| Library / Tipiṭaka / திபிடக • Tipiṭaka / வினயஸங்க³ஹ-அட்ட²கதா² • Vinayasaṅgaha-aṭṭhakathā |
7. அனாமாஸவினிச்ச²யகதா²
7. Anāmāsavinicchayakathā
40. அனாமாஸந்தி ந பராமஸிதப்³ப³ங். தத்ராயங் வினிச்ச²யோ (பாரா॰ அட்ட²॰ 2.281) – யஸ்மா மாதா வா ஹோது தீ⁴தா வா ப⁴கி³னீ வா, இத்தீ² நாம ஸப்³பா³பி ப்³ரஹ்மசரியஸ்ஸ பாரிப³ந்தி²காவ அனாமாஸா ச, தஸ்மா ‘‘அயங் மே மாதா, அயங் மே தீ⁴தா, அயங் மே ப⁴கி³னீ’’தி கே³ஹஸ்ஸிதபேமேன ஆமஸதோபி து³க்கடமேவ வுத்தங். இமங் பன ப⁴க³வதோ ஆணங் அனுஸ்ஸரந்தேன ஸசேபி நதீ³ஸோதேன வுய்ஹமானங் மாதரங் பஸ்ஸதி, நேவ ஹத்தே²ன பராமஸிதப்³பா³, பண்டி³தேன பன பி⁴க்கு²னா நாவா வா ப²லகங் வா கத³லிக்க²ந்தோ⁴ வா தா³ருக்க²ந்தோ⁴ வா உபஸங்ஹரிதப்³போ³. தஸ்மிங் அஸதி காஸாவம்பி உபஸங்ஹரித்வா புரதோ ட²பேதப்³ப³ங், ‘‘எத்த² க³ண்ஹாஹீ’’தி பன ந வத்தப்³பா³. க³ஹிதே ‘‘பரிக்கா²ரங் கட்³டா⁴மீ’’தி கட்³ட⁴ந்தேன க³ந்தப்³ப³ங். ஸசே பன பா⁴யதி, புரதோ புரதோ க³ந்த்வா ‘‘மா பா⁴யீ’’தி ஸமஸ்ஸாஸேதப்³பா³. ஸசே பா⁴யமானா புத்தஸ்ஸ ஸஹஸா க²ந்தே⁴ வா அபி⁴ருஹதி, ஹத்தே² வா க³ண்ஹாதி, ந ‘‘அபேஹி மஹல்லிகே’’தி நித்³து⁴னிதப்³பா³, த²லங் பாபேதப்³பா³. கத்³த³மே லக்³கா³யபி கூபே பதிதாயபி ஏஸேவ நயோ. தத்ராபி ஹி யொத்தங் வா வத்த²ங் வா பக்கி²பித்வா ஹத்தே²ன க³ஹிதபா⁴வங் ஞத்வா உத்³த⁴ரிதப்³பா³, ந த்வேவ ஆமஸிதப்³பா³.
40.Anāmāsanti na parāmasitabbaṃ. Tatrāyaṃ vinicchayo (pārā. aṭṭha. 2.281) – yasmā mātā vā hotu dhītā vā bhaginī vā, itthī nāma sabbāpi brahmacariyassa pāribanthikāva anāmāsā ca, tasmā ‘‘ayaṃ me mātā, ayaṃ me dhītā, ayaṃ me bhaginī’’ti gehassitapemena āmasatopi dukkaṭameva vuttaṃ. Imaṃ pana bhagavato āṇaṃ anussarantena sacepi nadīsotena vuyhamānaṃ mātaraṃ passati, neva hatthena parāmasitabbā, paṇḍitena pana bhikkhunā nāvā vā phalakaṃ vā kadalikkhandho vā dārukkhandho vā upasaṃharitabbo. Tasmiṃ asati kāsāvampi upasaṃharitvā purato ṭhapetabbaṃ, ‘‘ettha gaṇhāhī’’ti pana na vattabbā. Gahite ‘‘parikkhāraṃ kaḍḍhāmī’’ti kaḍḍhantena gantabbaṃ. Sace pana bhāyati, purato purato gantvā ‘‘mā bhāyī’’ti samassāsetabbā. Sace bhāyamānā puttassa sahasā khandhe vā abhiruhati, hatthe vā gaṇhāti, na ‘‘apehi mahallike’’ti niddhunitabbā, thalaṃ pāpetabbā. Kaddame laggāyapi kūpe patitāyapi eseva nayo. Tatrāpi hi yottaṃ vā vatthaṃ vā pakkhipitvā hatthena gahitabhāvaṃ ñatvā uddharitabbā, na tveva āmasitabbā.
