤམཱཎཊྛཱནེ པདཾ ནིཀྑིཔནྟོ ཝཏྟཾ ཀཏྭཱ སུསམྨཊྛཾ མུཏྟཱདལསིནྡུཝཱརསནྠརསདིསཾ ཝཱལིཀཾ ཨཝིནཱསེནྟོཏི ཨཏྠོ། ཨཱལི༹ནྡནྟི པམུཁཾ། ཨུཀྐཱསིཏྭཱཏི ཨུཀྐཱསིཏསདྡཾ ཀཏྭཱ། ཨགྒལ༹ནྟི དྭཱརཀཝཱཊཾ། ཨཱཀོཊེཧཱིཏི ཨགྒནཁེཧི སཎིཀཾ ཀུཉྩིཀཙྪིདྡསམཱིཔེ ཨཱཀོཊེཧཱིཏི ཝུཏྟཾ ཧོཏི། དྭཱརཾ ཀིར ཨཏིཨུཔརི ཨམནུསྶཱ, ཨཏིཧེཊྛཱ དཱིགྷཛཱཏིཀཱ ཀོཊེནྟི། ཏཐཱ ཨནཱཀོཊེཏྭཱ མཛ྄ཛྷེ ཚིདྡསམཱིཔེ ཀོཊེཏབྦནྟི ཨིདཾ དྭཱརཱཀོཊནཝཏྟནྟི དཱིཔེནྟཱ ཝདནྟི།

    Ataramānoti aturito, saṇikaṃ padappamāṇaṭṭhāne padaṃ nikkhipanto vattaṃ katvā susammaṭṭhaṃ muttādalasinduvārasantharasadisaṃ vālikaṃ avināsentoti attho. Āḷindanti pamukhaṃ. Ukkāsitvāti ukkāsitasaddaṃ katvā. Aggaḷanti dvārakavāṭaṃ. Ākoṭehīti agganakhehi saṇikaṃ kuñcikacchiddasamīpe ākoṭehīti vuttaṃ hoti. Dvāraṃ kira atiupari amanussā, atiheṭṭhā dīghajātikā koṭenti. Tathā anākoṭetvā majjhe chiddasamīpe koṭetabbanti idaṃ dvārākoṭanavattanti dīpentā vadanti.

    ༢༦༡. ཝིཝརི བྷགཝཱ དྭཱརནྟི ན བྷགཝཱ ཨུཊྛཱཡ དྭཱརཾ ཝིཝརི། ཝིཝརིཡཏཱུཏི པན ཧཏྠཾ པསཱརེསི། ཏཏོ ‘‘བྷགཝཱ ཏུམྷེཧི ཨནེཀཱསུ ཀཔྤཀོཊཱིསུ དཱནཾ དདམཱནེཧི ན སཧཏྠཱ དྭཱརཝིཝརཎཀམྨཾ ཀཏ’’ནྟི སཡམེཝ དྭཱརཾ ཝིཝཊཾ། ཏཾ པན ཡསྨཱ བྷགཝཏོ མནེན ཝིཝཊཾ, ཏསྨཱ ཝིཝརི བྷགཝཱ དྭཱརནྟི ཝཏྟུཾ ཝཊྚཏི།

    261.Vivari bhagavā dvāranti na bhagavā uṭṭhāya dvāraṃ vivari. Vivariyatūti pana hatthaṃ pasāresi. Tato ‘‘bhagavā tumhehi anekāsu kappakoṭīsu dānaṃ dadamānehi na sahatthā dvāravivaraṇakammaṃ kata’’nti sayameva dvāraṃ vivaṭaṃ. Taṃ pana yasmā bhagavato manena vivaṭaṃ, tasmā vivari bhagavā dvāranti vattuṃ vaṭṭati.

    བྷགཝཏཱ སདྡྷིཾ སམྨོདིཾསཱུཏི ཡཐཱ ཁམནཱིཡཱདཱིནི པུཙྪནྟོ བྷགཝཱ ཏེཧི, ཨེཝཾ ཏེཔི བྷགཝཏཱ སདྡྷིཾ སམཔྤཝཏྟམོདཱ ཨཧེསུཾ། སཱིཏོདཀཾ ཝིཡ ཨུཎྷོདཀེན སམྨོདིཏཾ ཨེཀཱིབྷཱཝཾ ཨགམཾསུ། ཡཱཡ ཙ ‘‘ཀཙྩི, བྷོ གོཏམ, ཁམནཱིཡཾ; ཀཙྩི ཡཱཔནཱིཡཾ, ཀཙྩི བྷོཏོ ཙ གོཏམསྶ སཱཝཀཱནཉྩ ཨཔྤཱབཱདྷཾ, ཨཔྤཱཏངྐཾ, ལཧུཊྛཱནཾ, བལཾ, ཕཱསུཝིཧཱརོ’’ཏིཨཱདིཀཱཡ ཀཐཱཡ སམྨོདིཾསུ, ཏཾ པཱིཏིཔཱམོཛྫསངྑཱཏསམྨོདཛནནཏོ སམྨོདིཏུཾ ཡུཏྟབྷཱཝཏོ ཙ སམྨོདནཱིཡཾ, ཨཏྠབྱཉྫནམདྷུརཏཱཡ སུཙིརམྤི ཀཱལཾ སཱརེཏུཾ ནིརནྟརཾ པཝཏྟེཏུཾ ཨརཧབྷཱཝཏོ སརིཏབྦབྷཱཝཏོ ཙ སཱརཎཱིཡཾ། སུཡྻམཱནསུཁཏོ སམྨོདནཱིཡཾ, ཨནུསྶརིཡམཱནསུཁཏོ ཙ སཱརཎཱིཡཾ། ཏཐཱ བྱཉྫནཔརིསུདྡྷཏཱཡ སམྨོདནཱིཡཾ, ཨཏྠཔརིསུདྡྷཏཱཡ སཱརཎཱིཡཾ། ཨེཝཾ ཨནེཀེཧི པརིཡཱཡེཧི སམྨོདནཱིཡཾ ཀཐཾ སཱརཎཱིཡཾ ཝཱིཏིསཱརེཏྭཱ པརིཡོསཱཔེཏྭཱ ནིཊྛཔེཏྭཱ ཨེཀམནྟཾ ནིསཱིདིཾསུ།

    Bhagavatā saddhiṃ sammodiṃsūti yathā khamanīyādīni pucchanto bhagavā tehi, evaṃ tepi bhagavatā saddhiṃ samappavattamodā ahesuṃ. Sītodakaṃ viya uṇhodakena sammoditaṃ ekībhāvaṃ agamaṃsu. Yāya ca ‘‘kacci, bho gotama, khamanīyaṃ; kacci yāpanīyaṃ, kacci bhoto ca gotamassa sāvakānañca appābādhaṃ, appātaṅkaṃ, lahuṭṭhānaṃ, balaṃ, phāsuvihāro’’tiādikāya kathāya sammodiṃsu, taṃ pītipāmojjasaṅkhātasammodajananato sammodituṃ yuttabhāvato ca sammodanīyaṃ, atthabyañjanamadhuratāya sucirampi kālaṃ sāretuṃ nirantaraṃ pavattetuṃ arahabhāvato saritabbabhāvato ca sāraṇīyaṃ. Suyyamānasukhato sammodanīyaṃ, anussariyamānasukhato ca sāraṇīyaṃ. Tathā byañjanaparisuddhatāya sammodanīyaṃ, atthaparisuddhatāya sāraṇīyaṃ. Evaṃ anekehi pariyāyehi sammodanīyaṃ kathaṃ sāraṇīyaṃ vītisāretvā pariyosāpetvā niṭṭhapetvā ekamantaṃ nisīdiṃsu.

    ཨམྦཊྛོ པན མཱཎཝོཏི སོ ཀིར བྷགཝཏོ རཱུཔསམྤཏྟིཡཾ ཙིཏྟཔྤསཱདམཏྟམྤི ཨཀཏྭཱ ‘‘དསབལཾ ཨཔསཱདེསྶཱམཱི’’ཏི ཨུདརེ བདྡྷསཱཊཀཾ མུཉྩིཏྭཱ ཀཎྛེ ཨོལམྦེཏྭཱ ཨེཀེན ཧཏྠེན དུསྶཀཎྞཾ གཧེཏྭཱ ཙངྐམཾ ཨབྷིརཱུཧིཏྭཱ ཀཱལེན བཱཧུཾ, ཀཱལེན ཨུདརཾ, ཀཱལེན པིཊྛིཾ དསྶེནྟོ, ཀཱལེན ཧཏྠཝིཀཱརཾ, ཀཱལེན བྷམུཀཝིཀཱརཾ ཀརོནྟོ, ‘‘ཀཙྩི ཏེ བྷོ, གོཏམ, དྷཱཏུསམཏཱ, ཀཙྩི བྷིཀྑཱཧཱརེན ན ཀིལམཐ, ཨཀིལམཐཱཀཱརོཡེཝ པན ཏེ པཉྙཱཡཏི; ཐཱུལཱནི ཧི ཏེ ཨངྒཔཙྩངྒཱནི, པཱསཱདིཀཏྠ གཏགཏཊྛཱནེ. ‘ཏེ བཧུཛནཱ རཱཛཔབྦཛིཏོཏི ཙ བུདྡྷོ’ཏི ཙ ཨུཔྤནྣབཧུམཱནཱ པཎཱིཏཾ ཨོཛཝནྟམཱཧཱརཾ དེནྟི། པསྶཐ, བྷོ, གེཧཾ, ཙིཏྟསཱལཱ ཝིཡ, དིབྦཔཱསཱདོ ཝིཡ། ཨིམཾ མཉྩཾ པསྶཐ, བིམྦོཧནཾ པསྶཐ, ཀིཾ ཨེཝརཱུཔེ ཋཱནེ ཝསནྟསྶ སམཎདྷམྨཾ ཀཱཏུཾ དུཀྐར’’ནྟི ཨེཝརཱུཔཾ ཨུཔྤཎྜནཀཐཾ ཨནཱཙཱརབྷཱཝསཱརཎཱིཡཾ ཀཐེཏི, ཏེན ཝུཏྟཾ – ‘‘ཨམྦཊྛོ པན མཱཎཝོ ཙངྐམནྟོཔི ནིསིནྣེན བྷགཝཏཱ ཀིཉྩི ཀིཉྩི ཀཐཾ སཱརཎཱིཡཾ ཝཱིཏིསཱརེཏི, ཋིཏོཔི ནིསིནྣེན བྷགཝཏཱ ཀིཉྩི ཀིཉྩི ཀཐཾ སཱརཎཱིཡཾ ཝཱིཏིསཱརེཏཱི’’ཏི།

    Ambaṭṭhopana māṇavoti so kira bhagavato rūpasampattiyaṃ cittappasādamattampi akatvā ‘‘dasabalaṃ apasādessāmī’’ti udare baddhasāṭakaṃ muñcitvā kaṇṭhe olambetvā ekena hatthena dussakaṇṇaṃ gahetvā caṅkamaṃ abhirūhitvā kālena bāhuṃ, kālena udaraṃ, kālena piṭṭhiṃ dassento, kālena hatthavikāraṃ, kālena bhamukavikāraṃ karonto, ‘‘kacci te bho, gotama, dhātusamatā, kacci bhikkhāhārena na kilamatha, akilamathākāroyeva pana te paññāyati; thūlāni hi te aṅgapaccaṅgāni, pāsādikattha gatagataṭṭhāne. ‘te bahujanā rājapabbajitoti ca buddho’ti ca uppannabahumānā paṇītaṃ ojavantamāhāraṃ denti. Passatha, bho, gehaṃ, cittasālā viya, dibbapāsādo viya. Imaṃ mañcaṃ passatha, bimbohanaṃ passatha, kiṃ evarūpe ṭhāne vasantassa samaṇadhammaṃ kātuṃ dukkara’’nti evarūpaṃ uppaṇḍanakathaṃ anācārabhāvasāraṇīyaṃ katheti, tena vuttaṃ – ‘‘ambaṭṭho pana māṇavo caṅkamantopi nisinnena bhagavatā kiñci kiñci kathaṃ sāraṇīyaṃ vītisāreti, ṭhitopi nisinnena bhagavatā kiñci kiñci kathaṃ sāraṇīyaṃ vītisāretī’’ti.

    ༢༦༢. ཨཐ ཁོ བྷགཝཱཏི ཨཐ བྷགཝཱ – ‘‘ཨཡཾ མཱཎཝོ ཧཏྠཾ པསཱརེཏྭཱ བྷཝགྒཾ གཧེཏུཀཱམོ ཝིཡ, པཱདཾ པསཱརེཏྭཱ ཨཝཱིཙིཾ ཝིཙརིཏུཀཱམོ ཝིཡ, མཧཱསམུདྡཾ ཏརིཏུཀཱམོ ཝིཡ, སིནེརུཾ ཨཱརོཧིཏུཀཱམོ ཝིཡ ཙ ཨཊྛཱནེ ཝཱཡམཏི, ཧནྡ, ཏེན སདྡྷིཾ མནྟེམཱི’’ཏི ཨམྦཊྛཾ མཱཎཝཾ ཨེཏདཝོཙ། ཨཱཙརིཡཔཱཙརིཡེཧཱིཏི ཨཱཙརིཡེཧི ཙ ཏེསཾ ཨཱཙརིཡེཧི ཙ།

    262.Atha kho bhagavāti atha bhagavā – ‘‘ayaṃ māṇavo hatthaṃ pasāretvā bhavaggaṃ gahetukāmo viya, pādaṃ pasāretvā avīciṃ vicaritukāmo viya, mahāsamuddaṃ taritukāmo viya, sineruṃ ārohitukāmo viya ca aṭṭhāne vāyamati, handa, tena saddhiṃ mantemī’’ti ambaṭṭhaṃ māṇavaṃ etadavoca. Ācariyapācariyehīti ācariyehi ca tesaṃ ācariyehi ca.

    པཋམཨིབྦྷཝཱདཝཎྞནཱ

    Paṭhamaibbhavādavaṇṇanā

    ༢༦༣. གཙྪནྟོ ཝཱཏི ཨེཏྠ ཀཱམཾ ཏཱིསུ ཨིརིཡཱཔཐེསུ བྲཱཧྨཎོ ཨཱཙརིཡབྲཱཧྨཎེན སདྡྷིཾ སལླཔིཏུམརཧཏི། ཨཡཾ པན མཱཎཝོ མཱནཐདྡྷཏཱཡ ཀཐཱསལླཱཔཾ ཀརོནྟོ ཙཏྟཱརོཔི ཨིརིཡཱཔཐེ ཡོཛེསྶཱམཱིཏི ‘‘སཡཱནོ ཝཱ ཧི, བྷོ གོཏམ, སཡཱནེནཱ’’ཏི ཨཱཧ།

    263.Gacchanto vāti ettha kāmaṃ tīsu iriyāpathesu brāhmaṇo ācariyabrāhmaṇena saddhiṃ sallapitumarahati. Ayaṃ pana māṇavo mānathaddhatāya kathāsallāpaṃ karonto cattāropi iriyāpathe yojessāmīti ‘‘sayāno vā hi, bho gotama, sayānenā’’ti āha.

    ཏཏོ ཀིར ཏཾ བྷགཝཱ – ‘‘ཨམྦཊྛ, གཙྪནྟསྶ ཝཱ གཙྪནྟེན, ཋིཏསྶ ཝཱ ཋིཏེན, ནིསིནྣསྶ ཝཱ ནིསིནྣེནཱཙརིཡེན སདྡྷིཾ ཀཐཱ ནཱམ སབྦཱཙརིཡེསུ ལབྦྷཏི། ཏྭཾ པན སཡཱནོ སཡཱནེནཱཙརིཡེན སདྡྷིཾ ཀཐེསི, ཀིཾ ཏེ ཨཱཙརིཡོ གོརཱུཔཾ, ཨུདཱཧུ ཏྭ’’ནྟི ཨཱཧ། སོ ཀུཛ྄ཛྷིཏྭཱ – ‘‘ཡེ ཙ ཁོ ཏེ, བྷོ གོཏམ, མུཎྜཀཱ’’ཏིཨཱདིམཱཧ། ཏཏྠ མུཎྜེ མུཎྜཱཏི སམཎེ ཙ སམཎཱཏི ཝཏྟུཾ ཝཊྚེཡྻ། ཨཡཾ པན ཧཱིལེ༹ནྟོ མུཎྜཀཱ སམཎཀཱཏི ཨཱཧ། ཨིབྦྷཱཏི གཧཔཏིཀཱ། ཀཎྷཱཏི ཀཎྷཱ, ཀཱལ༹ཀཱཏི ཨཏྠོ། བནྡྷུཔཱདཱཔཙྩཱཏི ཨེཏྠ བནྡྷཱུཏི བྲཧྨཱ ཨདྷིཔྤེཏོ། ཏཉྷི བྲཱཧྨཎཱ པིཏཱམཧོཏི ཝོཧརནྟི། པཱདཱནཾ ཨཔཙྩཱ པཱདཱཔཙྩཱ, བྲཧྨུནོ པིཊྛིཔཱདཏོ ཛཱཏཱཏི ཨདྷིཔྤཱཡོ། ཏསྶ ཀིར ཨཡཾ ལདྡྷི – བྲཱཧྨཎཱ བྲཧྨུནོ མུཁཏོ ནིཀྑནྟཱ, ཁཏྟིཡཱ ཨུརཏོ, ཝེསྶཱ ནཱབྷིཏོ, སུདྡཱ ཛཱཎུཏོ, སམཎཱ པིཊྛིཔཱདཏོཏི། ཨེཝཾ ཀཐེནྟོ ཙ པནེས ཀིཉྩཱཔི ཨནིཡམེཏྭཱ ཀཐེཏི། ཨཐ ཁོ བྷགཝནྟམེཝ ཝདཱམཱིཏི ཀཐེཏི།

    Tato kira taṃ bhagavā – ‘‘ambaṭṭha, gacchantassa vā gacchantena, ṭhitassa vā ṭhitena, nisinnassa vā nisinnenācariyena saddhiṃ kathā nāma sabbācariyesu labbhati. Tvaṃ pana sayāno sayānenācariyena saddhiṃ kathesi, kiṃ te ācariyo gorūpaṃ, udāhu tva’’nti āha. So kujjhitvā – ‘‘ye ca kho te, bho gotama, muṇḍakā’’tiādimāha. Tattha muṇḍe muṇḍāti samaṇe ca samaṇāti vattuṃ vaṭṭeyya. Ayaṃ pana hīḷento muṇḍakā samaṇakāti āha. Ibbhāti gahapatikā. Kaṇhāti kaṇhā, kāḷakāti attho. Bandhupādāpaccāti ettha bandhūti brahmā adhippeto. Tañhi brāhmaṇā pitāmahoti voharanti. Pādānaṃ apaccā pādāpaccā, brahmuno piṭṭhipādato jātāti adhippāyo. Tassa kira ayaṃ laddhi – brāhmaṇā brahmuno mukhato nikkhantā, khattiyā urato, vessā nābhito, suddā jāṇuto, samaṇā piṭṭhipādatoti. Evaṃ kathento ca panesa kiñcāpi aniyametvā katheti. Atha kho bhagavantameva vadāmīti katheti.

    ཨཐ ཁོ བྷགཝཱ – ‘‘ཨཡཾ ཨམྦཊྛོ ཨཱགཏཀཱལཏོ པཊྛཱཡ མཡཱ སདྡྷིཾ ཀཐཡམཱནོ མཱནམེཝ ནིསྶཱཡ ཀཐེསི, ཨཱསཱིཝིསཾ གཱིཝཱཡཾ གཎྷནྟོ ཝིཡ, ཨགྒིཀྑནྡྷཾ ཨཱལིངྒནྟོ ཝིཡ, མཏྟཝཱརཎཾ སོཎྜཱཡ པརཱམསནྟོ ཝིཡ, ཨཏྟནོ པམཱཎཾ ན ཛཱནཱཏི། ཧནྡ ནཾ ཛཱནཱཔེསྶཱམཱི’’ཏི ཙིནྟེཏྭཱ ‘‘ཨཏྠིཀཝཏོ ཁོ པན ཏེ, ཨམྦཊྛཱ’’ཏིཨཱདིམཱཧ། ཏཏྠ ཨཱགནྟྭཱ ཀཏྟབྦཀིཙྩསངྑཱཏོ ཨཏྠོ, ཨེཏསྶ ཨཏྠཱིཏི ཨཏྠིཀཾ, ཏསྶ མཱཎཝསྶ ཙིཏྟཾ། ཨཏྠིཀམསྶ ཨཏྠཱིཏི ཨཏྠིཀཝཱ, ཏསྶ ཨཏྠིཀཝཏོ ཏཝ ཨིདྷཱགམནཾ ཨཧོསཱིཏི ཨཏྠོ།

    Atha kho bhagavā – ‘‘ayaṃ ambaṭṭho āgatakālato paṭṭhāya mayā saddhiṃ kathayamāno mānameva nissāya kathesi, āsīvisaṃ gīvāyaṃ gaṇhanto viya, aggikkhandhaṃ āliṅganto viya, mattavāraṇaṃ soṇḍāya parāmasanto viya, attano pamāṇaṃ na jānāti. Handa naṃ jānāpessāmī’’ti cintetvā ‘‘atthikavato kho pana te, ambaṭṭhā’’tiādimāha. Tattha āgantvā kattabbakiccasaṅkhāto attho, etassa atthīti atthikaṃ, tassa māṇavassa cittaṃ. Atthikamassa atthīti atthikavā, tassa atthikavato tava idhāgamanaṃ ahosīti attho.

    ཁོ པནཱཏི ནིཔཱཏམཏྟཾ། ཡཱཡེཝ ཁོ པནཏྠཱཡཱཏི ཡེནེཝ ཁོ པནཏྠེན། ཨཱགཙྪེཡྻཱཐཱཏི མམ ཝཱ ཨཉྙེསཾ ཝཱ སནྟིཀཾ ཡདཱ ཀདཱཙི ཨཱགཙྪེཡྻཱཐ། ཏམེཝ ཨཏྠནྟི ཨིདཾ པུརིསལིངྒཝསེནེཝ ཝུཏྟཾ། མནསི ཀརེཡྻཱཐཱཏི ཙིཏྟེ ཀརེཡྻཱཐ། ཨིདཾ ཝུཏྟཾ ཧོཏི – ཏྭཾ ཨཱཙརིཡེན ཨཏྟནོ ཀརཎཱིཡེན པེསིཏོ, ན ཨམྷཱཀཾ པརིབྷཝནཏྠཱཡ, ཏསྨཱ ཏམེཝ ཀིཙྩཾ མནསི ཀརོཧཱིཏི། ཨེཝམསྶ ཨཉྙེསཾ སནྟིཀཾ ཨཱགཏཱནཾ ཝཏྟཾ དསྶེཏྭཱ མཱནནིགྒཎྷནཏྠཾ ‘‘ཨཝུསིཏཝཱཡེཝ ཁོ པནཱ’’ཏིཨཱདིམཱཧ། ཏསྶཏྠོ པསྶཐ བྷོ ཨཡཾ ཨམྦཊྛོ མཱཎཝོ ཨཱཙརིཡཀུལེ ཨཝུསིཏཝཱ ཨསིཀྑིཏོ ཨཔྤསྶུཏོཝ སམཱནོ། ཝུསིཏམཱནཱིཏི ‘‘ཨཧཾ ཝུསིཏཝཱ སིཀྑིཏོ བཧུསྶུཏོ’’ཏི ཨཏྟཱནཾ མཉྙཏི། ཨེཏསྶ ཧི ཨེཝཾ ཕརུསཝཙནསམུདཱཙཱརེ ཀཱརཎཾ ཀིམཉྙཏྲ ཨཝུསིཏཏྟཱཏི ཨཱཙརིཡཀུལེ ཨསཾཝུདྡྷཱ ཨསིཀྑིཏཱ ཨཔྤསྶུཏཱཡེཝ ཧི ཨེཝཾ ཝདནྟཱིཏི།

    Kho panāti nipātamattaṃ. Yāyeva kho panatthāyāti yeneva kho panatthena. Āgaccheyyāthāti mama vā aññesaṃ vā santikaṃ yadā kadāci āgaccheyyātha. Tameva atthanti idaṃ purisaliṅgavaseneva vuttaṃ. Manasi kareyyāthāti citte kareyyātha. Idaṃ vuttaṃ hoti – tvaṃ ācariyena attano karaṇīyena pesito, na amhākaṃ paribhavanatthāya, tasmā tameva kiccaṃ manasi karohīti. Evamassa aññesaṃ santikaṃ āgatānaṃ vattaṃ dassetvā mānaniggaṇhanatthaṃ ‘‘avusitavāyeva kho panā’’tiādimāha. Tassattho passatha bho ayaṃ ambaṭṭho māṇavo ācariyakule avusitavā asikkhito appassutova samāno. Vusitamānīti ‘‘ahaṃ vusitavā sikkhito bahussuto’’ti attānaṃ maññati. Etassa hi evaṃ pharusavacanasamudācāre kāraṇaṃ kimaññatra avusitattāti ācariyakule asaṃvuddhā asikkhitā appassutāyeva hi evaṃ vadantīti.

