| Library / Tipiṭaka / д̇ибидага • Tipiṭaka / винаяаалан̇гаара-дийгаа • Vinayālaṅkāra-ṭīkā |
7. анаамаасавинижчаяагат̇аа
7. Anāmāsavinicchayakathā
40. звам̣ мажчамам̣савинижчаяам̣ гат̇зд̇ваа ид̣̇аани анаамаасавинижчаяам̣ гат̇зд̇ум̣ ‘‘анаамааса’’нд̇иаад̣̇имааха. д̇ад̇т̇а аамасияад̇зд̇и аамаасам̣, на аамаасам̣ анаамаасам̣, абараамасид̇аб̣б̣анд̇и ад̇т̇о. баарибант̇игаад̇и вигуббанигаа, анд̇арааяигаад̇и вуд̇д̇ам̣ ход̇и. над̣̇ийсод̇зна вуяхамаанам̣ маад̇аранд̇и зд̇ам̣ уггадтабарижчзд̣̇ад̣̇ассанад̇т̇ам̣ вуд̇д̇ам̣. ан̃н̃аасу бана ид̇т̇ийсу гаарун̃н̃аад̇хиббааязна маад̇ари вуд̇д̇анаязна бадибаж̇ж̇анд̇асса нзвад̇т̇и д̣̇осод̇и вад̣̇анд̇и. ‘‘маад̇ара’’нд̇и вуд̇д̇ад̇д̇аа ан̃н̃аасу на ваддад̇ийд̇и вад̣̇анд̇ааби ад̇т̇и. зд̇т̇а г̇ан̣хаахийд̇и на вад̇д̇аб̣б̣аад̇и г̇зхассид̇абзмзна гааяаббадиб̣ад̣̇д̇хзна пусанз д̣̇уггадам̣ санд̇хааяа вуд̇д̇ам̣. гаарун̃н̃зна бана вад̇т̇аад̣̇им̣ г̇ахзд̇ум̣ асаггонд̇им̣ ‘‘г̇ан̣хаахий’’д̇и вад̣̇анд̇ассаби авасабхааваббад̇д̇ид̇о уд̣̇агз нимуж̇ж̇анд̇им̣ гаарун̃н̃зна сахасаа анаамаасанд̇и ажинд̇зд̇ваа гзсаад̣̇ийсу г̇ахзд̇ваа могкаад̇хиббааязна аагад̣дхад̇оби анаабад̇д̇иязва. на хи мийяамаанам̣ маад̇арам̣ убзгкид̇ум̣ ваддад̇и. ан̃н̃аад̇игааяа ид̇т̇ияааби зсзва наяо. уггадтааяа маад̇уяааби аамаасо на ваддад̇ийд̇и д̣̇ассанад̇т̇ам̣ ‘‘маад̇ара’’нд̇и вуд̇д̇ам̣. д̇асса гаад̇аб̣б̣ам̣ бана ан̃н̃аасамби ид̇т̇ийнам̣ гаронд̇ассаби анаабад̇д̇иязва анаамаасад̇д̇з висзсаабхааваа.
40. Evaṃ macchamaṃsavinicchayaṃ kathetvā idāni anāmāsavinicchayaṃ kathetuṃ ‘‘anāmāsa’’ntiādimāha. Tattha āmasiyateti āmāsaṃ, na āmāsaṃ anāmāsaṃ, aparāmasitabbanti attho. Pāripanthikāti vikuppanikā, antarāyikāti vuttaṃ hoti. Nadīsotena vuyhamānaṃ mātaranti etaṃ ukkaṭṭhaparicchedadassanatthaṃ vuttaṃ. Aññāsu pana itthīsu kāruññādhippāyena mātari vuttanayena paṭipajjantassa nevatthi dosoti vadanti. ‘‘Mātara’’nti vuttattā aññāsu na vaṭṭatīti vadantāpi atthi. Ettha gaṇhāhīti na vattabbāti gehassitapemena kāyappaṭibaddhena phusane dukkaṭaṃ sandhāya vuttaṃ. Kāruññena pana vatthādiṃ gahetuṃ asakkontiṃ ‘‘gaṇhāhī’’ti vadantassapi avasabhāvappattito udake nimujjantiṃ kāruññena sahasā anāmāsanti acintetvā kesādīsu gahetvā mokkhādhippāyena ākaḍḍhatopi anāpattiyeva. Na hi mīyamānaṃ mātaraṃ upekkhituṃ vaṭṭati. Aññātikāya itthiyāpi eseva nayo. Ukkaṭṭhāya mātuyāpi āmāso na vaṭṭatīti dassanatthaṃ ‘‘mātara’’nti vuttaṃ. Tassa kātabbaṃ pana aññāsampi itthīnaṃ karontassapi anāpattiyeva anāmāsatte visesābhāvā.
д̇ин̣ан̣д̣убаганд̇и хиривзраад̣̇имуулзхи гзсаалан̇гаарад̇т̇ааяа гад̇ажумб̣адагам̣. д̇аалабан̣н̣амуд̣̇д̣̇иганд̇и д̇аалабан̣н̣зхи гад̇ам̣ ан̇г̇улимуд̣̇д̣̇игам̣. д̇зна д̇аалабан̣н̣аад̣̇имаяам̣ гадисуд̇д̇аган̣н̣абил̣анд̇ханаад̣̇и саб̣б̣ам̣ на ваддад̇ийд̇и сид̣̇д̇хам̣. баривад̇д̇зд̇ваад̇и ад̇д̇ано ниваасанабаарубанабхаавад̇о абанзд̇ваа, жийварад̇т̇ааяа барин̣аамзд̇ваад̇и вуд̇д̇ам̣ ход̇и. жийварад̇т̇ааяа баад̣̇амуулз табзд̇ийд̇и ид̣̇ам̣ нид̣̇ассанамад̇д̇ам̣. бажжад̇т̇аран̣авид̇аанаад̣̇иад̇т̇амби ваддад̇иязва, бууж̇аад̣̇иад̇т̇ам̣ д̇аавагаалигамби аамасид̇ум̣ ваддад̇и. сийсабасаад̇ханад̣̇анд̇асуужийд̇и ид̣̇ам̣ сийсаалан̇гаарад̇т̇ааяа бадабилод̇игаахи гад̇асийсабасаад̇ханаган̃жзва д̣̇анд̇асуужиаад̣̇и жаад̇и д̣̇вз д̇аяо. сийсабасаад̇ханам̣ сибаадигобагаран̣ад̇т̇ааяа жзва д̣̇анд̇асуужим̣ суужиубагаран̣ад̇т̇ааяа жа г̇ахзд̇аб̣б̣анд̇и яат̇ааггамам̣ ад̇т̇ам̣ д̣̇ассзд̇и. гзсагалаабам̣ б̣анд̇хид̇ваа д̇ад̇т̇а д̇ирияам̣ бавзсанад̇т̇ааяа гад̇аа суужи зва сийсабасаад̇ханагад̣̇анд̇асуужийд̇и згамзва гад̇ваа сибаадигааяа багкибид̇ваа барихарид̇аб̣б̣асуужиязва д̇асса д̇асса гижжасса убагаран̣анд̇и сибаадигасуужиубагаран̣ам̣, звам̣ ваа яож̇анаа гаад̇аб̣б̣аа.