ந கேவலஞ்ச மாதுகா³மஸ்ஸ ஸரீரமேவ அனாமாஸங், நிவாஸனபாருபனம்பி ஆப⁴ரணப⁴ண்ட³ம்பி அந்தமஸோ திணண்டு³பகங் வா தாலபண்ணமுத்³தி³கங் வா உபாதா³ய அனாமாஸமேவ. தஞ்ச கோ² நிவாஸனபாவுரணங் பிளந்த⁴னத்தா²ய ட²பிதமேவ. ஸசே பன நிவாஸனங் வா பாருபனங் வா பரிவத்தெத்வா சீவரத்தா²ய பாத³மூலே ட²பேதி, வட்டதி. ஆப⁴ரணப⁴ண்டே³ஸு பன ஸீஸபஸாத⁴னத³ந்தஸூசிஆதி³கப்பியப⁴ண்ட³ங் ‘‘இமங், ப⁴ந்தே, தும்ஹாகங் தே³ம, க³ண்ஹதா²’’தி தீ³யமானங் ஸிபாடிகாஸூசிஆதி³உபகரணத்தா²ய க³ஹேதப்³ப³ங். ஸுவண்ணரஜதமுத்தாதி³மயங் பன அனாமாஸமேவ, தீ³யமானம்பி ந க³ஹேதப்³ப³ங். ந கேவலஞ்ச ஏதாஸங் ஸரீரூபக³மேவ அனாமாஸங், இத்தி²ஸண்டா²னேன கதங் கட்ட²ரூபம்பி த³ந்தரூபம்பி அயரூபம்பி லோஹரூபம்பி திபுரூபம்பி பொத்த²கரூபம்பி ஸப்³ப³ரதனரூபம்பி அந்தமஸோ பிட்ட²மயரூபம்பி அனாமாஸமேவ. பரிபோ⁴க³த்தா²ய பன ‘‘இத³ங் தும்ஹாகங் ஹோதூ’’தி லபி⁴த்வா ட²பெத்வா ஸப்³ப³ரதனமயங் அவஸேஸங் பி⁴ந்தி³த்வா உபகரணாரஹங் உபகரணே, பரிபோ⁴கா³ரஹங் பரிபோ⁴கே³ உபனேதுங் வட்டதி.
Na kevalañca mātugāmassa sarīrameva anāmāsaṃ, nivāsanapārupanampi ābharaṇabhaṇḍampi antamaso tiṇaṇḍupakaṃ vā tālapaṇṇamuddikaṃ vā upādāya anāmāsameva. Tañca kho nivāsanapāvuraṇaṃ piḷandhanatthāya ṭhapitameva. Sace pana nivāsanaṃ vā pārupanaṃ vā parivattetvā cīvaratthāya pādamūle ṭhapeti, vaṭṭati. Ābharaṇabhaṇḍesu pana sīsapasādhanadantasūciādikappiyabhaṇḍaṃ ‘‘imaṃ, bhante, tumhākaṃ dema, gaṇhathā’’ti dīyamānaṃ sipāṭikāsūciādiupakaraṇatthāya gahetabbaṃ. Suvaṇṇarajatamuttādimayaṃ pana anāmāsameva, dīyamānampi na gahetabbaṃ. Na kevalañca etāsaṃ sarīrūpagameva anāmāsaṃ, itthisaṇṭhānena kataṃ kaṭṭharūpampi dantarūpampi ayarūpampi loharūpampi tipurūpampi potthakarūpampi sabbaratanarūpampi antamaso piṭṭhamayarūpampi anāmāsameva. Paribhogatthāya pana ‘‘idaṃ tumhākaṃ hotū’’ti labhitvā ṭhapetvā sabbaratanamayaṃ avasesaṃ bhinditvā upakaraṇārahaṃ upakaraṇe, paribhogārahaṃ paribhoge upanetuṃ vaṭṭati.