    ༢༦༤. ཀུཔིཏོཏི ཀུདྡྷོ། ཨནཏྟམནོཏི ཨསཀམནོ, ཀིཾ པན བྷགཝཱ ཏསྶ ཀུཛ྄ཛྷནབྷཱཝཾ ཉཏྭཱ ཨེཝམཱཧ ཨུདཱཧུ ཨཉཏྭཱཏི? ཉཏྭཱ ཨཱཧཱཏི། ཀསྨཱ ཉཏྭཱ ཨཱཧཱཏི? ཏསྶ མཱནནིམྨདནཏྠཾ། བྷགཝཱ ཧི ཨཉྙཱསི – ‘‘ཨཡཾ མཡཱ ཨེཝཾ ཝུཏྟེ ཀུཛ྄ཛྷིཏྭཱ མམ ཉཱཏཀེ ཨཀྐོསིསྶཏི། ཨཐསྶཱཧཾ ཡཐཱ ནཱམ ཀུསལོ བྷིསཀྐོ དོསཾ ཨུགྒིལེཏྭཱ ནཱིཧརཏི, ཨེཝམེཝ གོཏྟེན གོཏྟཾ, ཀུལཱཔདེསེན ཀུལཱཔདེསཾ , ཨུཊྛཱཔེཏྭཱ བྷཝགྒཔྤམཱཎེན ཝིཡ ཨུཊྛིཏཾ མཱནདྡྷཛཾ མཱུལེ ཚེཏྭཱ ནིཔཱཏེསྶཱམཱི’’ཏི། ཁུཾསེནྟོཏི གྷཊྚེནྟོ། ཝམྦྷེནྟོཏི ཧཱིལེ༹ནྟོ། པཱཔིཏོ བྷཝིསྶཏཱིཏི ཙཎྜབྷཱཝཱདིདོསཾ པཱཔིཏོ བྷཝིསྶཏི།

    264.Kupitoti kuddho. Anattamanoti asakamano, kiṃ pana bhagavā tassa kujjhanabhāvaṃ ñatvā evamāha udāhu añatvāti? Ñatvā āhāti. Kasmā ñatvā āhāti? Tassa mānanimmadanatthaṃ. Bhagavā hi aññāsi – ‘‘ayaṃ mayā evaṃ vutte kujjhitvā mama ñātake akkosissati. Athassāhaṃ yathā nāma kusalo bhisakko dosaṃ uggiletvā nīharati, evameva gottena gottaṃ, kulāpadesena kulāpadesaṃ , uṭṭhāpetvā bhavaggappamāṇena viya uṭṭhitaṃ mānaddhajaṃ mūle chetvā nipātessāmī’’ti. Khuṃsentoti ghaṭṭento. Vambhentoti hīḷento. Pāpito bhavissatīti caṇḍabhāvādidosaṃ pāpito bhavissati.

    ཙཎྜཱཏི མཱནནིསྶིཏཀོདྷཡུཏྟཱ། ཕརུསཱཏི ཁརཱ། ལཧུསཱཏི ལཧུཀཱ། ཨཔྤཀེནེཝ ཏུསྶནྟི ཝཱ དུསྶནྟི ཝཱ ཨུདཀཔིཊྛེ ཨལཱབུཀཊཱཧཾ ཝིཡ ཨཔྤཀེནེཝ ཨུཔླཝནྟི། བྷསྶཱཏི བཧུབྷཱཎིནོ། སཀྱཱནཾ མུཁེ ཝིཝཊེ ཨཉྙསྶ ཝཙནོཀཱསོ ནཏྠཱིཏི ཨདྷིཔྤཱཡེནེཝ ཝདཏི། སམཱནཱཏི ཨིདཾ སནྟཱཏི པུརིམཔདསྶ ཝེཝཙནཾ། ན སཀྐརོནྟཱིཏི ན བྲཱཧྨཎཱནཾ སུནྡརེནཱཀཱརེན ཀརོནྟི། ན གརུཾ ཀརོནྟཱིཏི བྲཱཧྨཎེསུ གཱརཝཾ ན ཀརོནྟི། ན མཱནེནྟཱིཏི ན མནེན པིཡཱཡནྟི། ན པཱུཛེནྟཱིཏི མཱལཱདཱིཧི ནེསཾ པཱུཛཾ ན ཀརོནྟི། ན ཨཔཙཱཡནྟཱིཏི ཨབྷིཝཱདནཱདཱིཧི ནེསཾ ཨཔཙིཏིཀམྨཾ ནཱིཙཝུཏྟིཾ ན དསྶེནྟི ཏཡིདནྟི ཏཾ ཨིདཾ། ཡདིམེ སཀྱཱཏི ཡཾ ཨིམེ སཀྱཱ ན བྲཱཧྨཎེ སཀྐརོནྟི…པེ॰… ན ཨཔཙཱཡནྟི, ཏཾ ཏེསཾ ཨསཀྐཱརཀརཎཱདི སབྦཾ ན ཡུཏྟཾ, ནཱནུལོམནྟི ཨཏྠོ།

    Caṇḍāti mānanissitakodhayuttā. Pharusāti kharā. Lahusāti lahukā. Appakeneva tussanti vā dussanti vā udakapiṭṭhe alābukaṭāhaṃ viya appakeneva uplavanti. Bhassāti bahubhāṇino. Sakyānaṃ mukhe vivaṭe aññassa vacanokāso natthīti adhippāyeneva vadati. Samānāti idaṃ santāti purimapadassa vevacanaṃ. Na sakkarontīti na brāhmaṇānaṃ sundarenākārena karonti. Na garuṃ karontīti brāhmaṇesu gāravaṃ na karonti. Na mānentīti na manena piyāyanti. Na pūjentīti mālādīhi nesaṃ pūjaṃ na karonti. Na apacāyantīti abhivādanādīhi nesaṃ apacitikammaṃ nīcavuttiṃ na dassenti tayidanti taṃ idaṃ. Yadime sakyāti yaṃ ime sakyā na brāhmaṇe sakkaronti…pe… na apacāyanti, taṃ tesaṃ asakkārakaraṇādi sabbaṃ na yuttaṃ, nānulomanti attho.

    དུཏིཡཨིབྦྷཝཱདཝཎྞནཱ

    Dutiyaibbhavādavaṇṇanā

    ༢༦༥. ཨཔརདྡྷུནྟི ཨཔརཛ྄ཛྷིཾསུ། ཨེཀམིདཱཧནྟི ཨེཏྠ ཨིདནྟི ནིཔཱཏམཏྟཾ། ཨེཀཾ ཨཧནྟི ཨཏྠོ། སནྡྷཱགཱརནྟི རཛྫཨནུསཱསནསཱལཱ། སཀྱཱཏི ཨབྷིསིཏྟརཱཛཱནོ ། སཀྱཀུམཱརཱཏི ཨནབྷིསིཏྟཱ། ཨུཙྩེསཱུཏི ཡཐཱནུརཱུཔེསུ པལླངྐཔཱིཋཀཝེཏྟཱསནཕལཀཙིཏྟཏྠརཎཱདིབྷེདེསུ། སཉྫགྒྷནྟཱཏི ཨུཔྤཎྜནཝསེན མཧཱཧསིཏཾ ཧསནྟཱ། སཾཀཱིལ༹ནྟཱཏི ཧསིཏམཏྟ ཀརཎཨངྒུལིསངྒྷཊྚནཔཱཎིཔྤཧཱརདཱནཱདཱིནི ཀརོནྟཱ། མམཉྙེཝ མཉྙེཏི ཨེཝམཧཾ མཉྙཱམི, མམཉྙེཝ ཨནུཧསནྟི, ན ཨཉྙནྟི།

    265.Aparaddhunti aparajjhiṃsu. Ekamidāhanti ettha idanti nipātamattaṃ. Ekaṃ ahanti attho. Sandhāgāranti rajjaanusāsanasālā. Sakyāti abhisittarājāno . Sakyakumārāti anabhisittā. Uccesūti yathānurūpesu pallaṅkapīṭhakavettāsanaphalakacittattharaṇādibhedesu. Sañjagghantāti uppaṇḍanavasena mahāhasitaṃ hasantā. Saṃkīḷantāti hasitamatta karaṇaaṅgulisaṅghaṭṭanapāṇippahāradānādīni karontā. Mamaññeva maññeti evamahaṃ maññāmi, mamaññeva anuhasanti, na aññanti.

    ཀསྨཱ པན ཏེ ཨེཝམཀཾསཱུཏི? ཏེ ཀིར ཨམྦཊྛསྶ ཀུལཝཾསཾ ཛཱནནྟི། ཨཡཉྩ ཏསྨིཾ སམཡེ ཡཱཝ པཱདནྟཱ ཨོལམྦེཏྭཱ ནིཝཏྠསཱཊཀསྶ ཨེཀེན ཧཏྠེན དུསྶཀཎྞཾ གཧེཏྭཱ ཁནྡྷཊྛིཀཾ ནཱམེཏྭཱ མཱནམདེན མཏྟོ ཝིཡ ཨཱགཙྪཏི། ཏཏོ – ‘‘པསྶཐ བྷོ ཨམྷཱཀཾ དཱསསྶ ཀཎྷཱཡནགོཏྟསྶ ཨམྦཊྛསྶ ཨཱགམནཀཱརཎ’’ནྟི ཝདནྟཱ ཨེཝམཀཾསུ། སོཔི ཨཏྟནོ ཀུལཝཾསཾ ཛཱནཱཏི། ཏསྨཱ ‘‘མམཉྙེཝ མཉྙེ’’ཏི ཏཀྐཡིཏྠ།

    Kasmā pana te evamakaṃsūti? Te kira ambaṭṭhassa kulavaṃsaṃ jānanti. Ayañca tasmiṃ samaye yāva pādantā olambetvā nivatthasāṭakassa ekena hatthena dussakaṇṇaṃ gahetvā khandhaṭṭhikaṃ nāmetvā mānamadena matto viya āgacchati. Tato – ‘‘passatha bho amhākaṃ dāsassa kaṇhāyanagottassa ambaṭṭhassa āgamanakāraṇa’’nti vadantā evamakaṃsu. Sopi attano kulavaṃsaṃ jānāti. Tasmā ‘‘mamaññeva maññe’’ti takkayittha.

    ཨཱསནེནཱཏི ‘‘ཨིདམཱསནཾ, ཨེཏྠ ནིསཱིདཱཧཱི’’ཏི ཨེཝཾ ཨཱསནེན ནིམནྟནཾ ནཱམ ཧོཏི, ཏཐཱ ན ཀོཙི ཨཀཱསི།

    Āsanenāti ‘‘idamāsanaṃ, ettha nisīdāhī’’ti evaṃ āsanena nimantanaṃ nāma hoti, tathā na koci akāsi.

    ཏཏིཡཨིབྦྷཝཱདཝཎྞནཱ

    Tatiyaibbhavādavaṇṇanā

    ༢༦༦. ལཊུཀིཀཱཏི ཁེཏྟལེཌྜཱུནཾ ཨནྟརེནིཝཱསིནཱི ཁུདྡཀསཀུཎིཀཱ། ཀུལཱཝཀེཏི ནིཝཱསནཊྛཱནེ། ཀཱམལཱཔིནཱིཏི ཡདིཙྪཀབྷཱཎིནཱི, ཡཾ ཡཾ ཨིཙྪཏི ཏཾ ཏཾ ལཔཏི, ན ཏཾ ཀོཙི ཧཾསོ ཝཱ ཀོཉྩོ ཝཱ མོརོ ཝཱ ཨཱགནྟྭཱ ‘‘ཀིཾ ཏྭཾ ལཔསཱི’ཏི ནིསེདྷེཏི། ཨབྷིསཛྫིཏུནྟི ཀོདྷཝསེན ལགྒིཏུཾ།

    266.Laṭukikāti khettaleḍḍūnaṃ antarenivāsinī khuddakasakuṇikā. Kulāvaketi nivāsanaṭṭhāne. Kāmalāpinīti yadicchakabhāṇinī, yaṃ yaṃ icchati taṃ taṃ lapati, na taṃ koci haṃso vā koñco vā moro vā āgantvā ‘‘kiṃ tvaṃ lapasī’ti nisedheti. Abhisajjitunti kodhavasena laggituṃ.

    ཨེཝཾ ཝུཏྟེ མཱཎཝོ – ‘‘ཨཡཾ སམཎོ གོཏམོ ཨཏྟནོ ཉཱཏཀེ ལཊུཀིཀསདིསེ ཀཏྭཱ ཨམྷེ ཧཾསཀོཉྩམོརསདིསེ ཀརོཏི, ནིམྨཱནོ དཱནི ཛཱཏོ’’ཏི མཉྙམཱནོ ཨུཏྟརི ཙཏྟཱརོ ཝཎྞེ དསྶེཏི།

    Evaṃ vutte māṇavo – ‘‘ayaṃ samaṇo gotamo attano ñātake laṭukikasadise katvā amhe haṃsakoñcamorasadise karoti, nimmāno dāni jāto’’ti maññamāno uttari cattāro vaṇṇe dasseti.

    དཱསིཔུཏྟཝཱདཝཎྞནཱ

    Dāsiputtavādavaṇṇanā

    ༢༦༧. ནིམྨཱདེཏཱིཏི ནིམྨདེཏི ནིམྨཱནེ ཀརོཏི། ཡཾནཱུནཱཧནྟི ཡདི པནཱཧཾ། ‘‘ཀཎྷཱཡནོཧམསྨི, བྷོ གོཏམཱ’’ཏི ཨིདཾ ཀིར ཝཙནཾ ཨམྦཊྛོ ཏིཀྑཏྟུཾ མཧཱསདྡེན ཨཝོཙ། ཀསྨཱ ཨཝོཙ? ཀིཾ ཨསུདྡྷབྷཱཝཾ ན ཛཱནཱཏཱིཏི? ཨཱམ ཛཱནཱཏི། ཛཱནནྟོཔི བྷཝཔཊིཙྪནྣམེཏཾ ཀཱརཎཾ, ཏཾ ཨནེན ན དིཊྛཾ། ཨཔསྶནྟོ མཧཱསམཎོ ཀིཾ ཝཀྑཏཱིཏི མཉྙམཱནོ མཱནཐདྡྷཏཱཡ ཨཝོཙ། མཱཏཱཔེཏྟིཀནྟི མཱཏཱཔིཏཱུནཾ སནྟཀཾ། ནཱམགོཏྟནྟི པཎྞཏྟིཝསེན ནཱམཾ, པཝེཎཱིཝསེན གོཏྟཾ། ཨནུསྶརཏོཏི ཨནུསྶརནྟསྶ ཀུལཀོཊིཾ སོདྷེནྟསྶ། ཨཡྻཔུཏྟཱཏི སཱམིནོ པུཏྟཱ། དཱསིཔུཏྟོཏི གྷརདཱསིཡཱཝ པུཏྟོ། ཏསྨཱ ཡཐཱ དཱསེན སཱམིནོ ཨུཔསངྐམིཏབྦཱ, ཨེཝཾ ཨནུཔསངྐམནྟཾ ཏཾ དིསྭཱ སཀྱཱ ཨནུཛགྒྷིཾསཱུཏི དསྶེཏི།

    267.Nimmādetīti nimmadeti nimmāne karoti. Yaṃnūnāhanti yadi panāhaṃ. ‘‘Kaṇhāyanohamasmi, bho gotamā’’ti idaṃ kira vacanaṃ ambaṭṭho tikkhattuṃ mahāsaddena avoca. Kasmā avoca? Kiṃ asuddhabhāvaṃ na jānātīti? Āma jānāti. Jānantopi bhavapaṭicchannametaṃ kāraṇaṃ, taṃ anena na diṭṭhaṃ. Apassanto mahāsamaṇo kiṃ vakkhatīti maññamāno mānathaddhatāya avoca. Mātāpettikanti mātāpitūnaṃ santakaṃ. Nāmagottanti paṇṇattivasena nāmaṃ, paveṇīvasena gottaṃ. Anussaratoti anussarantassa kulakoṭiṃ sodhentassa. Ayyaputtāti sāmino puttā. Dāsiputtoti gharadāsiyāva putto. Tasmā yathā dāsena sāmino upasaṅkamitabbā, evaṃ anupasaṅkamantaṃ taṃ disvā sakyā anujagghiṃsūti dasseti.

    ཨིཏོ པརཾ ཏསྶ དཱསབྷཱཝཾ སཀྱཱནཉྩ སཱམིབྷཱཝཾ པཀཱསེཏྭཱ ཨཏྟནོ ཙ ཨམྦཊྛསྶ ཙ ཀུལཝཾསཾ ཨཱཧརནྟོ སཀྱཱ ཁོ པནཱཏིཨཱདིམཱཧ། ཏཏྠ དཧནྟཱིཏི ཋཔེནྟི, ཨོཀྐཱཀོ ནོ པུབྦཔུརིསོཏི, ཨེཝཾ ཀརོནྟཱིཏི ཨཏྠོ། ཏསྶ ཀིར རཉྙོ ཀཐནཀཱལེ ཨུཀྐཱ ཝིཡ མུཁཏོ པབྷཱ ནིཙྪརཏི, ཏསྨཱ ཏཾ ‘‘ཨོཀྐཱཀོ’’ཏི སཉྫཱནིཾསཱུཏི། པབྦཱཛེསཱིཏི ནཱིཧརི།

    Ito paraṃ tassa dāsabhāvaṃ sakyānañca sāmibhāvaṃ pakāsetvā attano ca ambaṭṭhassa ca kulavaṃsaṃ āharanto sakyā kho panātiādimāha. Tattha dahantīti ṭhapenti, okkāko no pubbapurisoti, evaṃ karontīti attho. Tassa kira rañño kathanakāle ukkā viya mukhato pabhā niccharati, tasmā taṃ ‘‘okkāko’’ti sañjāniṃsūti. Pabbājesīti nīhari.

    ཨིདཱནི ཏེ ནཱམཝསེན དསྶེནྟོ – ‘‘ཨོཀྐཱམུཁ’’ནྟིཨཱདིམཱཧ། ཏཏྲཱཡཾ ཨནུཔུབྦཱི ཀཐཱ – པཋམཀཔྤིཀཱནཾ ཀིར རཉྙོ མཧཱསམྨཏསྶ རོཛོ ནཱམ པུཏྟོ ཨཧོསི། རོཛསྶ ཝརརོཛོ, ཝརརོཛསྶ ཀལྱཱཎོ, ཀལྱཱཎསྶ ཝརཀལྱཱཎོ, ཝརཀལྱཱཎསྶ མནྡྷཱཏཱ, མནྡྷཱཏུསྶ ཝརམནྡྷཱཏཱ , ཝརམནྡྷཱཏུསྶ ཨུཔོསཐོ, ཨུཔོསཐསྶ ཝརོ, ཝརསྶ ཨུཔཝརོ, ཨུཔཝརསྶ མགྷདེཝོ, མགྷདེཝསྶ པརམྤརཱཡ ཙཏུརཱསཱིཏིཁཏྟིཡསཧསྶཱནི ཨཧེསུཾ། ཏེསཾ པཙྪཏོ ཏཡོ ཨོཀྐཱཀཝཾསཱ ཨཧེསུཾ། ཏེསུ ཏཏིཡཨོཀྐཱཀསྶ པཉྩ མཧེསིཡོ ཨཧེསུཾ – ཧཏྠཱ, ཙིཏྟཱ, ཛནྟུ, ཛཱལིནཱི, ཝིསཱཁཱཏི། ཨེཀེཀིསྶཱ པཉྩཔཉྩཨིཏྠིསཏཔརིཝཱརཱ། སབྦཛེཊྛཱཡ ཙཏྟཱརོ པུཏྟཱ – ཨོཀྐཱམུཁོ, ཀརཀཎྜུ, ཧཏྠིནིཀོ, སིནིསཱུརོཏི། པཉྩ དྷཱིཏརོ – པིཡཱ, སུཔྤིཡཱ, ཨཱནནྡཱ, ཝིཛིཏཱ, ཝིཛིཏསེནཱཏི། ཨིཏི སཱ ནཝ པུཏྟེ ཝིཛཱཡིཏྭཱ ཀཱལམཀཱསི།

    Idāni te nāmavasena dassento – ‘‘okkāmukha’’ntiādimāha. Tatrāyaṃ anupubbī kathā – paṭhamakappikānaṃ kira rañño mahāsammatassa rojo nāma putto ahosi. Rojassa vararojo, vararojassa kalyāṇo, kalyāṇassa varakalyāṇo, varakalyāṇassa mandhātā, mandhātussa varamandhātā , varamandhātussa uposatho, uposathassa varo, varassa upavaro, upavarassa maghadevo, maghadevassa paramparāya caturāsītikhattiyasahassāni ahesuṃ. Tesaṃ pacchato tayo okkākavaṃsā ahesuṃ. Tesu tatiyaokkākassa pañca mahesiyo ahesuṃ – hatthā, cittā, jantu, jālinī, visākhāti. Ekekissā pañcapañcaitthisataparivārā. Sabbajeṭṭhāya cattāro puttā – okkāmukho, karakaṇḍu, hatthiniko, sinisūroti. Pañca dhītaro – piyā, suppiyā, ānandā, vijitā, vijitasenāti. Iti sā nava putte vijāyitvā kālamakāsi.

    ཨཐ རཱཛཱ ཨཉྙཾ དཧརིཾ ཨབྷིརཱུཔཾ རཱཛདྷཱིཏརཾ ཨཱནེཏྭཱ ཨགྒམཧེསིཊྛཱནེ ཋཔེསི། སཱ ཛནྟུཾ ནཱམ པུཏྟཾ ཝིཛཱཡི། ཨཐ ནཾ པཉྩམདིཝསེ ཨལངྐརིཏྭཱ རཉྙོ དསྶེསི། རཱཛཱ ཏུཊྛོ ཏསྶཱ ཝརཾ ཨདཱསི། སཱ ཉཱཏཀེཧི སདྡྷིཾ མནྟེཏྭཱ པུཏྟསྶ རཛྫཾ ཡཱཙི། རཱཛཱ – ‘‘ནསྶ, ཝསལི, མམ པུཏྟཱནཾ ཨནྟརཱཡཾ ཨིཙྪསཱི’’ཏི ཏཛྫེསི། སཱ པུནཔྤུནཾ རཧོ རཱཛཱནཾ པརིཏོསེཏྭཱ – ‘‘མཧཱརཱཛ, མུསཱཝཱདོ ནཱམ ན ཝཊྚཏཱི’’ཏིཨཱདཱིནི ཝཏྭཱ ཡཱཙཏིཡེཝ། ཨཐ རཱཛཱ པུཏྟེ ཨཱམནྟེསི – ‘‘ཨཧཾ ཏཱཏཱ, ཏུམྷཱཀཾ ཀནིཊྛཾ ཛནྟུཀུམཱརཾ དིསྭཱ ཏསྶ མཱཏུཡཱ སཧསཱ ཝརཾ ཨདཱསིཾ , སཱ པུཏྟསྶ རཛྫཾ པརིཎཱམེཏུཾ ཨིཙྪཏི། ཏུམྷེ ཋཔེཏྭཱ མངྒལཧཏྠིཾ མངྒལཨསྶཾ མངྒལརཐཉྩ ཡཏྟཀེ ཨིཙྪཐ, ཏཏྟཀེ ཧཏྠིཨསྶརཐེ གཧེཏྭཱ གཙྪཐ། མམཙྩཡེན ཨཱགནྟྭཱ རཛྫཾ ཀརེཡྻཱཐཱ’’ཏི, ཨཊྛཧི ཨམཙྩེཧི སདྡྷིཾ ཨུཡྻོཛེསི།

    Atha rājā aññaṃ dahariṃ abhirūpaṃ rājadhītaraṃ ānetvā aggamahesiṭṭhāne ṭhapesi. Sā jantuṃ nāma puttaṃ vijāyi. Atha naṃ pañcamadivase alaṅkaritvā rañño dassesi. Rājā tuṭṭho tassā varaṃ adāsi. Sā ñātakehi saddhiṃ mantetvā puttassa rajjaṃ yāci. Rājā – ‘‘nassa, vasali, mama puttānaṃ antarāyaṃ icchasī’’ti tajjesi. Sā punappunaṃ raho rājānaṃ paritosetvā – ‘‘mahārāja, musāvādo nāma na vaṭṭatī’’tiādīni vatvā yācatiyeva. Atha rājā putte āmantesi – ‘‘ahaṃ tātā, tumhākaṃ kaniṭṭhaṃ jantukumāraṃ disvā tassa mātuyā sahasā varaṃ adāsiṃ , sā puttassa rajjaṃ pariṇāmetuṃ icchati. Tumhe ṭhapetvā maṅgalahatthiṃ maṅgalaassaṃ maṅgalarathañca yattake icchatha, tattake hatthiassarathe gahetvā gacchatha. Mamaccayena āgantvā rajjaṃ kareyyāthā’’ti, aṭṭhahi amaccehi saddhiṃ uyyojesi.

