| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
3. அமூள்ஹவினயோ
3. Amūḷhavinayo
196. தேன கோ² பன ஸமயேன க³க்³கோ³ பி⁴க்கு² உம்மத்தகோ ஹோதி, சித்தவிபரியாஸகதோ. தேன உம்மத்தகேன சித்தவிபரியாஸகதேன ப³ஹுங் அஸ்ஸாமணகங் அஜ்ஜா²சிண்ணங் ஹோதி பா⁴ஸிதபரிக்கந்தங். பி⁴க்கூ² க³க்³க³ங் பி⁴க்கு²ங் உம்மத்தகேன சித்தவிபரியாஸகதேன அஜ்ஜா²சிண்ணேன ஆபத்தியா சோதெ³ந்தி – ‘‘ஸரதாயஸ்மா ஏவரூபிங் ஆபத்திங் ஆபஜ்ஜிதா’’தி? ஸோ ஏவங் வதே³தி – ‘‘அஹங் கோ², ஆவுஸோ , உம்மத்தகோ அஹோஸிங் சித்தவிபரியாஸகதோ. தேன மே உம்மத்தகேன சித்தவிபரியாஸகதேன ப³ஹுங் அஸ்ஸாமணகங் அஜ்ஜா²சிண்ணங் பா⁴ஸிதபரிக்கந்தங். நாஹங் தங் ஸராமி. மூள்ஹேன மே ஏதங் கத’’ந்தி. ஏவம்பி நங் வுச்சமானா சோதெ³ந்தேவ – ‘‘ஸரதாயஸ்மா ஏவரூபிங் ஆபத்திங் ஆபஜ்ஜிதா’’தி? யே தே பி⁴க்கூ² அப்பிச்சா²..பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கூ² க³க்³க³ங் பி⁴க்கு²ங் உம்மத்தகேன சித்தவிபரியாஸகதேன அஜ்ஜா²சிண்ணேன ஆபத்தியா சோதெ³ஸ்ஸந்தி – ‘‘ஸரதாயஸ்மா ஏவரூபிங் ஆபத்திங் ஆபஜ்ஜிதா’தி! ஸோ ஏவங் வதே³தி – ‘அஹங் கோ², ஆவுஸோ, உம்மத்தகோ அஹோஸிங் சித்தவிபரியாஸகதோ. தேன மே உம்மத்தகேன சித்தவிபரியாஸகதேன ப³ஹுங் அஸ்ஸாமணகங் அஜ்ஜா²சிண்ணங் பா⁴ஸிதபரிக்கந்தங். நாஹங் தங் ஸராமி. மூள்ஹேன மே ஏதங் கத’ந்தி. ஏவம்பி நங் வுச்சமானா சோதெ³ந்தேவ – ‘‘ஸரதாயஸ்மா ஏவரூபிங் ஆபத்திங் ஆபஜ்ஜிதா’’தி? அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர, பி⁴க்க²வே…பே॰… ஸச்சங் ப⁴க³வா’’தி…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி –
196. Tena kho pana samayena gaggo bhikkhu ummattako hoti, cittavipariyāsakato. Tena ummattakena cittavipariyāsakatena bahuṃ assāmaṇakaṃ ajjhāciṇṇaṃ hoti bhāsitaparikkantaṃ. Bhikkhū gaggaṃ bhikkhuṃ ummattakena cittavipariyāsakatena ajjhāciṇṇena āpattiyā codenti – ‘‘saratāyasmā evarūpiṃ āpattiṃ āpajjitā’’ti? So evaṃ vadeti – ‘‘ahaṃ kho, āvuso , ummattako ahosiṃ cittavipariyāsakato. Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ. Nāhaṃ taṃ sarāmi. Mūḷhena me etaṃ kata’’nti. Evampi naṃ vuccamānā codenteva – ‘‘saratāyasmā evarūpiṃ āpattiṃ āpajjitā’’ti? Ye te bhikkhū appicchā..pe… te ujjhāyanti khiyyanti vipācenti – ‘‘kathañhi nāma bhikkhū gaggaṃ bhikkhuṃ ummattakena cittavipariyāsakatena ajjhāciṇṇena āpattiyā codessanti – ‘‘saratāyasmā evarūpiṃ āpattiṃ āpajjitā’ti! So evaṃ vadeti – ‘ahaṃ kho, āvuso, ummattako ahosiṃ cittavipariyāsakato. Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ. Nāhaṃ taṃ sarāmi. Mūḷhena me etaṃ kata’nti. Evampi naṃ vuccamānā codenteva – ‘‘saratāyasmā evarūpiṃ āpattiṃ āpajjitā’’ti? Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave…pe… saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi –
‘‘தேன ஹி, பி⁴க்க²வே, ஸங்கோ⁴ க³க்³க³ஸ்ஸ பி⁴க்கு²னோ அமூள்ஹஸ்ஸ அமூள்ஹவினயங் தே³து. ஏவஞ்ச பன, பி⁴க்க²வே, தா³தப்³போ³ – ‘‘தேன, பி⁴க்க²வே, க³க்³கே³ன பி⁴க்கு²னா ஸங்க⁴ங் உபஸங்கமித்வா, ஏகங்ஸங் உத்தராஸங்க³ங் கரித்வா, வுட்³டா⁴னங் பி⁴க்கூ²னங் பாதே³ வந்தி³த்வா, உக்குடிகங் நிஸீதி³த்வா, அஞ்ஜலிங் பக்³க³ஹெத்வா, ஏவமஸ்ஸ வசனீயோ – ‘அஹங், ப⁴ந்தே, உம்மத்தகோ அஹோஸிங் சித்தவிபரியாஸகதோ. தேன மே உம்மத்தகேன சித்தவிபரியாஸகதேன ப³ஹுங் அஸ்ஸாமணகங் அஜ்ஜா²சிண்ணங் பா⁴ஸிதபரிக்கந்தங். மங் பி⁴க்கூ² உம்மத்தகேன சித்தவிபரியாஸகதேன அஜ்ஜா²சிண்ணேன ஆபத்தியா சோதெ³ந்தி – ‘ஸரதாயஸ்மா ஏவரூபிங் ஆபத்திங் ஆபஜ்ஜிதா’தி? த்யாஹங் ஏவங் வதா³மி – ‘அஹங் கோ², ஆவுஸோ, உம்மத்தகோ அஹோஸிங் சித்தவிபரியாஸகதோ. தேன மே உம்மத்தகேன சித்தவிபரியாஸகதேன ப³ஹுங் அஸ்ஸாமணகங் அஜ்ஜா²சிண்ணங் பா⁴ஸிதபரிக்கந்தங். நாஹங் தங் ஸராமி. மூள்ஹேன மே ஏதங் கத’ந்தி. ஏவம்பி மங் வுச்சமானா சோதெ³ந்தேவ – ‘ஸரதாயஸ்மா ஏவரூபிங் ஆபத்திங் ஆபஜ்ஜிதா’தி? ஸோஹங் , ப⁴ந்தே, அமூள்ஹோ ஸங்க⁴ங் அமூள்ஹவினயங் யாசாமீ’தி. து³தியம்பி யாசிதப்³போ³. ததியம்பி யாசிதப்³போ³ – ‘அஹங், ப⁴ந்தே, உம்மத்தகோ அஹோஸிங் சித்தவிபரியாஸகதோ. தேன மே உம்மத்தகேன சித்தவிபரியாஸகதேன ப³ஹுங் அஸ்ஸாமணகங் அஜ்ஜா²சிண்ணங் பா⁴ஸிதபரிக்கந்தங். மங் பி⁴க்கூ² உம்மத்தகேன சித்தவிபரியாஸகதேன அஜ்ஜா²சிண்ணேன ஆபத்தியா சோதெ³ந்தி – ‘ஸரதாயஸ்மா ஏவரூபிங் ஆபத்திங் ஆபஜ்ஜிதா’தி? த்யாஹங் ஏவங் வதா³மி – ‘அஹங் கோ², ஆவுஸோ, உம்மத்தகோ அஹோஸிங் சித்தவிபரியாஸகதோ. தேன மே உம்மத்தகேன சித்தவிபரியாஸகதேன ப³ஹுங் அஸ்ஸாமணகங் அஜ்ஜா²சிண்ணங் பா⁴ஸிதபரிக்கந்தங். நாஹங் தங் ஸராமி மூள்ஹேன மே ஏதங் கத’ந்தி. ஏவம்பி மங் வுச்சமானா சோதெ³ந்தேவ – ‘ஸரதாயஸ்மா ஏவரூபிங் ஆபத்திங் ஆபஜ்ஜிதா’தி? ஸோஹங் அமூள்ஹோ 1 ததியம்பி, ப⁴ந்தே, ஸங்க⁴ங் அமூள்ஹவினயங் யாசாமீ’தி. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
