| Library / Tipiṭaka / ཏིཔིཊཀ • Tipiṭaka / ཙཱུལ༹ཝགྒཔཱལི༹ • Cūḷavaggapāḷi |
༣. ཨམཱུལ༹ྷཝིནཡོ
3. Amūḷhavinayo
༡༩༦. ཏེན ཁོ པན སམཡེན གགྒོ བྷིཀྑུ ཨུམྨཏྟཀོ ཧོཏི, ཙིཏྟཝིཔརིཡཱསཀཏོ། ཏེན ཨུམྨཏྟཀེན ཙིཏྟཝིཔརིཡཱསཀཏེན བཧུཾ ཨསྶཱམཎཀཾ ཨཛ྄ཛྷཱཙིཎྞཾ ཧོཏི བྷཱསིཏཔརིཀྐནྟཾ། བྷིཀྑཱུ གགྒཾ བྷིཀྑུཾ ཨུམྨཏྟཀེན ཙིཏྟཝིཔརིཡཱསཀཏེན ཨཛ྄ཛྷཱཙིཎྞེན ཨཱཔཏྟིཡཱ ཙོདེནྟི – ‘‘སརཏཱཡསྨཱ ཨེཝརཱུཔིཾ ཨཱཔཏྟིཾ ཨཱཔཛྫིཏཱ’’ཏི? སོ ཨེཝཾ ཝདེཏི – ‘‘ཨཧཾ ཁོ, ཨཱཝུསོ , ཨུམྨཏྟཀོ ཨཧོསིཾ ཙིཏྟཝིཔརིཡཱསཀཏོ། ཏེན མེ ཨུམྨཏྟཀེན ཙིཏྟཝིཔརིཡཱསཀཏེན བཧུཾ ཨསྶཱམཎཀཾ ཨཛ྄ཛྷཱཙིཎྞཾ བྷཱསིཏཔརིཀྐནྟཾ། ནཱཧཾ ཏཾ སརཱམི། མཱུལ༹ྷེན མེ ཨེཏཾ ཀཏ’’ནྟི། ཨེཝམྤི ནཾ ཝུཙྩམཱནཱ ཙོདེནྟེཝ – ‘‘སརཏཱཡསྨཱ ཨེཝརཱུཔིཾ ཨཱཔཏྟིཾ ཨཱཔཛྫིཏཱ’’ཏི? ཡེ ཏེ བྷིཀྑཱུ ཨཔྤིཙྪཱ..པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ བྷིཀྑཱུ གགྒཾ བྷིཀྑུཾ ཨུམྨཏྟཀེན ཙིཏྟཝིཔརིཡཱསཀཏེན ཨཛ྄ཛྷཱཙིཎྞེན ཨཱཔཏྟིཡཱ ཙོདེསྶནྟི – ‘‘སརཏཱཡསྨཱ ཨེཝརཱུཔིཾ ཨཱཔཏྟིཾ ཨཱཔཛྫིཏཱ’ཏི! སོ ཨེཝཾ ཝདེཏི – ‘ཨཧཾ ཁོ, ཨཱཝུསོ, ཨུམྨཏྟཀོ ཨཧོསིཾ ཙིཏྟཝིཔརིཡཱསཀཏོ། ཏེན མེ ཨུམྨཏྟཀེན ཙིཏྟཝིཔརིཡཱསཀཏེན བཧུཾ ཨསྶཱམཎཀཾ ཨཛ྄ཛྷཱཙིཎྞཾ བྷཱསིཏཔརིཀྐནྟཾ། ནཱཧཾ ཏཾ སརཱམི། མཱུལ༹ྷེན མེ ཨེཏཾ ཀཏ’ནྟི། ཨེཝམྤི ནཾ ཝུཙྩམཱནཱ ཙོདེནྟེཝ – ‘‘སརཏཱཡསྨཱ ཨེཝརཱུཔིཾ ཨཱཔཏྟིཾ ཨཱཔཛྫིཏཱ’’ཏི? ཨཐ ཁོ ཏེ བྷིཀྑཱུ བྷགཝཏོ ཨེཏམཏྠཾ ཨཱརོཙེསུཾ…པེ॰… ‘‘སཙྩཾ ཀིར, བྷིཀྑཝེ…པེ॰… སཙྩཾ བྷགཝཱ’’ཏི…པེ॰… ཝིགརཧིཏྭཱ…པེ॰… དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི –
196. Tena kho pana samayena gaggo bhikkhu ummattako hoti, cittavipariyāsakato. Tena ummattakena cittavipariyāsakatena bahuṃ assāmaṇakaṃ ajjhāciṇṇaṃ hoti bhāsitaparikkantaṃ. Bhikkhū gaggaṃ bhikkhuṃ ummattakena cittavipariyāsakatena ajjhāciṇṇena āpattiyā codenti – ‘‘saratāyasmā evarūpiṃ āpattiṃ āpajjitā’’ti? So evaṃ vadeti – ‘‘ahaṃ kho, āvuso , ummattako ahosiṃ cittavipariyāsakato. Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ. Nāhaṃ taṃ sarāmi. Mūḷhena me etaṃ kata’’nti. Evampi naṃ vuccamānā codenteva – ‘‘saratāyasmā evarūpiṃ āpattiṃ āpajjitā’’ti? Ye te bhikkhū appicchā..pe… te ujjhāyanti khiyyanti vipācenti – ‘‘kathañhi nāma bhikkhū gaggaṃ bhikkhuṃ ummattakena cittavipariyāsakatena ajjhāciṇṇena āpattiyā codessanti – ‘‘saratāyasmā evarūpiṃ āpattiṃ āpajjitā’ti! So evaṃ vadeti – ‘ahaṃ kho, āvuso, ummattako ahosiṃ cittavipariyāsakato. Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ. Nāhaṃ taṃ sarāmi. Mūḷhena me etaṃ kata’nti. Evampi naṃ vuccamānā codenteva – ‘‘saratāyasmā evarūpiṃ āpattiṃ āpajjitā’’ti? Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave…pe… saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi –
‘‘ཏེན ཧི, བྷིཀྑཝེ, སངྒྷོ གགྒསྶ བྷིཀྑུནོ ཨམཱུལ༹ྷསྶ ཨམཱུལ༹ྷཝིནཡཾ དེཏུ། ཨེཝཉྩ པན, བྷིཀྑཝེ, དཱཏབྦོ – ‘‘ཏེན, བྷིཀྑཝེ, གགྒེན བྷིཀྑུནཱ སངྒྷཾ ཨུཔསངྐམིཏྭཱ, ཨེཀཾསཾ ཨུཏྟརཱསངྒཾ ཀརིཏྭཱ, ཝུཌྜྷཱནཾ བྷིཀྑཱུནཾ པཱདེ ཝནྡིཏྭཱ, ཨུཀྐུཊིཀཾ ནིསཱིདིཏྭཱ, ཨཉྫལིཾ པགྒཧེཏྭཱ, ཨེཝམསྶ ཝཙནཱིཡོ – ‘ཨཧཾ, བྷནྟེ, ཨུམྨཏྟཀོ ཨཧོསིཾ ཙིཏྟཝིཔརིཡཱསཀཏོ། ཏེན མེ ཨུམྨཏྟཀེན ཙིཏྟཝིཔརིཡཱསཀཏེན བཧུཾ ཨསྶཱམཎཀཾ ཨཛ྄ཛྷཱཙིཎྞཾ བྷཱསིཏཔརིཀྐནྟཾ། མཾ བྷིཀྑཱུ ཨུམྨཏྟཀེན ཙིཏྟཝིཔརིཡཱསཀཏེན ཨཛ྄ཛྷཱཙིཎྞེན ཨཱཔཏྟིཡཱ ཙོདེནྟི – ‘སརཏཱཡསྨཱ ཨེཝརཱུཔིཾ ཨཱཔཏྟིཾ ཨཱཔཛྫིཏཱ’ཏི? ཏྱཱཧཾ ཨེཝཾ ཝདཱམི – ‘ཨཧཾ ཁོ, ཨཱཝུསོ, ཨུམྨཏྟཀོ ཨཧོསིཾ ཙིཏྟཝིཔརིཡཱསཀཏོ། ཏེན མེ ཨུམྨཏྟཀེན ཙིཏྟཝིཔརིཡཱསཀཏེན བཧུཾ ཨསྶཱམཎཀཾ ཨཛ྄ཛྷཱཙིཎྞཾ བྷཱསིཏཔརིཀྐནྟཾ། ནཱཧཾ ཏཾ སརཱམི། མཱུལ༹ྷེན མེ ཨེཏཾ ཀཏ’ནྟི། ཨེཝམྤི མཾ ཝུཙྩམཱནཱ ཙོདེནྟེཝ – ‘སརཏཱཡསྨཱ ཨེཝརཱུཔིཾ ཨཱཔཏྟིཾ ཨཱཔཛྫིཏཱ’ཏི? སོཧཾ , བྷནྟེ, ཨམཱུལ༹ྷོ སངྒྷཾ ཨམཱུལ༹ྷཝིནཡཾ ཡཱཙཱམཱི’ཏི། དུཏིཡམྤི ཡཱཙིཏབྦོ། ཏཏིཡམྤི ཡཱཙིཏབྦོ – ‘ཨཧཾ, བྷནྟེ, ཨུམྨཏྟཀོ ཨཧོསིཾ ཙིཏྟཝིཔརིཡཱསཀཏོ། ཏེན མེ ཨུམྨཏྟཀེན ཙིཏྟཝིཔརིཡཱསཀཏེན