    ཏེ ནཱནཔྤཀཱརཾ རོདིཏྭཱ ཀནྡིཏྭཱ – ‘‘ཏཱཏ, ཨམྷཱཀཾ དོསཾ ཁམཐཱ’’ཏི རཱཛཱནཉྩེཝ རཱཛོརོདྷེ ཙ ཁམཱཔེཏྭཱ, ‘‘མཡམྤི བྷཱཏཱུཧི སདྡྷིཾ གཙྪཱམཱ’’ཏི རཱཛཱནཾ ཨཱཔུཙྪིཏྭཱ ནགརཱ ནིཀྑནྟཱ བྷགིནིཡོ ཨཱདཱཡ ཙཏུརངྒིནིཡཱ སེནཱཡ པརིཝུཏཱ ནགརཱ ནིཀྑམིཾསུ། ‘‘ཀུམཱརཱ པིཏུཨཙྩཡེན ཨཱགནྟྭཱ རཛྫཾ ཀཱརེསྶནྟི, གཙྪཱམ ནེ ཨུཔཊྛཧཱམཱ’’ཏི ཙིནྟེཏྭཱ བཧཱུ མནུསྶཱ ཨནུབནྡྷིཾསུ། པཋམདིཝསེ ཡོཛནམཏྟཱ སེནཱ ཨཧོསི, དུཏིཡེ དྭིཡོཛནམཏྟཱ, ཏཏིཡེ ཏིཡོཛནམཏྟཱ། ཀུམཱརཱ མནྟཡིཾསུ – ‘‘མཧཱ བལཀཱཡོ, སཙེ མཡཾ ཀཉྩི སཱམནྟརཱཛཱནཾ མདྡིཏྭཱ ཛནཔདཾ གཎྷེཡྻཱམ, སོཔི ནོ ནཔྤསཧེཡྻ། ཀིཾ པརེསཾ པཱིལཱ༹ཡ ཀཏཱཡ, མཧཱ ཨཡཾ ཛམྦུདཱིཔོ, ཨརཉྙེ ནགརཾ མཱཔེསྶཱམཱ’’ཏི ཧིམཝནྟཱབྷིམུཁཱ གནྟྭཱ ནགརཝཏྠུཾ པརིཡེསིཾསུ།

    Te nānappakāraṃ roditvā kanditvā – ‘‘tāta, amhākaṃ dosaṃ khamathā’’ti rājānañceva rājorodhe ca khamāpetvā, ‘‘mayampi bhātūhi saddhiṃ gacchāmā’’ti rājānaṃ āpucchitvā nagarā nikkhantā bhaginiyo ādāya caturaṅginiyā senāya parivutā nagarā nikkhamiṃsu. ‘‘Kumārā pituaccayena āgantvā rajjaṃ kāressanti, gacchāma ne upaṭṭhahāmā’’ti cintetvā bahū manussā anubandhiṃsu. Paṭhamadivase yojanamattā senā ahosi, dutiye dviyojanamattā, tatiye tiyojanamattā. Kumārā mantayiṃsu – ‘‘mahā balakāyo, sace mayaṃ kañci sāmantarājānaṃ madditvā janapadaṃ gaṇheyyāma, sopi no nappasaheyya. Kiṃ paresaṃ pīḷāya katāya, mahā ayaṃ jambudīpo, araññe nagaraṃ māpessāmā’’ti himavantābhimukhā gantvā nagaravatthuṃ pariyesiṃsu.

    ཏསྨིཉྩ སམཡེ ཨམྷཱཀཾ བོདྷིསཏྟོ བྲཱཧྨཎམཧཱསཱལཀུལེ ནིབྦཏྟིཏྭཱ ཀཔིལབྲཱཧྨཎོ ནཱམ ཧུཏྭཱ ནིཀྑམྨ ཨིསིཔབྦཛྫཾ པབྦཛིཏྭཱ ཧིམཝནྟཔསྶེ པོཀྑརཎིཡཱ ཏཱིརེ སཱཀཝནསཎྜེ པཎྞསཱལཾ མཱཔེཏྭཱ ཝསཏི། སོ ཀིར བྷུམྨཛཱལཾ ནཱམ ཝིཛྫཾ ཛཱནཱཏི, ཡཱཡ ཨུདྡྷཾ ཨསཱིཏིཧཏྠེ ཨཱཀཱསེ, ཧེཊྛཱ ཙ བྷཱུམིཡམྤི གུཎདོསཾ པསྶཏི། ཨེཏསྨིཾ པདེསེ ཏིཎགུམྦལཏཱ དཀྑིཎཱཝཊྚཱ པཱཙཱིནཱབྷིམུཁཱ ཛཱཡནྟི། སཱིཧབྱགྒྷཱདཡོ མིགསཱུཀརེ སཔྤབིལཱ༹རཱ ཙ མཎྜཱུཀམཱུསིཀེ ཨནུབནྡྷམཱནཱ ཏཾ པདེསཾ པཏྭཱ ན སཀྐོནྟི ཏེ ཨནུབནྡྷིཏུཾ། ཏེཧི ཏེ ཨཉྙདཏྠུ སནྟཛྫིཏཱ ནིཝཏྟནྟིཡེཝ། སོ – ‘‘ཨཡཾ པཐཝིཡཱ ཨགྒཔདེསོ’’ཏི ཉཏྭཱ ཏཏྠ ཨཏྟནོ པཎྞསཱལཾ མཱཔེསི།

    Tasmiñca samaye amhākaṃ bodhisatto brāhmaṇamahāsālakule nibbattitvā kapilabrāhmaṇo nāma hutvā nikkhamma isipabbajjaṃ pabbajitvā himavantapasse pokkharaṇiyā tīre sākavanasaṇḍe paṇṇasālaṃ māpetvā vasati. So kira bhummajālaṃ nāma vijjaṃ jānāti, yāya uddhaṃ asītihatthe ākāse, heṭṭhā ca bhūmiyampi guṇadosaṃ passati. Etasmiṃ padese tiṇagumbalatā dakkhiṇāvaṭṭā pācīnābhimukhā jāyanti. Sīhabyagghādayo migasūkare sappabiḷārā ca maṇḍūkamūsike anubandhamānā taṃ padesaṃ patvā na sakkonti te anubandhituṃ. Tehi te aññadatthu santajjitā nivattantiyeva. So – ‘‘ayaṃ pathaviyā aggapadeso’’ti ñatvā tattha attano paṇṇasālaṃ māpesi.

    ཨཐ ཏེ ཀུམཱརེ ནགརཝཏྠུཾ པརིཡེསམཱནེ ཨཏྟནོ ཝསནོཀཱསཾ ཨཱགཏེ དིསྭཱ པུཙྪིཏྭཱ ཏཾ པཝཏྟིཾ ཉཏྭཱ ཏེསུ ཨནུཀམྤཾ ཛནེཏྭཱ ཨཝོཙ – ‘‘ཨིམསྨིཾ པཎྞསཱལཊྛཱནེ མཱཔིཏཾ ནགརཾ ཛམྦུདཱིཔེ ཨགྒནགརཾ བྷཝིསྶཏི། ཨེཏྠ ཛཱཏཔུརིསེསུ ཨེཀེཀོ པུརིསསཏམྤི པུརིསསཧསྶམྤི ཨབྷིབྷཝིཏུཾ སཀྑིསྶཏི། ཨེཏྠ ནགརཾ མཱཔེཐ, པཎྞསཱལཊྛཱནེ རཉྙོ གྷརཾ ཀརོཐ། ཨིམསྨིཉྷི ཨོཀཱསེ ཋཏྭཱ ཙཎྜཱལཔུཏྟོཔི ཙཀྐཝཏྟིབལེན ཨཏིསེཡྻོ’’ཏི། ནནུ, བྷནྟེ, ཨཡྻསྶ ཝསནོཀཱསོཏི? ‘‘མམ ཝསནོཀཱསོ’’ཏི མཱ ཙིནྟཡིཏྠ། མཡ྄ཧཾ ཨེཀཔསྶེ པཎྞསཱལཾ ཀཏྭཱ ནགརཾ མཱཔེཏྭཱ ཀཔིལཝཏྠུནྟི ནཱམཾ ཀརོཐཱ’’ཏི། ཏེ ཏཐཱ ཀཏྭཱ ཏཏྠ ནིཝཱསཾ ཀཔྤེསུཾ།

    Atha te kumāre nagaravatthuṃ pariyesamāne attano vasanokāsaṃ āgate disvā pucchitvā taṃ pavattiṃ ñatvā tesu anukampaṃ janetvā avoca – ‘‘imasmiṃ paṇṇasālaṭṭhāne māpitaṃ nagaraṃ jambudīpe agganagaraṃ bhavissati. Ettha jātapurisesu ekeko purisasatampi purisasahassampi abhibhavituṃ sakkhissati. Ettha nagaraṃ māpetha, paṇṇasālaṭṭhāne rañño gharaṃ karotha. Imasmiñhi okāse ṭhatvā caṇḍālaputtopi cakkavattibalena atiseyyo’’ti. Nanu, bhante, ayyassa vasanokāsoti? ‘‘Mama vasanokāso’’ti mā cintayittha. Mayhaṃ ekapasse paṇṇasālaṃ katvā nagaraṃ māpetvā kapilavatthunti nāmaṃ karothā’’ti. Te tathā katvā tattha nivāsaṃ kappesuṃ.

    ཨཐཱམཙྩཱ – ‘‘ཨིམེ དཱརཀཱ ཝཡཔྤཏྟཱ, སཙེ ནེསཾ པིཏཱ སནྟིཀེ བྷཝེཡྻ, སོ ཨཱཝཱཧཝིཝཱཧཾ ཀརེཡྻ། ཨིདཱནི པན ཨམྷཱཀཾ བྷཱརོ’’ཏི ཙིནྟེཏྭཱ ཀུམཱརེཧི སདྡྷིཾ མནྟཡིཾསུ། ཀུམཱརཱ ཨམྷཱཀཾ སདིསཱ ཁཏྟིཡདྷཱིཏརོ ནཱམ ན པསྶཱམ, ནཱཔི བྷགིནཱིནཾ སདིསེ ཁཏྟིཡཀུམཱརཀེ, ཨསདིསསཾཡོགེ ཙ ནོ ཨུཔྤནྣཱ པུཏྟཱ མཱཏིཏོ ཝཱ པིཏིཏོ ཝཱ ཨཔརིསུདྡྷཱ ཛཱཏིསམྦྷེདཾ པཱཔུཎིསྶནྟི། ཏསྨཱ མཡཾ བྷགིནཱིཧིཡེཝ སདྡྷིཾ སཾཝཱསཾ རོཙེམཱཏི། ཏེ ཛཱཏིསམྦྷེདབྷཡེན ཛེཊྛཀབྷགིནིཾ མཱཏུཊྛཱནེ ཋཔེཏྭཱ ཨཝསེསཱཧི སཾཝཱསཾ ཀཔྤེསུཾ།

    Athāmaccā – ‘‘ime dārakā vayappattā, sace nesaṃ pitā santike bhaveyya, so āvāhavivāhaṃ kareyya. Idāni pana amhākaṃ bhāro’’ti cintetvā kumārehi saddhiṃ mantayiṃsu. Kumārā amhākaṃ sadisā khattiyadhītaro nāma na passāma, nāpi bhaginīnaṃ sadise khattiyakumārake, asadisasaṃyoge ca no uppannā puttā mātito vā pitito vā aparisuddhā jātisambhedaṃ pāpuṇissanti. Tasmā mayaṃ bhaginīhiyeva saddhiṃ saṃvāsaṃ rocemāti. Te jātisambhedabhayena jeṭṭhakabhaginiṃ mātuṭṭhāne ṭhapetvā avasesāhi saṃvāsaṃ kappesuṃ.

    ཏེསཾ པུཏྟེཧི ཙ དྷཱིཏཱཧི ཙ ཝཌྜྷམཱནཱནཾ ཨཔརེན སམཡེན ཛེཊྛཀབྷགིནིཡཱ ཀུཊྛརོགོ ཨུདཔཱདི, ཀོཝིལཱ༹རཔུཔྥསདིསཱནི གཏྟཱནི ཨཧེསུཾ། རཱཛཀུམཱརཱ ཨིམཱཡ སདྡྷིཾ ཨེཀཏོ ནིསཛྫཊྛཱནབྷོཛནཱདཱིནི ཀརོནྟཱནམྤི ཨུཔརི ཨཡཾ རོགོ སངྐམཏཱིཏི ཙིནྟེཏྭཱ ཨེཀདིཝསཾ ཨུཡྻཱནཀཱིལ༹ཾ གཙྪནྟཱ ཝིཡ ཏཾ ཡཱནེ ཨཱརོཔེཏྭཱ ཨརཉྙཾ པཝིསིཏྭཱ བྷཱུམིཡཾ པོཀྑརཎིཾ ཁཎཱཔེཏྭཱ ཏཏྠ ཁཱདནཱིཡབྷོཛནཱིཡེན སདྡྷིཾ ཏཾ པཀྑིཔིཏྭཱ གྷརསངྑེཔེན ཨུཔརི པདརཾ པཊིཙྪཱདེཏྭཱ པཾསུཾ དཏྭཱ པཀྐམིཾསུ།

    Tesaṃ puttehi ca dhītāhi ca vaḍḍhamānānaṃ aparena samayena jeṭṭhakabhaginiyā kuṭṭharogo udapādi, koviḷārapupphasadisāni gattāni ahesuṃ. Rājakumārā imāya saddhiṃ ekato nisajjaṭṭhānabhojanādīni karontānampi upari ayaṃ rogo saṅkamatīti cintetvā ekadivasaṃ uyyānakīḷaṃ gacchantā viya taṃ yāne āropetvā araññaṃ pavisitvā bhūmiyaṃ pokkharaṇiṃ khaṇāpetvā tattha khādanīyabhojanīyena saddhiṃ taṃ pakkhipitvā gharasaṅkhepena upari padaraṃ paṭicchādetvā paṃsuṃ datvā pakkamiṃsu.

    ཏེན ཙ སམཡེན རཱམོ ནཱམ བཱརཱཎསིརཱཛཱ ཀུཊྛརོགོ ནཱཊཀིཏྠཱིཧི ཙ ཨོརོདྷེཧི ཙ ཛིགུཙྪིཡམཱནོ ཏེན སཾཝེགེན ཛེཊྛཔུཏྟསྶ རཛྫཾ དཏྭཱ ཨརཉྙཾ པཝིསིཏྭཱ ཏཏྠ པཎྞསཱལཾ མཱཔེཏྭཱ མཱུལཕལཱནི པརིབྷུཉྫནྟོ ནཙིརསྶེཝ ཨརོགོ སུཝཎྞཝཎྞོ ཧུཏྭཱ ཨིཏོ ཙིཏོ ཙ ཝིཙརནྟོ མཧནྟཾ སུསིརརུཀྑཾ དིསྭཱ ཏསྶབྦྷནྟརེ སོལ༹སཧཏྠཔྤམཱཎཾ ཨོཀཱསཾ སོདྷེཏྭཱ དྭཱརཉྩ ཝཱཏཔཱནཉྩ ཡོཛེཏྭཱ ནིསྶེཎིཾ བནྡྷིཏྭཱ ཏཏྠ ཝཱསཾ ཀཔྤེསི། སོ ཨངྒཱརཀཊཱཧེ ཨགྒིཾ ཀཏྭཱ རཏྟིཾ མིགསཱུཀརཱདཱིནཾ སདྡེ སུཎནྟོ སཡཏི། སོ – ‘‘ཨསུཀསྨིཾ པདེསེ སཱིཧོ སདྡམཀཱསི, ཨསུཀསྨིཾ བྱགྒྷོ’’ཏི སལླཀྑེཏྭཱ པབྷཱཏེ ཏཏྠ གནྟྭཱ ཝིགྷཱསམཾསཾ ཨཱདཱཡ པཙིཏྭཱ ཁཱདཏི།

    Tena ca samayena rāmo nāma bārāṇasirājā kuṭṭharogo nāṭakitthīhi ca orodhehi ca jigucchiyamāno tena saṃvegena jeṭṭhaputtassa rajjaṃ datvā araññaṃ pavisitvā tattha paṇṇasālaṃ māpetvā mūlaphalāni paribhuñjanto nacirasseva arogo suvaṇṇavaṇṇo hutvā ito cito ca vicaranto mahantaṃ susirarukkhaṃ disvā tassabbhantare soḷasahatthappamāṇaṃ okāsaṃ sodhetvā dvārañca vātapānañca yojetvā nisseṇiṃ bandhitvā tattha vāsaṃ kappesi. So aṅgārakaṭāhe aggiṃ katvā rattiṃ migasūkarādīnaṃ sadde suṇanto sayati. So – ‘‘asukasmiṃ padese sīho saddamakāsi, asukasmiṃ byaggho’’ti sallakkhetvā pabhāte tattha gantvā vighāsamaṃsaṃ ādāya pacitvā khādati.

    ཨཐེཀདིཝསཾ ཏསྨིཾ པཙྩཱུསསམཡེ ཨགྒིཾ ཛཱལེཏྭཱ ནིསིནྣེ རཱཛདྷཱིཏཱཡ སརཱིརགནྡྷེན ཨཱགནྟྭཱ བྱགྒྷོ ཏསྨིཾ པདེསེ པཾསུཾ ཝིཡཱུཧནྟོ པདརེ ཝིཝརམཀཱསི, ཏེན ཙ ཝིཝརེན སཱ བྱགྒྷཾ དིསྭཱ བྷཱིཏཱ ཝིསྶརམཀཱསི། སོ ཏཾ སདྡཾ སུཏྭཱ – ‘‘ཨིཏྠིསདྡོ ཨེསོ’’ཏི ཙ སལླཀྑེཏྭཱ པཱཏོཝ ཏཏྠ གནྟྭཱ – ‘‘ཀོ ཨེཏྠཱ’’ཏི ཨཱཧ། མཱཏུགཱམོ སཱམཱིཏི། ཀིཾ ཛཱཏིཀཱསཱིཏི? ཨོཀྐཱཀམཧཱརཱཛསྶ དྷཱིཏཱ སཱམཱིཏི། ནིཀྑམཱཏི? ན སཀྐཱ སཱམཱིཏི། ཀིཾ ཀཱརཎཱཏི? ཚཝིརོགོ མེ ཨཏྠཱིཏི། སོ སབྦཾ པཝཏྟིཾ པུཙྪིཏྭཱ ཁཏྟིཡམཱནེན ཨནིཀྑམནྟིཾ – ‘‘ཨཧམྤི ཁཏྟིཡོ’’ཏི ཨཏྟནོ ཁཏྟིཡབྷཱཝཾ ཛཱནཱཔེཏྭཱ ནིསྶེཎིཾ དཏྭཱ ཨུདྡྷརིཏྭཱ ཨཏྟནོ ཝསནོཀཱསཾ ནེཏྭཱ སཡཾ པརིབྷུཏྟབྷེསཛྫཱནིཡེཝ དཏྭཱ ནཙིརསྶེཝ ཨརོགཾ སུཝཎྞཝཎྞཾ ཀཏྭཱ ཏཱཡ སདྡྷིཾ སཾཝཱསཾ ཀཔྤེསི། སཱ པཋམསཾཝཱསེནེཝ གབྦྷཾ གཎྷིཏྭཱ དྭེ པུཏྟེ ཝིཛཱཡི, པུནཔི དྭེཏི, ཨེཝཾ སོལ༹སཀྑཏྟུམྤི ཝིཛཱཡི། ཨེཝཾ དྭཏྟིཾས བྷཱཏརོ ཨཧེསུཾ། ཏེ ཨནུཔུབྦེན ཝུཌྜྷིཔྤཏྟེ པིཏཱ སབྦསིཔྤཱནི སིཀྑཱཔེསི།

    Athekadivasaṃ tasmiṃ paccūsasamaye aggiṃ jāletvā nisinne rājadhītāya sarīragandhena āgantvā byaggho tasmiṃ padese paṃsuṃ viyūhanto padare vivaramakāsi, tena ca vivarena sā byagghaṃ disvā bhītā vissaramakāsi. So taṃ saddaṃ sutvā – ‘‘itthisaddo eso’’ti ca sallakkhetvā pātova tattha gantvā – ‘‘ko etthā’’ti āha. Mātugāmo sāmīti. Kiṃ jātikāsīti? Okkākamahārājassa dhītā sāmīti. Nikkhamāti? Na sakkā sāmīti. Kiṃ kāraṇāti? Chavirogo me atthīti. So sabbaṃ pavattiṃ pucchitvā khattiyamānena anikkhamantiṃ – ‘‘ahampi khattiyo’’ti attano khattiyabhāvaṃ jānāpetvā nisseṇiṃ datvā uddharitvā attano vasanokāsaṃ netvā sayaṃ paribhuttabhesajjāniyeva datvā nacirasseva arogaṃ suvaṇṇavaṇṇaṃ katvā tāya saddhiṃ saṃvāsaṃ kappesi. Sā paṭhamasaṃvāseneva gabbhaṃ gaṇhitvā dve putte vijāyi, punapi dveti, evaṃ soḷasakkhattumpi vijāyi. Evaṃ dvattiṃsa bhātaro ahesuṃ. Te anupubbena vuḍḍhippatte pitā sabbasippāni sikkhāpesi.

    ཨཐེཀདིཝསཾ ཨེཀོ རཱམརཉྙོ ནགརཝཱསཱི ཝནཙརཀོ པབྦཏེ རཏནཱནི གཝེསནྟོ རཱཛཱནཾ དིསྭཱ སཉྫཱནིཏྭཱ ཨཱཧ – ‘‘ཛཱནཱམཧཾ, དེཝ, ཏུམྷེ’’ཏི། ཏཏོ ནཾ རཱཛཱ སབྦཾ པཝཏྟིཾ པུཙྪི། ཏསྨིཾཡེཝ ཙ ཁཎེ ཏེ དཱརཀཱ ཨཱགམིཾསུ། སོ ཏེ དིསྭཱ – ‘‘ཀེ ཨིམེ’’ཏི ཨཱཧ། ‘‘པུཏྟཱ མེ’’ཏི ཙ ཝུཏྟེ ཏེསཾ མཱཏིཀཝཾསཾ པུཙྪིཏྭཱ – ‘‘ལདྡྷཾ དཱནི མེ པཱབྷཏ’’ནྟི ནགརཾ གནྟྭཱ རཉྙོ ཨཱརོཙེསི། སོ ‘པིཏརཾ ཨཱནཡིསྶཱམཱི’ཏི ཙཏུརངྒིནིཡཱ སེནཱཡ ཏཏྠ གནྟྭཱ པིཏརཾ ཝནྡིཏྭཱ – ‘‘རཛྫཾ, དེཝ, སམྤཊིཙྪཱ’’ཏི ཡཱཙི། སོ – ‘‘ཨལཾ, ཏཱཏ, ན ཏཏྠ གཙྪཱམི, ཨིདྷེཝ མེ ཨིམཾ རུཀྑཾ ཨཔནེཏྭཱ ནགརཾ མཱཔེཧཱི’’ཏི ཨཱཧ། སོ ཏཐཱ ཀཏྭཱ ཏསྶ ནགརསྶ ཀོལརུཀྑཾ ཨཔནེཏྭཱ ཀཏཏྟཱ ཀོལནགརནྟི ཙ བྱགྒྷཔཐེ ཀཏཏྟཱ བྱགྒྷཔཐནྟི ཙཱཏི དྭེ ནཱམཱནི ཨཱརོཔེཏྭཱ པིཏརཾ ཝནྡིཏྭཱ ཨཏྟནོ ནགརཾ ཨགམཱསི།

    Athekadivasaṃ eko rāmarañño nagaravāsī vanacarako pabbate ratanāni gavesanto rājānaṃ disvā sañjānitvā āha – ‘‘jānāmahaṃ, deva, tumhe’’ti. Tato naṃ rājā sabbaṃ pavattiṃ pucchi. Tasmiṃyeva ca khaṇe te dārakā āgamiṃsu. So te disvā – ‘‘ke ime’’ti āha. ‘‘Puttā me’’ti ca vutte tesaṃ mātikavaṃsaṃ pucchitvā – ‘‘laddhaṃ dāni me pābhata’’nti nagaraṃ gantvā rañño ārocesi. So ‘pitaraṃ ānayissāmī’ti caturaṅginiyā senāya tattha gantvā pitaraṃ vanditvā – ‘‘rajjaṃ, deva, sampaṭicchā’’ti yāci. So – ‘‘alaṃ, tāta, na tattha gacchāmi, idheva me imaṃ rukkhaṃ apanetvā nagaraṃ māpehī’’ti āha. So tathā katvā tassa nagarassa kolarukkhaṃ apanetvā katattā kolanagaranti ca byagghapathe katattā byagghapathanti cāti dve nāmāni āropetvā pitaraṃ vanditvā attano nagaraṃ agamāsi.