41. யதா² ச இத்தி²ரூபகங், ஏவங் ஸத்தவித⁴ங் த⁴ஞ்ஞம்பி அனாமாஸமேவ. தஸ்மா கெ²த்தமஜ்ஜே²ன க³ச்ச²ந்தேன தத்த²ஜாதகம்பி த⁴ஞ்ஞப²லங் ந ஆமஸந்தேன க³ந்தப்³ப³ங். ஸசே க⁴ரத்³வாரே வா அந்தராமக்³கே³ வா த⁴ஞ்ஞங் பஸாரிதங் ஹோதி, பஸ்ஸேன ச மக்³கோ³ அத்தி², ந மத்³த³ந்தேன க³ந்தப்³ப³ங். க³மனமக்³கே³ அஸதி மக்³க³ங் அதி⁴ட்டா²ய க³ந்தப்³ப³ங். அந்தரக⁴ரே த⁴ஞ்ஞஸ்ஸ உபரி ஆஸனங் பஞ்ஞபெத்வா தெ³ந்தி, நிஸீதி³துங் வட்டதி. கேசி ஆஸனஸாலாய த⁴ஞ்ஞங் ஆகிரந்தி, ஸசே ஸக்கா ஹோதி ஹராபேதுங், ஹராபேதப்³ப³ங். நோ சே, ஏகமந்தங் த⁴ஞ்ஞங் அமத்³த³ந்தேன பீட²கங் பஞ்ஞபெத்வா நிஸீதி³தப்³ப³ங். ஸசே ஓகாஸோ ந ஹோதி, மனுஸ்ஸா த⁴ஞ்ஞமஜ்ஜே²யேவ பஞ்ஞபெத்வா தெ³ந்தி, நிஸீதி³தப்³ப³ங். தத்த²ஜாதகானி முக்³க³மாஸாதீ³னி அபரண்ணானிபி தாலபனஸாதீ³னி வா ப²லானி கீளந்தேன ந ஆமஸிதப்³பா³னி. மனுஸ்ஸேஹி ராஸிகதேஸுபி ஏஸேவ நயோ. அரஞ்ஞே பன ருக்க²தோ பதிதானி ப²லானி ‘‘அனுபஸம்பன்னானங் த³ஸ்ஸாமீ’’தி க³ண்ஹிதுங் வட்டதி.
41. Yathā ca itthirūpakaṃ, evaṃ sattavidhaṃ dhaññampi anāmāsameva. Tasmā khettamajjhena gacchantena tatthajātakampi dhaññaphalaṃ na āmasantena gantabbaṃ. Sace gharadvāre vā antarāmagge vā dhaññaṃ pasāritaṃ hoti, passena ca maggo atthi, na maddantena gantabbaṃ. Gamanamagge asati maggaṃ adhiṭṭhāya gantabbaṃ. Antaraghare dhaññassa upari āsanaṃ paññapetvā denti, nisīdituṃ vaṭṭati. Keci āsanasālāya dhaññaṃ ākiranti, sace sakkā hoti harāpetuṃ, harāpetabbaṃ. No ce, ekamantaṃ dhaññaṃ amaddantena pīṭhakaṃ paññapetvā nisīditabbaṃ. Sace okāso na hoti, manussā dhaññamajjheyeva paññapetvā denti, nisīditabbaṃ. Tatthajātakāni muggamāsādīni aparaṇṇānipi tālapanasādīni vā phalāni kīḷantena na āmasitabbāni. Manussehi rāsikatesupi eseva nayo. Araññe pana rukkhato patitāni phalāni ‘‘anupasampannānaṃ dassāmī’’ti gaṇhituṃ vaṭṭati.
42. முத்தா மணி வேளுரியோ ஸங்கோ² ஸிலா பவாளங் ரஜதங் ஜாதரூபங் லோஹிதங்கோ மஸாரக³ல்லந்தி இமேஸு த³ஸஸு ரதனேஸு முத்தா அதோ⁴தா அவித்³தா⁴ யதா²ஜாதாவ ஆமஸிதுங் வட்டதி, ஸேஸா அனாமாஸாதி வத³ந்தி, தங் ந க³ஹேதப்³ப³ங். மஹாபச்சரியங் பன ‘‘முத்தா தோ⁴தாபி அதோ⁴தாபி அனாமாஸா, ப⁴ண்ட³மூலத்தா²ய ச ஸம்படிச்சி²துங் ந வட்டதி, குட்ட²ரோக³ஸ்ஸ பே⁴ஸஜ்ஜத்தா²ய பன வட்டதீ’’தி வுத்தங், தங் யுத்தங். அந்தமஸோ ஜாதிப²லிகங் உபாதா³ய ஸப்³போ³பி நீலபீதாதி³வண்ணபே⁴தோ³ மணி தோ⁴தவித்³த⁴வட்டிதோ அனாமாஸோ, யதா²ஜாதோ பன ஆகரமுத்தோ பத்தாதி³ப⁴ண்ட³மூலத்த²ங் ஸம்படிச்சி²துங் வட்டதீதி வுத்தங், தம்பி மஹாபச்சரியங் படிக்கி²த்தங். பசித்வா கதோ காசமணியேவேகோ வட்டதீதி வுத்தங். வேளுரியேபி மணிஸதி³ஸோவ வினிச்ச²யோ.