Tiṇaṇḍupakanti hiriverādimūlehi kesālaṅkāratthāya katacumbaṭakaṃ. Tālapaṇṇamuddikanti tālapaṇṇehi kataṃ aṅgulimuddikaṃ. Tena tālapaṇṇādimayaṃ kaṭisuttakaṇṇapiḷandhanādi sabbaṃ na vaṭṭatīti siddhaṃ. Parivattetvāti attano nivāsanapārupanabhāvato apanetvā, cīvaratthāya pariṇāmetvāti vuttaṃ hoti. Cīvaratthāya pādamūle ṭhapetīti idaṃ nidassanamattaṃ. Paccattharaṇavitānādiatthampi vaṭṭatiyeva, pūjādiatthaṃ tāvakālikampi āmasituṃ vaṭṭati. Sīsapasādhanadantasūcīti idaṃ sīsālaṅkāratthāya paṭapilotikāhi katasīsapasādhanakañceva dantasūciādi cāti dve tayo. Sīsapasādhanaṃ sipāṭikopakaraṇatthāya ceva dantasūciṃ sūciupakaraṇatthāya ca gahetabbanti yathākkamaṃ atthaṃ dasseti. Kesakalāpaṃ bandhitvā tattha tiriyaṃ pavesanatthāya katā sūci eva sīsapasādhanakadantasūcīti ekameva katvā sipāṭikāya pakkhipitvā pariharitabbasūciyeva tassa tassa kiccassa upakaraṇanti sipāṭikasūciupakaraṇaṃ, evaṃ vā yojanā kātabbā.
бод̇т̇агаруубанд̇и суд̇хаад̣̇ийхи гад̇ам̣ баарааж̇игавад̇т̇убхууд̇аанам̣ д̇иражчаанаг̇ад̇ид̇т̇ийнам̣ сан̣таанзна гад̇амби анаамаасамзва . ид̇т̇ируубаани д̣̇ассзд̇ваа гад̇ам̣ вад̇т̇убхид̇д̇иаад̣̇ин̃жа ид̇т̇ируубам̣ анаамасид̇ваа вал̣ан̃ж̇зд̇ум̣ ваддад̇и. зваруубз хи анаамаасз гааяасам̣саг̇г̇арааг̇з асад̇и гааяаббадиб̣ад̣̇д̇хзна аамасад̇о д̣̇осо над̇т̇и. бхинд̣̇ид̇ваад̇и зд̇т̇а хад̇т̇зна аг̇г̇ахзд̇ваава гзнажи д̣̇ан̣д̣аад̣̇инаа бхинд̣̇ид̇аб̣б̣ам̣. зд̇т̇а жа анаамаасамби д̣̇ан̣д̣абаасаан̣аад̣̇ийхи бхзд̣̇анасса адтагат̇ааяам̣ вуд̇д̇ад̇д̇аа, баал̣ияамби аабад̣̇аасу могкаад̇хиббааяасса аамасанзби анаабад̇д̇ияаа вуд̇д̇ад̇д̇аа жа саббиниаад̣̇иваал̣амиг̇ийхи г̇ахид̇абаан̣агаанам̣ можанад̇т̇ааяа д̇ам̣ д̇ам̣ саббиниаад̣̇ивад̇т̇ум̣ д̣̇ан̣д̣аад̣̇ийхи бадигкибид̇ваа г̇ахзд̇ум̣, маад̇уаад̣̇им̣ уд̣̇агз мийяамаанам̣ вад̇т̇аад̣̇ийхи г̇ахзд̇ум̣, асаггонд̇им̣ гзсаад̣̇ийсу г̇ахзд̇ваа гаарун̃н̃зна угкибид̇ун̃жа ваддад̇ийд̇и аяамад̇т̇о г̇ахзд̇аб̣б̣ова. ‘‘адтагат̇ааяам̣ ‘на д̇взва аамасид̇аб̣б̣аа’д̇и ид̣̇ам̣ бана важанам̣ амийяамаанам̣ вад̇т̇ум̣ санд̇хааяа вуд̇д̇анд̇и аяам̣ амхаагам̣ канд̇ий’’д̇и вимад̇ивинод̣̇анияам̣ (ви. ви. дий. 1.281) вуд̇д̇ам̣.
Potthakarūpanti sudhādīhi kataṃ pārājikavatthubhūtānaṃ tiracchānagatitthīnaṃ saṇṭhānena katampi anāmāsameva . Itthirūpāni dassetvā kataṃ vatthubhittiādiñca itthirūpaṃ anāmasitvā vaḷañjetuṃ vaṭṭati. Evarūpe hi anāmāse kāyasaṃsaggarāge asati kāyappaṭibaddhena āmasato doso natthi. Bhinditvāti ettha hatthena aggahetvāva kenaci daṇḍādinā bhinditabbaṃ. Ettha ca anāmāsampi daṇḍapāsāṇādīhi bhedanassa aṭṭhakathāyaṃ vuttattā, pāḷiyampi āpadāsu mokkhādhippāyassa āmasanepi anāpattiyā vuttattā ca sappiniādivāḷamigīhi gahitapāṇakānaṃ mocanatthāya taṃ taṃ sappiniādivatthuṃ daṇḍādīhi paṭikkhipitvā gahetuṃ, mātuādiṃ udake mīyamānaṃ vatthādīhi gahetuṃ, asakkontiṃ kesādīsu gahetvā kāruññena ukkhipituñca vaṭṭatīti ayamattho gahetabbova. ‘‘Aṭṭhakathāyaṃ ‘na tveva āmasitabbā’ti idaṃ pana vacanaṃ amīyamānaṃ vatthuṃ sandhāya vuttanti ayaṃ amhākaṃ khantī’’ti vimativinodaniyaṃ (vi. vi. ṭī. 1.281) vuttaṃ.