    ཏཏོ ཝཡཔྤཏྟེ ཀུམཱརེ མཱཏཱ ཨཱཧ – ‘‘ཏཱཏཱ, ཏུམྷཱཀཾ ཀཔིལཝཏྠུཝཱསིནོ སཀྱཱ མཱཏུལཱ སནྟི། མཱཏུལདྷཱིཏཱནཾ པན ཝོ ཨེཝརཱུཔཾ ནཱམ ཀེསགྒཧཎཾ ཧོཏི, ཨེཝརཱུཔཾ དུསྶགཧཎཾ། ཡདཱ ཏཱ ནྷཱནཏིཏྠཾ ཨཱགཙྪནྟི, ཏདཱ གནྟྭཱ ཡསྶ ཡཱ རུཙྩཏི, སོ ཏཾ གཎྷཏཱུ’’ཏི། ཏེ ཏཐེཝ གནྟྭཱ ཏཱསུ ནྷཏྭཱ སཱིསཾ སུཀྑཱཔཡམཱནཱསུ ཡཾ ཡཾ ཨིཙྪིཾསུ, ཏཾ ཏཾ གཧེཏྭཱ ནཱམཾ སཱཝེཏྭཱ ཨགམིཾསུ། སཀྱརཱཛཱནོ སུཏྭཱ ‘‘ཧོཏུ, བྷཎེ, ཨམྷཱཀཾ ཉཱཏཀཱ ཨེཝ ཏེ’’ཏི ཏུཎྷཱི ཨཧེསུཾ། ཨཡཾ སཀྱཀོལིཡཱནཾ ཨུཔྤཏྟི། ཨེཝཾ ཏེསཾ སཀྱཀོལིཡཱནཾ ཨཉྙམཉྙཾ ཨཱཝཱཧཝིཝཱཧཾ ཀརོནྟཱནཾ ཡཱཝ བུདྡྷཀཱལཱ ཨནུཔཙྪིནྣོཝ ཝཾསོ ཨཱགཏོ། ཏཏྠ བྷགཝཱ སཀྱཝཾསཾ དསྶེཏུཾ – ‘‘ཏེ རཊྛསྨཱ པབྦཱཛིཏཱ ཧིམཝནྟཔསྶེ པོཀྑརཎིཡཱ ཏཱིརེ’’ཏིཨཱདིམཱཧ། ཏཏྠ སམྨནྟཱིཏི ཝསནྟི། སཀྱཱ ཝཏ བྷོཏི རཊྛསྨཱ པབྦཱཛིཏཱ ཨརཉྙེ ཝསནྟཱཔི ཛཱཏིསམྦྷེདམཀཏྭཱ ཀུལཝཾསཾ ཨནུརཀྑིཏུཾ སཀྱཱ, སམཏྠཱ, པཊིབལཱཏི ཨཏྠོ། ཏདགྒེཏི ཏཾ ཨགྒཾ ཀཏྭཱ, ཏཏོ པཊྛཱཡཱཏི ཨཏྠོ། སོ ཙ ནེསཾ པུབྦཔུརིསོཏི སོ ཨོཀྐཱཀོ རཱཛཱ ཨེཏེསཾ པུབྦཔུརིསོ། ནཏྠི ཨེཏེསཾ གཧཔཏིཝཾསེན སམྦྷེདམཏྟམྤཱིཏི།

    Tato vayappatte kumāre mātā āha – ‘‘tātā, tumhākaṃ kapilavatthuvāsino sakyā mātulā santi. Mātuladhītānaṃ pana vo evarūpaṃ nāma kesaggahaṇaṃ hoti, evarūpaṃ dussagahaṇaṃ. Yadā tā nhānatitthaṃ āgacchanti, tadā gantvā yassa yā ruccati, so taṃ gaṇhatū’’ti. Te tatheva gantvā tāsu nhatvā sīsaṃ sukkhāpayamānāsu yaṃ yaṃ icchiṃsu, taṃ taṃ gahetvā nāmaṃ sāvetvā agamiṃsu. Sakyarājāno sutvā ‘‘hotu, bhaṇe, amhākaṃ ñātakā eva te’’ti tuṇhī ahesuṃ. Ayaṃ sakyakoliyānaṃ uppatti. Evaṃ tesaṃ sakyakoliyānaṃ aññamaññaṃ āvāhavivāhaṃ karontānaṃ yāva buddhakālā anupacchinnova vaṃso āgato. Tattha bhagavā sakyavaṃsaṃ dassetuṃ – ‘‘te raṭṭhasmā pabbājitā himavantapasse pokkharaṇiyā tīre’’tiādimāha. Tattha sammantīti vasanti. Sakyā vata bhoti raṭṭhasmā pabbājitā araññe vasantāpi jātisambhedamakatvā kulavaṃsaṃ anurakkhituṃ sakyā, samatthā, paṭibalāti attho. Tadaggeti taṃ aggaṃ katvā, tato paṭṭhāyāti attho. So ca nesaṃ pubbapurisoti so okkāko rājā etesaṃ pubbapuriso. Natthi etesaṃ gahapativaṃsena sambhedamattampīti.

    ཨེཝཾ སཀྱཝཾསཾ པཀཱསེཏྭཱ ཨིདཱནི ཨམྦཊྛཝཾསཾ པཀཱསེནྟོ – ‘‘རཉྙོ ཁོ པནཱ’’ཏིཨཱདིམཱཧ། ཀཎྷཾ ནཱམ ཛནེསཱིཏི ཀཱལ༹ཝཎྞཾ ཨནྟོཀུཙྪིཡཾཡེཝ སཉྫཱཏདནྟཾ པརཱུལ༹ྷམསྶུདཱཋིཀཾ པུཏྟཾ ཝིཛཱཡི། པབྱཱཧཱསཱིཏི ཡཀྑོ ཛཱཏོཏི བྷཡེན པལཱཡིཏྭཱ དྭཱརཾ པིདྷཱཡ ཋིཏེསུ གྷརམཱནུསཀེསུ ཨིཏོ ཙིཏོ ཙ ཝིཙརནྟོ དྷོཝཐ མནྟིཨཱདཱིནི ཝདནྟོ ཨུཙྩཱསདྡམཀཱསི།

    Evaṃ sakyavaṃsaṃ pakāsetvā idāni ambaṭṭhavaṃsaṃ pakāsento – ‘‘rañño kho panā’’tiādimāha. Kaṇhaṃnāma janesīti kāḷavaṇṇaṃ antokucchiyaṃyeva sañjātadantaṃ parūḷhamassudāṭhikaṃ puttaṃ vijāyi. Pabyāhāsīti yakkho jātoti bhayena palāyitvā dvāraṃ pidhāya ṭhitesu gharamānusakesu ito cito ca vicaranto dhovatha mantiādīni vadanto uccāsaddamakāsi.

    ༢༦༨. ཏེ མཱཎཝཀཱ བྷགཝནྟཾ ཨེཏདཝོཙུནྟི ཨཏྟནོ ཨུཔཱརམྦྷམོཙནཏྠཱཡ – ‘‘ཨེཏཾ མཱ བྷཝ’’ནྟིཨཱདིཝཙནཾ ཨཝོཙུཾ། ཏེསཾ ཀིར ཨེཏདཧོསི – ‘‘ཨམྦཊྛོ ཨམྷཱཀཾ ཨཱཙརིཡསྶ ཛེཊྛནྟེཝཱསཱི, སཙེ མཡཾ ཨེཝརཱུཔེ ཋཱནེ ཨེཀདྭེཝཙནམཏྟམྤི ན ཝཀྑཱམ, ཨཡཾ ནོ ཨཱཙརིཡསྶ སནྟིཀེ ཨམྷེ པརིབྷིནྡིསྶཏཱི’’ཏི ཨུཔཱརམྦྷམོཙནཏྠཾ ཨེཝཾ ཨཝོཙུཾ། ཙིཏྟེན པནསྶ ནིམྨདབྷཱཝཾ ཨཱཀངྑནྟི། ཨཡཾ ཀིར མཱནནིསྶིཏཏྟཱ ཏེསམྤི ཨཔྤིཡོཝ། ཀལྱཱཎཝཱཀྐརཎོཏི མདྷུརཝཙནོ། ཨསྨིཾ ཝཙནེཏི ཨཏྟནཱ ཨུགྒཧིཏེ ཝེདཏྟཡཝཙནེ། པཊིམནྟེཏུནྟི པུཙྪིཏཾ པཉྷཾ པཊིཀཐེཏུཾ, ཝིསྶཛྫེཏུནྟི ཨཏྠོ། ཨེཏསྨིཾ ཝཱ དཱསིཔུཏྟཝཙནེ། པཊིམནྟེཏུནྟི ཨུཏྟརཾ ཀཐེཏུཾ།

    268.Temāṇavakā bhagavantaṃ etadavocunti attano upārambhamocanatthāya – ‘‘etaṃ mā bhava’’ntiādivacanaṃ avocuṃ. Tesaṃ kira etadahosi – ‘‘ambaṭṭho amhākaṃ ācariyassa jeṭṭhantevāsī, sace mayaṃ evarūpe ṭhāne ekadvevacanamattampi na vakkhāma, ayaṃ no ācariyassa santike amhe paribhindissatī’’ti upārambhamocanatthaṃ evaṃ avocuṃ. Cittena panassa nimmadabhāvaṃ ākaṅkhanti. Ayaṃ kira mānanissitattā tesampi appiyova. Kalyāṇavākkaraṇoti madhuravacano. Asmiṃ vacaneti attanā uggahite vedattayavacane. Paṭimantetunti pucchitaṃ pañhaṃ paṭikathetuṃ, vissajjetunti attho. Etasmiṃ vā dāsiputtavacane. Paṭimantetunti uttaraṃ kathetuṃ.

    ༢༦༩. ཨཐ ཁོ བྷགཝཱཏི ཨཐ ཁོ བྷགཝཱ – ‘‘སཙེ ཨིམེ མཱཎཝཀཱ ཨེཏྠ ནིསིནྣཱ ཨེཝཾ ཨུཙྩཱསདྡཾ ཀརིསྶནྟི, ཨཡཾ ཀཐཱ པརིཡོསཱནཾ ན གམིསྶཏི། ཧནྡ, ནེ ནིསྶདྡེ ཀཏྭཱ ཨམྦཊྛེནེཝ སདྡྷིཾ ཀཐེམཱི’’ཏི ཏེ མཱཎཝཀེ ཨེཏདཝོཙ། ཏཏྠ མནྟཝ྄ཧོཏི མནྟཡཐ། མཡཱ སདྡྷིཾ པཊིམནྟེཏཱུཏི མཡཱ སཧ ཀཐེཏུ། ཨེཝཾ ཝུཏྟེ མཱཎཝཀཱ ཙིནྟཡིཾསུ – ‘‘ཨམྦཊྛོ ཏཱཝ དཱསིཔུཏྟོསཱིཏི ཝུཏྟེ པུན སཱིསཾ ཨུཀྑིཔིཏུཾ ནཱསཀྑི། ཨཡཾ ཁོ ཛཱཏི ནཱམ དུཛྫཱནཱ, སཙེ ཨཉྙམྤི ཀིཉྩི སམཎོ གོཏམོ ‘ཏྭཾ དཱསོ’ཏི ཝཀྑཏི, ཀོ ཏེན སདྡྷིཾ ཨཌྜཾ ཀརིསྶཏི། ཨམྦཊྛོ ཨཏྟནཱ བདྡྷཾ པུཊཀཾ ཨཏྟནཱཝ མོཙེཏཱུ’’ཏི ཨཏྟཱནཾ པརིམོཙེཏྭཱ ཏསྶེཝ ཨུཔརི ཁིཔནྟཱ – ‘‘སུཛཱཏོ ཙ བྷོ གོཏམཱ’’ཏིཨཱདིམཱཧཾསུ།

    269.Atha kho bhagavāti atha kho bhagavā – ‘‘sace ime māṇavakā ettha nisinnā evaṃ uccāsaddaṃ karissanti, ayaṃ kathā pariyosānaṃ na gamissati. Handa, ne nissadde katvā ambaṭṭheneva saddhiṃ kathemī’’ti te māṇavake etadavoca. Tattha mantavhoti mantayatha. Mayā saddhiṃ paṭimantetūti mayā saha kathetu. Evaṃ vutte māṇavakā cintayiṃsu – ‘‘ambaṭṭho tāva dāsiputtosīti vutte puna sīsaṃ ukkhipituṃ nāsakkhi. Ayaṃ kho jāti nāma dujjānā, sace aññampi kiñci samaṇo gotamo ‘tvaṃ dāso’ti vakkhati, ko tena saddhiṃ aḍḍaṃ karissati. Ambaṭṭho attanā baddhaṃ puṭakaṃ attanāva mocetū’’ti attānaṃ parimocetvā tasseva upari khipantā – ‘‘sujāto ca bho gotamā’’tiādimāhaṃsu.

    ༢༧༠. སཧདྷམྨིཀོཏི སཧེཏུཀོ སཀཱརཎོ། ཨཀཱམཱ བྱཱཀཱཏབྦོཏི ཨཏྟནཱ ཨནིཙྪནྟེནཔི བྱཱཀརིཏབྦོ, ཨཝསྶཾ ཝིསྶཛྫེཏབྦོཏི ཨཏྠོ། ཨཉྙེན ཝཱ ཨཉྙཾ པཊིཙརིསྶསཱིཏི ཨཉྙེན ཝཙནེན ཨཉྙཾ ཝཙནཾ པཊིཙརིསྶསི ཨཛ྄ཛྷོཏྠརིསྶསི, པཊིཙྪཱདེསྶསཱིཏི ཨཏྠོ། ཡོ ཧི ‘‘ཀིཾ གོཏྟོ ཏྭ’’ནྟི ཨེཝཾ པུཊྛོ – ‘‘ཨཧཾ ཏཡོ ཝེདེ ཛཱནཱམཱི’’ཏིཨཱདཱིནི ཝདཏི, ཨཡཾ ཨཉྙེན ཨཉྙཾ པཊིཙརཏི ནཱམ། པཀྐམིསྶསི ཝཱཏི པུཙྪིཏཾ པཉྷཾ ཛཱནནྟོཝ ཨཀཐེཏུཀཱམཏཱཡ ཨུཊྛཱཡཱསནཱ པཀྐམིསྶསི ཝཱ།

    270.Sahadhammikoti sahetuko sakāraṇo. Akāmā byākātabboti attanā anicchantenapi byākaritabbo, avassaṃ vissajjetabboti attho. Aññenavā aññaṃ paṭicarissasīti aññena vacanena aññaṃ vacanaṃ paṭicarissasi ajjhottharissasi, paṭicchādessasīti attho. Yo hi ‘‘kiṃ gotto tva’’nti evaṃ puṭṭho – ‘‘ahaṃ tayo vede jānāmī’’tiādīni vadati, ayaṃ aññena aññaṃ paṭicarati nāma. Pakkamissasi vāti pucchitaṃ pañhaṃ jānantova akathetukāmatāya uṭṭhāyāsanā pakkamissasi vā.

    ཏུཎྷཱི ཨཧོསཱིཏི སམཎོ གོཏམོ མཾ སཱམཾཡེཝ དཱསིཔུཏྟབྷཱཝཾ ཀཐཱཔེཏུཀཱམོ, སཱམཾ ཀཐིཏེ ཙ དཱསོ ནཱམ ཛཱཏོཡེཝ ཧོཏི། ཨཡཾ པན དྭཏིཀྑཏྟུཾ ཙོདེཏྭཱ ཏུཎྷཱི བྷཝིསྶཏི, ཏཏོ ཨཧཾ པརིཝཏྟིཏྭཱ པཀྐམིསྶཱམཱིཏི ཙིནྟེཏྭཱ ཏུཎྷཱི ཨཧོསི།

    Tuṇhīahosīti samaṇo gotamo maṃ sāmaṃyeva dāsiputtabhāvaṃ kathāpetukāmo, sāmaṃ kathite ca dāso nāma jātoyeva hoti. Ayaṃ pana dvatikkhattuṃ codetvā tuṇhī bhavissati, tato ahaṃ parivattitvā pakkamissāmīti cintetvā tuṇhī ahosi.

    ༢༧༡. ཝཛིརཾ པཱཎིམྷི ཨསྶཱཏི ཝཛིརཔཱཎི། ཡཀྑོཏི ན ཡོ ཝཱ སོ ཝཱ ཡཀྑོ, སཀྐོ དེཝརཱཛཱཏི ཝེདིཏབྦོ། ཨཱདིཏྟནྟི ཨགྒིཝཎྞཾ། སམྤཛྫལིཏནྟི སུཊྛུ པཛྫལིཏཾ། སཛོཏིབྷཱུཏནྟི སམནྟཏོ ཛོཏིབྷཱུཏཾ, ཨེཀགྒིཛཱལབྷཱུཏནྟི ཨཏྠོ། ཋིཏོ ཧོཏཱིཏི མཧནྟཾ སཱིསཾ, ཀནྡལམཀུལ༹སདིསཱ དཱཋཱ བྷཡཱནཀཱནི ཨཀྑིནཱསཱདཱིནི ཨེཝཾ ཝིརཱུཔརཱུཔཾ མཱཔེཏྭཱ ཋིཏོ།

    271. Vajiraṃ pāṇimhi assāti vajirapāṇi. Yakkhoti na yo vā so vā yakkho, sakko devarājāti veditabbo. Ādittanti aggivaṇṇaṃ. Sampajjalitanti suṭṭhu pajjalitaṃ. Sajotibhūtanti samantato jotibhūtaṃ, ekaggijālabhūtanti attho. Ṭhito hotīti mahantaṃ sīsaṃ, kandalamakuḷasadisā dāṭhā bhayānakāni akkhināsādīni evaṃ virūparūpaṃ māpetvā ṭhito.

    ཀསྨཱ པནེས ཨཱགཏོཏི? དིཊྛིཝིསྶཛྫཱཔནཏྠཾ། ཨཔི ཙ – ‘‘ཨཧཉྩེཝ ཁོ པན དྷམྨཾ དེསེཡྻཾ, པརེ ཙ མེ ན ཨཱཛཱནེཡྻུ’’ནྟི ཨེཝཾ དྷམྨདེསནཱཡ ཨཔྤོསྶུཀྐབྷཱཝཾ ཨཱཔནྣེ བྷགཝཏི སཀྐོ མཧཱབྲཧྨུནཱ སདྡྷིཾ ཨཱགནྟྭཱ – ‘‘བྷགཝཱ དྷམྨཾ དེསེཐ, ཏུམྷཱཀཾ ཨཱཎཱཡ ཨཝཏྟམཱནེ མཡཾ ཝཏྟཱཔེསྶཱམ, ཏུམྷཱཀཾ དྷམྨཙཀྐཾ ཧོཏུ, ཨམྷཱཀཾ ཨཱཎཱཙཀྐ’’ནྟི པཊིཉྙཾ ཨཀཱསི། ཏསྨཱ – ‘‘ཨཛྫ ཨམྦཊྛཾ ཏཱསེཏྭཱ པཉྷཾ ཝིསྶཛྫཱཔེསྶཱམཱི’’ཏི ཨཱགཏོ།

    Kasmā panesa āgatoti? Diṭṭhivissajjāpanatthaṃ. Api ca – ‘‘ahañceva kho pana dhammaṃ deseyyaṃ, pare ca me na ājāneyyu’’nti evaṃ dhammadesanāya appossukkabhāvaṃ āpanne bhagavati sakko mahābrahmunā saddhiṃ āgantvā – ‘‘bhagavā dhammaṃ desetha, tumhākaṃ āṇāya avattamāne mayaṃ vattāpessāma, tumhākaṃ dhammacakkaṃ hotu, amhākaṃ āṇācakka’’nti paṭiññaṃ akāsi. Tasmā – ‘‘ajja ambaṭṭhaṃ tāsetvā pañhaṃ vissajjāpessāmī’’ti āgato.

    བྷགཝཱ ཙེཝ པསྶཏི ཨམྦཊྛོ ཙཱཏི ཡདི ཧི ཏཾ ཨཉྙེཔི པསྶེཡྻུཾ, ཏཾ ཀཱརཎཾ ཨགརུ ཨསྶ, ‘‘ཨཡཾ སམཎོ གོཏམོ ཨམྦཊྛཾ ཨཏྟནོ ཝཱདེ ཨནོཏརནྟཾ ཉཏྭཱ ཡཀྑཾ ཨཱཝཱཧེཏྭཱ དསྶེསི, ཏཏོ ཨམྦཊྛོ བྷཡེན ཀཐེསཱི’’ཏི ཝདེཡྻུཾ། ཏསྨཱ བྷགཝཱ ཙེཝ པསྶཏི ཨམྦཊྛོ ཙ། ཏསྶ ཏཾ དིསྭཱཝ སཀལསརཱིརཏོ སེདཱ མུཙྩིཾསུ། ཨནྟོཀུཙྪི ཝིཔརིཝཏྟམཱནཱ མཧཱརཝཾ ཝིརཝི ། སོ ‘‘ཨཉྙེཔི ནུ ཁོ པསྶནྟཱི’’ཏི ཨོལོཀེནྟོ ཀསྶཙི ལོམཧཾསམཏྟམྤི ནཱདྡས། ཏཏོ – ‘‘ཨིདཾ བྷཡཾ མམེཝ ཨུཔྤནྣཾ, སཙཱཧཾ ཡཀྑོཏི ཝཀྑཱམི, ‘ཀིཾ ཏཝམེཝ ཨཀྑཱིནི ཨཏྠི, ཏྭམེཝ ཡཀྑཾ པསྶསི, པཋམཾ ཡཀྑཾ ཨདིསྭཱ སམཎེན གོཏམེན ཝཱདསངྒྷཊྚེ པཀྑིཏྟོཝ ཡཀྑཾ པསྶསཱི’ཏི ཝདེཡྻུ’’ནྟི ཙིནྟེཏྭཱ ‘‘ན དཱནི མེ ཨིདྷ ཨཉྙཾ པཊིསརཎཾ ཨཏྠི, ཨཉྙཏྲ སམཎཱ གོཏམཱ’’ཏི མཉྙམཱནོ ཨཐ ཁོ ཨམྦཊྛོ མཱཎཝོ…པེ॰… བྷགཝནྟཾ ཨེཏདཝོཙ།

    Bhagavā ceva passati ambaṭṭho cāti yadi hi taṃ aññepi passeyyuṃ, taṃ kāraṇaṃ agaru assa, ‘‘ayaṃ samaṇo gotamo ambaṭṭhaṃ attano vāde anotarantaṃ ñatvā yakkhaṃ āvāhetvā dassesi, tato ambaṭṭho bhayena kathesī’’ti vadeyyuṃ. Tasmā bhagavā ceva passati ambaṭṭho ca. Tassa taṃ disvāva sakalasarīrato sedā mucciṃsu. Antokucchi viparivattamānā mahāravaṃ viravi . So ‘‘aññepi nu kho passantī’’ti olokento kassaci lomahaṃsamattampi nāddasa. Tato – ‘‘idaṃ bhayaṃ mameva uppannaṃ, sacāhaṃ yakkhoti vakkhāmi, ‘kiṃ tavameva akkhīni atthi, tvameva yakkhaṃ passasi, paṭhamaṃ yakkhaṃ adisvā samaṇena gotamena vādasaṅghaṭṭe pakkhittova yakkhaṃ passasī’ti vadeyyu’’nti cintetvā ‘‘na dāni me idha aññaṃ paṭisaraṇaṃ atthi, aññatra samaṇā gotamā’’ti maññamāno atha kho ambaṭṭho māṇavo…pe… bhagavantaṃ etadavoca.

