| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
4. அனாத³ரியஸிக்கா²பத³வண்ணனா
4. Anādariyasikkhāpadavaṇṇanā
து³வித⁴ஞ்ஹெத்த² அனாத³ரியங் புக்³க³லானாத³ரியஞ்ச த⁴ம்மானாத³ரியஞ்சாதி ஆஹ ‘‘புக்³க³லஸ்ஸ வா’’திஆதி³. தத்த² யோ பி⁴க்கு² உபஸம்பன்னேன பஞ்ஞத்தேன வுச்சமானோ ‘‘அயங் உக்கி²த்தகோ வா வம்பி⁴தோ வா க³ரஹிதோ வா, இமஸ்ஸ வசனங் அகதங் ப⁴விஸ்ஸதீ’’தி (பாசி॰ 342) அனாத³ரியங் கரோதி, அயங் புக்³க³லே அனாத³ரியங் கரோதி நாம. யோ பன பஞ்ஞத்தேன வுச்சமானோ ‘‘கதா²யங் நஸ்ஸெய்ய வா வினஸ்ஸெய்ய வா அந்தரதா⁴யெய்ய வா’’தி, தங் வா நஸிக்கி²துகாமோ அனாத³ரியங் கரோதி, அயங் த⁴ம்மே அனாத³ரியங் கரோதி நாம. தேனாஹ ‘‘தஸ்மா’’திஆதி³.
Duvidhañhettha anādariyaṃ puggalānādariyañca dhammānādariyañcāti āha ‘‘puggalassa vā’’tiādi. Tattha yo bhikkhu upasampannena paññattena vuccamāno ‘‘ayaṃ ukkhittako vā vambhito vā garahito vā, imassa vacanaṃ akataṃ bhavissatī’’ti (pāci. 342) anādariyaṃ karoti, ayaṃ puggale anādariyaṃ karoti nāma. Yo pana paññattena vuccamāno ‘‘kathāyaṃ nasseyya vā vinasseyya vā antaradhāyeyya vā’’ti, taṃ vā nasikkhitukāmo anādariyaṃ karoti, ayaṃ dhamme anādariyaṃ karoti nāma. Tenāha ‘‘tasmā’’tiādi.
இத³ங் ந ஸல்லேகா²ய ஸங்வத்ததீதி ஸம்மா கிலேஸே லிக²தீதி ஸல்லேகோ², அப்பிச்ச²தா, தத³த்த²ங் நயித³ங் ஸங்வத்ததி. ஆதி³ஸத்³தே³ன ‘‘இத³ங் ந து⁴தத்தா²ய ஸங்வத்ததி, ந பாஸாதி³கதாய, ந அபசயாய, ந வீரியாரம்பா⁴ய ஸங்வத்ததீ’’தி (பாசி॰ 343) இத³ங் ஸங்க³ண்ஹாதி. அபஞ்ஞத்தேனாதி ஸுத்தே வா அபி⁴த⁴ம்மே வா ஆக³தேன. பவேணிஆக³தந்தி ஸங்கீ³திகாலதோ பட்டா²ய மஹாகஸ்ஸபாதி³ஆசரியபரம்பராய ஆக³தங். ஸசே பன யஸ்மா உச்சு²ரஸோ ஸத்தாஹகாலிகோ, தஸ்ஸ கஸடோ யாவஜீவிகோ, த்³வின்னங்யேவ ஸமவாயோ உச்சு²யட்டி², தஸ்மா விகாலே உச்சு²யட்டி²ங் கா²தி³துங் வட்டதி கு³ளஹரீதகங் வியாதி ஏவமாதி³கங் கா³ரய்ஹாசரியுக்³க³ஹங் க³ஹெத்வா ‘‘ஏவங் அம்ஹாகங் ஆசரியானங் உக்³க³ஹோ பரிபுச்சா²’’தி ப⁴ணதி, ஆபத்தியேவ.
Idaṃna sallekhāya saṃvattatīti sammā kilese likhatīti sallekho, appicchatā, tadatthaṃ nayidaṃ saṃvattati. Ādisaddena ‘‘idaṃ na dhutatthāya saṃvattati, na pāsādikatāya, na apacayāya, na vīriyārambhāya saṃvattatī’’ti (pāci. 343) idaṃ saṅgaṇhāti. Apaññattenāti sutte vā abhidhamme vā āgatena. Paveṇiāgatanti saṅgītikālato paṭṭhāya mahākassapādiācariyaparamparāya āgataṃ. Sace pana yasmā ucchuraso sattāhakāliko, tassa kasaṭo yāvajīviko, dvinnaṃyeva samavāyo ucchuyaṭṭhi, tasmā vikāle ucchuyaṭṭhiṃ khādituṃ vaṭṭati guḷaharītakaṃ viyāti evamādikaṃ gārayhācariyuggahaṃ gahetvā ‘‘evaṃ amhākaṃ ācariyānaṃ uggaho paripucchā’’ti bhaṇati, āpattiyeva.
அனாத³ரியஸிக்கா²பத³வண்ணனா நிட்டி²தா.
Anādariyasikkhāpadavaṇṇanā niṭṭhitā.