‘‘Tena hi, bhikkhave, saṅgho gaggassa bhikkhuno amūḷhassa amūḷhavinayaṃ detu. Evañca pana, bhikkhave, dātabbo – ‘‘tena, bhikkhave, gaggena bhikkhunā saṅghaṃ upasaṅkamitvā, ekaṃsaṃ uttarāsaṅgaṃ karitvā, vuḍḍhānaṃ bhikkhūnaṃ pāde vanditvā, ukkuṭikaṃ nisīditvā, añjaliṃ paggahetvā, evamassa vacanīyo – ‘ahaṃ, bhante, ummattako ahosiṃ cittavipariyāsakato. Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ. Maṃ bhikkhū ummattakena cittavipariyāsakatena ajjhāciṇṇena āpattiyā codenti – ‘saratāyasmā evarūpiṃ āpattiṃ āpajjitā’ti? Tyāhaṃ evaṃ vadāmi – ‘ahaṃ kho, āvuso, ummattako ahosiṃ cittavipariyāsakato. Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ. Nāhaṃ taṃ sarāmi. Mūḷhena me etaṃ kata’nti. Evampi maṃ vuccamānā codenteva – ‘saratāyasmā evarūpiṃ āpattiṃ āpajjitā’ti? Sohaṃ , bhante, amūḷho saṅghaṃ amūḷhavinayaṃ yācāmī’ti. Dutiyampi yācitabbo. Tatiyampi yācitabbo – ‘ahaṃ, bhante, ummattako ahosiṃ cittavipariyāsakato. Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ. Maṃ bhikkhū ummattakena cittavipariyāsakatena ajjhāciṇṇena āpattiyā codenti – ‘saratāyasmā evarūpiṃ āpattiṃ āpajjitā’ti? Tyāhaṃ evaṃ vadāmi – ‘ahaṃ kho, āvuso, ummattako ahosiṃ cittavipariyāsakato. Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ. Nāhaṃ taṃ sarāmi mūḷhena me etaṃ kata’nti. Evampi maṃ vuccamānā codenteva – ‘saratāyasmā evarūpiṃ āpattiṃ āpajjitā’ti? Sohaṃ amūḷho 2 tatiyampi, bhante, saṅghaṃ amūḷhavinayaṃ yācāmī’ti. Byattena bhikkhunā paṭibalena saṅgho ñāpetabbo –
197. ‘‘ஸுணாது மே, ப⁴ந்தே, ஸங்கோ⁴. அயங் க³க்³கோ³ பி⁴க்கு² உம்மத்தகோ அஹோஸி சித்தவிபரியாஸகதோ. தேன உம்மத்தகேன சித்தவிபரியாஸகதேன ப³ஹுங் அஸ்ஸாமணகங் அஜ்ஜா²சிண்ணங் பா⁴ஸிதபரிக்கந்தங். பி⁴க்கூ² க³க்³க³ங் பி⁴க்கு²ங் உம்மத்தகேன சித்தவிபரியாஸகதேன அஜ்ஜா²சிண்ணேன ஆபத்தியா சோதெ³ந்தி – ‘ஸரதாயஸ்மா ஏவரூபிங் ஆபத்திங் ஆபஜ்ஜிதா’தி? ஸோ ஏவங் வதே³தி – ‘அஹங் கோ², ஆவுஸோ, உம்மத்தகோ அஹோஸிங் சித்தவிபரியாஸகதோ. தேன மே உம்மத்தகேன சித்தவிபரியாஸகதேன ப³ஹுங் அஸ்ஸாமணகங் அஜ்ஜா²சிண்ணங் பா⁴ஸிதபரிக்கந்தங். நாஹங் தங் ஸராமி, மூள்ஹேன மே ஏதங் கத’ந்தி. ஏவம்பி நங் வுச்சமானா சோதெ³ந்தேவ – ‘ஸரதாயஸ்மா ஏவரூபிங் ஆபத்திங் ஆபஜ்ஜிதா’தி? ஸோ அமூள்ஹோ ஸங்க⁴ங் அமூள்ஹவினயங் யாசதி. யதி³ ஸங்க⁴ஸ்ஸ பத்தகல்லங், ஸங்கோ⁴ க³க்³க³ஸ்ஸ பி⁴க்கு²னோ அமூள்ஹஸ்ஸ அமூள்ஹவினயங் த³தெ³ய்ய. ஏஸா ஞத்தி.