41. маг̇г̇ам̣ ад̇хидтааяаад̇и ‘‘маг̇г̇о аяа’’нд̇и маг̇г̇асан̃н̃ам̣ уббаад̣̇зд̇ваад̇и ад̇т̇о. бан̃н̃абзд̇ваа д̣̇знд̇ийд̇и ид̣̇ам̣ саамийживасзна вуд̇д̇ам̣, д̇зхи бана ‘‘аасанам̣ бан̃н̃абзд̇ваава нисийд̣̇ат̇аа’’д̇и вуд̇д̇з саяамзва бан̃н̃абзд̇ваа нисийд̣̇ид̇ум̣ ваддад̇и. д̇ад̇т̇а ж̇аад̇агаанийд̇и ажчинд̣̇ид̇ваа бхууд̇аг̇аамабхаавзнзва тид̇аани. ‘‘гийл̣анд̇знаа’’д̇и вуд̇д̇ад̇д̇аа сад̇и бажжаяз аамасанд̇асса анаабад̇д̇и, ид̣̇ан̃жа г̇ихисанд̇агам̣ санд̇хааяа вуд̇д̇ам̣, бхигкусанд̇агам̣ бана барибхог̇аарахам̣ саб̣б̣ат̇аа аамасид̇ум̣ на ваддад̇и д̣̇уруубажин̣н̣ад̇д̇аа. д̇аалабанасаад̣̇ийнийд̇и жзд̇т̇а аад̣̇и-сад̣̇д̣̇зна наал̣игзралаб̣уж̇ад̇ибусаалааб̣угумбхан̣д̣абуссапалазл̣аалугапалаанам̣ сан̇г̇ахо д̣̇адтаб̣б̣о. ‘‘яат̇аавуд̇д̇апалаанам̣язва жзд̇т̇а гийл̣аад̇хиббааязна аамасанам̣ на ваддад̇ий’’д̇и вуд̇д̇ад̇д̇аа баасаан̣асагкараад̣̇ийни гийл̣аад̇хиббааязнаби аамасид̇ум̣ ваддад̇и. анубасамбаннаанам̣ д̣̇ассаамийд̇и ид̣̇ам̣ абадиг̇г̇ахзд̇ваа г̇ахан̣ам̣ санд̇хааяа вуд̇д̇ам̣. ад̇д̇аноби ад̇т̇ааяа бадиг̇г̇ахзд̇ваа г̇ахан̣з д̣̇осо над̇т̇и анаамаасад̇д̇аабхааваа.
41.Maggaṃ adhiṭṭhāyāti ‘‘maggo aya’’nti maggasaññaṃ uppādetvāti attho. Paññapetvā dentīti idaṃ sāmīcivasena vuttaṃ, tehi pana ‘‘āsanaṃ paññapetvāva nisīdathā’’ti vutte sayameva paññapetvā nisīdituṃ vaṭṭati. Tattha jātakānīti acchinditvā bhūtagāmabhāveneva ṭhitāni. ‘‘Kīḷantenā’’ti vuttattā sati paccaye āmasantassa anāpatti, idañca gihisantakaṃ sandhāya vuttaṃ, bhikkhusantakaṃ pana paribhogārahaṃ sabbathā āmasituṃ na vaṭṭati durūpaciṇṇattā. Tālapanasādīnīti cettha ādi-saddena nāḷikeralabujatipusaalābukumbhaṇḍapussaphalaeḷālukaphalānaṃ saṅgaho daṭṭhabbo. ‘‘Yathāvuttaphalānaṃyeva cettha kīḷādhippāyena āmasanaṃ na vaṭṭatī’’ti vuttattā pāsāṇasakkharādīni kīḷādhippāyenapi āmasituṃ vaṭṭati. Anupasampannānaṃ dassāmīti idaṃ apaṭiggahetvā gahaṇaṃ sandhāya vuttaṃ. Attanopi atthāya paṭiggahetvā gahaṇe doso natthi anāmāsattābhāvā.
42. муд̇д̇аад̇и (ма. ни. дий. 1.2 бат̇авийваараван̣н̣анаа; саарад̇т̇а. дий. 2.281) хад̇т̇игумбхаж̇аад̇игаа адтавид̇хаа муд̇д̇аа. д̇ат̇аа хи хад̇т̇игумбхам̣, вараахад̣̇аатам̣, бхуж̇аг̇асийсам̣, валаахагам̣, взл̣у, мажчасиро, сан̇ко, сиббийд̇и адта муд̇д̇ааяонияо. д̇ад̇т̇а хад̇т̇игумбхаж̇аа бийд̇аван̣н̣аа бабхаахийнаа. вараахад̣̇аатаа вараахад̣̇аатааван̣н̣аава. бхуж̇аг̇асийсаж̇аа нийлаад̣̇иван̣н̣аа сувисуд̣̇д̇хаа ваддалаа жа. валаахагаж̇аа бхаасураа д̣̇уб̣б̣ибхааг̇аа рад̇д̇ибхааг̇з анд̇хагаарам̣ вид̇хамзнд̇ияо д̇идтанд̇и, д̣̇звуубабхог̇аа зва жа хонд̇и. взл̣уж̇аа гарагапаласамаанаван̣н̣аа на бхаасураа, д̇з жа взл̣уу амануссаг̇ожарзязва бад̣̇зсз ж̇ааяанд̇и . мажчасираж̇аа баатийнабидтисамаанаван̣н̣аа ваддалаа лагхаво жа д̇зж̇аванд̇аа хонд̇и бабхаавихийнаа жа, д̇з жа мажчаа самуд̣̇д̣̇амаж̇жхзязва ж̇ааяанд̇и. сан̇каж̇аа сан̇кауд̣̇аражчавиван̣н̣аа голапалаббамаан̣ааби хонд̇и бабхаавихийнаава. сиббиж̇аа бабхаависзсаяуд̇д̇аа хонд̇и наанаасан̣таанаа. звам̣ ж̇аад̇ид̇о адтавид̇хаасу муд̇д̇аасу яаа мажчасан̇касиббиж̇аа, д̇аа саамуд̣̇д̣̇игаа. бхуж̇аг̇аж̇ааби гаажи саамуд̣̇д̣̇игаа хонд̇и, ид̇араа асаамуд̣̇д̣̇игаа. яасмаа б̣ахулам̣ саамуд̣̇д̣̇игаава муд̇д̇аа логз д̣̇иссанд̇и, д̇ад̇т̇ааби сиббиж̇аава, ид̇араа гад̣̇аажи гаажи, д̇асмаа саммохавинод̣̇анияам̣ (вибха. адта. 173) ‘‘муд̇д̇аад̇и саамуд̣̇д̣̇игаа муд̇д̇аа’’д̇и вуд̇д̇ам̣.
