| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
5. පඤ්‌චමවග්‌ගො
5. Pañcamavaggo
(50) 8. අනාගතඤාණකථා
(50) 8. Anāgatañāṇakathā
439. අනාගතෙ ඤාණං අත්‌ථීති? ආමන්‌තා. අනාගතං මූලතො ජානාති, හෙතුතො ජානාති, නිදානතො ජානාති, සම්‌භවතො ජානාති, පභවතො ජානාති, සමුට්‌ඨානතො ජානාති, ආහාරතො ජානාති , ආරම්‌මණතො ජානාති, පච්‌චයතො ජානාති, සමුදයතො ජානාතීති? න හෙවං වත්‌තබ්‌බෙ…පෙ.….
439. Anāgate ñāṇaṃ atthīti? Āmantā. Anāgataṃ mūlato jānāti, hetuto jānāti, nidānato jānāti, sambhavato jānāti, pabhavato jānāti, samuṭṭhānato jānāti, āhārato jānāti , ārammaṇato jānāti, paccayato jānāti, samudayato jānātīti? Na hevaṃ vattabbe…pe….
අනාගතෙ ඤාණං අත්‌ථීති? ආමන්‌තා. අනාගතං හෙතුපච්‌චයතං ජානාති, ආරම්‌මණපච්‌චයතං ජානාති, අධිපතිපච්‌චයතං ජානාති, අනන්‌තරපච්‌චයතං ජානාති, සමනන්‌තරපච්‌චයතං ජානාතීති? න හෙවං වත්‌තබ්‌බෙ…පෙ.….
Anāgate ñāṇaṃ atthīti? Āmantā. Anāgataṃ hetupaccayataṃ jānāti, ārammaṇapaccayataṃ jānāti, adhipatipaccayataṃ jānāti, anantarapaccayataṃ jānāti, samanantarapaccayataṃ jānātīti? Na hevaṃ vattabbe…pe….
අනාගතෙ ඤාණං අත්‌ථීති? ආමන්‌තා. ගොත්‍රභුනො පුග්‌ගලස්‌ස සොතාපත්‌තිමග්‌ගෙ ඤාණං අත්‌ථීති? න හෙවං වත්‌තබ්‌බෙ…පෙ.…. සොතාපත්‌තිඵලසච්‌ඡිකිරියාය පටිපන්‌නස්‌ස පුග්‌ගලස්‌ස සොතාපත්‌තිඵලෙ ඤාණං අත්‌ථීති? න හෙවං වත්‌තබ්‌බෙ…පෙ.….
Anāgate ñāṇaṃ atthīti? Āmantā. Gotrabhuno puggalassa sotāpattimagge ñāṇaṃ atthīti? Na hevaṃ vattabbe…pe…. Sotāpattiphalasacchikiriyāya paṭipannassa puggalassa sotāpattiphale ñāṇaṃ atthīti? Na hevaṃ vattabbe…pe….
සකදාගාමි…පෙ.… අනාගාමි …පෙ.… අරහත්‌තසච්‌ඡිකිරියාය පටිපන්‌නස්‌ස පුග්‌ගලස්‌ස අරහත්‌තෙ ඤාණං අත්‌ථීති? න හෙවං වත්‌තබ්‌බෙ…පෙ.….
Sakadāgāmi…pe… anāgāmi …pe… arahattasacchikiriyāya paṭipannassa puggalassa arahatte ñāṇaṃ atthīti? Na hevaṃ vattabbe…pe….
440. න වත්‌තබ්‌බං – ‘‘අනාගතෙ ඤාණං අත්‌ථී’’ති? ආමන්‌තා. නනු වුත්‌තං භගවතා – ‘‘පාටලිපුත්‌තස්‌ස ඛො, ආනන්‌ද, තයො අන්‌තරායා භවිස්‌සන්‌ති – අග්‌ගිතො වා උදකතො වා මිථුභෙදා වා’’ති 1! අත්‌ථෙව සුත්‌තන්‌තොති? ආමන්‌තා. තෙන හි අනාගතෙ ඤාණං අත්‌ථීති.
440. Na vattabbaṃ – ‘‘anāgate ñāṇaṃ atthī’’ti? Āmantā. Nanu vuttaṃ bhagavatā – ‘‘pāṭaliputtassa kho, ānanda, tayo antarāyā bhavissanti – aggito vā udakato vā mithubhedā vā’’ti 2! Attheva suttantoti? Āmantā. Tena hi anāgate ñāṇaṃ atthīti.
අනාගතඤාණකථා නිට්‌ඨිතා.
Anāgatañāṇakathā niṭṭhitā.
Footnotes:
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 8. අනාගතඤාණකථාවණ්‌ණනා • 8. Anāgatañāṇakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 8. අනාගතඤාණකථාවණ්‌ණනා • 8. Anāgatañāṇakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 8. අනාගතඤාණකථාවණ්‌ණනා • 8. Anāgatañāṇakathāvaṇṇanā
