| Library / Tipiṭaka / д̇ибидага • Tipiṭaka / винаяасан̇г̇аха-адтагат̇аа • Vinayasaṅgaha-aṭṭhakathā |
7. анаамаасавинижчаяагат̇аа
7. Anāmāsavinicchayakathā
40. анаамаасанд̇и на бараамасид̇аб̣б̣ам̣. д̇ад̇рааяам̣ винижчаяо (баараа. адта. 2.281) – яасмаа маад̇аа ваа ход̇у д̇хийд̇аа ваа бхаг̇иний ваа, ид̇т̇ий наама саб̣б̣ааби б̣рахмажарияасса баариб̣ант̇игаава анаамаасаа жа, д̇асмаа ‘‘аяам̣ мз маад̇аа, аяам̣ мз д̇хийд̇аа, аяам̣ мз бхаг̇иний’’д̇и г̇зхассид̇абзмзна аамасад̇оби д̣̇уггадамзва вуд̇д̇ам̣. имам̣ бана бхаг̇авад̇о аан̣ам̣ ануссаранд̇зна сажзби над̣̇ийсод̇зна вуяхамаанам̣ маад̇арам̣ бассад̇и, нзва хад̇т̇зна бараамасид̇аб̣б̣аа, бан̣д̣ид̇зна бана бхигкунаа нааваа ваа палагам̣ ваа гад̣̇алигканд̇хо ваа д̣̇ааругканд̇хо ваа убасам̣харид̇аб̣б̣о. д̇асмим̣ асад̇и гаасаавамби убасам̣харид̇ваа бурад̇о табзд̇аб̣б̣ам̣, ‘‘зд̇т̇а г̇ан̣хаахий’’д̇и бана на вад̇д̇аб̣б̣аа. г̇ахид̇з ‘‘баригкаарам̣ гад̣дхаамий’’д̇и гад̣дханд̇зна г̇анд̇аб̣б̣ам̣. сажз бана бхааяад̇и, бурад̇о бурад̇о г̇анд̇ваа ‘‘маа бхааяий’’д̇и самассаасзд̇аб̣б̣аа. сажз бхааяамаанаа буд̇д̇асса сахасаа канд̇хз ваа абхирухад̇и, хад̇т̇з ваа г̇ан̣хаад̇и, на ‘‘абзхи махаллигз’’д̇и нид̣̇д̇хунид̇аб̣б̣аа, т̇алам̣ баабзд̇аб̣б̣аа. гад̣̇д̣̇амз лаг̇г̇ааяаби гуубз бад̇ид̇ааяаби зсзва наяо. д̇ад̇рааби хи яод̇д̇ам̣ ваа вад̇т̇ам̣ ваа багкибид̇ваа хад̇т̇зна г̇ахид̇абхаавам̣ н̃ад̇ваа уд̣̇д̇харид̇аб̣б̣аа, на д̇взва аамасид̇аб̣б̣аа.
40.Anāmāsanti na parāmasitabbaṃ. Tatrāyaṃ vinicchayo (pārā. aṭṭha. 2.281) – yasmā mātā vā hotu dhītā vā bhaginī vā, itthī nāma sabbāpi brahmacariyassa pāribanthikāva anāmāsā ca, tasmā ‘‘ayaṃ me mātā, ayaṃ me dhītā, ayaṃ me bhaginī’’ti gehassitapemena āmasatopi dukkaṭameva vuttaṃ. Imaṃ pana bhagavato āṇaṃ anussarantena sacepi nadīsotena vuyhamānaṃ mātaraṃ passati, neva hatthena parāmasitabbā, paṇḍitena pana bhikkhunā nāvā vā phalakaṃ vā kadalikkhandho vā dārukkhandho vā upasaṃharitabbo. Tasmiṃ asati kāsāvampi upasaṃharitvā purato ṭhapetabbaṃ, ‘‘ettha gaṇhāhī’’ti pana na vattabbā. Gahite ‘‘parikkhāraṃ kaḍḍhāmī’’ti kaḍḍhantena gantabbaṃ. Sace pana bhāyati, purato purato gantvā ‘‘mā bhāyī’’ti samassāsetabbā. Sace bhāyamānā puttassa sahasā khandhe vā abhiruhati, hatthe vā gaṇhāti, na ‘‘apehi mahallike’’ti niddhunitabbā, thalaṃ pāpetabbā. Kaddame laggāyapi kūpe patitāyapi eseva nayo. Tatrāpi hi yottaṃ vā vatthaṃ vā pakkhipitvā hatthena gahitabhāvaṃ ñatvā uddharitabbā, na tveva āmasitabbā.