197. ‘‘Suṇātu me, bhante, saṅgho. Ayaṃ gaggo bhikkhu ummattako ahosi cittavipariyāsakato. Tena ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ. Bhikkhū gaggaṃ bhikkhuṃ ummattakena cittavipariyāsakatena ajjhāciṇṇena āpattiyā codenti – ‘saratāyasmā evarūpiṃ āpattiṃ āpajjitā’ti? So evaṃ vadeti – ‘ahaṃ kho, āvuso, ummattako ahosiṃ cittavipariyāsakato. Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ. Nāhaṃ taṃ sarāmi, mūḷhena me etaṃ kata’nti. Evampi naṃ vuccamānā codenteva – ‘saratāyasmā evarūpiṃ āpattiṃ āpajjitā’ti? So amūḷho saṅghaṃ amūḷhavinayaṃ yācati. Yadi saṅghassa pattakallaṃ, saṅgho gaggassa bhikkhuno amūḷhassa amūḷhavinayaṃ dadeyya. Esā ñatti.
‘‘ஸுணாது மே, ப⁴ந்தே, ஸங்கோ⁴. அயங் க³க்³கோ³ பி⁴க்கு² உம்மத்தகோ அஹோஸி சித்தவிபரியாஸகதோ. தேன உம்மத்தகேன சித்தவிபரியாஸகதேன ப³ஹுங் அஸ்ஸாமணகங் அஜ்ஜா²சிண்ணங் பா⁴ஸிதபரிக்கந்தங். பி⁴க்கூ² க³க்³க³ங் பி⁴க்கு²ங் உம்மத்தகேன சித்தவிபரியாஸகதேன அஜ்ஜா²சிண்ணேன ஆபத்தியா சோதெ³ந்தி – ‘ஸரதாயஸ்மா ஏவரூபிங் ஆபத்திங் ஆபஜ்ஜிதா’தி? ஸோ ஏவங் வதே³தி – ‘அஹங் கோ², ஆவுஸோ, உம்மத்தகோ அஹோஸிங் சித்தவிபரியாஸகதோ. தேன மே உம்மத்தகேன சித்தவிபரியாஸகதேன ப³ஹுங் அஸ்ஸாமணகங் அஜ்ஜா²சிண்ணங் பா⁴ஸிதபரிக்கந்தங். நாஹங் தங் ஸராமி மூள்ஹேன மே ஏதங் கத’ந்தி. ஏவம்பி நங் வுச்சமானா சோதெ³ந்தேவ – ‘ஸரதாயஸ்மா ஏவரூபிங் ஆபத்திங் ஆபஜ்ஜிதா’தி? ஸோ அமூள்ஹோ ஸங்க⁴ங் அமூள்ஹவினயங் யாசதி. ஸங்கோ⁴ க³க்³க³ஸ்ஸ பி⁴க்கு²னோ அமூள்ஹஸ்ஸ அமூள்ஹவினயங் தே³தி. யஸ்ஸாயஸ்மதோ க²மதி க³க்³க³ஸ்ஸ பி⁴க்கு²னோ அமூள்ஹஸ்ஸ அமூள்ஹவினயஸ்ஸ தா³னங், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Ayaṃ gaggo bhikkhu ummattako ahosi cittavipariyāsakato. Tena ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ. Bhikkhū gaggaṃ bhikkhuṃ ummattakena cittavipariyāsakatena ajjhāciṇṇena āpattiyā codenti – ‘saratāyasmā evarūpiṃ āpattiṃ āpajjitā’ti? So evaṃ vadeti – ‘ahaṃ kho, āvuso, ummattako ahosiṃ cittavipariyāsakato. Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ. Nāhaṃ taṃ sarāmi mūḷhena me etaṃ kata’nti. Evampi naṃ vuccamānā codenteva – ‘saratāyasmā evarūpiṃ āpattiṃ āpajjitā’ti? So amūḷho saṅghaṃ amūḷhavinayaṃ yācati. Saṅgho gaggassa bhikkhuno amūḷhassa amūḷhavinayaṃ deti. Yassāyasmato khamati gaggassa bhikkhuno amūḷhassa amūḷhavinayassa dānaṃ, so tuṇhassa; yassa nakkhamati, so bhāseyya.