42.Muttāti (ma. ni. ṭī. 1.2 pathavīvāravaṇṇanā; sārattha. ṭī. 2.281) hatthikumbhajātikā aṭṭhavidhā muttā. Tathā hi hatthikumbhaṃ, varāhadāṭhaṃ, bhujagasīsaṃ, valāhakaṃ, veḷu, macchasiro, saṅkho, sippīti aṭṭha muttāyoniyo. Tattha hatthikumbhajā pītavaṇṇā pabhāhīnā. Varāhadāṭhā varāhadāṭhāvaṇṇāva. Bhujagasīsajā nīlādivaṇṇā suvisuddhā vaṭṭalā ca. Valāhakajā bhāsurā dubbibhāgā rattibhāge andhakāraṃ vidhamentiyo tiṭṭhanti, devūpabhogā eva ca honti. Veḷujā karakaphalasamānavaṇṇā na bhāsurā, te ca veḷū amanussagocareyeva padese jāyanti . Macchasirajā pāṭhīnapiṭṭhisamānavaṇṇā vaṭṭalā laghavo ca tejavantā honti pabhāvihīnā ca, te ca macchā samuddamajjheyeva jāyanti. Saṅkhajā saṅkhaudaracchavivaṇṇā kolaphalappamāṇāpi honti pabhāvihīnāva. Sippijā pabhāvisesayuttā honti nānāsaṇṭhānā. Evaṃ jātito aṭṭhavidhāsu muttāsu yā macchasaṅkhasippijā, tā sāmuddikā. Bhujagajāpi kāci sāmuddikā honti, itarā asāmuddikā. Yasmā bahulaṃ sāmuddikāva muttā loke dissanti, tatthāpi sippijāva, itarā kadāci kāci, tasmā sammohavinodaniyaṃ (vibha. aṭṭha. 173) ‘‘muttāti sāmuddikā muttā’’ti vuttaṃ.
ман̣ийд̇и взл̣урияаад̣̇ид̇о ан̃н̃о ж̇од̇ирасаад̣̇ибхзд̣̇о саб̣б̣о ман̣и. взл̣урияод̇и аллавзл̣уван̣н̣о ман̣и, ‘‘маж̇ж̇аарагкиман̣д̣алаван̣н̣о’’д̇иби вад̣̇анд̇и. сан̇код̇и саамуд̣̇д̣̇игасан̇ко. силаад̇и муг̇г̇аван̣н̣аа ад̇исинид̣̇д̇хаа гаал̣асилаа. ман̣ивохаарам̣ аг̇ад̇аа рад̇д̇асзд̇аад̣̇иван̣н̣аа сумадтааби силаа анаамаасаа зваад̇и вад̣̇анд̇и. саарад̇т̇ад̣̇ийбанияам̣ (саарад̇т̇а. дий. 2.281) бана ‘‘сан̇код̇и саамуд̣̇д̣̇игасан̇ко. силаад̇и гаал̣асилаабан̣д̣усилаасзд̇асилаад̣̇ибхзд̣̇аа саб̣б̣ааби силаа’’д̇и вуд̇д̇ам̣. баваал̣ам̣ самуд̣̇д̣̇ад̇о ж̇аад̇анаад̇ирад̇д̇аман̣и. раж̇ад̇анд̇и гахаабан̣амаасаад̣̇ибхзд̣̇ам̣ ж̇ад̇умаасаад̣̇им̣ убаад̣̇ааяа саб̣б̣ам̣ вуд̇д̇аавасзсаруубияам̣ г̇ахид̇ам̣. ж̇аад̇аруубанд̇и суван̣н̣ам̣. лохид̇ан̇год̇и рад̇д̇аман̣и. масаараг̇алланд̇и габ̣араван̣н̣о ман̣и. ‘‘марагад̇а’’нд̇иби вад̣̇анд̇и.
Maṇīti veḷuriyādito añño jotirasādibhedo sabbo maṇi. Veḷuriyoti allaveḷuvaṇṇo maṇi, ‘‘majjārakkhimaṇḍalavaṇṇo’’tipi vadanti. Saṅkhoti sāmuddikasaṅkho. Silāti muggavaṇṇā atisiniddhā kāḷasilā. Maṇivohāraṃ agatā rattasetādivaṇṇā sumaṭṭhāpi silā anāmāsā evāti vadanti. Sāratthadīpaniyaṃ (sārattha. ṭī. 2.281) pana ‘‘saṅkhoti sāmuddikasaṅkho. Silāti kāḷasilāpaṇḍusilāsetasilādibhedā sabbāpi silā’’ti vuttaṃ. Pavāḷaṃ samuddato jātanātirattamaṇi. Rajatanti kahāpaṇamāsādibhedaṃ jatumāsādiṃ upādāya sabbaṃ vuttāvasesarūpiyaṃ gahitaṃ. Jātarūpanti suvaṇṇaṃ. Lohitaṅkoti rattamaṇi. Masāragallanti kabaravaṇṇo maṇi. ‘‘Marakata’’ntipi vadanti.