на гзвалан̃жа маад̇уг̇аамасса сарийрамзва анаамаасам̣, ниваасанабаарубанамби аабхаран̣абхан̣д̣амби анд̇амасо д̇ин̣ан̣д̣убагам̣ ваа д̇аалабан̣н̣амуд̣̇д̣̇игам̣ ваа убаад̣̇ааяа анаамаасамзва. д̇ан̃жа ко ниваасанабаавуран̣ам̣ бил̣анд̇ханад̇т̇ааяа табид̇амзва. сажз бана ниваасанам̣ ваа баарубанам̣ ваа баривад̇д̇зд̇ваа жийварад̇т̇ааяа баад̣̇амуулз табзд̇и, ваддад̇и. аабхаран̣абхан̣д̣зсу бана сийсабасаад̇ханад̣̇анд̇асуужиаад̣̇игаббияабхан̣д̣ам̣ ‘‘имам̣, бханд̇з, д̇умхаагам̣ д̣̇зма, г̇ан̣хат̇аа’’д̇и д̣̇ийяамаанам̣ сибаадигаасуужиаад̣̇иубагаран̣ад̇т̇ааяа г̇ахзд̇аб̣б̣ам̣. суван̣н̣араж̇ад̇амуд̇д̇аад̣̇имаяам̣ бана анаамаасамзва, д̣̇ийяамаанамби на г̇ахзд̇аб̣б̣ам̣. на гзвалан̃жа зд̇аасам̣ сарийруубаг̇амзва анаамаасам̣, ид̇т̇исан̣таанзна гад̇ам̣ гадтаруубамби д̣̇анд̇аруубамби аяаруубамби лохаруубамби д̇ибуруубамби бод̇т̇агаруубамби саб̣б̣арад̇анаруубамби анд̇амасо бидтамаяаруубамби анаамаасамзва. барибхог̇ад̇т̇ааяа бана ‘‘ид̣̇ам̣ д̇умхаагам̣ ход̇уу’’д̇и лабхид̇ваа табзд̇ваа саб̣б̣арад̇анамаяам̣ авасзсам̣ бхинд̣̇ид̇ваа убагаран̣аарахам̣ убагаран̣з, барибхог̇аарахам̣ барибхог̇з убанзд̇ум̣ ваддад̇и.
Na kevalañca mātugāmassa sarīrameva anāmāsaṃ, nivāsanapārupanampi ābharaṇabhaṇḍampi antamaso tiṇaṇḍupakaṃ vā tālapaṇṇamuddikaṃ vā upādāya anāmāsameva. Tañca kho nivāsanapāvuraṇaṃ piḷandhanatthāya ṭhapitameva. Sace pana nivāsanaṃ vā pārupanaṃ vā parivattetvā cīvaratthāya pādamūle ṭhapeti, vaṭṭati. Ābharaṇabhaṇḍesu pana sīsapasādhanadantasūciādikappiyabhaṇḍaṃ ‘‘imaṃ, bhante, tumhākaṃ dema, gaṇhathā’’ti dīyamānaṃ sipāṭikāsūciādiupakaraṇatthāya gahetabbaṃ. Suvaṇṇarajatamuttādimayaṃ pana anāmāsameva, dīyamānampi na gahetabbaṃ. Na kevalañca etāsaṃ sarīrūpagameva anāmāsaṃ, itthisaṇṭhānena kataṃ kaṭṭharūpampi dantarūpampi ayarūpampi loharūpampi tipurūpampi potthakarūpampi sabbaratanarūpampi antamaso piṭṭhamayarūpampi anāmāsameva. Paribhogatthāya pana ‘‘idaṃ tumhākaṃ hotū’’ti labhitvā ṭhapetvā sabbaratanamayaṃ avasesaṃ bhinditvā upakaraṇārahaṃ upakaraṇe, paribhogārahaṃ paribhoge upanetuṃ vaṭṭati.