‘‘து³தியம்பி ஏதமத்த²ங் வதா³மி…பே॰… ததியம்பி ஏதமத்த²ங் வதா³மி…பே॰….
‘‘Dutiyampi etamatthaṃ vadāmi…pe… tatiyampi etamatthaṃ vadāmi…pe….
‘‘தி³ன்னோ ஸங்கே⁴ன க³க்³க³ஸ்ஸ பி⁴க்கு²னோ அமூள்ஹஸ்ஸ அமூள்ஹவினயோ. க²மதி ஸங்க⁴ஸ்ஸ, தஸ்மா துண்ஹீ , ஏவமேதங் தா⁴ரயாமீ’’தி.
‘‘Dinno saṅghena gaggassa bhikkhuno amūḷhassa amūḷhavinayo. Khamati saṅghassa, tasmā tuṇhī , evametaṃ dhārayāmī’’ti.
198. ‘‘தீணிமானி, பி⁴க்க²வே, அத⁴ம்மிகானி அமூள்ஹவினயஸ்ஸ தா³னானி, தீணி த⁴ம்மிகானி. கம்மானி தீணி அத⁴ம்மிகானி அமூள்ஹவினயஸ்ஸ தா³னானி?
198. ‘‘Tīṇimāni, bhikkhave, adhammikāni amūḷhavinayassa dānāni, tīṇi dhammikāni. Kammāni tīṇi adhammikāni amūḷhavinayassa dānāni?
‘‘இத⁴ பன, பி⁴க்க²வே, பி⁴க்கு² ஆபத்திங் ஆபன்னோ ஹோதி. தமேனங் சோதே³தி ஸங்கோ⁴ வா, ஸம்ப³ஹுலா வா, ஏகபுக்³க³லோ வா – ‘ஸரதாயஸ்மா ஏவரூபிங் ஆபத்திங் ஆபஜ்ஜிதா’தி? ஸோ ஸரமானோவ ஏவங் வதே³தி – ‘ந கோ² அஹங், ஆவுஸோ, ஸராமி ஏவரூபிங் ஆபத்திங் ஆபஜ்ஜிதா’தி. தஸ்ஸ ஸங்கோ⁴ அமூள்ஹவினயங் தே³தி. அத⁴ம்மிகங் அமூள்ஹவினயஸ்ஸ தா³னங்.
‘‘Idha pana, bhikkhave, bhikkhu āpattiṃ āpanno hoti. Tamenaṃ codeti saṅgho vā, sambahulā vā, ekapuggalo vā – ‘saratāyasmā evarūpiṃ āpattiṃ āpajjitā’ti? So saramānova evaṃ vadeti – ‘na kho ahaṃ, āvuso, sarāmi evarūpiṃ āpattiṃ āpajjitā’ti. Tassa saṅgho amūḷhavinayaṃ deti. Adhammikaṃ amūḷhavinayassa dānaṃ.
‘‘இத⁴ பன, பி⁴க்க²வே, பி⁴க்கு² ஆபத்திங் ஆபன்னோ ஹோதி. தமேனங் சோதே³தி ஸங்கோ⁴ வா, ஸம்ப³ஹுலா வா, ஏகபுக்³க³லோ வா – ‘ஸரதாயஸ்மா ஏவரூபிங் ஆபத்திங் ஆபஜ்ஜிதா’தி? ஸோ ஸரமானோவ ஏவங் வதே³தி – ‘ஸராமி கோ² அஹங், ஆவுஸோ, யதா²ஸுபினந்தேனா’தி. தஸ்ஸ ஸங்கோ⁴ அமூள்ஹவினயங் தே³தி. அத⁴ம்மிகங் அமூள்ஹவினயஸ்ஸ தா³னங்.
‘‘Idha pana, bhikkhave, bhikkhu āpattiṃ āpanno hoti. Tamenaṃ codeti saṅgho vā, sambahulā vā, ekapuggalo vā – ‘saratāyasmā evarūpiṃ āpattiṃ āpajjitā’ti? So saramānova evaṃ vadeti – ‘sarāmi kho ahaṃ, āvuso, yathāsupinantenā’ti. Tassa saṅgho amūḷhavinayaṃ deti. Adhammikaṃ amūḷhavinayassa dānaṃ.