бхан̣д̣амуулад̇т̇ааяаад̇и бад̇д̇ажийвараад̣̇имуулад̇т̇ааяа. гудтарог̇ассаад̇и нид̣̇ассанамад̇д̇ам̣. д̇ааяа вуубасамзд̇аб̣б̣асса яасса гассажи рог̇асса ад̇т̇ааяа ваддад̇иязва. ‘‘бхзсаж̇ж̇ад̇т̇ан̃жа авид̣̇д̇хааязва муд̇д̇аа ваддад̇ий’’д̇и д̇ийсуби г̇ан̣тибад̣̇зсу вуд̇д̇аа. бхзсаж̇ж̇ад̇т̇ааяа бисид̇ваа яож̇ид̇аанам̣ муд̇д̇аанам̣ рад̇анабхаававиж̇аханад̇о г̇ахан̣агкан̣зби рад̇анаагаарзна абзгкаабхааваа ‘‘бхзсаж̇ж̇ад̇т̇ааяа бана ваддад̇ий’’д̇и вуд̇д̇ам̣. яаава бана д̇аа муд̇д̇аа рад̇анаруубзна д̇идтанд̇и, д̇аава аамасид̇ум̣ на вадданд̇и. звам̣ ан̃н̃амби рад̇анабаасаан̣ам̣ бисид̇ваа бхзсаж̇ж̇з яож̇анад̇т̇ааяа г̇ахзд̇ум̣ ваддад̇и зва. ж̇аад̇аруубараж̇ад̇ам̣ бана миссзд̇ваа яож̇анабхзсаж̇ж̇ад̇т̇ааяаби самбадижчид̇ум̣ на ваддад̇и. г̇ахадтзхи яож̇зд̇ваа д̣̇иннамби яад̣̇и бхзсаж̇ж̇з суван̣н̣аад̣̇ируубзна д̇идтад̇и, вияож̇зд̇ун̃жа саггаа, д̇аад̣̇исам̣ бхзсаж̇ж̇амби на ваддад̇и. д̇ам̣ аб̣б̣охааригад̇д̇аг̇ад̇ан̃жз ваддад̇и. ‘‘ж̇аад̇ипалигам̣ убаад̣̇ааяаа’’д̇и вуд̇д̇ад̇д̇аа суурияаганд̇ажанд̣̇аганд̇аад̣̇игам̣ ж̇аад̇ибаасаан̣ам̣ ман̣имхи зва сан̇г̇ахид̇анд̇и д̣̇адтаб̣б̣ам̣. аагарамуд̇д̇од̇и аагарад̇о муд̇д̇амад̇д̇о. бхан̣д̣амуулад̇т̇ам̣ самбадижчид̇ум̣ ваддад̇ийд̇и иминаава аамасид̇умби ваддад̇ийд̇и д̣̇ассзд̇и. бажид̇ваа гад̇од̇и гаажагаарзхи бажид̇ваа гад̇о.
Bhaṇḍamūlatthāyāti pattacīvarādimūlatthāya. Kuṭṭharogassāti nidassanamattaṃ. Tāya vūpasametabbassa yassa kassaci rogassa atthāya vaṭṭatiyeva. ‘‘Bhesajjatthañca aviddhāyeva muttā vaṭṭatī’’ti tīsupi gaṇṭhipadesu vuttā. Bhesajjatthāya pisitvā yojitānaṃ muttānaṃ ratanabhāvavijahanato gahaṇakkhaṇepi ratanākārena apekkhābhāvā ‘‘bhesajjatthāya pana vaṭṭatī’’ti vuttaṃ. Yāva pana tā muttā ratanarūpena tiṭṭhanti, tāva āmasituṃ na vaṭṭanti. Evaṃ aññampi ratanapāsāṇaṃ pisitvā bhesajje yojanatthāya gahetuṃ vaṭṭati eva. Jātarūparajataṃ pana missetvā yojanabhesajjatthāyapi sampaṭicchituṃ na vaṭṭati. Gahaṭṭhehi yojetvā dinnampi yadi bhesajje suvaṇṇādirūpena tiṭṭhati, viyojetuñca sakkā, tādisaṃ bhesajjampi na vaṭṭati. Taṃ abbohārikattagatañce vaṭṭati. ‘‘Jātiphalikaṃ upādāyā’’ti vuttattā sūriyakantacandakantādikaṃ jātipāsāṇaṃ maṇimhi eva saṅgahitanti daṭṭhabbaṃ. Ākaramuttoti ākarato muttamatto. Bhaṇḍamūlatthaṃsampaṭicchituṃ vaṭṭatīti imināva āmasitumpi vaṭṭatīti dasseti. Pacitvā katoti kācakārehi pacitvā kato.
д̇хаманасан̇ко жа д̇ход̇авид̣̇д̇хо жа рад̇анамиссо жаад̇и яож̇зд̇аб̣б̣ам̣. вид̣̇д̇ход̇иаад̣̇ибхаавзна гад̇ачид̣̇д̣̇о. рад̇анамиссод̇и ган̃жаналад̇аад̣̇ивижид̇д̇о муд̇д̇аад̣̇ирад̇анакажид̇о жа. зд̇зна д̇хаманасан̇кад̇о ан̃н̃о рад̇анасаммиссо анаамаасод̇и д̣̇ассзд̇и. силааяамби зсзва наяо. баанийяасан̇код̇и иминаа т̇аалагаад̣̇иаагаарзна гад̇асан̇камаяабхааж̇анаани бхигкуунам̣ самбадижчид̇ум̣ вадданд̇ийд̇и сид̣̇д̇хам̣. сзсанд̇и рад̇анамиссам̣ табзд̇ваа авасзсам̣. муг̇г̇аван̣н̣ам̣язва рад̇анасаммиссам̣ гаронд̇и, на ан̃н̃анд̇и ааха ‘‘муг̇г̇аван̣н̣ааваа’’д̇и, муг̇г̇аван̣н̣аа рад̇анасаммиссаава на ваддад̇ийд̇и вуд̇д̇ам̣ ход̇и. сзсаад̇и рад̇анасаммиссам̣ табзд̇ваа авасзсаа силаа.