41. яат̇аа жа ид̇т̇ируубагам̣, звам̣ сад̇д̇авид̇хам̣ д̇хан̃н̃амби анаамаасамзва. д̇асмаа кзд̇д̇амаж̇жхзна г̇ажчанд̇зна д̇ад̇т̇аж̇аад̇агамби д̇хан̃н̃апалам̣ на аамасанд̇зна г̇анд̇аб̣б̣ам̣. сажз гхарад̣̇ваарз ваа анд̇араамаг̇г̇з ваа д̇хан̃н̃ам̣ басаарид̇ам̣ ход̇и, бассзна жа маг̇г̇о ад̇т̇и, на мад̣̇д̣̇анд̇зна г̇анд̇аб̣б̣ам̣. г̇аманамаг̇г̇з асад̇и маг̇г̇ам̣ ад̇хидтааяа г̇анд̇аб̣б̣ам̣. анд̇арагхарз д̇хан̃н̃асса убари аасанам̣ бан̃н̃абзд̇ваа д̣̇знд̇и, нисийд̣̇ид̇ум̣ ваддад̇и. гзжи аасанасаалааяа д̇хан̃н̃ам̣ аагиранд̇и, сажз саггаа ход̇и хараабзд̇ум̣, хараабзд̇аб̣б̣ам̣. но жз, згаманд̇ам̣ д̇хан̃н̃ам̣ амад̣̇д̣̇анд̇зна бийтагам̣ бан̃н̃абзд̇ваа нисийд̣̇ид̇аб̣б̣ам̣. сажз огаасо на ход̇и, мануссаа д̇хан̃н̃амаж̇жхзязва бан̃н̃абзд̇ваа д̣̇знд̇и, нисийд̣̇ид̇аб̣б̣ам̣. д̇ад̇т̇аж̇аад̇агаани муг̇г̇амаасаад̣̇ийни абаран̣н̣ааниби д̇аалабанасаад̣̇ийни ваа палаани гийл̣анд̇зна на аамасид̇аб̣б̣аани. мануссзхи раасигад̇зсуби зсзва наяо. аран̃н̃з бана ругкад̇о бад̇ид̇аани палаани ‘‘анубасамбаннаанам̣ д̣̇ассаамий’’д̇и г̇ан̣хид̇ум̣ ваддад̇и.
41. Yathā ca itthirūpakaṃ, evaṃ sattavidhaṃ dhaññampi anāmāsameva. Tasmā khettamajjhena gacchantena tatthajātakampi dhaññaphalaṃ na āmasantena gantabbaṃ. Sace gharadvāre vā antarāmagge vā dhaññaṃ pasāritaṃ hoti, passena ca maggo atthi, na maddantena gantabbaṃ. Gamanamagge asati maggaṃ adhiṭṭhāya gantabbaṃ. Antaraghare dhaññassa upari āsanaṃ paññapetvā denti, nisīdituṃ vaṭṭati. Keci āsanasālāya dhaññaṃ ākiranti, sace sakkā hoti harāpetuṃ, harāpetabbaṃ. No ce, ekamantaṃ dhaññaṃ amaddantena pīṭhakaṃ paññapetvā nisīditabbaṃ. Sace okāso na hoti, manussā dhaññamajjheyeva paññapetvā denti, nisīditabbaṃ. Tatthajātakāni muggamāsādīni aparaṇṇānipi tālapanasādīni vā phalāni kīḷantena na āmasitabbāni. Manussehi rāsikatesupi eseva nayo. Araññe pana rukkhato patitāni phalāni ‘‘anupasampannānaṃ dassāmī’’ti gaṇhituṃ vaṭṭati.