    ༢༧༢. ཏཱཎཾ གཝེསཱིཏི ཏཱཎཾ གཝེསམཱནོ། ལེཎཾ གཝེསཱིཏི ལེཎཾ གཝེསམཱནོ། སརཎཾ གཝེསཱིཏི སརཎཾ གཝེསམཱནོ། ཨེཏྠ ཙ ཏཱཡཏི རཀྑཏཱིཏི ཏཱཎཾ། ནིལཱིཡནྟི ཨེཏྠཱཏི ལེཎཾ། སརཏཱིཏི སརཎཾ, བྷཡཾ ཧིཾསཏི, ཝིདྡྷཾསེཏཱིཏི ཨཏྠོ། ཨུཔནིསཱིདིཏྭཱཏི ཨུཔགམྨ ཧེཊྛཱསནེ ནིསཱིདིཏྭཱ། བྲཝིཏཱུཏི ཝདཏུ།

    272.Tāṇaṃ gavesīti tāṇaṃ gavesamāno. Leṇaṃ gavesīti leṇaṃ gavesamāno. Saraṇaṃ gavesīti saraṇaṃ gavesamāno. Ettha ca tāyati rakkhatīti tāṇaṃ. Nilīyanti etthāti leṇaṃ. Saratīti saraṇaṃ, bhayaṃ hiṃsati, viddhaṃsetīti attho. Upanisīditvāti upagamma heṭṭhāsane nisīditvā. Bravitūti vadatu.

    ཨམྦཊྛཝཾསཀཐཱ

    Ambaṭṭhavaṃsakathā

    ༢༧༣-༢༧༤. དཀྑིཎཛནཔདནྟི དཀྑིཎཱཔཐོཏི པཱཀཊཾ། གངྒཱཡ དཀྑིཎཏོ པཱཀཊཛནཔདཾ། ཏདཱ ཀིར དཀྑིཎཱཔཐེ བཧཱུ བྲཱཧྨཎཏཱཔསཱ ཧོནྟི, སོ ཏཏྠ གནྟྭཱ ཨེཀཾ ཏཱཔསཾ ཝཏྟཔཊིཔཏྟིཡཱ ཨཱརཱདྷེསི། སོ ཏསྶ ཨུཔཀཱརཾ དིསྭཱ ཨཱཧ – ‘‘ཨམྦྷོ, པུརིས, མནྟཾ ཏེ དེམི, ཡཾ ཨིཙྪསི, ཏཾ མནྟཾ གཎྷཱཧཱི’’ཏི། སོ ཨཱཧ – ‘‘ན མེ ཨཱཙརིཡ, ཨཉྙེན མནྟེན, ཀིཙྩཾ ཨཏྠི, ཡསྶཱནུབྷཱཝེན ཨཱཝུདྷཾ ན པརིཝཏྟཏི, ཏཾ མེ མནྟཾ དེཧཱི’’ཏི། སོ – ‘‘བྷདྲཾ, བྷོ’’ཏི ཏསྶ དྷནུཨགམནཱིཡཾ ཨམྦཊྛཾ ནཱམ ཝིཛྫཾ ཨདཱསི, སོ ཏཾ ཝིཛྫཾ གཧེཏྭཱ ཏཏྠེཝ ཝཱིམཾསིཏྭཱ – ‘‘ཨིདཱནི མེ མནོརཐཾ པཱུརེསྶཱམཱི’’ཏི ཨིསིཝེསཾ གཧེཏྭཱ ཨོཀྐཱཀསྶ སནྟིཀཾ གཏོ། ཏེན ཝུཏྟཾ – ‘‘དཀྑིཎཛནཔདཾ གནྟྭཱ བྲཧྨམནྟེ ཨདྷཱིཡིཏྭཱ རཱཛཱནཾ ཨོཀྐཱཀཾ ཨུཔསངྐམིཏྭཱ’’ཏི།

    273-274.Dakkhiṇajanapadanti dakkhiṇāpathoti pākaṭaṃ. Gaṅgāya dakkhiṇato pākaṭajanapadaṃ. Tadā kira dakkhiṇāpathe bahū brāhmaṇatāpasā honti, so tattha gantvā ekaṃ tāpasaṃ vattapaṭipattiyā ārādhesi. So tassa upakāraṃ disvā āha – ‘‘ambho, purisa, mantaṃ te demi, yaṃ icchasi, taṃ mantaṃ gaṇhāhī’’ti. So āha – ‘‘na me ācariya, aññena mantena, kiccaṃ atthi, yassānubhāvena āvudhaṃ na parivattati, taṃ me mantaṃ dehī’’ti. So – ‘‘bhadraṃ, bho’’ti tassa dhanuagamanīyaṃ ambaṭṭhaṃ nāma vijjaṃ adāsi, so taṃ vijjaṃ gahetvā tattheva vīmaṃsitvā – ‘‘idāni me manorathaṃ pūressāmī’’ti isivesaṃ gahetvā okkākassa santikaṃ gato. Tena vuttaṃ – ‘‘dakkhiṇajanapadaṃ gantvā brahmamante adhīyitvā rājānaṃ okkākaṃ upasaṅkamitvā’’ti.

    ཨེཏྠ བྲཧྨམནྟེཏི ཨཱནུབྷཱཝསམྤནྣཏཱཡ སེཊྛམནྟེ། ཀོ ནེཝཾ’རེ ཨཡཾ མཡ྄ཧཾ དཱསིཔུཏྟོཏི ཀོ ནུ ཨེཝཾ ཨརེ ཨཡཾ མམ དཱསིཔུཏྟོ། སོ ཏཾ ཁུརཔྤནྟི སོ རཱཛཱ ཏཾ མཱརེཏུཀཱམཏཱཡ སནྣཧིཏཾ སརཾ ཏསྶ མནྟཱནུབྷཱཝེན ནེཝ ཁིཔིཏུཾ ན ཨཔནེཏུཾ སཀྑི, ཏཱཝདེཝ སཀལསརཱིརེ སཉྫཱཏསེདོ བྷཡེན ཝེདྷམཱནོ ཨཊྛཱསི།

    Ettha brahmamanteti ānubhāvasampannatāya seṭṭhamante. Ko nevaṃ’re ayaṃ mayhaṃ dāsiputtoti ko nu evaṃ are ayaṃ mama dāsiputto. Sotaṃ khurappanti so rājā taṃ māretukāmatāya sannahitaṃ saraṃ tassa mantānubhāvena neva khipituṃ na apanetuṃ sakkhi, tāvadeva sakalasarīre sañjātasedo bhayena vedhamāno aṭṭhāsi.

    ཨམཙྩཱཏི མཧཱམཙྩཱ། པཱརིསཛྫཱཏི ཨིཏརེ པརིསཱཝཙརཱ། ཨེཏདཝོཙུནྟི – ‘‘དཎྜཀཱིརཉྙོ ཀིསཝཙྪཏཱཔསེ ཨཔརདྡྷསྶ ཨཱཝུདྷཝུཊྛིཡཱ སཀལརཊྛཾ ཝིནཊྛཾ ། ནཱལི༹ཀེརོ པཉྩསུ ཏཱཔསསཏེསུ ཨཛྫུནོ ཙ ཨངྒཱིརསེ ཨཔརདྡྷོ པཐཝིཾ བྷིནྡིཏྭཱ ནིརཡཾ པཝིཊྛོ’’ཏི ཙིནྟཡནྟཱ བྷཡེན ཨེཏཾ སོཏྠི, བྷདྡནྟེཏིཨཱདིཝཙནཾ ཨཝོཙུཾ།

    Amaccāti mahāmaccā. Pārisajjāti itare parisāvacarā. Etadavocunti – ‘‘daṇḍakīrañño kisavacchatāpase aparaddhassa āvudhavuṭṭhiyā sakalaraṭṭhaṃ vinaṭṭhaṃ . Nāḷikero pañcasu tāpasasatesu ajjuno ca aṅgīrase aparaddho pathaviṃ bhinditvā nirayaṃ paviṭṭho’’ti cintayantā bhayena etaṃ sotthi, bhaddantetiādivacanaṃ avocuṃ.

    སོཏྠི བྷཝིསྶཏི རཉྙོཏི ཨིདཾ ཝཙནཾ ཀཎྷོ ཙིརཾ ཏུཎྷཱི ཧུཏྭཱ ཏཏོ ཨནེཀཔྤཀཱརཾ ཡཱཙཱིཡམཱནོ – ‘‘ཏུམྷཱཀཾ རཉྙཱ མཱདིསསྶ ཨིསིནོ ཁུརཔྤཾ སནྣཡ྄ཧནྟེན བྷཱརིཡཾ ཀམྨཾ ཀཏ’’ནྟིཨཱདཱིནི ཙ ཝཏྭཱ པཙྪཱ ཨབྷཱསི། ཨུནྡྲིཡིསྶཏཱིཏི བྷིཛྫིསྶཏི, ཐུསམུཊྛི ཝིཡ ཝིཔྤཀིརིཡིསྶཏཱིཏི། ཨིདཾ སོ ‘‘ཛནཾ ཏཱསེསྶཱམཱི’’ཏི མུསཱ བྷཎཏི། སརསནྠམྦྷནམཏྟེཡེཝ ཧིསྶ ཝིཛྫཱཡ ཨཱནུབྷཱཝོ, ན ཨཉྙཏྲ། ཨིཏོ པརེསུཔི ཝཙནེསུ ཨེསེཝ ནཡོ།

    Sotthi bhavissati raññoti idaṃ vacanaṃ kaṇho ciraṃ tuṇhī hutvā tato anekappakāraṃ yācīyamāno – ‘‘tumhākaṃ raññā mādisassa isino khurappaṃ sannayhantena bhāriyaṃ kammaṃ kata’’ntiādīni ca vatvā pacchā abhāsi. Undriyissatīti bhijjissati, thusamuṭṭhi viya vippakiriyissatīti. Idaṃ so ‘‘janaṃ tāsessāmī’’ti musā bhaṇati. Sarasanthambhanamatteyeva hissa vijjāya ānubhāvo, na aññatra. Ito paresupi vacanesu eseva nayo.

    པལློམོཏི པནྣལོམོ། ལོམཧཾསནམཏྟམྤིསྶ ན བྷཝིསྶཏི། ཨིདཾ ཀིར སོ ‘‘སཙེ མེ རཱཛཱ ཏཾ དཱརིཀཾ དསྶཏཱི’’ཏི པཊིཉྙཾ ཀཱརེཏྭཱ ཨཝཙ། ཀུམཱརེ ཁུརཔྤཾ པཏིཊྛཔེསཱིཏི ཏེན ‘‘སརོ ཨོཏརཏཱུ’’ཏི མནྟེ པརིཝཏྟི, ཏེ ཀུམཱརསྶ ནཱབྷིཡཾ པཏིཊྛཔེསི། དྷཱིཏརཾ ཨདཱསཱིཏི སཱིསཾ དྷོཝིཏྭཱ ཨདཱསཾ བྷུཛིསྶཾ ཀཏྭཱ དྷཱིཏརཾ ཨདཱསི, ཨུལཱ༹རེ ཙ ཏཾ ཋཱནེ ཋཔེསི། མཱ ཁོ ཏུམྷེ མཱཎཝཀཱཏི ཨིདཾ པན བྷགཝཱ – ‘‘ཨེཀེན པཀྑེན ཨམྦཊྛོ སཀྱཱནཾ ཉཱཏི ཧོཏཱི’’ཏི པཀཱསེནྟོ ཏསྶ སམསྶཱསནཏྠཾ ཨཱཧ། ཏཏོ ཨམྦཊྛོ གྷཊསཏེན ཨབྷིསིཏྟོ ཝིཡ པསྶདྡྷདརཐོ ཧུཏྭཱ སམསྶཱསེཏྭཱ སམཎོ གོཏམོ མཾ ‘‘ཏོསེསྶཱམཱི’’ཏི ཨེཀེན པཀྑེན ཉཱཏིཾ ཀརོཏི, ཁཏྟིཡོ ཀིརཱཧམསྨཱི’’ཏི ཙིནྟེསི།

    Pallomoti pannalomo. Lomahaṃsanamattampissa na bhavissati. Idaṃ kira so ‘‘sace me rājā taṃ dārikaṃ dassatī’’ti paṭiññaṃ kāretvā avaca. Kumāre khurappaṃ patiṭṭhapesīti tena ‘‘saro otaratū’’ti mante parivatti, te kumārassa nābhiyaṃ patiṭṭhapesi. Dhītaraṃ adāsīti sīsaṃ dhovitvā adāsaṃ bhujissaṃ katvā dhītaraṃ adāsi, uḷāre ca taṃ ṭhāne ṭhapesi. Mā kho tumhe māṇavakāti idaṃ pana bhagavā – ‘‘ekena pakkhena ambaṭṭho sakyānaṃ ñāti hotī’’ti pakāsento tassa samassāsanatthaṃ āha. Tato ambaṭṭho ghaṭasatena abhisitto viya passaddhadaratho hutvā samassāsetvā samaṇo gotamo maṃ ‘‘tosessāmī’’ti ekena pakkhena ñātiṃ karoti, khattiyo kirāhamasmī’’ti cintesi.

    ཁཏྟིཡསེཊྛབྷཱཝཝཎྞནཱ

    Khattiyaseṭṭhabhāvavaṇṇanā

    ༢༧༥. ཨཐ ཁོ བྷགཝཱ – ‘‘ཨཡཾ ཨམྦཊྛོ ཁཏྟིཡོསྨཱི’’ཏི སཉྙཾ ཀརོཏི, ཨཏྟནོ ཨཁཏྟིཡབྷཱཝཾ ན ཛཱནཱཏི, ཧནྡ ནཾ ཛཱནཱཔེསྶཱམཱིཏི ཁཏྟིཡཝཾསཾ དསྶེཏུཾ ཨུཏྟརིདེསནཾ ཝཌྜྷེནྟོ – ‘‘ཏཾ ཀིཾ མཉྙསི ཨམྦཊྛཱ’’ཏིཨཱདིམཱཧ། ཏཏྠ ཨིདྷཱཏི ཨིམསྨིཾ ལོཀེ། བྲཱཧྨཎེསཱུཏི བྲཱཧྨཎཱནཾ ཨནྟརེ། ཨཱསནཾ ཝཱ ཨུདཀཾ ཝཱཏི ཨགྒཱསནཾ ཝཱ ཨགྒོདཀཾ ཝཱ། སདྡྷེཏི མཏཀེ ཨུདྡིསྶ ཀཏབྷཏྟེ། ཐཱལིཔཱཀེཏི མངྒལཱདིབྷཏྟེ། ཡཉྙེཏི ཡཉྙབྷཏྟེ། པཱཧུནེཏི པཱཧུནཀཱནཾ ཀཏབྷཏྟེ པཎྞཱཀཱརབྷཏྟེ ཝཱ། ཨཔི ནུསྶཱཏི ཨཔི ནུ ཨསྶ ཁཏྟིཡཔུཏྟསྶ། ཨཱཝཊཾ ཝཱ ཨསྶ ཨནཱཝཊཾ ཝཱཏི , བྲཱཧྨཎཀཉྙཱསུ ནིཝཱརཎཾ བྷཝེཡྻ ཝཱ ནོ ཝཱ, བྲཱཧྨཎདཱརིཀཾ ལབྷེཡྻ ཝཱ ན ཝཱ ལབྷེཡྻཱཏི ཨཏྠོ། ཨནུཔཔནྣོཏི ཁཏྟིཡབྷཱཝཾ ཨཔཏྟོ, ཨཔརིསུདྡྷོཏི ཨཏྠོ།

    275. Atha kho bhagavā – ‘‘ayaṃ ambaṭṭho khattiyosmī’’ti saññaṃ karoti, attano akhattiyabhāvaṃ na jānāti, handa naṃ jānāpessāmīti khattiyavaṃsaṃ dassetuṃ uttaridesanaṃ vaḍḍhento – ‘‘taṃ kiṃ maññasi ambaṭṭhā’’tiādimāha. Tattha idhāti imasmiṃ loke. Brāhmaṇesūti brāhmaṇānaṃ antare. Āsanaṃ vā udakaṃ vāti aggāsanaṃ vā aggodakaṃ vā. Saddheti matake uddissa katabhatte. Thālipāketi maṅgalādibhatte. Yaññeti yaññabhatte. Pāhuneti pāhunakānaṃ katabhatte paṇṇākārabhatte vā. Api nussāti api nu assa khattiyaputtassa. Āvaṭaṃ vā assa anāvaṭaṃ vāti , brāhmaṇakaññāsu nivāraṇaṃ bhaveyya vā no vā, brāhmaṇadārikaṃ labheyya vā na vā labheyyāti attho. Anupapannoti khattiyabhāvaṃ apatto, aparisuddhoti attho.

    ༢༧༦. ཨིཏྠིཡཱ ཝཱ ཨིཏྠིཾ ཀརིཏྭཱཏི ཨིཏྠིཡཱ ཝཱ ཨིཏྠིཾ པརིཡེསིཏྭཱ། ཀིསྨིཉྩིདེཝ པཀརཎེཏི ཀིསྨིཉྩིདེཝ དོསེ བྲཱཧྨཎཱནཾ ཨཡུཏྟེ ཨཀཏྟབྦཀརཎེ། བྷསྶཔུཊེནཱཏི བྷསྨཔུཊེན, སཱིསེ ཚཱརིཀཾ ཨོཀིརིཏྭཱཏི ཨཏྠོ།

    276.Itthiyāvā itthiṃ karitvāti itthiyā vā itthiṃ pariyesitvā. Kismiñcideva pakaraṇeti kismiñcideva dose brāhmaṇānaṃ ayutte akattabbakaraṇe. Bhassapuṭenāti bhasmapuṭena, sīse chārikaṃ okiritvāti attho.

    ༢༧༧. ཛནེཏསྨིནྟི ཛནིཏསྨིཾ, པཛཱཡཱཏི ཨཏྠོ། ཡེ གོཏྟཔཊིསཱརིནོཏི ཡེ ཛནེཏསྨིཾ གོཏྟཾ པཊིསརནྟི – ‘‘ཨཧཾ གོཏམོ, ཨཧཾ ཀསྶཔོ’’ཏི, ཏེསུ ལོཀེ གོཏྟཔཊིསཱརཱིསུ ཁཏྟིཡོ སེཊྛོ། ཨནུམཏཱ མཡཱཏི མམ སབྦཉྙུཏཉྙཱཎེན སདྡྷིཾ སཾསནྡིཏྭཱ དེསིཏཱ མཡཱ ཨནུཉྙཱཏཱ།

    277.Janetasminti janitasmiṃ, pajāyāti attho. Ye gottapaṭisārinoti ye janetasmiṃ gottaṃ paṭisaranti – ‘‘ahaṃ gotamo, ahaṃ kassapo’’ti, tesu loke gottapaṭisārīsu khattiyo seṭṭho. Anumatā mayāti mama sabbaññutaññāṇena saddhiṃ saṃsanditvā desitā mayā anuññātā.

    པཋམབྷཱཎཝཱརཝཎྞནཱ ནིཊྛིཏཱ།

    Paṭhamabhāṇavāravaṇṇanā niṭṭhitā.

    ཝིཛྫཱཙརཎཀཐཱཝཎྞནཱ

    Vijjācaraṇakathāvaṇṇanā

    ༢༧༨. ཨིམཱཡ པན གཱཐཱཡ ཝིཛྫཱཙརཎསམྤནྣོཏི ཨིདཾ པདཾ སུཏྭཱ ཨམྦཊྛོ ཙིནྟེསི – ‘‘ཝིཛྫཱ ནཱམ ཏཡོ ཝེདཱ, ཙརཎཾ པཉྩ སཱིལཱནི, ཏཡིདཾ ཨམྷཱཀཾཡེཝ ཨཏྠི, ཝིཛྫཱཙརཎསམྤནྣོ ཙེ སེཊྛོ, མཡམེཝ སེཊྛཱ’’ཏི ནིཊྛཾ གནྟྭཱ ཝིཛྫཱཙརཎཾ པུཙྪནྟོ – ‘‘ཀཏམཾ པན ཏཾ, བྷོ གོཏམ, ཙརཎཾ, ཀཏམཱ ཙ པན སཱ ཝིཛྫཱ’’ཏི ཨཱཧ། ཨཐསྶ བྷགཝཱ ཏཾ བྲཱཧྨཎསམཡེ སིདྡྷཾ ཛཱཏིཝཱདཱདིཔཊིསཾཡུཏྟཾ ཝིཛྫཱཙརཎཾ པཊིཀྑིཔིཏྭཱ ཨནུཏྟརཾ ཝིཛྫཱཙརཎཾ དསྶེཏུཀཱམོ – ‘‘ན ཁོ ཨམྦཊྛཱ’’ཏིཨཱདིམཱཧ། ཏཏྠ ཛཱཏིཝཱདོཏི ཛཱཏིཾ ཨཱརབྦྷ ཝཱདོ, བྲཱཧྨཎསྶེཝིདཾ ཝཊྚཏི, ན སུདྡསྶཱཏིཨཱདི ཝཙནནྟི ཨཏྠོ། ཨེས ནཡོ སབྦཏྠ། ཛཱཏིཝཱདཝིནིབདྡྷཱཏི ཛཱཏིཝཱདེ ཝིནིབདྡྷཱ། ཨེས ནཡོ སབྦཏྠ།

    278. Imāya pana gāthāya vijjācaraṇasampannoti idaṃ padaṃ sutvā ambaṭṭho cintesi – ‘‘vijjā nāma tayo vedā, caraṇaṃ pañca sīlāni, tayidaṃ amhākaṃyeva atthi, vijjācaraṇasampanno ce seṭṭho, mayameva seṭṭhā’’ti niṭṭhaṃ gantvā vijjācaraṇaṃ pucchanto – ‘‘katamaṃ pana taṃ, bho gotama, caraṇaṃ, katamā ca pana sā vijjā’’ti āha. Athassa bhagavā taṃ brāhmaṇasamaye siddhaṃ jātivādādipaṭisaṃyuttaṃ vijjācaraṇaṃ paṭikkhipitvā anuttaraṃ vijjācaraṇaṃ dassetukāmo – ‘‘na kho ambaṭṭhā’’tiādimāha. Tattha jātivādoti jātiṃ ārabbha vādo, brāhmaṇassevidaṃ vaṭṭati, na suddassātiādi vacananti attho. Esa nayo sabbattha. Jātivādavinibaddhāti jātivāde vinibaddhā. Esa nayo sabbattha.

    ཏཏོ ཨམྦཊྛོ – ‘‘ཡཏྠ དཱནི མཡཾ ལགྒིསྶཱམཱཏི ཙིནྟཡིམྷ, ཏཏོ ནོ སམཎོ གོཏམོ མཧཱཝཱཏེ ཐུསཾ དྷུནནྟོ ཝིཡ དཱུརམེཝ ཨཝཀྑིཔི། ཡཏྠ པན མཡཾ ན ལགྒཱམ, ཏཏྠ ནོ ནིཡོཛེསི། ཨཡཾ ནོ ཝིཛྫཱཙརཎསམྤདཱ ཉཱཏུཾ ཝཊྚཏཱི’’ཏི ཙིནྟེཏྭཱ པུན ཝིཛྫཱཙརཎསམྤདཾ པུཙྪི། ཨཐསྶ བྷགཝཱ སམུདཱགམཏོ པབྷུཏི ཝིཛྫཱཙརཎཾ དསྶེཏུཾ – ‘‘ཨིདྷ ཨམྦཊྛ ཏཐཱགཏོ’’ཏིཨཱདིམཱཧ།

    Tato ambaṭṭho – ‘‘yattha dāni mayaṃ laggissāmāti cintayimha, tato no samaṇo gotamo mahāvāte thusaṃ dhunanto viya dūrameva avakkhipi. Yattha pana mayaṃ na laggāma, tattha no niyojesi. Ayaṃ no vijjācaraṇasampadā ñātuṃ vaṭṭatī’’ti cintetvā puna vijjācaraṇasampadaṃ pucchi. Athassa bhagavā samudāgamato pabhuti vijjācaraṇaṃ dassetuṃ – ‘‘idha ambaṭṭha tathāgato’’tiādimāha.