བཧུཾ ཨསྶཱམཎཀཾ ཨཛ྄ཛྷཱཙིཎྞཾ བྷཱསིཏཔརིཀྐནྟཾ། མཾ བྷིཀྑཱུ ཨུམྨཏྟཀེན ཙིཏྟཝིཔརིཡཱསཀཏེན ཨཛ྄ཛྷཱཙིཎྞེན ཨཱཔཏྟིཡཱ ཙོདེནྟི – ‘སརཏཱཡསྨཱ ཨེཝརཱུཔིཾ ཨཱཔཏྟིཾ ཨཱཔཛྫིཏཱ’ཏི? ཏྱཱཧཾ ཨེཝཾ ཝདཱམི – ‘ཨཧཾ ཁོ, ཨཱཝུསོ, ཨུམྨཏྟཀོ ཨཧོསིཾ ཙིཏྟཝིཔརིཡཱསཀཏོ། ཏེན མེ ཨུམྨཏྟཀེན ཙིཏྟཝིཔརིཡཱསཀཏེན བཧུཾ ཨསྶཱམཎཀཾ ཨཛ྄ཛྷཱཙིཎྞཾ བྷཱསིཏཔརིཀྐནྟཾ། ནཱཧཾ ཏཾ སརཱམི མཱུལ༹ྷེན མེ ཨེཏཾ ཀཏ’ནྟི། ཨེཝམྤི མཾ ཝུཙྩམཱནཱ ཙོདེནྟེཝ – ‘སརཏཱཡསྨཱ ཨེཝརཱུཔིཾ ཨཱཔཏྟིཾ ཨཱཔཛྫིཏཱ’ཏི? སོཧཾ ཨམཱུལ༹ྷོ 1 ཏཏིཡམྤི, བྷནྟེ, སངྒྷཾ ཨམཱུལ༹ྷཝིནཡཾ ཡཱཙཱམཱི’ཏི། བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ –
‘‘Tena hi, bhikkhave, saṅgho gaggassa bhikkhuno amūḷhassa amūḷhavinayaṃ detu. Evañca pana, bhikkhave, dātabbo – ‘‘tena, bhikkhave, gaggena bhikkhunā saṅghaṃ upasaṅkamitvā, ekaṃsaṃ uttarāsaṅgaṃ karitvā, vuḍḍhānaṃ bhikkhūnaṃ pāde vanditvā, ukkuṭikaṃ nisīditvā, añjaliṃ paggahetvā, evamassa vacanīyo – ‘ahaṃ, bhante, ummattako ahosiṃ cittavipariyāsakato. Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ. Maṃ bhikkhū ummattakena cittavipariyāsakatena ajjhāciṇṇena āpattiyā codenti – ‘saratāyasmā evarūpiṃ āpattiṃ āpajjitā’ti? Tyāhaṃ evaṃ vadāmi – ‘ahaṃ kho, āvuso, ummattako ahosiṃ cittavipariyāsakato. Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ. Nāhaṃ taṃ sarāmi. Mūḷhena me etaṃ kata’nti. Evampi maṃ vuccamānā codenteva – ‘saratāyasmā evarūpiṃ āpattiṃ āpajjitā’ti? Sohaṃ , bhante, amūḷho saṅghaṃ amūḷhavinayaṃ yācāmī’ti. Dutiyampi yācitabbo. Tatiyampi yācitabbo – ‘ahaṃ, bhante, ummattako ahosiṃ cittavipariyāsakato. Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ. Maṃ bhikkhū ummattakena cittavipariyāsakatena ajjhāciṇṇena āpattiyā codenti – ‘saratāyasmā evarūpiṃ āpattiṃ āpajjitā’ti? Tyāhaṃ evaṃ vadāmi – ‘ahaṃ kho, āvuso, ummattako ahosiṃ cittavipariyāsakato. Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ. Nāhaṃ taṃ sarāmi mūḷhena me etaṃ kata’nti. Evampi maṃ vuccamānā codenteva – ‘saratāyasmā evarūpiṃ āpattiṃ āpajjitā’ti? Sohaṃ amūḷho 2 tatiyampi, bhante, saṅghaṃ amūḷhavinayaṃ yācāmī’ti. Byattena bhikkhunā paṭibalena saṅgho ñāpetabbo –
༡༩༧. ‘‘སུཎཱཏུ མེ, བྷནྟེ, སངྒྷོ། ཨཡཾ གགྒོ བྷིཀྑུ ཨུམྨཏྟཀོ ཨཧོསི ཙིཏྟཝིཔརིཡཱསཀཏོ། ཏེན ཨུམྨཏྟཀེན ཙིཏྟཝིཔརིཡཱསཀཏེན བཧུཾ ཨསྶཱམཎཀཾ ཨཛ྄ཛྷཱཙིཎྞཾ བྷཱསིཏཔརིཀྐནྟཾ། བྷིཀྑཱུ གགྒཾ བྷིཀྑུཾ ཨུམྨཏྟཀེན ཙིཏྟཝིཔརིཡཱསཀཏེན ཨཛ྄ཛྷཱཙིཎྞེན ཨཱཔཏྟིཡཱ ཙོདེནྟི – ‘སརཏཱཡསྨཱ ཨེཝརཱུཔིཾ ཨཱཔཏྟིཾ ཨཱཔཛྫིཏཱ’ཏི? སོ ཨེཝཾ ཝདེཏི – ‘ཨཧཾ ཁོ, ཨཱཝུསོ, ཨུམྨཏྟཀོ ཨཧོསིཾ ཙིཏྟཝིཔརིཡཱསཀཏོ། ཏེན མེ ཨུམྨཏྟཀེན ཙིཏྟཝིཔརིཡཱསཀཏེན བཧུཾ ཨསྶཱམཎཀཾ ཨཛ྄ཛྷཱཙིཎྞཾ བྷཱསིཏཔརིཀྐནྟཾ། ནཱཧཾ ཏཾ སརཱམི, མཱུལ༹ྷེན མེ ཨེཏཾ ཀཏ’ནྟི། ཨེཝམྤི ནཾ ཝུཙྩམཱནཱ ཙོདེནྟེཝ – ‘སརཏཱཡསྨཱ ཨེཝརཱུཔིཾ ཨཱཔཏྟིཾ ཨཱཔཛྫིཏཱ’ཏི? སོ ཨམཱུལ༹ྷོ སངྒྷཾ ཨམཱུལ༹ྷཝིནཡཾ ཡཱཙཏི། ཡདི སངྒྷསྶ པཏྟཀལླཾ, སངྒྷོ གགྒསྶ བྷིཀྑུནོ ཨམཱུལ༹ྷསྶ ཨམཱུལ༹ྷཝིནཡཾ དདེཡྻ། ཨེསཱ ཉཏྟི།
197. ‘‘Suṇātu me, bhante, saṅgho. Ayaṃ gaggo bhikkhu ummattako ahosi cittavipariyāsakato. Tena ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ. Bhikkhū gaggaṃ bhikkhuṃ ummattakena cittavipariyāsakatena ajjhāciṇṇena āpattiyā codenti – ‘saratāyasmā evarūpiṃ āpattiṃ āpajjitā’ti? So evaṃ vadeti – ‘ahaṃ kho, āvuso, ummattako ahosiṃ cittavipariyāsakato. Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ. Nāhaṃ taṃ sarāmi, mūḷhena me etaṃ kata’nti. Evampi naṃ vuccamānā codenteva – ‘saratāyasmā evarūpiṃ āpattiṃ āpajjitā’ti? So amūḷho saṅghaṃ amūḷhavinayaṃ yācati. Yadi saṅghassa pattakallaṃ, saṅgho gaggassa bhikkhuno amūḷhassa amūḷhavinayaṃ dadeyya. Esā ñatti.