42. муд̇д̇аа ман̣и взл̣урияо сан̇ко силаа баваал̣ам̣ раж̇ад̇ам̣ ж̇аад̇аруубам̣ лохид̇ан̇го масаараг̇алланд̇и имзсу д̣̇асасу рад̇анзсу муд̇д̇аа ад̇ход̇аа авид̣̇д̇хаа яат̇ааж̇аад̇аава аамасид̇ум̣ ваддад̇и, сзсаа анаамаасаад̇и вад̣̇анд̇и, д̇ам̣ на г̇ахзд̇аб̣б̣ам̣. махаабажжарияам̣ бана ‘‘муд̇д̇аа д̇ход̇ааби ад̇ход̇ааби анаамаасаа, бхан̣д̣амуулад̇т̇ааяа жа самбадижчид̇ум̣ на ваддад̇и, гудтарог̇асса бхзсаж̇ж̇ад̇т̇ааяа бана ваддад̇ий’’д̇и вуд̇д̇ам̣, д̇ам̣ яуд̇д̇ам̣. анд̇амасо ж̇аад̇ипалигам̣ убаад̣̇ааяа саб̣б̣оби нийлабийд̇аад̣̇иван̣н̣абхзд̣̇о ман̣и д̇ход̇авид̣̇д̇хаваддид̇о анаамаасо, яат̇ааж̇аад̇о бана аагарамуд̇д̇о бад̇д̇аад̣̇ибхан̣д̣амуулад̇т̇ам̣ самбадижчид̇ум̣ ваддад̇ийд̇и вуд̇д̇ам̣, д̇амби махаабажжарияам̣ бадигкид̇д̇ам̣. бажид̇ваа гад̇о гаажаман̣иязвзго ваддад̇ийд̇и вуд̇д̇ам̣. взл̣уриязби ман̣исад̣̇исова винижчаяо.
42. Muttā maṇi veḷuriyo saṅkho silā pavāḷaṃ rajataṃ jātarūpaṃ lohitaṅko masāragallanti imesu dasasu ratanesu muttā adhotā aviddhā yathājātāva āmasituṃ vaṭṭati, sesā anāmāsāti vadanti, taṃ na gahetabbaṃ. Mahāpaccariyaṃ pana ‘‘muttā dhotāpi adhotāpi anāmāsā, bhaṇḍamūlatthāya ca sampaṭicchituṃ na vaṭṭati, kuṭṭharogassa bhesajjatthāya pana vaṭṭatī’’ti vuttaṃ, taṃ yuttaṃ. Antamaso jātiphalikaṃ upādāya sabbopi nīlapītādivaṇṇabhedo maṇi dhotaviddhavaṭṭito anāmāso, yathājāto pana ākaramutto pattādibhaṇḍamūlatthaṃ sampaṭicchituṃ vaṭṭatīti vuttaṃ, tampi mahāpaccariyaṃ paṭikkhittaṃ. Pacitvā kato kācamaṇiyeveko vaṭṭatīti vuttaṃ. Veḷuriyepi maṇisadisova vinicchayo.
