| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-ཨབྷིནཝ-ཊཱིཀཱ • Kaṅkhāvitaraṇī-abhinava-ṭīkā |
༤. ཨནཱདརིཡསིཀྑཱཔདཝཎྞནཱ
4. Anādariyasikkhāpadavaṇṇanā
དུཝིདྷཉྷེཏྠ ཨནཱདརིཡཾ པུགྒལཱནཱདརིཡཉྩ དྷམྨཱནཱདརིཡཉྩཱཏི ཨཱཧ ‘‘པུགྒལསྶ ཝཱ’’ཏིཨཱདི། ཏཏྠ ཡོ བྷིཀྑུ ཨུཔསམྤནྣེན པཉྙཏྟེན ཝུཙྩམཱནོ ‘‘ཨཡཾ ཨུཀྑིཏྟཀོ ཝཱ ཝམྦྷིཏོ ཝཱ གརཧིཏོ ཝཱ, ཨིམསྶ ཝཙནཾ ཨཀཏཾ བྷཝིསྶཏཱི’’ཏི (པཱཙི॰ ༣༤༢) ཨནཱདརིཡཾ ཀརོཏི, ཨཡཾ པུགྒལེ ཨནཱདརིཡཾ ཀརོཏི ནཱམ། ཡོ པན པཉྙཏྟེན ཝུཙྩམཱནོ ‘‘ཀཐཱཡཾ ནསྶེཡྻ ཝཱ ཝིནསྶེཡྻ ཝཱ ཨནྟརདྷཱཡེཡྻ ཝཱ’’ཏི, ཏཾ ཝཱ ནསིཀྑིཏུཀཱམོ ཨནཱདརིཡཾ ཀརོཏི, ཨཡཾ དྷམྨེ ཨནཱདརིཡཾ ཀརོཏི ནཱམ། ཏེནཱཧ ‘‘ཏསྨཱ’’ཏིཨཱདི།
Duvidhañhettha anādariyaṃ puggalānādariyañca dhammānādariyañcāti āha ‘‘puggalassa vā’’tiādi. Tattha yo bhikkhu upasampannena paññattena vuccamāno ‘‘ayaṃ ukkhittako vā vambhito vā garahito vā, imassa vacanaṃ akataṃ bhavissatī’’ti (pāci. 342) anādariyaṃ karoti, ayaṃ puggale anādariyaṃ karoti nāma. Yo pana paññattena vuccamāno ‘‘kathāyaṃ nasseyya vā vinasseyya vā antaradhāyeyya vā’’ti, taṃ vā nasikkhitukāmo anādariyaṃ karoti, ayaṃ dhamme anādariyaṃ karoti nāma. Tenāha ‘‘tasmā’’tiādi.
ཨིདཾ ན སལླེཁཱཡ སཾཝཏྟཏཱིཏི སམྨཱ ཀིལེསེ ལིཁཏཱིཏི སལླེཁོ, ཨཔྤིཙྪཏཱ, ཏདཏྠཾ ནཡིདཾ སཾཝཏྟཏི། ཨཱདིསདྡེན ‘‘ཨིདཾ ན དྷུཏཏྠཱཡ སཾཝཏྟཏི, ན པཱསཱདིཀཏཱཡ, ན ཨཔཙཡཱཡ, ན ཝཱིརིཡཱརམྦྷཱཡ སཾཝཏྟཏཱི’’ཏི (པཱཙི॰ ༣༤༣) ཨིདཾ སངྒཎྷཱཏི། ཨཔཉྙཏྟེནཱཏི སུཏྟེ ཝཱ ཨབྷིདྷམྨེ ཝཱ ཨཱགཏེན། པཝེཎིཨཱགཏནྟི སངྒཱིཏིཀཱལཏོ པཊྛཱཡ མཧཱཀསྶཔཱདིཨཱཙརིཡཔརམྤརཱཡ ཨཱགཏཾ། སཙེ པན ཡསྨཱ ཨུཙྪུརསོ སཏྟཱཧཀཱལིཀོ, ཏསྶ ཀསཊོ ཡཱཝཛཱིཝིཀོ, དྭིནྣཾཡེཝ སམཝཱཡོ ཨུཙྪུཡཊྛི, ཏསྨཱ ཝིཀཱལེ ཨུཙྪུཡཊྛིཾ ཁཱདིཏུཾ ཝཊྚཏི གུལ༹ཧརཱིཏཀཾ ཝིཡཱཏི ཨེཝམཱདིཀཾ གཱརཡ྄ཧཱཙརིཡུགྒཧཾ གཧེཏྭཱ ‘‘ཨེཝཾ ཨམྷཱཀཾ ཨཱཙརིཡཱནཾ ཨུགྒཧོ པརིཔུཙྪཱ’’ཏི བྷཎཏི, ཨཱཔཏྟིཡེཝ།
Idaṃna sallekhāya saṃvattatīti sammā kilese likhatīti sallekho, appicchatā, tadatthaṃ nayidaṃ saṃvattati. Ādisaddena ‘‘idaṃ na dhutatthāya saṃvattati, na pāsādikatāya, na apacayāya, na vīriyārambhāya saṃvattatī’’ti (pāci. 343) idaṃ saṅgaṇhāti. Apaññattenāti sutte vā abhidhamme vā āgatena. Paveṇiāgatanti saṅgītikālato paṭṭhāya mahākassapādiācariyaparamparāya āgataṃ. Sace pana yasmā ucchuraso sattāhakāliko, tassa kasaṭo yāvajīviko, dvinnaṃyeva samavāyo ucchuyaṭṭhi, tasmā vikāle ucchuyaṭṭhiṃ khādituṃ vaṭṭati guḷaharītakaṃ viyāti evamādikaṃ gārayhācariyuggahaṃ gahetvā ‘‘evaṃ amhākaṃ ācariyānaṃ uggaho paripucchā’’ti bhaṇati, āpattiyeva.
ཨནཱདརིཡསིཀྑཱཔདཝཎྞནཱ ནིཊྛིཏཱ།
Anādariyasikkhāpadavaṇṇanā niṭṭhitā.