42. Muttā maṇi veḷuriyo saṅkho silā pavāḷaṃ rajataṃ jātarūpaṃ lohitaṅko masāragallanti imesu dasasu ratanesu muttā adhotā aviddhā yathājātāva āmasituṃ vaṭṭati, sesā anāmāsāti vadanti, taṃ na gahetabbaṃ. Mahāpaccariyaṃ pana ‘‘muttā dhotāpi adhotāpi anāmāsā, bhaṇḍamūlatthāya ca sampaṭicchituṃ na vaṭṭati, kuṭṭharogassa bhesajjatthāya pana vaṭṭatī’’ti vuttaṃ, taṃ yuttaṃ. Antamaso jātiphalikaṃ upādāya sabbopi nīlapītādivaṇṇabhedo maṇi dhotaviddhavaṭṭito anāmāso, yathājāto pana ākaramutto pattādibhaṇḍamūlatthaṃ sampaṭicchituṃ vaṭṭatīti vuttaṃ, tampi mahāpaccariyaṃ paṭikkhittaṃ. Pacitvā kato kācamaṇiyeveko vaṭṭatīti vuttaṃ. Veḷuriyepi maṇisadisova vinicchayo.
ஸங்கோ² த⁴மனஸங்கோ² ச தோ⁴தவித்³தோ⁴ ச ரதனமிஸ்ஸோ அனாமாஸோ, பானீயஸங்கோ² தோ⁴தோபி அதோ⁴தோபி ஆமாஸோவ. ஸேஸஞ்ச அஞ்ஜனாதி³பே⁴ஸஜ்ஜத்தா²யபி ப⁴ண்ட³மூலத்தா²யபி ஸம்படிச்சி²துங் வட்டதி. ஸிலா தோ⁴தவித்³தா⁴ ரதனஸங்யுத்தா முக்³க³வண்ணாவ அனாமாஸா, ஸேஸா ஸத்த²கனிக⁴ங்ஸனாதி³அத்தா²ய க³ண்ஹிதுங் வட்டதி. எத்த² ச ரதனஸங்யுத்தாதி ஸுவண்ணேன ஸத்³தி⁴ங் யோஜெத்வா பசித்வா கதாதி வத³ந்தி. பவாளங் தோ⁴தவித்³த⁴ங் அனாமாஸங், ஸேஸங் ஆமாஸஞ்ச ப⁴ண்ட³மூலத்த²ஞ்ச ஸம்படிச்சி²துங் வட்டதீதி வத³ந்தி, தங் ந க³ஹேதப்³ப³ங் . மஹாபச்சரியங் பன ‘‘தோ⁴தம்பி அதோ⁴தம்பி ஸப்³ப³ங் அனாமாஸஞ்ச ந ச ஸம்படிச்சி²துங் வட்டதீ’’தி வுத்தங், தங் யுத்தங்.
Saṅkho dhamanasaṅkho ca dhotaviddho ca ratanamisso anāmāso, pānīyasaṅkho dhotopi adhotopi āmāsova. Sesañca añjanādibhesajjatthāyapi bhaṇḍamūlatthāyapi sampaṭicchituṃ vaṭṭati. Silā dhotaviddhā ratanasaṃyuttā muggavaṇṇāva anāmāsā, sesā satthakanighaṃsanādiatthāya gaṇhituṃ vaṭṭati. Ettha ca ratanasaṃyuttāti suvaṇṇena saddhiṃ yojetvā pacitvā katāti vadanti. Pavāḷaṃ dhotaviddhaṃ anāmāsaṃ, sesaṃ āmāsañca bhaṇḍamūlatthañca sampaṭicchituṃ vaṭṭatīti vadanti, taṃ na gahetabbaṃ . Mahāpaccariyaṃ pana ‘‘dhotampi adhotampi sabbaṃ anāmāsañca na ca sampaṭicchituṃ vaṭṭatī’’ti vuttaṃ, taṃ yuttaṃ.