сан̇ко д̇хаманасан̇ко жа д̇ход̇авид̣̇д̇хо жа рад̇анамиссо анаамаасо, баанийяасан̇ко д̇ход̇оби ад̇ход̇оби аамаасова. сзсан̃жа ан̃ж̇анаад̣̇ибхзсаж̇ж̇ад̇т̇ааяаби бхан̣д̣амуулад̇т̇ааяаби самбадижчид̇ум̣ ваддад̇и. силаа д̇ход̇авид̣̇д̇хаа рад̇анасам̣яуд̇д̇аа муг̇г̇аван̣н̣аава анаамаасаа, сзсаа сад̇т̇аганигхам̣санаад̣̇иад̇т̇ааяа г̇ан̣хид̇ум̣ ваддад̇и. зд̇т̇а жа рад̇анасам̣яуд̇д̇аад̇и суван̣н̣зна сад̣̇д̇хим̣ яож̇зд̇ваа бажид̇ваа гад̇аад̇и вад̣̇анд̇и. баваал̣ам̣ д̇ход̇авид̣̇д̇хам̣ анаамаасам̣, сзсам̣ аамаасан̃жа бхан̣д̣амуулад̇т̇ан̃жа самбадижчид̇ум̣ ваддад̇ийд̇и вад̣̇анд̇и, д̇ам̣ на г̇ахзд̇аб̣б̣ам̣ . махаабажжарияам̣ бана ‘‘д̇ход̇амби ад̇ход̇амби саб̣б̣ам̣ анаамаасан̃жа на жа самбадижчид̇ум̣ ваддад̇ий’’д̇и вуд̇д̇ам̣, д̇ам̣ яуд̇д̇ам̣.
Saṅkho dhamanasaṅkho ca dhotaviddho ca ratanamisso anāmāso, pānīyasaṅkho dhotopi adhotopi āmāsova. Sesañca añjanādibhesajjatthāyapi bhaṇḍamūlatthāyapi sampaṭicchituṃ vaṭṭati. Silā dhotaviddhā ratanasaṃyuttā muggavaṇṇāva anāmāsā, sesā satthakanighaṃsanādiatthāya gaṇhituṃ vaṭṭati. Ettha ca ratanasaṃyuttāti suvaṇṇena saddhiṃ yojetvā pacitvā katāti vadanti. Pavāḷaṃ dhotaviddhaṃ anāmāsaṃ, sesaṃ āmāsañca bhaṇḍamūlatthañca sampaṭicchituṃ vaṭṭatīti vadanti, taṃ na gahetabbaṃ . Mahāpaccariyaṃ pana ‘‘dhotampi adhotampi sabbaṃ anāmāsañca na ca sampaṭicchituṃ vaṭṭatī’’ti vuttaṃ, taṃ yuttaṃ.
раж̇ад̇ан̃жа ж̇аад̇аруубан̃жа гад̇абхан̣д̣амби агад̇абхан̣д̣амби саб̣б̣зна саб̣б̣ам̣ б̣ийж̇ад̇о бадтааяа анаамаасан̃жа асамбадижчанийяан̃жа. уд̇д̇арарааж̇абуд̇д̇о гира суван̣н̣ажзд̇ияам̣ гаараабзд̇ваа махаабад̣̇умад̇т̇зрасса бзсзси. т̇зро ‘‘на габбад̇ий’’д̇и бадигкиби. жзд̇ияагхарз суван̣н̣абад̣̇умасуван̣н̣аб̣уб̣б̣ул̣агаад̣̇ийни хонд̇и, зд̇ааниби анаамаасаани. жзд̇ияагхараг̇обагаа бана руубияачад̣д̣агадтаанз тид̇аа , д̇асмаа д̇зсам̣ гзл̣аабаяид̇ум̣ ваддад̇ийд̇и вуд̇д̇ам̣. гурунд̇хияам̣ бана д̇амби бадигкид̇д̇ам̣, суван̣н̣ажзд̇ияз гажаварамзва харид̇ум̣ ваддад̇ийд̇и зд̇д̇агамзва анун̃н̃аад̇ам̣. аарагуудалохамби ж̇аад̇аруубаг̇ад̇игамзва анаамаасанд̇и саб̣б̣адтагат̇аасу вуд̇д̇ам̣. сзнаасанабарибхог̇з бана саб̣б̣оби габбияо, д̇асмаа ж̇аад̇аруубараж̇ад̇амаяаа саб̣б̣зби сзнаасанабаригкаараа аамаасаа, бхигкуунам̣ д̇хаммавинаяаван̣н̣анадтаанз рад̇анаман̣д̣абз гаронд̇и палигад̇т̇амбхз рад̇анад̣̇аамабадиман̣д̣ид̇з, д̇ад̇т̇а саб̣б̣уубагаран̣аани бхигкуунам̣ бадиж̇аг̇г̇ид̇ум̣ вадданд̇и. лохид̇ан̇гамасаараг̇аллаа д̇ход̇авид̣̇д̇хаа анаамаасаа, ид̇арз аамаасаа, бхан̣д̣амуулад̇т̇ааяа жа самбадижчид̇ум̣ ваддад̇ийд̇и вуд̇д̇ам̣. махаабажжарияам̣ бана ‘‘д̇ход̇ааби ад̇ход̇ааби саб̣б̣асо анаамаасаа, на жа самбадижчид̇ум̣ вадданд̇ий’’д̇и бадигкид̇д̇ам̣.
Rajatañca jātarūpañca katabhaṇḍampi akatabhaṇḍampi sabbena sabbaṃ bījato paṭṭhāya anāmāsañca asampaṭicchanīyañca. Uttararājaputto kira suvaṇṇacetiyaṃ kārāpetvā mahāpadumattherassa pesesi. Thero ‘‘na kappatī’’ti paṭikkhipi. Cetiyaghare suvaṇṇapadumasuvaṇṇabubbuḷakādīni honti, etānipi anāmāsāni. Cetiyagharagopakā pana rūpiyachaḍḍakaṭṭhāne ṭhitā , tasmā tesaṃ keḷāpayituṃ vaṭṭatīti vuttaṃ. Kurundhiyaṃ pana tampi paṭikkhittaṃ, suvaṇṇacetiye kacavarameva harituṃ vaṭṭatīti ettakameva anuññātaṃ. Ārakūṭalohampi jātarūpagatikameva anāmāsanti sabbaṭṭhakathāsu vuttaṃ. Senāsanaparibhoge pana sabbopi kappiyo, tasmā jātarūparajatamayā sabbepi senāsanaparikkhārā āmāsā, bhikkhūnaṃ dhammavinayavaṇṇanaṭṭhāne ratanamaṇḍape karonti phalikatthambhe ratanadāmapaṭimaṇḍite, tattha sabbūpakaraṇāni bhikkhūnaṃ paṭijaggituṃ vaṭṭanti. Lohitaṅkamasāragallā dhotaviddhā anāmāsā, itare āmāsā, bhaṇḍamūlatthāya ca sampaṭicchituṃ vaṭṭatīti vuttaṃ. Mahāpaccariyaṃ pana ‘‘dhotāpi adhotāpi sabbaso anāmāsā, na ca sampaṭicchituṃ vaṭṭantī’’ti paṭikkhittaṃ.
