| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
៥. បញ្ចមវគ្គោ
5. Pañcamavaggo
(៥០) ៨. អនាគតញាណកថា
(50) 8. Anāgatañāṇakathā
៤៣៩. អនាគតេ ញាណំ អត្ថីតិ? អាមន្តា។ អនាគតំ មូលតោ ជានាតិ, ហេតុតោ ជានាតិ, និទានតោ ជានាតិ, សម្ភវតោ ជានាតិ, បភវតោ ជានាតិ, សមុដ្ឋានតោ ជានាតិ, អាហារតោ ជានាតិ , អារម្មណតោ ជានាតិ, បច្ចយតោ ជានាតិ, សមុទយតោ ជានាតីតិ? ន ហេវំ វត្តព្ពេ…បេ.…។
439. Anāgate ñāṇaṃ atthīti? Āmantā. Anāgataṃ mūlato jānāti, hetuto jānāti, nidānato jānāti, sambhavato jānāti, pabhavato jānāti, samuṭṭhānato jānāti, āhārato jānāti , ārammaṇato jānāti, paccayato jānāti, samudayato jānātīti? Na hevaṃ vattabbe…pe….
អនាគតេ ញាណំ អត្ថីតិ? អាមន្តា។ អនាគតំ ហេតុបច្ចយតំ ជានាតិ, អារម្មណបច្ចយតំ ជានាតិ, អធិបតិបច្ចយតំ ជានាតិ, អនន្តរបច្ចយតំ ជានាតិ, សមនន្តរបច្ចយតំ ជានាតីតិ? ន ហេវំ វត្តព្ពេ…បេ.…។
Anāgate ñāṇaṃ atthīti? Āmantā. Anāgataṃ hetupaccayataṃ jānāti, ārammaṇapaccayataṃ jānāti, adhipatipaccayataṃ jānāti, anantarapaccayataṃ jānāti, samanantarapaccayataṃ jānātīti? Na hevaṃ vattabbe…pe….
អនាគតេ ញាណំ អត្ថីតិ? អាមន្តា។ គោត្រភុនោ បុគ្គលស្ស សោតាបត្តិមគ្គេ ញាណំ អត្ថីតិ? ន ហេវំ វត្តព្ពេ…បេ.…។ សោតាបត្តិផលសច្ឆិកិរិយាយ បដិបន្នស្ស បុគ្គលស្ស សោតាបត្តិផលេ ញាណំ អត្ថីតិ? ន ហេវំ វត្តព្ពេ…បេ.…។
Anāgate ñāṇaṃ atthīti? Āmantā. Gotrabhuno puggalassa sotāpattimagge ñāṇaṃ atthīti? Na hevaṃ vattabbe…pe…. Sotāpattiphalasacchikiriyāya paṭipannassa puggalassa sotāpattiphale ñāṇaṃ atthīti? Na hevaṃ vattabbe…pe….
សកទាគាមិ…បេ.… អនាគាមិ …បេ.… អរហត្តសច្ឆិកិរិយាយ បដិបន្នស្ស បុគ្គលស្ស អរហត្តេ ញាណំ អត្ថីតិ? ន ហេវំ វត្តព្ពេ…បេ.…។
Sakadāgāmi…pe… anāgāmi …pe… arahattasacchikiriyāya paṭipannassa puggalassa arahatte ñāṇaṃ atthīti? Na hevaṃ vattabbe…pe….
៤៤០. ន វត្តព្ពំ – ‘‘អនាគតេ ញាណំ អត្ថី’’តិ? អាមន្តា។ ននុ វុត្តំ ភគវតា – ‘‘បាដលិបុត្តស្ស ខោ, អានន្ទ, តយោ អន្តរាយា ភវិស្សន្តិ – អគ្គិតោ វា ឧទកតោ វា មិថុភេទា វា’’តិ 1! អត្ថេវ សុត្តន្តោតិ? អាមន្តា។ តេន ហិ អនាគតេ ញាណំ អត្ថីតិ។
440. Na vattabbaṃ – ‘‘anāgate ñāṇaṃ atthī’’ti? Āmantā. Nanu vuttaṃ bhagavatā – ‘‘pāṭaliputtassa kho, ānanda, tayo antarāyā bhavissanti – aggito vā udakato vā mithubhedā vā’’ti 2! Attheva suttantoti? Āmantā. Tena hi anāgate ñāṇaṃ atthīti.
អនាគតញាណកថា និដ្ឋិតា។
Anāgatañāṇakathā niṭṭhitā.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៨. អនាគតញាណកថាវណ្ណនា • 8. Anāgatañāṇakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៨. អនាគតញាណកថាវណ្ណនា • 8. Anāgatañāṇakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៨. អនាគតញាណកថាវណ្ណនា • 8. Anāgatañāṇakathāvaṇṇanā