Dhamanasaṅkho ca dhotaviddho ca ratanamisso cāti yojetabbaṃ. Viddhotiādibhāvena katachiddo. Ratanamissoti kañcanalatādivicitto muttādiratanakhacito ca. Etena dhamanasaṅkhato añño ratanasammisso anāmāsoti dasseti. Silāyampi eseva nayo. Pānīyasaṅkhoti iminā thālakādiākārena katasaṅkhamayabhājanāni bhikkhūnaṃ sampaṭicchituṃ vaṭṭantīti siddhaṃ. Sesanti ratanamissaṃ ṭhapetvā avasesaṃ. Muggavaṇṇaṃyeva ratanasammissaṃ karonti, na aññanti āha ‘‘muggavaṇṇāvā’’ti, muggavaṇṇā ratanasammissāva na vaṭṭatīti vuttaṃ hoti. Sesāti ratanasammissaṃ ṭhapetvā avasesā silā.
б̣ийж̇ад̇о бадтааяаад̇и д̇хаад̇убаасаан̣ад̇о бадтааяа. суван̣н̣ажзд̇ияанд̇и д̇хаад̇угаран̣д̣агам̣. бадигкибийд̇и ‘‘д̇хаад̇удтабанад̇т̇ааяа г̇ан̣хат̇аа’’д̇и авад̇ваа ‘‘д̇умхаагам̣ г̇ан̣хат̇аа’’д̇и бзсид̇ад̇д̇аа бадигкиби. вимад̇ивинод̣̇анияам̣ (ви. ви. дий. 1.281) бана ‘‘бадигкибийд̇и суван̣н̣амаяасса д̇хаад̇угаран̣д̣агасса б̣уд̣̇д̇хаад̣̇ируубасса жа ад̇д̇ано санд̇агагаран̣з ниссаг̇г̇ияад̇д̇аа вуд̇д̇а’’нд̇и вуд̇д̇ам̣. суван̣н̣аб̣уб̣б̣ул̣аганд̇и суван̣н̣ад̇аарагам̣. ‘‘руубияачад̣д̣агадтаанз’’д̇и вуд̇д̇ад̇д̇аа руубияачад̣д̣агасса ж̇аад̇аруубараж̇ад̇ам̣ аамасид̇ваа чад̣д̣зд̇ум̣ ваддад̇ийд̇и вуд̇д̇ам̣. гзл̣аабаяид̇унд̇и аамасид̇ваа ид̇о жид̇о жа сан̃жаарзд̇ум̣. вуд̇д̇анд̇и махааадтагат̇ааяам̣ вуд̇д̇ам̣. гажаварамзва харид̇ум̣ ваддад̇ийд̇и г̇обагаа ваа хонд̇у ан̃н̃з ваа, хад̇т̇знаби бун̃чид̇ваа гажаварам̣ абанзд̇ум̣ ваддад̇и, ‘‘маламби бамаж̇ж̇ид̇ум̣ ваддад̇иязваа’’д̇и саарад̇т̇ад̣̇ийбанияам̣ (саарад̇т̇а. дий. 2.281) вуд̇д̇ам̣. вимад̇ивинод̣̇анияам̣ (ви. ви. дий. 1.281) бана ‘‘гажаварамзва харид̇ум̣ ваддад̇ийд̇и г̇обагаа ваа хонд̇у ан̃н̃з ваа, хад̇т̇знаби бун̃чид̇ваа гажаварам̣ абанзд̇ум̣ ваддад̇и, маламби маж̇ж̇ид̇ум̣ ваддад̇и зваад̇и вад̣̇анд̇и, д̇ам̣ адтагат̇ааяа на самзд̇и гзл̣ааяанасад̣̇исад̇д̇аа’’д̇и вуд̇д̇ам̣. гат̇ам̣ на самзд̇и? махааадтагат̇ааяам̣ жзд̇ияагхараг̇обагаа руубияачад̣д̣агадтаанз тид̇аад̇и д̇зсам̣язва гзл̣ааяанам̣ анун̃н̃аад̇ам̣, на ан̃н̃зсам̣, д̇асмаа ‘‘г̇обагаа ваа хонд̇у ан̃н̃з ваа’’д̇и важанам̣ махааадтагат̇ааяа на самзд̇и.
Bījato paṭṭhāyāti dhātupāsāṇato paṭṭhāya. Suvaṇṇacetiyanti dhātukaraṇḍakaṃ. Paṭikkhipīti ‘‘dhātuṭṭhapanatthāya gaṇhathā’’ti avatvā ‘‘tumhākaṃ gaṇhathā’’ti pesitattā paṭikkhipi. Vimativinodaniyaṃ (vi. vi. ṭī. 1.281) pana ‘‘paṭikkhipīti suvaṇṇamayassa dhātukaraṇḍakassa buddhādirūpassa ca attano santakakaraṇe nissaggiyattā vutta’’nti vuttaṃ. Suvaṇṇabubbuḷakanti suvaṇṇatārakaṃ. ‘‘Rūpiyachaḍḍakaṭṭhāne’’ti vuttattā rūpiyachaḍḍakassa jātarūparajataṃ āmasitvā chaḍḍetuṃ vaṭṭatīti vuttaṃ. Keḷāpayitunti āmasitvā ito cito ca sañcāretuṃ. Vuttanti mahāaṭṭhakathāyaṃ vuttaṃ. Kacavarameva harituṃ vaṭṭatīti gopakā vā hontu aññe vā, hatthenapi puñchitvā kacavaraṃ apanetuṃ vaṭṭati, ‘‘malampi pamajjituṃ vaṭṭatiyevā’’ti sāratthadīpaniyaṃ (sārattha. ṭī. 2.281) vuttaṃ. Vimativinodaniyaṃ (vi. vi. ṭī. 1.281) pana ‘‘kacavarameva harituṃ vaṭṭatīti gopakā vā hontu aññe vā, hatthenapi puñchitvā kacavaraṃ apanetuṃ vaṭṭati, malampi majjituṃ vaṭṭati evāti vadanti, taṃ aṭṭhakathāya na sameti keḷāyanasadisattā’’ti vuttaṃ. Kathaṃ na sameti? Mahāaṭṭhakathāyaṃ cetiyagharagopakā rūpiyachaḍḍakaṭṭhāne ṭhitāti tesaṃyeva keḷāyanaṃ anuññātaṃ, na aññesaṃ, tasmā ‘‘gopakā vā hontu aññe vā’’ti vacanaṃ mahāaṭṭhakathāya na sameti.