43. саб̣б̣ам̣ аавуд̇хабхан̣д̣ам̣ анаамаасам̣, бхан̣д̣амуулад̇т̇ааяа д̣̇ийяамаанамби на самбадижчид̇аб̣б̣ам̣. сад̇т̇аван̣иж̇ж̇аа наама на ваддад̇и. суд̣̇д̇хад̇хануд̣̇ан̣д̣оби д̇хануж̇ияааби бад̇од̣̇оби д̇омароби ан̇гусоби анд̇амасо ваасипарасуаад̣̇ийниби аавуд̇хасан̇кзбзна гад̇аани анаамаасаани. сажз гзнажи вихаарз сад̇д̇и ваа д̇омаро ваа табид̇о ход̇и, вихаарам̣ ж̇аг̇г̇анд̇зна ‘‘харанд̇уу’’д̇и саамигаанам̣ бзсзд̇аб̣б̣ам̣. сажз на харанд̇и, д̇ам̣ ажаалзнд̇зна вихааро бадиж̇аг̇г̇ид̇аб̣б̣о. яуд̣̇д̇хабхуумияам̣ бана бад̇ид̇ам̣ асим̣ ваа сад̇д̇им̣ ваа д̇омарам̣ ваа д̣̇исваа баасаан̣зна ваа гзнажи ваа асим̣ бхинд̣̇ид̇ваа сад̇т̇агад̇т̇ааяа г̇ахзд̇ум̣ ваддад̇и. ид̇арааниби вияож̇зд̇ваа гин̃жи сад̇т̇агад̇т̇ааяа, гин̃жи гад̇д̇арад̣̇ан̣д̣аад̣̇иад̇т̇ааяа г̇ахзд̇ум̣ ваддад̇и. ‘‘ид̣̇ам̣ г̇ан̣хат̇аа’’д̇и д̣̇ийяамаанам̣ бана винаасзд̇ваа ‘‘габбияабхан̣д̣ам̣ гариссаамий’’д̇и саб̣б̣амби самбадижчид̇ум̣ ваддад̇и.
43. Sabbaṃ āvudhabhaṇḍaṃ anāmāsaṃ, bhaṇḍamūlatthāya dīyamānampi na sampaṭicchitabbaṃ. Satthavaṇijjā nāma na vaṭṭati. Suddhadhanudaṇḍopi dhanujiyāpi patodopi tomaropi aṅkusopi antamaso vāsipharasuādīnipi āvudhasaṅkhepena katāni anāmāsāni. Sace kenaci vihāre satti vā tomaro vā ṭhapito hoti, vihāraṃ jaggantena ‘‘harantū’’ti sāmikānaṃ pesetabbaṃ. Sace na haranti, taṃ acālentena vihāro paṭijaggitabbo. Yuddhabhūmiyaṃ pana patitaṃ asiṃ vā sattiṃ vā tomaraṃ vā disvā pāsāṇena vā kenaci vā asiṃ bhinditvā satthakatthāya gahetuṃ vaṭṭati. Itarānipi viyojetvā kiñci satthakatthāya, kiñci kattaradaṇḍādiatthāya gahetuṃ vaṭṭati. ‘‘Idaṃ gaṇhathā’’ti dīyamānaṃ pana vināsetvā ‘‘kappiyabhaṇḍaṃ karissāmī’’ti sabbampi sampaṭicchituṃ vaṭṭati.
мажчаж̇аалабагкиж̇аалаад̣̇ийниби палагаж̇аалигаад̣̇ийниби сарабарид̇д̇аан̣ааниби саб̣б̣аани анаамаасаани, барибхог̇ад̇т̇ааяа лаб̣бхамаанзсу бана ж̇аалам̣ д̇аава ‘‘аасанасса ваа жзд̇ияасса ваа убари б̣анд̇хиссаами, чад̇д̇ам̣ ваа взтзссаамий’’д̇и г̇ахзд̇ум̣ ваддад̇и. сарабарид̇д̇аан̣ам̣ саб̣б̣амби бхан̣д̣амуулад̇т̇ааяа самбадижчид̇ум̣ ваддад̇и. баруубарод̇ханивааран̣ан̃хи зд̇ам̣, на убарод̇хагаранд̇и. палагам̣ ‘‘д̣̇анд̇агадтабхааж̇анам̣ гариссаамий’’д̇и г̇ахзд̇ум̣ ваддад̇и.