ரஜதஞ்ச ஜாதரூபஞ்ச கதப⁴ண்ட³ம்பி அகதப⁴ண்ட³ம்பி ஸப்³பே³ன ஸப்³ப³ங் பீ³ஜதோ பட்டா²ய அனாமாஸஞ்ச அஸம்படிச்ச²னீயஞ்ச. உத்தரராஜபுத்தோ கிர ஸுவண்ணசேதியங் காராபெத்வா மஹாபது³மத்தே²ரஸ்ஸ பேஸேஸி. தே²ரோ ‘‘ந கப்பதீ’’தி படிக்கி²பி. சேதியக⁴ரே ஸுவண்ணபது³மஸுவண்ணபு³ப்³பு³ளகாதீ³னி ஹொந்தி, ஏதானிபி அனாமாஸானி. சேதியக⁴ரகோ³பகா பன ரூபியச²ட்³ட³கட்டா²னே டி²தா , தஸ்மா தேஸங் கேளாபயிதுங் வட்டதீதி வுத்தங். குருந்தி⁴யங் பன தம்பி படிக்கி²த்தங், ஸுவண்ணசேதியே கசவரமேவ ஹரிதுங் வட்டதீதி எத்தகமேவ அனுஞ்ஞாதங். ஆரகூடலோஹம்பி ஜாதரூபக³திகமேவ அனாமாஸந்தி ஸப்³ப³ட்ட²கதா²ஸு வுத்தங். ஸேனாஸனபரிபோ⁴கே³ பன ஸப்³போ³பி கப்பியோ, தஸ்மா ஜாதரூபரஜதமயா ஸப்³பே³பி ஸேனாஸனபரிக்கா²ரா ஆமாஸா, பி⁴க்கூ²னங் த⁴ம்மவினயவண்ணனட்டா²னே ரதனமண்ட³பே கரொந்தி ப²லிகத்த²ம்பே⁴ ரதனதா³மபடிமண்டி³தே, தத்த² ஸப்³பூ³பகரணானி பி⁴க்கூ²னங் படிஜக்³கி³துங் வட்டந்தி. லோஹிதங்கமஸாரக³ல்லா தோ⁴தவித்³தா⁴ அனாமாஸா, இதரே ஆமாஸா, ப⁴ண்ட³மூலத்தா²ய ச ஸம்படிச்சி²துங் வட்டதீதி வுத்தங். மஹாபச்சரியங் பன ‘‘தோ⁴தாபி அதோ⁴தாபி ஸப்³ப³ஸோ அனாமாஸா, ந ச ஸம்படிச்சி²துங் வட்டந்தீ’’தி படிக்கி²த்தங்.
Rajatañca jātarūpañca katabhaṇḍampi akatabhaṇḍampi sabbena sabbaṃ bījato paṭṭhāya anāmāsañca asampaṭicchanīyañca. Uttararājaputto kira suvaṇṇacetiyaṃ kārāpetvā mahāpadumattherassa pesesi. Thero ‘‘na kappatī’’ti paṭikkhipi. Cetiyaghare suvaṇṇapadumasuvaṇṇabubbuḷakādīni honti, etānipi anāmāsāni. Cetiyagharagopakā pana rūpiyachaḍḍakaṭṭhāne ṭhitā , tasmā tesaṃ keḷāpayituṃ vaṭṭatīti vuttaṃ. Kurundhiyaṃ pana tampi paṭikkhittaṃ, suvaṇṇacetiye kacavarameva harituṃ vaṭṭatīti ettakameva anuññātaṃ. Ārakūṭalohampi jātarūpagatikameva anāmāsanti sabbaṭṭhakathāsu vuttaṃ. Senāsanaparibhoge pana sabbopi kappiyo, tasmā jātarūparajatamayā sabbepi senāsanaparikkhārā āmāsā, bhikkhūnaṃ dhammavinayavaṇṇanaṭṭhāne ratanamaṇḍape karonti phalikatthambhe ratanadāmapaṭimaṇḍite, tattha sabbūpakaraṇāni bhikkhūnaṃ paṭijaggituṃ vaṭṭanti. Lohitaṅkamasāragallā dhotaviddhā anāmāsā, itare āmāsā, bhaṇḍamūlatthāya ca sampaṭicchituṃ vaṭṭatīti vuttaṃ. Mahāpaccariyaṃ pana ‘‘dhotāpi adhotāpi sabbaso anāmāsā, na ca sampaṭicchituṃ vaṭṭantī’’ti paṭikkhittaṃ.