‘‘སུཎཱཏུ མེ, བྷནྟེ, སངྒྷོ། ཨཡཾ གགྒོ བྷིཀྑུ ཨུམྨཏྟཀོ ཨཧོསི ཙིཏྟཝིཔརིཡཱསཀཏོ། ཏེན ཨུམྨཏྟཀེན ཙིཏྟཝིཔརིཡཱསཀཏེན བཧུཾ ཨསྶཱམཎཀཾ ཨཛ྄ཛྷཱཙིཎྞཾ བྷཱསིཏཔརིཀྐནྟཾ། བྷིཀྑཱུ གགྒཾ བྷིཀྑུཾ ཨུམྨཏྟཀེན ཙིཏྟཝིཔརིཡཱསཀཏེན ཨཛ྄ཛྷཱཙིཎྞེན ཨཱཔཏྟིཡཱ ཙོདེནྟི – ‘སརཏཱཡསྨཱ ཨེཝརཱུཔིཾ ཨཱཔཏྟིཾ ཨཱཔཛྫིཏཱ’ཏི? སོ ཨེཝཾ ཝདེཏི – ‘ཨཧཾ ཁོ, ཨཱཝུསོ, ཨུམྨཏྟཀོ ཨཧོསིཾ ཙིཏྟཝིཔརིཡཱསཀཏོ། ཏེན མེ ཨུམྨཏྟཀེན ཙིཏྟཝིཔརིཡཱསཀཏེན བཧུཾ ཨསྶཱམཎཀཾ ཨཛ྄ཛྷཱཙིཎྞཾ བྷཱསིཏཔརིཀྐནྟཾ། ནཱཧཾ ཏཾ སརཱམི མཱུལ༹ྷེན མེ ཨེཏཾ ཀཏ’ནྟི། ཨེཝམྤི ནཾ ཝུཙྩམཱནཱ ཙོདེནྟེཝ – ‘སརཏཱཡསྨཱ ཨེཝརཱུཔིཾ ཨཱཔཏྟིཾ ཨཱཔཛྫིཏཱ’ཏི? སོ ཨམཱུལ༹ྷོ སངྒྷཾ ཨམཱུལ༹ྷཝིནཡཾ ཡཱཙཏི། སངྒྷོ གགྒསྶ བྷིཀྑུནོ ཨམཱུལ༹ྷསྶ ཨམཱུལ༹ྷཝིནཡཾ དེཏི། ཡསྶཱཡསྨཏོ ཁམཏི གགྒསྶ བྷིཀྑུནོ ཨམཱུལ༹ྷསྶ ཨམཱུལ༹ྷཝིནཡསྶ དཱནཾ, སོ ཏུཎྷསྶ; ཡསྶ ནཀྑམཏི, སོ བྷཱསེཡྻ།
‘‘Suṇātu me, bhante, saṅgho. Ayaṃ gaggo bhikkhu ummattako ahosi cittavipariyāsakato. Tena ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ. Bhikkhū gaggaṃ bhikkhuṃ ummattakena cittavipariyāsakatena ajjhāciṇṇena āpattiyā codenti – ‘saratāyasmā evarūpiṃ āpattiṃ āpajjitā’ti? So evaṃ vadeti – ‘ahaṃ kho, āvuso, ummattako ahosiṃ cittavipariyāsakato. Tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ. Nāhaṃ taṃ sarāmi mūḷhena me etaṃ kata’nti. Evampi naṃ vuccamānā codenteva – ‘saratāyasmā evarūpiṃ āpattiṃ āpajjitā’ti? So amūḷho saṅghaṃ amūḷhavinayaṃ yācati. Saṅgho gaggassa bhikkhuno amūḷhassa amūḷhavinayaṃ deti. Yassāyasmato khamati gaggassa bhikkhuno amūḷhassa amūḷhavinayassa dānaṃ, so tuṇhassa; yassa nakkhamati, so bhāseyya.
‘‘དུཏིཡམྤི ཨེཏམཏྠཾ ཝདཱམི…པེ॰… ཏཏིཡམྤི ཨེཏམཏྠཾ ཝདཱམི…པེ॰…།
‘‘Dutiyampi etamatthaṃ vadāmi…pe… tatiyampi etamatthaṃ vadāmi…pe….
‘‘དིནྣོ སངྒྷེན གགྒསྶ བྷིཀྑུནོ ཨམཱུལ༹ྷསྶ ཨམཱུལ༹ྷཝིནཡོ། ཁམཏི སངྒྷསྶ, ཏསྨཱ ཏུཎྷཱི , ཨེཝམེཏཾ དྷཱརཡཱམཱི’’ཏི།
‘‘Dinno saṅghena gaggassa bhikkhuno amūḷhassa amūḷhavinayo. Khamati saṅghassa, tasmā tuṇhī , evametaṃ dhārayāmī’’ti.
༡༩༨. ‘‘ཏཱིཎིམཱནི, བྷིཀྑཝེ, ཨདྷམྨིཀཱནི ཨམཱུལ༹ྷཝིནཡསྶ དཱནཱནི, ཏཱིཎི དྷམྨིཀཱནི། ཀམྨཱནི ཏཱིཎི ཨདྷམྨིཀཱནི ཨམཱུལ༹ྷཝིནཡསྶ དཱནཱནི?