Macchajālapakkhijālādīnipi phalakajālikādīnipi saraparittāṇānipi sabbāni anāmāsāni, paribhogatthāya labbhamānesu pana jālaṃ tāva ‘‘āsanassa vā cetiyassa vā upari bandhissāmi, chattaṃ vā veṭhessāmī’’ti gahetuṃ vaṭṭati. Saraparittāṇaṃ sabbampi bhaṇḍamūlatthāya sampaṭicchituṃ vaṭṭati. Parūparodhanivāraṇañhi etaṃ, na uparodhakaranti. Phalakaṃ ‘‘dantakaṭṭhabhājanaṃ karissāmī’’ti gahetuṃ vaṭṭati.
жаммавинад̣̇д̇хаани вийн̣аабхзриаад̣̇ийни анаамаасаани. гурунд̣̇ияам̣ бана ‘‘бхзрисан̇гхаадоби вийн̣аасан̇гхаадоби д̇ужчабогкарамби мукаваддияам̣ ааробид̇ажаммамби вийн̣аад̣̇ан̣д̣агоби саб̣б̣ам̣ анаамааса’’нд̇и вуд̇д̇ам̣. онахид̇ум̣ ваа онахаабзд̇ум̣ ваа ваад̣̇зд̇ум̣ ваа ваад̣̇аабзд̇ум̣ ваа на лаб̣бхад̇иязва. жзд̇ияан̇г̇ан̣з бууж̇ам̣ гад̇ваа мануссзхи чад̣д̣ид̇ам̣ д̣̇исвааби ажаалзд̇ваава анд̇аранд̇арз саммаж̇ж̇ид̇аб̣б̣ам̣, гажаварачад̣д̣анагаалз бана гажаваранияаамзнзва харид̇ваа згаманд̇ам̣ нигкибид̇ум̣ ваддад̇ийд̇и махаабажжарияам̣ вуд̇д̇ам̣. бхан̣д̣амуулад̇т̇ааяа самбадижчид̇умби ваддад̇и, барибхог̇ад̇т̇ааяа лаб̣бхамаанзсу бана вийн̣аад̣̇он̣иган̃жа бхзрибогкаран̃жа д̣̇анд̇агадтабхааж̇анам̣ гариссаама, жаммам̣ сад̇т̇агагосаганд̇и звам̣ д̇асса д̇асса баригкаарасса убагаран̣ад̇т̇ааяа г̇ахзд̇ваа д̇ат̇аа д̇ат̇аа гаад̇ум̣ ваддад̇и.
Cammavinaddhāni vīṇābheriādīni anāmāsāni. Kurundiyaṃ pana ‘‘bherisaṅghāṭopi vīṇāsaṅghāṭopi tucchapokkharampi mukhavaṭṭiyaṃ āropitacammampi vīṇādaṇḍakopi sabbaṃ anāmāsa’’nti vuttaṃ. Onahituṃ vā onahāpetuṃ vā vādetuṃ vā vādāpetuṃ vā na labbhatiyeva. Cetiyaṅgaṇe pūjaṃ katvā manussehi chaḍḍitaṃ disvāpi acāletvāva antarantare sammajjitabbaṃ, kacavarachaḍḍanakāle pana kacavaraniyāmeneva haritvā ekamantaṃ nikkhipituṃ vaṭṭatīti mahāpaccariyaṃ vuttaṃ. Bhaṇḍamūlatthāya sampaṭicchitumpi vaṭṭati, paribhogatthāya labbhamānesu pana vīṇādoṇikañca bheripokkharañca dantakaṭṭhabhājanaṃ karissāma, cammaṃ satthakakosakanti evaṃ tassa tassa parikkhārassa upakaraṇatthāya gahetvā tathā tathā kātuṃ vaṭṭati.
ид̇и баал̣имуд̇д̇агавинаяавинижчаяасан̇г̇ахз
Iti pāḷimuttakavinayavinicchayasaṅgahe
анаамаасавинижчаяагат̇аа самад̇д̇аа.
Anāmāsavinicchayakathā samattā.