‘‘இத⁴ பன, பி⁴க்க²வே, பி⁴க்கு² ஆபத்திங் ஆபன்னோ ஹோதி. தமேனங் சோதே³தி ஸங்கோ⁴ வா, ஸம்ப³ஹுலா வா, ஏகபுக்³க³லோ வா – ‘ஸரதாயஸ்மா ஏவரூபிங் ஆபத்திங் ஆபஜ்ஜிதா’தி? ஸோ அனும்மத்தகோ உம்மத்தகாலயங் கரோதி – ‘அஹம்பி கோ² ஏவங் கரோமி. தும்ஹேபி ஏவங் கரோத². மய்ஹம்பி ஏதங் கப்பதி. தும்ஹாகம்பேதங் கப்பதீ’தி. தஸ்ஸ ஸங்கோ⁴ அமூள்ஹவினயங் தே³தி. அத⁴ம்மிகங் அமூள்ஹவினயஸ்ஸ தா³னங். இமானி தீணி அத⁴ம்மிகானி அமூள்ஹவினயஸ்ஸ தா³னானி.
‘‘Idha pana, bhikkhave, bhikkhu āpattiṃ āpanno hoti. Tamenaṃ codeti saṅgho vā, sambahulā vā, ekapuggalo vā – ‘saratāyasmā evarūpiṃ āpattiṃ āpajjitā’ti? So anummattako ummattakālayaṃ karoti – ‘ahampi kho evaṃ karomi. Tumhepi evaṃ karotha. Mayhampi etaṃ kappati. Tumhākampetaṃ kappatī’ti. Tassa saṅgho amūḷhavinayaṃ deti. Adhammikaṃ amūḷhavinayassa dānaṃ. Imāni tīṇi adhammikāni amūḷhavinayassa dānāni.
199. ‘‘கதமானி தீணி த⁴ம்மிகானி அமூள்ஹவினயஸ்ஸ தா³னானி?
199. ‘‘Katamāni tīṇi dhammikāni amūḷhavinayassa dānāni?
‘‘இத⁴ பன, பி⁴க்க²வே, பி⁴க்கு² உம்மத்தகோ ஹோதி சித்தவிபரியாஸகதோ. தேன உம்மத்தகேன சித்தவிபரியாஸகதேன ப³ஹுங் அஸ்ஸாமணகங் அஜ்ஜா²சிண்ணங் ஹோதி பா⁴ஸிதபரிக்கந்தங். தமேனங் சோதே³தி ஸங்கோ⁴ வா, ஸம்ப³ஹுலா வா, ஏகபுக்³க³லோ வா – ‘ஸரதாயஸ்மா ஏவரூபிங் ஆபத்திங் ஆபஜ்ஜிதா’தி? ஸோ அஸ்ஸரமானோவ ஏவங் வதே³தி – ‘ந கோ² அஹங், ஆவுஸோ, ஸராமி ஏவரூபிங் ஆபத்திங் ஆபஜ்ஜிதா’தி. தஸ்ஸ ஸங்கோ⁴ அமூள்ஹவினயங் தே³தி. த⁴ம்மிகங் அமூள்ஹவினயஸ்ஸ தா³னங்.
‘‘Idha pana, bhikkhave, bhikkhu ummattako hoti cittavipariyāsakato. Tena ummattakena cittavipariyāsakatena bahuṃ assāmaṇakaṃ ajjhāciṇṇaṃ hoti bhāsitaparikkantaṃ. Tamenaṃ codeti saṅgho vā, sambahulā vā, ekapuggalo vā – ‘saratāyasmā evarūpiṃ āpattiṃ āpajjitā’ti? So assaramānova evaṃ vadeti – ‘na kho ahaṃ, āvuso, sarāmi evarūpiṃ āpattiṃ āpajjitā’ti. Tassa saṅgho amūḷhavinayaṃ deti. Dhammikaṃ amūḷhavinayassa dānaṃ.