гурунд̣̇ияам̣ бана д̇амби бадигкид̇д̇ам̣, суван̣н̣ажзд̇ияз гажаварамзва харид̇ум̣ ваддад̇ийд̇и зд̇д̇агамзва анун̃н̃аад̇ам̣, д̇асмаа саавад̇хааран̣ам̣ гад̇ваа вуд̇д̇ад̇д̇аа ‘‘хад̇т̇знаби бун̃чид̇ваа’’д̇и жа ‘‘маламби бамаж̇ж̇ид̇ум̣ ваддад̇и зваа’’д̇и жа важанам̣ гурунд̣̇адтагат̇ааяа на самзд̇и, д̇асмаа вижаарзд̇аб̣б̣амзд̇анд̇и. аарагуудалоханд̇и суван̣н̣аван̣н̣о гид̇д̇ималохависзсо. д̇ивид̇хан̃хи гид̇д̇ималохам̣ – гам̣салохам̣ ваддалохам̣ аарагуудалоханд̇и. д̇ад̇т̇а д̇ибуд̇амб̣з миссзд̇ваа гад̇ам̣ гам̣салохам̣ наама, сийсад̇амб̣з миссзд̇ваа гад̇ам̣ ваддалохам̣, расад̇уд̇т̇зхи ран̃ж̇ид̇ам̣ д̇амб̣ам̣ аарагуудалохам̣ наама. ‘‘багад̇ирасад̇амб̣з миссзд̇ваа гад̇ам̣ аарагууда’’нд̇и жа саарад̇т̇ад̣̇ийбанияам̣ (саарад̇т̇а. дий. 2.281) вуд̇д̇ам̣. д̇ам̣ бана ‘‘ж̇аад̇аруубаг̇ад̇ига’’нд̇и вуд̇д̇ад̇д̇аа уг̇г̇ан̣хад̇о ниссаг̇г̇ияамби ход̇ийд̇и гзжи вад̣̇анд̇и, руубиязсу бана аг̇ан̣ид̇ад̇д̇аа ниссаг̇г̇ияам̣ на ход̇и, аамасанз самбадижчанз жа д̣̇уггадамзваад̇и взд̣̇ид̇аб̣б̣ам̣. саб̣б̣оби габбияод̇и яат̇аавуд̇д̇асуван̣н̣аад̣̇имаяаанам̣ сзнаасанабаригкаараанам̣ аамасанаг̇обанаад̣̇ивасзна барибхог̇о саб̣б̣ат̇аа габбияод̇и ад̇хиббааяо. д̇знааха ‘‘д̇асмаа’’д̇иаад̣̇и. ‘‘бхигкуунам̣ д̇хаммавинаяаван̣н̣анадтаанз’’д̇и вуд̇д̇ад̇д̇аа сан̇гхигамзва суван̣н̣аад̣̇имаяам̣ сзнаасанам̣ сзнаасанабаригкаараа жа вадданд̇и, на буг̇г̇алигаанийд̇и г̇ахзд̇аб̣б̣ам̣. бадиж̇аг̇г̇ид̇ум̣ вадданд̇ийд̇и сзнаасанабадиб̣анд̇хад̇о вуд̇д̇ам̣.
Kurundiyaṃ pana tampi paṭikkhittaṃ, suvaṇṇacetiye kacavarameva harituṃ vaṭṭatīti ettakameva anuññātaṃ, tasmā sāvadhāraṇaṃ katvā vuttattā ‘‘hatthenapi puñchitvā’’ti ca ‘‘malampi pamajjituṃ vaṭṭati evā’’ti ca vacanaṃ kurundaṭṭhakathāya na sameti, tasmā vicāretabbametanti. Ārakūṭalohanti suvaṇṇavaṇṇo kittimalohaviseso. Tividhañhi kittimalohaṃ – kaṃsalohaṃ vaṭṭalohaṃ ārakūṭalohanti. Tattha tiputambe missetvā kataṃ kaṃsalohaṃ nāma, sīsatambe missetvā kataṃ vaṭṭalohaṃ, rasatutthehi rañjitaṃ tambaṃ ārakūṭalohaṃ nāma. ‘‘Pakatirasatambe missetvā kataṃ ārakūṭa’’nti ca sāratthadīpaniyaṃ (sārattha. ṭī. 2.281) vuttaṃ. Taṃ pana ‘‘jātarūpagatika’’nti vuttattā uggaṇhato nissaggiyampi hotīti keci vadanti, rūpiyesu pana agaṇitattā nissaggiyaṃ na hoti, āmasane sampaṭicchane ca dukkaṭamevāti veditabbaṃ. Sabbopi kappiyoti yathāvuttasuvaṇṇādimayānaṃ senāsanaparikkhārānaṃ āmasanagopanādivasena paribhogo sabbathā kappiyoti adhippāyo. Tenāha ‘‘tasmā’’tiādi. ‘‘Bhikkhūnaṃ dhammavinayavaṇṇanaṭṭhāne’’ti vuttattā saṅghikameva suvaṇṇādimayaṃ senāsanaṃ senāsanaparikkhārā ca vaṭṭanti, na puggalikānīti gahetabbaṃ. Paṭijaggituṃ vaṭṭantīti senāsanapaṭibandhato vuttaṃ.