43. ஸப்³ப³ங் ஆவுத⁴ப⁴ண்ட³ங் அனாமாஸங், ப⁴ண்ட³மூலத்தா²ய தீ³யமானம்பி ந ஸம்படிச்சி²தப்³ப³ங். ஸத்த²வணிஜ்ஜா நாம ந வட்டதி. ஸுத்³த⁴த⁴னுத³ண்டோ³பி த⁴னுஜியாபி பதோதோ³பி தோமரோபி அங்குஸோபி அந்தமஸோ வாஸிப²ரஸுஆதீ³னிபி ஆவுத⁴ஸங்கே²பேன கதானி அனாமாஸானி. ஸசே கேனசி விஹாரே ஸத்தி வா தோமரோ வா ட²பிதோ ஹோதி, விஹாரங் ஜக்³க³ந்தேன ‘‘ஹரந்தூ’’தி ஸாமிகானங் பேஸேதப்³ப³ங். ஸசே ந ஹரந்தி, தங் அசாலெந்தேன விஹாரோ படிஜக்³கி³தப்³போ³. யுத்³த⁴பூ⁴மியங் பன பதிதங் அஸிங் வா ஸத்திங் வா தோமரங் வா தி³ஸ்வா பாஸாணேன வா கேனசி வா அஸிங் பி⁴ந்தி³த்வா ஸத்த²கத்தா²ய க³ஹேதுங் வட்டதி. இதரானிபி வியோஜெத்வா கிஞ்சி ஸத்த²கத்தா²ய, கிஞ்சி கத்தரத³ண்டா³தி³அத்தா²ய க³ஹேதுங் வட்டதி. ‘‘இத³ங் க³ண்ஹதா²’’தி தீ³யமானங் பன வினாஸெத்வா ‘‘கப்பியப⁴ண்ட³ங் கரிஸ்ஸாமீ’’தி ஸப்³ப³ம்பி ஸம்படிச்சி²துங் வட்டதி.
43. Sabbaṃ āvudhabhaṇḍaṃ anāmāsaṃ, bhaṇḍamūlatthāya dīyamānampi na sampaṭicchitabbaṃ. Satthavaṇijjā nāma na vaṭṭati. Suddhadhanudaṇḍopi dhanujiyāpi patodopi tomaropi aṅkusopi antamaso vāsipharasuādīnipi āvudhasaṅkhepena katāni anāmāsāni. Sace kenaci vihāre satti vā tomaro vā ṭhapito hoti, vihāraṃ jaggantena ‘‘harantū’’ti sāmikānaṃ pesetabbaṃ. Sace na haranti, taṃ acālentena vihāro paṭijaggitabbo. Yuddhabhūmiyaṃ pana patitaṃ asiṃ vā sattiṃ vā tomaraṃ vā disvā pāsāṇena vā kenaci vā asiṃ bhinditvā satthakatthāya gahetuṃ vaṭṭati. Itarānipi viyojetvā kiñci satthakatthāya, kiñci kattaradaṇḍādiatthāya gahetuṃ vaṭṭati. ‘‘Idaṃ gaṇhathā’’ti dīyamānaṃ pana vināsetvā ‘‘kappiyabhaṇḍaṃ karissāmī’’ti sabbampi sampaṭicchituṃ vaṭṭati.
மச்ச²ஜாலபக்கி²ஜாலாதீ³னிபி ப²லகஜாலிகாதீ³னிபி ஸரபரித்தாணானிபி ஸப்³பா³னி அனாமாஸானி, பரிபோ⁴க³த்தா²ய லப்³ப⁴மானேஸு பன ஜாலங் தாவ ‘‘ஆஸனஸ்ஸ வா சேதியஸ்ஸ வா உபரி ப³ந்தி⁴ஸ்ஸாமி, ச²த்தங் வா வேடெ²ஸ்ஸாமீ’’தி க³ஹேதுங் வட்டதி. ஸரபரித்தாணங் ஸப்³ப³ம்பி ப⁴ண்ட³மூலத்தா²ய ஸம்படிச்சி²துங் வட்டதி. பரூபரோத⁴னிவாரணஞ்ஹி ஏதங், ந உபரோத⁴கரந்தி. ப²லகங் ‘‘த³ந்தகட்ட²பா⁴ஜனங் கரிஸ்ஸாமீ’’தி க³ஹேதுங் வட்டதி.