198. ‘‘Tīṇimāni, bhikkhave, adhammikāni amūḷhavinayassa dānāni, tīṇi dhammikāni. Kammāni tīṇi adhammikāni amūḷhavinayassa dānāni?
‘‘ཨིདྷ པན, བྷིཀྑཝེ, བྷིཀྑུ ཨཱཔཏྟིཾ ཨཱཔནྣོ ཧོཏི། ཏམེནཾ ཙོདེཏི སངྒྷོ ཝཱ, སམྦཧུལཱ ཝཱ, ཨེཀཔུགྒལོ ཝཱ – ‘སརཏཱཡསྨཱ ཨེཝརཱུཔིཾ ཨཱཔཏྟིཾ ཨཱཔཛྫིཏཱ’ཏི? སོ སརམཱནོཝ ཨེཝཾ ཝདེཏི – ‘ན ཁོ ཨཧཾ, ཨཱཝུསོ, སརཱམི ཨེཝརཱུཔིཾ ཨཱཔཏྟིཾ ཨཱཔཛྫིཏཱ’ཏི། ཏསྶ སངྒྷོ ཨམཱུལ༹ྷཝིནཡཾ དེཏི། ཨདྷམྨིཀཾ ཨམཱུལ༹ྷཝིནཡསྶ དཱནཾ།
‘‘Idha pana, bhikkhave, bhikkhu āpattiṃ āpanno hoti. Tamenaṃ codeti saṅgho vā, sambahulā vā, ekapuggalo vā – ‘saratāyasmā evarūpiṃ āpattiṃ āpajjitā’ti? So saramānova evaṃ vadeti – ‘na kho ahaṃ, āvuso, sarāmi evarūpiṃ āpattiṃ āpajjitā’ti. Tassa saṅgho amūḷhavinayaṃ deti. Adhammikaṃ amūḷhavinayassa dānaṃ.
‘‘ཨིདྷ པན, བྷིཀྑཝེ, བྷིཀྑུ ཨཱཔཏྟིཾ ཨཱཔནྣོ ཧོཏི། ཏམེནཾ ཙོདེཏི སངྒྷོ ཝཱ, སམྦཧུལཱ ཝཱ, ཨེཀཔུགྒལོ ཝཱ – ‘སརཏཱཡསྨཱ ཨེཝརཱུཔིཾ ཨཱཔཏྟིཾ ཨཱཔཛྫིཏཱ’ཏི? སོ སརམཱནོཝ ཨེཝཾ ཝདེཏི – ‘སརཱམི ཁོ ཨཧཾ, ཨཱཝུསོ, ཡཐཱསུཔིནནྟེནཱ’ཏི། ཏསྶ སངྒྷོ ཨམཱུལ༹ྷཝིནཡཾ དེཏི། ཨདྷམྨིཀཾ ཨམཱུལ༹ྷཝིནཡསྶ དཱནཾ།
‘‘Idha pana, bhikkhave, bhikkhu āpattiṃ āpanno hoti. Tamenaṃ codeti saṅgho vā, sambahulā vā, ekapuggalo vā – ‘saratāyasmā evarūpiṃ āpattiṃ āpajjitā’ti? So saramānova evaṃ vadeti – ‘sarāmi kho ahaṃ, āvuso, yathāsupinantenā’ti. Tassa saṅgho amūḷhavinayaṃ deti. Adhammikaṃ amūḷhavinayassa dānaṃ.