    ༢༧༩. ཨེཏྠ ཙ བྷགཝཱ ཙརཎཔརིཡཱཔནྣམྤི ཏིཝིདྷཾ སཱིལཾ ཝིབྷཛནྟོ ‘‘ཨིདམསྶ ཧོཏི ཙརཎསྨི’’ནྟི ཨནིཡྻཱཏེཏྭཱ ‘‘ཨིདམྤིསྶ ཧོཏི སཱིལསྨི’’ནྟི སཱིལཝསེནེཝ ནིཡྻཱཏེསི། ཀསྨཱ? ཏསྶཔི ཧི ཀིཉྩི ཀིཉྩི སཱིལཾ ཨཏྠི, ཏསྨཱ ཙརཎཝསེན ནིཡྻཱཏིཡམཱནེ ‘‘མཡམྤི ཙརཎསམྤནྣཱ’’ཏི ཏཏྠ ཏཏྠེཝ ལགྒེཡྻ། ཡཾ པན ཏེན སུཔིནེཔི ན དིཊྛཔུབྦཾ, ཏསྶེཝ ཝསེན ནིཡྻཱཏེནྟོ པཋམཾ ཛྷཱནཾ ཨུཔསམྤཛྫ ཝིཧརཏི། ཨིདམྤིསྶ ཧོཏི ཙརཎསྨིཾ…པེ॰… ཙཏུཏྠཾ ཛྷཱནཾ ཨུཔསམྤཛྫ ཝིཧརཏི, ཨིདམྤིསྶ ཧོཏི ཙརཎསྨིནྟིཨཱདིམཱཧ། ཨེཏྟཱཝཏཱ ཨཊྛཔི སམཱཔཏྟིཡོ ཙརཎནྟི ནིཡྻཱཏིཏཱ ཧོནྟི, ཝིཔསྶནཱ ཉཱཎཏོ པན པཊྛཱཡ ཨཊྛཝིདྷཱཔི པཉྙཱ ཝིཛྫཱཏི ནིཡྻཱཏིཏཱ།

    279. Ettha ca bhagavā caraṇapariyāpannampi tividhaṃ sīlaṃ vibhajanto ‘‘idamassa hoti caraṇasmi’’nti aniyyātetvā ‘‘idampissa hoti sīlasmi’’nti sīlavaseneva niyyātesi. Kasmā? Tassapi hi kiñci kiñci sīlaṃ atthi, tasmā caraṇavasena niyyātiyamāne ‘‘mayampi caraṇasampannā’’ti tattha tattheva laggeyya. Yaṃ pana tena supinepi na diṭṭhapubbaṃ, tasseva vasena niyyātento paṭhamaṃ jhānaṃ upasampajja viharati. Idampissa hoti caraṇasmiṃ…pe… catutthaṃ jhānaṃ upasampajja viharati, idampissa hoti caraṇasmintiādimāha. Ettāvatā aṭṭhapi samāpattiyo caraṇanti niyyātitā honti, vipassanā ñāṇato pana paṭṭhāya aṭṭhavidhāpi paññā vijjāti niyyātitā.

    ཙཏུཨཔཱཡམུཁཀཐཱཝཎྞནཱ

    Catuapāyamukhakathāvaṇṇanā

    ༢༨༠. ཨཔཱཡམུཁཱནཱིཏི ཝིནཱསམུཁཱནི། ཨནབྷིསམྦྷུཎམཱནོཏི ཨསམྤཱཔུཎནྟོ, ཨཝིསཧམཱནོ ཝཱ། ཁཱརིཝིདྷམཱདཱཡཱཏི ཨེཏྠ ཁཱརཱིཏི ཨརཎཱི ཀམཎྜལུ སུཛཱདཡོ ཏཱཔསཔརིཀྑཱརཱ། ཝིདྷོཏི ཀཱཛོ། ཏསྨཱ ཁཱརིབྷརིཏཾ ཀཱཛམཱདཱཡཱཏི ཨཏྠོ། ཡེ པན ཁཱརིཝིཝིདྷནྟི པཋནྟི, ཏེ ‘‘ཁཱརཱིཏི ཀཱཛསྶ ནཱམཾ, ཝིཝིདྷནྟི བཧུཀམཎྜལུཨཱདིཔརིཀྑཱར’’ནྟི ཝཎྞཡནྟི། པཝཏྟཕལབྷོཛནོཏི པཏིཏཕལབྷོཛནོ། པརིཙཱརཀོཏི ཀཔྤིཡཀརཎཔཏྟཔཊིགྒཧཎཔཱདདྷོཝནཱདིཝཏྟཀརཎཝསེན པརིཙཱརཀོ། ཀཱམཉྩ གུཎཱདྷིཀོཔི ཁཱིཎཱསཝསཱམཎེརོ པུཐུཛྫནབྷིཀྑུནོ ཝུཏྟནཡེན པརིཙཱརཀོ ཧོཏི, ཨཡཾ པན ན ཏཱདིསོ གུཎཝསེནཔི ཝེཡྻཱཝཙྩཀརཎཝསེནཔི ལཱམཀོཡེཝ།

    280.Apāyamukhānīti vināsamukhāni. Anabhisambhuṇamānoti asampāpuṇanto, avisahamāno vā. Khārividhamādāyāti ettha khārīti araṇī kamaṇḍalu sujādayo tāpasaparikkhārā. Vidhoti kājo. Tasmā khāribharitaṃ kājamādāyāti attho. Ye pana khārivividhanti paṭhanti, te ‘‘khārīti kājassa nāmaṃ, vividhanti bahukamaṇḍaluādiparikkhāra’’nti vaṇṇayanti. Pavattaphalabhojanoti patitaphalabhojano. Paricārakoti kappiyakaraṇapattapaṭiggahaṇapādadhovanādivattakaraṇavasena paricārako. Kāmañca guṇādhikopi khīṇāsavasāmaṇero puthujjanabhikkhuno vuttanayena paricārako hoti, ayaṃ pana na tādiso guṇavasenapi veyyāvaccakaraṇavasenapi lāmakoyeva.

    ཀསྨཱ པན ཏཱཔསཔབྦཛྫཱ སཱསནསྶ ཝིནཱསམུཁནྟི ཝུཏྟཱཏི? ཡསྨཱ གཙྪནྟཾ གཙྪནྟཾ སཱསནཾ ཏཱཔསཔབྦཛྫཱཝསེན ཨོསཀྐིསྶཏི། ཨིམསྨིཉྷི སཱསནེ པབྦཛིཏྭཱ ཏིསྶོ སིཀྑཱ པཱུརེཏུཾ ཨསཀྐོནྟཾ ལཛྫིནོ སིཀྑཱཀཱམཱ – ‘‘ནཏྠི ཏཡཱ སདྡྷིཾ ཨུཔོསཐོ ཝཱ པཝཱརཎཱ ཝཱ སངྒྷཀམྨཾ ཝཱ’’ཏི ཛིགུཙྪིཏྭཱ པརིཝཛྫེནྟི། སོ ‘‘དུཀྐརཾ ཁུརདྷཱརཱུཔམཾ སཱསནེ པཊིཔཏྟིཔཱུརཎཾ དུཀྑཾ, ཏཱཔསཔབྦཛྫཱ པན སུཀརཱ ཙེཝ བཧུཛནསམྨཏཱ ཙཱ’’ཏི ཝིབྦྷམིཏྭཱ ཏཱཔསོ ཧོཏི། ཨཉྙེ ཏཾ དིསྭཱ – ‘‘ཀིཾ ཏཡཱ ཀཏ’’ནྟི པུཙྪནྟི། སོ – ‘‘བྷཱརིཡཾ ཏུམྷཱཀཾ སཱསནེ ཀམྨཾ, ཨིདྷ པན སཚནྡཙཱརིནོ མཡ’’ནྟི ཝདཏི། སོཔི, ཡདི ཨེཝཾ ཨཧམྤི ཨེཏྠེཝ པབྦཛཱམཱིཏི ཏསྶ ཨནུསིཀྑནྟོ ཏཱཔསོ ཧོཏི། ཨེཝམཉྙེཔི ཨཉྙེཔཱིཏི ཀམེན ཏཱཔསཱཝ བཧུཀཱ ཧོནྟི། ཏེསཾ ཨུཔྤནྣཀཱལེ སཱསནཾ ཨོསཀྐིཏཾ ནཱམ བྷཝིསྶཏི། ལོཀེ ཨེཝརཱུཔོ བུདྡྷོ ནཱམ ཨུཔྤཛྫི, ཏསྶ ཨཱིདིསཾ ནཱམ སཱསནཾ ཨཧོསཱིཏི སུཏམཏྟམེཝ བྷཝིསྶཏི། ཨིདཾ སནྡྷཱཡ བྷགཝཱ ཏཱཔསཔབྦཛྫཾ སཱསནསྶ ཝིནཱསམུཁནྟི ཨཱཧ།

    Kasmā pana tāpasapabbajjā sāsanassa vināsamukhanti vuttāti? Yasmā gacchantaṃ gacchantaṃ sāsanaṃ tāpasapabbajjāvasena osakkissati. Imasmiñhi sāsane pabbajitvā tisso sikkhā pūretuṃ asakkontaṃ lajjino sikkhākāmā – ‘‘natthi tayā saddhiṃ uposatho vā pavāraṇā vā saṅghakammaṃ vā’’ti jigucchitvā parivajjenti. So ‘‘dukkaraṃ khuradhārūpamaṃ sāsane paṭipattipūraṇaṃ dukkhaṃ, tāpasapabbajjā pana sukarā ceva bahujanasammatā cā’’ti vibbhamitvā tāpaso hoti. Aññe taṃ disvā – ‘‘kiṃ tayā kata’’nti pucchanti. So – ‘‘bhāriyaṃ tumhākaṃ sāsane kammaṃ, idha pana sachandacārino maya’’nti vadati. Sopi, yadi evaṃ ahampi ettheva pabbajāmīti tassa anusikkhanto tāpaso hoti. Evamaññepi aññepīti kamena tāpasāva bahukā honti. Tesaṃ uppannakāle sāsanaṃ osakkitaṃ nāma bhavissati. Loke evarūpo buddho nāma uppajji, tassa īdisaṃ nāma sāsanaṃ ahosīti sutamattameva bhavissati. Idaṃ sandhāya bhagavā tāpasapabbajjaṃ sāsanassa vināsamukhanti āha.

    ཀུདཱལཔིཊཀནྟི ཀནྡམཱུལཕལགྒཧཎཏྠཾ ཀུདཱལཉྩེཝ པིཊཀཉྩ། གཱམསཱམནྟཾ ཝཱཏི ཝིཛྫཱཙརཎསམྤདཱདཱིནི ཨནབྷིསམྦྷུཎནྟོ, ཀསིཀམྨཱདཱིཧི ཙ ཛཱིཝིཏཾ ནིཔྥཱདེཏུཾ དུཀྑནྟི མཉྙམཱནོ བཧུཛནཀུཧཱཔནཏྠཾ གཱམསཱམནྟེ ཝཱ ནིགམསཱམནྟེ ཝཱ ཨགྒིསཱལཾ ཀཏྭཱ སཔྤིཏེལདདྷིམདྷུཕཱཎིཏཏིལཏཎྜུལཱདཱིཧི ཙེཝ ནཱནཱདཱརཱུཧི ཙ ཧོམཀརཎཝསེན ཨགྒིཾ པརིཙརནྟོ ཨཙྪཏི།

    Kudālapiṭakanti kandamūlaphalaggahaṇatthaṃ kudālañceva piṭakañca. Gāmasāmantaṃ vāti vijjācaraṇasampadādīni anabhisambhuṇanto, kasikammādīhi ca jīvitaṃ nipphādetuṃ dukkhanti maññamāno bahujanakuhāpanatthaṃ gāmasāmante vā nigamasāmante vā aggisālaṃ katvā sappiteladadhimadhuphāṇitatilataṇḍulādīhi ceva nānādārūhi ca homakaraṇavasena aggiṃ paricaranto acchati.

    ཙཏུདྭཱརཾ ཨགཱརཾ ཀརིཏྭཱཏི ཙཏུམུཁཾ པཱནཱགཱརཾ ཀཏྭཱ ཏསྶ དྭཱརེ མཎྜཔཾ ཀཏྭཱ ཏཏྠ པཱནཱིཡཾ ཨུཔཊྛཔེཏྭཱ ཨཱགཏཱགཏེ པཱནཱིཡེན ཨཱཔུཙྪཏི། ཡམྤིསྶ ཨདྡྷིཀཱ ཀིལནྟཱ པཱནཱིཡཾ པིཝིཏྭཱ པརིཏུཊྛཱ བྷཏྟཔུཊཾ ཝཱ ཏཎྜུལཱདཱིནི ཝཱ དེནྟི, ཏཾ སབྦཾ གཧེཏྭཱ ཨམྦིལཡཱགུཨཱདཱིནི ཀཏྭཱ བཧུཏརཾ ཨཱམིསགཧཎཏྠཾ ཀེསཉྩི ཨནྣཾ དེཏི, ཀེསཉྩི བྷཏྟཔཙནབྷཱཛནཱདཱིནི། ཏེཧིཔི དིནྣཾ ཨཱམིསཾ ཝཱ པུབྦཎྞཱདཱིནི ཝཱ གཎྷཏི, ཏཱནི ཝཌྜྷིཡཱ པཡོཛེཏི། ཨེཝཾ ཝཌྜྷམཱནཝིབྷཝོ གོམཧིཾསདཱསཱིདཱསཔརིགྒཧཾ ཀརོཏི, མཧནྟཾ ཀུཊུམྦཾ སཎྛཔེཏི། ཨིམཾ སནྡྷཱཡེཏཾ ཝུཏྟཾ – ‘‘ཙཏུདྭཱརཾ ཨགཱརཾ ཀརིཏྭཱ ཨཙྪཏཱི’’ཏི། ‘‘ཏམཧཾ ཡཐཱསཏྟི ཡཐཱབལཾ པཊིཔཱུཛེསྶཱམཱི’’ཏི ཨིདཾ པནསྶ པཊིཔཏྟིམུཁཾ། ཨིམིནཱ ཧི མུཁེན སོ ཨེཝཾ པཊིཔཛྫཏཱིཏི། ཨེཏྟཱཝཏཱ ཙ བྷགཝཏཱ སབྦཱཔི ཏཱཔསཔབྦཛྫཱ ནིདྡིཊྛཱ ཧོནྟི།

    Catudvāraṃ agāraṃ karitvāti catumukhaṃ pānāgāraṃ katvā tassa dvāre maṇḍapaṃ katvā tattha pānīyaṃ upaṭṭhapetvā āgatāgate pānīyena āpucchati. Yampissa addhikā kilantā pānīyaṃ pivitvā parituṭṭhā bhattapuṭaṃ vā taṇḍulādīni vā denti, taṃ sabbaṃ gahetvā ambilayāguādīni katvā bahutaraṃ āmisagahaṇatthaṃ kesañci annaṃ deti, kesañci bhattapacanabhājanādīni. Tehipi dinnaṃ āmisaṃ vā pubbaṇṇādīni vā gaṇhati, tāni vaḍḍhiyā payojeti. Evaṃ vaḍḍhamānavibhavo gomahiṃsadāsīdāsapariggahaṃ karoti, mahantaṃ kuṭumbaṃ saṇṭhapeti. Imaṃ sandhāyetaṃ vuttaṃ – ‘‘catudvāraṃ agāraṃ karitvā acchatī’’ti. ‘‘Tamahaṃ yathāsatti yathābalaṃ paṭipūjessāmī’’ti idaṃ panassa paṭipattimukhaṃ. Iminā hi mukhena so evaṃ paṭipajjatīti. Ettāvatā ca bhagavatā sabbāpi tāpasapabbajjā niddiṭṭhā honti.

    ཀཐཾ? ཨཊྛཝིདྷཱ ཧི ཏཱཔསཱ – སཔུཏྟབྷརིཡཱ, ཨུཉྪཱཙརིཡཱ, ཨནགྒིཔཀྐིཀཱ, ཨསཱམཔཱཀཱ, ཨསྨམུཊྛིཀཱ, དནྟཝཀྐལིཀཱ, པཝཏྟཕལབྷོཛནཱ, པཎྜུཔལཱསིཀཱཏི། ཏཏྠ ཡེ ཀེཎིཡཛཊིལོ ཝིཡ ཀུཊུམྦཾ སཎྛཔེཏྭཱ ཝསནྟི, ཏེ སཔུཏྟབྷརིཡཱ ནཱམ།

    Kathaṃ? Aṭṭhavidhā hi tāpasā – saputtabhariyā, uñchācariyā, anaggipakkikā, asāmapākā, asmamuṭṭhikā, dantavakkalikā, pavattaphalabhojanā, paṇḍupalāsikāti. Tattha ye keṇiyajaṭilo viya kuṭumbaṃ saṇṭhapetvā vasanti, te saputtabhariyā nāma.

    ཡེ པན ‘‘སཔུཏྟདཱརབྷཱཝོ ནཱམ པབྦཛིཏསྶ ཨཡུཏྟོ’’ཏི ལཱཡནམདྡནཊྛཱནེསུ ཝཱིཧིམུགྒམཱསཏིལཱདཱིནི སངྐཌྜྷིཏྭཱ པཙིཏྭཱ པརིབྷུཉྫནྟི, ཏེ ཨུཉྪཱཙརིཡཱ ནཱམ།

    Ye pana ‘‘saputtadārabhāvo nāma pabbajitassa ayutto’’ti lāyanamaddanaṭṭhānesu vīhimuggamāsatilādīni saṅkaḍḍhitvā pacitvā paribhuñjanti, te uñchācariyā nāma.

    ཡེ ‘‘ཁལེན ཁལཾ ཝིཙརིཏྭཱ ཝཱིཧིཾ ཨཱཧརིཏྭཱ ཀོཊྚེཏྭཱ པརིབྷུཉྫནཾ ནཱམ ཨཡུཏྟ’’ནྟི གཱམནིགམེསུ ཏཎྜུལབྷིཀྑཾ གཧེཏྭཱ པཙིཏྭཱ པརིབྷུཉྫནྟི, ཏེ ཨནགྒིཔཀྐིཀཱ ནཱམ།

    Ye ‘‘khalena khalaṃ vicaritvā vīhiṃ āharitvā koṭṭetvā paribhuñjanaṃ nāma ayutta’’nti gāmanigamesu taṇḍulabhikkhaṃ gahetvā pacitvā paribhuñjanti, te anaggipakkikā nāma.

    ཡེ པན ‘‘ཀིཾ པབྦཛིཏསྶ སཱམཔཱཀེནཱ’’ཏི གཱམཾ པཝིསིཏྭཱ པཀྐབྷིཀྑམེཝ གཎྷནྟི , ཏེ ཨསཱམཔཱཀཱ ནཱམ།

    Ye pana ‘‘kiṃ pabbajitassa sāmapākenā’’ti gāmaṃ pavisitvā pakkabhikkhameva gaṇhanti , te asāmapākā nāma.

    ཡེ ‘‘དིཝསེ དིཝསེ བྷིཀྑཱཔརིཡེཊྛི ནཱམ དུཀྑཱ པབྦཛིཏསྶཱ’’ཏི མུཊྛིཔཱསཱཎེན ཨམྦཱཊཀཱདཱིནཾ རུཀྑཱནཾ ཏཙཾ ཀོཊྚེཏྭཱ ཁཱདནྟི, ཏེ ཨསྨམུཊྛིཀཱ ནཱམ།

    Ye ‘‘divase divase bhikkhāpariyeṭṭhi nāma dukkhā pabbajitassā’’ti muṭṭhipāsāṇena ambāṭakādīnaṃ rukkhānaṃ tacaṃ koṭṭetvā khādanti, te asmamuṭṭhikā nāma.

    ཡེ པན ‘‘པཱསཱཎེན ཏཙཾ ཀོཊྚེཏྭཱ ཝིཙརཎཾ ནཱམ དུཀྑ’’ནྟི དནྟེཧེཝ ཨུབྦཱཊེཏྭཱ ཁཱདནྟི, ཏེ དནྟཝཀྐལིཀཱ ནཱམ།

    Ye pana ‘‘pāsāṇena tacaṃ koṭṭetvā vicaraṇaṃ nāma dukkha’’nti danteheva ubbāṭetvā khādanti, te dantavakkalikā nāma.

    ཡེ ‘‘དནྟེཧི ཨུབྦཱཊེཏྭཱ ཁཱདནཾ ནཱམ དུཀྑཾ པབྦཛིཏསྶཱ’’ཏི ལེཌྜུདཎྜཱདཱིཧི པཧརིཏྭཱ པཏིཏཱནི ཕལཱནི པརིབྷུཉྫནྟི, ཏེ པཝཏྟཕལབྷོཛནཱ ནཱམ།

    Ye ‘‘dantehi ubbāṭetvā khādanaṃ nāma dukkhaṃ pabbajitassā’’ti leḍḍudaṇḍādīhi paharitvā patitāni phalāni paribhuñjanti, te pavattaphalabhojanā nāma.

    ཡེ པན ‘‘ལེཌྜུདཎྜཱདཱིཧི པཱཏེཏྭཱ པརིབྷོགོ ནཱམ ཨསཱརུཔྤོ པབྦཛིཏསྶཱ’’ཏི སཡཾ པཏིཏཱནེཝ པུཔྥཕལཔཎྜུཔལཱསཱདཱིནི ཁཱདནྟཱ ཡཱཔེནྟི, ཏེ པཎྜུཔལཱསིཀཱ ནཱམ།

    Ye pana ‘‘leḍḍudaṇḍādīhi pātetvā paribhogo nāma asāruppo pabbajitassā’’ti sayaṃ patitāneva pupphaphalapaṇḍupalāsādīni khādantā yāpenti, te paṇḍupalāsikā nāma.

    ཏེ ཏིཝིདྷཱ – ཨུཀྐཊྛམཛ྄ཛྷིམམུདུཀཝསེན། ཏཏྠ ཡེ ནིསིནྣཊྛཱནཏོ ཨནུཊྛཱཡ ཧཏྠེན པཱཔུཎནཊྛཱནེཝ པཏིཏཾ གཧེཏྭཱ ཁཱདནྟི, ཏེ ཨུཀྐཊྛཱ། ཡེ ཨེཀརུཀྑཏོ ཨཉྙཾ རུཀྑཾ ན གཙྪནྟི, ཏེ མཛ྄ཛྷིམཱ། ཡེ ཏཾ ཏཾ རུཀྑམཱུལཾ གནྟྭཱ པརིཡེསིཏྭཱ ཁཱདནྟི, ཏེ མུདུཀཱ།

    Te tividhā – ukkaṭṭhamajjhimamudukavasena. Tattha ye nisinnaṭṭhānato anuṭṭhāya hatthena pāpuṇanaṭṭhāneva patitaṃ gahetvā khādanti, te ukkaṭṭhā. Ye ekarukkhato aññaṃ rukkhaṃ na gacchanti, te majjhimā. Ye taṃ taṃ rukkhamūlaṃ gantvā pariyesitvā khādanti, te mudukā.

    ཨིམཱ པན ཨཊྛཔི ཏཱཔསཔབྦཛྫཱ ཨིམཱཧི ཙཏཱུཧིཡེཝ སངྒཧཾ གཙྪནྟི། ཀཐཾ? ཨེཏཱསུ ཧི སཔུཏྟབྷརིཡཱ ཙ ཨུཉྪཱཙརིཡཱ ཙ ཨགཱརཾ བྷཛནྟི། ཨནགྒིཔཀྐིཀཱ ཙ ཨསཱམཔཱཀཱ ཙ ཨགྱཱགཱརཾ བྷཛནྟི། ཨསྨམུཊྛིཀཱ ཙ དནྟཝཀྐལིཀཱ ཙ ཀནྡམཱུལཕལབྷོཛནཾ བྷཛནྟི། པཝཏྟཕལབྷོཛནཱ ཙ པཎྜུཔལཱསིཀཱ ཙ པཝཏྟཕལབྷོཛནཾ བྷཛནྟི། ཏེན ཝུཏྟཾ – ‘‘ཨེཏྟཱཝཏཱ ཙ བྷགཝཏཱ སབྦཱཔི ཏཱཔསཔབྦཛྫཱ ནིདྡིཊྛཱ ཧོནྟཱི’’ཏི།

    Imā pana aṭṭhapi tāpasapabbajjā imāhi catūhiyeva saṅgahaṃ gacchanti. Kathaṃ? Etāsu hi saputtabhariyā ca uñchācariyā ca agāraṃ bhajanti. Anaggipakkikā ca asāmapākā ca agyāgāraṃ bhajanti. Asmamuṭṭhikā ca dantavakkalikā ca kandamūlaphalabhojanaṃ bhajanti. Pavattaphalabhojanā ca paṇḍupalāsikā ca pavattaphalabhojanaṃ bhajanti. Tena vuttaṃ – ‘‘ettāvatā ca bhagavatā sabbāpi tāpasapabbajjā niddiṭṭhā hontī’’ti.

