| Library / Tipiṭaka / তিপিটক • Tipiṭaka / কঙ্খাৰিতরণী-অভিনৰ-টীকা • Kaṅkhāvitaraṇī-abhinava-ṭīkā |
৪. আমিসসিক্খাপদৰণ্ণনা
4. Āmisasikkhāpadavaṇṇanā
তণ্হাদিট্ঠীহি আমসিতব্বতো আমিসং, চীৰরাদি, আমিসমেৰ হেতু আমিসহেতু। তেনাহ ‘‘চীৰরাদীনং অঞ্ঞতরহেতূ’’তি। আদিসদ্দেন পিণ্ডপাতসেনাসনগিলানপচ্চযসক্কারগরুকারমাননৰন্দনপূজনানং গহণং। অৰণ্ণকামতাযাতি অযসকামতাযেৰ।
Taṇhādiṭṭhīhi āmasitabbato āmisaṃ, cīvarādi, āmisameva hetu āmisahetu. Tenāha ‘‘cīvarādīnaṃ aññatarahetū’’ti. Ādisaddena piṇḍapātasenāsanagilānapaccayasakkāragarukāramānanavandanapūjanānaṃ gahaṇaṃ. Avaṇṇakāmatāyāti ayasakāmatāyeva.
ধম্মকম্মেতিআদীসু ভিক্খুনোৰাদসম্মুতিকম্মং ‘‘কম্ম’’ন্তি ৰেদিতব্বং। তত্থ তিকপাচিত্তিযন্তি ধম্মকম্মে ধম্মকম্মসঞ্ঞিৰেমতিকঅধম্মকম্মসঞ্ঞীনং ৰসেন তীণি পাচিত্তিযানি। তথেৰ অধম্মকম্মে তিকদুক্কটং ৰেদিতব্বং। অসম্মতন্তি সম্মতেন ৰা সঙ্ঘেন ৰা ভারং কত্ৰা ঠপিতং উপসম্পন্নং। ননু ওৰাদসম্মুতি উপসম্পন্নস্সেৰ দীযতি, ন সামণেরস্সাতি আহ ‘‘তত্থা’’তিআদি। সম্মতেন ৰা সঙ্ঘেন ৰা ঠপিতো পন বহুস্সুতো সামণেরো ‘‘অসম্মতো’’তি ৰেদিতব্বো। পকতিযা চীৰরাদিহেতু ওৰদন্তং পন এৰং ভণন্তস্সাতি পকতিযা চীৰরাদিহেতু ওৰদন্তং ‘‘এস চীৰরাদিহেতু ওৰদতী’’তি সঞ্ঞায এৰং ভণন্তস্স। ‘‘ন চীৰরাদিহেতু ওৰদতী’’তি সঞ্ঞায পন এৰং ভণন্তস্স দুক্কটং। অনামিসন্তরতাতি আমিসচিত্তাভাৰো, ‘‘আমিসহেতু ওৰদিস্সামী’’তি এৰং পৰত্তঅজ্ঝাসযাভাৰোতি অত্থো। চিত্তপরিযাযো হেত্থ অন্তরসদ্দো ‘‘যস্সন্তরতো ন সন্তি কোপা’’তিআদীসু (উদা॰ ২০) ৰিয।
Dhammakammetiādīsu bhikkhunovādasammutikammaṃ ‘‘kamma’’nti veditabbaṃ. Tattha tikapācittiyanti dhammakamme dhammakammasaññivematikaadhammakammasaññīnaṃ vasena tīṇi pācittiyāni. Tatheva adhammakamme tikadukkaṭaṃ veditabbaṃ. Asammatanti sammatena vā saṅghena vā bhāraṃ katvā ṭhapitaṃ upasampannaṃ. Nanu ovādasammuti upasampannasseva dīyati, na sāmaṇerassāti āha ‘‘tatthā’’tiādi. Sammatena vā saṅghena vā ṭhapito pana bahussuto sāmaṇero ‘‘asammato’’ti veditabbo. Pakatiyā cīvarādihetu ovadantaṃ pana evaṃ bhaṇantassāti pakatiyā cīvarādihetu ovadantaṃ ‘‘esa cīvarādihetu ovadatī’’ti saññāya evaṃ bhaṇantassa. ‘‘Na cīvarādihetu ovadatī’’ti saññāya pana evaṃ bhaṇantassa dukkaṭaṃ. Anāmisantaratāti āmisacittābhāvo, ‘‘āmisahetu ovadissāmī’’ti evaṃ pavattaajjhāsayābhāvoti attho. Cittapariyāyo hettha antarasaddo ‘‘yassantarato na santi kopā’’tiādīsu (udā. 20) viya.
আমিসসিক্খাপদৰণ্ণনা নিট্ঠিতা।
Āmisasikkhāpadavaṇṇanā niṭṭhitā.