‘‘ཨིདྷ པན, བྷིཀྑཝེ, བྷིཀྑུ ཨཱཔཏྟིཾ ཨཱཔནྣོ ཧོཏི། ཏམེནཾ ཙོདེཏི སངྒྷོ ཝཱ, སམྦཧུལཱ ཝཱ, ཨེཀཔུགྒལོ ཝཱ – ‘སརཏཱཡསྨཱ ཨེཝརཱུཔིཾ ཨཱཔཏྟིཾ ཨཱཔཛྫིཏཱ’ཏི? སོ ཨནུམྨཏྟཀོ ཨུམྨཏྟཀཱལཡཾ ཀརོཏི – ‘ཨཧམྤི ཁོ ཨེཝཾ ཀརོམི། ཏུམྷེཔི ཨེཝཾ ཀརོཐ། མཡ྄ཧམྤི ཨེཏཾ ཀཔྤཏི། ཏུམྷཱཀམྤེཏཾ ཀཔྤཏཱི’ཏི། ཏསྶ སངྒྷོ ཨམཱུལ༹ྷཝིནཡཾ དེཏི། ཨདྷམྨིཀཾ ཨམཱུལ༹ྷཝིནཡསྶ དཱནཾ། ཨིམཱནི ཏཱིཎི ཨདྷམྨིཀཱནི ཨམཱུལ༹ྷཝིནཡསྶ དཱནཱནི།
‘‘Idha pana, bhikkhave, bhikkhu āpattiṃ āpanno hoti. Tamenaṃ codeti saṅgho vā, sambahulā vā, ekapuggalo vā – ‘saratāyasmā evarūpiṃ āpattiṃ āpajjitā’ti? So anummattako ummattakālayaṃ karoti – ‘ahampi kho evaṃ karomi. Tumhepi evaṃ karotha. Mayhampi etaṃ kappati. Tumhākampetaṃ kappatī’ti. Tassa saṅgho amūḷhavinayaṃ deti. Adhammikaṃ amūḷhavinayassa dānaṃ. Imāni tīṇi adhammikāni amūḷhavinayassa dānāni.
༡༩༩. ‘‘ཀཏམཱནི ཏཱིཎི དྷམྨིཀཱནི ཨམཱུལ༹ྷཝིནཡསྶ དཱནཱནི?
199. ‘‘Katamāni tīṇi dhammikāni amūḷhavinayassa dānāni?
‘‘ཨིདྷ པན, བྷིཀྑཝེ, བྷིཀྑུ ཨུམྨཏྟཀོ ཧོཏི ཙིཏྟཝིཔརིཡཱསཀཏོ། ཏེན ཨུམྨཏྟཀེན ཙིཏྟཝིཔརིཡཱསཀཏེན བཧུཾ ཨསྶཱམཎཀཾ ཨཛ྄ཛྷཱཙིཎྞཾ ཧོཏི བྷཱསིཏཔརིཀྐནྟཾ། ཏམེནཾ ཙོདེཏི སངྒྷོ ཝཱ, སམྦཧུལཱ ཝཱ, ཨེཀཔུགྒལོ ཝཱ – ‘སརཏཱཡསྨཱ ཨེཝརཱུཔིཾ ཨཱཔཏྟིཾ ཨཱཔཛྫིཏཱ’ཏི? སོ ཨསྶརམཱནོཝ ཨེཝཾ ཝདེཏི – ‘ན ཁོ ཨཧཾ, ཨཱཝུསོ, སརཱམི ཨེཝརཱུཔིཾ ཨཱཔཏྟིཾ ཨཱཔཛྫིཏཱ’ཏི། ཏསྶ སངྒྷོ ཨམཱུལ༹ྷཝིནཡཾ དེཏི། དྷམྨིཀཾ ཨམཱུལ༹ྷཝིནཡསྶ དཱནཾ།
‘‘Idha pana, bhikkhave, bhikkhu ummattako hoti cittavipariyāsakato. Tena ummattakena cittavipariyāsakatena bahuṃ assāmaṇakaṃ ajjhāciṇṇaṃ hoti bhāsitaparikkantaṃ. Tamenaṃ codeti saṅgho vā, sambahulā vā, ekapuggalo vā – ‘saratāyasmā evarūpiṃ āpattiṃ āpajjitā’ti? So assaramānova evaṃ vadeti – ‘na kho ahaṃ, āvuso, sarāmi evarūpiṃ āpattiṃ āpajjitā’ti. Tassa saṅgho amūḷhavinayaṃ deti. Dhammikaṃ amūḷhavinayassa dānaṃ.