    ༢༨༡-༢༨༢. ཨིདཱནི བྷགཝཱ སཱཙརིཡཀསྶ ཨམྦཊྛསྶ ཝིཛྫཱཙརཎསམྤདཱཡ ཨཔཱཡམུཁམྤི ཨཔྤཏྟབྷཱཝཾ དསྶེཏུཾ ཏཾ ཀིཾ མཉྙསི ཨམྦཊྛཱཏིཨཱདིམཱཧ། ཏཾ ཨུཏྟཱནཏྠམེཝ། ཨཏྟནཱ ཨཱཔཱཡིཀོཔི ཨཔརིཔཱུརམཱནོཏི ཨཏྟནཱ ཝིཛྫཱཙརཎསམྤདཱཡ ཨཱཔཱཡིཀེནཱཔི ཨཔརིཔཱུརམཱནེན།

    281-282. Idāni bhagavā sācariyakassa ambaṭṭhassa vijjācaraṇasampadāya apāyamukhampi appattabhāvaṃ dassetuṃ taṃ kiṃ maññasi ambaṭṭhātiādimāha. Taṃ uttānatthameva. Attanā āpāyikopi aparipūramānoti attanā vijjācaraṇasampadāya āpāyikenāpi aparipūramānena.

    པུབྦཀཨིསིབྷཱཝཱནུཡོགཝཎྞནཱ

    Pubbakaisibhāvānuyogavaṇṇanā

    ༢༨༣. དཏྟིཀནྟི དིནྣཀཾ། སམྨུཁཱིབྷཱཝམྤི ན དདཱཏཱིཏི ཀསྨཱ ན དདཱཏི? སོ ཀིར སམྨུཁཱ ཨཱཝཊྚནིཾ ནཱམ ཝིཛྫཾ ཛཱནཱཏི། ཡདཱ རཱཛཱ མཧཱརཧེན ཨལངྐཱརེན ཨལངྐཏོ ཧོཏི, ཏདཱ རཉྙོ སམཱིཔེ ཋཏྭཱ ཏསྶ ཨལངྐཱརསྶ ནཱམཾ གཎྷཏི། ཏསྶ རཱཛཱ ནཱམེ གཧིཏེ ན དེམཱིཏི ཝཏྟུཾ ན སཀྐོཏི། དཏྭཱ པུན ཚཎདིཝསེ ཨལངྐཱརཾ ཨཱཧརཐཱཏི ཝཏྭཱ, ནཏྠི, དེཝ, ཏུམྷེཧི བྲཱཧྨཎསྶ དིནྣོཏི ཝུཏྟོ, ‘‘ཀསྨཱ མེ དིནྣོ’’ཏི པུཙྪི། ཏེ ཨམཙྩཱ ‘སོ བྲཱཧྨཎོ སམྨུཁཱ ཨཱཝཊྚནིམཱཡཾ ཛཱནཱཏི། ཏཱཡ ཏུམྷེ ཨཱཝཊྚེཏྭཱ གཧེཏྭཱ གཙྪཏཱི’ཏི ཨཱཧཾསུ། ཨཔརེ རཉྙཱ སཧ ཏསྶ ཨཏིསཧཱཡབྷཱཝཾ ཨསཧནྟཱ ཨཱཧཾསུ – ‘‘དེཝ, ཨེཏསྶ བྲཱཧྨཎསྶ སརཱིརེ སངྑཕལིཏཀུཊྛཾ ནཱམ ཨཏྠི། ཏུམྷེ ཨེཏཾ དིསྭཱཝ ཨཱལིངྒཐ པརཱམསཐ, ཨིདཉྩ ཀུཊྛཾ ནཱམ ཀཱཡསཾསགྒཝསེན ཨནུགཙྪཏི, མཱ ཨེཝཾ ཀརོཐཱ’’ཏི། ཏཏོ པཊྛཱཡ ཏསྶ རཱཛཱ སམྨུཁཱིབྷཱཝཾ ན དེཏི།

    283.Dattikanti dinnakaṃ. Sammukhībhāvampi na dadātīti kasmā na dadāti? So kira sammukhā āvaṭṭaniṃ nāma vijjaṃ jānāti. Yadā rājā mahārahena alaṅkārena alaṅkato hoti, tadā rañño samīpe ṭhatvā tassa alaṅkārassa nāmaṃ gaṇhati. Tassa rājā nāme gahite na demīti vattuṃ na sakkoti. Datvā puna chaṇadivase alaṅkāraṃ āharathāti vatvā, natthi, deva, tumhehi brāhmaṇassa dinnoti vutto, ‘‘kasmā me dinno’’ti pucchi. Te amaccā ‘so brāhmaṇo sammukhā āvaṭṭanimāyaṃ jānāti. Tāya tumhe āvaṭṭetvā gahetvā gacchatī’ti āhaṃsu. Apare raññā saha tassa atisahāyabhāvaṃ asahantā āhaṃsu – ‘‘deva, etassa brāhmaṇassa sarīre saṅkhaphalitakuṭṭhaṃ nāma atthi. Tumhe etaṃ disvāva āliṅgatha parāmasatha, idañca kuṭṭhaṃ nāma kāyasaṃsaggavasena anugacchati, mā evaṃ karothā’’ti. Tato paṭṭhāya tassa rājā sammukhībhāvaṃ na deti.

    ཡསྨཱ པན སོ བྲཱཧྨཎོ པཎྜིཏོ ཁཏྟཝིཛྫཱཡ ཀུསལོ, ཏེན སཧ མནྟེཏྭཱ ཀཏཀམྨཾ ནཱམ ན ཝིརུཛ྄ཛྷཏི, ཏསྨཱ སཱཎིཔཱཀཱརསྶ ཨནྟོ ཋཏྭཱ བཧི ཋིཏེན ཏེན སདྡྷིཾ མནྟེཏི། ཏཾ སནྡྷཱཡ ཝུཏྟཾ ‘‘ཏིརོ དུསྶནྟེན མནྟེཏཱི’’ཏི། ཏཏྠ ཏིརོདུསྶནྟེནཱཏི ཏིརོདུསྶེན། ཨཡམེཝ ཝཱ པཱཋོ། དྷམྨིཀནྟི ཨནཝཛྫཾ། པཡཱཏནྟི ཨབྷིཧརིཏྭཱ དིནྣཾ། ཀཐཾ ཏསྶ རཱཛཱཏི ཡསྶ རཉྙོ བྲཱཧྨཎོ ཨཱིདིསཾ བྷིཀྑཾ པཊིགྒཎྷེཡྻ, ཀཐཾ ཏསྶ བྲཱཧྨཎསྶ སོ རཱཛཱ སམྨུཁཱིབྷཱཝམྤི ན དདེཡྻ། ཨཡཾ པན ཨདིནྣཀཾ མཱཡཱཡ གཎྷཏི, ཏེནསྶ སམྨུཁཱིབྷཱཝཾ རཱཛཱ ན དེཏཱིཏི ནིཊྛམེཏྠ གནྟབྦནྟི ཨཡམེཏྠ ཨདྷིཔྤཱཡོ། ‘‘ཨིདཾ པན ཀཱརཎཾ ཋཔེཏྭཱ རཱཛཱནཉྩེཝ བྲཱཧྨཎཉྩ ན ཨཉྙོ ཀོཙི ཛཱནཱཏི། ཏདེཏཾ ཨེཝཾ རཧསྶམྤི པཊིཙྪནྣམྤི ཨདྡྷཱ སབྦཉྙཱུ སམཎོ གོཏམོཏི ནིཊྛཾ གམིསྶཏཱི’’ཏི བྷགཝཱ པཀཱསེསི།

    Yasmā pana so brāhmaṇo paṇḍito khattavijjāya kusalo, tena saha mantetvā katakammaṃ nāma na virujjhati, tasmā sāṇipākārassa anto ṭhatvā bahi ṭhitena tena saddhiṃ manteti. Taṃ sandhāya vuttaṃ ‘‘tiro dussantena mantetī’’ti. Tattha tirodussantenāti tirodussena. Ayameva vā pāṭho. Dhammikanti anavajjaṃ. Payātanti abhiharitvā dinnaṃ. Kathaṃ tassa rājāti yassa rañño brāhmaṇo īdisaṃ bhikkhaṃ paṭiggaṇheyya, kathaṃ tassa brāhmaṇassa so rājā sammukhībhāvampi na dadeyya. Ayaṃ pana adinnakaṃ māyāya gaṇhati, tenassa sammukhībhāvaṃ rājā na detīti niṭṭhamettha gantabbanti ayamettha adhippāyo. ‘‘Idaṃ pana kāraṇaṃ ṭhapetvā rājānañceva brāhmaṇañca na añño koci jānāti. Tadetaṃ evaṃ rahassampi paṭicchannampi addhā sabbaññū samaṇo gotamoti niṭṭhaṃ gamissatī’’ti bhagavā pakāsesi.

    ༢༨༤. ཨིདཱནི ཨཡཉྩ ཨམྦཊྛོ, ཨཱཙརིཡོ ཙསྶ མནྟེ ནིསྶཱཡ ཨཏིམཱནིནོ། ཏེན ཏེསཾ མནྟནིསྶིཏམཱནནིམྨདནཏྠཾ ཨུཏྟརི དེསནཾ ཝཌྜྷེནྟོ ཏཾ ཀིཾ མཉྙསི, ཨམྦཊྛ, ཨིདྷ རཱཛཱཏིཨཱདིམཱཧ། ཏཏྠ རཐཱུཔཏྠརེཏི རཐམྷི རཉྙོ ཋཱནཏྠཾ ཨཏྠརིཏྭཱ སཛྫིཏཔདེསེ། ཨུགྒེཧི ཝཱཏི ཨུགྒཏུགྒཏེཧི ཝཱ ཨམཙྩེཧི། རཱཛཉྙེཧཱིཏི ཨནབྷིསིཏྟཀུམཱརེཧི། ཀིཉྩིདེཝ མནྟནནྟི ཨསུཀསྨིཾ དེསེ ཏལཱ༹ཀཾ ཝཱ མཱཏིཀཾ ཝཱ ཀཱཏུཾ ཝཊྚཏི, ཨསུཀསྨིཾ གཱམཾ ཝཱ ནིགམཾ ཝཱ ནགརཾ ཝཱ ནིཝེསེཏུནྟི ཨེཝརཱུཔཾ པཱཀཊམནྟནཾ། ཏདེཝ མནྟནནྟི ཡཾ རཉྙཱ མནྟིཏཾ ཏདེཝ། ཏཱདིསེཧིཡེཝ སཱིསུཀྑེཔབྷམུཀྑེཔཱདཱིཧི ཨཱཀཱརེཧི མནྟེཡྻ། རཱཛབྷཎིཏནྟི ཡཐཱ རཉྙཱ བྷཎིཏཾ, ཏསྶཏྠསྶ སཱདྷནསམཏྠཾ། སོཔི ཏསྶཏྠསྶ སཱདྷནསམཏྠམེཝ བྷཎིཏཾ བྷཎཏཱིཏི ཨཏྠོ།

    284. Idāni ayañca ambaṭṭho, ācariyo cassa mante nissāya atimānino. Tena tesaṃ mantanissitamānanimmadanatthaṃ uttari desanaṃ vaḍḍhento taṃ kiṃ maññasi, ambaṭṭha, idha rājātiādimāha. Tattha rathūpatthareti rathamhi rañño ṭhānatthaṃ attharitvā sajjitapadese. Uggehi vāti uggatuggatehi vā amaccehi. Rājaññehīti anabhisittakumārehi. Kiñcideva mantananti asukasmiṃ dese taḷākaṃ vā mātikaṃ vā kātuṃ vaṭṭati, asukasmiṃ gāmaṃ vā nigamaṃ vā nagaraṃ vā nivesetunti evarūpaṃ pākaṭamantanaṃ. Tadeva mantananti yaṃ raññā mantitaṃ tadeva. Tādisehiyeva sīsukkhepabhamukkhepādīhi ākārehi manteyya. Rājabhaṇitanti yathā raññā bhaṇitaṃ, tassatthassa sādhanasamatthaṃ. Sopi tassatthassa sādhanasamatthameva bhaṇitaṃ bhaṇatīti attho.

    ༢༨༥. པཝཏྟཱརོཏི པཝཏྟཡིཏཱརོ། ཡེསནྟི ཡེསཾ སནྟཀཾ། མནྟཔདནྟི ཝེདསངྑཱཏཾ མནྟམེཝ ། གཱིཏནྟི ཨཊྛཀཱདཱིཧི དསཧི པོརཱཎཀབྲཱཧྨཎེཧི སརསམྤཏྟིཝསེན སཛ྄ཛྷཱཡིཏཾ། པཝུཏྟནྟི ཨཉྙེསཾ ཝུཏྟཾ, ཝཱཙིཏནྟི ཨཏྠོ། སམིཧིཏནྟི སམུཔབྱཱུལ༹ྷཾ རཱསིཀཏཾ, པིཎྜཾ ཀཏྭཱ ཋཔིཏནྟི ཨཏྠོ། ཏདནུགཱཡནྟཱིཏི ཨེཏརཧི བྲཱཧྨཎཱ ཏཾ ཏེཧི པུབྦེ གཱིཏཾ ཨནུགཱཡནྟི ཨནུསཛ྄ཛྷཱཡནྟི། ཏདནུབྷཱསནྟཱིཏི ཏཾ ཨནུབྷཱསནྟི, ཨིདཾ པུརིམསྶེཝ ཝེཝཙནཾ། བྷཱསིཏམནུབྷཱསནྟཱིཏི ཏེཧི བྷཱསིཏཾ སཛ྄ཛྷཱཡིཏཾ ཨནུསཛ྄ཛྷཱཡནྟི། ཝཱཙིཏམནུཝཱཙེནྟཱིཏི ཏེཧི ཨཉྙེསཾ ཝཱཙིཏཾ ཨནུཝཱཙེནྟི།

    285.Pavattāroti pavattayitāro. Yesanti yesaṃ santakaṃ. Mantapadanti vedasaṅkhātaṃ mantameva . Gītanti aṭṭhakādīhi dasahi porāṇakabrāhmaṇehi sarasampattivasena sajjhāyitaṃ. Pavuttanti aññesaṃ vuttaṃ, vācitanti attho. Samihitanti samupabyūḷhaṃ rāsikataṃ, piṇḍaṃ katvā ṭhapitanti attho. Tadanugāyantīti etarahi brāhmaṇā taṃ tehi pubbe gītaṃ anugāyanti anusajjhāyanti. Tadanubhāsantīti taṃ anubhāsanti, idaṃ purimasseva vevacanaṃ. Bhāsitamanubhāsantīti tehi bhāsitaṃ sajjhāyitaṃ anusajjhāyanti. Vācitamanuvācentīti tehi aññesaṃ vācitaṃ anuvācenti.

    སེཡྻཐིདནྟི ཏེ ཀཏམེཧི ཨཏྠོ། ཨཊྛཀོཏིཨཱདཱིནི ཏེསཾ ནཱམཱནི། ཏེ ཀིར དིབྦེན ཙཀྑུནཱ ཨོལོཀེཏྭཱ པརཱུཔགྷཱཏཾ ཨཀཏྭཱ ཀསྶཔསམྨཱསམྦུདྡྷསྶ བྷགཝཏོ པཱཝཙནེན སཧ སཾསནྡིཏྭཱ མནྟེ གནྠིཾསུ། ཨཔརཱཔརེ པན བྲཱཧྨཎཱ པཱཎཱཏིཔཱཏཱདཱིནི པཀྑིཔིཏྭཱ ཏཡོ ཝེདེ བྷིནྡིཏྭཱ བུདྡྷཝཙནེན སདྡྷིཾ ཝིརུདྡྷེ ཨཀཾསུ། ནེཏཾ ཋཱནཾ ཝིཛྫཏཱིཏི ཡེན ཏྭཾ ཨིསི བྷཝེཡྻཱསི, ཨེཏཾ ཀཱརཎཾ ན ཝིཛྫཏི། ཨིདྷ བྷགཝཱ ཡསྨཱ – ‘‘ཨེས པུཙྪིཡམཱནོཔི, ཨཏྟནོ ཨཝཏྠརཎབྷཱཝཾ ཉཏྭཱ པཊིཝཙནཾ ན དསྶཏཱི’’ཏི ཛཱནཱཏི, ཏསྨཱ པཊིཉྙཾ ཨགཧེཏྭཱཝ ཏཾ ཨིསིབྷཱཝཾ པཊིཀྑིཔི།

    Seyyathidanti te katamehi attho. Aṭṭhakotiādīni tesaṃ nāmāni. Te kira dibbena cakkhunā oloketvā parūpaghātaṃ akatvā kassapasammāsambuddhassa bhagavato pāvacanena saha saṃsanditvā mante ganthiṃsu. Aparāpare pana brāhmaṇā pāṇātipātādīni pakkhipitvā tayo vede bhinditvā buddhavacanena saddhiṃ viruddhe akaṃsu. Netaṃṭhānaṃ vijjatīti yena tvaṃ isi bhaveyyāsi, etaṃ kāraṇaṃ na vijjati. Idha bhagavā yasmā – ‘‘esa pucchiyamānopi, attano avattharaṇabhāvaṃ ñatvā paṭivacanaṃ na dassatī’’ti jānāti, tasmā paṭiññaṃ agahetvāva taṃ isibhāvaṃ paṭikkhipi.

    ༢༨༦. ཨིདཱནི ཡསྨཱ ཏེ པོརཱཎཱ དས བྲཱཧྨཎཱ ནིརཱམགནྡྷཱ ཨནིཏྠིགནྡྷཱ རཛོཛལླདྷརཱ བྲཧྨཙཱརིནོ ཨརཉྙཱཡཏནེ པབྦཏཔཱདེསུ ཝནམཱུལཕལཱཧཱརཱ ཝསིཾསུ། ཡདཱ ཀཏྠཙི གནྟུཀཱམཱ ཧོནྟི, ཨིདྡྷིཡཱ ཨཱཀཱསེནེཝ གཙྪནྟི, ནཏྠི ཏེསཾ ཡཱནེན ཀིཙྩཾ། སབྦདིསཱསུ ཙ ནེསཾ མེཏྟཱདིབྲཧྨཝིཧཱརབྷཱཝནཱཝ ཨཱརཀྑཱ ཧོཏི, ནཏྠི ཏེསཾ པཱཀཱརཔུརིསགུཏྟཱིཧི ཨཏྠོ། ཨིམིནཱ ཙ ཨམྦཊྛེན སུཏཔུབྦཱ ཏེསཾ པཊིཔཏྟི; ཏསྨཱ ཨིམསྶ སཱཙརིཡཀསྶ ཏེསཾ པཊིཔཏྟིཏོ ཨཱརཀབྷཱཝཾ དསྶེཏུཾ – ‘‘ཏཾ ཀིཾ མཉྙསི, ཨམྦཊྛཱ’’ཏིཨཱདིམཱཧ།

    286. Idāni yasmā te porāṇā dasa brāhmaṇā nirāmagandhā anitthigandhā rajojalladharā brahmacārino araññāyatane pabbatapādesu vanamūlaphalāhārā vasiṃsu. Yadā katthaci gantukāmā honti, iddhiyā ākāseneva gacchanti, natthi tesaṃ yānena kiccaṃ. Sabbadisāsu ca nesaṃ mettādibrahmavihārabhāvanāva ārakkhā hoti, natthi tesaṃ pākārapurisaguttīhi attho. Iminā ca ambaṭṭhena sutapubbā tesaṃ paṭipatti; tasmā imassa sācariyakassa tesaṃ paṭipattito ārakabhāvaṃ dassetuṃ – ‘‘taṃ kiṃ maññasi, ambaṭṭhā’’tiādimāha.

    ཏཏྠ ཝིཙིཏཀཱལ༹ཀནྟི ཝིཙིནིཏྭཱ ཨཔནཱིཏཀཱལ༹ཀཾ། ཝེཋཀནཏཔསྶཱཧཱིཏི དུསྶཔཊྚདུསྶཝེཎི ཨཱདཱིཧི ཝེཋཀེཧི ནམིཏཕཱསུཀཱཧི། ཀུཏྟཝཱལེཧཱིཏི སོབྷཱཀརཎཏྠཾ ཀཔྤེཏུཾ, ཡུཏྟཊྛཱནེསུ ཀཔྤིཏཝཱལེཧི། ཨེཏྠ ཙ ཝལ༹ཝཱནཾཡེཝ ཝཱལཱ ཀཔྤིཏཱ, ན རཐཱནཾ, ཝལ༹ཝཔཡུཏྟཏྟཱ པན རཐཱཔི ‘‘ཀུཏྟཝཱལཱ’’ཏི ཝུཏྟཱ། ཨུཀྐིཎྞཔརིཁཱསཱུཏི ཁཏཔརིཁཱསུ། ཨོཀྑིཏྟཔལིགྷཱསཱུཏི ཋཔིཏཔལིགྷཱསུ། ནགརཱུཔཀཱརིཀཱསཱུཏི ཨེཏྠ ཨུཔཀཱརིཀཱཏི པརེསཾ ཨཱརོཧནིཝཱརཎཏྠཾ སམནྟཱ ནགརཾ པཱཀཱརསྶ ཨདྷོབྷཱགེ ཀཏསུདྷཱཀམྨཾ ཝུཙྩཏི། ཨིདྷ པན ཏཱཧི ཨུཔཀཱརིཀཱཧི ཡུཏྟཱནི ནགརཱནེཝ ‘‘ནགརཱུཔཀཱརིཀཱཡོ’’ཏི ཨདྷིཔྤེཏཱནི། རཀྑཱཔེནྟཱིཏི ཏཱདིསེསུ ནགརེསུ ཝསནྟཱཔི ཨཏྟཱནཾ རཀྑཱཔེནྟི། ཀངྑཱཏི ‘‘སབྦཉྙཱུ, ན སབྦཉྙཱུ’’ཏི ཨེཝཾ སཾསཡོ། ཝིམཏཱིཏི ཏསྶེཝ ཝེཝཙནཾ, ཝིརཱུཔཱ མཏི, ཝིནིཙྪིནིཏུཾ ཨསམཏྠཱཏི ཨཏྠོ། ཨིདཾ བྷགཝཱ ‘‘ཨམྦཊྛསྶ ཨིམིནཱ ཨཏྟབྷཱཝེན མགྒཔཱཏུབྷཱཝོ ནཏྠི, ཀེཝལཾ དིཝསོ ཝཱིཏིཝཏྟཏི, ཨཡཾ ཁོ པན ལཀྑཎཔརིཡེསནཏྠཾ ཨཱགཏོ, ཏམྤི ཀིཙྩཾ ནསྶརཏི། ཧནྡསྶ སཏིཛནནཏྠཾ ནཡཾ དེམཱི’’ཏི ཨཱཧ།

    Tattha vicitakāḷakanti vicinitvā apanītakāḷakaṃ. Veṭhakanatapassāhīti dussapaṭṭadussaveṇi ādīhi veṭhakehi namitaphāsukāhi. Kuttavālehīti sobhākaraṇatthaṃ kappetuṃ, yuttaṭṭhānesu kappitavālehi. Ettha ca vaḷavānaṃyeva vālā kappitā, na rathānaṃ, vaḷavapayuttattā pana rathāpi ‘‘kuttavālā’’ti vuttā. Ukkiṇṇaparikhāsūti khataparikhāsu. Okkhittapalighāsūti ṭhapitapalighāsu. Nagarūpakārikāsūti ettha upakārikāti paresaṃ ārohanivāraṇatthaṃ samantā nagaraṃ pākārassa adhobhāge katasudhākammaṃ vuccati. Idha pana tāhi upakārikāhi yuttāni nagarāneva ‘‘nagarūpakārikāyo’’ti adhippetāni. Rakkhāpentīti tādisesu nagaresu vasantāpi attānaṃ rakkhāpenti. Kaṅkhāti ‘‘sabbaññū, na sabbaññū’’ti evaṃ saṃsayo. Vimatīti tasseva vevacanaṃ, virūpā mati, vinicchinituṃ asamatthāti attho. Idaṃ bhagavā ‘‘ambaṭṭhassa iminā attabhāvena maggapātubhāvo natthi, kevalaṃ divaso vītivattati, ayaṃ kho pana lakkhaṇapariyesanatthaṃ āgato, tampi kiccaṃ nassarati. Handassa satijananatthaṃ nayaṃ demī’’ti āha.

    དྭེལཀྑཎདསྶནཝཎྞནཱ

    Dvelakkhaṇadassanavaṇṇanā

    ༢༨༧. ཨེཝཾ ཝཏྭཱ པན ཡསྨཱ བུདྡྷཱནཾ ནིསིནྣཱནཾ ཝཱ ནིཔནྣཱནཾ ཝཱ ཀོཙི ལཀྑཎཾ པརིཡེསིཏུཾ ན སཀྐོཏི, ཋིཏཱནཾ པན ཙངྐམནྟཱནཾ ཝཱ སཀྐོཏི། ཨཱཙིཎྞཉྩེཏཾ བུདྡྷཱནཾ ལཀྑཎཔརིཡེསནཏྠཾ ཨཱགཏབྷཱཝཾ ཉཏྭཱ ཨུཊྛཱཡཱསནཱ ཙངྐམཱདྷིཊྛཱནཾ ནཱམ, ཏེན བྷགཝཱ ཨུཊྛཱཡཱསནཱ བཧི ནིཀྑནྟོ། ཏསྨཱ ཨཐ ཁོ བྷགཝཱཏིཨཱདི ཝུཏྟཾ།

    287. Evaṃ vatvā pana yasmā buddhānaṃ nisinnānaṃ vā nipannānaṃ vā koci lakkhaṇaṃ pariyesituṃ na sakkoti, ṭhitānaṃ pana caṅkamantānaṃ vā sakkoti. Āciṇṇañcetaṃ buddhānaṃ lakkhaṇapariyesanatthaṃ āgatabhāvaṃ ñatvā uṭṭhāyāsanā caṅkamādhiṭṭhānaṃ nāma, tena bhagavā uṭṭhāyāsanā bahi nikkhanto. Tasmā atha kho bhagavātiādi vuttaṃ.