‘‘இத⁴ பன, பி⁴க்க²வே, பி⁴க்கு² உம்மத்தகோ ஹோதி சித்தவிபரியாஸகதோ. தேன உம்மத்தகேன சித்தவிபரியாஸகதேன ப³ஹுங் அஸ்ஸாமணகங் அஜ்ஜா²சிண்ணங் ஹோதி பா⁴ஸிதபரிக்கந்தங். தமேனங் சோதே³தி ஸங்கோ⁴ வா, ஸம்ப³ஹுலா வா, ஏகபுக்³க³லோ வா – ‘ஸரதாயஸ்மா ஏவரூபிங் ஆபத்திங் ஆபஜ்ஜிதா’தி ? ஸோ அஸ்ஸரமானோவ ஏவங் வதே³தி – ‘ஸராமி கோ² அஹங், ஆவுஸோ, யதா² ஸுபினந்தேனா’தி. தஸ்ஸ ஸங்கோ⁴ அமூள்ஹவினயங் தே³தி. த⁴ம்மிகங் அமூள்ஹவினயஸ்ஸ தா³னங்.
‘‘Idha pana, bhikkhave, bhikkhu ummattako hoti cittavipariyāsakato. Tena ummattakena cittavipariyāsakatena bahuṃ assāmaṇakaṃ ajjhāciṇṇaṃ hoti bhāsitaparikkantaṃ. Tamenaṃ codeti saṅgho vā, sambahulā vā, ekapuggalo vā – ‘saratāyasmā evarūpiṃ āpattiṃ āpajjitā’ti ? So assaramānova evaṃ vadeti – ‘sarāmi kho ahaṃ, āvuso, yathā supinantenā’ti. Tassa saṅgho amūḷhavinayaṃ deti. Dhammikaṃ amūḷhavinayassa dānaṃ.
‘‘இத⁴ பன, பி⁴க்க²வே, பி⁴க்கு² உம்மத்தகோ ஹோதி சித்தவிபரியாஸகதோ. தேன உம்மத்தகேன சித்தவிபரியாஸகதேன ப³ஹுங் அஸ்ஸாமணகங் அஜ்ஜா²சிண்ணங் ஹோதி பா⁴ஸிதபரிக்கந்தங். தமேனங் சோதே³தி ஸங்கோ⁴ வா, ஸம்ப³ஹுலா வா, ஏகபுக்³க³லோ வா – ‘ஸரதாயஸ்மா ஏவரூபிங் ஆபத்திங் ஆபஜ்ஜிதா’தி? ஸோ உம்மத்தகோ உம்மத்தகாலயங் கரோதி – ‘அஹம்பி ஏவங் கரோமி. தும்ஹேபி ஏவங் கரோத². மய்ஹம்பி ஏதங் கப்பதி. தும்ஹாகம்பேதங் கப்பதீ’தி. தஸ்ஸ ஸங்கோ⁴ அமூள்ஹவினயங் தே³தி. த⁴ம்மிகங் அமூள்ஹவினயஸ்ஸ தா³னங். ‘‘இமானி தீணி த⁴ம்மிகானி அமூள்ஹவினயஸ்ஸ தா³னானீ’’தி.
‘‘Idha pana, bhikkhave, bhikkhu ummattako hoti cittavipariyāsakato. Tena ummattakena cittavipariyāsakatena bahuṃ assāmaṇakaṃ ajjhāciṇṇaṃ hoti bhāsitaparikkantaṃ. Tamenaṃ codeti saṅgho vā, sambahulā vā, ekapuggalo vā – ‘saratāyasmā evarūpiṃ āpattiṃ āpajjitā’ti? So ummattako ummattakālayaṃ karoti – ‘ahampi evaṃ karomi. Tumhepi evaṃ karotha. Mayhampi etaṃ kappati. Tumhākampetaṃ kappatī’ti. Tassa saṅgho amūḷhavinayaṃ deti. Dhammikaṃ amūḷhavinayassa dānaṃ. ‘‘Imāni tīṇi dhammikāni amūḷhavinayassa dānānī’’ti.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / அமூள்ஹவினயகதா² • Amūḷhavinayakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸதிவினயாதி³கதா²வண்ணனா • Sativinayādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அமூள்ஹவினயகதா²வண்ணனா • Amūḷhavinayakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஸதிவினயகதா²தி³வண்ணனா • Sativinayakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 3. அமூள்ஹவினயகதா² • 3. Amūḷhavinayakathā