43. саамигаанам̣ бзсзд̇аб̣б̣анд̇и саамигаанам̣ саасанам̣ бзсзд̇аб̣б̣ам̣. бхинд̣̇ид̇ваад̇и батамамзва анаамасид̇ваа баасаан̣аад̣̇инаа гин̃жимад̇д̇ам̣ бхзд̣̇ам̣ гад̇ваа бажчаа габбияабхан̣д̣ад̇т̇ааяа ад̇хидтахид̇ваа хад̇т̇зна г̇ахзд̇ум̣ ваддад̇и. д̇знааха ‘‘габбияабхан̣д̣ам̣ гариссаамийд̇и самбадижчид̇ум̣ ваддад̇ий’’д̇и. зд̇т̇ааби д̇ан̃жа вияож̇зд̇ваа аамасид̇аб̣б̣ам̣. палагаж̇аалигаад̣̇ийнийд̇и зд̇т̇а сарабарид̇д̇аан̣ааяа хад̇т̇зна г̇ахзд̇аб̣б̣ам̣. гидигаапалагам̣ агкирагкан̣ад̇т̇ааяа аяалохаад̣̇ийхи ж̇аалаагаарзна гад̇ваа сийсаад̣̇ийсу бадимун̃жид̇аб̣б̣ам̣ ж̇аалигам̣ наама. аад̣̇и-сад̣̇д̣̇зна гаважаад̣̇игам̣ сан̇г̇ан̣хаад̇и. анаамаасаанийд̇и мажчаж̇аалаад̣̇ибаруубарод̇хам̣ санд̇хааяа вуд̇д̇ам̣, на сарабарид̇д̇аан̣ам̣ д̇асса аавуд̇хабхан̣д̣ад̇д̇аабхааваа. д̇зна вагкад̇и ‘‘баруубарод̇ханивааран̣ан̃хий’’д̇иаад̣̇и (ви. сан̇г̇а. адта. 43). аасанассаад̇и жзд̇ияассасаманд̇аа гад̇абарибхан̣д̣асса. б̣анд̇хиссаамийд̇и гаагаад̣̇ийнам̣ ад̣̇уусанад̇т̇ааяа б̣анд̇хиссаами.
43.Sāmikānaṃ pesetabbanti sāmikānaṃ sāsanaṃ pesetabbaṃ. Bhinditvāti paṭhamameva anāmasitvā pāsāṇādinā kiñcimattaṃ bhedaṃ katvā pacchā kappiyabhaṇḍatthāya adhiṭṭhahitvā hatthena gahetuṃ vaṭṭati. Tenāha ‘‘kappiyabhaṇḍaṃ karissāmīti sampaṭicchituṃ vaṭṭatī’’ti. Etthāpi tañca viyojetvā āmasitabbaṃ. Phalakajālikādīnīti ettha saraparittāṇāya hatthena gahetabbaṃ. Kiṭikāphalakaṃ akkhirakkhaṇatthāya ayalohādīhi jālākārena katvā sīsādīsu paṭimuñcitabbaṃ jālikaṃ nāma. Ādi-saddena kavacādikaṃ saṅgaṇhāti. Anāmāsānīti macchajālādiparūparodhaṃ sandhāya vuttaṃ, na saraparittāṇaṃ tassa āvudhabhaṇḍattābhāvā. Tena vakkhati ‘‘parūparodhanivāraṇañhī’’tiādi (vi. saṅga. aṭṭha. 43). Āsanassāti cetiyassasamantā kataparibhaṇḍassa. Bandhissāmīti kākādīnaṃ adūsanatthāya bandhissāmi.
‘‘бхзрисан̇гхаадод̇и сан̇гхадид̇ажаммабхзрий. вийн̣аасан̇гхаадод̇и сан̇гхадид̇ажаммавийн̣аа’’д̇и саарад̇т̇ад̣̇ийбанияам̣ (саарад̇т̇а. дий. 2.281) вуд̇д̇ам̣. ‘‘жаммавинад̣̇д̇хаа вийн̣аабхзриаад̣̇ийний’’д̇и махааадтагат̇ааяам̣ вуд̇д̇аважанад̇о висзсаабхааваа ‘‘гурунд̣̇ияам̣ банаа’’д̇иаад̣̇инаа д̇ад̇о висзсасса вад̇д̇умаарад̣̇д̇хад̇д̇аа жа бхзриаад̣̇ийнам̣ винад̣̇д̇хобагаран̣асамуухо бхзривийн̣аасан̇гхаадод̇и взд̣̇ид̇аб̣б̣о ‘‘сан̇гхадид̇аб̣б̣од̇и сан̇гхаадо’’д̇и гад̇ваа. д̇ужчабогкаранд̇и авинад̣̇д̇хажаммабхзривийн̣аанам̣ богкарам̣. ааробид̇ажамманд̇и буб̣б̣з ааробид̇ам̣ худ̇ваа бажчаа д̇ад̇о абанзд̇ваа висум̣ табид̇амукажаммамад̇д̇ам̣, на сзсобагаран̣асахид̇ам̣, д̇ам̣ бана сан̇гхаад̇од̇и аяам̣ висзсо. онахид̇унд̇и бхзрибогкараад̣̇ийни жаммам̣ ааробзд̇ваа жаммавад̣̇д̇хиаад̣̇ийхи саб̣б̣зхи убагаран̣зхи винанд̇хид̇ум̣. онахаабзд̇унд̇и д̇ат̇зва ан̃н̃зхи винанд̇хаабзд̇ум̣.
‘‘Bherisaṅghāṭoti saṅghaṭitacammabherī. Vīṇāsaṅghāṭoti saṅghaṭitacammavīṇā’’ti sāratthadīpaniyaṃ (sārattha. ṭī. 2.281) vuttaṃ. ‘‘Cammavinaddhā vīṇābheriādīnī’’ti mahāaṭṭhakathāyaṃ vuttavacanato visesābhāvā ‘‘kurundiyaṃ panā’’tiādinā tato visesassa vattumāraddhattā ca bheriādīnaṃ vinaddhopakaraṇasamūho bherivīṇāsaṅghāṭoti veditabbo ‘‘saṅghaṭitabboti saṅghāṭo’’ti katvā. Tucchapokkharanti avinaddhacammabherivīṇānaṃ pokkharaṃ. Āropitacammanti pubbe āropitaṃ hutvā pacchā tato apanetvā visuṃ ṭhapitamukhacammamattaṃ, na sesopakaraṇasahitaṃ, taṃ pana saṅghātoti ayaṃ viseso. Onahitunti bheripokkharādīni cammaṃ āropetvā cammavaddhiādīhi sabbehi upakaraṇehi vinandhituṃ. Onahāpetunti tatheva aññehi vinandhāpetuṃ.
ид̇и винаяасан̇г̇ахасам̣ван̣н̣анаабхууд̇з винаяаалан̇гаарз
Iti vinayasaṅgahasaṃvaṇṇanābhūte vinayālaṅkāre
анаамаасавинижчаяагат̇аалан̇гааро наама
Anāmāsavinicchayakathālaṅkāro nāma
сад̇д̇амо барижчзд̣̇о.
Sattamo paricchedo.