‘‘ཨིདྷ པན, བྷིཀྑཝེ, བྷིཀྑུ ཨུམྨཏྟཀོ ཧོཏི ཙིཏྟཝིཔརིཡཱསཀཏོ། ཏེན ཨུམྨཏྟཀེན ཙིཏྟཝིཔརིཡཱསཀཏེན བཧུཾ ཨསྶཱམཎཀཾ ཨཛ྄ཛྷཱཙིཎྞཾ ཧོཏི བྷཱསིཏཔརིཀྐནྟཾ། ཏམེནཾ ཙོདེཏི སངྒྷོ ཝཱ, སམྦཧུལཱ ཝཱ, ཨེཀཔུགྒལོ ཝཱ – ‘སརཏཱཡསྨཱ ཨེཝརཱུཔིཾ ཨཱཔཏྟིཾ ཨཱཔཛྫིཏཱ’ཏི ? སོ ཨསྶརམཱནོཝ ཨེཝཾ ཝདེཏི – ‘སརཱམི ཁོ ཨཧཾ, ཨཱཝུསོ, ཡཐཱ སུཔིནནྟེནཱ’ཏི། ཏསྶ སངྒྷོ ཨམཱུལ༹ྷཝིནཡཾ དེཏི། དྷམྨིཀཾ ཨམཱུལ༹ྷཝིནཡསྶ དཱནཾ།
‘‘Idha pana, bhikkhave, bhikkhu ummattako hoti cittavipariyāsakato. Tena ummattakena cittavipariyāsakatena bahuṃ assāmaṇakaṃ ajjhāciṇṇaṃ hoti bhāsitaparikkantaṃ. Tamenaṃ codeti saṅgho vā, sambahulā vā, ekapuggalo vā – ‘saratāyasmā evarūpiṃ āpattiṃ āpajjitā’ti ? So assaramānova evaṃ vadeti – ‘sarāmi kho ahaṃ, āvuso, yathā supinantenā’ti. Tassa saṅgho amūḷhavinayaṃ deti. Dhammikaṃ amūḷhavinayassa dānaṃ.
‘‘ཨིདྷ པན, བྷིཀྑཝེ, བྷིཀྑུ ཨུམྨཏྟཀོ ཧོཏི ཙིཏྟཝིཔརིཡཱསཀཏོ། ཏེན ཨུམྨཏྟཀེན ཙིཏྟཝིཔརིཡཱསཀཏེན བཧུཾ ཨསྶཱམཎཀཾ ཨཛ྄ཛྷཱཙིཎྞཾ ཧོཏི བྷཱསིཏཔརིཀྐནྟཾ། ཏམེནཾ ཙོདེཏི སངྒྷོ ཝཱ, སམྦཧུལཱ ཝཱ, ཨེཀཔུགྒལོ ཝཱ – ‘སརཏཱཡསྨཱ ཨེཝརཱུཔིཾ ཨཱཔཏྟིཾ ཨཱཔཛྫིཏཱ’ཏི? སོ ཨུམྨཏྟཀོ ཨུམྨཏྟཀཱལཡཾ ཀརོཏི – ‘ཨཧམྤི ཨེཝཾ ཀརོམི། ཏུམྷེཔི ཨེཝཾ ཀརོཐ། མཡ྄ཧམྤི ཨེཏཾ ཀཔྤཏི། ཏུམྷཱཀམྤེཏཾ ཀཔྤཏཱི’ཏི། ཏསྶ སངྒྷོ ཨམཱུལ༹ྷཝིནཡཾ དེཏི། དྷམྨིཀཾ ཨམཱུལ༹ྷཝིནཡསྶ དཱནཾ། ‘‘ཨིམཱནི ཏཱིཎི དྷམྨིཀཱནི ཨམཱུལ༹ྷཝིནཡསྶ དཱནཱནཱི’’ཏི།
‘‘Idha pana, bhikkhave, bhikkhu ummattako hoti cittavipariyāsakato. Tena ummattakena cittavipariyāsakatena bahuṃ assāmaṇakaṃ ajjhāciṇṇaṃ hoti bhāsitaparikkantaṃ. Tamenaṃ codeti saṅgho vā, sambahulā vā, ekapuggalo vā – ‘saratāyasmā evarūpiṃ āpattiṃ āpajjitā’ti? So ummattako ummattakālayaṃ karoti – ‘ahampi evaṃ karomi. Tumhepi evaṃ karotha. Mayhampi etaṃ kappati. Tumhākampetaṃ kappatī’ti. Tassa saṅgho amūḷhavinayaṃ deti. Dhammikaṃ amūḷhavinayassa dānaṃ. ‘‘Imāni tīṇi dhammikāni amūḷhavinayassa dānānī’’ti.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / ཙཱུལ༹ཝགྒ-ཨཊྛཀཐཱ • Cūḷavagga-aṭṭhakathā / ཨམཱུལ༹ྷཝིནཡཀཐཱ • Amūḷhavinayakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / སཏིཝིནཡཱདིཀཐཱཝཎྞནཱ • Sativinayādikathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཨམཱུལ༹ྷཝིནཡཀཐཱཝཎྞནཱ • Amūḷhavinayakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / སཏིཝིནཡཀཐཱདིཝཎྞནཱ • Sativinayakathādivaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༣. ཨམཱུལ༹ྷཝིནཡཀཐཱ • 3. Amūḷhavinayakathā
