| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
4. ஆமிஸஸிக்கா²பத³வண்ணனா
4. Āmisasikkhāpadavaṇṇanā
தண்ஹாதி³ட்டீ²ஹி ஆமஸிதப்³ப³தோ ஆமிஸங், சீவராதி³, ஆமிஸமேவ ஹேது ஆமிஸஹேது. தேனாஹ ‘‘சீவராதீ³னங் அஞ்ஞதரஹேதூ’’தி. ஆதி³ஸத்³தே³ன பிண்ட³பாதஸேனாஸனகி³லானபச்சயஸக்காரக³ருகாரமானநவந்த³னபூஜனானங் க³ஹணங். அவண்ணகாமதாயாதி அயஸகாமதாயேவ.
Taṇhādiṭṭhīhi āmasitabbato āmisaṃ, cīvarādi, āmisameva hetu āmisahetu. Tenāha ‘‘cīvarādīnaṃ aññatarahetū’’ti. Ādisaddena piṇḍapātasenāsanagilānapaccayasakkāragarukāramānanavandanapūjanānaṃ gahaṇaṃ. Avaṇṇakāmatāyāti ayasakāmatāyeva.
த⁴ம்மகம்மேதிஆதீ³ஸு பி⁴க்கு²னோவாத³ஸம்முதிகம்மங் ‘‘கம்ம’’ந்தி வேதி³தப்³ப³ங். தத்த² திகபாசித்தியந்தி த⁴ம்மகம்மே த⁴ம்மகம்மஸஞ்ஞிவேமதிகஅத⁴ம்மகம்மஸஞ்ஞீனங் வஸேன தீணி பாசித்தியானி. ததே²வ அத⁴ம்மகம்மே திகது³க்கடங் வேதி³தப்³ப³ங். அஸம்மதந்தி ஸம்மதேன வா ஸங்கே⁴ன வா பா⁴ரங் கத்வா ட²பிதங் உபஸம்பன்னங். நனு ஓவாத³ஸம்முதி உபஸம்பன்னஸ்ஸேவ தீ³யதி, ந ஸாமணேரஸ்ஸாதி ஆஹ ‘‘தத்தா²’’திஆதி³. ஸம்மதேன வா ஸங்கே⁴ன வா ட²பிதோ பன ப³ஹுஸ்ஸுதோ ஸாமணேரோ ‘‘அஸம்மதோ’’தி வேதி³தப்³போ³. பகதியா சீவராதி³ஹேது ஓவத³ந்தங் பன ஏவங் ப⁴ணந்தஸ்ஸாதி பகதியா சீவராதி³ஹேது ஓவத³ந்தங் ‘‘ஏஸ சீவராதி³ஹேது ஓவத³தீ’’தி ஸஞ்ஞாய ஏவங் ப⁴ணந்தஸ்ஸ. ‘‘ந சீவராதி³ஹேது ஓவத³தீ’’தி ஸஞ்ஞாய பன ஏவங் ப⁴ணந்தஸ்ஸ து³க்கடங். அனாமிஸந்தரதாதி ஆமிஸசித்தாபா⁴வோ, ‘‘ஆமிஸஹேது ஓவதி³ஸ்ஸாமீ’’தி ஏவங் பவத்தஅஜ்ஜா²ஸயாபா⁴வோதி அத்தோ². சித்தபரியாயோ ஹெத்த² அந்தரஸத்³தோ³ ‘‘யஸ்ஸந்தரதோ ந ஸந்தி கோபா’’திஆதீ³ஸு (உதா³॰ 20) விய.
Dhammakammetiādīsu bhikkhunovādasammutikammaṃ ‘‘kamma’’nti veditabbaṃ. Tattha tikapācittiyanti dhammakamme dhammakammasaññivematikaadhammakammasaññīnaṃ vasena tīṇi pācittiyāni. Tatheva adhammakamme tikadukkaṭaṃ veditabbaṃ. Asammatanti sammatena vā saṅghena vā bhāraṃ katvā ṭhapitaṃ upasampannaṃ. Nanu ovādasammuti upasampannasseva dīyati, na sāmaṇerassāti āha ‘‘tatthā’’tiādi. Sammatena vā saṅghena vā ṭhapito pana bahussuto sāmaṇero ‘‘asammato’’ti veditabbo. Pakatiyā cīvarādihetu ovadantaṃ pana evaṃ bhaṇantassāti pakatiyā cīvarādihetu ovadantaṃ ‘‘esa cīvarādihetu ovadatī’’ti saññāya evaṃ bhaṇantassa. ‘‘Na cīvarādihetu ovadatī’’ti saññāya pana evaṃ bhaṇantassa dukkaṭaṃ. Anāmisantaratāti āmisacittābhāvo, ‘‘āmisahetu ovadissāmī’’ti evaṃ pavattaajjhāsayābhāvoti attho. Cittapariyāyo hettha antarasaddo ‘‘yassantarato na santi kopā’’tiādīsu (udā. 20) viya.
ஆமிஸஸிக்கா²பத³வண்ணனா நிட்டி²தா.
Āmisasikkhāpadavaṇṇanā niṭṭhitā.