Macchajālapakkhijālādīnipi phalakajālikādīnipi saraparittāṇānipi sabbāni anāmāsāni, paribhogatthāya labbhamānesu pana jālaṃ tāva ‘‘āsanassa vā cetiyassa vā upari bandhissāmi, chattaṃ vā veṭhessāmī’’ti gahetuṃ vaṭṭati. Saraparittāṇaṃ sabbampi bhaṇḍamūlatthāya sampaṭicchituṃ vaṭṭati. Parūparodhanivāraṇañhi etaṃ, na uparodhakaranti. Phalakaṃ ‘‘dantakaṭṭhabhājanaṃ karissāmī’’ti gahetuṃ vaṭṭati.
சம்மவினத்³தா⁴னி வீணாபே⁴ரிஆதீ³னி அனாமாஸானி. குருந்தி³யங் பன ‘‘பே⁴ரிஸங்கா⁴டோபி வீணாஸங்கா⁴டோபி துச்ச²பொக்க²ரம்பி முக²வட்டியங் ஆரோபிதசம்மம்பி வீணாத³ண்ட³கோபி ஸப்³ப³ங் அனாமாஸ’’ந்தி வுத்தங். ஓனஹிதுங் வா ஓனஹாபேதுங் வா வாதே³துங் வா வாதா³பேதுங் வா ந லப்³ப⁴தியேவ. சேதியங்க³ணே பூஜங் கத்வா மனுஸ்ஸேஹி ச²ட்³டி³தங் தி³ஸ்வாபி அசாலெத்வாவ அந்தரந்தரே ஸம்மஜ்ஜிதப்³ப³ங், கசவரச²ட்³ட³னகாலே பன கசவரனியாமேனேவ ஹரித்வா ஏகமந்தங் நிக்கி²பிதுங் வட்டதீதி மஹாபச்சரியங் வுத்தங். ப⁴ண்ட³மூலத்தா²ய ஸம்படிச்சி²தும்பி வட்டதி, பரிபோ⁴க³த்தா²ய லப்³ப⁴மானேஸு பன வீணாதோ³ணிகஞ்ச பே⁴ரிபொக்க²ரஞ்ச த³ந்தகட்ட²பா⁴ஜனங் கரிஸ்ஸாம, சம்மங் ஸத்த²ககோஸகந்தி ஏவங் தஸ்ஸ தஸ்ஸ பரிக்கா²ரஸ்ஸ உபகரணத்தா²ய க³ஹெத்வா ததா² ததா² காதுங் வட்டதி.
Cammavinaddhāni vīṇābheriādīni anāmāsāni. Kurundiyaṃ pana ‘‘bherisaṅghāṭopi vīṇāsaṅghāṭopi tucchapokkharampi mukhavaṭṭiyaṃ āropitacammampi vīṇādaṇḍakopi sabbaṃ anāmāsa’’nti vuttaṃ. Onahituṃ vā onahāpetuṃ vā vādetuṃ vā vādāpetuṃ vā na labbhatiyeva. Cetiyaṅgaṇe pūjaṃ katvā manussehi chaḍḍitaṃ disvāpi acāletvāva antarantare sammajjitabbaṃ, kacavarachaḍḍanakāle pana kacavaraniyāmeneva haritvā ekamantaṃ nikkhipituṃ vaṭṭatīti mahāpaccariyaṃ vuttaṃ. Bhaṇḍamūlatthāya sampaṭicchitumpi vaṭṭati, paribhogatthāya labbhamānesu pana vīṇādoṇikañca bheripokkharañca dantakaṭṭhabhājanaṃ karissāma, cammaṃ satthakakosakanti evaṃ tassa tassa parikkhārassa upakaraṇatthāya gahetvā tathā tathā kātuṃ vaṭṭati.
இதி பாளிமுத்தகவினயவினிச்ச²யஸங்க³ஹே
Iti pāḷimuttakavinayavinicchayasaṅgahe
அனாமாஸவினிச்ச²யகதா² ஸமத்தா.
Anāmāsavinicchayakathā samattā.
