| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
8. அனாக³தஞாணகதா²வண்ணனா
8. Anāgatañāṇakathāvaṇṇanā
439-440. இதா³னி அனாக³தஞாணகதா² நாம ஹோதி. தத்த² அனாக³தங் நாம அந்தரம்பி அத்தி², அனந்தரம்பி. தேஸு அனந்தரே ஏகந்தேனேவ ஞாணங் நத்தி². யதா² ச அனந்தரே, ததா² ஏகவீதி²ஏகஜவனபரியாபன்னேபி. தத்த² யே ஸப்³ப³ஸ்மிம்பி அனாக³தே ஞாணங் இச்ச²ந்தி, ஸெய்யதா²பி அந்த⁴கா; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நங் ‘‘யங் தே அனாக³தே ஞாணங், கிங் தேன அனந்தரங் அனாக³தங் மூலாதி³வஸேன ஜானாதீ’’தி சோதே³துங் அனாக³தங் மூலதோதிஆதி³மாஹ. தத்த² மூலதோதிஆதீ³னி ஸப்³பா³னி காரணவேவசனானேவ. காரணஞ்ஹி யங் அத்தனோ ப²லங் கரோதி, தங் தத்த² மூலயதி பதிட்டா²தீதி மூலங். ததோ ச தங் ஹினோதி பவத்தயதீதி ஹேது. ததே³வ தங் நிதே³தி ‘‘ஹந்த³ நங் க³ண்ஹதா²’’தி. நிய்யாதேதி வியாதி நிதா³னங். ததோ தங் ஸம்ப⁴வதீதி ஸம்ப⁴வோ. பப⁴வதீதி பப⁴வோ. தத்த² ச தங் ஸமுட்டா²தி, தங் வா நங் ஸமுட்டா²பேதீதி ஸமுட்டா²னங். ததே³வ நங் ஆஹரதீதி ஆஹாரோ. தஞ்சஸ்ஸ அபரிச்சஜிதப்³ப³ட்டே²ன ஆரம்மணங். ததே³வ சேதங் படிச்ச ஏதீதி பச்சயோ. ததோ நங் ஸமுதே³தீதி ஸமுத³யோதி வுச்சதி. யஸ்மா பன அனந்தரங் சித்தங் ஏதேஹாகாரேஹி ந ஸக்கா ஜானிதுங், தஸ்மா ந ஹேவந்தி படிக்கி²பதி. அனாக³தங் ஹேதுபச்சயதந்தி யா அனந்தரானாக³தே சித்தே ஹேதுபச்சயதா, தங் ஜானாதி. யே தத்த² த⁴ம்மா ஹேதுபச்சயா ஹொந்தி, தே ஜானாதீதி அத்தோ². ஸேஸபதே³ஸுபி ஏஸேவ நயோ. கொ³த்ரபு⁴னோதிஆதி³ யஸ்மிங் அனாக³தே ஞாணங் ந உப்பஜ்ஜதி, தங் ஸரூபதோ த³ஸ்ஸேதுங் வுத்தங். பாடலிபுத்தஸ்ஸாதி ஸுத்தங் யஸ்மிங் அனாக³தே ஞாணங் உப்பஜ்ஜதி, தங் த³ஸ்ஸேதுங் ஆஹடங். யஸ்மா பனேதங் ந ஸப்³ப³ஸ்மிங் அனாக³தே ஞாணஸ்ஸ ஸாத⁴கங்; தஸ்மா அனாஹடமேவாதி.
439-440. Idāni anāgatañāṇakathā nāma hoti. Tattha anāgataṃ nāma antarampi atthi, anantarampi. Tesu anantare ekanteneva ñāṇaṃ natthi. Yathā ca anantare, tathā ekavīthiekajavanapariyāpannepi. Tattha ye sabbasmimpi anāgate ñāṇaṃ icchanti, seyyathāpi andhakā; te sandhāya pucchā sakavādissa, paṭiññā itarassa. Atha naṃ ‘‘yaṃ te anāgate ñāṇaṃ, kiṃ tena anantaraṃ anāgataṃ mūlādivasena jānātī’’ti codetuṃ anāgataṃ mūlatotiādimāha. Tattha mūlatotiādīni sabbāni kāraṇavevacanāneva. Kāraṇañhi yaṃ attano phalaṃ karoti, taṃ tattha mūlayati patiṭṭhātīti mūlaṃ. Tato ca taṃ hinoti pavattayatīti hetu. Tadeva taṃ nideti ‘‘handa naṃ gaṇhathā’’ti. Niyyāteti viyāti nidānaṃ. Tato taṃ sambhavatīti sambhavo. Pabhavatīti pabhavo. Tattha ca taṃ samuṭṭhāti, taṃ vā naṃ samuṭṭhāpetīti samuṭṭhānaṃ. Tadeva naṃ āharatīti āhāro. Tañcassa apariccajitabbaṭṭhena ārammaṇaṃ. Tadeva cetaṃ paṭicca etīti paccayo. Tato naṃ samudetīti samudayoti vuccati. Yasmā pana anantaraṃ cittaṃ etehākārehi na sakkā jānituṃ, tasmā na hevanti paṭikkhipati. Anāgataṃ hetupaccayatanti yā anantarānāgate citte hetupaccayatā, taṃ jānāti. Ye tattha dhammā hetupaccayā honti, te jānātīti attho. Sesapadesupi eseva nayo. Gotrabhunotiādi yasmiṃ anāgate ñāṇaṃ na uppajjati, taṃ sarūpato dassetuṃ vuttaṃ. Pāṭaliputtassāti suttaṃ yasmiṃ anāgate ñāṇaṃ uppajjati, taṃ dassetuṃ āhaṭaṃ. Yasmā panetaṃ na sabbasmiṃ anāgate ñāṇassa sādhakaṃ; tasmā anāhaṭamevāti.
அனாக³தஞாணகதா²வண்ணனா.
Anāgatañāṇakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (50) 8. அனாக³தஞாணகதா² • (50) 8. Anāgatañāṇakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 8. அனாக³தஞாணகதா²வண்ணனா • 8. Anāgatañāṇakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 8. அனாக³தஞாணகதா²வண்ணனா • 8. Anāgatañāṇakathāvaṇṇanā