    སམནྣེསཱིཏི གཝེསི, ཨེཀཾ དྭེཏི ཝཱ གཎཡནྟོ སམཱནཡི། ཡེབྷུཡྻེནཱཏི པཱཡེན, བཧུཀཱནི ཨདྡས, ཨཔྤཱནི ན ཨདྡསཱཏི ཨཏྠོ། ཏཏོ ཡཱནི ན ཨདྡས ཏེསཾ དཱིཔནཏྠཾ ཝུཏྟཾ – ‘‘ཋཔེཏྭཱ དྭེ’’ཏི། ཀངྑཏཱིཏི ‘‘ཨཧོ ཝཏ པསྶེཡྻ’’ནྟི པཏྠནཾ ཨུཔྤཱདེཏི། ཝིཙིཀིཙྪཏཱིཏི ཏཏོ ཏཏོ ཏཱནི ཝིཙིནནྟོ ཀིཙྪཏི ན སཀྐོཏི དཊྛུཾ། ནཱདྷིམུཙྩཏཱིཏི ཏཱཡ ཝིཙིཀིཙྪཱཡ སནྣིཊྛཱནཾ ན གཙྪཏི། ན སམྤསཱིདཏཱིཏི ཏཏོ – ‘‘པརིཔུཎྞལཀྑཎོ ཨཡ’’ནྟི བྷགཝཏི པསཱདཾ ནཱཔཛྫཏི། ཀངྑཱཡ ཝཱ དུབྦལཱ ཝིམཏི ཝུཏྟཱ, ཝིཙིཀིཙྪཱཡ མཛ྄ཛྷིམཱ, ཨནདྷིམུཙྩནཏཱཡ བལཝཏཱི, ཨསམྤསཱདེན ཏེཧི ཏཱིཧི དྷམྨེཧི ཙིཏྟསྶ ཀཱལུསིཡབྷཱཝོ། ཀོསོཧིཏེཏི ཝཏྠིཀོསེན པཊིཙྪནྣེ། ཝཏྠགུཡ྄ཧེཏི ཨངྒཛཱཏེ བྷགཝཏོ ཧི ཝརཝཱརཎསྶེཝ ཀོསོཧིཏཾ ཝཏྠགུཡ྄ཧཾ སུཝཎྞཝཎྞཾ པདུམགབྦྷསམཱནཾ། ཏཾ སོ ཝཏྠཔཊིཙྪནྣཏྟཱ ཨཔསྶནྟོ, ཨནྟོམུཁགཏཱཡ ཙ ཛིཝ྄ཧཱཡ པཧཱུཏབྷཱཝཾ ཨསལླཀྑེནྟོ ཏེསུ དྭཱིསུ ལཀྑཎེསུ ཀངྑཱི ཨཧོསི ཝིཙིཀིཙྪཱི།

    Samannesīti gavesi, ekaṃ dveti vā gaṇayanto samānayi. Yebhuyyenāti pāyena, bahukāni addasa, appāni na addasāti attho. Tato yāni na addasa tesaṃ dīpanatthaṃ vuttaṃ – ‘‘ṭhapetvā dve’’ti. Kaṅkhatīti ‘‘aho vata passeyya’’nti patthanaṃ uppādeti. Vicikicchatīti tato tato tāni vicinanto kicchati na sakkoti daṭṭhuṃ. Nādhimuccatīti tāya vicikicchāya sanniṭṭhānaṃ na gacchati. Na sampasīdatīti tato – ‘‘paripuṇṇalakkhaṇo aya’’nti bhagavati pasādaṃ nāpajjati. Kaṅkhāya vā dubbalā vimati vuttā, vicikicchāya majjhimā, anadhimuccanatāya balavatī, asampasādena tehi tīhi dhammehi cittassa kālusiyabhāvo. Kosohiteti vatthikosena paṭicchanne. Vatthaguyheti aṅgajāte bhagavato hi varavāraṇasseva kosohitaṃ vatthaguyhaṃ suvaṇṇavaṇṇaṃ padumagabbhasamānaṃ. Taṃ so vatthapaṭicchannattā apassanto, antomukhagatāya ca jivhāya pahūtabhāvaṃ asallakkhento tesu dvīsu lakkhaṇesu kaṅkhī ahosi vicikicchī.

    ༢༨༨. ཏཐཱརཱུཔནྟི ཏཾ རཱུཔཾ། ཀིམེཏྠ ཨཉྙེན ཝཏྟབྦཾ? ཝུཏྟམེཏཾ ནཱགསེནཏྠེརེནེཝ མིལིནྡརཉྙཱ པུཊྛེན – ‘‘དུཀྐརཾ, བྷནྟེ, ནཱགསེན, བྷགཝཏཱ ཀཏནྟི། ཀིཾ མཧཱརཱཛཱཏི? མཧཱཛནེན ཧིརིཀརཎོཀཱསཾ བྲཧྨཱཡུ བྲཱཧྨཎསྶ ཙ ཨནྟེཝཱསི ཨུཏྟརསྶ ཙ, བཱཝརིསྶ ཨནྟེཝཱསཱིནཾ སོལ༹སབྲཱཧྨཎཱནཉྩ , སེལསྶ བྲཱཧྨཎསྶ ཙ ཨནྟེཝཱསཱིནཾ ཏིསཏམཱཎཝཱནཉྩ དསྶེསི, བྷནྟེཏི། ན, མཧཱརཱཛ, བྷགཝཱ གུཡ྄ཧཾ དསྶེསི། ཚཱཡཾ བྷགཝཱ དསྶེསི། ཨིདྡྷིཡཱ ཨབྷིསངྑརིཏྭཱ ནིཝཱསནནིཝཏྠཾ ཀཱཡབནྡྷནབདྡྷཾ ཙཱིཝརཔཱརུཏཾ ཚཱཡཱརཱུཔཀམཏྟཾ དསྶེསི མཧཱརཱཛཱཏི། ཚཱཡཾ དིཊྛེ སཏི དིཊྛཾཡེཝ ནནུ, བྷནྟེཏི? ཏིཊྛཏེཏཾ, མཧཱརཱཛ, ཧདཡརཱུཔཾ དིསྭཱ བུཛ྄ཛྷནཀསཏྟོ བྷཝེཡྻ, ཧདཡམཾསཾ ནཱིཧརིཏྭཱ དསྶེཡྻ སམྨཱསམྦུདྡྷོཏི། ཀལློསི, བྷནྟེ, ནཱགསེནཱ’’ཏི།

    288.Tathārūpanti taṃ rūpaṃ. Kimettha aññena vattabbaṃ? Vuttametaṃ nāgasenatthereneva milindaraññā puṭṭhena – ‘‘dukkaraṃ, bhante, nāgasena, bhagavatā katanti. Kiṃ mahārājāti? Mahājanena hirikaraṇokāsaṃ brahmāyu brāhmaṇassa ca antevāsi uttarassa ca, bāvarissa antevāsīnaṃ soḷasabrāhmaṇānañca , selassa brāhmaṇassa ca antevāsīnaṃ tisatamāṇavānañca dassesi, bhanteti. Na, mahārāja, bhagavā guyhaṃ dassesi. Chāyaṃ bhagavā dassesi. Iddhiyā abhisaṅkharitvā nivāsananivatthaṃ kāyabandhanabaddhaṃ cīvarapārutaṃ chāyārūpakamattaṃ dassesi mahārājāti. Chāyaṃ diṭṭhe sati diṭṭhaṃyeva nanu, bhanteti? Tiṭṭhatetaṃ, mahārāja, hadayarūpaṃ disvā bujjhanakasatto bhaveyya, hadayamaṃsaṃ nīharitvā dasseyya sammāsambuddhoti. Kallosi, bhante, nāgasenā’’ti.

    ནིནྣཱམེཏྭཱཏི ནཱིཧརིཏྭཱ། ཨནུམསཱིཏི ཀཐིནསཱུཙིཾ ཝིཡ ཀཏྭཱ ཨནུམཛྫི, ཏཐཱཀརཎེན ཙེཏྠ མུདུབྷཱཝོ, ཀཎྞསོཏཱནུམསནེན དཱིགྷབྷཱཝོ, ནཱསིཀསོཏཱནུམསནེན ཏནུབྷཱཝོ, ནལཱཊཙྪཱདནེན པུཐུལབྷཱཝོ པཀཱསིཏོཏི ཝེདིཏབྦོ།

    Ninnāmetvāti nīharitvā. Anumasīti kathinasūciṃ viya katvā anumajji, tathākaraṇena cettha mudubhāvo, kaṇṇasotānumasanena dīghabhāvo, nāsikasotānumasanena tanubhāvo, nalāṭacchādanena puthulabhāvo pakāsitoti veditabbo.

    ༢༨༩. པཊིམཱནེནྟོཏི ཨཱགམེནྟོ, ཨཱགམནམསྶ པཏྠེནྟོ ཨུདིཀྑནྟོཏི ཨཏྠོ།

    289.Paṭimānentoti āgamento, āgamanamassa patthento udikkhantoti attho.

    ༢༩༠. ཀཐཱསལླཱཔོཏི ཀཐཱ ཙ སལླཱཔོ ཙ, ཀཐནཾ པཊིཀཐནནྟི ཨཏྠོ།

    290.Kathāsallāpoti kathā ca sallāpo ca, kathanaṃ paṭikathananti attho.

    ༢༩༡. ཨཧོ ཝཏཱཏི གརཧཝཙནམེཏཾ། རེཏི ཨིདཾ ཧཱིལ༹ནཝསེན ཨཱམནྟནཾ། པཎྜིཏཀཱཏི ཏམེཝ ཛིགུཙྪནྟོ ཨཱཧ། སེསཔདདྭཡེཔི ཨེསེཝ ནཡོ། ཨེཝརཱུཔེན ཀིར བྷོ པུརིསོ ཨཏྠཙརཀེནཱཏི ཨིདཾ ཡཱདིསོ ཏྭཾ, ཨེདིསེ ཨཏྠཙརཀེ ཧིཏཀཱརཀེ སཏི པུརིསོ ནིརཡཾཡེཝ གཙྪེཡྻ, ན ཨཉྙཏྲཱཏི ཨིམམཏྠཾ སནྡྷཱཡ ཝདཏི། ཨཱསཛྫ ཨཱསཛྫཱཏི གྷཊྚེཏྭཱ གྷཊྚེཏྭཱ། ཨམྷེཔི ཨེཝཾ ཨུཔནེཡྻ ཨུཔནེཡྻཱཏི བྲཱཧྨཎོ ཁོ པན ཨམྦཊྛ པོཀྑརསཱཏཱིཏིཨཱདཱིནི ཝཏྭཱ ཨེཝཾ ཨུཔནེཏྭཱ ཨུཔནེཏྭཱ པཊིཙྪནྣཾ ཀཱརཎཾ ཨཱཝིཀརིཏྭཱ སུཊྛུ དཱསཱདིབྷཱཝཾ ཨཱརོཔེཏྭཱ ཨཝཙ, ཏཡཱ ཨམྷེ ཨཀྐོསཱཔིཏཱཏི ཨདྷིཔྤཱཡོ། པདསཱཡེཝ པཝཏྟེསཱིཏི པཱདེན པཧརིཏྭཱ བྷཱུམིཡཾ པཱཏེསི། ཡཉྩ སོ པུབྦེ ཨཱཙརིཡེན སདྡྷིཾ རཐཾ ཨཱརུཧིཏྭཱ སཱརཐི ཧུཏྭཱ ཨགམཱསི , ཏམྤིསྶ ཋཱནཾ ཨཙྪིནྡིཏྭཱ རཐསྶ པུརཏོ པདསཱ ཡེཝསྶ གམནཾ ཨཀཱསི།

    291.Aho vatāti garahavacanametaṃ. Reti idaṃ hīḷanavasena āmantanaṃ. Paṇḍitakāti tameva jigucchanto āha. Sesapadadvayepi eseva nayo. Evarūpena kira bho puriso atthacarakenāti idaṃ yādiso tvaṃ, edise atthacarake hitakārake sati puriso nirayaṃyeva gaccheyya, na aññatrāti imamatthaṃ sandhāya vadati. Āsajja āsajjāti ghaṭṭetvā ghaṭṭetvā. Amhepi evaṃ upaneyya upaneyyāti brāhmaṇo kho pana ambaṭṭha pokkharasātītiādīni vatvā evaṃ upanetvā upanetvā paṭicchannaṃ kāraṇaṃ āvikaritvā suṭṭhu dāsādibhāvaṃ āropetvā avaca, tayā amhe akkosāpitāti adhippāyo. Padasāyeva pavattesīti pādena paharitvā bhūmiyaṃ pātesi. Yañca so pubbe ācariyena saddhiṃ rathaṃ āruhitvā sārathi hutvā agamāsi , tampissa ṭhānaṃ acchinditvā rathassa purato padasā yevassa gamanaṃ akāsi.

    པོཀྑརསཱཏིབུདྡྷཱུཔསངྐམནཝཎྞནཱ

    Pokkharasātibuddhūpasaṅkamanavaṇṇanā

    ༢༩༢-༢༩༦. ཨཏིཝིཀཱལོཏི སུཊྛུ ཝིཀཱལོ, སམྨོདནཱིཡཀཐཱཡཔི ཀཱལོ ནཏྠི། ཨཱགམཱ ནུ ཁྭིདྷ བྷོཏི ཨཱགམཱ ནུ ཁོ ཨིདྷ བྷོ། ཨདྷིཝཱསེཏཱུཏི སམྤཊིཙྪཏུ། ཨཛྫཏནཱཡཱཏི ཡཾ མེ ཏུམྷེསུ ཀཱརཾ ཀརོཏོ ཨཛྫ བྷཝིསྶཏི པུཉྙཉྩ པཱིཏིཔཱམོཛྫཉྩ ཏདཏྠཱཡ། ཨདྷིཝཱསེསི བྷགཝཱ ཏུཎྷཱིབྷཱཝེནཱཏི བྷགཝཱ ཀཱཡངྒཾ ཝཱ ཝཱཙངྒཾ ཝཱ ཨཙོཔེཏྭཱ ཨབྦྷནྟརེཡེཝ ཁནྟིཾ དྷཱརེནྟོ ཏུཎྷཱིབྷཱཝེན ཨདྷིཝཱསེསི། བྲཱཧྨཎསྶ ཨནུགྒཧཎཏྠཾ མནསཱཝ སམྤཊིཙྪཱིཏི ཝུཏྟཾ ཧོཏི།

    292-296.Ativikāloti suṭṭhu vikālo, sammodanīyakathāyapi kālo natthi. Āgamā nu khvidha bhoti āgamā nu kho idha bho. Adhivāsetūti sampaṭicchatu. Ajjatanāyāti yaṃ me tumhesu kāraṃ karoto ajja bhavissati puññañca pītipāmojjañca tadatthāya. Adhivāsesi bhagavā tuṇhībhāvenāti bhagavā kāyaṅgaṃ vā vācaṅgaṃ vā acopetvā abbhantareyeva khantiṃ dhārento tuṇhībhāvena adhivāsesi. Brāhmaṇassa anuggahaṇatthaṃ manasāva sampaṭicchīti vuttaṃ hoti.

    ༢༩༧. པཎཱིཏེནཱཏི ཨུཏྟམེན། སཧཏྠཱཏི སཧཏྠེན། སནྟཔྤེསཱིཏི སུཊྛུ ཏཔྤེསི པརིཔུཎྞཾ སུཧིཏཾ ཡཱཝདཏྠཾ ཨཀཱསི། སམྤཝཱརེསཱིཏི སུཊྛུ པཝཱརེསི, ཨལཾ ཨལནྟི ཧཏྠསཉྙཱཡ པཊིཀྑིཔཱཔེསི། བྷུཏྟཱཝིནྟི བྷུཏྟཝནྟཾ། ཨོནཱིཏཔཏྟཔཱཎིནྟི པཏྟཏོ ཨོནཱིཏཔཱཎིཾ, ཨཔནཱིཏཧཏྠནྟི ཝུཏྟཾ ཧོཏི། ཨོནིཏྟཔཏྟཔཱཎིནྟིཔི པཱཋོ། ཏསྶཏྠོ – ཨོནིཏྟཾ ནཱནཱབྷཱུཏཾ ཝིནཱབྷཱུཏཾ པཏྟཾ པཱཎིཏོ ཨསྶཱཏི ཨོནིཏྟཔཏྟཔཱཎི, ཏཾ ཨོནིཏྟཔཏྟཔཱཎིཾ། ཧཏྠེ ཙ པཏྟཉྩ དྷོཝིཏྭཱ ཨེཀམནྟེ པཏྟཾ ནིཀྑིཔིཏྭཱ ནིསིནྣནྟི ཨཏྠོ། ཨེཀམནྟཾ ནིསཱིདཱིཏི བྷགཝནྟཾ ཨེཝཾ བྷཱུཏཾ ཉཏྭཱ ཨེཀསྨིཾ ཨོཀཱསེ ནིསཱིདཱིཏི ཨཏྠོ།

    297.Paṇītenāti uttamena. Sahatthāti sahatthena. Santappesīti suṭṭhu tappesi paripuṇṇaṃ suhitaṃ yāvadatthaṃ akāsi. Sampavāresīti suṭṭhu pavāresi, alaṃ alanti hatthasaññāya paṭikkhipāpesi. Bhuttāvinti bhuttavantaṃ. Onītapattapāṇinti pattato onītapāṇiṃ, apanītahatthanti vuttaṃ hoti. Onittapattapāṇintipi pāṭho. Tassattho – onittaṃ nānābhūtaṃ vinābhūtaṃ pattaṃ pāṇito assāti onittapattapāṇi, taṃ onittapattapāṇiṃ. Hatthe ca pattañca dhovitvā ekamante pattaṃ nikkhipitvā nisinnanti attho. Ekamantaṃ nisīdīti bhagavantaṃ evaṃ bhūtaṃ ñatvā ekasmiṃ okāse nisīdīti attho.

    ༢༩༨. ཨནུཔུབྦིཾ ཀཐནྟི ཨནུཔཊིཔཱཊིཀཐཾ། ཨཱནུཔུབྦིཀཐཱ ནཱམ དཱནཱནནྟརཾ སཱིལཾ, སཱིལཱནནྟརཾ སགྒོ, སགྒཱནནྟརཾ མགྒོཏི ཨེཏེསཾ ཨཏྠཱནཾ དཱིཔནཀཐཱ། ཏེནེཝ – ‘‘སེཡྻཐིདཾ དཱནཀཐ’’ནྟིཨཱདིམཱཧ། ཨོཀཱརནྟི ཨཝཀཱརཾ ལཱམཀབྷཱཝཾ། སཱམུཀྐཾསིཀཱཏི སཱམཾ ཨུཀྐཾསིཀཱ, ཨཏྟནཱཡེཝ ཨུདྡྷརིཏྭཱ གཧིཏཱ, སཡམྦྷཱུཉཱཎེན དིཊྛཱ, ཨསཱདྷཱརཎཱ ཨཉྙེསནྟི ཨཏྠོ། ཀཱ པན སཱཏི? ཨརིཡསཙྩདེསནཱ། ཏེནེཝཱཧ – ‘‘དུཀྑཾ, སམུདཡཾ, ནིརོདྷཾ, མགྒ’’ནྟི། དྷམྨཙཀྑུནྟི ཨེཏྠ སོཏཱཔཏྟིམགྒོ ཨདྷིཔྤེཏོ། ཏསྶ ཨུཔྤཏྟིཨཱཀཱརདསྶནཏྠཾ – ‘‘ཡཾ ཀིཉྩི སམུདཡདྷམྨཾ, སབྦཾ ཏཾ ནིརོདྷདྷམྨ’’ནྟི ཨཱཧ། ཏཉྷི ནིརོདྷཾ ཨཱརམྨཎཾ ཀཏྭཱ ཀིཙྩཝསེན ཨེཝཾ སབྦསངྑཏཾ པཊིཝིཛ྄ཛྷནྟཾ ཨུཔྤཛྫཏི།

    298.Anupubbiṃ kathanti anupaṭipāṭikathaṃ. Ānupubbikathā nāma dānānantaraṃ sīlaṃ, sīlānantaraṃ saggo, saggānantaraṃ maggoti etesaṃ atthānaṃ dīpanakathā. Teneva – ‘‘seyyathidaṃ dānakatha’’ntiādimāha. Okāranti avakāraṃ lāmakabhāvaṃ. Sāmukkaṃsikāti sāmaṃ ukkaṃsikā, attanāyeva uddharitvā gahitā, sayambhūñāṇena diṭṭhā, asādhāraṇā aññesanti attho. Kā pana sāti? Ariyasaccadesanā. Tenevāha – ‘‘dukkhaṃ, samudayaṃ, nirodhaṃ, magga’’nti. Dhammacakkhunti ettha sotāpattimaggo adhippeto. Tassa uppattiākāradassanatthaṃ – ‘‘yaṃ kiñci samudayadhammaṃ, sabbaṃ taṃ nirodhadhamma’’nti āha. Tañhi nirodhaṃ ārammaṇaṃ katvā kiccavasena evaṃ sabbasaṅkhataṃ paṭivijjhantaṃ uppajjati.

    པོཀྑརསཱཏིཨུཔཱསཀཏྟཔཊིཝེདནཱཝཎྞནཱ

    Pokkharasātiupāsakattapaṭivedanāvaṇṇanā

    ༢༩༩. དིཊྛོ ཨརིཡསཙྩདྷམྨོ ཨེཏེནཱཏི དིཊྛདྷམྨོ། ཨེས ནཡོ སེསཔདེསུཔི། ཏིཎྞཱ ཝིཙིཀིཙྪཱ ཨནེནཱཏི ཏིཎྞཝིཙིཀིཙྪོ། ཝིགཏཱ ཀཐཾཀཐཱ ཨསྶཱཏི ཝིགཏཀཐཾཀཐོ། ཝེསཱརཛྫཔྤཏྟོཏི ཝིསཱརདབྷཱཝཾ པཏྟོ། ཀཏྠ? སཏྠུསཱསནེ། ནཱསྶ པརོ པཙྩཡོ, ན པརསྶ སདྡྷཱཡ ཨེཏྠ ཝཏྟཏཱིཏི ཨཔརཔྤཙྩཡོ། སེསཾ སབྦཏྠ ཝུཏྟནཡཏྟཱ ཨུཏྟཱནཏྠཏྟཱ ཙ པཱཀཊམེཝཱཏི།

    299. Diṭṭho ariyasaccadhammo etenāti diṭṭhadhammo. Esa nayo sesapadesupi. Tiṇṇā vicikicchā anenāti tiṇṇavicikiccho. Vigatā kathaṃkathā assāti vigatakathaṃkatho. Vesārajjappattoti visāradabhāvaṃ patto. Kattha? Satthusāsane. Nāssa paro paccayo, na parassa saddhāya ettha vattatīti aparappaccayo. Sesaṃ sabbattha vuttanayattā uttānatthattā ca pākaṭamevāti.

    ཨིཏི སུམངྒལཝིལཱསིནིཡཱ དཱིགྷནིཀཱཡཊྛཀཐཱཡཾ

    Iti sumaṅgalavilāsiniyā dīghanikāyaṭṭhakathāyaṃ

    ཨམྦཊྛསུཏྟཝཎྞནཱ ནིཊྛིཏཱ།

    Ambaṭṭhasuttavaṇṇanā niṭṭhitā.




    Next: ༤. སོཎདཎྜསུཏྟཝཎྞནཱ • 4. Soṇadaṇḍasuttavaṇṇanā




    Related texts:



    ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / དཱིགྷནིཀཱཡ • Dīghanikāya / ༣. ཨམྦཊྛསུཏྟཾ • 3. Ambaṭṭhasuttaṃ

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / དཱིགྷནིཀཱཡ (ཊཱིཀཱ) • Dīghanikāya (ṭīkā) / ༣. ཨམྦཊྛསུཏྟཝཎྞནཱ • 3. Ambaṭṭhasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact